الأربعاء، 29 سبتمبر، 2010

هو احنا ليه ما بنربيش ولادنا ؟؟


ايوه مش بنربيهم 
اذا كان احنا نفسنا ناقصين تربيه 

اوعى حد يقولي لاااا انا باربي ابنى احسن تربيه بادخله احسن مدارس وباجيبله احسن مدرسين احسن لبس احسن اكل وعمري فى حياتي ما شتمت ولا قلت قدامه كلمه مش مظبوطه  والولد اخلااااق  بس هو شقي شويه ما كل العيال اشقيه

طيب معلش عندي لكم سؤال جميعا :

هل علمت ابنك ان ليس منا من لم يوقر كبيرنا ويرحم صغيرنا ؟؟
علمته دي مش كلمه
لا دى حياه
بتتكلم ازاي قدامه عن اخوك الكبير وعن ابوك وبتعامل  ابوك ازاي قدامه وبتعامل اخوك وعمك وخالك ازاي

علمت ابنك انه لما يكون ماشي مع حد اكبر منه ما يسبقوش وهو ماشي وما يقاطعوش فى الكلام وما يزعقش فى وشه
علمته لما يقعد على السفره مع الكبار ينتظر لحد لما الكبار يقعدوا ويبدأوا اكل  اولا

طيب علمته يبقى صادق ؟
مع نفسه اولا ما يخدعش نفسه ويقول انا شاطر وما حصلتش وهو اصلا مش كده
وما ينكرش نفسه من الضيف وما يطنش جرس الباب ولا جرس التليفون ويحترم الناس ويكون ذوق ولسانه حلو مع الناس

كمان علمته ما يرميش ولا ورقه فى الشارع وهو ماشي حتى لو كانت الدنيا كلها بترمي هو ما يرميش

طب  علمته يحترم القواعد والقوانين حتى لو كانت صعبه او هو مش مقتنع بها او لو الناس كلها مش بتعملها ؟؟

ولما يقدر يقول القوانين دي غلط وانا مش مقتنع بها يقول انما ما يبلطجش فى الحياه بقى

علمته يعتمد على نفسه ويخدم نفسه ويساعد ماماته ويساعد ابوه

علمته قيمة العمل الى اهم من قيمة الفلوس ....احنا بنشتغل عشان يكون لنا فايده عشان ننتج مش  عشان نجيب فلوس بس والا لو الواحد معاه فلوس يبقى ينام ويأنتخ بقى طول حياته

علمتوا ولادكم الدين ؟؟
علمتوهم ايه ؟؟
ياكل بايده اليمين ويحفظ قرأن ويصلي ويصوم
مش كفايه
لازم يفهم روح الدين
لازم يعرف ان الدين قبل أي شي تعامل واخلاق وصفات حسنه فى المجمل
مش  دقن وجلابيه وحرام حرام حرام

لازم يفضل عارف ان اول مرجعيه له طول عمره هى الدين واول قانون يحترم هو الشرع واول من يخافه ويرجو رضاه هو ربنا سبحانه وتعالى

مش بالكلام بالفعل

ارجوكم الى فيكم مضايقه من حماتها ما تخليش ولادك يكرهوا جدتهم  مش عشان جدتهم لا عشان الصحه النفسيه لولادك
ارجوك لو كنت مش طايق  مراتك طلقها .. بس ما تضربهاش ولا تهينها ولا تكلمها وحش قدام ولادك برضه مش عشانها يا سيدى هى كلبه ولا تسوى  برضه عشان الصحه النفسيه لولادك

يا ناس الى فيكم مضايقه من اخوه ولا ابوه  ما يقولش لابنه ولا بنته ما تكلميش عمو فلان ولا حتى تتكلم قدام ولادك وحش عنه ما تتكلمش خااااالص  فلتقل خيرا او لتصمت

يا نااااس العيال مالهاش أي ذنب باي مشاكل بينكم وبين أي حد تاني

يرضي مين واحده تتخانق مع سلفتها تقولها طنط فلانه دي لا تكلميها ولا تسلمى عليها ولا تخليها تبوسك ؟؟!!! وتروح عند امها وتقعد تقول يجيلها ويتحط عليها فلانه عملت فيا وعملت وقدام ولادها

 فى حين ممكن جدا تكون الام نفسها بتقابل سلفتها بعد نص ساعه تبوسها وتكلمها عاااااادي من ورا قلبها اه
بس الطفل يجيله انفصام كده هايشوف الام كدابه ومنافقه

يا جماعه احنا بنخلف العيال  عشان نربيهم صح مش عشان نستعملهم لمعاقبة الاخرين
ولا عشان نطلع فيهم عقدنا وكلاكيعنا
ونخليه يكره من نكرهم فى حين بننسى ساعات نخليه يحب الى بنحبهم كمان
ونستعملهم كسلاح
واحده عايزه تضغط على جوزها عشان يطلقها او  عشان ما يطلقهاش تحرمه من ولاده عشان عارفه انه بيحبهم مثلا
واحد عايز يادب طليقته ويطلع عليها القديم والجديد ياخد منها عيالها ويحرم عياله من وجود الام فى حياتهم حتى لو كانت تليفون ولا زياره كل اسبوع
واحده تمنع العيال عن ابوها اصل زعلانه منه   أي كلام واي هبل
ولا ايه بقى العقد والكلاكيع المركزه الاتيه
ونخليه يدخل الكليه الى احنا دخلناها او الى احنا ما عرفناش ندخلها
حتى التعليم بنخليهم يتعلموا مش عشان يتعلموا عشان يجيبوا درجات مش  تحصيل علم تحصيل درجات وكليات قمه وهبل بنسقيه للعيال قتل جواهم كل ميول واتجاه وهوايه

ونجوزهم جوازه تكون عجبانا احنا ومقتنعين احنا بيها مش مهم هما
الله هو انتم جايبين العيال دي  من الملجأ ولا ايه ؟؟
هما لعبه ؟؟
ارجوكم كل واحد يحتفظ بكلاكيعه الخاصه بحيث ان كل طفل يعمل لنفسه كلاكيعه براحته
مش معقول ياخد كلاكيع اهله ويحط  عليها كلاكيعه هو كمان تبقى كارثه بقى

ارجوكم بلاش  ازدواجية الفعل والتعبير  خليكم واضحين مع نفسكم شويه
خلوا المقام الاول لو سمحتم لتربية  الولاد ومصلحتهم وتوازنهم النفسي

مش تخليص عقد ولا تخليص حقوق ما تدخلوش الولاد ضمن دايرة صراعاتكم

وحد يجبلى انا بنادول لان انا الى صدعت على ما كتبت على فكره ايه ده انتم هاتقروا كل ده ازاي ؟؟!!

الأربعاء، 22 سبتمبر، 2010

الاحلام


الاحلام دي حاجه كده الواحد يفكر فيها زي ما تكون كائن هلامي متحول

 اه حاجه يعنى عجيبه ما لهاش كنه محدد وما لهاش شكل محدد
بقالي فتره كنت عايزه اكتب عن الموضوع ده بس نسيته وفكرنى به النهارده استاذ عمرو بدر باستيت  له على الفيس بوك
الاحلام سواء ا لى بنحلمها واحنا نايمين ولا واحنا صاحيين

مهمه اوي ؟ مش عارفه  بس هى اكيد مهمه والا ما كانتش تبقى مخلوقه فينا

طيب الاحلام واحنا نايمين دى عادي حاجه ما لناش يد فيها اصلا بتعبر  عن افكار فى العقل الباطن وجايز تكون رؤى بدون سبب برضه الله اعلم

انما ايا تكن احنا مالناش اي يد فيها اطلاقا دي بتيجى لواحدها كده من غير ما نتدخل

طيب والاحلام واحنا صاحيين بقىىىىىىىىىىىىى

تفتكروا احنا برضه ممكن نتحكم فيها
بتهيئلي على الاقل بشكل جزئي ايوه

بس يا ترى الاحلام دي حدودها ايه ؟؟
ما لهاش حدود ؟؟

طب لو ما لهاش حدود شروطها ايه

عشان تفضل حلم عشان تبقى مالهاش حدود عشان ما نتحاسبش عليها قدام رب كريم

فى الحقيقه انا كان معنى الحلم بالنسبه لي وانا طفله مثلا انى احلم انى عندي مصنع شيكولاته كبيييييييييير او عندي مدينة ملاهي
اه طبعا ده عاااااااتي جدا وممكن الواحد يستغرق بقى فى الحلم

لما كبرت بقى بقت احلامي اكبر من ناحية المضمون يعنى مش الحجم

ما كنتش بافكر  اوي فى موضوع الاحلام نفسه فى حد ذاته لحد وقت قريب

والله شرف الحلم وجه على بالي لما يبقى بالي يفضى اصلا ماشي  ما جاش  برضه ماشي

انما اكتر من شخص لقيتهم بيتكلموا عن الحلم بشكل مختلف

والاقي ناس بتقول ايوه ده مهربنا ده ملاذنا من عذابات الدنيا ده انا لو ما حلمتش شويه كل يوم قد ساعه بيبقى يومي زي الزفت

طب بتحلموا بايه يا جماعه انا فايتنى حاجه ولا ايه .. يقولوا على اختلاف انواعهم واعمارهم

بنحلم فى كل حاجه واي حاجه ونروح اي مكان ونكلم اي  حد ونعمل اي حاجه كله فى  الخيال

طب طول ماهو حلم ماشي احلموا ايا يكن الحلم ما دام حلم

طب سألتنى مره  واحده سؤال حيرنى موت

طبعا انا ماليش اي خبرات فى الاحلام الى هى كده

كده ده الى هو بشكل مقصود يعنى الواحد يقول لنفسه تعالى يا نفسي نحلم لنا حلمين كده واحنا مغمضين عنينا ونعيش فى عالم اخر غير العالم الحقيقى

ماليش فيه خالص الحقيقه

المهم السؤال الى حيرنى

الحلم والخيال مالوش حدود مالوش سقف ولا قوانين من اي نوع

قلتلها اينعم هو كذلك

طب ربنا بيحاسبنا عليه

قلت فى حدود علمي ما دام مجرد جال بخاطرك  مش عملتي منه حاجه يبقى لا

قالتلى طب لو انا شاركت حد الحلم

يعنى مثلا حكيتلك على حلم من احلامي ؟؟؟
او حتى حلمناه سوا ؟؟؟

قلتلها ااااااااااه كده نقف نحتار بقى

وقعت افكر …هو كده يفضل زي ما هو حلم ؟؟ ولا هو كده اتحول لكلام

وينطبق  عليه المبدأ  الشرعي حلاله حلال  وحرامه حرام ؟؟؟


ماهو ا صل الحلم حلم طول ماهو بينك وبين نفسك وخيال طول ما هو بين طيات عقلك

طلع بره معالمه اتغيرت و صفاته اتغيرت وبقى حاجات تانيه

الحقيقه هى لم توافقني  على الراي ا طلاقا

ومش هى بس  كل لما اخد راي حد شايف انها تظل احلام

هو الوضع ممكن يكون عادي لو انا باحلم مثلا انى اشتريت مزرعه وربيت بقره وفرخه ووزه
وزرعت شجرة توت وجمبها شجرة مانجو  كل ده مش هانختلف فيه ان كنا نشاركه مع حد ولا نقوله ولا ما نقولوش

المشكله تكمن فى انواع تانيه من الاحلام

يعنى لو انا حكيت حلمى او خيالي لحد او حتى شاركته فيه

وكان الحلم  ده عباره عن اننا هانسطوا على بنك ونقتل الحراس ونسرق البنك وبعدين نهرب

ونشتري جزيرتين واحده كبيره وواحده صغيره وياخت  ونجيب ازازتين حلبه حصى ونشربهم وندخن سيجارتين حشيش ونعمل دماغ وكده يعنى

هل هذا النوع من الاحلام ينفع نحكيه ونتكلم عنه ونتشاركه مع حد ونقول هو فى  النهايه احلام ؟؟؟

الحقيقه انا مش عارفه ومحتاره

عايزه اسمع رايكم جميعا  عشان انا ماسكه فى خناق حوالي 13 صديق وصديقه بسبب  الموضوع ده
هههههههههههههههههههههههه

يلا سمعوني رايكم وبسرعه بلاش الكسل الى انتم فيه الايام دي ده

الاثنين، 20 سبتمبر، 2010

فين ايام زمان ؟؟

راحت فين ايام زمان

ايام الجري واللعب وتغيير السنان
أيام ما كان القلب اخضر والعقل أكبر جنان
وكنت على صوت جدتى بتدعي لولادها انام
****
ايام الحيره فيها ..أشتري بسكوت ولا لبان ؟؟!!
وكانت المدرسه والواجب اقصى هم و التزام
و كنت احيي العلم بهمه ..لا مراره ولا قلب حزنان
***
طب فاكر لما كان الوجع خبطه من ماما بدلع وحنان؟
ولا لما كان الخوف من الحقنه وقطة الجيران
أأأأه يا سلام ...... راحت فين ايام زمان

الثلاثاء، 14 سبتمبر، 2010

مقاعد المرأه ...هوبالعافيه ؟؟

تحديث
نحيط علما بسيادتكم يا ايها المدونين الكرام ان الليالي المصريه ستعاود من جديد بعد انتهاء اجازة رمضان والعيد
وعلى كل من له مشاركه  بالكتابه فى القصه انه يروح يثبت حضور هناك فى الليالي عشان ست الريسه تعرف انه لسه موجود معانا
وللجميع تابعونا هناك ان شاء الله عشان نكمل قصة قلب كامل
***************************************************

بقالي شهر كل ما امشي فى الشارع اشوف صور لمرشحه جديده لمجلس الشعب لما بقوا المرشحات الحريمات اكتر من الرجاله بكتير

باقول لرضا هو فى ايه هما الستات بتوع المنصوره مالهم كده يا اخويا
وبعدين ده فى صور منهم الواحد يادوب يديها عشرين سنه

قالي مش64  مقعد فى المجلس

قلتله طب ماشي هياخدوهم كلهم من المنصوره ولا ايه

سؤال يطرح نفسه ... جوايا انا يعنى ... هو عافيه ؟؟

طبعا احنا المفروض بلد ديموقراطي

والديموقراطيه  اساسها تحقيق ارادة الشعب

طب الشعب لو مش عايز حريم فى المجلس  برضه هو حر

ليه  تجبروا الناس  على انهم يختاروا لتمثيلهم ستات

لو كان فى مفاهيم خطأ (ده لو كانت خطأ )
يبقى نصحح المفاهيم دي عند الناس اولا
وهما حرين بعد كده فى اختيارهم

يختاروا الى يمثلهم ست ولا راجل

طيب فى قصة المسيحين ماشي كلام معقول انهم يحددوها عشان اقليات والكلام ده

انما الستات ليه ؟؟

طبعا انا لما لقيت كل الحريمات دي  انا قلت خلاص انا هارشح نفسي بقى

طيب المجلس لما يكون لازم يكون فيه ستات ماشي عشان يمثلوا راي المرأه

انما ليه كمان مجالس ادارات الغرف التجاريه يصروا على وجود ستات ؟؟

برضه عافيه ؟؟؟!!!

اينعم احنا متاخدين عافيه اصلا فى كل حاجه

انما ده ما يمنعش انى اقول رايي فى الموضوع برضه

انا مش باقول بلاش الستات ترشح نفسها
اطلاقا
اه احسن اعضاء جمعية المرأه المتوحشه حبايبى يقطعوني

بس انا عايزه الى ترشح نفسها للمجلس او تكون اساسا فى المجلس تكون عشان الناس اختارتها لكفائتها الشخصيه
مش عشان الشعب مجبر  على اختيار 64 مقعد للمرأه

لو شايفين ان المجتمع محتاج تعديل فى افكاره الخاطئه يبقى نعمل ده بالتوعيه مش بالعافيه

ولا هى وسائل الاعلام تخدم فقط المصالح اياها ؟؟

وسؤال تاني يلح عليا كل ما امشي فى الشارع واشوف صور المرشحين

هما ليه  كلهم شكلهم مش مريح ؟؟!!!

سؤال كمان والنبى والنبى اخر مره ما تزعقوش بقى

هو ليه الى مرشحين نفسهم المره دي نصهم مدربين العاب رياضيه
وامبارح شوفت اسم واحد  صاحب كوافير ؟؟؟؟ ليه هاه ؟؟ ليه

بس خلاص
على راي المطرب السياسي ا لمعروف شعبوله

الجمعة، 10 سبتمبر، 2010

عيدكم مبارك

كل سنه وانتم طيبين يا اصدقائي الحلوين  الى واحشني جدا جدا

انا عارفه انى رخمه واتاخرت اوي فى التهنئه بالعيد  وحتى ما عيدتش على اي حد فيكم ولا رديت على الردود بتاعة التهنئه على البوست الى فات
بس برضه انا عارفه انكم اكيد اكيد عارفين انه غصب عني  معلش يا جماعه الحكايه ملخبطه معايا شويه

وكان بودي والله اجيبلكم طب كحك وانا جايه بس للاسف الشديد ما عملتش كحك  اهيء اهيء اهيء

اه والله كده يا اخواتي  واشتريت .. ولسه ما جاش كماااااااان الى اشترتهولي مش عارفه توصلهولي ما عرفتش انزل كمان

المهم كل سنه وانتم طيبين وبخير وسلام واتمنى تكونوا جميعا اكلتوا الكحك واتمرجحتوا وميه ميه
ههههههههههههههه

وزي كل عيد وزي كل سنه باقولكم يا جماعه فى العيد صلوا ارحامكم وزوروا بعض واتسامحوا والعيد فرصه كويسه عشان يبقى سبب انك تصالح اي حد زعلان منك او انت زعلان منه  روح صالحه بمناسبة العيد من غير ما كرامتك تنقح عليك عادي

خصوصا لو كان اخوك ولا ابوك ولا امك تبقى مصيبه دي   ولا مراتك

وانسوا خلافتكم يا جماعه وعيدوا وبعدين ابقوا كملوا خناق بعد العيد عادي وده خصوصا بالنسبه للمتجوزين الى ما يقدروش يعيشوا من غير الخناق يعنى

ويارب يكون عيد سعيد عليكم جميعا

واسفه تاني لكل الى مش عارفه ازوره ولا اعيد عليه

وادعولي ربنا يشفينى وادعوا كمان لشمس النهار  ربنا يشفيها انا كلمتها من كام يوم زعلت عشانها اوي اوي وهاتجنن واشوفها بس مش عارفه اسافر
ربنا يشفيها يارب ويشفي كل مريض

السبت، 4 سبتمبر، 2010

الاسلام ارقى من كده

سلام عليكم
متشكره اوي يا جماعه على اهتمامكم بالبوست الى فات ودعواتكم لبابا  بس استمروا يعنى  وربنا يمن عليه بتمام الشفا ان شاء الله
وانا والنبى ادعولي  عشان مش عارفه ضغطي فوق فوق فوق  تقريبا انتم السبب والله اعلم

انا قلت لما اجي افضفض لكم بكلمتين جايز وربما الضغط يحترم نفسه وينزل

طبعا احنا فى رمضان كل سنه وانتم طيبين ورمضان قرب يخلص بس انا عدى عليا موقفين يا مسلمين يا صايمين معلمين فى نفسيتي اوي اوي اوي

الموقف الاول

خناقه فى الشارع واحد بجلابيه قصيره ودقن ماسك فى واحد تاني وبيشتم بقى وكل ما يلزم والناس بتشيلهم عن بعض والتاني كذلك برضه بكل ما يلزم

سألنا في ايه يا جماعه وده كان ساعة صلاة التراويح والناس نازله تصلي

رد متطوع من الجيران وقالك اصل فلان اكل عند حماته فحماته المفتريه الى مش هاتورد على جنه كانت عامله سمك مقلي وحاطه فى السمك المقلي توووووووووم

اي والله كدهو  توووووووم

المفتريه تحط توووم فى بطن السمك المقلي

وعم الشيخ بقى لما اكتشف هذا  الامر الجلل

اتخانق مع المودام وامها واخوها وفضحهم فى الشارع كده

لانه يا ساده لما اكل الثوم فى السمك مش هايعرف يروح يصلي فى المسجد لان الرسول نهى عن قصد المسجد وهو واكل توم

اه والله العظيم عم عماد الى فى اخر الشارع قال كده والعهده على الراوي

عشان التووووم الى فى السمك

وعشان ما حدش يقول فى ناس بسيطه ومش فاهمه الاخ جامعي ومتعلم
وايام ما كان بيكلم مسلمين عادي كان بيقولي انه سلفي

الرسول قاله ما تصليش فى المسجد وانت واكل ثوم قوم لما حماته طفحته عندها والاكل كان فيه توم كان لزاما عليه يفضحها ويشتمها ويشتم الكل  كليله

الاخ ابو دقن نص متر وصلاة  المساجد وجلابيه قصيره  لم يمر  عليه الحديث الى بيقول  الى عايز ياكل بصل وتوم يطبخهم وياكلهم عاااااااااااااااادي

الاخ ابو دقن وحرص  على صلاة المسجد ما يعرفش انه لو ما صلاش التراويح اصلا خالص مش هايؤثم انما بالى هو نيله هايتنيل على عينه  هايؤثم

الاخ ده قصته طويله معايا  هابقى هاحكيهالكم فى موال لواحدها

ننتقل الى الموقف التاني والى هو مشهد سريع

سائق تاكسي محترم واخر الاجه  وسايق التاكسي اي والله كده

وماسك الدركسيون بايده  وبصوباعين كده ماسك مصحف صغير وبيقرا وهو سايق

اي والله حدث ذلك

طبعا هاتقولوا يا مفتريه تلاقيه سايق فى حته فاضيه وهاديه ويمكن بس بيراجع ولا اي بتنجان تاني

طب الى من المنصوره هايعرف انه مش باتجنى عليه وانه عايز يتعلق على باب زويله

كان سايق التاكسي الساعه 9 صباحا فى شارع البحر قدام مركز الكلى كده

حيث الجامعه وملحقاتها ومستشفياتها والكل كليله

اييييييييييييه رمضان وعايز يلحق يختم القرآن

ربنا قاله يقرا القرآن بغير تدبر وغير عابيء بحياة البشر الى حواليه

بلاش حياته
طز فى حياته مش عايزنها اصلا هانعمل به ايه وهو كده

الناس الى حواليه  الى اصلا مش ناقصين غلب وقرف


يا ناس حرام عليكم هاموت منكم والله

يا مسلمين
الاسلام مش كده
والله العظيم الاسلام مش كده

الاسلام
احلى من كده
ارقى من كده
اعمق من كده

افهمواااااااااااااااااا
الهي يستركم افهموااااااااااااااااااا