قلب ايمان ... الثاني

سلام عليكم سوري يا جماعه على التاخير بس والله غصب عني يلا بسرعه عشان اقولكم عن ايمان كلام كتير ......

خلصت ايمان الصلاه ومشيت هى وداليا وما اتكلموش خالص لحد ما وصلوا لمكتب ايمان الى كانت وشها متغير وباين عليها الضيق جدا من كل شي ء
ويمكن علشان كده اشفقت عليها داليا من الموقف كله وطبطبت عليها

وقالت لها وهى بتشد على ايدها : ما تزعليش مني يا ايمى انتى عارفه انتى عندي غاليه ازاي ..دول عشرة عشر سنين يا بنتى
عموما انا هاحاول ا جي ازورك فى الويك ايند ونقعد مع بعض شويه

هزت ايمان راسها بالقبول وحاولت تبتسم ابتسامه متألمه وقالتلها : ماشي يا داليا عارفه والله
.
وكملت ايمان الكام ساعه الى اتبقوا فى يوم العمل وهى وشها بدون اي تعبيرات، وتظاهرت بانشغالها بالورق والشغل الى قدامها وما شافتش اي حد حواليها او تعمدت ذلك لحد لما خلص وقت الشغل ومشيت ايمان
بسرعه الساعه 3

ايمان بتروح بسرعه عشان يادوب تعدي على الحضانه عشان تاخد نور(2) ومازن(4) من الحضانه وتمشي بعدها خمس دقايق لحد البيت وتطلع جري عشان تكمل الاكل قبل ما اشرف جوزها يجى من الشغل الساعه 5
اول ما ايمان بتدخل بيتها بتدخل دوامه كبيره ما بتلحقش معاها تفكر فى اي حاجه تانيه اول حاجه بتجري وقبل ما تغير هدومها تفتح البوتجاز وتحط عليه حاجات وبعدين تجري على الولاد الى بيبقى لهم الف طلب وغالبا بياخدوا حمام وتخلص ماتش الاولاد وتجري كمان تكمل الاكل وسط طلبات الولاد وتغير هدومها هى كمان لو كان فى وقت
وما تعرفش ازاي الوقت ده بيجرى كأنه دقيقه وهى بتجري فى كل اتجاه في الشقه ويجى اشرف من الشغل .

اشرف : سلام عليكم

الولاد فى وقت واحد وجري : بابااااااااااااااااا جه يا مامااااااا .

ايمان : وعليكم السلام .

وجري على بابا وينطوا على ايده الاثنين ويفتشوا كويس يمكن جايب معاه حاجه تنفع .
وهو بيبوس فيهم ويسلم عليهم

وبعديين وهو بيغير هدومه : يا ايمااااان اخبار الاكل ايه انا ميت من الجوع

ايمان بترد من المطبخ بصوت هادي : طيب حاضر ربع ساعه بس .

اشرف بعد ما وصلها المطبخ : ايه مالك انتى تعبانه ولا ايه .

ايمان بارتباك ومحاولة اظهار ابتسامه باهته : انا لا لا ابدا بس مرهقه شويه من الشغل .

اشرف : شغل ؟؟!!! شغل ايه يا ماما هو الى انتى فيه ده شغل ؟؟!! الله يكون فى عونااااااا .

ايمان فى بالها :بدأناااااااا

اشرف: هادخل اصلي العصر اجي الاقي الاكل جااااااااهز .

ايمان بغيظ : حاااااااااااضر على النار هاكلملك النار تخلص بسرعه .

خلصت الاكل وهى كل شويه تسمع استعجال من اشرف وهو قاعد قدام التلفزيون واتغدوا وايمان اكلت الولاد وشالت الاكل واشرف خلص اكل وجرررررررري على التلفزيون وكانت لسه ايمان فى المطبخ ينده عليها .

اشرف : ايماااااااان بسرعه الشاااااي عايز انااااااام .

ايمان : حااااااااااااااااااضر اصبر عليا يا اشرف

تخلص ايمان الماتش كااااامل واشرف دخل ينام والعيال وايمان وراه
وبعد خمس دقايق....

اشرف: ايماااااان حرام عليكي انا مش عارف انام خدي العيال دي وروحوا الاوضه التانيه سبوني ارتاح شويه دى مش عيشه دي.

ايمان اخدت الولاد وانسحبت للاوضه التانيه ونام مازن انما نور فضلت صاحيه ايمان قالت اهلا وسهلا شكلك نايمه فى الحضانه ومخمخه .

نور بحروف مكسره وابتسامه شقيه : اه نايمه فى الحضانه.

تضحك ايمان فى ارهاق وتبوس نور جامد اوي .

وطبعا ما نامتش ايمان الا غفوات خاطفه لمده ساعتين لحد لما مازن واشرف صحيوا
وبدأت ماتش تاني من طلبات البيت والعيال واشرف نفسه ...الى جه على الساعه عشره كده وجاله تليفون من واحد صاحبه ولقته بيلبس

ايمان : رايح فين يا اشرف دلوقتي ؟؟

اشرف : مافيش اسامه صاحبي اتصل عليا وهايعدي عليا ننزل نتمشي شويه مش عايزه حاجه من بره ؟

ايمان : طب ما تاخد معاك مازن ده قاعد زهقان على ما اخلص باقي الشغل الى ورايا .

اشرف : لااااااا باقولك نازلين نتمشى مازن هايتمشى ؟؟

ايمان بعصبيه : الله مش معاك العربيه .

اشرف بغلاسه: لااااااا مش عايز وجع دماغ .

ويخرج اشرف وتصارع ايمان مع الولاد وشغل البيت ساعه كمان من الزمن ما بين جري وصريخ وعياط احيانا ويرجع اشرف الساعه 11 وشويه يلاقي الكل نااااااااايم .

يبص عليهم ويظهر على وشه ابتسامة راحه يشوبها اسف

ويغير هدومه ويدخل المطبخ يدور على اكل يلاقي صنيه على عشاء خفيف ياخده ويقول : كتر خيرك والله .

ويهز راسه فى غير رضا: بتهيئلي لو كانت مربيه قطه كانت بقى اهم مني .....

ويتعشى اشرف وبعدين يعدي على ايمان الى نايمه جنب نور

ويقولها وهو بيخبط على كتفها بالراحه : ايمان ايمااااان. مش هاتقومي تنامي مكانك ؟؟

ايمان وهى غرقانه فى النوم : العشا فى المطبخ .
اشرف بضيق : عارف يا ستى اتنيلت كلت باقولك مش هاتتنقلي مكانك .
ايمان: لا يا اشرف مش قادره اقوم بقى خلاص خلينى هنا .
اشرف بضيق اكبر وزفرة كبيره : طييييييب خليكى يا اختي .

ويفتح الكمبيوتر ويقعد قدامه لحد الساعه 2 صباحا
وتبدأ ايمان يومها بعد كده ب 3ساعات الساعه 5 يعنى حيث الطبيخ ولبس العيال وسندوتشاتهم وفطار اشرف ولبسها وخروجها للشغل

وعلى باب المبنى ايمان رفعت وشها وقدامها مباشرة ومش عارفه جه منين..

بابتسامه عريضه من استاذ محمود :صباح الخير يا مدام ايمان

ايمان : ............

يتبع يا حلوين

وده كان مخلص متعب لكم اوي اوي يا جماعه عشان تعرفوا ايمان واشرف عايشين ازاي
واعتقد هى دي حياة كل النااااااااس الى زيهم فى اغلب واعم الايام صح ولا لا ؟؟؟
حياه صعبه ومتعبه وجافه ودواااامه ما حدش عارف يخرج منها
اسفه على الاطاله الممله
بس حبيت تشوفوا ايمان واشرف بعينى

قلب ايمان ... مقدمه

تحدييييييييييث ::: الصوره دي يا جماعه مهداه للبرنامج قصدي لقصة قلب ايمان ههههههههه

من الفنان بيبرس صاحب مدونة سهران لوحدي

جميله يا استاذ بيبرس تسلم اديك وبعد كده هانطمع فيك وتعملنا صوره لكل بوست

==============================================================

السلام عليكم

النهارده يا حلوين انا قررت اننا احكيلكم حدوته ههههههههههههههههه

لا بجد هابدأ اكتب قصه مش عارفه هاعرف ولا لا بس انا هاجرب وانتم معايا

القصه دي انا عايزه اتكلم من خلالها عن حاجات كتير اوي وموضوعات مهمه اوي ما لقيتش طريقه سهله وبسيطه غير انى اسوقها من خلال ا حداث القصه دي

انتم عارفين انى باكتب فى المدونه دي على صفحات البلوج مباشرة مش محضره حاجه يعنى والقصه هاكتبها على كذا مره عشان ما تزهقوش وباقي الاحداث متأكده ان ردودكم وارائكم هاتكون مؤثره فى باقي الاحداث الى لسه ما كتبتهاش اصلا

مش هاعرفكم بشخصيات القصه هاتعرفوها من خلال الكلام ان شاء الله لكن اتمنى اسمع رايكم بسررررعه عشان انا قلقانه شويه

يلا نشوف قلب ايمان ماله بقى

قلـــــــــب ايمـــــان

على مكتبها ما يقرب من 200 ورقه مبعثره الى جانب جهاز الكمبيوتر الخاص بها وهى تنقل بصرها بين الورق والشاشه وغارقه فى عملها . وفجأه شعرت ان هناك من يراقبها من بعيد ولكنها لما تلفت واكملت عملها

وبعد دقائق وفجأه رفعت عينيها الى امامها مباشره ونظرت فى عينى مراقبها مباشرة بنظره تعرف طريقها ولكنه لم يبعد بناظريه عنها وانما اشرأب بعنقه اكثر ليراها بوضوح من بين مايفصلهم من زملاء وجدار زجاجي .

فابتسمت له عن استحياء وابتسم لها .

ثم نظرت لمن هم هولها فى ارتباك وعادت تنظر للاوراق والعمل ثانية . وبعد لحظات سمعت صوت جهازها المحمول يعلن عن وجود رساله فتحت الرساله وقرأتها وعلت ملامحها ابتسامه شغوفه راضيه .

داليا : يلا يا بنتى مش هاتصلي ؟؟

سمعتها ايمان ولم تعي ما تقول ولم ترد او تلتفت اليها وظلت تنظر للموبايل

فكررت داليا فى عجب : ايماااااااااااان يلااا الظهر اذن مش هاتصلي ؟؟؟!!!

فنظرت لها ايمان كأنها لمت تلحظ وجودها الا الآن : حاااااااضر فى ايييييه ؟؟ هاصلي طبعا .

ووقفت ايمان تجمع حاجيتها ورفعت عيناها تنظر فى نفس الاتجاه عبر الزجاج وابتسمت الابتسامه نفسها وعلى وجهها احمرارا.

داليا وهى تنظر لها وتنتقل بنظرها بسرعه فى اتجاه نظر ايمان : يووووووه وبعدين معاكي يا بنتى مش هاتعقلي بقى وايه اخرتها القصه دي ؟؟؟

ايمان وهى تهرب بعينيها ومن داليا نفسها : قصة ايه ؟؟!! تقصدي ايه مش فاهمه ؟؟!!

داليا : ما تستهبليش يا حلوه ده انا داليا . كانت منه الرساله دي ؟؟؟

ايمان بغير رضا عن الموقف أو عن نفسها : ايوه منه ...... بس عادي يعنى مافيش حاجه .

داليا : ما تضحكيش على نفسك يا ايمان وما تدخليش نفسك فى مشكله انتى مش قدها .

ايمان وفى غاية الضيق : داليااااا انتى بتتكلمي كده ليه ؟؟ أنا مافيش بينى وبينه اي حاجه انتى بتهرجي انتى هاتجبيلى تهمه ؟؟!!

داليا : افهمي يا هبله هانم انا خايفه عليكى لو انا ما نبهتكيش الناس حواليكى هايتكلموا عليكى وبعدين اصلا الوضع غلط.

ما تنسيش انك متجوزه وهو كمان متنيل متجوز ولا نسيييييتى دي كمااااان .

ايمان : يالااااا الصلاه هايبدأ ........

================================

وكفايه عليكم كده النهارده

الى اللقاء فى الحلقه القادمه

يتبع

سمعوني رايكم بسررررررررعه

صور من حياة الفاروق ... على الرؤيه

الفاروق عمر بن الخطاب

شخصيه فاذه فعلا وباحبها جدا

تعالوا نشوف

صور من حياة الفاروق

على

رؤيه اسلاميه متواضعه

واحد اثنين ... الجيش العربي فين؟؟؟؟!!!!

باسمعها كل يوم واقول ياخيبتنا القويه قلت لما اصحيكم على الصبح على وجع القلب

أو لا اصلي وراء مالك؟؟؟

السلام عليكم

ازييييييييكم .

مبسوطين كده ؟؟؟ لازم تعصبوني وتخلوني اقول الحقيقه ههههههههههههههه

اهم قطعوا فى شعري لما قالوا بس فى البوست الى فات

والى قالي انا اتخميت فيكى والى اتصدم فيا على رايي العجيب الغريب المتعارض مع كوني عامله مدونه دينيه

مع ان الدين ما قالش ابدا انى اتاكل على قفايا ولا اسقف واطبل فى اي زفه معديه

المهم عشان مش عايزه اعيد الكلام

ياريت اي حد تسول له نفسه لشتيمتى ياريت يخليه راجل كده ويكتب اسمه او يقول هو مين خصوصا لما يكون بيتكلم بشكل يقول انه عارفني

وبعدين الخناقات دي فتحت نفسي على الخناق وانا بقى كنت مانعه نفسي بالعافيه وعندي مليون موضوع هانتخانق فيه ونشد فى شعور بعض لما نقول بس

خلي الصدمه تبقى عشره بقى

ههههههههههههههههههههههههههههههه

ندخل على الرغي الجامد جدا والى محوشاه على مدى كام يوم وكاتماه فى قلبي ما تخافوش مش كلام كتير وانما مهم .

هاحكيلكم حكايه حصلت ايام الامام ابن حنبل .

الامام بن حنبل كان رأيه ان اكل لحم الجمل يفسد الوضوء و الامام مالك كان رايه ان لا يفسد الوضوء

(بصرف النظر عن مين الى صح مش موضوعنا لان الاثنين صح اصلااااا)

واحد راح لابن حنبل وقاله : لو علمت ان رجلا يصلي واكل لحم جمل ولم يتوضا اتصلي ورائه؟؟

تفتكروا بن حنبل رد قال ايه ؟؟؟

قال : او لا اصلي وراء مالك ؟؟!!!!

مالك كان استاذه يا جماعه . وهو مختلف معاه فى راي . لكن مش معنى كده انه على خلاف معاه .

اوحتى مغلط مالك او مستأثر برايه فى مسأله دينيه يعنى مجاله اساسا وده امام يعنى مش اي حاجه

الا انه ممكن يعمل براي مالك وهو رايه العكس اصلا

فاهمين يا جماعه ؟؟؟

فاهمين يعنى ايه اختلاف فى الرأي ؟؟؟

حاسين اد ايه الاختلاف ده عاطي مرونه للدين الجميل بتاعنا .

الدين الكامل

تفتكروا اي مسأله من مسائل اختلاف الراي بين الائمه والمسلمين عموما للان الم يكن الله قادرا على حسمها بكلمه واحده فى كتابه ؟؟؟؟

مش ملاحظين يا ناااااس ان الاختلاف ده مقصود ؟؟؟

طبعا مش فى الثوابت الى فيه نص صريح مافيهوش كلام

نص صرييييييييييح ( مش حد يجبلى كتاب تفسير ويقولي فلان قال كذا يبقى كذا لان كتب التفاسير نفسها بتختلف )

ما علينااااااااااا مش موضوعنا

واختلاف الراي مش فى الدين بس فى كل حاجه

ولله الحمد احنا عندنا مافيش اي ثقافه لحرية الراي واحترام الراي الاخر

اي حد رايه مش زي رايي يبقى حمار ومش بيفهم حاجه دي القاعده

وتلاقي اثنين اساسا مش فاهمين اي حاجه فى السياسه وقاعدين مع ذلك يتخانقوا على حاجه وكل واحد ماسك فى رايه باديه وسنانه لا ومش بس ماسك لا كمان عايز يفرضه على كل الدنيا

يااااااااااااااااارب اعيش واشوف حوارات راقيه بين الناس مش شتيمه وقلة ادب وقلة قيمه

واحترام للراي الاخر مش استهزاء ورفض تام لاي دماغ تانيه

واعتزاز بالراي مش عند وفرض راي

اعتقد 50 فى الميه من مشاكلنا مع بعض ومع الدنيا هاتتحل لو كنا بس نحترم راي وعقول بعض

بس كفايه كده عشان الجو برد

اه ولو سمحتم ادعوا لرضا ربنا يشفيه عشان واخد دور برد جامد اوي

والى فيكم ما دعاليش امبارح الفجر هاعررررررفه وهاعلقه على باب المدونه

اه والى راحت عليه نومه وما صحاش وما صلاش

لا ده هاعلقه من رجليه على باب زويله

هههههههههههههههههههههههههههه

الوقفة التضامنيه بالدعاء لغزه فجر الجمعه 2/1/2009

تحديييث

فاضل شويه صغيرين على الفجر يا جماعه

وانا قاعده اهو مستنياااااكم ومعاكم لحد ادان الفجر

تحديييييييييث : وهنـــــــــا الجروب على الفيس بوك لنفس الغرض

تحدييييث تاني: نمى الى علمى ان فى دعوه بالفعل من ناس تانيه مش عارفه مين لنفس الكلام وتكون فى فجر يوم الجمعه الجايه عشان كده انا غيرت المعاد عشان نكون اكتر عدد ممكن اوووووووووك يا جماعه ؟؟

يا جماعة ان شاء الله انا حددت معاد الوقفه التضامنيه بالدعاء لاهل غزه

يكون ان شاء الله يوم الجمعه فى صلاة الفجر

ومن فضلكم ندعي من قلوبنا

ومن فضلكم نحاول الالتزام بالوقت

نفسي احس اننا وقفنا كلنا على قلب رجل واحد عشان حاجه مهمه

لنصرة دينا ولنصرة اهلنا المكلومين

وزي ما ساعة ماتشات الكوره بتبقوا كلكم فى وقت واحد بتقولوا يارب

ياريت نسمعها مره عشان حاجه مهمه فعلا

وده دعاء انا كتبته وطبعا الى عايز يقول حاجه تانيه يقول والى عايز يقول ده ويزود عليه حاجه يقوووول

وطبعا ما تنسوش تدعولي كلكم فرصه بقى

هانصلي كلنا ان شاء الله

وبعدها ندعوا الدعاء ده

والى ما تعرفش تصلي تدعي مش مشكله

والى عايش بره مصر ياريت يحاول يدعي معانا فى نفس الوقت احنا الفجر عندنا الساعه الخامسه والثلث بتوقيت القاهره (عشان كده انا كنت محدد ساعه فى الاول مش أذان بس مين يفهم )

طبعا الى ما يقدرش يعمل كده يدعي بعد الفجر بتاعه وامرنا لله

يا ودود، ياذا العرش المجيد، يا فعالاً لما تريد أسألك بعزك الذي لا يرام، والملك الذي لا يضام، وبنورك الذي ملأ أركان عرشك أن تكفي المسلمين شر أعدائهم ، يا مغيث أغثنا، (ثلاث مرات)

اللهم إنا عبيدك وابناء عبيدك ، ناصيتنا بيدك، ماضين في حكمك، عدل في قضاؤك، نسألك بكل اسم هو لك، سميت به نفسك، أو أنزلته في كتابك، أو علمته أحداً من خلقك، أو استأثرت به في علم الغيب عندك، أن تجعل القرآن العظيم ربيع قلبي، ونور صدورنا، وجلاء حزننا، وذهاب همنا

اللهم اللهم عليك باعداء الدين. اللهم يا قادر يا قاهر يا قوي يا عزيز ،

اللهم عبادك المستضعفين في غزة تجبر عليهم اعداء الدين الملاعين والمنافقين الحاقدين اللهم فانصرهم على أعدائهم وفرج كربتهم وارحمهم ،

اللهم من يجيرهم سواك ومن يرأف بهم إلاك اللهم بك نثق وبقوتك نؤمن

اللهم زلزل الارض تحت اقدام اعدائنا اللهم شتت شملهم واجعل تدبيرهم تدميرهم

يا الله يا الله يا ذا القوة والملكوت ليس لنا رب سواك

يارب ارفع عن المسلمين اجمع الضر

يارب ولي علينا الصالحين

اللهم انصر المسلمين فى كل مكان

اللهم ثبتهم واضعف اعدائهم

اللهم نسألك الرحمه نسألك الرحمه نسألك الرحمه

لا إله إلا أنت سبحانك إني كنت من الظالمين،

لا إله إلا الله العظيم الحليم، لا إله إلا الله رب السموات والأرض ورب العرش العظيم

واللهم صلي وسلم وبارك على سيدنا محمد وعلى اليه وصحبه وسلم

طبعا يا حلوين الدعاء طويل شويه معلش انا استغرقت بس مش هاقصره طبعا مش هاتلحقوا تحفظوه ياريت تطبعوه او حتى تقروه ساعتها من الشاشه

والي يعرف يحفظ منكم يدعوا الى الله وهو ساجد

واوعوا تنسوا تدعوووووولي باي حاجه كويسه يعنى الى يطلع من ذمتكم حلو

غزه....... بدون جعجعه

سلام عليكم

حقيقى يا جماعه احنا ناس نجيد التسقيف والتطبيل فى الزفه مووووووت .

من غير ما نعرف اساسا هى زفة مين

دلوقتي فى كلام كتير اوي بيتقال فى موضوع غزه والى له والى مالوش بتكلم

فى ناس عندها استعداد تفكر وناس لا

السياسه للاسف لعبه قذره

ده فى عصرنا بس

انما الرسول علية الصلاة والسلام كان سياسي ناجح بدون قذاره

اه كان رسول ونبي الا انى ارسى قواعد دوله قويه سياسيه وعسكريا لقرون مضت بعده

لحد ما شرفنا احنا واسلافنا وبوظناها ولله الحمد

والحمد لله اصبحنا كما وصفنا الحبيب المصطفى كغثاء السيل

عارفين يعنى ايه غثاء السيل ؟؟

بعد ما السيول بتخلص مخلفات السيول بقى بتبقى ايه ؟؟؟

حاجات كده بايشه وضعيفه صح ؟

احنا كده بقى

وليس عن قله كما قال الحبيب المصطفى ولكن عن ضعف ايمانا

المهم كلام كتير عمال يتقال

مصر يجيلها ويتحط عليها قافله المعبر

مصر المفتريي عندهم جيش ومستخسرينه

مصر المفتريين عندهم 80 مليون شحط ما بيجوش يحاربوا ليه

مصر مصر مصر وكأن الدنيا كلها خلصت ما عادتش الا مصر

واحنا كشعب مش فاهم حاجه ومش واثق فى حكومته بنهلل وراهم ونقول ااااااااااه

عموما انا طبعا قلبا وقالبا مع اهل غزه ومع كل مسلم مقهور على الارض

والله وغير مسلم كمان

الا انى اخص المسلمين طبعا بشفقة قلبي اولا

نفتح المعبر اووووووك

انما تبقى الحدود ميييييغه لا طبعا .

دى مش حدود عربيه حتى خالصه

دى حدود مع دوله معاديه ومش اي عداوه

الى بيحصل ان بمجرد فتح الحدود الفلسطنين عايزين يدخلوا بعربياتهم وعيالهم وبيوتهم كمان

وكمان قوات حرس الحدود هناك ما تقدرش تفتح الحدود بالسلاسه دي يا جدعان لو في حرب

لازم تعزيزات توصلها

والى انا شايفاه انهم جابوا صور من الصبح للمعبر مفتوح

حتى ان فى واحد طلع اتحدى حماس انهم يصوروا معبرهم ان كان مفتوح اصلااااااااا وده حصل يوم الحج برضه

ارجوووووووووكم بلاش الجعجعه واحنا مش فاهمين حاجه

والى شايف نفسه جدع يروح يتفضل الطريق قدامه والمعبر مفتوح ويروح يحارب

لكن بصدورنا عريانه لو روحنا كلنا هانموت زيهم

وحكوماتنا حكومات كلها فاسده وضعيفه وامرها مش بايدها وكلنا عارفين كده

وبطلوا يا عرب تهبهبوا على بعض من فضلكم

يوما من الايم حطيت صباعي فى عين واحده فلسطينيه كانت معايا فى الكليه بتجعجع برضه وبتقول 70 مليون مصري مش عارفين يطلعوا اليهود من بلدنا

الصراحه البجاحه غاظتني وقلتلها 70 مليون مصري ربوك وآنوكى وعلموكى انتى وابوكى واخواتك وعيلتك كلها وعايزه تقعدي تبرطعي هنا انتى واهلك ونروح نحاربلك ورونا انتم الهمه الاول وبطلوا تهربوا من بلدكم .

مش باهاجم الفلسطنين يا جماعه دول مقطعين قلبي الا انى احق الحق برضه . ان كانوا هما اصحاب الارض نفسهم يدعوا انهم مكبلين الايدي ضعاف ما يقدروش يرجعوا بلدهم يحاربوا يبقى لسانهم في بؤهم بقى .

نفتح المعبر وناخد عندنا الفلسطنيين كلهم زي ما هما عايزين . ونكون نفذنا المخطط اليهودي بحاذفيره.

كل الناس كانت بتبارك للفلسطنيين على غزه

وانا كنت فى بالي باقوووووول مبروك عليكم الطحن عشان هما بيلموكم فى مكان واحد عشان يطحنوا على كيفهم يا حلوين .

عارفه ان كلامي مش هايجى على هوا ناس كتير لكن ده رايي

ولو سمحتم نعمل حاجه يمكن تكون اجابيه بدل النواح الى بتنوحوا ده

بادعوا كل مسلم او حتى اي دين انه يتضامن مع اهل غزه بالدعاء

ولانى طول عمري باتمنى من قلبي اني اشوف المصريين او العرب او المسلمين متجمعين على قلب رجل واحد

زي ما باشوفهم كده يوم كاس افريقيا ولا كاس اي حاجه تانيه من البتنجان المخلل ده .

واشوف كده اديهم مرفووووووعه لله فى وقت واحد وبيقولوا ياااااااااارب .

من فضلكم تدعوا بكل الطرق سواء هنا او على الفيس بوك للتضامن ده

ونختار وقت كلنا فى وقت واحد نرفع ادينا لله عز وجل وندعوا برفع الغمه عن اهل غزه وعن المسلمين جميعا

وليكن الوقت ده مثلا فى الثلث الاخير من ليلة الجمعه الجايه ولو حبيتوا نحدد ساعه معينه

وطبعا انا اخترت المعاد ه تحريا لاوقات الاجابه

ولو حبيتوا نوحد الدعاء كمان وانزلكم الدعاء هنا من بكررررررررررره

عايزه رايكم بسررررررررع عشان ما عادش فى وقت