احنا وهما (العرب والغرب )

السلام عليكم اولا

فاكرين يا جماعه البوست الى كان من زماااااان اوي ده بتاع احنا وهما الستات والرجاله ؟؟؟ مش انا قلتلكم ان فى احنا وهما كتير وعايزين نتكلم فيها .
مش عارفه كنت ناسيه الحكايه دي ومش عارفه افتكرتها ازاي برضه المهم . النهارده بقى نتكلم عن احنا وهما العرب والغرب أو نقول يعنى العرب والناس التانين دول الى بيقولوا عليهم متقدمين عقبالنا . بس مافيناش من زعل وخناق .
نبدأ الرغي بسم الله طبعا ونشوف الفرق بينا وبينهم :

أولا : هما يربوا الطفل ويعلموه ماشي اول ما يبقى 16 سنه وياخد الثانويه العامه . بس خلاص اخرج اشتغل بقى يا حلو واعتمد على نفسك ولو عايز تكمل فى الجامعه اصرف على نفسك ومش بعيد يطردوه من البيت كمان لكن ممكن يفضل معاهم ويساعدوه يكمل تعليمه ،يساعدوووووه .
احنا بقى : اخر حلاوه نطبطب على الواد طول عمره وندلع فيه على الاخر (على راي الست نانسي ) ونوديه احسن مدارس انشاله نجوع وينبوس ايده كل يوم عشان يذاكر وينجح ويجيب مجمووووووع . ونعيط ونبات قدام لجنة الامتحان وكده يعنى . وبعدين ندخله الجامعه ونفضل نصرف عليه وهو جايز فاشل اساسا وبيسقط وبعدين يتخرج ويقعد ويستنى ابوه يشوفله واسطه عشان يتعين فى الحكومه وما يتهبدلش وابوه برضه يجيبله شقه وامه تعمل جمعيه وتجيبله الشبكه ونقعد ندلع ونهنن فيه كده الى ما شاء الله مش مشكله عاااااااااادي ونصرف عليه لحد ما يبقى 35 سنه عااااااااااااادي .

ثانيا : الشغل والاجازه . هما بيعيشوا حياتهم فى الاجازات الاسبوعيه او السنويه مش بيأجزوا باخلاااص ويتفسحوا ويظبطوا نفسهم على الاخر . لكن ايه فى أيام الشغل كل شغال وكله بينام بدري وكله مش فاضي .
احنا بقى : نروح الشغل واحنا متأخرين ومكسلين ونعسانين ويوم الاجازه نقضيه نوم ويمكن ناخد معانا البيت كام ملف نحطهم قدامنا كده نعذب بهم نفسنا ونقنع نفسنا اننا مشغولين . وايام الشغل نتفنن فى الخروج من الشغل قبل المعاد ونضيع وقت الشغل زي الفل ومافيش اي التزام لا باجازه ولا بشغل نعزل الخبطه دي اد عنينا. ولا منا اشتغلنا ومنا استمعتنا بالاجازه .

ثالثا : الموت هما واحد مات ممكن نزعل عليه طبعا ونعزي فيه بس يوم واحد ونسيب بقى اصحاب الفقيد يرتاحوا ويكملوا حياتهم ولا يكتئبوا حتى على راحتهم .
احنا بقى نفضل كابسين على نفس اصحاب الفقيد الى مش ناقصنا اصلا 3 ايام عزا وخد عندك 3 اخمسه واربعين مواويل ورغي ولك حريم للصبح واصحاب المعزى قاعدين يناموا على نفسهم ومش شايفين قدامهم . ده غير بقى قوانين لبس الاسود الى بتمتد سنين وكده يعنى .

رابعا : الجواز : هما الفرح يوم واحد ويمكن ساعه واحده والعريس ياخد عروسته ويمشي وديتهم علبتين صلصله فاضين مربوطين فى العربيه وويل يا ويل ومشيوا وخلصت .
احنا بقى خد عندك حنه وفرح وصباحيه وأسبوع كامل من الضيوف والمواويل . وساعة الفرح بتاع خمسين فرد يطلعوا مع العروسه شقتها ومافيش مانع يتخانقوا كمان عندها وعيال تبوظ فى الشقه ومطلوب عشرين عربيه عشان تمشي تلف انحاء الجمهوريه ورا العروسه وتكلكس ويعملوا خمسات ولا مش عارف ايه الى بيقولوها دي ويقفوا الشارع ويقرفوا الناس كام ساعه كده على الماشي .

خامسا : الجهاز اه ده تبع ا لى فوق هما كل اثنين هايتجوزا بيصرفوا نفسهم هما يجيبوا كتير يجيبوا قليل هما حرين . احنا بقى لو ما كانش الاهالي يتخانقوا مع بعض خمسين خناقه ويعملوا جمعيات للركب ويدينوا لكل الخلق (ده الاهالي مش العرسان) ويفرشوا شقه ممكن تكفي خمس افراد يعيشوا فيها ويملوها فرش واطباق وحلل من كل صنف ولون يكفوهم عشر سنين قدام ما يرتاحوش ولا يتجوزوا (امال الخيبه جايه منين يعنى )

سادسا : هما دايما باحس خصوصا الامريكان ان لسانهم طويل اوي وبيقولوا كلام وحش اوي لكن والله اعلم انا ما روحتش هناك عمري ما شوفت بعينى لكن هما لما بيشتموا بعض بيبقوا زعلانين وبيتخانقوا ده العادي بتاع البنى ادمين بتهيئلي (وممكن الناس تشتكيهم كمان ويرحوا فى داهيه) .
احنا بقى ممكن تسمع اقذع الشتائم والالفاظ حتى يمكن وانت قاعد فى بيتك من اثنين فى الشارع بيهزروا . اها بيهزروا مش عارفه لما بيتخانقوا بيعملوا ايه ؟؟؟
اه لا عرفت مطاوي على طول .

سابعا : هما عندهم اختراع عظيم اسمه تنظيم المرور وقواعد المرور واشارات ا لمرور والناس هناك عقبال عندكم بيبصوا فى المرايات ويستعملوا الاشارات وحاجه زي الفل .
احنا : انسىىىىىىى ان كان على القوانين والقواعد موجوووووووووده بس الى ينفذها بقى ياعم الحاج والشارع كله خالي تماما من الاشارات سواء اشارات المرور فى الشوارع ولا الاشارات بين السواقين وبعضهم هيييييييييييييييصه (والفلوس نازله عليه وهييييييييصه ) ده الى هو عسكري المرور طبعا .

ثامنا : هما عقبال املتكم برضه وعلى ما سمعت انهم ممكن يعملوا استفتاء داخل مدينه معينه مثلا الناس تقول رايها فى انهم يعملوا هنا نافوره ولا ما يعملوش مثلاااااااااا . والناس بتقول رايها وبينفذوا رأيهم .
احنا بقى : اخترنااااااااااااه اخترنااااااااااااه . مش عارفه هو ايه بس كل حاجه اخترناه يعنى من اول اسم الله عليه لحد سيادة اللواء المحافظ( عيييييب ما حدش يقول سيادة اللواء ممنوع على فكره ) لحد بتوع الحكم المحلي حتى لحد تمثال رمسيس التاني الى حطوه فى المنصوره عندنا الى اتكلف عمله 23 مليون جنيه .واحنا طبعا ا لى ايه ؟؟؟ اخترناااااااااااااه.

تاسعا : هما عقبال عندكم بررررررررررضه بالقوي عملوا الولايات المتحده الامريكيه . والاتحاد الاوربي . وماشين زي الفل . لا زي السمن على البتنجان الاسود بس ماشين يعنى .
احنا بقى : بالصلاة على النبى ما عملناش اي اتحادات لها قيمه واستمرت اللهم الا الامارات العربيه المتحده الى هما اساسا لولا الشيخ زايد وثروته ما كانوش راحوا تحت جناحه .
وتحيا الامه العربيييييييييييييييييييييييه .

عاشرا : هما ناس عندهم برود اجتماعي وعاطفي فظيع والعلاقات الاجتماعيه بتاعتهم تعتبر معدومه حتى بين الاهالي واولادهم . احنا بقى عندنا ترابط عائلي جامد جدا خصوصا فى الريف تلاقي الواحد من دول عارف البلد كلها واصلها وفصلها ونصهم ولاد عمه والنص التاني ولاد خاله عادي . لقيتلكم ميزه اهو يلا انشاله ما حد حوش . ولو ان انا ساعات كتير باتخنق من الترابط لما يتحول لحشريه بشعه بين الناس وبعضها .

وأفتكر كفايه كده اصل شكلكم زهقتم من رغيي النهارده . نستودعكم الله يا كتاكيت .

شوفوا حادثة الافك على الرؤيه الاسلاميه المتواضعه خاصتى

ممكن اسوق فيها ؟؟؟

السلام عليكم :
منورين فى القاعده تملي . ووحشتوني برضه مش عارفه ليه !!!!

شوفوا بقى انا دلوقتي فى حيره من امري وشوشة الستاتيت الجزء التاني انا مش عارفه اكتبها . كل ما ابدأ فيها امسح الي كتبته واعيد من الاول . وبصراحه وكل صراحه خايفه منه . لاني حاسه انه هايجبلى الكلام ومش هاخلص منكم . المهم انا هاكتبه بررررررضه وبعدين ناخد راي الحبايب الاول فى السر وبعدين نبقى نزله لو تمت الموافقه عليه بالاغلبيه مش الاجماع اصل انا ديموقراطيه .

ها نرجع بقى للرغي يا حلوين يا قطاقيط . ايه رأيكم بقى انا عايزه اقولكم على موضوع جد خطير - فصحى اهو خطير بصحيح يعنى -
أنا يا جماعه عندي عقده نفسيه مركبه دلوقتي لانى مش عارفه اسوق العربيه .ماتبصوليش كده والله حاولت كتير واصلا ما فشلتش اوي يعنى اصلا ما حدش اداني فرصه . هاحكيلكم حكايتى واحكمواااااا انتم .

من حوالي سنتين كده يا حلوين انا كنت واقفه فى مفترق طرق قدامي طريقين الاول هو انى اتعلم السواقه واسطو على عربية جوزي فى بعض الايام واقضي مشاوير البيت والعيال واودي العيال انا المدرسه واجيبهم وفى الصيف اوديهم تدريب رياضه وتحفيظ قرآن وما الى ذلك ونعيش حياتنا خارج المنزل بقى .
والتاااااني : هو انى اطنش خاااااااالث واعمل نفسي هبله وابيع القضيه وما اعملش اي حاجه واقعد زي خيبتها وخلاص .
المهم بعد تفكير عميق قلت لا ممكن ابدا ابقى زي خيبتها . انا لازم اتعلم السواقه .
مااخبيش عليكم الموضوع كان صعب اوي اوي خالد كان عنده اربع شهور وخارج من عمليات وجلسات وبلاوي كتير من اول ما شاف الدنيا . لمده اربع شهور بس قلت برضه احاول.
اتفقت مع رضا انه اول ما يفضى فى اي يوم ياخدنى بالعربيه يعملنى فى اي منطقه تكون فاضيه شويه . طبعا يجى شهر على مااليوم ده جه . وكذا مره يادووووووووب اركب انا العربيه والتليفوووووووون تررررررررررررررم الحقى خالد بيعيط وارجع يا جدع على البيت .
وبعد ما سمعتلي كلمتين فى دماغي من ماما وبابا على انى مااسيبش ابنى تاني بلا سواقه بلا بتاع . قررت انى اروح اتعلم فى مدرسة السواقه فى المرور وبالمره اخد الرخصه والتدريب هايكون الصبح بدري وخالد نايم وهاسيبه مع رضا .
وقد كااااااان .
وبدأت اروح وكنت ماشيه فى التدريب زي الفل طب ياعم ايه هانفضل كده نلف بالعربيه فى الحته الفاضيه دي وبعدين طيب . جوزي قالي باقولك ايه اديله خمسه جنيه كده ولا حاجه كل مره وهو يخرجك الشارع . اديتله كام مره واتحايل عليه يقولي ممنوع ياعم الحاج الناس كلها طالعه بره اهو وبعدين ممنوع ايه امال كاتبين على العربيات تعليم ليه عشان تمشي فى الساحه الفاضيه دي ؟؟؟؟ هو كده

المهم خرجت من الموضوع زي ما بدأت تقريبااااااا . وبعدين بقى بدأت انى اتجرأ شويه واخد عربية رضا وهو معايا طبعا وانزل بيها شويه يعنى ربع ساعه وارجع جري طبعا عشان العيال وطبعا ده كان مره فىا لشهر ولا حاجه .
شويه كده واتجرأت اكتر وكنت باخد العربيه واطلع بس بابا كان بيصر يجى معايا وكنا بنبقى الصبح بدري واروح وامشي كده يجى كيلوا ولا حاجه والدنيا فاضيه وانزل اتمشى ساعه وارجع تاني للعربيه وعلى البيت .
حلو الكلام ؟؟؟؟
بعدين بقى رضا قالي ما ينفعش بقى لازم تطلعي لواحدك . طلعت لوحدي وحصل خير الحمد لله روحت مشوار قريب كده ورجعت صحيح وانا راجعه خبط فى جدار البيت بتاعنا بس جت سليمه اهو بيتنا وعربيتنا مش مشكله .

بعد كام يوم رضا سافر الصين وانا بقى عملت فالحه وخدت ولادي وكنا يوم شم النسيم وقلنا نروح الناااااادي .
تمام كده وماما كانت معانا وماشين زي الفل لحد لما وصلنا قرب النادي وكنت ماشيه على كوبري زحمه اصلا وكنت واقفه وطلعت على الاولاني وما غيرتش عشان اطلع من الكوبري على الملف والاقي واحده ست كبيره ومعاها عيال كده ومولد وشايله حاجات على راسها ووقفت فى نص الطريق تمش خطوه وترجع اثنين اديها كلكس تتلبخ اكتر وانا اتلبخت اكتر واكتر
هوب طاخ بم تش وقعت الست من الخضه قبل ما المسها وقعت وانا فرملت الحمد لله ما حصلش حاجه بس هى بقى كانت بقت تحت كبوت العربيه ابنها كان هايقتلنا قبل ما يشوف امه .

المهم بعد سيل من الاحداث اصروا يعملوا محضر ورحت القسم وكان يوم لطيف جدا جدا جدا . وطبعا المنصوره كلها اتقلب عليا عشان رضا مش موجود كله بيعمل الواجب . ومش عارفه مين فلان بيه اتصل عليا يقولي ادينى الظابط الى عندك وانا اقولهم يا جدعان الست طالعه الاسعاف على رجليها مافيش حاجه ااساسا . المهم اتضح ليا فى الاخر انهم عملوا الفيلم ده ولادها عشان يسلكوا قرشين بس الست الحمد لله طلعت سليمه وانا طنشت لانها ست غلبانه فعلا بس عيالها مش تمام .
المهم بقى رجعت البيت بالعربيه وبابا قالي ما عدتيش تركبيها تاني الا لما جوزك يجى ابقى خوديها وانزلي فى البحر. قلت حااااااااااااضر
وجه جوزي وخرجت بها تااااااااني وكله تمام مافيش اي حاجه بس كان معايا العيال وانا ماشيه مامااااااااااا خالد وقع . طبعا انا زي الهبله بصيت ورايا . بس يعنى كنت هاطلع على الرصيف بس حصل خير ما طلعتش . طبعا ماما كانت معايا عملت قصه وحدووووووته . وكانت اصلا حصلت مشكله هبله وانا بره ومعصباني . رجعت قلت خلاااااااااااص مش سايقه ها ما تقرفوناش بقى انا اقعد واحط رجل على رجل واي حد فيكم يوصلني مكان ما أنا عاوزه بلاش قرف بقى .
لكن رجعت فى كلامي لاني عيله . وانا دلوقتي هاموت واسوق بقى عشان اعرف اخرج بالعيال واوديهم التدريب وماالى ذلك .
والله العظيم حتى لو انا مش باعرف اسوق يعنى هي جت عليا ؟؟؟؟؟؟
ما الناس فى الشارع اهو بيعجنوا ؟؟؟؟؟!!!!! وربنا انا قلت كده لرضا .قالي والله انتي بتقولي فيها .
انا عموما ما حبيتش السواقه ولا سيما فى شوارعنا المنيله دي بالاضافه لان الناس الى سايقين فى الشورع ما ينفعش تقول عليهم بشر اصلاااااا .
انا كل مااركب مع سواق تاكسي لازم ما اعرفش امسك اعصابي واديله كلمتين فى جنابه . حاجه تقرررررف . ماشي بطريقه مش ممكن بتهيئلي لو كان ماشي على رجليه كان بقى احرص من كده . مافيش اشارات مافيش قوانين مافيش عقل مافيش ذوق مافيش مراعاة حق الشارع والاخرين مافيش اي حاجه .
بس اعمل اييييييييه لازم اسووووووووق برضه .
الغلط فييييييييين فيا ولا فى الى ادوني الرخصه ولا فى الى خايفين عليا اسوق ولا فى الشوارع الهم ولا فى السواقين الى مش سواقين . ولا فى كله ده .
وايه المطلوب من الى عايز يسوق فى البلد دي ؟؟؟؟ انه يتعلم السواقه ولا انه يسوق فيها ؟؟؟؟؟؟؟؟؟؟؟؟؟؟
وعليه انا بطالب بحقى بقى فانى اسوووووووق فيها ............ اتصرفوا فى الموضوع ده وافيدونا افادكم الله .

شوفوا البوست الاخير فى الرؤيه الاسلاميه عن عائشه بنت ابي بكر زوجة الرسول صلى الله عليه وسلم

وشوشه للرجال

سلام عليكم

يعنى مش عارفه اعتذر للرجاله ازاي على تأخير البوست بتاعهم بس غصب عني يا كباتن والله . والبوست اهو بس ده بقى الستات هاتدخل تقراه عادي اه فرض سيطره بقى على القاعده . وبعدين يا ستات اي واحده عندها مطالب اخرى تتفضل تقول .

وبعدين اي حقد على الستات عشان انا دلعتهم المره الى فاتت وقلتلهم يا ستاتيت مش عايزه جيت ادعلكم واقول رجاجيل لقيتها سخيفه اوي مش لايق عليكم دلع خالص .

نبدأ الوشوشه بقى :

اولا: المره الى فاتت قلت فى بوست وشوشة ستاتيت للستات ( الايثار - الكلام - المشاركه - ساحرة القلوب - تهادوا تحبوا - ممنوع الخصام الطويل ) كل ده معاناااااااااا .

ثانيا: اوعى تفكر انك تحسسها بالغيره عليك عشان تزود حبها يبقى جنيت على نفسك عشان كده هاتولع نار مش هاتعرف تطفيها لانها هاتوصل عندها نوع من عدم الامان من ناحيتك

ثالثا: ما تعلقش كتير على لبسها الى مش عاجبك او مكياجها او حتى شكلها وخصوصا شكلها لوحبيت تبدى رايك فى اي موضوع من دول يبقى لاااازم تبقى حريص اوي وكفايه اوي تلميح من بعيد ويكون قبليه كلمة حبيبتى .

رابعا: اذا حبيت تطلب منها طلب زى عزومه اصحابك مثلا يبقى لازم تحسسها انها هاتعمل كده عشان بتحبك مش غصب عنها والا اصحابك هايباتوا فى المستشفى .

خامسا: لا تذمها ابدااااااااااا قدام اهلك او صاحبتها او اصحابك ويستحسن مش قدام اى حد. لان فى مثل تعتقد فيه كل النساء هو( من قلها زوجها يا عوره لعبوا بيها الناس الكوره)

سادسا: اذا نسيت ان النهارده عيد جوازكم او عيد ميلادها او اى مناسبه انشاله اول مره هى كحت فيها قدامك لما تفكرك مش تقولها ان الموضوع هايف ومش يستاهل مدام هى فاكراه يبقى مهم عندها انت استغرب من نفسك انك نسيت واعترف بخطأك على طول من غير مكابره وياريت تقولها البركه فيكى انتى عقلى تبقى تفكرينى( وخليك لطيف واظبط الموبايل يفكرك بعيد ميلادها وهات لها هديه من غير ما تسألها اجيبلك ايه ولا تديها 100 جنيه وتقولها هاتي الى نفسك فيه ).

سابعا : اذا جابتلك هديه مش مهمه او ورد مثلا مش تقولها صرفتى الفلوس فى هيافه كفايه انك انت نسيت اساسا تجيب هديه او جبتلها هديه خلاط أو شبب .

ثامنا: لما تقابل اى واحده ست او تكلمها فى التليفون احسنلك لما تروح على طول تحكى لها عشان لو اكتشفت من بره هاتبصلك بكل شك وريبه حتى لو كانت متأكده من الموقف.

تاسعا: ما تلغيش شخصيتها بمعنى ما تحولهاش لمسخ حاول دايما تعلمها كل حاجه انت بتعرفها وتكلمها عن شغلك وتاخد رايها فيه حتى لو مش عملت بيه بس تحس انها قالت رايها وبعدين لما يطلع رايك انت غلط هاتقولك لو كنت سمعت كلامييييييي . وصدقنى اول من سيفتقد عقلها لو فقدته هو انت .

عاشرا: حاول تتفرج معاها على برنامج الموضه والميك اب عشان تبقى تسيبك تتفرج على الماتش واتكلم معاها وانت بتتفرج ما تقعدش مشمقنط وتحسسها انها بتتفرج على هيافه وحاجات مش مهمه بس ما تنساش اوعى تعلق على الموديل انها حلوه عشان هاتبقى اخر مره تتفرج فيها على التلفزيون

الحادي عشر: اذا تكلمت عن اى سيده اخرى حتى لو كانت اختك لا تمدحها كثيرا خصوصا لو كانت فى حاجه مش فى زوجتك زي انها مثلا شعرها اصفر وزوجتك شعرها اخضر يبقى نهارك هايبقى الوان حتى لو كانت مامتك . لو لازم تمدح ما تطولش وفى الاخر قولها هو فى زيك انتى ياحبيبتى صلح نفسك يعنى . وما تبقاش قاعد تاكل من ايديها وتقولها فينك اكلك ياماما هاتقولك روح كل عند ماما . كل وقولها تسلم اديكى ده احسنلك يعنى .

اثنى عشر: لا تمنعها من اهلها كلما منعتها زاد شوقها اليهم وحثها على ودهم ما تخلهاش تحس انك ند لهم وبعدين ده لو كنت عايزها تبقى تضحك فى وش اهلك

الثالث عشر : معلومه تهمك كل الستات فى مجتمعنا عندهم مشكله . انهم اتربوا فى كوكب مختلف عن كوكب الرجال بمباديء واخلاق تانيه خالص . تخلى الخجل ممكن يقتل المشاعر جواها قبل ما توصلك . مهما ادعت هى عكس ذلك اعرف ان ده جواها . ترفق بها وحاول تكسر الحاجز الى ممكن يتخلق بينكم للسبب ده وحاول قبل ما يكبر الحاجز ده .

رابع عشر: عاشرها بالمعروف . ورفقا بالقوارير. واوصيكم بالنساء خيرا. وان احببتها اكرمها وانم لم تحبها فلا تظلمهاهكذا علمنا رسول الله صلى الله عليه وسلم فلنمشي على الدرب

وفى النهايه اقولكم ربنا يوفقكم جميعا وشكرا لكم

الى ما يجيش بالذوق نعمل فيه ايه ؟؟

السلام عليكم

والله العظيم وحشتوني جدا ووحشني الرغي موووووووت بس مش عارفه اكتب والله مشغوله جدا جدا .

المهم طبعا انتم مستنين البوست الجديد بتاع اخوانا الرجاله بس والله مش فاضيه اكمله عشان ده محتاج مخمخه عاليه وتكتيك محكم .

بس انا النهارده بقى قلت اقولكم على كام نقطه كده قابلونى فى الكام يوم الى فاتوا قبل ما انساهم .

أولا : من موقعي هذا باوجه اعتذار وشكر وامتنان لخالتي الحلوه طنط حنان . اعتذار عشان هى زعلانه مني عشان كلمت ماما وهى بتزورها في القاهره سألتها هاتيجى امته وقولتها تعالى بدري عشان تتغدي معانا ودى جريمه شنعاء واتخناقنا فيها وكنا خلاص هانجيب البوليس .
وشكر وامتنان لاني اكتشفت انها بتشجعني فى صمت وبتطبع المدونه بتاعتي وبتقراها وانا ما اعرفش الا من كام يوم .
وحاجه ساقعه على حسابي للبلوجريه كلهم يا جدعان على شرف طنط حنان .

ثانيا : هاحكيلكم على صوره شوفتها وحبيت ابرزها واوضحها من موقعي هذا برضه - حلوه موقعي هذا دي عجبتنى - المهم يوم الخميس فى تمام الساعه الثانيه ظهرا كان موعدي مع دكتور الاسنان (لا مش طقم ما وصلناش للدرجه دي بس قربنا )
لاحظت ملاحظه مهمه جدا فى الشارع وان تقريبا تسعين فى المائه من الشباب الى قابلوني فى الشارع من عمر مثلا 16 سنه لحد 22 سنه كده تقريبا ويمكن اعلى شويه
كلهم باين على وشهم كده لسه مدلوقين من على سريره حالا يادوب غسل وشه وضرب حبة جل فى شعره او حتى زيت تموين وخارج بقى ويمكن نصهم تقريبا عنيه حمرا دم وشفايفه زرقا (بيشرب سجاير يعنى على الاقل )
المهم قلت لرضا هو في ايه هو الناس كلها لسه صاحيه من النوم ليه ؟؟ وبعدين الناس الى صاحيه من النوم مش هما الفئه المنتجه فى الشعب اصلا ؟؟؟ لما يبقوا لسه نايمين لحد دلوقتي امال مين الى صاحي ومين الى بيشتغل ؟؟؟؟
رضا رد عليا ساخرا : منتجه ؟؟ مين دول ؟؟؟ قلتله الشباب مش المفروض ان المرحله العمريه دي هى ذروة الشباب والعمل .
طبعا ظهرت على وش جوزي علامات القرف كده والخنقه من الحياه وقالي :اه ان شاء الله .
بصراحه نفسي ميزان الحياه يتعدل تاني بينا والناس تصحى الصبح وتنام بالليل والناس تشتغل والدنيا تتظبط كده تاني اصل خلاص الحكايه بقت خانقه على الاخر .

المحلات عندنا ما عدتش بتقفل طول الليل وعلى العكس كمان طول النهار قافلين . انا مره اتهفيت فى عقلي ونزلت اشتري حاجه من شارع فيها المفروض محلات ملابس كتير وكانت الساعه 12 ظهرا . لقيت كل المحلات لسه قافله ؟؟!!
ولما فتحوا بعد الظهر روحت لقيتهم كلهم حاسين انى كائن فضائي لانهم ما كانوش فاضيين بيرتبوا المحل والبضاعه استعدادا لفترة الشغل بقى الى هى اخر النهار وبالليل ولما سألتهم . صاحبة المحل قالتلى: اعمل ايه يا مدام انا بابدأ اقفل الساعه 1 بالليل بافضل امشي فى الزباين مش عايزين يمشوا يجى ساعه واكتر . باقفل الساعه 2 ويمكن اكتر . انام امته وافتح بدري ازاي ؟؟؟

وانا كنت فى ابو ظبي كان فى قانون على ما افتكر المحلات بتقفل الساعه 11 . يارب اشوفها لان في رايي انها كلها متواليه مرتبطه ببعضها .
يعنى لو المحلات قفلت بدري الناس هاتروح بدري مش هايلاقوا حته يتسرمحوا فيها . وعليه المحلات دي هاتفتح بدري والناس تظبط نفسها تشتري حاجتها قبل ما المحلات تقفل . وهكذا . ولا ايه رايكم ؟؟؟

ثالثا : الحكايه التانيه . انا روحت النادي يوم الجمعه وما رضيوش يدخلوني واتخانقت مع الحارس الى هناك ودخلت عافيه . اه انا بقيت متشرده . انا عارفه انه النادي ده للاعضاء فقط . لكن صدفة سألتهم لما روحت هناك للولادي وهما فى رحله فيه ممكن ادخل بتذاكر قالي اه ومن يومها من كام شهر وانا بادخل عادي . والى بقطعلي التذكره بيقعد يتلاكع كده عشان ازهق وامشي ويضرب هو على الفلوس لكن هيهات مش انا .
لكن بقى بعد الخناقه والدخول عافيه اكتفشت انهم بقبلوا التذاكر فقط فى حال النادي فاضي اما لو زحمه طز فى الناس الى جت من بيوتها وقطعت مشوار عشان تدخل . لان الناس مش مهم اصلا . لو محترمين كانوا اعلنوا ان الاجازات قاصرة على الاعضاء لكن هما اعلنوا انه للاعضاء وبعدين بيدخلوا بقى حسب مزاجهم وهواهم . كان ممكن احل المشكله بتليفون من غير خناق . لكن حيث ان قبلي بدقايق اصحابي دخلوا بتذاكر ومكلمنى من جوا النادي . فلا بقى مش هاتصل بحد ومش هاخرج والى تقدر عليه اعمله .
بدأت اؤمن ان الي ما يجيش بالذوق يجى بالعافيه. موقف ما كنتش احب اعمله لكن دفعونى اليه دفعا . يارب نكون محل اهتمام الاخرين .

رابعا : المكان شارع البحر (شارع رئيسى فى المنصوره ) الزمان يوم الجمعه الساعه 9 مساءا . الموقف ان الشارع زحمه جدا جدا والعربيات لازقه فى بعضها وفى كمية هبل مش معقوله من السائقين لعباتهم المدلعه نفسها على الاخر .وانا رايحه ما خدتش بالي اوي من خلفيات الموقف . وأنا راجعه بقى لقيت ان مصدر الزحمه عربيات مدلعه وتلاقي السيناريو ده قدام عربيه على اليمين سايقها بنت ومعاها صاحبتها ومشغله الكاست وبتهزر راسها وهى بتدندن مع الكاسيت وكلهم حاطين وشهم فى كيس الدقيق قبل ما يخرجوا ولابسين عجائب . وعلى الشمال عربيه تانيه فيها ولد لزج واهبل ومعاه اصحابه برضه ولابسين هبل برضه وناقشين وشهم زي الستات برضه مافيش ماااااانع . ومش شايف اي حد فى الشارع الا الحلوه ام كيس دقيق على وشها وجري وراها زي ال ...... ما علينا . غير عابيء بالناس الى في الشارع وعليه التلطيش فى الناس شغال على اشده .
المشهد ده اتكرر صدقوني على طول الطريق يجى حوالي 5 مرات تقريبا الى هو الطريق اصلا اخد ربع ساعه بسبب الزحمه .
حد بقى يقولي اعمل ايه وانا شايله المراره من اربع سنين ؟؟؟
ملحوظه : الشارع ده كله مستشفيات العام والجامعه والطواريء . وأنا عن نفسي كنت رايحه بابنى مستشفى العيون . والشارع زحمه ومقفول عشان العيال الهبله دي بيتفسحوا . وصبرني يااااااااااااارب .

وكفايه كده رغي واشوفكم على خير

شوفوا كمان معاملة اهل الكتاب كما اراها فى دينا الجميل

زعلانه منكم اوي عشان ما حدش بيجى فى المدونه التانيه رؤيه اسلاميه متواضعه وجوزي كل شويه يقولي ولا حد معبرك شكلى بقى وحش اتكسفوا بقى

22- وشوشة ستاتيت (الجزء الاول )

السلام عليكم ورحمة الله وبركاته

ازيكم يا ايها المدونين والمدونات والزائرين والزائرات بس خلاص كده نص القاعده تطلع بره .

اه الرجاله من فضكلم يطلعوا بره عشان الموضوع ده من اسمه اهو زي ما انتم شايفين موضوع بتاع الستات .

لا البنات خليكم ما انتم ستات المستقبل .

يلا شكر الله سعيكم يا رجال روحوا اقروا موضوع الرؤيه الجديد صلة الرحم يلا نشوفكم بعد شويه

مش تقطعوا فى نفسكم بقى بعد شويه هابقى اعملكم موضوع ونطلع الستات بره انا حقانيه على الاخر .

نبدأ وشوشه بقى رغي برضه بس وشوشه يعنى بالراحه (ولا كلمه هاوطي صوتي مش عشان قلتلكم ان صوتي عالي بقى )

شوفوا بقى يا ستاتي يا حلوين من خلال حياتي الطويله العريضه ورغيي العظيم مع ستات كتيير هاقولكم بقى على خلاصة افكاري انتم حبايبى ما اعزوش عليكم .

ندخل فى الجد بقى . امنية حياتي فعلا اشوف المتزوجين كلهم او حتى معظمهم سعداء ببعض ومطبقين الايه : وجعلنا لكم من أنفسكم أزواجا لتسكنوا اليها وجعلنا بينكم مودة ورحمه

4 كلمات هنا ركزوا فيهم ( من انفسكم - لتسكنوا - موده - رحمه ) بس ده ملخص الحياه الزوجيه الى المفروض تكون على اختلاف ظروفها ده الاساس يعنى .

فى حاجات صغيره يا بنات احنا بننساها او بمعنى تاني بنتاجاهلها هانقول شوية مبادي كده صغننه ويارب تكون مفيده .


شايفاااااااااااااااااااااك اطلع بره قلنا النهارده القاعده ستاتي .


أولا : الايثاااااار : الايثار ده مهم اوي فى اي علاقه وديه اصلا بين اثنين مش بس المتزوجين (الايثار :تفضيل الطرف التاني وتقديمه على نفسك ) . ده اساس العلاقه متفقين ؟؟؟

ثانيا : الكلام : ايوه كلام لازم تتكلموا مع بعض كتير فى كل حاجه واي حاجه ما تخليش ابدا السلك يتقطع خليكى دايما اون لاين معاه اتكلموااااااااااااااا فى كل حاجه كل حاااااااااااجه .كمان لو حبيتى تسمعى كلمه حلوه ما تسنهوش يقولها عشان غالبا مش هايقول قولى انتى كلمه حلوه عشان تسمعى زيها .وما تنسيش اهمية ساحرة القلوب

ثالثا : المشاركه : مافيش حاجه اسمها ماليش دعوه او مالكش دعوه من اول ما تعرفي الراجل ده عايزاكي تلزقي فيه ولا اللازقه الانجليزى . ما تسبيهوش ابدااااااا اقولك بلاش الانجليزى . الزقى فى رقابته زي القراضه (مش عارفه هى ايه بس بيقولوها كده ) اعرفي كل حاجه عن الشغل عن اصحابه عن اهله عن الناس الى قابلهم فى الشارع

وانتي كمان قوليله كتير عن كل حاجه عملتيها وبتعمليها اي وقت ما تبقوش مع بعض فيها حاولوا تعيشوه برضه مع بعض .اتفرجوا على الماتش مع بعض واحكيله بعد الماتش على الموضه الجديده فى الميك اب والبرنامج الى شوفتيه عن طريقة عمل البتنجان المخلل .

حتى لو كلامه قليل شدي الكلام من بؤه واربطي طرفه على صباعك وشدي بقى كلمه كلمه يا حلوه .

وتهتمي بكل حاجه تهمه شغله امه اهله اصاحبه الماتش البرنامج الى بيحبه كل حاجه هو بيحبها لازم تشاركيه فيها وتحاولي كمان انه يشاركك اهتمامتك . من غير حاجه هو لو حس مشاركتك له هايبقى كده معاكي .

من الاخر ترشقي مناخيرك فى حياته ما تطلعيهاش ابدا بس من غير ما يحس عشان ما يتخنقش منك خليكى ذكيه .

رابعا : تعيشوا مع بعض مش تبقوا اغراب فى بيت واحد . تاكلوا مع بعض (تستنيه لما يرجع ويستانكي ). تناموا فى وقت واحد وفى مكان واحد (مش مهم لما يصحى من صوت العيال عااااااااادي) . وتحاولوا تصحوا فى وقت واحد . مش جايلك نوم بررررررضه ادخلي نامي هو كده (مش انا قلت تلزقيله ؟؟؟) ما تتعبونيش بقى .

خامسا : ايااااااك وانك تشتكيه لاهلك ولا تقولي عنه اي حاجه مش تمام وهو قاعد قدام اهلك ولا اهله كمان بس قدام اهلك الطامه الكبرى واه لو حس انك بتشتكى لمامتك بقى منه موال تاني وهايكره امك اصلا ويحس انها سبب كل المشاكل .

سادسا : اياااااك والخصام الطويل . الخصام اقصى مده له 12 ساعه بعدها اموتك لو ما اتصالحتوش وتتفقوا على كده رسميا . مافيش نوم وانتم متخاصمين . البعد بيولد الجفا ومافيش حاجه بتتنسى . اتكلموا واتعاتبوا فى يومها وصفوا الجو واتفقوا تنسوا واتعودوا تعتذروا لبعض انتم الاثنين . اعتبروا ده مبدأ واتفقوا عليه فعلا مش ضمنيا .

يا سيدى قلنا بررررررررررره هاعملكم موضوع لوحدكم بقى

سابعا : تهادوا تحبوا . ما بيجبلكيش هديه ؟؟؟؟ عادي مش مهم . يوما ما هايتكسف ويجيب لما يلاقي شكله وحش . اتصلبي واعملى مناسبه . عيد جوازك . عيد ميلاده . فى مثل هذا اليوم خطوبتنا ولا اول مره شوفتك فيها ولا اول مره بربشت وانا باكلمك كده يعنى اي حاااااجه .

مش لازم هديه يا ستىىىىىىى احتفلي انتى انشاله تعملي طبقين كستربالشيكولاته اي حاجه .

قدامك بتاع ست سبع سنين على ما يبدأ يتحرج بقى ويبقى يجيبلك هو هديه فى المناسبات دي ده لو افتكرها يعنى .

ثامنا : اياك ثم اياك تنتقضي اهله وبالذاااات ماماته خصوصا فى اول الجواز هو اصلا عنده استعداد فظيع انه يصدق انك ما بتقبليش اهله ومش طايقاهم . فلو عندك كلمه حاولي تبلعيها وتقولبيها بحيث تبقى مش هجوم مباشر وبرضه خليكى ذكيه .

تاسعا : خليه دايما يحس انك محتاجه له فى كل حاجه ما تقدريش تستغنى عنه وكونى كده فعلا ده منتهى السعاده عنده وعلى العكس كمان خليه برضه يحس انه محتاجلك دايما فى حياته كلها حتى شغله . حاولى تفهمى فى شغله وتتكلمى فيه .مخك مهم اوي شغليه.
ده غير طبعا انك لازم تمدحي مجايبه (ما تقوليش ياما جاب الغراب لامه ) قولي تعيش وتجيب يا ابو نسمه كده يعنى .
خليه دايما يحس انه مجهوده مثاب عليه . حتى لو جاب الفاصوليا زي الكاوتش لما يجي ياكلها هايعرف الحقيقه وابقى ساعتها علميه بقى يشتريها ازاي . هايقبل الكلام ماهو بياكل كاتوش ياا مي .

عاشرا : لازم تكونى كل الادوار والشخصيات خليكى هاديه احيانا وعاصفه احيانا ومنظمه ومهرجله , عقله ومجنونه, كبيره وصغيره , جميله ولا, خليكى مراته واخته وحبيبته وصاحبته وامه ومديرة اعماله وسكرتيرته وكل حاااااااجه كل دور له وقته خليكى ذكيه. عادي ممكن تكوني كده ما تقوليش ازاي .

وقبل كده ده يا ناس احنا لما نكون داخلين على جواز نبقى داخلين على حياه سلميه مش حرب ولازم يكون فيها غالب ومغلوب لا احنا عايزين نعيش كويس يا ناس ما تعذبوش نفسكم .

وعلى فكره فى حاجات مهمه كتييييييييييير اوي لسه عايزه اتكلم فيها لكن المره دي كفايه كده واعتبروا دي اول حلقه من الوشوشه .

سوده بنت زمعه

زوجة الرسول عليه الصلاة والسلام تعالوا نتعرف عليها اكتر فى مدونتي الاخرى

رؤيه اسلاميه متواضعه

21-التاج ده جاني قلت اه يانى

سلام عليكم

ايه موضوع التاج ده كان بيقابلنى برضه فى مدونات لناس كتير وقابلنى الطاقيه بتاعة خيخه لكن مش عارفه هو عباره عن ايه

لكن اظاهر والله اعلم ان لما حد يهديلى تاج المفروض ارد عليه هنا فأنا هاعمل كده ولو انه تاج متعب يا فيس موون

التاج ده جاني من الجميله فيس مون . بس بافكر ابطل اقولها يا جميله خلاص هههههههههه

اتكلم عن نفسي يا لهوي يا بنتى انا رغايه يعنى ما بابطلش كلام تقومي تقوليلى اتكلمى عن نفسك .

ونقول التاج :

أولا:اذكر عشرة اشياء عن نفسك

ثانيا:اختر خمس اشخاص تهدى لهم التاج

ثالثا:لا تهدى التاج لمن اهداه اليك

رابعا:عرف اللى بعتلك التاج انك نزلته عندك

عشرة اشياء ؟؟؟ ايه ده هما كلهم هايطلعوا حاجه واحده فى الاخر .

طب نبدأ بالوحش ولا الحلو ؟؟؟؟ نبدا بالوحش الى نفسي اغيره بجد

اولا : عصبيه جدا جدا تقدروا تقولوا بابقى مجنونه احيانا نفسي ابقى بارده وهاديه شويه عشان انا الى تعبت من العصبيه دي قبل اي حد تاني .

ثانيا : صوتي عالي . مش عارفه اعمل ايه نفسي حد يظبطلى الاوبشنات بتاعة الصوت. بس انا طبقة صوتي عاليا سواء باتكلم اوبازعق او باضحك (الضحك ده بالذات مشكله ) . والصويت بقى وانا متعصبه قدام العيال مشكله اكبر واكبر .

ثالثا : رغايه . اه والله باتكلم كتير زي ما انتم شايفين عايزه ابطل رغي شويه بس مش عارفه ابطل اصله ادمان باين . حتى فى ناس ادمنو الرغي بتاعي برضه لو ما رغيتش يسألونى مالك في ايه ؟ وتلاقيهم كده ما يجلهمش نوم قبل ما ارغي فى ودنهم شويه .

فى حاجات بقى مش عارفه هى عيوب ولا مزايا بس انا بصراحه مش عايزه اغيرها .

رابعا : انا جريئه مش عايزه اقول جدا لكن هو انا جريئه الى حد بعيد لكن مش جرأه رعناء يعنى بعقل مش باحدف نفسي فى الحفره واقول هيه .

خامسا : انا شديده شويه . لا خليها شويتين لكن والله فى الحق يعنى ما اعرفش اطبطب على حد وهو غلطان من غير ما اقوله الاول انه غلطان واظبطه كلمتين جامدين وبعدين اطبطب بقى .

لكن على المستوى العام انا شديده حتى مع الولاد لكن مش قاسيه مع حد ابدا ومش عايزه اغيره لانى شايفه ان الشده دي لازمه ومهمه جدا .

سادسا : اجتماعيه جدا جدا . بحيث انى ممكن مثلا اصاحب واحده فى خمس دقايق وهى تحس انها مستغربه اني باكلمها ازاي وواخده عليها كده ببساطه .

مش عارفه ليه بس هو انا كده اخر مره روحت مع الولاد نادي اول مره نروحه واحنا مروحين بعد 3 اربع ساعات فى النادي كانوا العيال كلهم وامهاتهم بيعملولنا باي بابتسامه عريضه ووديه جدا . هههههههههههههههههههههه.

ومش عايزه اغيره برضه انا مبسوطه كده .

لسه كتير ولا ايه ؟؟؟؟؟؟

سابعا : صريحه جدا جدا . الصراحه الى هى صراحه مش بجاحه . يعنى مش هاقول للاعور انت اعور فى عينه . لانه اصلا عارف انه اعور . لكن ممكن لو لقيته سايق الاستهبال ومش عارف انه اعور او مش حاسس الفت نظره لان تقريبا نظره ضعيف .

اقول الحق لو على رقبتى لكن بقدر الامكان باحاول ما اجرحش حد . لكن دايما اقول ساعات فى جروح لما الواحد ينكشها يبقى كويس عشان بتبقى محتاجه تنظيف وتطهير وتقفل على نضافه .

نيجى للصفات العامه بقى :

ثامنا : باحب اتعلم كل حاجه فى الدنيا مش بالضروره نجحت فى كل حاجه حاولت اتعلمها ( ما حدش يفكرني انى فشلت فى اول جوله فى السواقه وقضيت شم النسيم فى فات فى قسم البوليس بس دي اول جوله لسه لم ايأس). باحب النت اوي عشان امكانية الاطلاع على اي حاجه فى اي وقت . باحب الابداع الفني عموما واسمع الاغنيه الحلوه والنغمه الحلوه والكلمه الحلوه بصرف النظر عن مين كاتبها رغم ان في ناس اغلب اعمالهم بتعجبنى .

تاسعا : علاقتى بربنا بينى وبينه مش هاتكلم عنها . لكن دينى باحاول اعرف الى يخلينى ارضى ربنا ويخلينى استحق اعيش فى خيره ونعمه عليا . وهافضل طول عمري ان شاء الله احاول اعرف واتعلم فى دينى واحاول اعلم الى اعرفهم كلهم الى انا اتعلمته .

عاشرا : واخيرا هيييييييييييه باحب المطبخ جدا جدا اطبخ واعمل حلويات واتعلم الجديد واكل مافيش مانع ( امال باعمل ابر صينيه ليه ) انتظروا قريبا مدونة طابخين ايه النهارده .

يااااااااه كان تاج بجد مرهق ما اتعودتش اتكلم عني . اي حد يعرفنى وعايز يضيف على وصفي حاجه يتفضل وليا حق الرد طبعا .

اهديه لمين بقى هو ده السؤال الصعب فعلا اختار مين ولا مين

بس هاحاول اختار :

فرنسا هانم(جاوبته امبارح )

بت خيخه واي كلام

دكتور حر

مفقوعه مرارتها من الست حماتها

خايف من الحقيقه

مفروسه حبيبتى

نفسي ابعته للبلوجر كلهم وشكرا لكي فيس مون وشكرا للجميع والمهدى لهم التاج كمان مقدما .

تعديل هام فى الموضوع يا قوم فرنسا حبيبتى قالت ان التاج ده جاوبت عليه امبارح خلاص بقى انا مش قادره لازم ابعته لحد تاني غير فرنسا عشان برضه دي فرصصصه ما اقدرش افوتها انا عايزه ابعته للبلوجر كلهم اصلا

ونقوووول نختار مين يا ترى يا هالترى مفروســــه

اعلااااااااان هام

الى هايدخل هنا ومش هايروح يشوف الموضوع الجديد الى فى

رؤيـــه اسلاميـــه متواضـعــه البوست الجديد عن السيده خـديـجـــه بنـــت خـويلــد هانحطه على الكرسي الكهربائي

سؤال يغيظ جدا

طبعا حاسين انى دايما مفروسه ومتغاظه وكده يعنى عادي ما هو ده تقريبا سمة العصر والله نفسي ابقى بارده واعصابي هاديه على الاقل يومين ثلاثه اجازه شويه عادي بس اظاهر دى نعمه انا لسه ما استهالهاش .

قبل ما اقولكم على السؤال البوست ده ليس اكثر من انى بافضفض فمش عايزه حد يقولي لزمته ايه وفكرته ايه البوست .

السؤال بقى وله عده اشكال اشهرها :
* انتى متجوزه وبتدخلي نت تعملى ايه ؟؟؟ وشات كماااااان ؟؟؟!!!
* انتى جوزك عارف انك بتدخلي النت والشات ؟؟؟؟
* انتى جوزك مش بيضايق من انك بتدخلي النت والشات ؟؟؟؟؟
* انتى بتتكلمى فى الدين على الشات ؟!!!!؟؟؟ طب امال داخله الشات ليه ؟؟!!!!

طبعا انا باحاول اكون هاديه جدا ومؤدبه وانا بارد على السؤال ده بشتى اشكاله لكن لااخفي عليكم بابقى من جوايه نفسي احدف الى قدامي باي حاجه خصوصا انه كمان ما عندوش استعداد يسمع الرد .

وفى مجموعة اسأله بقى نفسي الناس دي تسألها لنفسها وتر د عليها قبل ما يسألونى انا :

- هو الى مش متجوزه بتدخل النت تعمل ايه ؟؟؟ تدور على عريس ؟؟؟ هو ده فايده النت وشغلانته فى الحياه ولا ايه ؟؟؟
هو لو الشات ده ولا النت حرام وغلط مش يبقى حرام وغلط على المتزوجه والغير متزوجه كمان ؟؟؟؟

- هو ايه وجه العجب ان جوزي يعرف اني بادخل النت والشات كمااان ؟؟؟؟ هو لازم ابقى كدابه واكذب على جوزي عشان يبقى وضعي مرضي بالنسبه للناس والمجتمع ؟؟؟
وايه الخطأ الى بيشوفني بارتكبه على الشات والنت عشان يستنكروا موافقة جوزي هنا ؟؟؟

- ليه المفترض ان جوزي يتضايق من الشات والنت ؟؟؟؟ عشان باكلم ناس ورجاله كمان يادي العيبه والفضيحه والجرسه ام حناجل ؟؟؟
طب اشمعن ما بيقولوش كده على الي مراته بتشتغل ؟؟؟ ماهو كمان موافق انها تخرج تشتغل وتكلم ناس ورجااااااله كمان ووجها لوجه مش من وراء حجاب ؟؟؟؟؟
ما حدش يقولي الشغل مهم والنت والشات لا . او الشغل اضطرار لان فى ستات بيشتغلوا من غير اضطرار ولا حاجه بتشتغل عشان تحقق ذاتها زي ما صفوت الشريف حفظ الشعب كله البؤين دول .
هل انا مش من حقى احقق ذاتي بالطريقه الى تعجبنى ؟؟؟ ولاتحقيق الذات بس فى الوظيفه الى هى بتروح تنقى رز هناك ؟؟؟
وهل تحقيق الذات وتقدير الذات ما يتحققش الا عن طريق حاجه مدفوعة الاجر ؟؟؟
وهل مبرر لو كانت الست هاتجيب فلوس يبقى مش مشكله لما تعمل حاجه غلط من وجهة نظر الناس وهى انها تخرج وتكلم رجاله ؟؟؟؟ ده ايه المبادي ء دي ؟؟؟

- ايه التعارض بين الكلام فى الدين والشات ؟؟؟؟
هو يعنى ايه شات ؟؟؟؟ حد عارف يعنى ايه ؟؟؟ الشات يعنى دردشه يعنى رغي يعنى كلام . والكلام حلاله حلال وحرامه حرام .
يبقى الشات فى حد ذاته مش حرام وانما يبقى حرام لو قلنا فيه كلام حرام . انما ايه الحرام لو كنت هاتكلم فى الدين او حتى هاتكلم كلام عادي بكل احترام ؟؟؟؟
الشات فيه ناس مش كويسه ومالوش لازمه احتك بهم ؟؟؟؟ طب ما كل الدنيا كده والشغل كده اي واحده كده من الستات الى بتشتغل لو سمحتم تقولي المكان الى بتشتغل فيه مافهوش حد زي الناس الي فى الشات ؟؟؟؟
وزي ما بيقولوا للست والبنت الى بتشتغل كل واحده بتحدد الناس تتعامل معاها ازاي والمحترمه تعرف توقف كل واحد عند حده . طب يعنى المحترمه ما تعرفش تعمل كده فى الشات والنت ؟؟؟

وهل عشان فى كل يوم والتاني واحده تطلعلنا بقصه انها خانت جوزها من خلال النت او بداية من النت يبقى النت هو الى متهم مش الخاينه ؟؟؟
وهل الخيانه كانت مستنيه النت والشات والموبيال عشان تبقى موجوده ؟؟؟؟؟
على فكره انا لو جوزي اعترض على وجودي هنا لمجرد انه مضايق ليس الا يعنى من غير اسباب تانيه غير انه بيتضايق انا هاسمع كلامه ارضاء لله تعالى وكمان لانى ماا رضاش اضايق جوزي ولا اخليه يعيش مضايق مافيش حاجه تستاهل كده .
لكن افتكر ان عمر بن الخطاب كانت زوجته مش فاكره مين فيهم بتخرج تصلي العشاء والفجر . وكانت هو بيتضايق من كده . لكن ما منعاهش ولا قالها . ولما الناس سألوه قالهم ما رضيتش امنعها لحديث رسول الله ( لا تمنعوا اماء الله مساجد الله ) ولما قالولها انتى بتخرجي تصلي بالليل وعمر بيبقى مضايق . قالت لهم : وما منعه ان يمنعني ؟؟؟؟؟؟

انا شايفه ان مجرد هوى النفس مش كفايه عشان تحرم الناس حقها الى ربنا ما حرموش . ايوه لان المبدأ بتاع انا ما ارضاش بكذا وكذا بدون مبرر ولا دليل . يبقى ليس اكثر من هوى النفس وبس .

ساعات باشك فى نفسي وفى رايي . لكن مش قادره اغير افكاري لمجرد معارضه بعض الناس لها بدون مبرر . وبدون اقناع وبدون حجه . انا بادعي ربنا دايما ان يرينى الحق حق ويرزقنى اتباعه ويرينى الباطل باطل ويرزقنى اجتنابه .
وعشمي فى ربنا انه يتقبل دعائي ومش هاتررد فى تغير افكاري لو اكتشفت انها غلط لكن لحد الان ما حدش اقنعني .

بصوا انا بساتحمل زقل طوب طول عمري على افكاري لكن النهارده بالذات الى هايزقل طوبه واحده هو الجاني على نفسه .