مش تمثليات .. لعلكم تعقلون

سلام عليكم

كل سنه وانتم طيبين يا جماعه رمضان فى اواخره واتمنى يكون كان رمضان سعيد ومبارك عليكم وتعيدوا على خير وربنا يعيد عليكم الايام الحلوه دي بالخير ان شاء الله

طيب انا بقى فى كلمتين واقفين فى زوري مش هارتاح الا لما اقولهم طبعا واكل دماغكم

ممكن حد يفهمنى ايه الى بيحصل ده فى رمضان فى الشوراع والمساجد والبيوت والهبل الى ماشي فى البلد ده

اليكم بعض المشاهد الى بتغيظني وتعليقى عليها

انتى بتروحي تصلي التراويح ؟

لا يا حاجه والله ما بينفعش معايا النظام ده عشان العيال انا لو صليتها فى البيت يبقى من الله

ليه بقى ان شاء الله وانتى وراكي ايه

يا حاجه ورايا كتير والله انا ساعات باجي بالليل ما اقدرش اصلي اعمل ايه يعنى

لا يعنى ايه تعملي ايه ؟دى سنه زي ما بتقدري تعملي شغل البيت والعيال تقدري تصليها

يا حاجه سنه مش فرض يعنى اذا كان الفرض لو انا تعبانه ممكن اصليه وانا قاعده

لا مش مهم شغل البيت المهم تصلي التراويح طبعا

منين جابت طبعا دي حد يقولي يا ناس

الاقي المحلات قافله لحد الساعه تسعه وعشره اصل عشان التراويح يا فندم

الله فى ايه

مين يقول كده ناجل الشغل ونفضل فاتحين محلاتنا لحد الفجر وفى وقت الشغل اصل احنا بنصلي

طيب ما الرسول صلى التراويح مره واحده بس فى جماعه وغير كده كان بيصليها لواحده

ما تصلوا فى بيوتكم اخر الليل لما تخلصوا شغلكم ومصالح الناس ؟؟!!

عمر بن الخطاب هو الى عملها فى جماعه طيب ماشي عمر بن الخطاب كان شعبه شبعان ومرتاح وزي الفل عقبالنا كده ان شاء الله

عمر بن الخطاب على عينى وراسي وحبيبى والله بس السنه هى سنة رسول الله مش صحابته الكرام

المشاهد المفزعه بقى

في

صلاة التراويح وصلاة التهجد

راحه تصلي ولابسه عبايه شيك اوي ولابسه نص كيلو دهب وميك اب على خفيف كده على اساس انها مش حاطه عيب دي راحه تصلي وريحة البرفان جايه اخر الشارع والعربيه والخدامه مافيش مانع

مش حقد يا جودعان والله لكن يعنى هي بقت كده ؟؟ نقلبها بقى تفاخر بالعربيات والخدمات واللبس والدهب ؟؟

مشهد اخر(يفقع برضه)

انتى بتصلي التراويح فين ؟؟

فى الجامع الفلاني

يا شيخه لا انا باروح الجامع العلاني اصل الجامع الفلاني ده بقى خنيق كده والناس الى فيه بقوا بيئه الجامع العلاني بقى هو الى ماشي اليومين دول

اه يا مرارتي الى شلتها من ست سنين ياني

ماشي اليومين دول ؟؟ قولوا انتم دول ايه ؟؟

المساجد

واه ثم اه ثم اه من المساجد وميكروفناتها الى ربنا مبارك فى عددها

صلاة العشاء والتراويح لحد الساعه 9

ودرس بعد الصلاه

وعلى الساعه واحده نبدأ صلاة التهجد بقىىىىىىىىى ايه هاتكفروا ده احنا فى رمضان مش هاتصلوا تهجد

ويادوب يبطلوا نص ساعه يتسحروا وجري على الميكروفونات تاااااني قرآن الفجر والادان الاول والادان التاااااني

اييييييه عشان الناس تقوم تصلي الفجر

لا اله الا الله

الناس الى بتصلي فى بيوتها تعمل ايه طيب تصلي ازاي ده احنا ما بنبقاش سامعين بعض فى البيت والله بدون مبالغه

لو ما كناش نقفل الشبابيك كلها بالازاز ما نسمعش بعض

نموت بقى نفطس عشان تستريحوا

ما حدش يقولي ما تنزلوا تصلوا

هو مين بنى ادم فاضي لدرجة انه يقضي فتره ما بعد الفطار كلها فى المسجد مين يقول كده

ده احنا كلنا مطحونين فى الدنيا فى اشغالنا وبيوتنا يعنى ما وصلناش من الرفاهيه لسه ان الشعب كله يتفرغ للعباده نص اليوم

ولو كان حد فينا فاضي كده ما يحرمش باقي الناس من حياتهم يا اخي تعبد براحتك انا ذنبي ايه

واحد شقيان طلعان عينه طول النهار من حقه يرتاح ماهو الشغل ده عباده والله

ولا يكلف الله نفسا الا وسعها انتم هاتخلوا الناس تكره نفسها ليه يا جدعان

ممكن يجيله يوم ويقوم الله برضه ويصلي ويتعبد وكل حاجه بس مش كل يوم كل واحد له ظروووووفه

لييييييييه تعملوا كده ليييييييه

هى تمثليات ؟؟ ده بينكم وبين ربنا والله

المشهد التالت

عزايم ايه وكحك ايه الى الناس شغالين فيه طول رمضان ده رمضان ده شهر عباده لازم الواحد يتفرغ للعباده

الله ؟؟!؟!؟!؟
هو يجرى ايه لو الواحد عمل عزومه بغرض افطار صائمين ... هو دي مش عباده ؟؟
هو يجرى ايه لو الواحد عمل كحك بغرض ادخال الفرحه والسرور على اهل البيت والعيال ... ما ينفعش تبقى عباده ؟؟؟
هى العباده مصحف وسجاده وسبحه بسسسسسسسسس

طب ازاي ؟؟ كان الكون يعمر ازاي

ما كان ربنا خلقلنا الاكل والشرب كده جاهزين بقى وهو قادر على كل شيء عشان نتفرغ بقى احنا للعباده

القرآن

جميل فل حاجه حلوه اوي اوي اننا نختم القرآن فى رمضان بس خد عندك الاتي:

يا انسه ممكن تجبيلى مقاس اصغر من ده

تقوم وتبصلي باعياء واستغلاس كده وهى بتقفل المصحف وبدون ما تتكلم تروح تجيب المقاس وترجع تاني تفتح المصحف وتقرا

ايييييييييه عايزه تلحق تختم المصحف فى رمضان

وشغلك يا هانم الى ائتمنك عليه صاحبه مش عباده ؟؟

وانتى قاعده تقري بالشكل ده وسط محل كبييييييييييير كده فاهمه ايه من الى انتى بتقريه

ولا هى ور ور ور ور وخلاص ولا ايه ؟؟؟

من فضلكم اقروا كل يوم صفحه واحده لا لا ايه واحده بس تدبروها واعقلوها ويا حلاوه لو تعملوا بها

ما يبقاش بنقرا واحنا كالحمار يحمل اسفارا وبس نسمع فى المكاتب والتليفونات انا خلصت كام جزء وختمت مرتين وختمت عشر مرات

الامام ابن حنبل بلغه ان احد تلامذته بيختم القرآن فى ليله

فبعت له وقاله اذهب واقرأ القرآن اليوم كأنك تقرأه علي

لما رجع تلميذه كان قرأ عشر اجزاء بس

فقاله ارجع واقراه كانك تقرأه على رسول الله صلى الله عليه وسلم

فرجع وقاله انه لم يكمل حتى جزء واحد

قاله اذهب اليوم واقرأه كما لو كنت تقرأه على الله عزو وجل

فرجع التلميذ وقاله باكيا انه ما كملش الفاتحه طول الليل ؟؟؟!!

تدبروا لعلكم تعقلون

ربنا بيقول ايه

انا انزلناه قرانا عربيا لعلكم تعقلون

تدبروا القرآن ارجوووووووكم وبلاش التمثليات والهبل الى شغال ده والله العظيم ما هو ده المقصود من العباده والتعبد ولا دي الطريقه الى المفروض نعيش بها فى رمضان

انا مش باقول ما تصلوش فى الجامع

لكن كمان مش كده الوضع كله مش صح

فكروا شويه من فضلكم قبل ما تسنوا سكاكينكم عليا

عارفه انى طولت عليكم بس عادي عادتي ولا هاشتريها

جبتوا لبس العيد ؟؟

الى افراد عائلتي الكرام واصدقائي واي حد تاني

سلام عليكم

عشان تصدقوني بس ان اسكار كان عنده حق

اليكم هذا الاعلان الهام جدا والى كل من يدخل هذه المدونه ان يعلقه حلق فى ودنه طول عمره

وعلى وجه الخصوص افراد عائلتي الكبيره الجميله على الاخر

انا باكتب فى مدونتي دي الى انا عايزاه مش الى اي حد تاني عايزه

باكتب كتير مواقف شخصيه حصلتلى انا شخصيا وتخصنى انا شخصيا وما دام انا طرف فيها من حقي اكتبها من غير ما ارجع لحد فيكم

وانا مسؤله عن كل كلمه على المدونه دي قدام ربنا وقدام القانون وقدام التخين فى البلد دي

الى فيكم شايف ان اي حاجه باكتبها بتمسه شخصيا وبتنتهك خصوصياته يتفضل يكلمنى وجها لوجه

او يتفضل يروح يرفع عليا قضيه ولو كان له حق عندي ياخده

عادي القضايا مش معناها ان احنا مجرمين ولا بلطجيه بالعكس ده اسلوب حضاري عشان كل واحد ياخد حقه

انا ما باغلطش فى حد وما باكتبش غير الحق

ده انا حتى كتير بازوقه عشان ما اجرحش حد وده مش عيب ولا نفاق وانما حفاظ على شعور الاخرين

صراحه بدون بجاحه

انا مش باقول كلمه وانكرها ولا امسحها ولا اقول لا ما قولتش

اي حد من عيلتى او اي حد يعرفنى كويس يعرف انى اقول الى انا عايزاه ولاي حد وما بيهمنيش

انا لا باخبي شخصيتى ولا مخبيه على اهلي وعيلتى ان ليا مدونه

ويظهر ان هى دي المشكله

بمعنى انى لو كنت شتمتكم حتى وانتم ما تعرفوش طريق المدونه كان هايبقى عادي

والى خايف من نشر موقف عمله معايا او مضايق او مكسوف او اي حاجه تانيه يبطل يكلمنى

يتبرى مني ويبعد عني وانا هابقى اغنيله

للمره التانيه الى له حق عندي يتفضل يجى ياخده

واعرفوا ان لو ليا حق عندكم هاخده ان شاء الله

ولو اتنازلت عنه فى الدنيا (بمزاااااجي )

هاخده منكم فى دار الحق يوم الحق بيد الحق

وحسبنا الله ونعم الوكيل

قال الحكيم اسكار : انا محاط بشله متخلفه

سلام عليكم

اخبار الصيام معاكم ايه ؟

ولله الحمد البلوج كله بيصوم وهونايم ولما بيصحوا بيفطروا ويرجعوا ناموا تاني

انا عندي 3 بلوجات اكتر نسبة مشاهدات فى البلوج عندي بلوج المطبخ حاجه زي الفل الشعب ده يا ولاد والله

المهم انتم تنوروا فى اي بلوج ولا يهمكم يا بشوات

الحقيقه انا عندي انفلونزا ووجع فى النافوخ فوق العاده ومش عارفه ارغي ولا احقق وادقق ولا اتناقش ولا اتكلم من عقلي خالص مالص بالص

بس انتم وحشتوني قلت اجي اسلم عليكم كده واقولكم على ما يجول بخاطري فى هذه اللحظه بالذات

انا زهقااااااااااااااااااانه

ايوه زهقت من كل حاجه

زهقت من التخلف والغباء

والشخصيات الرخمه

والشخصيات الى ما بتفكرش

والشخصيات الى بما بتفهمش

والشخصيات الى بيستهبلوا

والشخصيات الى سايقين الهبل على الشيطنه

والعيال ا لمدلعه

والابهات والامهات الى حاطين اديهم فى ا لمايه البارده

والتواكل والكسل والتناحه والصفاقه

والعواطليه فعلا ومعنا

وكل حاااااااااااااااجه قرفت من كل حاجه من الحاجات دي

اعمل ايه ؟؟

حد يدينى حل

ما عدتش قادره استحمل ولا اسمع ولا اعرف ولا اتناقش ولا اتكلم

اعمل ايه ؟؟

اهاجر طيب ؟؟

جايز يكون ده الحل ؟؟؟؟؟؟؟؟؟؟؟؟

اعمل ايييييييه

عارفين فيلم الليون كينج ؟

الكارتون اه

الاسد اسكار قال كلمه خااااااااااااالده باحبها موت وارددها بين طياتي بين الفينه والاخرى

قال انا محاط بشله متخلفه

والعاقل الرزين ابو بال طووووووويل بوفاسا قال اعمل معاه ايده يا زازو

وزازو حكيم عصره قاله كل عيله فيها واحد سيادتك متخصص دايما فى افساد الاوقات السعيده

اعمل اييييييييييييييييييييه؟؟؟؟؟؟؟؟؟؟

حد يقولي اعمل ايه ؟؟

ونكتفي بهذا القدر من الخنقه عليكم

مبطلات الصوم .... على الرؤيه الاسلاميه

مبطلات الصوم

موضوع جديد على مدونتى

رؤيه اسلامية متواضعة

اتفضلوا اقروه ويارب اقدر افيدكم

وربنا يتقبل منا ومنكم صيامنا ان شاء الله

فيلم الشيخ حسن

السلام عليكم

شوفوا بقى انتم تشوفلكم حل مش فاضيه ومش لاحقه ومش عارفه اكتب

والاغلس من كده مش عارفه اتابعكم فى مدوناتكم

بجد متاسفه لكل الناس لانى مش عارفه اتابع خالص الايام دي رمضان بقى وكل سنه وانتم طيبين

النهارده يا قوم هاقولكم على كلمتين كده فى بالي من زمان وفضلت متحفظه عليهم عشان اقولهم لكم ونرغي بشأنهم

الموضوع متعلق بفيلم الشيخ حسن

طبعا الفيلم ده فيلم قديم لحسين صدقى الراجل ده كان محترم اوي يا جماعه بجد حاجه مفتقدنها حاليا فى الفنانين بتوعنا بكل صراحه

له مجموعة افلام انا باعتبرهم افلام هايله جدا وبتناقش فكر حلو اوي

بصرف النظر بقى عن انتى مضايقه مني والكلام بتاعهم المجبس ده ما علينا خلينا فى الفكر

نركز اكتر على فيلم الشيخ حسن الى حسين صدقى كان البطل فيه وكمان حواره واخراجه واشترك فى تاليفه واعتقد انه من انتاجه وتوزيعه كمان

يعنى الراجل كان قايم بالفيلم تقريبا

اولا الفيلم بيناقش فكره ما حدش دلوقتي يقدر يتكلم عنها اطلاقا وهى فكرة اسلام بنت مسيحيه من اصل اجنبي ودي حاجه شئنا ام ابينا موجوده

والعكس موجود برضه ما قلناش حاجه عشان كده باقول كان عندهم وقتها الجرأه يناقشوا من غير ما يحسسوا على بطحه ولا حاجه

ثانيا داخل الفيلم بقى اتعرض لنقط معينه من وجهة نظري هى نقط مهمه وجامده جدا

خلينى اقولكم الاول ملخص للقصه وبعد كده اقولكم كام مشهد معلقين فى دماغي

القصه ان فى بنت هى واخوها اجانب وعايشين فى مصر ودوروا على مدرس لغه عربيه عشان هما بيدرسوا فى مصر وكان الشيخ حسن الازهري ده هو الى بيدرسلهم

البنت بتقع فى حبه وهو كمان بيحبها وبيتجوزها بعد طبعا مشاكل مع اهلها ورفضهم لكونه مسلم وهكذا بقى احداث الفيلم بتكمل

المهم بقى المشاهد الى علقت فى دماغي

اولا لما طلب يصلي وهو عندهم ولقى عندهم سجادة صلاه وما للموقف ده فعلا من اهميه انهم كون هما مسحيين لكن عايشين فى بلد مسلم ولهم اصدقاء مسلمين راعوا ده وحرصوا على وجود سجاده صلاه فى بيتهم

ثانيا : لما البنت وقفت تتناقش مع الشيخ حسن وتنقد الدين الاسلامي بكل حريه وهو كمان كلمها بكل عقل وهدوء واحترام للراي ا لاخر وناقشوا نقط مهمه جدا جدا

زي مثلا التعدد وقالها بكل بساطه احنا عندنا تعدد زوجات اه بقوانين وروابط وده افضل بكتير من وجود تعدد علاقات بدون روابط ولا قيود محدده وقال كلام تاني كتير شوفته كلام صح جدا

وكمان لما قالتله ليه بتضيقوا على الستات فى اللبس بالحجاب وكده .

قالها عشان نحافظ عليها ونحافظ على المجتمع ككل

قالتله طب وليه كل ده لو كل الستات لابسين عادي مش هايبقى فيه فتنه ولا حاجه الرجاله هايعتادوا على الامر

قالها ومين قالك اننا مش عايزين الفتنه ؟ ده احنا خايفين على الفتنه منكم

قالتله ازاي ده ؟

قالها زمان مش امروء القيس عمل قصيده شعر فى صباع حبيبته الى بان ما شوفناش حد عمل قصيده فى شاطيء استانلي مثلا

احنا عايزين الفتنه تفضل موجوده بس فى مكانها (يقصد بين الزوج وزوجته )

الموقف الى بعد كده هو لما هى بدأت تستفسر عن الاسلام وتسأله انت عايزنى اسلم قالها انا يسعدنى ده لكن لما تكوني عاملاه عن اقتناع مش عشان ترضينى وخلاص

وكمان هى فضلت تقرا فعلا وتسال مش الحكايه عبط وهبل ومدام باحبه اعمل اي حاجه

المشهد الى بعد كده الى فطسنى من الضحك الصراحه ولقيته حقيقى جدا فعلا هو موقف خالها القس لما استنجد به حسن بعد تفاقم المشاكل بينهم بعد الجواز

استنوا احكي لكم الموقف عشان تفهموا قصدي

ومبدأيا دي صوره من المشهد ده

اهلها راحوا ومعاهم البوليس وبلغوا انها مخطوفه وهى قالت انها مراته وطلعوا القسيمه ومشيوا اهلها وامها مرضت وهى حبت تروح تشوف امها

ابوها منعها وقالها روحي اطلقي منه وانا ادخلك البيت فراح الشيخ حسن استنجد بخالها القس وقاله انا متعشم فى عقلك وكده يعنى

الراجل اتكلم بكل هدووووء وعقل وميه ميه وقاله طيب لو كانت المشكله كده انتم عندكم طلاق وتردها عادي طلقها لحد ما تمرض امها وتطمن عليها وابقى ردها تاني ( كهين كهين يعنى ههههههههههههههه )

وراح الشيخ حسن عمل كده فعلا طبعا خدوا البنت وقالوله العب بعيد يا عم الامور وساعتها برضه خالها قاله وانا اعملك ايه بقى ده بنتهم وانت طلقتها ما اقدرش اتدخل ( مش قلتلكم كهن )

اوعوا المسحيين يزعلوا انا باهزر مش عايزه حاساسيه زياده وحركات من دي بقى

اخر مشهد فى الفيلم بقى الى بجد كان مؤثر لما البطله ماتت وهى بتولد ومنعوا من انه يشوفها ودخلوا لها خالها القس بس على اساس انها بتحتضر وقالتله انها مسلمه وطلبت منه انه يسلمها لجوزها

وطبعا هو كان عنده من الامانه انه فعلا عمل كده وسلمها لجوزها بعد وفاتها

وعجبنى اوي اوي اظهار القس فعلا بشكل مش وحش ولا غباوه ولا حاجه فى حين الفيلم بيتكلم عن الدين الاسلامي فى اغلبه بالعكس هما جابوه راجل حكيم ومحترم وعاقل ومؤدب وعنده ضمير ( كهين شويه بس عادي يعنى ههههههه )

وكان دايما الشيخ حسن يوقره جدا وهو بيكلمه ويقوله انت رجل دين وانا واثق فى عدلك وما الى ذلك

طبعا بتقولوا ايه الست القديمه الى بتتفرج على افلام قديمه دي

والله انا صدفه يعنى قريبا شوفته الفيلم ده ما كانش قصدي ولا كنت شوفته قبل كده اساسا

بجد فرحت لوجود فيلم محترم كده وراقي كده وده كان بيتعمل زمان على ادين ناس فعلا فنانين وفى نفس الوقت عندهم فكر واحترام

ورغم انه خلال الفيلم تلاقي المفروض طلعت بمجموعه لا باس بها من الاحاديث والافكار الاسلاميه الا ان الفيلم برضه مش ممل يعنى ولا افتقد جوانب الحبكه والقصه والدراما العاليه جدا

ياريت تتفرجوا عليه لو صادفكم

انا حاولت اجيب منه اجزاء ما لقيتش حاجه على النت

لكن هو بيجى على قنوات الافلام كتير

وكفايه عليكم كده عشان احنا فى صيام زي بعضه

(امال لو ما كناش فى صايم كنتى عملتي فينا ايه يا صبرني )

عادي كنت هارغي برضه زي كده وايه يعنى

موضوع جديد اهو يا خالو ولا تزعل اي خدمه

كل سنه وانتم طيبين .. تعالوا خدوا الفوانيس

كل سنه وانتم طيبين يا شعب البلوجر العظيم

اي والله عظيم فعلا

وما زلتم وحشينى جدا جدا ومش عارفه اتابعكم حق المتابعه برضه

ولسه مش عارفه هايجرالي ايه فى رمضان الحقيقه جايز اتلاشى

المهم كل سنه وانتم طيبين ويارب رمضان كريم ومبارك عليكم جميعا وعلى ولادكم واهلكم وحبايبكم والمسلمين والعالم كله ان شاء الله

انا جبتلكم فوانيس معايا شوفتوا الحلاوه بقى

مع ان احنا ما اشتغلناش فى الفوانيس السنه دي يعنى جايبالكم من بره شوفوا التضحيات بقى

ده فانوس مصري تقليدى شحط محط للناس الكباره بس الى هما يقدروا الفن الجميل

مدوا اديكم جبتلكم محل بحاله اهووووو

وعشان الاطفال برضه الى الصين لحست دماغهم جبتلهم شوية فوانيس بلاستيك بتقول حلو يا حلو باللغه الاكواويه اهو مش حارمااااااااااكم

وهذه مفجأة السيزون بقى يا رجاله عمك كرمبو وخالتك بايره عملوهم فوانيس الفانوس تمنه من تلاتين لستين جنيه حسب حجمه وزغرتي ياالى ما انتيش غرمانه

وشعب يستاهل الى يجراله

نفسي اعرف الملحق التجاري بتاعنا فى السفارات بيعملوا ايه ؟؟

البعثات الدبلوماسيه بررررررررره بيعملوا ايييييييييييه

الجماعه بتوع الصين اعتقد مركبين كاميرات علينا فى البيوت واحنا مرزوعين زي الهبل

نستاااااااهل ولا ما نستاهلش

حقها ولا مش حقها

ما علينا يا جدعان جايه اقولكم كل سنه وانتم طيبين ندخل فى كلام ملعبك

والياميش بقى اجازه السنه دي ما حدش يجيب ياميش

وانا ما عنديش ياميش ما تطمعوش فى الموسم الى ابويا جايبهولي

هههههههههههههههههههههههههههه

ارجوكم خلوا رمضان شهر كرم مش فى الماديات والاكل بس فى الاخلاق والتسامح من فضلكم من فضلكم

وكل خطوه كده تعملوها فى رمضان حاجه بس بسيطه باطلبها منكم قبل ما تخطوها اعقد النيه على انها فى سبيل الله تعالى

الى تعمل عزومه ما تقعدش تنفخ وتقول كان يوم اسود يوم ما وافقت على العزومه وهى مره وما عادتش هاتحصل تاني

لا ياا ختي انوي العزومه افطار صائم كده وخليكى حلوه

وابوس اديكم الستات الى راحه تصلي التراويح بلاش العبايات الى مليانه بربرق وميك اب وبرفانات فى الجاااااااااامع معلش يا اختي انتى وهي تعالوا على نفسكم حبه

وبس خلاص بقى سبوني انااااااااام

وكل سنه وانتم بالف خير ودايما يارب متجمعين على كل خير يا اهل البلوجر العظام

الامهات من النوع ده هاعملهم مقصله .. والابهات كمان

سلاااااااام عليكم

الاول قبل ما ننصب المقصه ونشتغل واحشني يا جماعه بشكل مش معقول

وزعلانه اوي عشان مش عارفه اتابعكم واتابع مدوناتكم

انا كنت الاول فاتحه المدونه بتاعتي اووووول ذا تايم دلوقتي من كل يومين بافتح كده ابص عليها يا لحقت يا ملحقتش

حتى لما ربنا يفتحها عليا كده واقعد اقرالكم شويه عشان اعرف اخباركم ساعات مش باكمل الموضوع او مش اعلق

معلش بجد يا جماعه اعذروني الايام دي انا باخد كورس كمبيوتر وباودي العيال تدريب باسكت وشويه مناسبات عائليه لطيفه بالاضافه الى الاستعداد لرمضان


يلا بقى ننصب المقصله ونشتغل


شوفوا يا جماعه انا ملاحظه ان الناس خلاص بجملة الهبل الى بقى موجود بقوا خلاص مش بيفكروا فى صحة العيال

صحة العيال دي مش بس نوديهم اكبر مستشفى لما يسخنوا ولا نكيل لهم ادويه وحقن ولا نحاسب عليهم من الجراثيم القاتله ونغسل اديهم عشر مرات فى اليوم

لا لا اهم حاجه لصحة العيال فعلا الغداء المتوازن السليم النضيف المفيد الي فيه كل حاجه

والخضار الخضار الخضار
واللبن الحليب والكالسيوم عموما حط تحتها ميييييت خط
والعسل الابيض الصبح على الريق

انا ليه باقول الكلام ده ؟؟

عشان بقيت اشوف عند دكتور الاطفال عيال عندهم انيميا فظيعه وما عندهمش اي مشاكل الدكتور بيقول سوء تغذيه

ومره لقيت واحده صاحبتي ولادها كلهم مكسورين ومتجبسين وورا بعض

وهى كمان حصلتهم ؟؟؟!!!!

ايه يا بنتى مالكم ؟ قالتلي مش عارفه والله نصيب

ماشي يا ستى ما قلناش حاجه قدر الله وما شاء فعل

انا اقول الموضوع عادي لو الواد وقع مثلا من على ارتفاع مترين ثلاثه فاتكسر

انما مش عارف بيشاور بايده لفوق ايده خبطت فى الحيطه فاتكسرت ؟؟؟!!!

انتى بتشربيهم لبن ؟؟
قالت لا والله انا فعلا بعد كده هاهتم بالموضوع ده ؟؟؟!!!!

بعد ايه ؟؟ ده قربوا يبقوا مراهقين يا امي

اعرفوا يا جماعه ان عمر ا لبيت ما يكون قوي الا لو كان اساسه قوي

وانت بتربي طفل لازم تطلعه قوي

ارجوكم زي ما بتهتموا انكم تعلموهم فى احسن مدارس وتجبوا احسن مدرسين وتخنقوا فى العيال عشان يجيبوا فول مارك

لازم تهتموا ببناء جسمهم

كل حاجه ممكن نعوضها بعد ما يكبروا نعلمهم الى احنا عايزين نعلمه ليهم

الا الصحه وبناء الجسم لو ما اتاسسش وهما صغيرين انسوا بقى الاساس بيبقى بايظ

انا دايما اقول لولادي عشان اقنعهم يشربوا لبن وياكلوا بيض

الجاموسه بنحلبها مرتين فى اليوم
والبيضه بتبيض بيضه واحده فى اليوم

ربنا خلقهم كده سبحانه وتعالى عشان نشرب الصبح كوباية حليب وبالليل ناكل كوباية زبادي وناكل بيضه واحده في اليوم

والخضار يا ناس

انا مره قابلت ولاد صغيرين مش عارفين الكوسه والبسله

ليه عشان مامتهم مش بتحب الكوسه وباباهم مش بيحب البسله فهى مش بتطبخهم بقى بتكسل تعمل صنفين

طيب العيال دي ذنبها ايييييه ما ياكلوش الخضار وماي عرفهوش وعشان ما اتعودوش عليه هايطلعوا ما ياكلوهوش

والاقي العيال فى المدرسه عند مريم معاهم سندوتشات سوسيس ولنشون وبلا ازرق ما نعرف حاطين فيه ايه

لييييييييه بس

الطفل يفطر قرف من ده ليييييييييه

وياكله اصلاااااااااا لييييييييييه

ما حدش يقولي العيال بيطلبوه العيال اصلا ما كانوش يعرفوه انتم الى جبتوه واكلتوه للعيال وعودتوهم عليه

انا عندي العيال مش بيحبوه عشان مش متعودين عليه

مالها الكوفته بتاعة امي وامك ؟؟

مش الام بس الى مسؤله هنا لا طبعا

لكن بالنسبه لموضوع الاكل هى المسؤل الاول انما كمان الاب مسؤل عن الكل بقى عن الام وعن الاطفال لازم هو كمان يوجهها

ولا التقليد السخيف البايخ المقرف بتاع البيبسي على الاكل
ارجووووووكم لو حبيتوا تبوظوا معدتكم وجسمكم مش لازم تعملوا كده فى اولادكم كماااااااان

العيل من دول بقى عنده 15 سنه وعنده التهاب فى المعده ؟؟!!!!

ارجوكم يا امهات اطبخوا فى بيوتكم وبلاش الدليفري ابوس اديكم

خلوها مره واحده فى الاسبوع ولو بلاش يكون احسن

اطبخوا خضاااااار واكلوا العيال خضار

بالذوق بالعافيه يشرب كل يوم كوباية حليب وبيضه

حليب والنبى حليب طبيعى طازه

مش لبن مجفف وياريت كمان ما يبقاش معلب ومبستر وملعوب فى اصوله

لكن لو مافيش غيره مااااااشي

بس مش لبن بودره ارجوكم


ولو ولادك صغيرين اوي ولسه مش عاجبهم طعم الحليب

اعمليه بالكاكاو او نسكافيه وشربيه منه وقلليل الكاكاو شويه شويه لحد ما هايتعود على طعم الحليب

ولو ما اتعودتش لما يشربه كل يوم بالكاكاو احسن من انه ما يشربوش اصلا

واكليهم زبادي

واعملي كاسرت ومهلبيه ورز باللبن وام علي وكله بالحليب الطبيعى والنبى عشان خاطري بلاش استسهال

والبيض طبعا كل يوم بيضه لازم

والخضار

وحاولي تعوديه ياكل سلطه من هو صغير

وياكل جرجير وبقدونس وخس وخيار على طول اعطيله فى ايده

من وهو صغير ومن اول ما يعرف ياكل

يارب تكونوا فهمتوا

وعليه قررت نحن صبرني يارب

ان لو لقيت واحده فيكم ولا واحد فيكم ولادهم عندهم نقص فيتامينات او حديد او كالسيوم او اي حاجه

يبقى ان شاء الله هناخده نفسحه فى المقصله الشيك الى فوق دي