اقالة شفيق ...لماذا ؟؟

الحقيقه انا مش قادره افسر لحد الان ليه بعض الناس والمفكرين او من يدعون ذلك مصممين يحجروا على راي الثوره ..راي الشباب ..بالاحرى راي الشعب

هما نفس الناس الى كانوا بيقولوا اصبروا  على مبارك لما مدته تخلص وكفايه

هما نفسهم الى قالوا هييييه خلاص اتنحى كفايه بقى

هما نفسهم الى قالوا سيبوا الوزاره كفايه بقى

هما نفسهم الى قالوا طب عملوا تعديل وزاري كفايه بقى

وهما نفسهم الى بيقولوا شفيق سبوه وكفايه بقى

ومالهمش تبرير مقنع ابدا والتبرير الابدي هو ...اصل البلد هاتخرب

نعم ؟؟  هى كانت ايه ؟؟؟ شمعه منوره ؟؟ ماهي كانت خربانه اصلا

الى بيقولك الاسعار زادت والى بيقولك الدولار غلي والى بيقول مش هانلاقي ناكل ؟؟!!!

فى ايه يا ناس ؟؟؟ الله هى ثوره ولا لعبه هى ؟؟ اشمعن ايام زمان شديتوا الحزام لما موتوا

واشمعن استحملتوا الحروب بصبر ؟؟  ما تصبروااااااااا ما تستحملواااااااااا

والاسعار ووالدولار يا جدعان انااوعلى الاقيهم بيعلوا ايه المصيبه دي ؟؟؟

ما علينا خلينا فى شفيق

شفيق : ليه عايزين نقيله ؟؟

احنا داخلين على مرحله خطيره جدا جدا جدا  لو ما كانش الى ماسك الى البلد دي خايف عليها بكل امانه فعلا ومتفاني فعلا لانقاذها ..هانقع ..هانقع واقعه جامده جدا

الى بيقولوا طب ما نسيبهم عشان البلد ما تقعش ...ده هما دول الى يهمهم يوقعوها اصلاااااا ..عشان يثبتوا ان الثوره فاشله ويفضلوا جاثمين على انفسنا

وبالنسبه لحبايبى الحلوين الى بيقولوا على شفيق اصله ده كان راجل محترم ( اعرفوا ان مافيش وزير محترم قدر يستمر فى الوزارت المشبوهه ولا سيما وزارتي نظيف  اكتر من شهور ) اصل كم الفساد يا ناس فظيع ريحته لا تطااااااااااق فى كل الوزارات  ما تقوليش واحد محترم يستمر سنين لا يمكن هايبقى شوكه فى ظهرهم لو هو استحملهم هما مش هاستحملوه

وان يكن شخص شفيق يا سيدى فله وشمعه منوره وما يهمناش غير كفاءته ان كان فى كفاءه  لان لا يخفى عليكم ان مصرللطيران تاسع اسوا طيران فى العااااااالم .. وكسه بنى  يا سيادة وزير الطيران السابق .

طب هو فله وشمعه منوره بس وزراته ما احنا عارفنها ومش هو الى مشكلها ده مشكلها حسنى وسوزان وجمال وكلنا عارفين كده ...خلعناهم ؟؟ طب لازم نخلع الباقي ....الضرس لو ما جاش من جدوره يعمل خراج يا جدعااااااان

ما ينفعش والله يا ناس

طيب بلاش كل ده ...انا عايزه افهم هو احنا عملنا ثوره ولا بتنجان ؟؟؟ ثوره طبعاااا

طب مين الى عمل الثوره دي ؟؟ اي واحد يرفع راسعه ويقول انا هاقطعله راسه

الى عمل الثوره الشعب ..طيب الشعب طلع لكم يقول اقالة حكومة شفيق ...يبقى اقالة حكومة شفيق

ليه لان الى بيقود البلد الان الشرعيه الثوريه ....مافيش اي شرعيات تاااااااانيه

يبقى الى يقول عليه الناس الى بتطلع التحرير بالملايين هو الى يتحقق والي له شوق فى حاجه يختار ميدان تاني ويطلع يقول رايه ...بس ما يكونش راكب جمال وخيول زي مناصري المخلوع

طيب ايه الى هايحصل لو اقلنا شفيق ؟؟ هانموت ؟؟

اوفكورس نوت ..... هانشكل وزاره جديده من ناس محترمين  لا خلاف عليهم ...ما حدش يقولي مين ومنين

البلد ملياااااانه ناس محترمين فاهمين ؟؟؟

نقيل الوزراه والى يمسك البلد فى الفتره الى جايه حد قلبه عليهااااا مش عايزين تنميه وعلاوه وبتنجان عايزين انقااااااذ

الاقتصاد ممكن يقع طبعا والبورصه ممكن تنهار والجنيه ممكن ينهار والشعب ممكن يجوع ......صدقونى هو ده الى هايحصل بالظبط فى حالة استمرار حكومة شفيق لحد الانتخابات البرلمانيه ولا الرئاسيه زي ما بيقولوا

وساعتها هايقولوا نعمل ايييييييه ماهى الثوره هى السبب

الامل الوحيد صدقوني اقالة شفيق وعصابته وناس محترمين يمسكوا البلد

الايام ان شاء الله ستثبت لكم ان كلامي صح

حاجتين لو ما اتنفذوش هاتبقى مصيبه والثوره هاتموووووت وهانرجع اسوأ مما كنا بمرااااحل

1.    اقالة حكومة شفيق .... وتشكيل حكومة انقاذ كفاءات او متخصصين الى هى التكنو قراط

2.    تفكيك جهاز امن الدوله ومحاكمة رموزه ...لانه جهاز قوي ومتشعب جدا وفى اديه خيوط خطيره

ويا انا يا امن الدوله ده بالذات فى البلد دي بقى

ويكون فى علمكم بقى انا عشمي فى ربنا كبير اوي وكل ثقه ان الحاجتين دول هايتنفذوا ان شاء الله

وارجوكم الى فيكم متلخبط يلزم مكانه ويتابع ويقرا ويفكر وبعدين يقرر هو رايه ايه

عشان خاطري بلاش تثبيط الهمم والعزائم وتشتيت الناس ارجوكم

واصحاب المطالب الفؤيه المنتهزين للفرصه والى ربعه مظلومين والباقي ما بين منتهزين للفرصه وما بين هبل وبينفذوا مخطط الحزب الوطني بكل هباله وهما مش حاسين

لو قعدت اتكلم من هنا للصبح مش هابطل على فكره عندي كمان كلمتين عن الدستور والتعديلات خليهم المره الجايه

عندي دعائين عشان خاطري ادعوهم دايما

اللهم ارنا الحق حقا وارزقنا اتباعه وارنا الباطل باطل وارزقنا اجتنابه

اللهم انا حسبنا اليك ترد علينا حقوقنا وترد كيد الظالمين الى نحورهم وترنا فيهم اعظم اياتك . انك على كل شيء قدير .

يااااااااااااااااااااارب ثقتى فى عدلك ما لهاش حدود

*********************
ملحوظه : الكلام ده انا كتبت اغلبه قبل ما اشوف حلقة شفيق النهارده ....يخربيت كده بجد ... والله العظيم حراااام كده البرنس نظيف بعديه شفيق  حرام بجد دول يبقوا رؤساء وزاره مصر ده افترا .... كنت مصره على اقالة وزارة شفيق بعيدا عن شخص شفيق حاليا انا مصره على الاقاله على الصعيدين شخصه ووزارته

سلاح الفتنه

انظمتنا العربيه تستخدم سلاح الفتنه ..وما اقذره سلاح

ما شاء الله حاسه ان الانظمه الحكوميه العربيه كلها اخوات فى الرضاعه كانت بترضهم جموسه واحده ....كلهم متخرجين من نفس المدرسه التييييييييييييييت لتفريخ خونه ومتسلطين ومتعجرفين

فى ليبيا هذا المجنون القذافي بيثير الفتنه بين القبائل ومن اسبوعين سبقوا الثوره بيسلم القبائل هناك اسلحه عشان يضربوا بعض .. بس قدرة ربنا بقى ورحمته ان انقلب السحر على الساحر وهم الان يد واحده ويحاربونه باسلحته

حتى ان احمد قذاف الدم جه مصر يحرض قبائل السلوم على الذهاب للحصول على اراضيهم التى ذهبت الى قبائل اخرى فى شرق ليبيا حين حدث تعديل الحدود

وعرض عليهم دعم مالي وسلاح لكنهم رفضوا ومشي وهو قفاه يقمر عيش

وبالمناسبه احذرمن انه اعلن انه انضم للثوره وعايز ياخد قوافل طبيه ويروح ليبيا من مصر .....اظنها خدعه والله اعلم

فى اليمن ...صالح صحى فيهم الانفصال وقال اهم ده المشكله انهم عايزين ينفصلوا ...امعانا فى فضل الله انقلب عليهم الامر وقال اليمنين الجنوبيين مش هاننفصل امشي انت وبعدين نبقى نفكر نعمل ايه احنا بس انت امشي الاول

فى البحرين ... انها فتنه وسنه وشيعه وهايشتغلوا ....قالوا الشيعه طييييب احنا هنختار زعيم لنا يكون سنه عشان ما تقولوش حركه شيعيه ...كبسه يا عم الملك

تكرار نفس المقرر القذر الى هما حافظينه حاجه تقرررررررف يا حكام العرب بجد

فى مصر  وما ادراك ما مصر وامن الدوله فى مصر..من قبل الثوره حتى والاسافين شغاله عشان المسلمين والمسيحين يقعوا فى بعض  اولا عشان الحكومه تتذرع بالارهاب وتلم كل من يقولها بم قبل الانتخابات الرئاسيه

وثانيا عشان  ننشغل فى بعض عن الي هما ناويين يعملوه

بعد الثوره ..السلفيه (حسبى الله ونعم الوكيل ) قبل التنحي كانوا بيقولوا حرام الخروج عن الحاكم

الجمعه الى فاتت كان راسهم المريض  لامم حواليه لامه هنا وقاعد يقول الدوله الاسلاميه وبيلمح ان السلفيه هايقتحموا المجال السياسي ونحكم احنا وياحليله يا حليله ......تعليقى انا تييييييييييييييييييييييييت

اضافة الى  ان السلفيه عمالين يلكو فى الكلام الخاص بالماده التانيه من الدستور  والخاصه بالشريعه الاسلاميه

الحكومه عاجبها اوي اللغط ده عن الماده التانيه وقال ايه عاملين استفتاء على موقع الاهرام ..الاهرام التعبيريه  ها ؟؟

هالبت احنا يا ولاد ما زال شكلنا غبي  .... ده  حاجه غريبه جدا فعلا

طيب استكمالا لفضل الله تعالى ورد كيدهم الى نحورهم ..المسحيين ناس منهم قالولي اصلا ما يهمناش  الغاء الماده التانيه لانها بكل بساطه _وده رايي_ بتقر واقع

حدش اهبل بيرط فى الكلام ده الاا السلفيه والاهبل منهم الى بيصدقوهم

وهو كان حد يا هبل جاب سيرة الماده التانيه فى التغيرات ؟؟ ما تتوكسوا بقى وما تفضحوش نفسكم اكتر من كده يا سلفيين وتبينوا عمالتكم وتعاملكم مع الجهاز المشبوه المدعو بامن الدوله

رايي الشخصي فى الماده التانيه ....

لو كل واحد حط لسانه فى بؤه واهتممنا اكتر بتركيز دعائم الحريه ووسائل ضمان استفتاءات وانتخابات تشريعه ورئاسيه نزيهه وحره .....بعد كده مافيش مشاكل

لو انهم عملوا استفتاء حقيقى على الماده التانيه للدستور – مش استفتاء هزلي تعبيرى على الاهرام -  ايه الى هايحصل ؟؟؟  اظن غالبا هايحصل اقرار الماده التانيه واستمرارها لاننا غالبية مسلمين ولو ستين فى الميه فقط من المسلمين وافقوا على وجود الماده التانيه هاتكون الغلبه لهم بالتالي نخرس بقى يا ريت ؟؟

لو حصل تصويت عليها انا هاقول تستمر الماده التانيه ...اولا لانى مسلمه اقتنع تماما بان تطبيق الشريعه الاسلاميه فيه مصلحة الجميع ان شاء الله حتى المسيحيين .. والعاقلين منهم عارفين كده

ثانيا : لان وجودها فى الدستور شايل عننا بلاوي احنا فى غنا عنها دلوقتي .... مش مجال تفصيلها

فى حال انا كان رايي ان الماده دي تفضل لكن الاغلبيه فى انتخابات نزييه اختارت الغائها اييييييه العمل ؟؟

قدامي حلين (عاقلين )  اما اظل فى البلد وانا مقتنعه برأي واحاول اروج لفكرتي و قضيتى واحاول اقنع الناس بها  الى ما شاء الله

واما امشي واشوفلي بلد تانيه تكون بتقر المبدا ده الشريعه الاسلاميه الحق ..والى لحد الان من وجهة نظري لسه مش موجوده .

كده خلص الكلام عن الماده التانيه  وياريت اسمع رايكم

وكلمه هاموت واقولها ....مش لاقيه يا المجلس الاعلى للقوات المسلحه للابقاء على امن الدوله غير ان زي ما قالي صديق عزيز ....اصل كله متصوووووووور يا باشا .....

وما حدش يقولي الامن ....فين الامن وفين الدوله ............لن يهدا لي بال الى بانتهاء مهزلة امن الدوله

الى حصل امبارح من القوات المسلحه من مواجهات للشباب فى التحرير مش فاهماه حقا وحتى بعد اعتذارهم انا مش مسمحاهم ولازم يقدموا تبرير وتوضيح يقولوا ازاي ده حصل وليه وايه الاجراءات الى خدوها عشان يضمنوا عدم تكرار ذلك

عفوا يا قواتنا المسلحه ..بطلت تعاطي العاطفيه فى السياسه ...

كيف تعود الشرطه؟

كيف تعود الشرطه؟

بل بالأحرى كيف ننقذ الشرطه

تتعالى اصوات الان فتقول يجب علينا كشعب ان نعود الى الشرطه ان نتقبلهم ان نجلهم والى اخره من كلام التلفزيون المصري الذي ما زلت اشتم فيه رائحة النظام العفنه

السؤال الان : ما ذا فعلت الشرطه حتى تعود الينا او نعود اليها ؟؟

ماذا راينامن الشرطه بما فيهم جهاز امن الدوله المشين غير غرف جهنم والتعذيب والعجرفه والتسلط بل وقلةالادب عموما فى التعامل مع افراد الشعب جميعا والتعالي عليهم ؟؟

ونعود مره اخرى الى سؤال الناس حول كيف تعود الشرطه؟

اولا :  الافراج عن معتقلي 25 يناير عن اخرهم ..فلم نسمع عن ثوره نجحت ابطالها محتجزين بايدى مجرمين ومعذبين ..والافراج عن باقي المعتقلين السياسيين بدون احكام قضائيه

ثانيا : تفكيك جهاز امن الدوله وفتح مقراته وتفتيشها والتحفظ على المستندات واستجواب القيادات والعاملين بسجونهم ومعتقلاتهم ..وانهاء مهزلة التعذيب التى تجرى بها

رابعا : ا لتحقييق الحقيقى فى الاحداث السابقه اثناء ثورة 25 يناير ..ولا سيما جمعة الشهداء والاربعاء الاسود و التحقيقات تعلن على الجميع ونعلم من هو الجاني ويعاقب عقاب يليق بما فعله من جرائم

خامسا : غربلة جهاز الشرطه عموما .. الجميع فى جهاز الشرطه بل حتى من عوام الناس يعلمون من هو الظابط الفاسد المرتشي المريض نفسيا المجرم المسيء للانسانيه وليس جهاز الشرطه فقط ..ويعلمون ايضا من هو الظابط الشريف ...وعليه يمكن ان تتم هذه الغربه خلال ايام معدوده..ويتم استبعادا هؤلاء المجرمين الفاسدين  او ايقافهم عن العمل لحين التحقيق بشانهم

سادسا : وجود جهاز رقابي محترم وقوي ومعلن للجميع لمحاسبة جهاز الشرطه وكل من يتبعهم وتقبل شكاوي المواطنين

سابعا :حملة توعيه تطلقها وسائل الاعلام هدفها ان يعلم الناس والعامه حقوقهم من جهاز الشرطه ولا يسمح اي مواطن بالتجاوز معه من جهاز الشرطه ويتوجه بالشكوى للجهاز الرقابي اذا حدث تجاوز

حين يتم ذلك او حتى البدء والشروع فى العمل عليه وتقديم خطه من الوزاره لنا بذلك قد نقبل ثانية بوجود الشرطه فى الشارع المصري

والى كل من يعتبر ان السرقات حاليا تتم لان الشرطه كانت تحمينا سابقا

الشرطه كانت تحمي النظام ..حتى انها غيرت شعارها الى الشرطه والشعب فى خدمة الوطن

لا اعلم ما هو تفسير كلمة الوطن عندهم هل هو مصر الارض والشعب  ام هو النظام الفاسد ولي نعمتهم

السرقات التى تحدث الان  ..تحدث لانهم اشاعوا الفوضى واخبروا المجرمين ان البلد فى حالة انفلات امنى ويستطيع كل سارق ان يسرق كيفما يشاء

تحدث كما يحدث الان ان الفلاحين يخلعون القمح من اراضيهم  حتى يزرعون مكانه كتل خراسنيه ..لان البلد اصبحت سايبه .... كما اشاعوا هم فى وسائلهم الاعلاميه من اول يوم للثوره

ان كنتم تريدون اصلاح فعلا وتريدون ان تعود الشرطه الى ميدان العمل وتفعيل دورها

هذا هول الحل

فهل من مجيب ؟؟؟

نسمات الحريه

تصدقوا انا مش عارفه اكتب

والله مش عارفه اكتب هاكتب ايه ولا ايه ولا ايه ده عايزالي خمس سنين على ما ابطل كتابه

اولا مبروك

مبروك يا شعب مصر عليكم مصر

ومبروك يا مصر عليكى ولادك الى اتولدوا من جديد فى التحرير

مبروك يا ناس الحريه ونسايمها الى هاله علينا

ثانيا  يارب يارب يارب كملها بالستر  علينا ويتمها على خير ونفضل طول عمرنا نقول كان اعظم يوم هو 25 يناير وكان اجمل يوم لما سمعنا خبر تنحي الرئيس الظالم

يا جماعه انا فرحانه اوي اوي اوي بشكل لا تتخيلوه

ايام لما كان النت مقطوع انا كنت باكتب  تدوينات يوميه يمكن لحظيه

خلال الثوره انا قضيت اصعب لحظات حياتي واسعدها ايضا

ما كنتش بانام ولا باعمل حاجه اصلا قاعده متنحه قدام الاخبار اوقات اتفائل وافرح واوقات اقلق واوقات ابكي بحرقه واوقات اتجنن وافضل ازعق واكلم نفسي

يمكن الى متابعنى يعرف انى مش باتكلم فى السياسه على مدونتي الا نادرا ومن بعيد لبعيد لذلك ناس كتير استغربت اهتمامي بالثوره وكلامي فى السياسه عموما

الحقيقه مش كان بمزاجي مجبر اخاك لا بطل جوزي كان واخد عليا عهد ما اتكلمش فى السياسه  خايف عليا بقى والجو ده

الحقيقه من قبل الثوره بكام يوم اترجيته يحررنى من العهد عشان اقدر اشترك فى الجروبز واتكلم وانشر  رفض برضه لكن يوم 25 قلتله بص انا باقترح تطلقني لحد ما الثوره تخلص مش مشكله يعنى عندنا 3 طلقات J

من الاخر كان مسلوب حريتي ويعلم ربنا بسبب الحكايه دي انا كانت بتحصلي ازمات نفسيه كتير حيث انى اكتر حاجه تجننى حد يحط ايده على بؤي

آلمنى كثيرا جدا موقف بعض اصدقائي من الثوره وفهمهم الخطأ وكلامهم المستفز حتى انى حاولت كتير اتجنب الحديث معاهم عشان ما اخسرهمش وانا متعصبه وضغطي عالي وعلى اخر اخر اخري

اهالني كمية الناس الى صدقت التلفزيون المصري دون اي تفكير واهالني اكتر من نعتوني بعدم الفهم وانى اساسا اعرف ايه فى الدنيا ده انا اخري حلة محشي ودمتم ....هو صحيح يا ولاد انا شكلي كده ؟

الحقيقه كنت متفائله يا شباب بيكم وكنت حاسه ان هنعمل حاجه بس كنت خايفه عليكم اوي اوي

كنت باموت حقا مش كلام والله يوم الاربعاء الى كان مذبحه ليلا وفضلت اعيط طول اليل واقول يا عاااااااالم حد ينجدهم  وتساقط الشهداء حقا كان بيقتلنى فعلا

بعدين هابقى انشر تدويناتي لايام الثوره انشاء الله

دلوقتي ارجوكم يا ناس ... الى ما كانش مؤيد للثوره ورجع فى كلامه عادي والله يقول الحقيقه انا ما كنتش مؤيد بس دلوقتي اقتنعت مافيهاش حاجه ...مالوش لازمه نستفز الناس

كل واحد وله وجهة نظره

ونفسي اعرف المنادين للمتظاهرين او بالاصح الثوار الابطال الى وقفوا على خط النار انهم خلاص يرجعوا وكفايه لحد كده

الكلام ده بيتقال من اول خطاب لمبارك يوم الجمعه بعد ما كلابه قتلونا فى الشوارع وقالولهم خلاص يا جدعان هو حل الحكومه ارجعوا بقى

وبعد كل انتصار وكل تنازلات من الحكومه كانوا بيقولوا كده ارجعوا بقى

ولحد الان لسه بيقولولهم ارجعوا بقى

افهموا بقى ارجوكم ...الشباب الى هناك دول مش سيس العيال دي فاهمه هى بتعمل ايه الدنيا والزنقه والموت الى شافوه بعنيهم علمهم ..بما انكم قاعدين فى بيوتكم يبقى من فضلكم بسسسسسسسس سبوهم يكملوا

افهموا انهم اقويا لانهم فى التحرير .. افهموا انهم ما دام مشيوا مشوار الاحسن يكملوه دلوقتي مش يرجعوا وبعدين يبقوا يبدأوا من الاول تاني

لو كانوا سمعوا كلامكم من الاول ما كناش وصلنا لاي حاجه

دم الشهداء غالي كلنا كنا خايفين عليهم وربنا العالم عينى ما غمضتش يوم الخميس الى فات  لما عرفت انهم راحين العروبه لحد ما الشباب كلموني طمنوني وقالولي مافيش اي حاجه احنا تمام

لكن

ارواحنا لم تزهق فقط فى التحرير

ارواحنا كانت تزهق يوميا على يد النظام الفاسد واعوانه وايديه وكلابه... العباره فساد .. السجون والمعتقلات فساد.... حوادث الطرق والقطارات والحرايق فسااااااااد .... المصايب الاجتماعيه الى احنا فيها فسااااااد

صدقوني احنا كنا كده كده بنموت فى اديهم ...

لو الشباب رجعوا من غير ما يضمنوا اجراءات حقيقيه من الجيش لضمان حكم مدنى وتغيرات دستوريه وافراج عن معتقلين لا اضمن الجيش وما سيفعله بينا

انا لااقصد الجيش با كمله ..فالجيش انا راهنت عليه من البدايه .. ساورتنى بعض الشكوك احيانا بانه يمكن يقلواا عقلهم ويضربوا الناس لكن رجعت تاني قلت مش ممكن

عارفين ليه مش ممكن لان الجيش بتاعنا جيش وطنى ..... الكلام هنا على الجيش  المجندين والقياده الصغيره والمتوسطه .... دول يا ساده بيقبضوا نص مرتبهم وطنيه ... مش مرتزقه

اما جنرالات الجيش المصري فالكل يعلم انهم قد تكون مئات الالوف التى يتقاضوها كبدل ولاء للنظام الفاسد اعمت قلوبهم عن الوطنيه والحقوق

الى حاليا متولين قيادة البلد مين المجلس الحربى .. الروس الكبيره ... بيعصف بيا بعض القلق ان السلطه تحلى فى عنيهم ونعيش عصر نيله عسكرى تاني

عشان كده لازم ناخد ضمانات قد ما نقدر ..  الكوره فى ملعبنااااااااااااااااا افهموا عشان خاطري

ملحوظه هامه

انا باعتذر لاي حد اتعصبت عليه فى اليومين الى فاتوا  والتمسوا ليا العذر .. انا بطبقى يا جماعه عصبيه جدا

تقدروا تقولوا مجنونه

اعيانى التفكير فى البلد وحالها سنين والله اكتر مما تتخيلوا بكييييييت والله ياما على الى احنا فيه والمراره ما كانتش بتفارق حلقي

لما شوفت بارقة امل ناس بتحاول تموتها كنت هاتجنن

اضيفوا الى ذلك  الضغط العالي الى بيضيق خلقى اكتر والقلق الى انا عايزه اتعالج منه والله بجد كان بيقتلنى على الشباب فى التحرير

بالعافيه فى الايام الاولى كنت باعرف اخبارهم ...اقصد اخبارهم منهم شخصيا مش من على التلفزيونات والفضائيات

يعنى هحاول انسى صدمتى فى ناس كتير يعز عليا يكونوا بيفكروا كده بس طبعا هما احرار فى فكرهم وانا كمان حره فى فكري ورايي

وارجوكم اظن انا رايي واتجاهي واضح للجميع من اول يوم فى الثوره لحد الان .... من فضلكم الى شايف انه مختلف معايا ومش هايقدر يتعامل مع الاختلاف ده بهدوء فمالوش لازمه حضراتكم النقاش معايا خالص فى الموضوع ده

ولا اي موضوع تاني حاليا لانى مش عارفه افكر غير فى الثوره وما بعد مبارك وما الى ذلك

اسفه طولت عليكم

 ومبرووووووووووك يا مصر

ومبروووووووووك عليكم مصر

مدونة ثورة الغضب

السلام عليكم
البلوج بتاعي وحشنى اوي يا جماعه والله بس اعذوروني مش عارفه اركز واكتب اي حاجه مع انى عندي كلام كتير اوي اوي عايزه اقوله وكاتبه كلام كتير من ايام ما كان النت مقطوع
بس مش قادره اكتب وانشر دلوقتي حاسه انه مش وقت كتابه وقرايه خلاص مبحلقه فى الاخبار طول النهار

باكتب كلمات بسيطه على الفيس بوك والتويتر على اساس انهم اسرع

المهم ربنا يعديها على خير يارب ويتسرها مع ولادنا وابطالنا الى فى التحرير والى فى كل ميادين مصر ونصرنا ان شاء الله

انا كلمت النهارده المدون ادم نبيل وهو مرابط فى التحرير ربنا يجازيه خير هو وكل الى معاه
المهم هو طلب مني اعمل مدونه واسميها ثورة الغضب عشان ينزل وا فيها كل الصور والفيديوهات الى معاهم وكده
وطبعا انا عملتها فى ساعتها وده اللنك بتاع اهو http://www.thawrt25eg.blogspot.com/


وان شاء الله هنحاول نحط فيه اكبر كميه من الكليبات والصور والاخبار وليسجل الزمان ملحمتنا العظيمه

تحياتي لكن وادعولهم ارجوكمط
ط

25 يناير

يارب يارب يارب


يارب استرها معانا ومع اهالينا الي فى الشوارع ويارب مايروحش تعبهم هدر ويارب نقدر نغير
ده فيديو مصوراه بنفسي من بلكونتي لان طبعا متحدد اقامتي

http://www.youtube.com/watch?v=W9fFYvz1Ezw

ودي اخر صوره لميدان التحرير ربنا يجعله من اسمه نصيب

وده لنك من كاميرا بتبث مباشر واضح  انها جمب التحرير ولا ايه مش جايبه صوره لكن جايبه صوت رهيب جدا

http://www.ustream.tv/channel/cairodowntown#utm_campaign=www.facebook.com&utm_source=6935497&utm_medium=social

هحاول الاقيلكم اي حاجه

ويارب استرها معانا واجبر بخاطرنا

الثوره الفرنسيه

الاوضاع قبل الثوره

اجتماعيا :وجود ثلاث طبقات

طبقة رجال الدين

الطبقه الحاكمه  والنبلاء

طبقة الفقراء او العاملين او  الكادحين او الشعب بمعنى اصح

اقتصاديا : مشاكل اقتصاديه وفشل وافلاسات ...الخ الخ

سياسيا : كانت فرنسا مقاطعات مستقله تحت لواء ملك واحد تخللتها مشاكل عده بين المقاطعات وبعضها من ناحيه وبين حكام المقاطعات والملك من ناحية  اخرى .. واتسمت الحياه السياسيه ان ذاك بعدم الاستقرار  والتوحد تحت نظام واحد او ا لالتزام به

مراحل الثوره الفرنسيه

اولا  اندلاع الخلافات بين لويس السادس عشر  ملك فرنسا آن ذاك من جهه والنبلاء من جهه اخرى

حيث ان ما قدمه لويس من اصلاحات سياسيه داخليه لم تؤتي ثمارها وعليه اندلعت ثورة باريس عام 1789

والتى طالبت بحكم ملكي دستوري  استمر من 1789 الى 1792

حيث تاسست الجمعيه الوطنيه (ودي كانت القوه الحقيقيه وقتها )

والجبهه المعارضه للجمعيه الوطنيه ايضا

وكانت  اقتحام سجن الباستيلرمز الظلم والقمع للنظام الملكي  14يوليو 1789  هو ضربه حقيقيه موجهه للملك ونظامه ويحتفل الفرنسويين حتى الان بهذا اليوم

واستمرت الجمعيه الوطنيه والملكيه الدستوريه على هذا الوضع حتى عام 1792 حتى لحقت بهم الهزيمه امام النمسا وبروسيا ... فكان ذلك تفجيرا للموقف وتاكيدا على فشل الملكيه الدستوريه والجمعيه الوطنيه

حيث قامت الثوره مره اخرى واطاحت بالملكيه تمام وتم اعلان الجمهوريه  برياسة روبسبيير  والذي ترأس ثوره دمويه قويه اطاحت بكل  اثر للملكيه فقد اعدم لويس السادس عشر وزوجته ماري انطوانيت النمساوية  الاصل والتى كانت مكروهه من ا لشعب الفرنسي

وتوالت احكام الاعدام بمحاكمات غير حقيقيه  وقد كان يقول روبسبيير انه سوف يفصل بين فرنسا واعدائها ببحر من دم ... وتصاعدت مشاعر البغض والغضب عند الشعب الفرنسي وغذتها الثوره اكثر  واكثر واستمر حكم روبسبيير  على هذا الشكل حتى عام 1794 سادت خلال هاتين السنتين فوضى من القتل وحفلات للقتل بالمقصله يحضرها  الجميع وبحار دم لا تجف فى انحاء فرنسا

وعاشت فرنسا ما سمي بالحكم الارهاب وساد الخوف فى نفوس الجميع واطلقت الايدي للقتل لاسباب مختلقه(تفصيل يعنى )

حتى قامت ثوره اخرى فى يوليو 1794 اطاحت بروسبير  وتم اغتياله وقامت دوله دستوريه جديده  هدفها هو تحقيق السعاده والاستقرار واقرارحقوق المواطنه  من خلال دستور 1795

ولكن حتى هذه الفتره شهدت صراعات داخل الحكومه وانعدام الاستقرار ولم تتمكن من اسعاد المواطنين ولا حل مشكلات الدوله

بالتالي وصلنا الى انقلاب 1799 العسكري بقياده نابلوين بونابرت والذي عاد من جديد بالدوله الفرنسيه الى الامبراطوريه الفرنسيه وكان هو امبراطورها بالطبع

وبعدها استقر الحكم لنابليون وبدات تصدير ثقافة الثوره(ايون تصدير )   الذي كان يخشاه ملوك اوربا جميعا(ايون اوربا J) بمجرد اندلاع الثوره  والتمرد على الملكيه

وكان اول من استنشق رياح الثوره والحريه بعد فرنسا ايطاليا ثم بروسيا

(طول عمري احب الباستا واموت فى الباستا انا )

وبدأت سلسله من الثورات فى اوربا على الانظمه الحاكمه وبدأت اوربا فى عهد جديد من الحريات وحقوق المواطنه والاصلاح الشامل  والحروب ايضا  داخليا وخارجيا