ياريتني كنت عنزه عمريه ولا ...خروفايه استراليه

السلام عليكم يا ايها المدونين والمدونات والزائرين والزائرات وبعد :

الاول احب اقول لكل الي تعاطف مع مبتلانا فى محمد وكل الى دعالنا ودعا لمحمد بالشفا متشكره جدا جدا وربنا يجعل الدعاء مقبول ان شاء الله ويرد عليكم بالخير باذن الله وحقيقى ممتنه لكم جميعا ولاهتمامكم
واطمنكم على محمد الحمد لله هو بيتحسن والدكاتره بيقولوا انت التحاليل فيها تقدم ملموس فعلا من العلاج وانه هايخرج من المستشفى بعد عشره ايام على الاكثر .ويبقى متابعه بعد كده تتباعد تدريجيا . وتاني شكرا لكم جميعا .

نعود بقى مره تانيه للرغي عشان كفايه عليكم كده اكتئاب مني هحاول اكون مش مش مكتئبه .

الحقيقه انا فى حاجه كده دايما باقولها لنفسي وقلت ابطل اكلم نفسي بقى عشان مش حلو علشاني ممكن تقلب معايا جنان اكتر من كده .

انتم عارفين ان انا غاويه دعبسه فى الكتب والموضوعات والى باوصله من الدعبسه دي باكتبها واحفظها عندي . وكان منها شوية قصص كده كنت قريتهم من حياة عمر بن الخطاب رضي الله عنه . شوفوا بقى بس بالراحله على اعصابكم

عن على بن ابى طال انه رأى عمر يجرى وراء بعير فسأله الى اين يا امير المؤمنين .فقال عمر :بعير ند من ابل الصدقه اطلبه. يقول على : لقد اتعبت الذين سيجيئون بعدك . فيجيبه عمر : والذى بعث محمد بالحق لو أن عنزا ذهبت بشاطيء الفرات لأخذ بها عمر يوم القيامه.

تعديل : توضيحا للروايه السابقه هانقولها بلدي عشان خاطر المؤسسه الخيخيه اعترض : الموضوع ان الحاج علي ده بيقول ان شاف عمر بن الخطاب بيجري ورا جمل من جمال الصدقه فقاله على فين يا امير المؤمنين قاله : ده جمل شطح من جمال الصدقه رايح اجيبه . فاقاله علي : انت هاتتعب ال هايجي من بعدك يا عمر ( يعنى عشان مش هايعرفوا يعملوا زيه ) فعمر بيحلف بالله الذى بعث محمد بالحق ان لو معزه راحت كده ولا كده بشاطيء الفرات ( اخر الدنيا يعنى ) عمر يتحاسب عليها يوم القيامه .

طب بذمتكم مش نفسكم تبقوا معزه من معيز عمر تلاقوا حد يحمل همكم وهو فى اخر الدنيا ؟؟

كل ما اعدي على القصه دي اقول يا حلاوه هو فى كده ؟؟ امال احنا ليه يعنى خير اللهم اجعله خير ما حدش سائل فينا ؟؟

متفرقين على الارض يمينا ويسارا وما حدش معبرنا الى فى معتقل والى فى سجن والى مش لاقي ياكل حتى الى مش فى اخر الدنيا الى فى البلد نفسها برضه ما حدش بيفكر فيهم اصلااااا . نفسي حد يفكر فينا يا جماعه كأننا معزه من معيز عمر كتير ولا ايه ؟؟؟

فى نفس ذات الوقت بقى يا كتاكيت لما اقرا القصه دي افتكر خبر كده كنت قريته السنه الى فاتت قبل العيد الكبير فى الجرنال . والله ما اول ما قريته رجعت قريته تاني واقول ايه ده هو بصحيح ولا ايه ؟؟؟

اليكم بقى الخبر بس الى المراره عنده فيها مشاكل يحاسب على نفسه وصحته :

استراليا ترسل لجنه لمعاينة الاحوال عندنا فى مصر والتأكد من اننا هانعامل الخرفان بتاعتها الى بنستوردها منهم كويس قبل الدبح وبعد الدبح ..!!!!!!!!!!!!! وكمالة الخبر بقى انهم الحمد لله لقونا مؤدبين ومحترمين وولاد ناس وبنكرم الخرفان ونعاملهم احسن معامله ومشيوا من عندنا وهما بيقولوا زي بعضه هانجيبلكم خرفان السنه الجايه وعليكم خير !!!!

طب بالذمه مش حرام عليهم ينشروا الخبر ده فى الجرنال ؟؟؟ ايه تقليب المواجع ده ؟؟؟ ما تخلوا الناس فى حالها ساكته وصابره على نفسها . مش كفايه ان احنا هانتنيل نجيب خرفان من بره . مع عندنا منهم كتيييييييير يا ابويا وقاعدين وكابسين على مراوحنا والواحد فيهم بقى اد الجموسه من كتر ما كل من لحمنا ؟؟؟

طب احنا ما حدش ليه بيفكر فينا يا ولاد مش برضه انتم زيي نفسكم تبقوا عنزه من عنزات عمر او خروفايه استرالي ؟؟؟

بس كده كفايه عشان العيال سايباهم فى البانيو زمانهم باشوا .

شوفوا اخر موضوعات الرؤيه الاسلاميه المتواضعه

شارب الخمر (الجزء الأول )

مستشفى سرطان الاطفال .... الى جايه من الفضاء

سلام عليكم يا اخواني:

عارفه انى اثقلت عليكم فى البوست الى فات بس معلش بقى مافيش قدامي الاكم حظكم كده . والف الف شكر لكل الناس الى بجد حسيت بمشاعرهم الحلوه وعواتهم لمحمد ولينا كلنا واتمنى ربنا يتقبل منا ومنكم .

انا النهارده عايزه احكيلكم على مستشفى 57357 لعلاج سرطان الاطفال احقاقا للحق وتقديرا للمستشفى والقائمين عليها والى بنوها اصلا .
انا لسه ما روحتش هناك بس لما رضا جه طبعا قعدته وشربته شاي تقيل عشان يفوووق ويحكيلى تفاصيل اليوم الفظيع كله من اول ما خرج من هنا الساعه 8 صباحا لحد ما رجع الساعه 12 بالليل من القاهره .

عن مستشفى 57357 بقى حكالي الآتي :
اولا المبنى اساسا من بره شكله رائع وجميل جدا تحس انه كمان طالع لوحده كده مكان مش بتاعه كأنه حته مثلا واقعه من الفضاء .

من الداخل بقى نظافه على حد قوله ما شافهاش فى اي مكان راحه حتى بره مصر ( رضا كان عمل تشيك فى مستشفى فى سويسرا كانت بتتعالج فيها الشيخه فاطمه زوجة الشيخ زايد الله يرحمه وهو كان المحاسب معاها هناك ) قالي انظف من المستشفى الى أنا دخلتها هناك فى سويسرا برضه .

واهم حاجه بقى الى رضا قالها وعاجباني وغايظاني من باقي المستشفيات جدا . العاملين فى المستشفى . ناس فى منتهى االاحترام . تنفيذ تعليمات صارمه جدا وملتزمه جدا مع وجود الانسانيه والرحمه والتعاطف مع المريض واهله .
من اول الحرس الى بره لحد الدكاتره طبعا والممرضات وكل الناس هناك .

نظافه والتزام بتطهير المكان كله فى اول كل ورديه ودكاتره محترمين وكبار وسماهم على وجوههم كده انهم بيفهموا .
بجد كل من راح هناك بيقول فى المستشفى دي كلام جميل اوي يا جماعه الى فى ايده مساعده لهم يساعدهم ويدعي لهم .
احب اقولكم ان احنا عندنا فى المنصوره مركز جديد بشوكه لسه لعلاج الاورام . وراحوه قبل ما يروحوا مصر . وقفوا الواد فى الشارع مش عايزين يجبولوا كرسي حتى عشان مش عارفه عايزين تذكره ولا مش عارف ايه . وقلة ادب وتناحه وصفاقه وقلة رحمه تماما بالمرضى .
خلي بالكم ما عندناش فى المنصوره تقريبا مستشفيات خاصه عندها الامكانيات لعلاج النوع ده . يعنى ده المفروض انه ملجأ الجميع .
والحمد لله ان هما ربنا هداهم وسمعوا الكلام وراحوا المستشفى دي .

السؤال بقى الى هايجننى ........

يا ترى الهيئه الخيريه الى بنت المستشفى دي اقوى واغنى من الدوله ؟؟؟؟

لما احنا محترمين ونقدر اننا نكون محترمين الى بيخلينا فى المؤسسات الحكومه بالمنظر الحقير ده ؟؟؟؟

انا مش باطالب ا بدا بان المؤسسات الحكوميه تكون على نفس مستوى التكاليف
يا سيدى مش مهم التكاااااااااليف فعلا المستشفى دي متكلفه جامد اوي.

خلينا فى المباني المهكعه الحكوميه والبلاط حتى يا سيدى العادي مش مشكلللللللللله . لكن النظام والاداره دي احنا عاجزين عنها ليه ؟؟؟

الكوادر الفنيه زي الزفت ليه ؟؟؟؟ والممرضين والممرضات عاملين شبه الجزارين وابشع ليه ؟؟؟؟؟

الحرس عاملين زي الى واقفين بيحروسوا حظيره مواشي ليه ؟؟؟؟؟

لو حكيت لكم من هنا للصبح الى سمعته هنا من شاهد عيان شغله سمحله يتطلع على الفساد بعين قريبه داخل المستشفيات الحكوميه التابعه للجامعه . مش هاتصدقوا ان الناس دي بنى ادمين . الى هما الدكاتره .
ده فضلا عن الممرضات الى للاسف حالتهم ما تسرش حد ابداااااااا.

على فكره مش بس المستشفيات الحكومي . انا اتعاملت مع مستشفيات خاصه ايام ما ولدت خالد لانه كان عنده مشاكل كبيره اتسبب فيها اهمال الممرضات وغفلة الدكاتره واهمالهم برضه .
مستشفى خاص بيقلبنا كل يوم فى حوالي الف جنيه عشان الولد مقيم فقط هناك بعد ا لعمليه فى العنايه المركزه مش الحضانه كمانه .
ومع ذلك كنت كل يوم باروح اعمل هنا مشكله مع الممرضات والدكاتره اصحاب المستشفى الى منهم واحد قريبى كمان .
ولما واجهته باهمال الممرضات واخطائهم قالي اعمل ايه انا جايب اصطف من الجامعه كلهم دارسين وقلت انقيهم محجبات وبيصلوا وعارفين ربنا عشان يبقوا يراعوا ضميرهم مع الاطفال .

ما صعبش عليا لا . كل راع مسؤل عن رعيته . لو بيروح هو يدخل العنايه المركزه بنفسه كل يوم يفتش على الاطفال ويجازي الغلطان كانت كل واحده قبل ما تقعد ترغي مع صاحبتها تقوم تغير للعيال وتأكلهم وما تنامش فى الورديه وتسيب العيال تموت زي الى حصل من كام يوم .

وكان يومها اسود الى قالتلى يا مدام انا بروفيشنال تمريض وعارفه انا باعمل ا يه . اتفحت فيها وقلتلها انا هنا وباتعذب بعذاب ابنى بقالي شهرين ولسه الله اعلم لحد امته بسبب اهمال واحده او اكتر من واحده بروفيشنال زيك . ولولا ربنا هداني كان زماني فى مصيبه اكتر من ال انا فيها . كلمه زياده مش عايزه اسمعها بقى .

واكتر ما يغيظنى فى الدنيا استهانة الدكتور بالخطأ . ولما قالي مره مدير المستشفى كل الناس بتغلط والغلط وارد . قلتله يا دكتور ده لو الميكانيكى بوظلك العربيه هاتضربه يمكن . لو حد بوظلك جسمك ولا جسم ضناك تبقى ساعتها ده شعورك برضه ؟؟؟
ان الخطأ وارد ؟؟؟؟؟؟؟؟ المجال الوحيد الى الغلطان فيه مالوش اي عذر هو مجال الطب عشان مش بتكون الخساير لها تعويض . بتهيئلي الى خبط واحد بالعربيه موته ولا عمل فيه حاجه اهماله وخطؤه يمكن قبوله من باب السهو والخطأ .

انما الى يبقى دكتور والناس تستأمنه على حياتها ويكون مهمل ومخطيء عن نفسي لا اقبل منه ذلك ابداااااا ولا التمس له اي عذر .
ناهيك عن غرور الدكاتره المميت والى انا واجهتهم به اكتر من مره واعترفوا به والله ويقول اصل احنا بشر ؟؟!!!!!!

وبلاش نجيب سيرة الفساد الاخلاقي والمتاجره بالام الناس وامراضهم . دون التفرقه بين القادر والغير قادر . الى بيتعود على طعم دم البشر ما بيفرقش بين فصايل الدم وما بيشبعش .

وبلاش كمان نجيب سيرة شركات الادويه وصفقاتهم المشبوهه مع الدكاتره والهيئات الحكوميه .

وبلاش كمان نقول ان المستشفيات الى المفروض تعالج الغلابه دلوقتي الدكاتره الكبار عاملنها حكر عليهم بيعملوا فيها عمليات لحبايبهم واصحابهم بس . والغلابه يقفوا فى الدور ويستنوا لما يبقى دكتور مبتديء يفضى ويتعلم فيهم .

وبلاش نجيب سيرة الاداره الى هى اصلا من الدكاتره برضه وبتتحكم فى الاجهزه والامكانيات المتاحه للمستشفى وممكن تقفل مثلا جهاز الاشعه يومين على ما يشغل عيادته شويه ولا يعنى ما ياكلش عيش عشان فى جهاز جديد فى المستشفى ؟؟؟؟؟؟؟؟

سؤال : فى بعد الااام الناس يا ناس ؟؟؟؟ لازم كل واحد فينا يتقرص فى قلبه وعينه عشان يحس بالناس ؟؟؟؟؟


لازم يكون فى حل لازم يكون فى وقفه لازم يكون لها اخر . انا على فكره موضوع الطب فى مصر ده مش فجره عندي بس مشكلة محمد لا انا عشان تكونوا عارفين بقالي كام سنه مش باروح الا لدكاتره معينين غير الى الناس كلها بتروح لهم .دكاتره محترمين وباثق فى علمهم وفى اخلاقهم . عندي مبدأ ثابت دلوقتي ان لو كان حتى دكتور مش هو اعلى حاجه فى العلم لكن عنده ضمير ويتقى الله افضل ميت مره من الى يكون هو قمة العلم وقاع الاخلاق والدين .

اغلب الدكاتره المشهورين للاسف انا باشك فيهم وفى نواياهم واخلاصهم لربنا وللمهنه وشرف المهنه الى ما عادش موجود اساسا .

حقيقى منه لله الى خلى كلية طب بالمجموع فقط والكليات كلها اصلا مش المفروض تكون بالمجموع فقط
المفروض يكون فى مقايس تانيه كتير . كل دول العالم المحترمه بتعمل كده . لكن واضح ان احنا لسه مش محترمين .

مع احترامي لكل الدكاتره المحترمين طبعا الى مازالوا موجودين وانا عارفاهم
ومتأسفه على الاطاله شكرا لسعة صدركم

شوفوا المنجيات من عذاب القبر فى الرؤيه الاسلاميه

تايفويد ....ولا بروسلا... ولا لوكيمااااااااااااا؟؟؟؟؟!!؟!؟؟

السلام عليكم
مش عارفه ابتدى الكلام ازاي عشان مخنوقه وحالتى مش عارفه اوصفها . هاحكيلكم الى حصلى النهارده يمكن استريح لما اقوله .

النهارده من الظهر تقريبا وبدأت الاحداث ورا بعضها . اتصلت بيا سلفتى الكبيره وطلبت مني رقم تليفون دكتور تحاليل وبعدين قالتلى كلميه انتى عشان مش انا مش عارفه اتكلم واطلبي منه تعجيل نتائج التحاليل بتاعة محمد ابني عشان نلحق نعرضها على الدكتور قبل ما يقفل . وعملت كده فعلا
ابنها ده من حوالي 3 اسابيع جاله اسهال وسخونيه وترجيع وعمره 16 سنه . وقالوا جابوله دكتور وقالهم تايفويد والعلاج شغال . وانا عرفت واتصلت عليهم على ان الوضع طبيعى وما روحتش لان هما قالولي انه معدي وانا مش عارفه هو كده فعلا ولا لا .
المهم بعد شويه صراحة تاه الموضوع عن بالي على ان التايفويد بقى مرض علاجه موجود ولله الحمد لكن لقيت اخو رضا الى هو ابو الولد بيقولي ان الولد لسه تعبان اوي والحكايه مأزمه اوي عشان الامتحانات قربت لانه فى ثانويه عامه .
ومن هنا بدأنا نقلق ونقول في ايه . وكلمتهم وحثيتهم شويه على انهم يعيدوا التحاليل ويشوفوا ا يه الموضوع .وفعلا عادوا التحاليل قام الدكتور التاني قال لا ده مش تايفويد ده بروسيلا ( تقريبا هى دي حمى البحر المتوسط ) وقال دي منقوله من اللبن . وهات يا علاج تاني
وفات اسبوع والواد حالته فى النازل وبقى كوم عضم وابوه بدأ يشك فى الموضوع لانه ابوه ده بيشتغل اساسا فى مستشفى فنى اشعه وعدى عليه من البلاوي دي ياما .
نرجع للحصل النهارده : كلمت الدكتور تاني لما وصل العياده والبنت الى هناك قاتلى نص ساعه وتعالوا استلموا التحاليل . لقيت الدكتور دخل على الخط وقالها سبيلى التليفون يا فلانه . وكلمنى وقالي محمد حلل دم قبل كده قلتله اكيد لانه تعبان من زمان . زعق فيا وقالي مافيش اكيد حلل ولا لا . قلتله حلل قالي عايز اشوف التحاليل حالا ابعتيهالي . قلتله حاضر (هو اساسا صديق لبابا ) . حدته فى الكلام دي قلقتنى جدا لانه هو مش كده اصلا .
المهم بعد سيل من التليفونات رايحه جايه الدكتور نفسه قالي انا عاااااااااايز اعرف عدد كرات الدم البيضاء كام .
اول ما قالي كده حسيت الدنيا فى وشي خرم ابره . لانى عرفت معنى السؤال ده . لكن كذبت نفسي وقلت انتى معقده يا بنتى ولا ايه .
واسنيت لحد ما بعد شويه اتأكدت ان كل الدكاتره شاكين بالفعل بان الولد عنده لوكيميا او سرطان الدم . جرينا عليهم فى البيت .لقيناهم منهارين فى محاولات يائسه من الاهل الى هناك انهم يخبوا على الولد . وادعاء انهيار امه وابوه انه بسبب انه هيأجل الامتحان السنه دي . ومع عدم اقتناع الولد الا انه مش قادر اصلا يناقشنا .
وبعد سلسله اخرى من البحث والجري فى الشوارع وتشقيط الدكاتره لنا شمال ويمين ونصنا فى الشارع معاهم والنص التاني فى البيت فى ساعات من الا نتظار المميت .
جالي تليفون من رضا ان المرض شبه اكيد فاضل فحص واحد مش هايكون الا فى مركز الاورام وده هايكون الرد القاطع انما كل الفحوصات الاوليه بتؤكد انها لوكيميا بالفعل .
وبعد وقت كمان مش عارفه اد ا يه لمحاولة ترتيب اوراقنا وتوزيع الادوار عشان ناخد اسرع وقت ممكن فى تخليص اجراءات دخول الولد بكره المركز رجعنا البيت .
ورضا قعد يحكيلى الدكاتره قالولهم ايه وانهم طمنوهم ان كل شيء له علاج الحمد لله وانه لسه صغير وحالته لسه حديثه والعلاج ان شاء الله ممكن وبنسب عاليه فى الشفاء .
تخيلوا من 3 سنين زي ا لايام دي بالظبط حصلت نفس الاحداث دي بالظبط من اول التايفويد لحد اللوكيميا. انا سمعت نفس الكلام بالحرف من رضا عن واحد من اعز اصحاب رضا عليه .وللاسف مات بعد دخول المركز بايام . بعد كل الكلام المطمئن الى سمعته من رضا بنفس الشكل عنه . وسنوية كانت اول امبارح . والايام الوحشه دي كلها ما راحتش لسه من دماغي . وهاتجنن وانا شايفه الفيلم من اوله تاني ومش عارفه اعمل ايه .
حد يفهمنى لو فاهم ازاي الحاله تتشخص تايفويد وبعد اسبوعين تتشخص بروسيلا وبعد كام يوم تتشخص لوكيميا ؟؟؟؟؟؟؟؟؟؟؟؟؟؟؟؟؟؟؟؟؟؟؟؟
هل الدكاتره دول الى شخصوا فى الاول بقر مش فاهمين حاجه ومن الاول كانت لوكيميا؟؟؟؟؟؟؟؟؟؟؟؟
ولا هى كانت كده فعلا ودول كانوا سبب انه جاله سرطان فى الدم ؟؟؟؟؟؟؟؟؟؟؟؟؟؟؟؟؟؟؟؟؟؟
ولا لما اخد ادوية لعلاج التايفويد عملت كده معاه ؟؟؟؟؟؟؟؟؟؟؟؟؟
حد يفهمنى ازاي فى الحالتين دول حصل كده من تايفويد الى لوكيميا ؟؟؟؟؟ ايه العلاقه ؟؟؟؟؟

وليه نسة الاصابات بالزفت ده بقت كده . احنا بنعمل ايه وبناكل ايه وبنشرب ايه ؟؟؟؟؟؟؟؟؟؟؟؟؟

ولما يكون التدخين والاكل ولا اي حاجه سبب للسرطان . ليه طفل يجيله سرطان بالشكل المفاجيء ده ؟؟؟
مش عارفه اعمل ايه بابكي وبس ومش عارف ابص فى وش الولد ومش عارفه ابص فى وش اهله ولا فى وش رضا

مش قادره استحمل تفاصيل الفيلم ده تاني انا لسه ما نستوش .
مش قادره اقول غير
انا لله وانا اليه راجعون
واللهم اجرنا فى مصيبتنا
وحسبنا الله ونعم الوكيل
واللطف من عندك يا لطيف والرحمه يا رحيم بينا وباولادنا .

وارجوكم ادعولنا نروح بكره المركز يقولوا غلط كله غلط ونلاقيه سليم . وادعولنا لو طلع عنده لوكيميا ربنا يشفيه
وادعوا لامه وابوه ربنا ينزل السكينه فى قلبهم .
ويارب ما يسيء حد ابدا فى اولاده ولا حبايبه ويشفى مرضى المسلمين جميعا
واسفه لو نكدت عليكم


تحديث : اتأكدنا يا جماعه انه فعلا عنده لوكيميا الغدد الليمفاويه الحاده . يقال انها خطيره لكن علاجها بدري ممكن اوي . والدكاتره بيقولوا برضه انه لسه باديء الامر معاه . والله ورسوله اعلم .
خايفه اصدق طمأنة الدكاتره لنا .
هو دلوقتي فىمستشفى 57357 هاحكيلكم عنها بكره .

ارجوووووووووكم ما تنسوناش بالدعاء بظهر الغيب ان ربنا يشفي محمد ويصبره ويقويه على العلاج الصعب اوي ويصبر اهله ويقوي امانهم . الى هو احنا يعنى .
والف شكر لكل من اهتم وسال ولكل من استجاب ودعالنا

احنا وهما (العرب والغرب )

السلام عليكم اولا

فاكرين يا جماعه البوست الى كان من زماااااان اوي ده بتاع احنا وهما الستات والرجاله ؟؟؟ مش انا قلتلكم ان فى احنا وهما كتير وعايزين نتكلم فيها .
مش عارفه كنت ناسيه الحكايه دي ومش عارفه افتكرتها ازاي برضه المهم . النهارده بقى نتكلم عن احنا وهما العرب والغرب أو نقول يعنى العرب والناس التانين دول الى بيقولوا عليهم متقدمين عقبالنا . بس مافيناش من زعل وخناق .
نبدأ الرغي بسم الله طبعا ونشوف الفرق بينا وبينهم :

أولا : هما يربوا الطفل ويعلموه ماشي اول ما يبقى 16 سنه وياخد الثانويه العامه . بس خلاص اخرج اشتغل بقى يا حلو واعتمد على نفسك ولو عايز تكمل فى الجامعه اصرف على نفسك ومش بعيد يطردوه من البيت كمان لكن ممكن يفضل معاهم ويساعدوه يكمل تعليمه ،يساعدوووووه .
احنا بقى : اخر حلاوه نطبطب على الواد طول عمره وندلع فيه على الاخر (على راي الست نانسي ) ونوديه احسن مدارس انشاله نجوع وينبوس ايده كل يوم عشان يذاكر وينجح ويجيب مجمووووووع . ونعيط ونبات قدام لجنة الامتحان وكده يعنى . وبعدين ندخله الجامعه ونفضل نصرف عليه وهو جايز فاشل اساسا وبيسقط وبعدين يتخرج ويقعد ويستنى ابوه يشوفله واسطه عشان يتعين فى الحكومه وما يتهبدلش وابوه برضه يجيبله شقه وامه تعمل جمعيه وتجيبله الشبكه ونقعد ندلع ونهنن فيه كده الى ما شاء الله مش مشكله عاااااااااادي ونصرف عليه لحد ما يبقى 35 سنه عااااااااااااادي .

ثانيا : الشغل والاجازه . هما بيعيشوا حياتهم فى الاجازات الاسبوعيه او السنويه مش بيأجزوا باخلاااص ويتفسحوا ويظبطوا نفسهم على الاخر . لكن ايه فى أيام الشغل كل شغال وكله بينام بدري وكله مش فاضي .
احنا بقى : نروح الشغل واحنا متأخرين ومكسلين ونعسانين ويوم الاجازه نقضيه نوم ويمكن ناخد معانا البيت كام ملف نحطهم قدامنا كده نعذب بهم نفسنا ونقنع نفسنا اننا مشغولين . وايام الشغل نتفنن فى الخروج من الشغل قبل المعاد ونضيع وقت الشغل زي الفل ومافيش اي التزام لا باجازه ولا بشغل نعزل الخبطه دي اد عنينا. ولا منا اشتغلنا ومنا استمعتنا بالاجازه .

ثالثا : الموت هما واحد مات ممكن نزعل عليه طبعا ونعزي فيه بس يوم واحد ونسيب بقى اصحاب الفقيد يرتاحوا ويكملوا حياتهم ولا يكتئبوا حتى على راحتهم .
احنا بقى نفضل كابسين على نفس اصحاب الفقيد الى مش ناقصنا اصلا 3 ايام عزا وخد عندك 3 اخمسه واربعين مواويل ورغي ولك حريم للصبح واصحاب المعزى قاعدين يناموا على نفسهم ومش شايفين قدامهم . ده غير بقى قوانين لبس الاسود الى بتمتد سنين وكده يعنى .

رابعا : الجواز : هما الفرح يوم واحد ويمكن ساعه واحده والعريس ياخد عروسته ويمشي وديتهم علبتين صلصله فاضين مربوطين فى العربيه وويل يا ويل ومشيوا وخلصت .
احنا بقى خد عندك حنه وفرح وصباحيه وأسبوع كامل من الضيوف والمواويل . وساعة الفرح بتاع خمسين فرد يطلعوا مع العروسه شقتها ومافيش مانع يتخانقوا كمان عندها وعيال تبوظ فى الشقه ومطلوب عشرين عربيه عشان تمشي تلف انحاء الجمهوريه ورا العروسه وتكلكس ويعملوا خمسات ولا مش عارف ايه الى بيقولوها دي ويقفوا الشارع ويقرفوا الناس كام ساعه كده على الماشي .

خامسا : الجهاز اه ده تبع ا لى فوق هما كل اثنين هايتجوزا بيصرفوا نفسهم هما يجيبوا كتير يجيبوا قليل هما حرين . احنا بقى لو ما كانش الاهالي يتخانقوا مع بعض خمسين خناقه ويعملوا جمعيات للركب ويدينوا لكل الخلق (ده الاهالي مش العرسان) ويفرشوا شقه ممكن تكفي خمس افراد يعيشوا فيها ويملوها فرش واطباق وحلل من كل صنف ولون يكفوهم عشر سنين قدام ما يرتاحوش ولا يتجوزوا (امال الخيبه جايه منين يعنى )

سادسا : هما دايما باحس خصوصا الامريكان ان لسانهم طويل اوي وبيقولوا كلام وحش اوي لكن والله اعلم انا ما روحتش هناك عمري ما شوفت بعينى لكن هما لما بيشتموا بعض بيبقوا زعلانين وبيتخانقوا ده العادي بتاع البنى ادمين بتهيئلي (وممكن الناس تشتكيهم كمان ويرحوا فى داهيه) .
احنا بقى ممكن تسمع اقذع الشتائم والالفاظ حتى يمكن وانت قاعد فى بيتك من اثنين فى الشارع بيهزروا . اها بيهزروا مش عارفه لما بيتخانقوا بيعملوا ايه ؟؟؟
اه لا عرفت مطاوي على طول .

سابعا : هما عندهم اختراع عظيم اسمه تنظيم المرور وقواعد المرور واشارات ا لمرور والناس هناك عقبال عندكم بيبصوا فى المرايات ويستعملوا الاشارات وحاجه زي الفل .
احنا : انسىىىىىىى ان كان على القوانين والقواعد موجوووووووووده بس الى ينفذها بقى ياعم الحاج والشارع كله خالي تماما من الاشارات سواء اشارات المرور فى الشوارع ولا الاشارات بين السواقين وبعضهم هيييييييييييييييصه (والفلوس نازله عليه وهييييييييصه ) ده الى هو عسكري المرور طبعا .

ثامنا : هما عقبال املتكم برضه وعلى ما سمعت انهم ممكن يعملوا استفتاء داخل مدينه معينه مثلا الناس تقول رايها فى انهم يعملوا هنا نافوره ولا ما يعملوش مثلاااااااااا . والناس بتقول رايها وبينفذوا رأيهم .
احنا بقى : اخترنااااااااااااه اخترنااااااااااااه . مش عارفه هو ايه بس كل حاجه اخترناه يعنى من اول اسم الله عليه لحد سيادة اللواء المحافظ( عيييييب ما حدش يقول سيادة اللواء ممنوع على فكره ) لحد بتوع الحكم المحلي حتى لحد تمثال رمسيس التاني الى حطوه فى المنصوره عندنا الى اتكلف عمله 23 مليون جنيه .واحنا طبعا ا لى ايه ؟؟؟ اخترناااااااااااااه.

تاسعا : هما عقبال عندكم بررررررررررضه بالقوي عملوا الولايات المتحده الامريكيه . والاتحاد الاوربي . وماشين زي الفل . لا زي السمن على البتنجان الاسود بس ماشين يعنى .
احنا بقى : بالصلاة على النبى ما عملناش اي اتحادات لها قيمه واستمرت اللهم الا الامارات العربيه المتحده الى هما اساسا لولا الشيخ زايد وثروته ما كانوش راحوا تحت جناحه .
وتحيا الامه العربيييييييييييييييييييييييه .

عاشرا : هما ناس عندهم برود اجتماعي وعاطفي فظيع والعلاقات الاجتماعيه بتاعتهم تعتبر معدومه حتى بين الاهالي واولادهم . احنا بقى عندنا ترابط عائلي جامد جدا خصوصا فى الريف تلاقي الواحد من دول عارف البلد كلها واصلها وفصلها ونصهم ولاد عمه والنص التاني ولاد خاله عادي . لقيتلكم ميزه اهو يلا انشاله ما حد حوش . ولو ان انا ساعات كتير باتخنق من الترابط لما يتحول لحشريه بشعه بين الناس وبعضها .

وأفتكر كفايه كده اصل شكلكم زهقتم من رغيي النهارده . نستودعكم الله يا كتاكيت .

شوفوا حادثة الافك على الرؤيه الاسلاميه المتواضعه خاصتى

ممكن اسوق فيها ؟؟؟

السلام عليكم :
منورين فى القاعده تملي . ووحشتوني برضه مش عارفه ليه !!!!

شوفوا بقى انا دلوقتي فى حيره من امري وشوشة الستاتيت الجزء التاني انا مش عارفه اكتبها . كل ما ابدأ فيها امسح الي كتبته واعيد من الاول . وبصراحه وكل صراحه خايفه منه . لاني حاسه انه هايجبلى الكلام ومش هاخلص منكم . المهم انا هاكتبه بررررررضه وبعدين ناخد راي الحبايب الاول فى السر وبعدين نبقى نزله لو تمت الموافقه عليه بالاغلبيه مش الاجماع اصل انا ديموقراطيه .

ها نرجع بقى للرغي يا حلوين يا قطاقيط . ايه رأيكم بقى انا عايزه اقولكم على موضوع جد خطير - فصحى اهو خطير بصحيح يعنى -
أنا يا جماعه عندي عقده نفسيه مركبه دلوقتي لانى مش عارفه اسوق العربيه .ماتبصوليش كده والله حاولت كتير واصلا ما فشلتش اوي يعنى اصلا ما حدش اداني فرصه . هاحكيلكم حكايتى واحكمواااااا انتم .

من حوالي سنتين كده يا حلوين انا كنت واقفه فى مفترق طرق قدامي طريقين الاول هو انى اتعلم السواقه واسطو على عربية جوزي فى بعض الايام واقضي مشاوير البيت والعيال واودي العيال انا المدرسه واجيبهم وفى الصيف اوديهم تدريب رياضه وتحفيظ قرآن وما الى ذلك ونعيش حياتنا خارج المنزل بقى .
والتاااااني : هو انى اطنش خاااااااالث واعمل نفسي هبله وابيع القضيه وما اعملش اي حاجه واقعد زي خيبتها وخلاص .
المهم بعد تفكير عميق قلت لا ممكن ابدا ابقى زي خيبتها . انا لازم اتعلم السواقه .
مااخبيش عليكم الموضوع كان صعب اوي اوي خالد كان عنده اربع شهور وخارج من عمليات وجلسات وبلاوي كتير من اول ما شاف الدنيا . لمده اربع شهور بس قلت برضه احاول.
اتفقت مع رضا انه اول ما يفضى فى اي يوم ياخدنى بالعربيه يعملنى فى اي منطقه تكون فاضيه شويه . طبعا يجى شهر على مااليوم ده جه . وكذا مره يادووووووووب اركب انا العربيه والتليفوووووووون تررررررررررررررم الحقى خالد بيعيط وارجع يا جدع على البيت .
وبعد ما سمعتلي كلمتين فى دماغي من ماما وبابا على انى مااسيبش ابنى تاني بلا سواقه بلا بتاع . قررت انى اروح اتعلم فى مدرسة السواقه فى المرور وبالمره اخد الرخصه والتدريب هايكون الصبح بدري وخالد نايم وهاسيبه مع رضا .
وقد كااااااان .
وبدأت اروح وكنت ماشيه فى التدريب زي الفل طب ياعم ايه هانفضل كده نلف بالعربيه فى الحته الفاضيه دي وبعدين طيب . جوزي قالي باقولك ايه اديله خمسه جنيه كده ولا حاجه كل مره وهو يخرجك الشارع . اديتله كام مره واتحايل عليه يقولي ممنوع ياعم الحاج الناس كلها طالعه بره اهو وبعدين ممنوع ايه امال كاتبين على العربيات تعليم ليه عشان تمشي فى الساحه الفاضيه دي ؟؟؟؟ هو كده

المهم خرجت من الموضوع زي ما بدأت تقريبااااااا . وبعدين بقى بدأت انى اتجرأ شويه واخد عربية رضا وهو معايا طبعا وانزل بيها شويه يعنى ربع ساعه وارجع جري طبعا عشان العيال وطبعا ده كان مره فىا لشهر ولا حاجه .
شويه كده واتجرأت اكتر وكنت باخد العربيه واطلع بس بابا كان بيصر يجى معايا وكنا بنبقى الصبح بدري واروح وامشي كده يجى كيلوا ولا حاجه والدنيا فاضيه وانزل اتمشى ساعه وارجع تاني للعربيه وعلى البيت .
حلو الكلام ؟؟؟؟
بعدين بقى رضا قالي ما ينفعش بقى لازم تطلعي لواحدك . طلعت لوحدي وحصل خير الحمد لله روحت مشوار قريب كده ورجعت صحيح وانا راجعه خبط فى جدار البيت بتاعنا بس جت سليمه اهو بيتنا وعربيتنا مش مشكله .

بعد كام يوم رضا سافر الصين وانا بقى عملت فالحه وخدت ولادي وكنا يوم شم النسيم وقلنا نروح الناااااادي .
تمام كده وماما كانت معانا وماشين زي الفل لحد لما وصلنا قرب النادي وكنت ماشيه على كوبري زحمه اصلا وكنت واقفه وطلعت على الاولاني وما غيرتش عشان اطلع من الكوبري على الملف والاقي واحده ست كبيره ومعاها عيال كده ومولد وشايله حاجات على راسها ووقفت فى نص الطريق تمش خطوه وترجع اثنين اديها كلكس تتلبخ اكتر وانا اتلبخت اكتر واكتر
هوب طاخ بم تش وقعت الست من الخضه قبل ما المسها وقعت وانا فرملت الحمد لله ما حصلش حاجه بس هى بقى كانت بقت تحت كبوت العربيه ابنها كان هايقتلنا قبل ما يشوف امه .

المهم بعد سيل من الاحداث اصروا يعملوا محضر ورحت القسم وكان يوم لطيف جدا جدا جدا . وطبعا المنصوره كلها اتقلب عليا عشان رضا مش موجود كله بيعمل الواجب . ومش عارفه مين فلان بيه اتصل عليا يقولي ادينى الظابط الى عندك وانا اقولهم يا جدعان الست طالعه الاسعاف على رجليها مافيش حاجه ااساسا . المهم اتضح ليا فى الاخر انهم عملوا الفيلم ده ولادها عشان يسلكوا قرشين بس الست الحمد لله طلعت سليمه وانا طنشت لانها ست غلبانه فعلا بس عيالها مش تمام .
المهم بقى رجعت البيت بالعربيه وبابا قالي ما عدتيش تركبيها تاني الا لما جوزك يجى ابقى خوديها وانزلي فى البحر. قلت حااااااااااااضر
وجه جوزي وخرجت بها تااااااااني وكله تمام مافيش اي حاجه بس كان معايا العيال وانا ماشيه مامااااااااااا خالد وقع . طبعا انا زي الهبله بصيت ورايا . بس يعنى كنت هاطلع على الرصيف بس حصل خير ما طلعتش . طبعا ماما كانت معايا عملت قصه وحدووووووته . وكانت اصلا حصلت مشكله هبله وانا بره ومعصباني . رجعت قلت خلاااااااااااص مش سايقه ها ما تقرفوناش بقى انا اقعد واحط رجل على رجل واي حد فيكم يوصلني مكان ما أنا عاوزه بلاش قرف بقى .
لكن رجعت فى كلامي لاني عيله . وانا دلوقتي هاموت واسوق بقى عشان اعرف اخرج بالعيال واوديهم التدريب وماالى ذلك .
والله العظيم حتى لو انا مش باعرف اسوق يعنى هي جت عليا ؟؟؟؟؟؟
ما الناس فى الشارع اهو بيعجنوا ؟؟؟؟؟!!!!! وربنا انا قلت كده لرضا .قالي والله انتي بتقولي فيها .
انا عموما ما حبيتش السواقه ولا سيما فى شوارعنا المنيله دي بالاضافه لان الناس الى سايقين فى الشورع ما ينفعش تقول عليهم بشر اصلاااااا .
انا كل مااركب مع سواق تاكسي لازم ما اعرفش امسك اعصابي واديله كلمتين فى جنابه . حاجه تقرررررف . ماشي بطريقه مش ممكن بتهيئلي لو كان ماشي على رجليه كان بقى احرص من كده . مافيش اشارات مافيش قوانين مافيش عقل مافيش ذوق مافيش مراعاة حق الشارع والاخرين مافيش اي حاجه .
بس اعمل اييييييييه لازم اسووووووووق برضه .
الغلط فييييييييين فيا ولا فى الى ادوني الرخصه ولا فى الى خايفين عليا اسوق ولا فى الشوارع الهم ولا فى السواقين الى مش سواقين . ولا فى كله ده .
وايه المطلوب من الى عايز يسوق فى البلد دي ؟؟؟؟ انه يتعلم السواقه ولا انه يسوق فيها ؟؟؟؟؟؟؟؟؟؟؟؟؟؟
وعليه انا بطالب بحقى بقى فانى اسوووووووق فيها ............ اتصرفوا فى الموضوع ده وافيدونا افادكم الله .

شوفوا البوست الاخير فى الرؤيه الاسلاميه عن عائشه بنت ابي بكر زوجة الرسول صلى الله عليه وسلم

وشوشه للرجال

سلام عليكم

يعنى مش عارفه اعتذر للرجاله ازاي على تأخير البوست بتاعهم بس غصب عني يا كباتن والله . والبوست اهو بس ده بقى الستات هاتدخل تقراه عادي اه فرض سيطره بقى على القاعده . وبعدين يا ستات اي واحده عندها مطالب اخرى تتفضل تقول .

وبعدين اي حقد على الستات عشان انا دلعتهم المره الى فاتت وقلتلهم يا ستاتيت مش عايزه جيت ادعلكم واقول رجاجيل لقيتها سخيفه اوي مش لايق عليكم دلع خالص .

نبدأ الوشوشه بقى :

اولا: المره الى فاتت قلت فى بوست وشوشة ستاتيت للستات ( الايثار - الكلام - المشاركه - ساحرة القلوب - تهادوا تحبوا - ممنوع الخصام الطويل ) كل ده معاناااااااااا .

ثانيا: اوعى تفكر انك تحسسها بالغيره عليك عشان تزود حبها يبقى جنيت على نفسك عشان كده هاتولع نار مش هاتعرف تطفيها لانها هاتوصل عندها نوع من عدم الامان من ناحيتك

ثالثا: ما تعلقش كتير على لبسها الى مش عاجبك او مكياجها او حتى شكلها وخصوصا شكلها لوحبيت تبدى رايك فى اي موضوع من دول يبقى لاااازم تبقى حريص اوي وكفايه اوي تلميح من بعيد ويكون قبليه كلمة حبيبتى .

رابعا: اذا حبيت تطلب منها طلب زى عزومه اصحابك مثلا يبقى لازم تحسسها انها هاتعمل كده عشان بتحبك مش غصب عنها والا اصحابك هايباتوا فى المستشفى .

خامسا: لا تذمها ابدااااااااااا قدام اهلك او صاحبتها او اصحابك ويستحسن مش قدام اى حد. لان فى مثل تعتقد فيه كل النساء هو( من قلها زوجها يا عوره لعبوا بيها الناس الكوره)

سادسا: اذا نسيت ان النهارده عيد جوازكم او عيد ميلادها او اى مناسبه انشاله اول مره هى كحت فيها قدامك لما تفكرك مش تقولها ان الموضوع هايف ومش يستاهل مدام هى فاكراه يبقى مهم عندها انت استغرب من نفسك انك نسيت واعترف بخطأك على طول من غير مكابره وياريت تقولها البركه فيكى انتى عقلى تبقى تفكرينى( وخليك لطيف واظبط الموبايل يفكرك بعيد ميلادها وهات لها هديه من غير ما تسألها اجيبلك ايه ولا تديها 100 جنيه وتقولها هاتي الى نفسك فيه ).

سابعا : اذا جابتلك هديه مش مهمه او ورد مثلا مش تقولها صرفتى الفلوس فى هيافه كفايه انك انت نسيت اساسا تجيب هديه او جبتلها هديه خلاط أو شبب .

ثامنا: لما تقابل اى واحده ست او تكلمها فى التليفون احسنلك لما تروح على طول تحكى لها عشان لو اكتشفت من بره هاتبصلك بكل شك وريبه حتى لو كانت متأكده من الموقف.

تاسعا: ما تلغيش شخصيتها بمعنى ما تحولهاش لمسخ حاول دايما تعلمها كل حاجه انت بتعرفها وتكلمها عن شغلك وتاخد رايها فيه حتى لو مش عملت بيه بس تحس انها قالت رايها وبعدين لما يطلع رايك انت غلط هاتقولك لو كنت سمعت كلامييييييي . وصدقنى اول من سيفتقد عقلها لو فقدته هو انت .

عاشرا: حاول تتفرج معاها على برنامج الموضه والميك اب عشان تبقى تسيبك تتفرج على الماتش واتكلم معاها وانت بتتفرج ما تقعدش مشمقنط وتحسسها انها بتتفرج على هيافه وحاجات مش مهمه بس ما تنساش اوعى تعلق على الموديل انها حلوه عشان هاتبقى اخر مره تتفرج فيها على التلفزيون

الحادي عشر: اذا تكلمت عن اى سيده اخرى حتى لو كانت اختك لا تمدحها كثيرا خصوصا لو كانت فى حاجه مش فى زوجتك زي انها مثلا شعرها اصفر وزوجتك شعرها اخضر يبقى نهارك هايبقى الوان حتى لو كانت مامتك . لو لازم تمدح ما تطولش وفى الاخر قولها هو فى زيك انتى ياحبيبتى صلح نفسك يعنى . وما تبقاش قاعد تاكل من ايديها وتقولها فينك اكلك ياماما هاتقولك روح كل عند ماما . كل وقولها تسلم اديكى ده احسنلك يعنى .

اثنى عشر: لا تمنعها من اهلها كلما منعتها زاد شوقها اليهم وحثها على ودهم ما تخلهاش تحس انك ند لهم وبعدين ده لو كنت عايزها تبقى تضحك فى وش اهلك

الثالث عشر : معلومه تهمك كل الستات فى مجتمعنا عندهم مشكله . انهم اتربوا فى كوكب مختلف عن كوكب الرجال بمباديء واخلاق تانيه خالص . تخلى الخجل ممكن يقتل المشاعر جواها قبل ما توصلك . مهما ادعت هى عكس ذلك اعرف ان ده جواها . ترفق بها وحاول تكسر الحاجز الى ممكن يتخلق بينكم للسبب ده وحاول قبل ما يكبر الحاجز ده .

رابع عشر: عاشرها بالمعروف . ورفقا بالقوارير. واوصيكم بالنساء خيرا. وان احببتها اكرمها وانم لم تحبها فلا تظلمهاهكذا علمنا رسول الله صلى الله عليه وسلم فلنمشي على الدرب

وفى النهايه اقولكم ربنا يوفقكم جميعا وشكرا لكم

الى ما يجيش بالذوق نعمل فيه ايه ؟؟

السلام عليكم

والله العظيم وحشتوني جدا ووحشني الرغي موووووووت بس مش عارفه اكتب والله مشغوله جدا جدا .

المهم طبعا انتم مستنين البوست الجديد بتاع اخوانا الرجاله بس والله مش فاضيه اكمله عشان ده محتاج مخمخه عاليه وتكتيك محكم .

بس انا النهارده بقى قلت اقولكم على كام نقطه كده قابلونى فى الكام يوم الى فاتوا قبل ما انساهم .

أولا : من موقعي هذا باوجه اعتذار وشكر وامتنان لخالتي الحلوه طنط حنان . اعتذار عشان هى زعلانه مني عشان كلمت ماما وهى بتزورها في القاهره سألتها هاتيجى امته وقولتها تعالى بدري عشان تتغدي معانا ودى جريمه شنعاء واتخناقنا فيها وكنا خلاص هانجيب البوليس .
وشكر وامتنان لاني اكتشفت انها بتشجعني فى صمت وبتطبع المدونه بتاعتي وبتقراها وانا ما اعرفش الا من كام يوم .
وحاجه ساقعه على حسابي للبلوجريه كلهم يا جدعان على شرف طنط حنان .

ثانيا : هاحكيلكم على صوره شوفتها وحبيت ابرزها واوضحها من موقعي هذا برضه - حلوه موقعي هذا دي عجبتنى - المهم يوم الخميس فى تمام الساعه الثانيه ظهرا كان موعدي مع دكتور الاسنان (لا مش طقم ما وصلناش للدرجه دي بس قربنا )
لاحظت ملاحظه مهمه جدا فى الشارع وان تقريبا تسعين فى المائه من الشباب الى قابلوني فى الشارع من عمر مثلا 16 سنه لحد 22 سنه كده تقريبا ويمكن اعلى شويه
كلهم باين على وشهم كده لسه مدلوقين من على سريره حالا يادوب غسل وشه وضرب حبة جل فى شعره او حتى زيت تموين وخارج بقى ويمكن نصهم تقريبا عنيه حمرا دم وشفايفه زرقا (بيشرب سجاير يعنى على الاقل )
المهم قلت لرضا هو في ايه هو الناس كلها لسه صاحيه من النوم ليه ؟؟ وبعدين الناس الى صاحيه من النوم مش هما الفئه المنتجه فى الشعب اصلا ؟؟؟ لما يبقوا لسه نايمين لحد دلوقتي امال مين الى صاحي ومين الى بيشتغل ؟؟؟؟
رضا رد عليا ساخرا : منتجه ؟؟ مين دول ؟؟؟ قلتله الشباب مش المفروض ان المرحله العمريه دي هى ذروة الشباب والعمل .
طبعا ظهرت على وش جوزي علامات القرف كده والخنقه من الحياه وقالي :اه ان شاء الله .
بصراحه نفسي ميزان الحياه يتعدل تاني بينا والناس تصحى الصبح وتنام بالليل والناس تشتغل والدنيا تتظبط كده تاني اصل خلاص الحكايه بقت خانقه على الاخر .

المحلات عندنا ما عدتش بتقفل طول الليل وعلى العكس كمان طول النهار قافلين . انا مره اتهفيت فى عقلي ونزلت اشتري حاجه من شارع فيها المفروض محلات ملابس كتير وكانت الساعه 12 ظهرا . لقيت كل المحلات لسه قافله ؟؟!!
ولما فتحوا بعد الظهر روحت لقيتهم كلهم حاسين انى كائن فضائي لانهم ما كانوش فاضيين بيرتبوا المحل والبضاعه استعدادا لفترة الشغل بقى الى هى اخر النهار وبالليل ولما سألتهم . صاحبة المحل قالتلى: اعمل ايه يا مدام انا بابدأ اقفل الساعه 1 بالليل بافضل امشي فى الزباين مش عايزين يمشوا يجى ساعه واكتر . باقفل الساعه 2 ويمكن اكتر . انام امته وافتح بدري ازاي ؟؟؟

وانا كنت فى ابو ظبي كان فى قانون على ما افتكر المحلات بتقفل الساعه 11 . يارب اشوفها لان في رايي انها كلها متواليه مرتبطه ببعضها .
يعنى لو المحلات قفلت بدري الناس هاتروح بدري مش هايلاقوا حته يتسرمحوا فيها . وعليه المحلات دي هاتفتح بدري والناس تظبط نفسها تشتري حاجتها قبل ما المحلات تقفل . وهكذا . ولا ايه رايكم ؟؟؟

ثالثا : الحكايه التانيه . انا روحت النادي يوم الجمعه وما رضيوش يدخلوني واتخانقت مع الحارس الى هناك ودخلت عافيه . اه انا بقيت متشرده . انا عارفه انه النادي ده للاعضاء فقط . لكن صدفة سألتهم لما روحت هناك للولادي وهما فى رحله فيه ممكن ادخل بتذاكر قالي اه ومن يومها من كام شهر وانا بادخل عادي . والى بقطعلي التذكره بيقعد يتلاكع كده عشان ازهق وامشي ويضرب هو على الفلوس لكن هيهات مش انا .
لكن بقى بعد الخناقه والدخول عافيه اكتفشت انهم بقبلوا التذاكر فقط فى حال النادي فاضي اما لو زحمه طز فى الناس الى جت من بيوتها وقطعت مشوار عشان تدخل . لان الناس مش مهم اصلا . لو محترمين كانوا اعلنوا ان الاجازات قاصرة على الاعضاء لكن هما اعلنوا انه للاعضاء وبعدين بيدخلوا بقى حسب مزاجهم وهواهم . كان ممكن احل المشكله بتليفون من غير خناق . لكن حيث ان قبلي بدقايق اصحابي دخلوا بتذاكر ومكلمنى من جوا النادي . فلا بقى مش هاتصل بحد ومش هاخرج والى تقدر عليه اعمله .
بدأت اؤمن ان الي ما يجيش بالذوق يجى بالعافيه. موقف ما كنتش احب اعمله لكن دفعونى اليه دفعا . يارب نكون محل اهتمام الاخرين .

رابعا : المكان شارع البحر (شارع رئيسى فى المنصوره ) الزمان يوم الجمعه الساعه 9 مساءا . الموقف ان الشارع زحمه جدا جدا والعربيات لازقه فى بعضها وفى كمية هبل مش معقوله من السائقين لعباتهم المدلعه نفسها على الاخر .وانا رايحه ما خدتش بالي اوي من خلفيات الموقف . وأنا راجعه بقى لقيت ان مصدر الزحمه عربيات مدلعه وتلاقي السيناريو ده قدام عربيه على اليمين سايقها بنت ومعاها صاحبتها ومشغله الكاست وبتهزر راسها وهى بتدندن مع الكاسيت وكلهم حاطين وشهم فى كيس الدقيق قبل ما يخرجوا ولابسين عجائب . وعلى الشمال عربيه تانيه فيها ولد لزج واهبل ومعاه اصحابه برضه ولابسين هبل برضه وناقشين وشهم زي الستات برضه مافيش ماااااانع . ومش شايف اي حد فى الشارع الا الحلوه ام كيس دقيق على وشها وجري وراها زي ال ...... ما علينا . غير عابيء بالناس الى في الشارع وعليه التلطيش فى الناس شغال على اشده .
المشهد ده اتكرر صدقوني على طول الطريق يجى حوالي 5 مرات تقريبا الى هو الطريق اصلا اخد ربع ساعه بسبب الزحمه .
حد بقى يقولي اعمل ايه وانا شايله المراره من اربع سنين ؟؟؟
ملحوظه : الشارع ده كله مستشفيات العام والجامعه والطواريء . وأنا عن نفسي كنت رايحه بابنى مستشفى العيون . والشارع زحمه ومقفول عشان العيال الهبله دي بيتفسحوا . وصبرني يااااااااااااارب .

وكفايه كده رغي واشوفكم على خير

شوفوا كمان معاملة اهل الكتاب كما اراها فى دينا الجميل

زعلانه منكم اوي عشان ما حدش بيجى فى المدونه التانيه رؤيه اسلاميه متواضعه وجوزي كل شويه يقولي ولا حد معبرك شكلى بقى وحش اتكسفوا بقى