الاثنين، 18 أبريل، 2011

شوية كلام

مبروك يا شعب مصر العظيم الانجاز العظيم بجد الرائع جدا الى حصل ده
والثوره البيضاء الاكثر من رائعه والى فى نظري اسطوريه كده وحاجه درب من الخيال ولكننا الحمد لله عملناه فى الواقع ..لدرجة ان الواحد بيبقى ساعات عايز حد يقرصه عشان يصدق انه الاحداث دي بتحصل .
ومبروك علينا الحريه وان شاء الله تعالى  هانبنى بلدنا ونشوفها كما نحب وكما املنا ...
وان شاء الله نعيش الحريه ونمارسها بحق وحقيق وبجد وجديد ... ونقول راينا بلااااااااا خوف ..

ويارب نتعلم بقى اننا ما نعملش فرعون جديد ونعيش فى محرابه ونفضل نخاف ونكتم فى بؤنا برضه  والناس تبطل تكتم الحق ارجوكم ارجوكم ارجوكم

الى يغيظك ويكيدك بقى ان امي  لسه امبارح  بتقولي باقولك ايه انتى ما عدتيش تكتبي حاجه فى المدونه .. ليييييييييه يا ماما ..اهم بيقولوا قابضين على مدون ... الحقيقه لولا انها امي كنت ارتكبت جريمه شنعاء

ايه احنا هانعمل فرعون جديد ولا ايه ونعبده يا دي المصيبه علينا وعلى عيشتنا

طبعا انا عارف ان فى فريق لا باس به بيقول فى سره وهو بيقرا كلامي .... ما هذه البلهاء الي فاكره الدنيا طبق فروت سلاد  ..لكن انا هارد عليه واقوله ده اسمه يا فندم حسن الظن بالله والامل والتفاؤل ..عقبالك يعنى يحصلك منهم حاجه
 *********************
طيب مجموعة حاجات عايزه اتكلم عنها

الجيش والشعب ايد واحده ........... يرد اخر لااااااا اطلاقا الجيش والشعب مش ايد واحده

وتفنيدات وتصريحات وتحليلات حول الموضوع  اسمحولي الخص الى فى دماغي

الجيش بتاعنا خاين ؟؟  لا مش خاين ابدا ..الجيش بتاعنا وطني ومن اول يوم باقول احنا جيشنا مش مرتزقه  لا ده جيش غلبان بيقبض نص مرتبه وطنيه ... بالتالي هو مش خاين

الجيش مين ؟؟  المجلس العسكري ..نو نو نو ...الجيش هو العسكري ابو بندقيه ...او الظابط الى بينزل الميدان ..مش ميدان التحرير لا ميدان المعركه يعنى

طب المؤسسه العسكريه بيضاء اليد ؟؟ ابسلوتلي نوت ... المؤسسه العسكريه زيها زي كل حته فى مصر طالها الفساد ..يا اخي ده احنا بالصلاة على النبي الفساد دلدق على البلاد الى حوالينا ... طب نطهرها ؟؟؟ ومالوا نطهرها هانقولك لا يعنى ؟؟

طب المجلس العسكري معانا ولا علينا ؟؟  شريف ولا مش شريف ؟ ثوره ولا مش ثوره

المجلس العسكري؟؟؟ زي المؤسسه العسكريه فيه وفيه ...
طب هما فاسدين : اه فيهم فاسدين طبعا ...ده احنا النظام بتاعنا كله وكبارات البلد كلهم الشريف فيهم واخد اراضي وفلل وشقق بالتخصيص من الدوله وبيدفعوا تمنها ملاليم وياريت شقق عشان يسكنوا فيها لا ده مراجيح  بقى وزحاليق فى الساحل الشمالي واشياء من هذا القبيل
والمؤسهه العسكريه برضه ولا سيمها كبارتها  طبعا طبعا برضه كده اشرفهم واخد فلل واراضي بالتخصيص بالامر المباشر ..حاجه ببلاش كده
طب اسوأهم : والله زي ما انت عايز تقول قول ... فساد مالي وفساد اداري تجارة سلاح جايز ... حتى العماله للخارج وارده ...الله اذا كان رئيس الدوله نفسه طلع عميل واسرائيل بتبكي على ايامه من يوم ما غار

ومش فى المجلس العسكري بس ؟؟ده فى المؤسسه العسكريه كلها ... طايلها الفساد كلها .. وقلنا ولا المؤسسه العسكريه بس لا ده البلد كلها

هاشرحلكم
اصل الفساد ده شجره كل ما تقدم تكبر اكتر وتضرب جذورها فى الارض اكتر والجذور تكتر وتكبر وتقوى وتخلف جذور تانيه اصغر وتتشعب اكتر وتاخد مساحه اكتر افقيه ورأسيه وتمص من الارض اكتررررر والشجره فوق تكبر اكتر وتقوى اكتر واكتر ..... شجرتنا معمره بالصلاه على النبى مش بقى من ثلاثين سنه لاااا ده ستين سنه ....  واحد زي اونكل صفوت الشريف  ده من ايام عبد الناصر وهو فى السلطه وبيتنقل من مكان لمكان حتى بعد قضية المخابرات الشهيره والى طلع منها زي الشعره من العجينه

بالتالي النهارده لما قطعنا الشجره من على وش الارض لسسسسسسسه بقى الجذور والفروع الى طالعه جنب الشجره وراشقه فى الارض ... الشجره لما تتشعب كده اقتلاعها من جذورها شيء مستحيل .. لو اقتلعناها مش هاتطلع وطلعت هتطلع معاها الارض وتعمل حفره  كبيييييييييييره  جايز نقع فينا كلنا ما نقبش لاقدر الله

بالتالي احنا قطعناها ومطلوب مننا بقى نمزمز فى الفروع والجذور

حد فهم حاجه ؟؟؟


طب نعمل ايه اخد المطوه يعنى واروح اغز المجلس العسكري كل واحد غزه ونسكت ؟؟
لا طبعا لانى ما عنديش مطوه

لكن فى رايي المتواضع ... نصبر ...بس مش نصبر نسكت لا ... مليونيات لو فى حاجه تستاهل الله عليها ..... ضغط بالراي العام .... قضايا بقى اد ما تقول قووووول ..... نخوره فى الارض عشان نطلع الجذور المتعفنه لشجرة الفساد .... كل شويه نقولهم  هاااااااااااا فاكرين الثوره ولا نفكركم ....فاكرين عمكم حسنى ولا ايييييييييييييه
والناس الى اتعذبوا دول ما يسكتوش يروحوا يعملوا قضايا ويتابعوا قضيتهم ما نكتفيش بالنواح كفاينا نواح مكتوم سنين

وسيبونا بقى نمزمز فى الجذور وهى هاتجيب بعضها ..... ما قلتش نسكت بس لا نسعى للصدام .... نتكلم ما نتخانقش
نطالب ما ناخدش بالعافيه

فى رايي الصدام دلوقتي مش فى صالحنا اطلاقا ..... تخيلوا لو انت عندك مقشه مكسره ومتآكله ومقندله وبتكنس بيها بيتك .... وما عندكش غيرها دلوقتي ..... ايه الحل تكسرها على ركبتك ترميها بره  .. ولا تفضل تكنس بيها لحد ما ربنا يكرمك وتجيب مقشه جديده لوكس واحتمال تبقى من وسع ونجيب مكنسه كهربا وتكون فيها غسيل سجاد ؟؟

طب ما تخلونا نفضل نكنس بمقشتنا العارجه لحد ما بس نقف على ارض صلب وبعدين نشوف هانعمل ايه فى المقشه القديمه ؟؟؟!!!!

طب ما جهاز القضاء فيه فساد ...اااااااه فى فساد طبعا .. مش قلنا الفساد طال كل المؤسسات ؟؟؟ وهانطهره برضه بس بررررررضه مش دلوقتي ...

فهمتوا ؟؟؟؟ لهم رووووقه الناس دي كلها لهم رووووقه بس نعدي احنا ..نطلع دماغنا فوق سطح المايه نلقط نفسنا
 ***********
النقطه التانيه
المحافظين .... ايه يا جدعان فى هاتقطعوا بعض على المحافظين ... كلها بضعة اشهر ونقلبهم ونجيب غيرهم بالدستور الجديد وننتخب مش باختيار حد ... لو شايفين فى محافظ منهم فاسد اقعدوا كده مخمخوا وطلعوله المستخبي مش المسخره الى بتحصل دي خصوصا فى قنا

وطبعا ما حدش يقولي ما عادش فلول نظام .. لا لسه فيه امال الى بيتبكبكوا على حسنى دول ايه ...وطول ما البقر الى فى السجن معاهم فلوس لسه اهم بيلعبوا شوية اراجوزات بره  لكن مسيرهم يتبطوا جميعا ان شاء الله

وياريت نعقل ونبطل نتكلم فى الفتنه الطائفيه بقى ده انتم عالم خنيقه موت ... الى فى الصعيد مش فتنه طائفيه اد ما هى عصبيه ... نعمل لهم ايه طيب صعايده انش كل واحد فيهم عيار ونخلص ولا ايه
 *****************
الناس المتشائمه : ابوس اديكم يا جدعان بطلوا بقى .... الى هاسمعه بعد كده بيقولي خربتوا البلد هاعلق على باب زويله ...والله العظيم احنا عملنا ثوره ...ثوره بيضاء خسرنا فيها دم طاهر دم شهادئنا ... والله العظيم ثوره يتحاكى بها العالم ... والله العظيم خلعنا حسنى وزبانيته وسجناهم .... والله العظيم عملنا استفتاء وقلنا راينا بصحيح وما حدش زوره ..... والله العظيم يا ناس عملنا ثوره
مش معقول تكسير الهمم ده حرام عليكم ... وليه كل مصيبه سوده فى البلد تقولوا الفوضى والبلد خربت والثوره هى السبب ومافيش استقرار وهباب ... هو احنا اصلا كنا يعنى فعلا عندنا امن قبل الثوره ؟؟ هو احنا كان عندنا استقرار ؟؟؟ هو احنا ما كانش عندنا خراب  وخسائر اقتصاديه بالهبل ؟؟؟  طب لما ما كانش عندنا كل ده احنا عملنا الثوره ليه بنغلس على روحنا ؟؟
الجرائم وقطاع الطرق والسرقات  وحتى المشاكل بين المسلمين والمسيحين والسلفين وسائر الشعب وكل ده كل ده كان موجود بس كان متعتم عليه ... كل الحكايه اننا شلنا الغطاء القذر الى كان مغطي كل حاجه وحشه وسايبها تتحرق تحت وتكبر وتزيد

طب تصدقوا بقى ؟؟؟ طز فيكم لا خمسين طز فيكم بجد ..... ممكن تخرسوا بقى ؟؟ اوف

ياشعب مصر العظيم ... الهي يستركم فكروا بهدوء

ورجاء حاااار من كل الناس ...عشان خاطري كل الى تحت ايده ورقه بفساد من اي نوع ارجوكم يقدمها... ما يريحش دمااغه ما يقولش وانا مالي ما يقولش م اخسرش حد ما يقولش  بلاش خراب بيوت ... ما يقولش والله لما يبقى حد يسالنى ابقى اقول
السااااااكت عن الحق شيطان اخرس ............. ماتكتموش الشهاده ما تكتموش الحق ...كلنا مسروق حقوقنا ارجوكم رجعولنا حقوقنا

وكفايه عليكم كده النهارده

هناك 21 تعليقًا:

مصري جدا يقول...

نلخص

عاوزه حد يقرصك!!!!

أبيه رضروض فين؟

عاوزه تغزي العسكر بمطوه!!!

شروع في قتل

الهانم والدتم بتفكري في جريمه شنعاء!!!!

يا لهوي

منظومة الفساد!!!

قراءه في عقل صاصا

والله كلامك وجيه جدا

تحريض على أن الشعب يكون ايجابي!!!!

موافق


أخيرا وليس اخرا لوحظ أن السبت فات والحد فات وبعد بكرا يوم التلات والوليه الصيني ما جتش؟؟؟؟؟؟؟؟؟؟؟؟؟

لعل المانع رضروض


وش اخر براءه

ندى الياسمين يقول...

ما انت عارف ابيه رضروض في اقاصي الشرق ... وبالنوسبه للوليه الصينى فلسه رضا ما جاش اجل اسبوع


ولعلمك الشماته حرام ههههههههههههههههههههه

sweet angel يقول...

ربنا يحمي بلدنا ويبارك في شبابها

يا مراكبي يقول...

كلام جميل .. المطلوب الصبر .. واللي فسد في عقود مش ممكن يتم إصلاحه في أيام

ناقص بس حاجة واحدة .. هي إننا نبطل نتكلم وبس .. كل الناس مشغوله بالكلام والتحليلات ولوك لوك لوك لوك وما فيش حد منتبه للشغل والإنتاج .. إحنا مش هناكل أو هنصرف رواتبنا كلام .. لازم الكل يرجع يبني البلد وبسرعة

مصري جدا يقول...

هع هع هع هع

مد أسبوع يعني شهر بالتمام والكمال

أممممممممممممممممم

ليه بئأأأأأأأأأأأ

بركاتك يا سيدي شنجهاي

طب ينفع بدل واحده تجيبولي تسعه؟

Timo.. يقول...

والله انت بتتكلمي صح..
مش ممكن الخراب والفساد اللي اتعمل في سنين ها يتصلح في ايام..!!
الموضوع محتاج صبر وفي نفس الوقت لازم كل واحد يؤدي دورة عشان البلد محتاجة دورة ده مهما كان صغير فهو دور في منظومة الانتاج.


بالمناسبة عجبني موضوع المطوة قوي :)

ندى الياسمين يقول...

سويت انجل

امين يارب

ندى الياسمين يقول...

مراكبي

لا لا لا ايه ده النور الى نور المدونه ده ده مشع ولا انعكاس

بجد نورت يا فندم

وطبعا اتفق معاك تماما لازم فعلا الكل يشتغل واصل دي حاجه مفروغ منها لكن احنا اساسا المشكله اننا من قبل الثور واحنا متعودين على الانتخه ربنا يسهل بقى ونتعلم ان العمل عباده

تحياتي لك يا فندم ونورتنا بجد

ندى الياسمين يقول...

استاذ هاني

لا لا ما لكش فى الحساب على فكره

كده يبقى 23 يوم بالظبط

وبعدي انت بالذات هاجيبلك ياعم عشرين يتنططوا حواليك كده هما يعنى تقيفهم بخمسه جنيه فىالعيد عادي

ندى الياسمين يقول...

تيمو

عجبتك المطوه اجيبلك طيب واحده يعنى احتياطي عشان في قلق الايام دي :))))

نورت

richardCatheart يقول...

بوست رائع ياندى برافو

ندى الياسمين يقول...

مارو

ربنا يخليكى يا جميل نورتي

كلمات من نور يقول...

كلامك زين علشان خلاص انا بقيت حاسه ان كل المصريين حراميه

واحده واحده اللي وقع رئيس بشلة حرامية

قادر كريم يوقع الباقيين بس نشوف حال البلد بقى ونصلحها من غير تهليل وصراخ

sony2000 يقول...

برافوووووووووو
كدا صح
وانا معاكي فكل كلمه قلتيها

بس مين يسمع ومين يشوف:(

فتاه من الصعيد يقول...

إحنا لو إشتغلنا على الأرض كويس وعملنا مجلس شعب نص محترم وجبنا رئيس تلات اربع محترم .... ناخد وندي معاه كده هيكون أحسن من سفسطه الفتره الإنتقاليه دي

تحياتي لبوستك الحلو :)

ندى الياسمين يقول...

كلمات من نور

الله يكرمك الحمد لله ان شاء الله كله هايبقى تمام

ندى الياسمين يقول...

سوني

ان شاء الله مسيرهم يسمعونا الا لو كانوا طرش بقى تبقى مشكله

ندى الياسمين يقول...

فتاه من الصعيد

الله ينور عليكى بالظبط كده

انتى متاكده انك صعيديه يا بنتى
هههههههههههههههههه

غير معرف يقول...

ثقافة الهزيمة .. العتبة الخضراء‏

و تقول الحكومة المصرية التعيسة أنها تسعى لبناء أربع محطات نووية بحلول عام 2025، على أن يبدأ تشغيل أولاها في 2019 ، وأن يضيف البرنامج النووي الجديد ما يصل إلى 4000 ميجاوات !!! علما بأن تكاليف بناء 4 مفاعلات نووية حوالى 20 مليار دولار. و نشرت جريدة المصرى اليوم فى 20 سبتمبر 2010 تصريح د.حسن يونس وزير الكهرباء و الطاقة جاء فيه سيتم إيفاد 67 مهندساً مصريا إلى كل من الولايات المتحدة، وروسيا، وفرنسا، وكوريا الجنوبية، للتدريب على التكنولوجيا النووية. وبالفعل هذا مفيد لأرسال الأصدقاء و المعارف فى رحلة مدفوعة الأجر على حساب الشعب المصرى الفقير.

..تكلفة مفاعل نووى جديد يبلغ 5.52 مليار إيرو ، و 300 من مراوح توليد طاقة الرياح تنتج ما يعادل مفاعل نووى و تتكلف 900 مليون إيرو فقط!!!

باقى المقال ضمن مقالات ثقافة الهزيمة بالرابط التالى www.ouregypt.us

قمم التميز يقول...

شركة تنظيف بالدمام

شركة تنظيف خزانات بالدمام

شركة تنظيف منازل بالدمام

شركة تنظيف فلل بالدمام

شركة مكافحة النمل الابيض بالدمام

شركة جلى بلاط بالدمام

شركة تسليك مجارى بالدمام

شركة نظافة بالدمام

شركة مكافحة حشرات بالدمام

شركة رش مبيدات بالدمام

شركة كشف تسربات المياه بالدمام

شركة تنظيف شقق بالدمام

شركة تنظيف موكيت بالدمام

شركة تنظيف مجالس بالدمام

شركة تنظيف بيوت بالدمام

شركة تنظيف سجاد بالدمام

شركة تنظيف كنب بالدمام

شركة تنظيف مسابح بالدمام

قمم التميز يقول...

شركة تنظيف بالخبر

شركة تنظيف بيوت بالخبر

شركة تنظيف مجالس بالخبر

شركة تنظيف شقق بالخبر

شركة تنظيف خزانات بالخبر

شركة تنظيف منازل بالخبر

شركة تنظيف فلل بالخبر

شركة مكافحة النمل الابيض بالخبر

شركة تسليك مجارى بالخبر

شركة نظافة بالخبر

شركة كشف تسربات المياه بالخبر

شركة تنظيف مسابح بالخبر

شركة عزل اسطح بالخبر

شركة عزل خزانات بالخبر