الثلاثاء، 30 نوفمبر، 2010

الفيل النونو


على راي الست  عفاف راضي .. مره سالت الفيل النونو انت كبير اوي ليه ومتين  ... شال زلومته وقال بعيونه انا باكل والعب  تماااارين

ايه ده  مش جايين نغني هنا

بس الحقيقه ناويه احكيلكم حدوته قبل  النوم

بس ركزوا كده معايا  يا حلوين عشان فى سؤال فى  اخر الحلقه

قصدي البوست

كان يا ما كان يا سعد يا اكرام ولا يحلى الكلام الكلام الا بذكر النبى  عليه الصلاة والسلام
اللهم صلي عليك يا بنى

كان في فيل  نونو صغنونوا امور كده وودانه بتهفهف على وشه

صاحبه الى هو ما شافش غيره طول عمره ويوعى يلاقيه

كان رابطه فى شجره كبيييييييييره بحبل  قوي جدا

والفيل كان بيزهق من الربطه السوده دي وحاول كتير يفك منها
مافيش فايده ما قدرش

مع الوقت الفيل خلاص بطل يحاول واقتنع تماما  انه  خلاص ما يقدرش يقطع الحبل ده

واتعود وعاش وخلاص وبقى ياكل الى صاحبه يرميه له وخلاص لا يقدر لا ولا مش عايز ولا مش جايلى نفس

ومرت الايام بحلوها ومرها والفيل النونو واقف زي ما هو مربوط بنفس الحبل فى نفس الشجره

ومرت سنين وسنين يجى 28 سنه كده وما حدش يفهمنى صح

والفيل كبر ما شاء الله مش انا قولتلكم فوق ان الفيل بياكل وبيلعب تمارين

و اقولكم على سر

الفيل ده اهبل اخر حاجه 

لان الحبل الى هو مربوط بيه فى الشجره اصلا الزمن هراه

غير ان الفيل كبر يقدر اساسا يوقع الشجره كلها

بس هو الى اهبل ويأس وما عادش بيحاول اصلا

 وما زال  هذا الفيل العبيط واقف مكانه  الى الان

وهكذا اصدقائي الحلوين المقطقطين  الهبل دايما يجرالهم كده


سؤال الحلقه بقى

ما هى احتمالات ان الفيل ييقطع الحبل ؟؟؟

ها فكروا جيدا   وهاقولكم الاجابه بعد الفاصل

فكروا الاووووووول

ممنوع الغش من تحت

ف
ا
ا
ا
ا
ا
ا
ص
ل
.

.
.
.
.
.
.
.

عدناااااا

ها فكرتوا ؟؟

 طيب الاجابه اهي

بس على الله حد يغشها قبل ما يفكر


أولا : ان الحكايه تيجى مع الهبل دبل كده والفيل وهو بيلعب حاوريني يا طيطا مع الكلاب الضاله يروح قاطع الحبل ... وده احتمال بعيد حيث انه صاحبه حريص وما بيخليش الكلاب الضاله تلعب معاه اصلا

ثانيا: ان الفيل يفهم لوحده كده ويعرف انه كبر وبقى قوي وان الحبل عجز وبقى ضعيف   وانه يقدر يقطعه ..... وده احتمال ضعيف برضيك حيث ان الفيل مخه تخين باين ولا ايه

ثالثا : ان الفيل  يتعرض للجوع والظلم والتعذيب والاستهبال عليه على الاخر فيقرر انه يحاول تاني مع الحبل وطبعا هايتقطع المره دي  .... وده  احتماااال وارد عشان الضغط بيولد الانفجااااااااااااااار

رابعا : انت تيجى من عند الله كده وفار عبيط رفيع كده يعدي من حصار صاحب الفيل ويقرض الحبل ويبقى الفار نجده  وربنا بعتها للفيل الغلبان العبيط ابو مخ تخين .... بس والنبى طيب وحنين وامور كده وودانه بتهفهف على وشه


وفى نهاية الحلقه باهدي اغنية  عفاف راضي هم النم


لكل اصدقائي الحلوين .. وخصوصا ميمي وسوسو وتوتو وديد ي وطنط سوزان
وباتمنالهم نوما هنيئا

السبت، 27 نوفمبر، 2010

يسرواااااااااا

سلام عليكم يا اصدقائي

ناس كتير فهمتنى غلط فى البوست  الى فات وعشان كده  انا هاكتب البوست ده النهارده عشان تعرفوا تفهموا وجهة نظري

دلوقتي انا مش قصدي ان البنات يتامروا انهم يغالوا فى المهور لاطبعا خالص بتاتا البته وانما العدل حلو

استاذنا فاروق ابن النيل قال كلام جميل اوي

قال انا اتجوزت بعفش قليل اوي وبشبكه صغيره  ... وهى رضيت ووافقت وبعد كده ربنا فتح عليهم وكرمهم وعملواكل الى فى نفسهم وربنا يبارك لهم ان شاء الله

كلام ميه ميه
بس حضرتك مين جاب الفرش القليل واشترى الشبكه القليله ؟؟

حضرتك  ولا والد حضرتك ولاوالد العروسه ؟؟؟

ظني انه يكون حضرتك طبعا

ده الى انا باقوله

يا جماعه انا عايزه الشباب يبقوا رجاله ولما يتجوزوا يبقى عندهم هدف وعايزين يشتغلوا ويتعبوا ويكسبوا ويكبروا

يرضي مين ان العيل من دول يروح يقف على باب العروسه  ومعاه ابوه

وابوه يقعد مع ابو العروسه ويقوله بص ياعم انا عليا النوم والسفره وانت عليك الصالون والمطبخ

والعريس بقى يتفرغ للصياعه وبس

انا شوفت اكتر من حالة جواز الاهالي بيموتوا نفسهم عشان يجوزوهم ويجيبلهم كل حاجه ويعملوا لهم كل حاجه

مش من سعه لا ده بالعاااااااااافيه وبيقطعوا من قوتهم عشان يعملوا

وبعدين العيل من دول يتجوز مرتاح لا تعب فى الجواز ولا تعب حتى بعد الجواز من الابره للصاروخ عنده

طب يعمل ايه بقى ؟؟؟؟ يعمل مشاكل طبعا ويطلق فى الاخر والجوازه تبوظ

او   بعد الجواز يبقى عباره عن اكل ومرعى وقلة صنعه ويسيب شغله وقعد سنه واثنين فى البيت مستنى ابوه ياكله هو ومراته او حتى ياخد من شغل مراته

وده لانه مش لاقي شغل يليق بمقام حضرته طبعا

طب ده يرضي مين ؟؟؟؟

طيب لما يكون واحد مش معاه غير الفين جنيه شبكه

يقول مش معايا الا كذا ياجماعه معلش ولا يقول لاااااااا انا هاحط الفين وانتم الفين زيهم ؟؟؟


طيب  الى  مش معاه يفرش شقه بكاملها يجيب اوضتين كفايه ولا يفرض على ابو العروسه انه يجيبله الاوضتين التانين وبمواصفاته الخاص  ويتامر ويقل ادبه

طب لما يكون مش معاه يعمل فرح ويحجز قاعه بعشر الاف جنيه على الاقل ويجيب دي جي ومش عارف ايه وهبل وبتنجان

يبقى ما يعملش
مش يقول لابو العروسه نعمل بالنص ؟؟؟؟!!!!!!!


ده الى انا اقصده

شوفوا يا جماعه انا اتجوزت فى شقه  سكن الشغل بتاع جوزي وقتها وكانت 4 اوض فرشنا منها اثنين بس اوضة نوم وانتريه ومستعملين كمان

بس عشان ايه  ؟؟؟ عشان ما كناش فى مصر

انما لما رجعنا مصر كان لزاما علينا  طبعا نعمل كل الى  الناس بتعمله

بس بصراحه ربنا احنا كنا ناس عاقلين لا ابويا قالي لجوزي انت جايب ايه ولا جوزي قال لابويا انت جايب ايه
الى جه جه  والى ما جاش وقتها جبناه بعدين عادي جدا

بس لا يزال من حق العروسه تطلب مهر وتتشرط ده شرع ربنا يا ناس

هاتعمل ايه يعنى هاتغالي فى المهور طيب لما تلاقي نفسها هاتضيع هاتوافق

كان فى واحد صعيدى مره بيحكيلى انه فى بلد جمبهم  مشهورين بمهورهم المعقوله كل البلاد الى حواليهم بيروحوا يتجوزوا منهم
وبنات البلاد التانيه الى مسمرين مخهم قاعدين من غير جواز

مسيرهم يلينوا وتتعدل لوحدها صدقوني


بس نمشي زي ما ربنا قال  ما نعوجهااااااااااااااااش

المهم المصايب السوده بقى  الى بتحصل فى الجهاز
نفسي افهم ليييييه

ليه فردين هايتجوزوا جديد يشتروا اوضة اطفال ؟؟؟

ليه يشتروا سفره 12 كرسي ؟؟

ليه انتريه وصالون الاثنين في نفس واحد


لييييييييييه العروسه تجيب دستة طقم سرير يكفوها لمدة عشرين سنه قدام

لييييييه تجيب دستتين فوط يكفوها عشرين سنه برضه

بكل بساطه واحده وهى بتكلمنى عن جهاز بنتها بتقولي انا جايبه والله عشرين فوطة وش غير البرانس وعايزه اجيب لها كمان اربع فوط عشان يبقوا كملوا دستتين

قلتلها لييييييييييه ده كده هاتستعمله فى عقدين من الزمان

تضحك وتقولي والله لسه عندي فوط من بتاعة  جهازي انا فعلا من 22 سنه

ايه الجنان ده ؟؟؟

ليه افرش النيش اكلفه 30 الف جنيه مثلا  واعيش بتاع خمستاشر سنه ما اجيش ناحيته

ايه الحاجات الغريبه دي ؟؟؟

ليه لازما وحتما ولابد البنت تدخل  وهى مخليه ابوها على الحديده ومديون لطوب الارض ؟؟؟

ليه لازم العريس يكون جايب جاز على  اعتاب حياته الجديده

ليه مصعبين الدنيا على نفسنا كده ليييييييييييييييييييه

يسرواااااااااااا ياعالم يسروااااااااااااااااا

بجد حرام الى بنعمله فى بعض يا جماعه

كنا  الاول بنقول للبنات ما تتعنتوش وماتتامروش

دلوقتي بنقول للطرفين بلاش المغالاه والاسارف والتفاخر
وبلاش نقطم رقبة بعض

احلى حاجه فى  الدنيا انك تفضلي طول عمرك تزودي بيتك مش تيجيلى اوضة اطفال قبل العيال ماتيجى  على ما تيجى تستعملهيا تبقى  قديمه

معقوله كده ؟؟

صدق بابا لما كان بيقول لاختي وهى بتفرجه على حاجات شارياها لجهازها

قالها طب باقولك ايه  ماتروحي تشتري هدوم العيال الى هاتخلفوهم بالمره عشان لما تخلفوا ما تبقوش تشتروا هدوم


يا نااااس ياعالم عايزين بدل ما  نطلع شقق وكريستالات ونجف وستاير ودهب وهبل

نطلع من بيوتنا ستات تفتح بيوت
نطلع رجااااااااااااااله تشيل المسؤليه وتربي عيال وتكبر  وتحمي وتضلل

ما زلت باقول للناس كلها
من حق البنت هى الى تطلب وتتشرط

ومليون بنت والله ما عايزه الهبل ده كله بس عايزه رااااجل  يعتمد عليه

يارب تكون وجهة نظري وصلت

الاثنين، 22 نوفمبر، 2010

اتأمروا يا بنات براحتكم


ايووووووه وان كان عاجبكم يا ابناء ادم


الموضوع ده يا جماعه تاعبنى اوي .. يمكن عشان انا عندي بنات .. بس والله الموضوع خطير ومحتاج فعلا علاج اجتماعي

احنا عندنا اعلام فااااشل بجميع المقاييس اعلام فاشل جدا جدا ... بيتكلم وبس والى ماسكينه مطبلتيه وبتوع مصلحتهم ومش بيفكروا فى اي اصلاح من اي نوع .. واولي الامر مش فاضيين طبعا للكلام الفاضي ده وتوجيه الاعلام

واحنا بصفتنا شعب متعلم ومثقف وواع بنتاثر بكل ما يبثه الاعلام لعقولنا مباشرة وهانفضل طول عمرنا مزمار يلمنا وعصايه تفرقنا

وعلى فكره احنا مش لواحدنا الي كده لا شعوب العالم كلها بتتاثر بالاعلام تاثرا كبيرا وفعلا انا شايفه ان الاعلام هو اهم جهاز فى الدوله من يمتلكه يمتلك عقول الناس ومشاعرهم

نرجع لموضوعنا الاعلام بتاعنا مافيهوش لا مبدعين ولا متنيلين هما كلهم يادوب يلاقوا لبانه ياخدوها ويفضلوا ينقلوها من بؤ لبؤ وخلصت على كده

الكلام عن العنوسه واخد قالب واحد لا يتغير .. ولا فى علماء اجتماع بيحللوا المجتمع ولا فى ناس بتدور منين المشكله ولا ازاي ولا فين
ولما ربنا يفتح عليهم وجيبوا خبير اجتماعي يلبس البدله والكرفته ويتشد ويقعد يهرينا كلام الله الوكيل هو نفسه مش فاهم نص ومش مقتنع به وحافظ ومش فاهم

مش هناقش اوي موضوع العنوسه اصل عايزله كتاب مش بوست

وانما هناقش معاكم الى حصل بسبب وسائل الاعلام لعقول الناس .. والى مش هاتعدل الا لما نرجع للكتالوج

وسائل الاعلام هرت النا س كلام عن شبح العنوسه والرجاله الى عددها فى النازل والمشايخ بتتكلم عن التعدد على انه المنقذ من ضياع المجتمع .. واصل الرجاله عددها قليل  والبنات هايبقوا الخمسه بقرش واصل دي من علاماااااااااات الساعه
واصبح واجب قومي انك تعف مسلمه وكل هذا الهراء

ايوووون هراء طبعا ... حسب  الاحصائيات الرسميه لكل الدول ما زال عدد الرجال اكتر من عدد الاناث فيما عدا اربع دول اوربيه تقريبا مش فاكره اوي
لكن فى دول فيها خلل بقى فى توزيع الاعمار يعنى عدد البنات الى سن الزواج اكتر من عدد الرجال الى فى سن الزواج ودول برررررررررضه فى اوربا واستراليا

يعنى احنا بالصلاة على النبى لسه عندنا ذكور ما تقلقوش
قصة علامات القيامه لسه لسه يا حبايبى ما تستعجلوش ده لما تنتشر الحروب والرجاله تموت فى الحرب .. مش شايفه فى مصر فى حروب ولا حاجه عندنا جيش بالصلاه عا النبى طويل عريض بنعلفه لله كده عشان يطلع لنا بشوات يمسكوا محافظين وغير ذلك

المهم الكلام الفارغ الاهبل والهراء ده عمل ايه ؟؟؟

خلى كل الناس تقولك اوباااااااا احنا بناتنا هايعنسوا ولازما ولا بد نطمن عليهم ونجوزهم وبقى فى من اهالي البنات هبل اسمه اتنازل والمهم انك تجوز البنت
والشعور ده طبعا اتنقل للشباب الى بيدوروا على عروسه وبقوا حاسين انهم لمجرد انهم يحملون بطاقه بتقول انه ذكر فهو كده فرصه ولقطه ما تتعوضش

والى بيغظنى وينقطنى ان تلاقي الكلام ده بيتقال فعلا من الطرفين .. يا اختي بتتامري على ايه هو حد لاقي جواز الايام دي !!!
وتلاقي واد كده اهبل ما يسواش والله فى سوق الرجاله فى ذمتي يعنى 3 مليم .. وبيقولك ياعم ده البنات دلوقتي الخمسه بقرش ما نتامرش ليه ولمؤخذه يعنى

ينفع كده ؟؟

ينفع يبقى فكرنا كده يا ناس عن الجواز وعن العيشه والى عايشنها ؟؟؟

ده غير طبعا احساس البنت الى تكون مخطوبه مثلا قبل كده فى تاني خطوبه مطلوب منها انها تطاطي رسها وتاكل بالجزمممممه لحسن دي تاني خطوبه وما عادش حد هايعبرها بعد كده واصلا ما عدش فى حد لاقي عرسان

والمفروض ان البنات كلهم واهاليهم يبقوا بالظبط عاملين زي نبيله السيد لما كانت بتقول عريس يا اماااااااي عريس يا امااااااااااي ..

ده حتى نبيله السيد كانت بتقوله طخه بس ما تموتوش ... دلوقتي الاهالي بيستهبلوا ويستعبطوا ويقولك احنا بنشتري راجل ... طب وهو فين الراجل ؟؟؟

لما واحد يروح يتانتخ فى الكرسي كده ويقول لابو العروسه شوف انا اصلا ما كنتش عايز اجوز الواد دلوقتي بصراحه كده كان بدري عليه (24 سنه ) بس يعنى وصلنى انكم عايزينه لبنتكم ( الله يخربيت الحريم الهبل كلهم )
وما دام بقى هى الحكايه كده انا كفايه عليا انى عملتله شقه وانتم بقى عليكم الباقي   انا ابنى لسه باديء حياته ومش معاه فلوس
وبالنسبه للشبكه وكده والله  هما 3 الاف جنيه الى معانا عايزين تزودوا زودوا انتم

وكانت النتيجه انه بعد ما خلف منها عيلين رماها فى الشارع حافيه وبهدوم البيت بعيالها وقالها روحي لابوكي كده ويكون فى معلومك هايجيبك ليا تاني ..

ايوه طبعا لازم يحس ان بنت الناس الجميله الجامعيه الكمل دي رميه مش اهلها عاطينه فرش شقه كامل ودهب بعشر الاف جنيه وفوق البيعه عروسه ؟؟؟

شوفوا المسخره القائمه دلوقتي فى مواضيع الجهاز والجواز ده لازم تنتهي

انتم فاهمين التيسير فى المهور غلط ...
التيسير فى المهور انه لما يجيب شقه ويفرشها وتعجب العروسه تقوم العروسه تقوله بلاش مهر عشر الاف خليهم خمسه بس

انما العريس الراجل  يعنى الى رايح يتجوز حضراتكم لازم يكون يقدر يجيب شقه ويفرشها  والى مش يقدر انشاله عنه ما اتجوز قلة احسن

ويكون فى معلومات حضراتكم فى شقه ايجار وتتفرش بعشر الاف جنيه واقل
وفى شقه تمليك بنص مليون جنيه وتتفرش بزيهم واكتر

التتيسير انك ترضي بالى هو يجيبه او ما ترضيش حقك برضه
انما مش التييسير ان اهل العروسه هما الى يجيبوا فرش الشقه اصل حرام كفايه عليه جاب الشقه

وكمان يبقى ابوه الى جايبله الشقه والاخ داخل بصحته بس ما ينفعش ده كلام فارغ ومسخره ومطلع جيل من الانطاع والاتكاليين

الكتالووووووووووووووووووووج (بعد اذنك يا د . اسلام ) الكاتلوج شرع ربنا

بيقول  من استطاع منكم الباءه فليتزوج

مش من استطاع اهله ولا من استطاع اهل مراته

وعمر بن الخطاب لما جه يحدد المهور عشان المغالاه  طلعت الى قالتله مش شغلك وصدق هو على كلامها


لو كنا نسيب الامور تمشي طبيعيه كانت هاتمشي انما التدخل السافر بتاعنا هو الى بوظ الموضوع

اجيبلكم التدريج حصل ازاي

الاول والصح والمفروض .. كان العريس بيجهز جهاز معقول فى اوضه فى بيت ابوه حتى ولا شقه متواضعه بالايجار ويدفع مهر ويجيب شبكه كمان  .. بس كانت العروسه تروح بقى بيت جوزها وهى محمله هدوم وهدايا من اهلها كل واحده على حسب مقدرة اهلها بقى وكانت دي مدعاه للتفاخر بين العائلات ( والتفاخر ده بقى الى جايبنا ورا لحد دلوقتي)

بعد كده نداءات بتيسير الزواج والتخفيف من المغالاه فى المهور

بقى العريس يدفع مهر بس العروسه تجهز منه لنفسها  ولما كان جهاز العروسه ده  شارياه بالمهر الى هو من حقها وملكها ... بدأوا يكتبوا قائمة المنقولات الى تثبت الكلام ده ان الفرش ده مهر الزوجه وبتاعها وحقها

بعد شويه  اتحور الامر لان المهر الى العريس بيدفعه اصلا ما يجيبش كل الفرش وهو بكل بساطه بيدفع ويقول لابو العروسه كمل انت بقى مش معايا الا كده وبعد ما كان الى يجيبه ابو العروسه فوق البيعه ويشكر

لا بعد شويه بقى حق مكتسب والعريس يقعد يتامر ويقول التنجيد وحش الستاير دي نوعها اي كلام وكل هذا الهبل

عندنا دلوقتي ما حدش بيدفع مهر انما العريس بيتفق مع ابو العروسه ان العريس هايجيب نص الفرش وابو العروسه النص التاني

وبقى العريس كمان يقل ادبه ويزعق ويقول تجيبوا ده ما تجيبش ده ويقول مش ماضي على قايمه
وامضي ليه  عشان تمسكوني من رقابتي .. وتمسكوني ليه ما انا امسكم انا

وتحول الامر لحرب مش جواز .. وبقى كله قرف .. قرف .. قرف

ليييييييييييه عشان نسينا الكتالوووووووووووووووووووووووووج

يا بنات
الكتالوج بيقول ... تقعدي فى بيتك معززه مكرمه .. والى يتقدملك لو عجبك من حقك انه يجيب شقه ويفرشها بشكل يرضيكى .. ويدفعلك مهر كمان انتى ترضيه .... وغير كده يا بت منك لها ما ترضيش وما توافقيش وما تعبريش ... وقولي لامك وابوكي القاعده فى الخزانه ولا الجوازه الندامه
  ان ما كانش راااااااجل ويعرف يجوز نفسه ويعولك ويعول عياله منك يبقى بلاش منه .. الواحد اعصابه تعبت من التفقيع قصاد شوية عيال ما بيعرفوش حتى يعولوا نفسهم

مش باقول طبعا للبنات يضربوا عليوى ويبهدلوا العرسان لا بالعكس انا مش عاجبنى كل الكلام الى بيحصل ده وفى مره تانيه هانتكلم عن جهاز العرايس عشان الموضوع طول اوي

فهمتوااااااااااا يا بنات ؟؟؟

الثلاثاء، 16 نوفمبر، 2010

اضحى سعيد عليكم يارب

كل سنه وانتم طيبين يا شعب البلوجر الكريم

ويارب يكون عيد سعيد عليكم وينعاد عليكم بالخير يارب السنه الجايه ونكون جمعا فى الحج السنه الجايه

وربنا يسعدكم يارب كلكم ويجمعكم على الخير يارب دايما مع اهلكم وحبايبكم

ووصيتى لكم زي كل عيد

عيدوا كويس وافرحوا واتبسطوا واجلوا كل المشاكل والخلافات والازمات يومين ثلاثه ما يجراش حاجه والله

وزي كل مرررررررره برضه اقولكم العيد فرصه كويسه  وحجه حلوه اوي عشان الى مخاصم حد يصالحه والى مزعل حد يقوله حقك عليا  انتهزوا الفرصه دي واوصلوا ما قطعه الشيطان

وما تحفوش اوي فى اللحمه والفته عشان اللحمه غاليه وانتم عارفين الظروف

وكل سنه وانتم طيبين يا اصدقائي الاعزاء
وشكرا من قلبي على انكم موجودين فى حياتي

الخميس، 11 نوفمبر، 2010

انتخابات غير واعية .. فى الفصل


اولا كل سنه وانتم طيبين وربنا يعود عليكم الايام بالخير يارب .. وتاكلوا لحمه كويس بقى فى العيد ده وتعملوا محشي كمان عشان الطماطم رخصت يعنى هيصه بقى

ثانيا موضوع البوست

الانتخابات .. اوعوا حد يفهمنى صح .. انا هاتكلم على انتخابات الفصل عند مريم  بنتى.. من حوالي 3 اسابيع مريم جت قالتلى انهم عملوا انتخابات فى الفصل على رواد الفصل كالعاده

مريم : عملنا يا ماما انتخابات فى الفصل النهارده

انا : كويس مين فاز  ؟

مريم باسف : واحد من الولاد

انا : اممممم وهو مين الى كان داخل من البنات ؟

مريم : نها يا ماما ...( وهنا تتفتح حنفية الرغي ما تتقفلش )

بس هى الاصوات بتاعتها كانت اد الاصوات بتاعة محمد علاء  .. بس المستر عمل بينهم مساباقات عشان حد فهيم يكسب

انا : اممممم.. وانتى ما رشحتيش نفسك يا لولو ..

مريم باسف واحراج : رشحت يا ماما بس ما فزتش ..خدت عشر اصوات بس

أنا : طب كويس يا مريومه برضه ماهو نص البنات اهو هاتنهبي

مريم : بس عارفه يا ماما انا كنت مرشحه نفسي فى الرائده الاجتماعيه ... تعرفي نها خدت اعلى اصوات من البنات .. مع ان يا ماما نها دي اصلا صوتها مش بيطلع .. حتى الاسبوع الى فات مقلمتها ضاعت والداده قالت انها ودتها اوضة الوكيله ... ما رضيتش تروح هناك وحدها وانا الى ورحت جبتهالها .. واحده مش عارفه تعمل حاجه لنفسها هاتعمل ازاي للفصل ؟؟!!

انا : طب ليه يا مريم ما رشحتيش نفس رائده فنيه .. انتى فنانه كبيره يعنى (صحيح بترسم حلو اوي )

مريم :  يا ماما هما اصلا مش فاهمين حاجه .. انتى عارفه مين فازت فى الرائده الفنيه ؟؟ مريهاااان !!!

انا : طب وايه يعنى مالك كده حاقده من جوات قلبك .

مريم  وهى بتضحك : لا يا ماما والله مش حاقده بس مريهان دي ما بتعرفش ترسم اصلااااا ولا تعمل اي حاجه فنيه .. دى بتيجلى انا ومنار نرسم لها فى حصة الرسم .. يبقى  ازاي ترشح نفسها لرائده فنيه وازاي هما ينتخبوها ؟؟؟

انا : بصي يا مريوم انتى عندك حق هما غلطانين بس انتى ما تقدريش تتحكمي فى الناس ورايها ... حتى لو كانوا هما غلطانين عارفه ايه هايحصل ؟؟

هما هايلاقوا ان الرائده الاجتماعيه مش اجتماعيه والفنيه ما بتعرفش ترسم والثقافيه مش عارفه مالها فهيعرفوا  غلطهم .. والمره الجايه لما يجوا يختاروا هايختاروا صح او هيحاولوا يختاروا صح
بس المهم انهم يتعلموا يختاروا .. صح ولا لا
مريم : صح .. بس المفروض كان المستر علمهم بقى يختاروا ازاي قبل ما يبدأوا انتخاب  صح ؟

أنا  وقد افحمتنى : اه فعلا كان المفروض برضه يلفت نظرهم ... بس احتمال هو فكرهم عارفيه

مريم وهى مش عاجبها تبريراتي للمدرس : امممممم .. طيب .. اصلا كله اي كلام  الى مترشحين مش عارفين حاجه والى انتخبوهم كمان مش عارفين حاجه (حصلها زي ما حاصلنا كلنا البنت يا عينى )

ثم استدركت قائله : ماما احنا هانتغدى ايه النهارده ؟؟

انا  وعلى وشي ابتسامه شماته : سمك مشوووووووووي

مريم : اااااااااه طيب ... ماما ينفع انزل اجيب فطير من المخبز ؟؟

انا : نوووووووووووووووووو .. هتاكلي سمك ..

مريم وهى منصرفه : يوووووووه بقى .. طب يلا بسرعه عشان جعانه

.............................................

مرشحين ما بيعملوش حاجه  .. ومش داخلين عشان يقضوا مصالح الفصل

منتخبين اساسا ما يعرفوش يختاروا

بس الفرق بين انتخابات الفصل وانتخابات الى مش فصل ان فى ايد فوق بتلعب الشطرنج

امبارح وانا ماشيه فى الشوارع اشوف المهازل القائمه بدعوى  دعايا انتخابيه .. بجد كنت عايزه اعيط .. ايوه على الى وصلنا له

تعالوا اتفضلوا عيطوا معايا الكلينكس كتير ولله الحمد