الأحد، 29 أغسطس 2010

ادعوا لبابا بذمه بقى

قلتلكم من البوست الى قبل الى فات انكم تدعوا لبابا ولكن عشان انتم  اصدقاء نص كم  دعيتم بنص قلب شكلكم وذمتكم استك فى الدعاء


بابا لسه تعبان  ربنا يشفيه يارب  شفاءا لا يغادر سقما

امنوا يا عيال وادعوا كويس بقى بلاش بخل يا ساتر عليكم

بجد يا ولاد بابا تعبان اوي يا حبيبى  والنبى ادعوله بذمه وضمير كده

وانتم صايمين كده ربنا يتقبل منكم ان شاء الله ويجيب الشفا من عنده

وطبعا باعتذر لكل الناس الى مش عارفه ازورهم ولا ارد حتى على معلقين البوست الى فات مشغوله مع بابا طبعا

وشكرا يا حلوين  .... بذممممممممممه  قلنا

الأربعاء، 25 أغسطس 2010

لقاء خيري وافطار جماعي فى القاهره

السلام عليكم

شهر الخير وقلوب الخير وانشاء الله دنيتكم كلها تبقى خير

طبعا   الدعوه للقاء بتاع القاهره والافطار من  وش الخير داليا  قوس قزح    والجدعنه والاخلاص لوجه الله   خالد همس الاحباب


و تفاصيل التجمع الخيرى بمستشفى ابو الريش اليابانى يوم السبت 28-8-2010

التجمع الساعة الثالثة عصرا امام المستشفى ونستمر لحد الخامسة مساء باذن الله

بعدها سنتوجه الى مكان الفطار الجماعى بمطعم ابو العز 117 شارع بور سعيد امام محطة مترو السيدة زينب المحل يبعد امتار عن المستشفى
 
 
وده ايميلات الناس المسئولة عن اليوم

kouskoza7@hotmail.com

kh_cyc2006@hotmail.com

و ده ارقام ممكن تبعتوا رسالة عليها او تسالوا على اى شىء خاص باليوم ده

داليا صاحبة مدونة قوس قزح

0148693432

خالد صاحب مدونة همس الاحباب

0101345140

 
والتفاصيل اكتر هتلاقيها هنا عند خالد همس الاحباب
 
 
طبعا والله كان نفسي اكون معاهم فى اليوم ده ربنا عالم
بس الظروف عندي ما تنفعش خالص سفر وكده
بس قلبي معاكم وياريتنى بجد كنت اقدر اجي
 
كل الى يقدر يروح او يشارك باي حاجه يا جماعه ما يتاخرش من فضلكم وانا عارفه انكم جميعا جدعان وقلوبكم مليانه خير
 
ودايما متجمعين فى الخير يا اصدقائي

الأحد، 22 أغسطس 2010

الاعمال بالنيات ... فى رمضان


الحقيقه انا احترت احط الموضوع ده فين هنا ولا على المدونه الاسلاميه

فقلت خلينى هنا عشان اتكلم براحتي اكتر


رمضان السنه دي مرهق جدا انا عارفه والناس بتبقى قبل الفطار دايخين ومهبطين وروحنا بتبقى طالعه
وبعدين بعد الفطار نبقى متنحين وبرضه هبطانين ونعسانين

الحر مريع ومخلي الناس مفرفره

ومع ذلك اكيد كلنا  عايزين نجمع حسنات طبعا

طيب انا عندي اقتراح جميل جدا جدا وهو انكم دايما قبل ما تعملوا أي حاجه ولو صغيره وعاديه واعتياديه انكم تنووا انها لوجه الله تعالى

أي حاجه فى الدنيا حتى طبيخ عيالك
واتقانك لعملك وضحتك فى وش مراتك
وبرك بالوالدين وصلة الرحم وطبق الحلويات للجيران

وطبعا وبدون شك العبادات الى على اد ما نقدر بنزودها بنوافل وقراءه قرآن وكل ده

اغتنموا الفرصه فعلا انكم تجمعوا حسنات فى رمضان
اعزمي اهل جوزك او صحابه واستحملي واصبري وقولي لله ورسوله وهاخد ثواب افطار صائم وثواب لم شمل وصلة رحم وثواب رضا جوزك عنك
وانتى تاخدي كل ده كده ربطه واحده فوق صبرك على الصيام الى هو لله تعالى وهو يجزى عليه

قصر لسانك حبه وانت سايق واتقن شغلك وخليك لطيف مع مراتك وولادك والكلمه الطيبه الصدقه وصبرها واضحك فى وشها ينوبك ثواب  فيها
وبر اهلك وزورهم واعزمهم وصالحهم على بعض

واي حد مخاصم اخوه ولا صاحبه ولا أي حاجه يصله ويقول لله ورسوله

هى دي خلق المسلم الحقيقى والله اوالى المفروض تكون على طول اصلا

المسلم مش بس الى بيصلي 21 ركعه فى  التراويح ولا الى مربي دقنه مترين ولا الى لابسه نقاب ولا الى بيتكلم باللغه العربيه الفصحى ولا الى مقصر التوب

كل ده ماشي حلو جميل اوي بس لو من غير اخلاق المسلم
ومن غير جوهر الدين تبقى طز ولا حاجه

بمعنى تاني لو واحد مربي دقنه ومقصر التوب وبيصلي فى اليوم ميت ركعه يا سيدى وبيصوم نوافل
لكن ممكن يكذب واخلاقه سيئه مع اهله ومراته وفي بيته ولسانه طويل وعايز قطعه وصلة الرحم بتاعته بعافيه


وواحد تاني لابس عادي قميص وبنطلون ومش مربي دقنه ومش بيصلي ولا بيصوم الا الفروض
لكن
اخلاقه عاليه اخلاقه بمعنى تاني مسلمه ومحترم فى بيته ومع اهله وبيصل رحمه ويبر اهله  ولسانه نصيف وقلبه قبل كل شيء نضيف وبيحب الناس والناس بيحبوه وبيقضى حوائج الناس 

مين فيهم المؤمن على حق يا جماعه

وصلتكم الرساله كده ؟

ارجوكم واحنا فى رمضان اوهبوا كل نقطة  عرق نازله منكم لله ورسوله  وصبركم على الناس واعملوا كل ما عليكم من واجبات قبل النوافل من فضلكم

وطبعا الى تقدروا عليه من النوافل

وليا طلب عندكم لو سمحتوا

تدعوا لبابا ربنا يشفيه ويقومه بالسلامه عشان هو تعبان شويه
وتجهزوله عروسه عشان هو قالي شوفيلي عروسه عشان اخف

وادعولي عشان اختكم محتاسه حوسه عجب فى رمضان

وكل سنه وانتم طيبين

الخميس، 19 أغسطس 2010

شكرا يا منونه

ايه رايكم يا جماعه فى النيو لوك

اظن يعنى انا صدمتكم صح  

اه والله انا نفسي اتصدمت لما شوفته

قلت ايه ده ؟؟؟ مين ده ؟؟؟؟  ده مش شبهي خالص   .. فين دي   ... فين دي
هههههههههههههههه

والواحد حس كده انه مثلا  بعد الكلاسيك لابس كاجوال الصراحه

طبعا منونه حبيبتى هى الى تعبت نفسها بجد وعملتلي التمبلت ده مخصوص

بجد يا منونه جميل  اوي وانتى ذوقك حلو اوي اوي  وعملتيلى مفجأه حلوه اوي اوي بجد ربنا يخليكى ليا


وربنا يخليكوا ليا كلكم يا اصدقائي الاعزاء

وعقبال ما اهاديكى ببوكيه ياسمين بحاله يوم فرحك يا جميل

الثلاثاء، 17 أغسطس 2010

ما بقاش انسان

ما باخافش انا من عفاريت ولا جان
انمـا جــايـز اخــاف مـن الانـســـان
اصـلــه بـقـى طـمـــاع وجــبــــــان
يـقـتـل اخــوه عــلـشـــان فـــــــدان
قـلـبــه؟ .. ده بـقـى حـجـر صــوان
ما يهموش فلان  تعبان ولا جعــان
نـخـوتـه؟ .. ما راحـت مـن زمـــان
مابقاش يهمه لو لحمه يبات عريان
ولا يفكر مين زعلان ومين غلبــان
باختصار الانسان ما بقاش انسـان
بـقـى كومــة غــدر عـلـى نكـــران
عرفتـوا ليه بقى ضاع الامــــان ؟؟


الاثنين، 16 أغسطس 2010

شمس النهار .... الف سلامه عليكى

شمس النهار

لا قولوا شمس البلوج وقمره وعسلياته كلها 

كلمتها اقولها كل سنه وهى طيبه لقيتها يا حبيبة قلبي مجبسه رجلها

اه والله مش عارفه ايه الرصيف الى ما عندوش قلب ده الى يقدر يكسر رجل شموستى ويمزق اربطتها هذا اللعين القاسي

الف الف سلامه عليكى يا شموسه يا جميله

وانشاله الرصيف هو الى ينشك فى قلبه القاسي

بجد من قلبي ربنا يشفيكى شفاءا لا يغادر سقما يا حبيبتى وربنا يهون عليكى ايام الجبس الرخمه خصوصا فى الحر

طبعا انا باقولكم عشان تدعولها معايا باخلاص يا شعب البلوجر  واحنا فى رمضان
وان شاء الله يشفيكى يا شموسه

وتعيدى وانتى تمام التمام

الأربعاء، 11 أغسطس 2010

رمضان كريم

كل سنه وانتم طيبين يا اصدقائي الاعزاء

ويارب يكون رمضان خير عليكم وينعاد عليكم وانتم بصحه وهنا وسعاده يارب

وتكونوا  جبتوا الياميش انشاله يارب نص كيلو فول سوداني  بقشره

واسفه انى ما لحقتش اعدي عليكم فردا فردا فى مدونته اقوله كل سنه وانت طيب مشغوووووووله والله خالص

وعلى ما يبدو انه سيظل هو ده الحال طول رمضان ولا ايه

دعواتكم معانا الله يخليكم

ويا ستيته يا حياتي انا عملت نيو لوك للمدونه بتاعة المطبخ عشان نبدأ شغل بقىىىىىى
وطلعتلكم الحلويات بره وكده  اي خدمه يا جميل  ما اتحرمش من تشجيعك يا قمر

الأحد، 8 أغسطس 2010

كما تدين تدان

سلام عليكم يا اصدقائي

الحقيقه انا يظهر دايما باحب احط ايدى فى عش الدبابير

الموضوع الى فات الى كان عن خدمة زوجة الابن لحماتها  والى زعل ناس كتير وحتى لما عملت استاتيو مره بالمعنى ده على الفيس بوك كان في واحد فاضل يقولي انتى هاتكفري ولا ايه
هههههههههههههههه

لكن طبعا ما حييت ما دام كلمة حق لازم تتقال وما دام شرع الله مش هاطنشه  وأخبيه واقول اصل يستغله ضعاف النفوس
اطلاقا مطلقا مش هايحصل  وان شاء الله لنا كلام تاني فى الموضوع ده على المدونه الاسلاميه

المهم انا وعدت  م. علي يونس انى هاعمل بوست تاني اصالحه فيه اصل كان زعلان مني اوي عشان رايي بتاع البوست الى فات والى بيقول انه مش فرض على الكنه خدمة ام الزوج او اهله  وطبعا ما زال هو ده رايي

لكن هاحكيلكم حاجه يا جماعه فعلا حصلت معايا

انا جدتى كانت ست حكيمه جدا وطيبه جدا وانا كنت باحبها جدا جدا ويمكن قلتلكم الكلام ده قبل كده واثرت فيا كتير واتعلمت منها كتير قوي

مره حكتلى عن واحده من قرايبنا نسميها عايده   وقالت ان حماتها راحت قعدت  عندها يومين بالحال من ابنها طبعا ورجعت زعلانه من عندها وحكت لتيته  الى حصل وطبعا ده يا جماعه فى الازمان البعيده جدا ماما نفسها ما توعاش عليه

المهم حماتها بتحكى انها الصبح بتحب تشرب شاي على لبن فلقت مرات ابنها جايبه لها الشاي ساده
فسألتها مافيش عندك حبة لبن يا عايده اصل الشاي ساده الصبح بيتعبنى
فقالت لها لا مافيش وطبعا بغباوه
الست شربت الشاي وامرها لله وقامت تودي الكوبايه وتغسل  اديها

لقت صنية كوبايات فاضيه مكانها حليب وحله فيها بواقي لبن على البوتجاز
وعليه الست حطت فى نفسها وزعلت اوي واول ما جه ابنها قالتله روحني يا ابنى

لحد كده عادي

تمر السنين يا ساده يا كرام وعايده حماتها ماتت وهى جوزت  عيالها وبدأت تجوز فى  عيال  عيالها    وتيته الله يرحمها ماتت  كمان  وبعدين ماما كانت راحه تزور الحاجه عايده دي مره وانا روحت معاها  كنت فى الجامعه ايامها تقريبا

فماما بتقولها يا حاجه انا اتصلت عليكى فى البيت ما حدش رد سألت مرات ابنك قالتلى انك قاعده عند فلانه بنتك  اغلب الوقت

راحت قالت الحاجه عايده : ايوه يا حبيبتى اصل انا ما بقيتش ارتاح هناك ابنى بيصمم ياخدنى عنده فوق  ومراته معاملتها مش اد كده مش باستريح معاها

وقعدت تحكي يا ساده يا كرام
مش عايزه اقولكم انى كنت هاعيط عشان الى قالته صوره بالكربووووون من الموقف الى تيته حكتهولي قبل ما تموت

والله ولا كلمه زياده ولا كلمه ناقصه  بالظببببببط  واقعة الشاي باللبن دي بالظبط بنفس التفاصيل

سبحانه وتعالى حقيقى كما تدين تدان

للأسف احنا  اصلا ما بنحسبهاش كده عموما مش بس مع الحمى لا خالص مع كل الناس وكل الدنيا
اوقات كتير اعمل حاجه وابقى حاسه ان الشخص الى عملتله الحاجه دي فعلا ندل وما يستهلش بس ارجع وارضي نفسي واقول لوجه الله تعالى خالصه ومتاكده ان ربنا هايردهالي في حاجه تانيه
حتى وان كان لولادي مش ليا انا شخصيا

عارفين لو نحط الامور فى نصابها الصحيح
وزوجة الابن تكون بتخدم حماتها او حماها وهى بتقول لله ورسوله  وجوزها وحماتها عارفين انها مش فرض عليها وانها بتعمل كده اخلاق وكرم منها

هاتبقى الزوجه راضيه ونفسيتها مستريحه وهايبقى اهل الزوج ممتنين لها وبيقلولها شكرا بالتالي الدنيا هاتمشي كويس اوي

انما نغطي الحقيقه ونقول اصل نعمل فتنه ؟؟!! ده لا يمكن ابدا

ده غير ان مش كل الناس تقدر تسامح ومش كل الناس تقدر تعطي فعلا دى بتبقى هبات من عند ربنا

والحمى الى تعبانه وعايزه حد يمرضها ويخدمها تسعين فى الميه منهم بتكون كل حاجه بتوجعها ماعادا عضو واحد لا يكل ولا يمل ... لسانها طبعا بينقط سكر

يا جماعه شوفوا ربنا وصى ازاي على الوالدين فى القرآن .. تفتكروا ده ليه ؟؟ التاكيد ده كله ليه ؟؟
عشان اصلا هى مهمه صعبه شاقه جدا جدا  التعامل مع كبار السن صعب جدا والله يا جماعه انا جربته كثيرا

تخيل انه يكون صعب عليك وهما امك وابوك  فما بالك لو كانت هى زوجتك مش امها وابوها  فعلا  ولا هما برضه بيعاملوها فعلا زي بنتهم خلونا واقعيين

على راي المثل الى بيقول اذا كانت الغله تيجى اد التبن الحمى تحب مرات الابن

:))))))))

الكتااااالوج
 ممنوع مخالفه الكتالوج وكل شيء هايمشي تمام

من فضلكن يا زوجات لا تنسوا الفضل بينكم  ....

ومن فضلكم يا ازواج اتقوا الله تعالى ولما يكون عندك ست بتخدم امك ربع خدمه بوس ايدها كل يوم وقولها شكرا
واي واحده من اخواتك تيجى  تقولها بم قولها تعالي انتى اخدمي  امك يا شاطره وخلي كل واحده تحط لسانها فى بؤها
وكمان فهم امك ان مراتك مش ملزومه بها ووصيها على مراتك بس ما توصيش اوي عشان هاتغير من مراتك وهاطين عشيتها زياده

بس خلاص

الاثنين، 2 أغسطس 2010

تارك الصلاه ... على الاسلام كما اراه

اخيراااااا

كتبت موضوع فى المدونه الاسلاميه بتاعتي


والموضوع بعنوان    تارك الصلاة

سمعااااكم الى بتقولوا عارفين هاتقولي ايه

والى بتقولوا احنا بنصلي يا ستى مش عايزين صداع

من فضلكم اقروه  اولا  عشان اخد ثواب على حسكم... ايوه داخله على طمع.
ثانيا : جايز الكلام ياثر فيكم بقدرة ربنا يوضع سره فى اضعف خلقه
ثالثا  : حتى لو بتصلي جايز تقول الكلام ده لحد وسبحان الله يصلي

وفى كل الاحوال الى مش هايروح يقراه مش هايحصله كويس خالص بقى بلطجه كده

قدامي على هناك يلا