ما هو احترام الراي الاخر

حد يعرف يعنى ايه احترام الراي الاخر او فكر الاخرين او معتقد الاخرين ؟؟؟

لللاسف الشديد اننا بنردده ومش فاهمينه...

احترم الراي الاخر يعنى اسمعه يعنى ما اسخرش منه  يعنى ما اقلش ادب واقوله انت غبي واهبل ومابتفهمش

حتى لو كان ده اصلا رايي فيه على فكره مش من حقي اصادر على اراء الاخرين

المشكله بقى  ان فى ناس بتقولك انا باحترم الراي الاخر ومعتقدات وفكر الاخرين

ولكن

بمجرد ما تدخل معاه فى نقاش فهو يعتبر انه لازم يقنعك ويكلمك  دائما من منطلق  انك غبي ومش فاهم او ضال محتاج لهدى من الله .. او اهبل ومضحوك عليك

النقطه بقى الى فقعاني وانا واحده شايله المراره مش حمل فاقعه خالص

هى ان الناس اليومين الى فاتوا يجيبوا واحد منشي كده وببدله وحلو ومزقلط ويقولك الوحده الوطنيه والدين لله والوطن للجميع  وحرية الفكر والمعتقد الدينى واحترام المعتقدات والديانات للاخرين ...... ويكلل البؤين دول بانه  كان له صاحبه مسيحى عادي وانه عمره ما سال حد على ديانته وانه مش مهم اصلا نعرف دينه ايه ويا حبذا لو راح داخل على خانة الديانه فى البطاقه وليه نكتبها ما مش مهم

طيب سؤال بس يا جدعان

هو يعنى احترام المعتقد الدينى للاخرين ؟؟

هل يعنى احترام المعتقد الدينى انى اجهل به وما اسلوش اصلا هو ديانته ايه ؟؟؟

ولا هو انى اعرف ان الى انا باكلمه ده مسحيى او مسلم او يهودي او بوذي او ملحد    ومع علمي بذلك فانا اعامله بكل ود واحترام ومافيش اي          ضغائن ما دام ما عمليش حاجه؟؟؟

انا اوقات باحس باحراج انى اسأل حد انت مسيحى ولا مسلم بسبب الفكر ده باخاف يهمنى غلط ولو هو مسيحي الهبل يشتغل  ويقول ده من ساعة ما عرفت انى مسيحي وهى مش طايقاني مثلا

ايوه ماهو الكتاكيت ماشيه فى امخاخ الناس كلها اصلا بصرف النظر هما مسحيين ولا مسلمين

مع انه عادي مفروض اسال عادي  لمجرد العلم

ايه المشكله لما يكون فى بطاقته مسيحى وعلى ايده الصليب واساله انت مسيحي يقول اه وبكل فخر واعتزاز زي ما انا باقول برضه بكل فخر واعتزاز انا مسلمه

هو من حقه يعتز بدينه مش فاهمه هما ليه الناس فاهمين النقطه دي  غلط

هاقول تاني احترام المعتقد الدينى هو انك تعرف معتقده وتحترمه

مش انك اساسا ما تحاولش تعرفه من اساسه

فى اليومين الى فاتوا سمعت هبل غيرعادي وكلام يفقع من الجانبين

مش معقول كده ابدا يا جماعه

احنا ليه بنزودها فى كل حاجه ونخلي كل حاجه اوفر ومبالغ فيها

القنوات كلها شغاله كلام عن الوحده الوطنيه الى هى فى الغالب واحد مسلم بيحكى عن صاحبه فى المدرسه  الى كان حبيبه

والمسلمين عمالين يطبطبوا على المسحيين بشكل برضه اوفر اوفر لحد ما انا حسيت انى انا الى فجرت الكنيسه اصلا طبعا بعض المسلمين مش كلهم  فى ناس عاقله ومعتدله طبعا

والمسحيين عاملين زي    ما يكونوا حسوا اننا  بنداريهم السكات وبرضه ساقوا فيها  وعمالين يهرتلوا فى كلام فارغ  وتلاقيهم ماشيين بيقلولك فى النص الخنازير وبناء الكنايس وخانة الديانه فى البطاقه واي هبل بقى وكل من له عيل بيبكي عليه فى الهيصه .....برضه مش كل المسحيين فى ناس عاقلين ومعتدلين

الى كل مسحيى على ارض مصر  كلنا طايلنا الهم يا اخويا لو مش مصدق جرب تبقى مسلم شويه وشوف يا حبيبى هايجرالك  ايه فى ام البلد دي

الى كل مسلم على ارض مصر  انت مسلم والاسلام فخر لك وعزه وكل ايه و كل حرف فيه وكل امر فيه اعتز به وافهمه صح  من فضلك يا تحط لسانك فى بؤك

ينفع يعنى الاقي واحد كاتب مقاله وبيقول  انا كرهت حصة الدين عشان كانت بتفرقني عن اصحابي فى المدرسه

ويقول انا شايف احنا بنتكلم  فى الدين اكتر من اللازم

وناس عمالين يسقفولوا ويطبلوله ايه القرف ده

هو احنا هانعقل امته ونبطل تسقيف وتطبيل امته ؟؟

انا على فكره مش معنى كده انى مش زعلانه  من الى حصل بالعكس ده انا زعلانه جدا على الناس الى ماتت

على قتل النفوس  على ترويع الامنين  على الصاق التهمه بالمسلمين بفعل ليس له اي علاقه بالاسلام

على ظهور العجز والاهمال من اجهزة الامن

على الوحده الوطنيه الى فعلا بقت مهدده

زعلانه اوي على  انى باشوف  المخططات احنا بنفذها ببراعه وغباوه

زعلانه على انى  شايفه ناس كتير مش فاهمه وبتتكلم وبتعك للصبح

ارجوكم افلا تعقلون

ملخص لقاء المنصوره

السلام عليكم

بتهيئلي ماحدش لسه لحق يكتب عن اللقاء عشان لسه ماحدش لحق يروح اصلا

اليوم كان جميل اوي يا جماعه مش معقول الجمال ده بجد

اممم نبتدي من اول اليوم

الاول اقولكم الحضور

فاتيما كتبتلي ورقه بالحضور وانا ضيعتها ايووووووون انا شاطره بقى يا فاتيما ؟؟

ويعنى انا عذبت فاتيما طول اليوم وانا ناسيه الاسامي كلها واقولها اسمها ايه  لمالخبطها هى شخصيا

المهم

اولا وفد القاهره

فاتيما  روح  قلب ماما   روح قلبي انا اصل

خالد همس الاحبا ب

ابو احميد

عبد الحميد من بورسعيد

حروف من اسكندريه

أ. ايهاب  الطائر الحزين

سما ليساندرا دمياط

وبتوع المنصوره

الغرباوي

ساره طوبار

امجد القهوجي

محمد متولي

ابراهيم العدوي

دعاء سلطان

الاء

مصطفى  فك زنقه
اسماء واختها هنا

مياده

ايمان سما مصر

 وطبعا طبعا اهم واحد فى الحضور :) رضا ... ايون اهم عاجبكم  ولا لا

طبعا بما انى من المنصوره بلد اللقاء فانا  روحت متاخره عن بتوع القاهره هههههههه بس معلش حصل خير

طبعا لان كان معايا شيل كتير فاستنيت رضا يوصلني

وروحنا لقينا وفد القاهره فى انتظارنا

وخدناهم وروحنا نصلي الجمعه الاول

وبعد ما خلصنا الصلاه نزلنا نلم فى المدونين قطعه قطعه

حيث ان هناك وفد من المدونين الخائنين راحوا دار بن لقمان بدوووونننا ايووون حصل  بس يلا زي بعضه مسامحنهم J وانبسطوا وشوفنا الصور على كاميرا سما

وبعدين لقينا مياده بتكلنا وبتقول انقذووووني انا فى المؤسسه بقالي ساعه مستنياكم ههههههههه

فدخلنا لها  ومعانا كل الحاجات  بتاعة البنات

والحقيقه هناك استقبلونا استقبال حاااااااااااافل

هههههههههههههههه

دخلنا لقيناهم بيتخانقوا  هههههههههههه

ايوه واحده من البنات بتتخانق مع المشرفه وبشده وصوت عالي ووقفت اسلك الخناقه واتحايل عليهم يبطلوا زعيق  وعيب كده يا جودعان طب استنوا لما نمشي وهما ابدااااا

واحده من البنات خطيبها جاي يزورها وعايزين يقعدوا فى مكان غير الى المشرفه بتقول عليه  يعنى خلاف فى وجهات النظر

الحقيقه البنت كلمت المشرفه وحش جدا والولد كمان خطيبها وقح جدا

المهم مش موضوعنا خالص هما اساسا مواضيع هناك كومبليكس

احنا سلمناهم الحاجات  بتاعتهم ولقيت بنت هناك فرحها بعد اسبوعين ندهت عليها تقولي ناقصها ايه

وقالت ان ناقصها  هدوم

وان شاء الله انا هاروح لها الاسبوع ده واخدها وانزل اشتري لها هدوم باذن الله

والخير الى جمعنا الحمد لله كان حوالي 2000 جنيه نقدي  وغير المساعدات العينيه  الى راحت مؤسسة البنات

والسخان الى الشباب اخدوه ودوه لمؤسسة الولاد   وطبعا انا باحب اسلم حاجات عينيه فاشتريت شوية قبل اللقاء ووديناه

والباقي الى جه النهارده لسه هانزل اكمل حاجاتهم واوديها

بجد يا جماعه احساس الخير ده جميل اوي اوي

ربنا يكرمكم ونكون دايما متجمعين  على خير يا اصدقائي الاعزاء

بعد ما خلصنا المؤسسات  لمينا بعض كده زي الشطار  وطلعنا على بامبو

طبعا ركبنا احنا الحريمات فى عربيتنا وعربية دعاء وبعنا الرجاله وده العادي طبعااااا هههههههههههه

ولسه البيعه الكبيره فى الاخر بقى

الجو الصبح كان مشمسسسسسسس وعلى الظهر كده قلب والدنيا بقت هوا وحاجه فل اوي

المهم روحنا بامبو انا بصراحه مازلت عاجبنى المكان

احنا كعواجيز الفرح هههههههه انا وفاتيما وابواحميد وخالد  وايهاب قعنا جوه ايون ما نسحملش البرد يا اخوانا العضمه كبرت

وطلبنا  الاكل  وكل الناس يا عينى نزلها الاكل ما عادا ابو احميد وخالد  هههههههههههههه

كانوا طالبين فراخ مشويه وهما يا عينى  جعانين وكل الناس نزلها الاكل هما اكلهم اتاخر يجى ساعتين

معلش يا جماعه عندي دي يعنى  برضه احنا صبرناكم بالكيك J

بعد ما الشباب اكلوا طلعوا بقى بره وركبوا خيل وانتشروا فى المنطقه ودعاء بصراحه ولدت لتكون فارسه

حتى المدرب بتاع الخيل قالها انتى عندك استعداد وهى هاتفكر تروح تتعلم

ابراهيم بقى الى تاعبنى دايما ههههههههه ركب خيل وهو نازل رجله شبكت فى السرج تقريبا  وقع وجه مصطفى يا ضنايا يلحقه راحت نضارته مكسوره

معلش يا مصطفى دفع ابراهيم تمنها

امممم فاضل ايه

حاولنا نعزم امجد يقعد معانا عشان ابو احميد يشرحله نظرية التحول ( والى بتقول ان الستات بيتحولوا بعد الجواز) بس ساره رفضت مش عارفه ليه J

وسمعنا شعر من امجد ومن الطائر الحزين

ورغينا انا وفايما كتير

كلنا اتكلمنا مع بعض كتير اوي  والوقت عدى مش عارفه ازاي  وكان وقت جميل اوي بجد

بجد الصحبه كانت جميله اوي يا ناس  ومتشكره اوي انكم جيتوا ونورتونا

ولما جينا نروح بقى البيعه الكبيره ايوه

متولي جاب لنا عربيات وركبنا كلنا وفضل يا عينى متولي وابراهيم مش لقينا لهم مكان ومش عارفه روحوا ازاي  هو انا صحيح كنت عايزه ابراهيم يروح ماشي ههههههههههه

بس متولي حرام تعب معايا الاسبوع ده خالص

وبعدين ركبنا مع دعاء نحن البنات ودعاء وصلتنا كلنا وما توهناش ولا اي حاجه ولا لفينا الكبري ورجعنا اني لا خالص خالص

ودعاء حافظه الشواااارع جداااا هههههههههههههه

الناس الى قابلتهم جديد النهارده

الاستاذ  ايهاب : انت  ما تعرفش اد ايه انت من الناس الى انا باحب اقرالهم جدا جدا والى عندهم فكر عميق فعلا ولما قابلت حضرتك النهارده  ايقنت ان كان عندي حق حضرتك حد محترم فعلا  وذوق ومهذب وكلامك بيشع منه الفكر والعقل المتزن .. وعلى فكره ده راي رضا برضه

حروف من اسكندريه : انتى عسوله اوي اوي بجد جايز ما اتكلمناش قبل كده كتر لكن اول لما شوفتك استريحت ليكى جداا

الناس الى ما عرفوش يجوا  لظروف  كان نفسكم معانا وافتقدناكم بجد

التليفونات

احمد سكر ..... الى احنا حظنا وحش عشان ما افضاش لكن كان معانا بنفسه

ريم .... الى عندها برد خاااااااالص يا عينى وحرارتها عاليا ربنا يشفيها

ستار ...... كنت حاسه انها  هاتنط من التليفون تيجى عندنا

الجواز وسنينه ... ما عملتش انقلاب زي ما قلتلها عشان تيجى الللقا ء

داليا قوس قزح ..... دولي حيااااتي كانت القاعده ناقصاااكي والله بجد  بس معلش ربنا يكتب لنا لقى قريب

اممممم مين تاني

يارب ما اكونش نسيت حد  ورقة فاتيما ضااااعت اهيء اهيء

كل الناس الى جم اللقاء فعلا وبجد شكرا  لكم ونورتونا واسعدتونا

ولكل المدونين  شكرا  انكم فى حياتي وشكرا انكم اصدقائي

وعقبال كل مره متجمعين فى الخير  دايما

قائمة طعام كافيه بامبو (لقاء المنصوره )

انا جبتكلم  يا قوم قائمة طعام الكافيه الى هانقضي فيه باقي اليوم لانهم اعتذروا ان يكون كل شيء حاضر هما اصلهم الدنيا هاديه عندهم يعنى مش زحمه

يعنى غالبا مش هايكون هناك غيرنا اصلا  وده احسسسسسسسن هانحتله بقى

المهم يلاا ختاروا بسرعه

قائمة كافيه بامبو

سندوتشات

كفته بانيه – هامبورجر – هوت دوج- فراخ بانيه سوبر بريمو-فاهيتا مكسيكى- فراخ فرايداي – شيش طاووق – كبده اسكندراني

كل السندوتشات دي تقريبا فى حدود عشره جنيه الواحد

حواوشي  بامبو  5.5

____________________

اطباق سريعه

مكرونه فتوتشينى == 18 جنيه

مكرونه بلوينز == 7.5

مكرونه بالسي فود === 35

مكرونه بالجمبري === 25

مكرونه بشاميل ===  مش مكتوب J

فتة سوري فراخ ===35

فته موزه بالخل والتوم ===35

نصف فرخه مشويه مع ارز بالخلطه ===30

طبق خضار مشكل ====7

____

ثم نأتي للمطبخ الفلاحي

معمر

طواجن خضار فى الفرن

فته  بالكوارع

ممبار

 ( ايه ده احنا راحين مسمط ولا ايه  نيهاهاهاهاها )

فطير مشلتت فلاحي ( جبنه قديمه + جبنه قريش + عسل + قشطه + بيض )  35 جنيه

الشيف الى هناك قالي الفطيره ممكن تكفي فردين ... وبرضه مش عارفه من ضمن تمنها الحاجات الى بتنزل معاها دي ولا ايه ... مكسله اسأل بقى بلاش رخامه J

فى اصناف كتيره متكوبه فى المينو بس مش عليها اسعار فمش عارفه اساسا هى بتتقدم ولا ايه

المهم كفايه عليكم كده مش هاتنهبوا بقى J

 اه وفى قايمه كريبات كامله  كمان  بس برضه مش عارفه اسعارها

فى العموما المكان اسعاره معقوله اوي

فى قايمةعصاير

وقايمه حلويات ... ام علي  كريم كراميل  فروت سلات  ايس كريم  الى الخ الخ الخ

وفى مشروبات طبعا بقى ساخنه وبارده ابقوا عيشوا بقى

ياريت كل حد جميل ناوي يجى  اللقاء يقولي هياكل  ايه او يستحسن ذلك بدل ما يفضل باصص لنا فى اللقمه وكده واحنا بناكل

وطبعا الى مش عايز يتغدى برضه براحته عااااتي

المهم تقلولي قبل يوم الخميس عشان ابلغهم فى الكافيه

واشوفكم على خير ان شاء الله يومها

والى ما يعرفش تفاصيل اللقاء ينزل تحت شويه على البوست الى فات هايعرف

بس خلاص

لقاء مدوني المنصوره ... وزيارة مؤسسات الايتام..+ تحديييث

تحديييث
يا جماعه تعديل بس بسيط فى الميعاد  بناءا على طلب مديرة مؤسسة البنات بالحاح اننا نروح بعد الصلاه فان شاء الله احنا هانصلي الجمعه فى المسجد الى جنب المؤسسه
والى اسمه مسجد عباد الرحمن فى شارع سعد الشربينى ... وهانطلع بعد الصلاه على طول على مؤسسة البنات  وبعدين نكمل اليوم عادي
وطبعا الى عايز يجيلنا على مؤسسة البنات على طول مافيش مشكله
معاكم تليفون اللقاء بقى كلمونا

كمان فى حاجه انا اتصلت على مؤسسة الاولاد تاني ومش عارفه رجعوا فى كلامهم وكلموني كويس جدا ورحبوا بينا وقالوا ممكن حد يروح يسلم التبرعات
بالتالي ان شاء الله احتمال نبقى نبعت حد من الشباب لمؤسسة الولاد هى مش بعيده عن مؤسسة البنات يعنى ويوصلوا التبرعات

الحاجه التانيه موضوع الغدا
ياريت  الى هايجي ياكدلي قبل يوم الخميس انه جاي ويقولي عايز ياكل ايه عشان ابلغ الشيف بتاع الكافيه يعمل حسابه
****************************************
السلام عليكم يا اصدقائي الاعزاء

ارساء لقواعد التجمع دايما على خير بادعوكم انا وكل مدوني المنصوره انكم تشرفونا عندنا فى المنصوره ان شاء الله  يوم الجمعه  31 /12/2010

ايووون اخر يوم فى السنه بنلحقها تقريبا وما تقلقوش هانمشيكم بدري الى عايز يلحق يحتفل بالسنه الجديده فى اي مكان تاني ان شاء الله يلحق

كل سنه وانتم طيبين

طيب نرجع تاني للموضوع  بتاع اللقاء

فى الحقيقه  احنا قطعنا فى شعر بعض كتير كمدوني المنصوره يعنى على ما استقرينا على المعاد والمكان J

انا بقالي سنه تقريبا جاي على بالي جدا زيارة مؤسسات الايتام الكبار الى هما من سن 8 سنين فيما فوق

وهما بيفصلوهم طبعا لمؤسسة بنات ومؤسسة اولاد

انا ايام ما كنت فى الكليه كنا بنروح ملاجيء الاطفال فى واحد من مشرفين الخدمه العامه هناك قالنا يا جماعه ياريت تبقوا تفتكروا تروحوا ملاجيء الكبار وخصوصا الاولاد

لان حالتهم وحشه جداا ومواردهم قليله جدا جدا

ليه  ؟؟ لان اي حد بيفكر يتبرع او يزور ملاجيء بيروح ملاجيء الاطفال  الصغيرين  ولو حصل وحد فكر فى الكبار بيروحوا للبنات عشان الجواز والجهاز والصبيان دول بقى حالتهم وحشه جدا مش بيلاقوا يلبسوا حتى واحيانا كتير ما بيلاقوش يدفعوا مصاريف المدرسه  ومنهم كتير بيطلع من المدرسه بسبب كده وبيشتغلوا حرفيين

المهم ايامها فعلا عملنا كده وجمعنا حتى مساعدات عينيه وملابس قديمه وبعتناها

من حوالي سنه  شوفت حلقه لوائل الابراشي وكان جايب العيال دول بس مش ملجأ المنصوره مكان تاني وحقيقى قطعوا قلبي قعدت كام يوم كل ما افتكر شكلهم اعيط بجد

وكمان كان فى مشكله كبيره  فى المؤسسه هنا فى المنصوره والموضع كبر وكان فى قلق كتير

المهم يعنى من يومها وانا ناويه اعمل لقاء ونروح لهم

طبعا بعد البحث والزياره للاماكن دي عشان نعرف هما محتاجين ايه

بالنسبه لمؤسسة  البنات : انا روحت بنفسي وقابلت المديره ست لطيفه جدا ومتعاونه ورحبت بينا ورغم ان الجمعه اجازتها  قالت ادوني خبر قبلها عشان نكون فى استقبالكم

وقالتلى ان النواقص فى مخازنهم عباره عن الآتي :

شاي

مربى

بيض

حلاوه

حبنه نستو

لانشون

طبعا بلاش البيض عشان اكيد هما مش عايزين عجه الصبح

وطبعا قالت لو فى اي هدوم حتى لو مستعمله بس نضيفه وحالتها كويسه مقاس البنات دول اوك

انا قابلت البنات كمان وكان عندهم خطوبه وعاملين هيصه وملبسين العروسه والعريس قاعد مع المديره جوه  ودخلت باركت للبنات

وهما البنات عددهم 40 واعمارهم من 15 وانت طالع

انا سألتهم هما محتاجين ايه بصفه شخصيه غير احتياجات مخازن الاداره

الحقيقه بنات عسولين جدا جدا وكانوا مكسوفين مني خالص بس فى بنت كده طلعت وقالتلى بصي احنا عندنا اربعه مخطوبين وفى منهم واحده هاتتجوز بعد شهر وبنجهزها فياريت لو اي حاجه من حاجات جهاز العرايس

كوبايات .. كاسات .. اطقم سراير ... فوط ... الخ الخ الخ   وكمان لو لبس برضه للعرايس مافيش مشكله

وعليه اي حد جاي ويقدر يجيب معاه اي حاجه من الحاجات دي يتفضل يجيب معاه

اما بقى مؤسسة البنين فدول موالهم موال

محمد  متولي الله يصلح حاله راح امبارح زارهم وما لقاش  هناك حد الا مشرف قاله انا ما اعرفش افيدك المهم خد تليفون المؤسسه وانا كلمتهم النهارده

وكلمت مدير المؤسسه

الحقيقه كان ناقص يقولي انتم عالم فاضيه ما تقرفونيش

قالي اولا احنا عندنا مشاكل فى المؤسسه وبناء عليه لاغيين الزياره ( مش فاهمه ليه )

قلتله طيب ماشي المساعدات لو جمعتها مش ممكن حد يجى يسلمهالكم ؟

قالي : اه كده ممكن .

قلتله طب ايه المطلوب عندكم ؟

قال : سخان مايه  لان السخان الى هنا عطلان وبلوفرات للولاد

واضاف بغتاته بس الى يجى يكون من 8 الى 2 ظهرا

قلتله لا يا  فندم ما ينفعش ده هانيجى  الجمعه

قالي : لاااااااااااااااا جمعة ايه مافيش الكلام ده ..

قلت : طب حد من الاداره يتواجد عشان يستلم مننا يجيلنا مخصوص  عشر دقايق بس قبل الصلاه

قالي : لا لا لا ما ينفعش خالص يا تيجوا من 8 لاثنين غير الجمعه يا بلاش

وهوب وراح مدورني مكتب وهايدينى بقى محاضره عن الالتزام بالقوانين واحترام النظام

وطبعا جابه لنفسه خد كلمتين فى التمام وقفلت وانا امني نفسي انى اروح الزقه قلمين

رغم ان فى ناس اقترحوا اننا نخلينا فى السالك ونروح ملجأ اطفال والمهم نعمل الخير (ويظهر نرميه البحر )

بصراحه ما اقتنعتش  ومش عايزه استسلم بكل سهوله .. اغلب الظن مدير المؤسسه دى مش حرامي .. عشان لو كان هياخد نص التبرعات دي ولا حتى كلها كان فرش لنا الارض رمل  وجه مخصوص يوم الجمعه

المهم طبعا هاقولكم احنا توصلنا لايه فى برنامج اليوم والاتفاق عليه

اولا هانصلي ان شاء الله الجمعه فى مسجد عباد الرحمن الكائن بشارع سعد الشربينى
 يوم الجمعه 31/12/2010
وبع الصلاه ان شاء الله على طول هانطلع على المؤسسه الى جنب المسجد اصلا

 

والمؤسسه  لو حد عايز يجى على المؤسسه على طول ... جنب المرور بالظبط الى هايركب تاكسي يقوله ودينى عند المرور البوابه الجانبيه ( بوابة  الفحص )

هاندخل المؤسسه على الساعه 12:30  تقريبا بعد الصلاه يعنى هانسلمهم التبرعات  ونقعد مع البنات شويه ومعلش الشوباب بقى يستنونا بره  عشان ممنوع يدخلوا المؤسسه  واحنا مش هانتاخر عليكم  وعد J

 وهنشوف لو كنا هانبعت حد من الشباب لمؤسسة البنين

وهانطلع  بعدها  على المكان الجميل الى هانقضي فيه اليوم .. وهو كافيه بامبو ومكانه قدام اكادمية السلاب بالظبط

وطبعا الى يجيب مساعدات عينيه يكون احسن عشان نسلمها على طول للمؤسسات ولو ماديه هابقى اتصرف انا واشتري حاجات واوديها بصراحه شايفه العينيه  احسن  من الماديه احتمال وصولها للولاد اكتر

هاقول تاني الاحتياجات

للبنات : شاي مربى حلاوه جبنه نستو لانشون ........ وجهاز للعرايس .. وملابس

للبنين : مطلوب  بلوفرات للولاد وهما عددهم هناك حوالي 11 ولد  (ايوه بس ومش عارفين يكسوهم الموكوسين ) وسخان مايه

نيجى بقى للمكان الى هانقضي فيه اليوم ده انا لقيته باعجوبه والله

دولي حبيبتى داليا قوس قزح كل ما تيجى المنصوره  حاسه بقى انها جايه الاقاليم وعايزه يا عينى تاكل فطير وقشطه وعسل و جبنه قديمه

وما كنتش عارفه اوديها فين الصراحه بعدين عثرت على المكان ده بالصدفه

وهوكافيه بامبو هو مكان جميل اوي ومفتوح وحواليه  اراضي زراعيه والمكان نفسه معملوه ديزاين بسيط اوي وريفى وقلل بقى وفخارات والجو ده

وفى كمان مبنى مقفول فى حال الدنيا بردت ولا حاجه نستخبى جوه

وفى مراجيح بسيطه كده فى جمب

وفى ركوب خيل ايوووووون والله في ركوب خيل هازيطك يا دعاء

وبالنسبه للاكل

هما بيعملوا كل حاجه سندوتشات واطباق سريعه و فطير مشلتت  وحاجات كتير تانيه بس المشكله انه بالطلب من قبلها

فقالي خصوصا الفطير لازم تبلغينى من قبلها بيوم

بالتالي الناس الى هايجوا لازم يبلغوني  من على بيات ... وقالي ان الفطيره بتكون كبيره تكفي فردين وتفيض وبتنزل معاها عسل وقشطه وجبنه قديمه ... وسعرها 35 جنيه تقريبا

ام هند يعنى ياريت تبلغوني الناس الى اكيد جايه عايزين ياكلوا ايه وعموما هماناس مرنين يعنى ممكن الى مش عاجبه الاكل يطلب دلفري او كده الحقيقه صاحب المكان انا كلمته وقالي اعملوا كل الى انتوا عايزينه

بس  هوفى مشكله انه المكان بره المنصوره على الطريق السريع مافيش مواصلات عليه بالتالي احنا لازم نأمن وسيلة  مواصلات بالذات فى الرجوع والموضوع ده هاشوفه  بقى وارتبه انا ومحمد متولي ربنا يسهل

تمام كده يا جماعه فى حاجه انا ناسياها ؟؟؟؟

فكرووووووووني

والله كنت ناسيه التليفون بتاع اللقاء

يوم اللقاء  ان شاء الله هايكون معايا  التليفون ده

0126379796

هافتحه من قبلها بيوم عشان الى عنده اي استفسار عن الطريق والترتيبات

طبعا طبعا لازم اشوفكم بجد عند عندنا وكلكم واحشنى وفاتيما لو ما جيتيش هاجيلكم البيت اجيبك عنوه

دولي يارب  تعرفي تيجى  عشان لو ما جيتيش هاجيب الفطير واجيلك بقى

وكل الناس طبعا اتمنى تنورونا هنا  ونتجمع على خير دايما