مصطلحات سياسيه

 نظرا لاننا كشعب بيحب يفتي فى كل حاجه فى الدنيا والفتاوي دلوقتي الي على الموضه هى الفتاوي السياسيه فحبيت اعملكم شويه تعريفات كده مهمه عشان نبقى فاهمين احنا بنقول ايه عن مين وكده وياريت لو حد عنده مقترحات لتعريفات اكتر يكتبهالي فى التعليق عشان اعمل بوست تاني بيها

هيا بنا نتعرف 

 

ليبراليه : كمعنى لغوي مشتقه من من كلمة liber   والتى تعنى باللاتينيه حر ... من هنا جائت تسميتها بليبراليه او حريه

هي مذهب يرى حرية الأفراد والجماعات في اعتناق ما يشاؤون من أفكار والتعبير عنها بشكل مطلق وبالطبع احترام حرية الاخرين

شيوعيه (ماركسيه ):

: وتعرف بعلم تحرير الطبقه العامله (بروليتاريا) اي الذين يعتمدون فى دخولهم على حصيلة اعمالهم فقط.. واطلق عليها الماركسيه نسبة الى كارل ماركس منظر الشيوعيه الاول  وهى اكثر شموليه من الاشتراكيه  وقد ظهر الفكر الشيوعى بعد الثوره الصناعيه فى اوربا ووجود شريحه عماليه كبيره يتحكم فيها مجموعه صغيره من اصحاب رؤس الاموال ( حيث لا ملكية فرديه وشيوعية الملكيه فكل وسائل الانتاج مملوكه لكل الناس)

اشتراكيه:  الاشتراكيه هى نظام اقتصادي اجتماعي يقضى بان يمتلك  الشعب او الطبقه العامله وسائل الانتاج بمعنى التشارك فى الملكيه ..ويفترض ان الهدف منها هى القضاء على الفروق بين الطبقات والمساواه وهو شيء نظري الى حد كبير ..ويعد النظام الاشتراكي اكثر حرية وديموقارطيه من النظام الشيوعي وان كان منبثق ومتحد مع الفكر الشيوعي نسبيا(تكون الدوله شريكه للفرد فى امواله لصالح باقي افراد الشعب )

اناركيه (لا سلطاويه):

بروليتاريا: هى الطبقه العامله التى يقتصر دخلها على ما تكسبه من العمل فقط

علمانيه : هى فصل الدين عن الدوله وعدم السماح بوجود اي تميز دينى او طائفي فى نظام الدوله .. وكسر لهيمنة اي سلطه دينيه على سياسة الدوله (مدنية الدوله)

:

الراسماليه : هى ملكية الافراد والقطاع الخاص للرؤس الاموال ( تعترف بملكية الفرد) وهى فكر الاقتصاد الحر وحيث يكون التوزيع، والإنتاج وتحديد الأسعار محكوم بالسوق الحر والعرض والطلب، ويحق للملاك آن يحتفظوا بالأرباح أو يعيدو استثمارها.( الاموال او وسائل الانتاج عموما ملك لاصحابها من الافراد)

العولمه :

هى التدويل او فتح مجالات التعاون والشراكه والدمج بين الدول بشكل يجعل من العالم كله كيان واحد وقد اشار الى الفكره كثير من المفكرين فاسماها فوكوياما العولمه ووصفها بحالة فتح الاسواق العالميه ...واسماها كارل ماركس الكوسموبلتى وهى كلمه منشقه عن كلمه يونانيه تعني الارض والسياسه .. ووصفها بالاقوميه ... وتحدث عنها ايضا  لينين بفكره مشابهه واسمها الامبرياليه ... وتعتبر الشركات العابره للقرات هى اوضح مثال على الفكره

البيرو قراطيه: يأتي أصل كلمه بيروقراطيه من الفرنسية من كلمه بيرو (Bureau ) وتعنى مكتب ، ومن اليونانية من كلمه (Kratos ) ، أي القوه ، (السلطة ، والسيادة) ، وقد استخدمت كلمه البيروقراطيه للدلالة على الرجال الذين يجلسون خلف المكاتب الحكومية ويمسكون بأيديهم بالسلطة ، ولكن توسع هذا المفهوم ليشمل المؤسسات غير الحكومية ، كالمدارس والمستشفيات والمصانع والشركات وغيرها وهوتنظيم نموذجي 

كده وكده

الصوره دي من تويتر طبعا وكلمه ليا كتبتها من فتره

ايوه هى دي الحقيقه

المجلس العسكري عايز يسلم السلطه كده وكده

وده مش اختراعات ولا انا بافتري عليه وانما هى تصريحات لما تجمعها على بعض تطلع كده فى الاخر

الاخوان بعد عقدوا الصفقه اتمام كالعاده مع المجلس العسكري .. مش عايزه تنصل من الصفقات هى شيم السياسيين ولا انتم مش بتلعبوا سياسه يا اخوان ؟

المهم بعد اتمام الصفقه راح الاخوان ساقوا فيها وقالك هانشيل وزاره ونحط وزراه وهانعمل ونسوي قام المجلس العسكري قالك عنددددددك مين ده ؟

وكالعاده نفس القلم بعد كل صفقه ... مجلس الشعب القادم هو مجلس تشريعى شكل لمهمه واحده هى اختيار اللجنه التاسيسيه وسن القوانين وليس من حقه حل الوزاره ... شكرااااا ادي مجلس شعب غير كامل الصلاحيات

طب اللجنه التاسيسيه : قالك لا ماهو احنا لازم نحط وثيقه اللجنه الدستوريه تمشي فى حزاها كده عشان برضه مش معقول نسيب دستور البلد يكتبه عدة اشخاص  على اساس ان العدة اشخاص دول عيال حافيه بتلعب فى الشارع الى ورانا مش لجنه تاسيسيه منتخبه او مختاره من برلمان منتخب من الشعب ولا ايتها حاجه

يبقى كمان اللجنه التاسيسيه غير كاملة الصلاحيات شكراااااااا برضه

طب رئيس الجمهوريه ... ااااه لا ده بقى احنا لازم نحد من سلطاته بموجب الدستور والقانون الجديد ايوووون امااااااااال حتى لا نخلق ديكتاتورا جديدا امااااااااااال ديموقراطيه يا جدعان

يلا بالشفا وكماااان رئيس جمهوريه بلا صلاحيات كامله  نفس الشكراااااااا

وطبعا طبعا الوزاره  اونكل جنزوري ملك الصلاحيات فى الارض الواقع بيقول ان هو كمان بلا صلاحيات كامله

حتى وزير بتروله خرج يقول مافيش ازمة بترول ..واتضح ان كل محطات البنزين عمو الى هناك بيقول للشعب ان ما عندوش بنزين وهو عنده جوه

يبقى نخرج من ده كله بايه ؟؟ ان احنا اصلا عملنا ثوره كده وكده تقريبا ... او ثوره فوتو شوب

وان المجلس العسكري بياخدنا على اد عقلنا ويقولنا ماشي اعملوا برلمان وانتخابات ومثلوا كده مع بعض يا ولاد والعبوا لعبة الديموقراطيه زي ما كنتم بتلعبوا بابا وماما زمان بس فى الاخر الحكم بتاعي

يكونش المجلس العسكري فاكر اننا خرجنا فى ثوره وولادنا دمهم ساح فى الميادين على يدك كلابهم عشان نشيله جمال مبارك من سكته ونديهاله على طبق من دهب ؟؟

طيب يسقط يسقط حكم العسكر ... مش هانسيبكم تركبونا تاني .. لازم تفهموا ان العهد ده ولى ومضى

لاقتناعي الشديد فى اننا بنعمل ديموقراطيه كده وكده انا ما صدمتش ولا اتفاجئت بانسحاب البرادعي وانا صورتلكم التويته عشان فى ناس عجيبة الدماغ قالتلى انتم قلتم كده بعد تنحي البرادعي التويته الى فوق دي عليها التاريخ ياريت نفهم ان انا وناس كتير لسنا اتباع البرادعي وانما احنا انصاره فى الحق ان شاء الله وما زلت اكن للرجل كل احترام وتقدير وتاييد لمواقفه

انا شاركت فى الانتخابات  سواء بالتصويت او بالمشاركه فى حملة الثوره مستمره

رغم انى عارفه انه هايبقى مجلس شعب كده وكده لكن شاركت لان المقاطعه لن تزيد الامر الا سوءا .. احنا قاطعنا سنين طويله وما عملناش حاجه برضه والمره دي مضطرين نخلينا مع الكداب لحد باب الدار ومش ضامنين ايه الى ممكن يحصل بكره كمان

فى النهايه احب اقول للجميع مش للمجلس العسكري بس .. احترسوا

الثوار راجعين يوم 25

صوتك لمين ؟

صوتك  لمين ؟

طبعا الموضوع ده متاخر كان مفروض اتكلم فيه من زمان بس الحقيقه انا نفسي ما كنتش لسه خدت قرار انا هادي صوتي لمين ولا على اساس ايه لانى مرحله ثالثه

انا عارفه ان فى ناس مقاطعه الانتخابات .. الحقيقه انا لقيته مش حل ابدا من وجهة نظري ان كان فى ناس بتحاول تستولى علينا فعزوفي عن حقي فى مجرد انى انتخب مش هايخليهم يستزوقوا معانا يعنى

للاسف احنا فعلا شعب بلا وعي سياسي تماما .. منه لله حسبى الله ونعم الوكيل فيه مبارك وزبانيته ومش بس مبارك الحقيقه احنا بنعاني طمس للهويه من ستين سنه ومحاوله لمسح الفكر الحر من عقولنا عشان يقدروا يسوقوا بسهوله

عموم الناس بيسألوني احنا مش عارفين نختار مين ومحتارين طبعا فيما عادا الاخوان والسلفيين والى غالبا حاسمين امرهم الا قليلا لاسباب مكانيه او فكريه خاصه وفرديه

لاحظت حاجه سخيفه اوي اوي ان كل الناس بتسالنى هاااا هاتصوتي للاخوان ولا للكتله ؟؟ على اساس ان احنا خلاص عدمنا كل الناس ما عادش في الا هما الاثنين

غلط طبعا  لان فى احزاب تانيه مستقله عن الكتلتين وباقول كتلتين لان الحريه والعداله عامل هو كمان تكتل مع مجموعة احزاب برضه

فى احزاب منفرده ومحترمه ومنها الاسلامي زي الوسط ومنها الليبرالي الوسطي زي العدل ومنهم الاشتراكي  ومنهم ومنهم  وفى منهم احزاب محترمه فعلا

وفى كمان تحالف مهم اوي للاسف ما حدش يعرف عنه حاجه كتير وهو تحالف الثوره مستمره والى بيضم ابطال ميادين مصر اثناء الثوره وبعض الشرفاء فعلا وكلهم وجوه جديده وشباب وده الى احنا محتاجينه فعلا يا جماعه

والحقيقه انا حسمت موقفي لهم لانى شايفاهم فعلا فيهم امل كبير  والله اعلم

فى كمان فزلكه زياده بيتفزلكها بعض البشر وهو انه مش بيختار الى هو عايزه من التيارات وانما بيختار الناجح او الى فيه امل ينجح

يعني مثلا انا مش عايز الاخوان ومش عايز الكتله والله عايز انتخب مثلا حزب العدل بس هو مالوش شعبيه فى منطقتنا فى الغالب هايخسر طيب الوسط له شعبيه اكتر خلاص خليني فى حزب الوسط

الحقيقه انا شايفه ده غلط من ناحية الاخلاص للمبدأ على الاقل .. مفروض تعتبر دايما صوتك هو الصوت المرجح وتختار على اساس مبداك وفكرك مش على اساس مين هاينجح خصوصا اننا فى عهد المفاجأت ما حدش عارف ايه ممكن يحصل

عشان تعبت من الاجابه على نفس الاساله دايما

رايي فى الاخوان طبعا كتيار سياسي : قد يكونوا منظمين وعندهم خبره سياسيه معقوله الا اني شايفه انهم ولائهم الاول للجماعه وليس للشعب او للوطن والحقيقه انا مش اخوانيه وما يهمنيش مصلحة الجماعه يهمنى مصلحة بلدي اولا طبعا

هذا بالاضافه لموقف شخصي منهم لموقفهم السياسي من الميدان وخصوصا فى احداث نوفبر

السلفيين : دماغهم تعبانه ويخيل لهم انهم هايعملوا مننا سعوديه تانيه لكن هيهات والحمد لله انا اعلم دينى جيدا ولا احتاج لاحد يجبرني على اتباع تعاليم دينى بالكرباج ..ولا اقبل ان يحدث ذلك ابداااا ولو فيها حياتي

بالاضافه الى انهم غير منظمين وعديمى الخبره ومخترقين بقوه من النظام السابق

الكتله المصريه: الراعي الرسمي لهم  "ساويرس "انا ما باحبوش لله فى لله  غير انى عندي قناعه انه لابد ان يكون له يد ملوثه مع النظام السابق حيث انهم لا يمكن انهم كانوا يتركوه يكسب المليارات وهو ليس من فريقهم  بالاضافه لانهم ككتله سياسيه بيضموا فلول كتير فى احزابهم وقوائهم وانا عايزه احرق الفلول اساسا

بالاضافه لان الثلاثه السابقين دول كل واحد فيهم له كتله خاصه هاتضمن له وجود قوي فى البرلمان

الحريه والعداله ... الاخوان ومن والاهم

حزب النور..... السلفيين ومن والاهم

بالاضافه للناس الغلابه الى بيستقطبوهم وهما مش عارفين اصلا يعنى انتخابات وبيخوفوهم يا اما بالغرامه او بالنار والعذاب الاليم فى الاخر

الكتله... وطبعا وراهم الاقباط وكتله اخرى من الشعب لا يستهان بها لا يريدون التيارات الاسلاميه لسبب او لاخر ولا يرون بديلا الا الكتله بالتالي بينتخبوا الكتله

انا بقى نفضت لكل دول لانى اولا مش مقتنعه بيهم زي ما قلت

وثانيا وده سبب مهم اوي اوي ياريت تحطوه حلقه فى ودنكم لو كنتم لسه ما حسمتوش اختياركم  هو ان البرلمان ده مش لازم ابدا ابدا اي كتله فيه تستاثر باغلبيه وتسيطر على البرلمان مطلوب التنوع الكبير عشان ما يحصلش انفراد بالحكم

ولا احنا هانخلع مخلوع ونجيب مصيبه تانيه يقرفنا ؟؟

فى كمان حاجه عايزه اقولها

ياريت كانت نسبة المشاركه كانت 40% فقط  لكن جايين من بيوتهم عشان عايزين حقهم مش عشان الغرامه

انا شايفه ان الغرامه دي هى مسخره وقلة ادب واهانه حقيقيه لنا باعتبار اننا محتاجين حد يكرتنا على قفانا عشان ننزل ندور على حقنا

بالاضافه لان فى ناس بتستغلها فى تخويف ناس ما يعرفوش اصلا اي حاجه تماما عن الانتخابات ولا التيارات السياسيه وبيكون سهل استقطابهم واللعب باصواتهم باي شكل من اي اتجاه

وطبعا الي اساتذه فى ذلك هما التيارات الاسلاميه وفى اكتر من واقعه مش بافتري عليهم لكن هى دي الحقيقه

واحد اثق فى كلامه قالي ان الشغاله بتاعة صاحبه المسيحيه انتخبت حزب النور عشان ناس طيبين ودولها زيت  وقالولها ان ده حزب ام النور "السيده مريم "

وتتوالي مساخر الضحك على عقول الناس

وما حدش يقولي انتى بتتهمى الشعب بالجهل ... ماهو الشعب اصلا جاهل انت هاتسعبطوا ؟؟ ده احنا اربعين فى الميه اميه ومن عندي انا بقى تسعين فى الميه زيرو وعي سيااسي

الحاجه الى احب كمان اؤكد عليها

ان الشعب المصري الحقيقى مالوش دعوه خالص بالبتنجان المخلل الى احنا بنهرس فيه وربنا انتم مش متخيلين النوعيات الى انا قابلتها فى الفتره الى فاتت لما قررت اتكلم مع اي حد اقابله فى موضوع الانتخابات ..ماساه بجد

قد يكون البعض عنده وعي فطري وانما العموما ابيض يا ورد والله

عموم الشعب المصري كمان بلا اتجاه سياسي ولافكري ولا يعرفوا البتنجان ده اصلا

وبالتالي هاقول تاني الكلمه الى بتزعل مني بعض الناس

اعزائي كل من:

المجلس العسكري ... التيارات الاسلاميه...الليبراليين ... القوى الخارجيه.. الفلول ... الاشتراكيين ... اي بتنجان تاني ... كل الطامعين فى السلطه والكراسي .... حلوا عن سمانا يا ولاد الكلب حرام عليكم الضرب فى الميت حرام ..خلونا ناخد نفسنا بعدين ابقوا اتخانقوا علينا

ملحوظه: اسفه على الشتيمه بس عشان انا قلتها كده اول مره وكنت متعصبه فمش عايزه ارجع فى كلامي تاني ... اه وزودت على الاتجاهات المذكوره ليبراليين واشتراكيين حيث انهم كانوا سقطوا سهوا

وملحوظه تانيه كل الناس الى قولتهم فى الجمله الى فاتت دي  هم اقليه فى الشعب المصري ...الاغلبيه العظمى ما يعرفش غير انه مصري ..يا مسلم يا مسيحى .. وممكن يكون عارف اسمه رباعي وامه طابخه ايه النهارده والماتش او المسلسل الساعه كام

اوصيكم بقائمة الثوره مستمره 

وشكرا

الحل الواقعي

احنا فى مشكله

اه طبعا ده احنا فى مصيبه مش مشكله بس  ..طيب عايزين حلول

طب عشان نلاقي حلول لازم نعمل حاجتين

اولا :نحدد المشكله الحقيقيه ..المشكله الام .. نجردها من كل النتائج ومن كل الديول الى طالعه لها عشان نشوفها كويس

ثانيا : نحدد معطياتنا ..امكانياتنا .. مهما كانت محدوده هاتنفع .. بس المهم نعرف ايه هي ونستخدمها

نحدد الاثنين الى فاتوا دول وبناءا عليهم بقى نبدأ نقترح الحلول ..ليست هى افضل الحلول على الاطلاق وانما هى افضل الحلول الممكنه الآن

يلا بقى نحاول نعمل الكلام ده

ايه هى المشكله ؟ فكروا

الامن ؟

الاقتصاد ؟

الفلول؟

الانتخابات ؟

الدستور ؟

المحاكمات العسكريه ؟

الفلوس الى اتنهبت وما رجعتش ؟

حقوق الشهدا ؟

اممممم ايه تاااااااني

كل دي نتائج كل دي ديول

المشكله الحقيقيه فوووووووق ... المجلس العسكري

لو كان المجلس العسكري عايز يصلح الى فوق ده كله كان صلحه .. بس الحقيقه هو مش عايز

طيب المجلس العسكري مش عايز ليه ؟؟

عشان المجلس العسكري زي ما قلتلكم قبل كده من زمااااان فى البوست دهون  زيه زي كل النظام السابق ملطوط معاهم ... وزي ما قلتلكم اشرفهم واخد فلل وشقق واراضي بالتخصيص من الدوله وبالعبيط  وفى منهم طبعا فساد مالي وعمولات وصفقات السلاح .. ومؤكد فى منهم العميل ... والا تبقى اسرائيل هبله ومسكوها طبله

وانتهز الفرصه السعيده دي واسأل المجلس العسكري فيما تردد فى شهر مارس الى فااااات عن القبض على قائد الحرس الوطني وسجنه ..كان ليه وعشان ايه وراح فيييييييييين

ويا ترى مين الى لسه ما اكتشفتهوووووش

طيب هذا هو المجلس  فماذا يريد ؟

عايز ضمانات طبعاااااا

اه  مجلس عامل كده يبقى من الطبيعى يرفض تسليم السلطه الا بضمانات .. ايوه طبعاااا .. ماهو على الوضع ده لو الصبح جت حكومه جديده  ورئيس جديد من اختيار الشعب ..وبرلمان جديد يمثل الشعب .. المجلس كله هايشرف فى ليمان طره بس على ايه ولا ايه ولا ايه ؟؟ ده الاسباب بتزيد .. بعد ما كان فساد مالي واداري بقى كمان فى محاكمات عسكريه وتعذيب فى السجون وشهداء واستفتاء  وبلاااااوي سووووده

اممممم تفتكروا طمعانين فى الحكم ؟ تؤ لا ما اعتقدش هما دلوقتي بيدوروا على ورقة توت يستروا بيها سوئتهم

وكالعاده السخيفه بتاعتهم لجس النبض نزلوا الفيديو بتاع طنطاوي بالبدله المدنى وبعدها ملصقات انتشرت فجأه لقوا الناس قامت عليهم .. قالوا لا كده وسعت مننا مش هاينفع الشعب برضه اتغير ما عادش شعب بتاع سنة 54 الى هلل لعبد الناصر

راحوا طالعين بوثيقة السلمي وقالك احنا نصدر السلمي وشرف ويحرق يلعن ... واهو بلاش الحكم بس نظبط نفسنا بدستور  نازل عليه ورقة توت هديه

برررررررضه فشلت  ولقوا الناس اوشكت تاكلهم احياء وحتى حليفهم من التيارات الاسلاميه الصديقه كشروا عن انيابهم وقالوا اوعى يغرك جسمك

اعتقد ان الحل الى هما دلوقتي بيسعوا له حاجتين

افتعال ازمات لتاجيل الانتخابات

ولو حصل والانتخابات اتعملت وتمت قضيه صغنووووونه كدهون بجوز محاميين من اتباعهم تتظبط وتتشك للقضاء النزيه ويتهد المجلس على الى فيه ونقطه ومن اول السطر ونرجع تااااااااااني  نلف حوالين نفسنا

ايه رايكم ؟

خلاص سودتها فى وشكم ومخنوقين مني عارفه

كده وصلنا للمشكله الحقيقيه حاليا ... المجلس العسكري

طيب المعطيات بقى ..عندنا ايه ؟

عندنا شعب غلبان تعبان جتته اتهرت مرض وفقر وظلم وكل حاجه ومش طايق نفسه وعايز يخلص من الفيلم كله ويناااااااام بقى

وفوق كل ده مبارك ابصمله بالعشره انه نجح فى جعل نص الشعب ده دماغه بيضا بلاطه ما بيعرفوش اي حاجه فى اي حاجه ولا حتى يعرفوا ياكلوا نفسهم ... اه والله للاسف دي الحقيقه الموجعه شئتم ام ابيتم

توعيه ؟ هاتوعي مين ولا مين وامته .. ما ينفعش خده على علاته بقى دلوقتي ... اذن الاعتماد على الوعي الشعبي زي ما حصل فى الاستفتاء هايضيعنا

عندنا مجلس عسكري لاااااااا يمكن هايسيب السلطه اذن المناداه بتسليم السلطه لمجلس رئاسي حاليا درب من الخيال

عندنا شرطه مواليه للنظام السابق وماسكه ذله على ناس كتييييييير والمجلس العسكري بيخطب ودهم عشان يسندوه وهما مش طايقين الجيش وعايزين يخلصوا منه ويعوثوا فى الارض فسادا مطلقين الايدى زي زمان

عندنا فلووووول .. عالم ما يعرفوش اكتر من فرعون يحكمهم ويدوروا فى فلكه ..ومالهومش اي شغلانه تانيه غير كده وهايقاتلوا من اجل ذلك  ... ومش هانقدر نمنعهم كمان لان ببساطه الي بيسن القوانين ويفعلها من حكومه او مجلس هو اصلا اصلا فلول بدرجة ما ..هايعزل نفسه ؟؟!!!

عندنا  تيارات اسلاميه  حاليا عباره عن كتلتين ..يتخانقوا ساعات ويتصالحوا ساعات J

الاخوان ككتله ... والسلفيين وباقي التيار الاسلامي ككتله اخرى ...

الاخوان: دائما وابدا يلهثون وراء البرلمان بغباوه سياسيه معهوده ..ومفاوضات مشينه مع السلطه ..وياخدوا وعود مالهاش اي قيمه ..ويكون الوضع فى المفاوضات والاتفاقيات الخفيه دي كمن لا يملك اعطى لمن لا يستحق

السلفيين : مخترقين من جهاز امن الدوله بغباوه .. ومواقفهم السياسيه الدينيه حقيقى مخجله .. مشايخهم الى مش مبطلين ترجيع فى ودان الناس يبعثوا على القرررررف

عشان البؤين الحمضانين الى هاسمعهم هنا ( عارفه ان فى اخوان وسلفيين كويسين انما انا باتكلم على رؤسهم وسياستهم العامه  مش اشخاصهم )

عندنا تيارات سياسه اخرى : نصها احزاب  كرتونيه متعفنه قد تكون اشد وطأة من الفلول على الحياه السياسيه فى مصر لكنه موجودين وما نقدرش نعزلهم  سياسيا

والنص التاني التيارات بقى المستحدثه والى منهم الناشطين و6 ابريل وكفايه و و و ... ودول بقى مشكلتهم السوده انهم مش على قلب رجل واحد  ومش منظمين وما عندهمش خبره وفى منهم فنجريين بؤ ومحبي للظهور وفوق كل ده مستهدفين من كل الناس الى فوق دول ..لانهم بذرة الثوره ..سواء اعترفتم بذلك ام لا لكن هى دي الحقيقه  والى على اساسها بيتحاربوا اصلا

وبعد ما حددنا الكلام الى فوق ده طبعا لازم نقول طريقك يا ولدي مسدودون مسدودون مسدود... ايون مسدودون بالبون

لا طبعا امال انا بارغي كل الرغي ده ليه  حاضر هاقول  حل

مع الاخذ فى الاعتبار الكلام الى فات ده

اقولكم الحل المقترح ..

القوى السياسه تتجمع كلها ..بما فيهم الفلول .. اه اه بما فيهم الفلول .. فلول  سلفيين اخوان شباب الثوره احزاب كرتونيه  احنا مش قلنا الى مش هانقدر نغيره دلوقتي ناخده على علاته ؟... ويختاروا من مرشحي الرئاسه البارزين خمسه ..اه خمسه  فى عين العدو عشان الحسد وكدهوك

الخمسه دول هايبقوا مجلس وطنى يتفاوضوا مع الجميع باسم الثوره ... يتفاوضوا مع المجلس العسكري  ويتفاوضوا مع التيارات السياسيه الداخليه ومع الشعب كمان لو لزم الامر

ممكن بقى الخمسه دول ما بينهم وبين بعض ينتخبوا ليهم ريس برضه عشان ما يقطعوش هدوم بعض والمركب ما تغرقش

هانتفاوض على ايه بقى ؟

نتفاوض مع المجلس بقى بشخصه وصفته .. نقوله بص احنا هانسيبك تعدي ياعم بالكام فيلا وكام فدان بجملة الى راح يعنى بس انت بقى يا حلو كفايه عليك كده اوي  ومالكش دعوه بالقوات المسلحه بعد ما تسيبها وبعد المرحله الانتقاليه تروح تقعد بقى فى الفدادين الى سايبنهالك وتزرعهم فلفل وشطيطه ومالكش دعوه بالسياسه

او ايا يكن شكل التفاوض بقى الى هايكون بينهم قد يكون المشهد الى انا قلته ده هزلي خيالي لكن المهم انهم هايتفاوضوا معاه على المكشوف ونخلص بقى من الفيلم المحروق بتاع المجلس حمى الثوره ونشفها وغطاها ونيمها ده بقى

المهم نوصل لوجود من يتفاوض باسمنا ولو لقينا المجلس الوطني ده بدأ يخرف هو كمان عن الهدف الاساسي الى هو دستور محترم ..نوصله بقى بعد الانتخابات البرلمانيه لا قبلها...بعد الرئاسيه لا قبلها مش مهمممممم كل ده ومش مهم مين الى هينجح اصلا اهم حاجه على الاطلاق كتابة دستور محترررررررم

لو خرف بقى المجلس واستهبل يبقى نطلع حلوين كدهون طعمين متوحدين على التحرير بيافطه واحده بس بتقول المجلس الوطني روح بيتكم فقططططططط

واكيد المجلس الوطني ده مش ملزم بتحقيق اي مطالب زي زيادة مرتبات زيد وتعين عبيد  وتوصيل نت للشارع الى ورانا

وانما هو شغلته يتفاوض على المهم بقى عشان ما عادش فى وقت لكل الفرعيات دي ارجوكم

خلونا نتنيل نعمل الدستور ونخلص بقى

ارجوكم اتفقوا...

 يا اخوااااااااان ارجوكم غيروا خطتهم وافهموا مين الى يستحق ان تعقدوا معه الصفقات

( الاخوان عايزين بوست لوحدهم ان شاء الله)

يا اصحاب الاحزاب الكرتونيه احترموا نفسكم وانضفوا ودي فرصه قدامكم تنضفوا

يا فرسان الثوره جمعوا الناس حواليكم ..وان كنت فظا غليظ القلب لانفضوا من حولك .

باقي رساله  مهمه اوووووي

يا شعب مصر العظيم ابوس اديكم اطلعوا فى مليونيه مافيش مخلوق يرفع فيها  اي يافظه غير لا للمحاكمات العسكريه  للمدنين

المهزله دي لازم تنتهي ال 12 الف مصري الى مرمين فى سجون العسكر لازم يطلعوا منه ويتحاكموا قدام معاكم طبيعيه

ما نفرحش ان المشير خرج لنا 400 واحد كاننا بنشحت منه دي مسخرررره

استرجعواااااااا ثورتكم ... استرجعواااااااا ثورتكم  ... ابوس اديكم

ما حدث فى احداث ماسبيرو ..من خلال الفيديوهات

ايه كمية اللك والعجن والكذب والمبالغات والقرف الى احنا فيه ده

حد يفهمنى بس احنا ايه جنسنا وايه دماغنا وايه دينا ودينا ابوناااا

اتهامات وتخوين وقرف قرف قرف على كل جانب

المجلس العسكري بيكذب  وبيتنصل من مسؤليته عن المصيبه الى حصلت

المسلمين بيستهبلوا وهما عارفين كويس ان فى ناس مسلمين فاهمين الدين غلط وبيكرهوا المسيحين فعلا

والمسحيين كمان بيستهبلوا وبينكروا ان حصل تحريض من قبل ناس عندهم على العنف مش بس التظاهر وان كمان عندهم ناس فاهمين دينهم غلط وبيكرهوا المسلمين

طب وبعدين ما طول ما احنا كده مش هانحل المشكله ابدا 

طيب انا عندي تحليل كده للاحداث بناءا على الفيديوهات  معلش هاطول عليكم بس استحملوني 


ركزوا معايا شويه


الاول وقبل ما نبدأ مسيرة ماسبيرو واخده تصريح من الامن بخط السير كمان يعنى قانونيه ميه فى الميه  زي ما سمعت من ناشطين على تويتر والله اعلم 


نبدأ الفيديوهات 


فى الفيديو ده وهو سابق على احداث ماسبيرو وقبل وصول المسيره لهناك





 هاتلاقوا ان فى ناس بتضرب المتظاهرين من اعلى النفق بالنار بالطوب  والمتظاهرين واقفين ومش عارفين منين جاي الضرب  علما بانه كان فى ناس من المتظاهرين معاهم عصين وكان فى واحد معاه صاعق كهربا


بعد كده نيجى للفيديو ده 








هما كملوا وراحوا على ماسبيرو وهناك وقفوا وهتفوا ولقوا الجيش واقف وفى جنود ماليين اتوبيس وهما واقفين فى سلميه تامه حوالين الاتوبيس
 وعند الدقيقه 3:20 بالضبط ومع بداية نزول العساكر من الاتوبيس  بيبدأ الضرب فى المتظاهرين بشكل خلاهم يجروا بهستيريه ويبعدوا تماما عن الجنود والاتوبيس وبيتبقى افراد قليلين قريبين من الجيش وبيرفعوا اديهم فى اشاره الى سلميتهم وتهدئة الجنود  لكن بيستمر الضرب وعند الدقيقه 3:40 بيظهر صوت ضرب نار ..الله اعلم هو رصاص حي ولا صوت ولا خرطوش ولا اي بالظبط

فرضا ان بعض المتظاهرين او المندسين اوي اي زفت معاهم سلاح وبيضرب نار على 


الجيش الاعزل  الغلبان 




هل من الطبيعى ان يكون الرد من راكبي المدرعات هو هرس الناس بالشكل البشع ده ؟ 


ما حدش يقولي ما كانش فى دهس مش هاعرف اعدلكم كمية الفيديوهات الى فيها دهس 
 امثال الفيديو المفزع الاتي مثلا :



والى اهم من ده وده صور القتلى الى واضح طبعا انهم مهروسين وبمدرعات او سيارات 


تقيله حسب كلام المتخصصين ..وحسب تقرير الطب الشرعي ان فى 8 ماتوا دهسا 


بالمدرعات 


خلينا نرتب الاحداث بصوا كده معايا على الفيديو ده 


عند الثانيه  26  من الدقيقه الاولى بيظهر هنا مدرعتين واحده كبيره ومقفله من كل ناحيه والتانيه مفتوحه من فوق  واصغر شويه  والاثنين كانوا ماشيين بسرعه جدا وواحد منهم تخطى الحاجز فى نص الطريق ومع ذلك الناس كانوا ماشيين حواليهم عادي


بعد كده بثواني وتحديدا عن الثانيه 38 بتبدا المدرعه الكبيره تدخل فى الناس وتهرس فيهم هرس

وطبعا فى فيديوهات تانيه كتييييييير للهرس  بما هو واضح وجلي  تخيلوا العربيات الى بتهرس فى الناس دي وهرست الى واقف جمبك هاتعمل ايه ؟ انا عن نفسي كنت اقل واجب هاقتل الى جواها واحرق ام العربيه ...


قالك فى شهود عيان بيقولوا ان فى متظاهرين استولوا على مدرعه للجيش .. اقولك اه حصل ..بس بعد الدهس يا معلم


بص معايا الفيديو ده
سيبك من الهجص الى بيقوله المذيعين الى صاحب القناه بتاعهم عايز يفتح قناته ويعيش فى سلام  وياكل بقلاوه





عند الدقيقه 3:48  هاتلاقي مدرعه بتنطلق بسرعه وبتشيل فى وشها عربيتين جيب للقوات المسلحه وبتزقهم لحد ما يعدوا الناحيه التانيه ويخبطوا فى الاتوبيس الابيض ( فاكرينه ؟ الى كان ناقل الجنود ) وبيعدوا من جنبه  وبتقف المدرعه بعد ما تلبس فى ظهر الاتوبيس وتزقه شويه كمان  وتثبت على كده
كان يقدر الى سايق المدرعه  لو كان متمكن منها قبل ما يخبط فى الاتوبيس بثانيه يكسر شمال وكان هايعدي ويهرب ده لو  كان مجرد عسكري مذعور عايز يهرب من المتوحشين المسلحين الى حواليه ..


ومن هنا يبدأ المشهد التاني للمدرعه الصغيره  والى موجود فى الفيديو ده بالظبط عند الدقيقه 0:40





والى بتظهر فيها المدرعه ورا الاتوبيس الابيض والمتظاهرين بينقضوا عليه ويحدفوا الى جواها بطوب  ويقلوله اطلع .. والى فى الفيديو الى فات شاهد العيان قال عنهم انهم ناس متظاهرين سارقين المدرعه .. وفعلا انا شايفه من طريقة السواقه للمدرعه انه فعلا شكلها واحد مش متمكن منها  وراجع الفيديو تاني ودقق فى طريقة السواقه


وفى حد سالنى مره طب وهو اي حد يعرف يسوق مدرعه 
احب اقوله ان المدرعه فى النهايه عربيه ومدراعتنا عمرها عشرات السنين مش تكنلوجيا فظيعه يعنى .. فوق ان مين بيسوق المدرعات فى الجيش مش اغلبهم مجندين؟ 
طب وهما مين المجندين ؟؟ يعنى ممكن يكون الى ساق المدرعه ده كان مجند سابق واحنا شعب اغلبنا دخل الجيش يعنى 


نيجى للمدرعه التانيه الكبيره والى ظهرت فى فيديوهات كتير بتهرس فى الناس فعلا  واحنا اتفقنا ان لا مجال للشك بان حصل دهس بالمدرعات
 طيب انتم متفقين معايا طبعا ان كيد الهرس فى المتظاهرين كان قبل حرق المدرعه ..ولا تفتكروا المدرعه هاتهرس بعد ما اتحرقت ؟؟


هانرجع تاني كده للفيديو السابق ده على طول وعند الدقيقه 0:55 بالظبط هاتظهر المدرعه الكبيره المقفوله من فوق والناس ملمومين حواليها وبعد شويه النار والعه تحتها والناس بتخبط عليها وبيطلع منها بعد شويه عسكري وبيجري ناحية اليمين لكن الناس بيلحقوه ويمسكوه يدوله العلقه التمام ورغم وجود قس حاول منعهم الا ان ده ما منعهمش توضيبه ...


وقلتلكم ان ده اقل واجب ممكن يتعمل مع حيوان راكب مردعه وبيهرس فى الناس وحسب تقرير الطب الشرعي ان فى 8 ماتوا دهسا بالمدرعات  والناس الى بيضربوا العسكري ويحرقوا المدرعه دول شافوا الدهس ده وشافوا ضحاياه على الحقيقه ودمهم سايل ووشهم مطبق وضلوعهم متساويه بالارض  على  الحقيقه مش صور زينا




طيب فاضل حاجه واحده بس اطلاق النار على المتظاهري حصل اطلاق نار ولالا ؟؟؟
شوف يا معلم الفيديو ده وقولي رايك ايه ؟؟







امممممم مش رصاص حي ؟؟ خرطوش ؟ او طلقات فشنك ؟؟  جايز برضه الله اعلم ... بس هى مش طلقات الصوت مفروض يضربها لفوق ولا يوجهها فى وش الناس ؟؟ برضه الله اعلم مش خبيره فى الطلقات بقى حد تاني خبير يقول لو يعرف


خلينا فى الفيديو الى بعده والى بيصور جنود قواتنا المسلحه داخل الاتوبيس الابيض ايااااه ... وياريت تسمعوا كويس  العسكري الى طلع من الشباك بيقول للناس ايه





بيقوله اخد رصاصه فى صدره ..وقالها كذا مره ... والاخ الى واقف تحت بيقوله رااااااااجل وبيهتفوا له وهيصه هيصه


هل ممكن ان يفسر ليا احدا من الذي اخذ الرصاصه فى صدره ؟؟ هل هو اسرائيلى مثلا مهاجما لوسط القاهره ؟؟


طيب حد تاني كده يقولي  السبعه الى ماتوا بطلقات ناريه حسب تقرير الطب الشرعي دول مين موتهم ؟؟؟


*****************************
خلاصة الى حصل فى نظري هو ان حصل ضرب بين طرفين هما الجيش والمتظاهرين ... مين الى بدأ الاول رغم انه واضح مين الى بدأ لكن حتى ده مش مهم لان حتى لو كان بعض المتظاهرين او المندسين بينهم هما الى بدأوا ضرب ما يكونش الرد بالوحشيه دي 


وهل يصح ان نقول ان المتظاهرين ضربوا الجيش فسقط منهم 25 قتيل ؟؟  
وهل احنا شكلنا اهبل عشان تقلولنا اصل احنا مش هانصرح بضحايا القوات المسلحه عشان نفسية الجنود .. دي مسخره 


وان حصل دهس للمتظاهرين ... ايوه حصل بما لا يوجد مجال للشك وطبعا من قبل الجيش للمتظاهرين 
اه حصل استيلاء على مدرعه لكن بعد الدهس 
اه هجم الناس على المدرعه وحرقوها بس بعد ما هرستهم وقتلتهم 
اه ضرب الناس المدرعه والى جواها   لكن كان الى جواها ناس مستوليين عليها 


اه حصل ضرب نار .. بما لا يوجد مجال للشك ايضا ... وقع فى صفوف المتظاهرين 7 قتلى بالرصاص الحي .. طب يعنى المتظاهرين ضربوا نفسهم ؟؟
طب الجيش ما كانش مسلح بذخيره حيه .. طب مين الى ضرب ؟؟ طرف ثالث؟؟ طب هو مين دي مسؤليتكم انتم تجاوبوا على السؤال ده 


حصل تحريض ؟؟؟ ايوووه حصل تحريض وشحن على جميع الجوانب .... الجنود جايين مشحونين ضد المتظاهرين الاقباط ولاد دين ....
المسيحين هما كمان جايين مشحونين ومحرضين ياخدوا حقهم من المسلمين الظلمه المفتريين الى بيهدولهم كنايسهم 


الشعب كله محرض من خلال الاعلام ضد الاقباط المسلحين الى اعتدوا على رجال الجيش الشرفاء 


سفاله وقلة ادب من الجميع .... ومين صاحب المصلحه ؟؟ جاوب انت مين صاحب المصلحه ؟؟






باقي نقطه عايزه اقولها للقساوسه المحترمين  هاقولهالكم لما تشوفوا الفيديو ده



اخسسسسسسسسسسس والف اخسسسسسسسس علي كل من يساوم على دماء شهداؤه ... عيب اوي لما تضللوا الناس وتقلولهم مالوش لازم التشريح ومش هتاخدوا حاجه .. وكمان تحرضوهم هناخد حقنا بادينا .... مش قادره ابعد عن ذهني اشتراكم فى المؤامره على الشعب المصري  كده عيب


والاخوه المشايخ الى سايبين كل حاجه وبيناقشوا هل يجوز نقول على المسيحين شهداء ولا لا ... الهي تتوكسوا


تحديثه: قابلتنى  الشهاده دي على الاحداث ياريت تشفوها 
http://masperotestimonies.wordpress.com/mohamed-el-zayatt-testimony/

لازم تشوفوا... الحقيقه على بشاعتها

   لازم تشوفوا الحقيقه

لازم نشوفها كلنا ونعرف على بشاعتها وقوتها وسفالتها

لازم ما ندفنش راسنا فى التراب

لازم نعرف مين عدو ومين حبيب

لازم كل الناس تعرررررررف

ايوه لازم نعرف

تحريض؟

ايوه تحريض ..

تحريض على الكرامه

تحريض على الانسانيه

تحريض على اقامة العدل

 تحريض على الحريه

تحريض اظهار الحق

يعنى ايه كل ما انشر فيديو او صوره الاقي ناس بتقولي بلاش كده

نفس طريقه المخلوع  لما كانوا يقولوا على فيديوهات التعذيب من الشرطه الصارخه ده تأليب لنفوس الناس وتوقيع

بلاش مسخرررررره بقى

فوقوااااااااااا واعرفوا  الحقيقه

والى بيقولوا فتنه طائفيه مش عايزه بقى كلام فارغ

الى حصل امبارح مش كان مسيحين ومسلمين بيضربوا بعض

كان  قوات الجيش  قوااااات الجيش ..قواتنا المسلحه بتضرب فى المصريين جميعا بتحفز واستنفار ضد المسحيين كانهم فى مواجهة العدوان الصليبى على مصر

قواتنا المسلحه

الاعلام الزباله ..ماسبيرو الى كان لازم الثوار يقفلوه على الاقل من اول يوم

الى حرض الناس ضد بعضها والى ناقل مباشر امبارح بالذات والى قال للناس انزلوا احموا الجيش من العدوان الصليبى

الى قال ان الاقباط ضربوا نار على الجيش والاخر طلع التييييييييييييت وزير الاعلام يقول لا ده انفعال مذيعين

ايه الاستخفاف بالناس ده ..ايه القرف ده .. ايه القذاره دي  ..ايه الغبااااااااااااااوه دي

اتفضلوا معايا حفلة تعذيب لكل من له قلب  وملامح انسان يشوف الحقيقه

 ليست فتنه وانما صراع على الملك 

يا ناس ارحمونا احنا عندنا مشاكل فى التعصب على الجانبي اه

بس عمرها ما تقوم حرب اهليه عشان اساسا دول ناس عددهم لا يذكر 

وعشان طبيعة الشعب عندنا مسالم ومتوافق اصلا

المشاكل دي ممكن تتعالج بس مش هى دي سبب احداث امبارح

انا ما شوفتش اصلا شعب كده كل حاجه اتعملت عشان يولعوها فتنه ومش بتولع  فتنه

بتولع حاجات تانيه

بتولع خسه ونداله 

 ما يمهنيش اسمه ما يمهنيش عنوان ما يهمنيش لووونه ... ما يهمنيش حاجه يا ناس ... يهمنى الانساااااان ... لو كنتم لسه حاسين انكم تنتموا للفصيله دي

http://www.facebook.com/photo.php?v=112706175504818

والاخبار دي كمان 

http://www.shorouknews.com/news/view.aspx?cdate=10102011&id=24dfc4b6-71cb-4974-8e8f-cea3dc9c40fd

http://www.25jan-news.com/article.php?id=6028