السبت، 31 يوليو، 2010

بري امي وانا سيدك

احبائي المدونين الاول انا اسفه انى خضيتكم البوست الى فات والله ما كان قصدي فعلا حتى انا كاتبه العنوان كابوس عشان تفهموا الموضوع

بس صدقا كنت مضايقه اوي ولسه صاحيه من الكابوس بجد وكتبت كده على طول طاخ كنوع من الفضفضه معاكم

المهم

ندخل فى بري امي وانا سيدك بقى

انتم عارفين طبعا ان ربنا اوصانا ببر الوالدين وخص الام بمكانه اكبر
والاحاديث والايات معروفه طبعا فى المجال ده واحنا كلنا حافظينها صم

اه حافظنها بس مش فاهمنها كالعاده

ايه هو بر الام وبر الاب؟؟

مين الى يبرهم ؟؟
انت يا ضنايا الى تبرهم

ايووووووووه انت تبرهم وتحسن اليهم فى المعامله والعطاء المادي وكله

انت    نقول كمان انتتتتتتت

انت الي مطلوب منك تخدم امك وابوك او انتى طبعا

ايووووووووه

انتى الى مطلوب منك كبر لوالدتك انك تزوريها  وتخدميها وتضحكي فى وشها
مش جوزك

انت الى مطلوب منك تخدم امك وتصرف عليها وتضحك فى وشها وتزورها او حتى تشيلها على راسك رايح جاي

انتتتتت مش مراتك

مليون مشكله يا ناس قدامي بسبب الخلط فى  الموضوع ده

كل واحد متجوز

عايز مراته تخدم امه وتدلع فيها وتضحك فى وشها ومافيش مانع كمان تكون بتشتغل وتساعده عشان يعرف يصرف على امه

من الاخر يعنى تبر امه بداله

لو امه تعبت يعمل فيها خمسين راجل فى بعض وتعالى يا ماما عندي كلا الفته لايمكن يحصل ويجيب مامته يقعدها عنده فى البيت ومالوش دعوه بقى
مراته تخدمها وتمرضها وتخدم اخواته لما يجوا يزوروها
وكل ده غصب عنها وفرض عليها

ايييييييه انتى عايزاني ارمي امي ؟؟

لا طبعا ما حدش قالك ترمي امك اطلاقا

بس انت عايز تبر امك طيب برها انت مش تخلي مراتك غصب  عنها تبرها
وتبقى ماشي بمبدأ هات حسنه وانا سيدك
او بري امي وانا سيدك
طيب افرض مراتك ست محترمه وبنت ناس وبتحبك وهاتخدم امك بعنيها عشان خاطرك  حتى لو كانت امك مسحوبه من لسانها ويتفات لها بلاد .. تبقى كل يوم يا شاطر تبوس ايد مراتك وتبوس راسها وتشيلها على راسك عشان هى بتعمل ده بدالك وبتعمله لوجه الله فضل منها مش فرض عليها

أي حد هايجى يقولي ان خدمة الزوجه لام زوجها فرضها هايبقى جنى على نفسه ولعب فى عداد عمره

الى فرض عليه خدمتها ابنها او بنتها الى بتيجى اخر الليل تتمختر وتقعد تتضايف وتقل ادبها كمان بكلمتين ماسخين تفور دم مرات اخوها بها

وكمان الزوجات
ربنا قالك بري امك وزوريها ايووووووه تمام
بس ما تغصبيش على جوزك يروح لاهلك خلاص مش عايز يجى رييييييح
فرض عليكى انتى مش عليه

ولا من حقك تدي لاهلك فلوس من فلوس جوزك الا باذنه الا لو كنتى بتشتغلي طبعا ده موضوع تاني

وهكذا يا جماعه
صدقا مشاكل بالهبل

كانت فى واحده هبله مره عامله مشكله مع جوزها عشان ليه ما بتجيش معايا عند ماما اسبوعيا وتبات معايا هناك كمان يوم ؟؟!!! ليه  مش فاهمه الصراحه المخ الغريب ده

وواحد تاني قالي انا طلقت مراتي ... اتخضيت  ليه كده يا سيدى الفاضل ... قالي تخيلى امي صحتها تعبت شويه فقعدنا انا واخواتي (هما ولدين وبنت)  ان احنا كل واحد يتكفل بطبيخ ماما عشر ايام فى الشهر

قلتله طيب تمام  ايه المشكله

قالي هى رفضت وقالت لا ما اطبخش لحد

طيب هى حضرت معاكم الاتفاق ده ؟؟ قالي لا
قلتله امال انت بتتفق انت ليه هو انت الى هاتطبخ ؟؟!!!

المهم قالي بقى حصل مشاكل وانتهت انها راحت بيت اهلها وانا رميت  عليها اليمين خلاص

بقالك اد ايه
قالي 6 شهور
طب مين بيطبخ لوالدتك دلوقتي

قالي انا طبعا وباعملها احسن اكل وقلت لاخواتي كمان عنكم انتم انا هاطبخ لها على طول

الله طب ما كانش ينفع يعنى تبر امك انت وتقولها خلاص يا ستى ما تطبخيش انتى وتبقى تطبخ انت لامك وخلاص ؟؟
مش يمكن كانت اتكسفت مراتك وقتها وقالت لك عنك يا سبعي ؟؟!!!

قالي لااااااا يمكن انا لااااا يمكن ابقى مش راجل فى بيتى وما اعرفش امشي كلمه على مراتي ( غصب يعنى )


وطبعا مش الام بس الى عليها المشكله والاب برضه

والحلاوه بقى تلاقي ولادهم البنات الى اولى بخدمتهم
هما الى بيتكلموا وبيحاسبوا مرات اخوهم ازاي ما تخدميش امي ولا ابويا

وتلاقي كمان الزوج بكل بجاحه وقلة ادب يقولك وانا اخدم امي ولا ابويا ازاي هاطبخ لهم واغسلهم يعنى
الله امال يعنى هى كانت خدامة اهلك ؟؟

ولو قعدت احكيلكم من هنا للصبح على مشاكل من النوع ده  صدقوني مسخره
صدقونى فاهمين بر الوالدين غلط
صدقوني فاهمين الدين غلط والدنيا غلط والجواز غلط والقوامه غلط

صدقوني كل ما باقعد اتفرج على مشاكل المتجوزين بابقى عايزه اولع فيهم

تعبت صدقا

لا ستات بتفهم ولا رجاله عندهم احساس ودم ولا أي حاجه  بذمتكم انتم شعب عايز يتربى من اول وجديد وانا زهقت منكم على فكره

 ملحوظه تحطوها حلقه فى ودنكم : بينى وبينكم الكتالوج .. كتاب ربنا وشرعه
الى هايختلف معايا فى الراي يعمل حسابه على كده
مش عايزه مناهده فى الفاضي

الأحد، 25 يوليو، 2010

الكابوس

كنت قاعدة فى مطعم ومعايا ولادي وكان فى فى المطعم ناس كتير


غيرنا  وبعدين مريم قالتلى يا ماما شوفي العربيه الى ماشيه هناك


 دي بيلفوا ويبصوا على هنا كل شويه قلتلها مالكيش دعوه يا ماما بحد عادي
بعد شويه وقفت العربيه بكسره مفاجأه على باب المطعم الزجاجي ونزلوا منها بسرعه اربعه منهم بنت
وبسرعه انتشروا حوالينا وطلعوا كلهم اسلحه بيضا وقالولنا بهدوء كده كل واحد يطلع الى معاه فلوس موبايلات ساعات ومن غير اي دوشه عشان ما حدش يتاذى
بصيت على ولادي وشوفت الرعب فى عنيهم قلتلهم اقعدوا ما تخافوش هما هايمشوا دلوقتي

وبدأت  اطلع الحاجه من شنطتي ولقيت معايا موبايلين فكرت اطلع واحد وبالتاني احاول اتصل على البوليس
بعدين فكرت... بوليس ؟؟ طب هاتكلم ازاي ولو اتكلمت اصلا هايجوا ويعبرونا ولا لا
ولو جم هايجوا  امته
طب اكلم مين ؟؟ اكلم جوزي  يتصرف ؟؟

ضربات قلبي كانت سريعه جدا جدا وكنت مرعوبه جدا وخايفه على ولادي جدا

ولقيت جوزي بيخبط على كتفي وبيقولي اعمل حسابك فى الشاي؟؟

صحيت من النوم بصيت حواليا ولقيتنى فى بيتى الحمد لله
وقلتله ماشي

بس لسه قلبي بيدق بسرعه والخوف والرعب مالينى

والاكتر والاكتر المراره فى حلقي زايده

عارفين ليه ؟؟
لان ده ممكن يحصل
ايوه بكل بساطه ممكن يحصل 
ومش هانلاقي  حد ينجدنا

لا هانقدر نعمل زي الافلام الامريكاني ونتصل بالنجده  يجوا بعد دقايق

ولا حد فينا اصلا هايبقى له تمن لو مات ساعتها

مش عايزه اشوف الخوف فى عيون ولادي واعجز انى اطمنهم

يارب ما تكتبهاش علينا وارحمنا



الجمعة، 23 يوليو، 2010

ملخص لقاء المنصوره

كان  ياما كان كان فى ناس عملوا تبرع بالدم ولقاء وبعدين ندور علىالدم يا اخوانا لا ممكن مش لاقيين دم يا جدعان طب شوية دم
يا جمعه طب كل واحد نص كوبايه  بلاش نص لتر لا ممكن ابدا ابدا

هههههههههههههههههههه

ايوه والله هو ده الى حصل النهارده

الاول حقيقى اليوم كان هادي وجميل فعلا وميرسي يا ساره على التجميعه الحلوه دي بجد

نحكي بقى  على الى حصل

طبعا احنا اتقابلنا عن المستشفى الساعه عشره
انا روحت لقيت هناك ابراهيم  ودعاء سلطان  قلتلهم اه يا خوفي منك يا بدران شكلنا هانبقى احنا بس
هههههههههههه

شويه بدأنا فى الاتصال بالناس وبدأوا يجوا

جت ساره طوبار وامجد القهوجي وتوالي باقي الحشد الى هاقوله لكم دلوقتي

ساره طوبار محاولات للبحث عني
امجد القهوجي  (مش فاكره اسم المدونه  :)
اسماء   مدونة حفلة تنكريه
محمد الغرباوي  رحلة بحث
ابراهيم العدوي  كأنى اتكلم
دعاء سلطان مجرد حلم صغنتوت
سما  ليساندرا
ايناس  نهر الحب
نسمه  (برضه نسيت  اسم المدونه :)
 داليا   قوس قزح
استاذ شرين الكردي
ألاء   ستيل سيرشنج
وهيثم المغنى الجميل وعازف العود الى ساره دعته والى ظبطنا الحقيقه

المهم يا جماعه هذا الجمع الغفير لما روحنا المستشفى والى انا روحت عملت هنا مولد وقلتلهم احنا كنا المره الي فاتت 30 واتبرع مننا 25 وده حقيقى طبعا

قوم كاااااااام واحد نفع يتبرع مننا

والنبى قولوا انتوا ........

واااااااااااااااااحد  اه والله وااااااحد

امجد القهوجي  ودى صورته بعد الانتصار العظيم واحنا خارجين المستشفى

وانا صورته وقلتله لازم نصور الضحيه الوحيده والى خدنا منه الدم الوحيد النهارده
واظاهر يا جماعه انه قرر يتبرع  مجاملة لساره  وجايز تحت ضغط وتهديد بقى ما نعرفش خطيبها بقى ومالناش دعوه

المهم طلعنا بره المستشفى كانت وصلت داليا واستاذ شرين خدناهم ولان الجو كان ربيع وبديع وكان بيتساقط علينا عرق الشعوب  يا كامليا
قلتلهم لو ما شوفتوليش حالا بالا مكان مكيف نقعد فيه هاتضربوا لان فاضل ساعه على الصلاه

المهم مشينا ندور على اي كافيه يلمنا

والحمد لله لقينا وطلع كافيه لطيف والله  وقعدنا نرغي  بقى كلنا مع بعض  وبعد شويه راحوا الرجاله يصلوا واحنا كحريمات والجو لطيف بره صلينا فى الكافيه

البنت الى شغاله فى الكافيه عطفت عليا وخلتنا صلينا فى اوضه كده تقريبا مخزن والحقيقه كانت فرصه لطيفه انى اعرف ان بقى فيه شيشه بطعم الكابتشينو  .. ايوه قعدنا  انا وسما ودعاء نلعب بقى وكده وكان فى علب قعدت اتفرج على نكهات الشيشه الحقيقه العلم اتقدم ما كنتش اعرف ان كل دي نكهات شيشه فى الدنيا

وبعد الصلاه كان جه هيثم  والى سجلتله اكتر من اغنيه وللاسف الشديد المريع مش لاقياهم معقوله اكون انا هبله وما حفظتهمش ولاايه مش عارفه والله

بجد يا هيثم انت صوتك حلو اوي وبتغني كلمات جميله وسمعنا كذا اغنيه كلمات امجد وبجد حلوين اوي

وفى اغنيه منهم عيطتنى وداليا قالتله بسسسسسسسس شهصينا شويه اصل خلاص عيط الناس 

كان وقت بجد جميل

ومريم بنتى كانت معايا ولزقت لسما لازقه ميه ميه وعاشوا حياتهم فى التصوير بقى والرغي لما قالوا بس 

بعد كده نزلنا اتغدينا  فى مطعم اول مره اسمع عنه الحقيقه تقريبا انا مش من البلد دي  اسمه بهجت وسمير يعنى برضه تيك اواي وكده

واستمرارا لبرنامج الرغي عااااادي برضه  خصوصا ان داليا كانت قاعده جمبي

والمطعم الحقيقه كان له فيو جميل اوي على النيل  بس الماساه بقى حاجتين
الشمس الى كانت لافه المكان فاضطرينا نقفل الستاير

والمصيبه بقى فى الستاير انها حمراااااا والحيطان برضه اغلبها حمراااا  والترابيزات حمرااااااااا

حتى استاذ شرين كان بيقول حاسس ان اللون الاحمر ده محرر الدنيا  هييييييييه ما علينا بس كلنا يعنى ما سبناش

وانا خلصت بقى قبلهم وقعدت اصور فيهم اتسلى عليهم

ده ابراهيم وهو واقع جوه ازازة الكاتشب



وده الغرباوي  وهو بياكل بيتزا


اي خدمه يا شباب  احب التصييح موووووووووووت

وطبعا انا باعمل الواجب ده مع الشوباب بس

البنات بقى هاتفرج على الصور لوحدي ( وش مطلع لسانه )

وبعد الغدا على طول نزلنا وقالوا هايركبوا مركب
الحقيقه انا كان عندي ظروف قلتلهم يا جودعان انا هاروح بقى
وداليا كانت هاتقتلنى الحقيقه بس غصب عني
الى عرفته انه بعد ما انا مشيت ما عرفوش يركبوا مركب
وداليا واستاذ شرين لقوا الوقت اتاخر وروحوا

وباقي الناس كمان بعد شويه روحوا

لكن الحقيقه هما لما لقوني مشيت قالوا الحياه مالهاش طعم من غيري وروحوا

نيهاهاهاهاهاهاها

الحقيقه وبكل فخر
على مستوى التبرع كان تبرع فاشل وجميل
ههههههههههههههههههههه
معلش يا ساره دي الحقيقه ماليش دعوه

اما كلقاء وصحبه حلوه بجد حقيقى كان جميل  اوي اوي

فاتيما وخالد زعلانه اوي اوي انكم ما جيتوش تحسوا اركان اللقاء متغيبه
وخيخه الندله ما ردتش  على اميلى حتى هاموتها ان شاء الله

وكل  الناس الى قالوا جايين وما عرفوش يجوا خيرها فى غيرها

والبت ريم مش هانساله الموقف ده وهاحرمه من المسقعه والغريبه واشياء اخرى طول العمر

بس خلاص كفايه كددددده انتم رغايين بشكل لا يطاق

كان معكم مراسلكم من المنصورة

الأحد، 18 يوليو، 2010

تبرع بالدم فى المنصورة

اعزائي المدونين

ان شاء الله تعالى هايكون فى تبرع بالدم فى المنصوره  يوم الجمعه الجايه الموافق 23/7/2010

وبدعوه من رحيل  محاولات للبحث عني  وبالتنسيق مع بنك دم المدونين 

وان شاء الله بعد التبرع هايكون فى لقاء للمدونين

خيخه يا منقطعه هانعمل التبرع من غيرك ولا ايه ما ينفعش هاستناكي

وطبعا اي لقاء ما ينفعش من غير خالد همس الاحباب وفاتيما وداليا قوس قزح لازم لازم اشوفكم

الحقيقه هو كان فى الاول الفكره اننا كنا هانتقابل  مجموعه صغيره كده فى الخباثه مع ايناس الى جايه المنصوره الاسبوع ده

بعدين لما فضل المعاد يتاجل ليوم الجمعه  ساره رحيل قال خلاص ما دام جمعه نخليه تبرع

وعليه بدأنا فى الاعداد للامر لسه بقى شويه على ما نعرف تفاصيل اللقاء وترتيبه ومواعيده وكده


وان شاء الله نوافيكم بالتطورات والمواعيد اول ما نعرف حاجه يا حلوين

الى ناوي يجى يحاول يقولنا من فضلكم يا قوم  عشان بس يبقى عندنا تصور كده لعدد الى هايكون معانا


السبت، 17 يوليو، 2010

الشحاتين اهما


ازيكم يا  اصدقائي

النهارده عايزه ارغي معاكم فى موضوع خانقنى بشكل مش معقول خصوصا اننا على اعتاب ذروة انتشاره
الا وهو يا اصدقائي  الحلوين الشحاتين

الحقيقه انا بقيت امشي فى الشارع وحاسه ان الشعب كله بقى شحات ولله الحمد والبركه فيهم ربنا ياخدهم

انا عارفه كويس ان الحاله الاقتصاديه زفت والناس تعبانه ما قلناش حاجه

بس الحكايه بقة فوق العاده يا جماعه

تلاقي واحد شحط طويل عريض يجر عربيه بطوله ورايح يشحت

والمصيبه السوده ان الناس بيدوله
طب لييييييه

جوزي بيقولي كان فى واد بيعدي علينا كده كل فتره ينضف العربيات ويلمع وكده ويجى ياخد الى فى النصيب من الكل
حاليا بقى بيجى يقول كل سنه وانت طيب يا بيه  معلش اصل مش قادر انضف النهارده
واصل اخويا واصل ابويا والرويات تشتغل

كان فى واحد تاني بيعدى شايل سبت زبادي على كتفه وبيبيع زبادي ومعاه زماره حاليا ماشي بالزماره بس وبرضه بيبيع كل سنه وانت طيب يا بيه

كان فى واحده مصدعاني ومش عارفه ايه حدفها عليا تيجى تخبط وكل مره
تحكيلى مأساه شكل وكله كذب وانا عارفه ومره على  التانيه وهى ست يعنى فى الثلاثينات مثلا وما شاء الله شكلها صحتها كويسه فقلتلها من غير ما تحكيلى قصص تعالي كل اسبوع نضفي سلم البيت وانا اديلك الى انتى عايزاه وزياده

تخيلوا قالتلى ايه ؟؟!!!

لا انا ما بامسحش سلالم
وما زالت بتيجى  تخبط بس عنتش باعبرها

خلاص الشعب ناوي يانتخ عن العمل وقالك الشحاته حلوه ياعم  وبتجيب فلوس ومن غير دوشه ولا شغل ولا حاجه
ماشي يلف ويلم فلوس وبس


عارفين عندنا هنا فى وسط البلد سوق زي الموسكي كده بس على صغير يعنى تخيلوا بقى حضراتكم ان فى جروب كامل من الشحاتين بيمشوا كده سواحين على البلاد

ومقسمنها كل بلد يوم
يروحوا السوق الرئيسي كده ويمشوا على التجار يلموا النقطه
قصدي يشحتوا يعنى

وايه بقى بتناحه وقلة ادب وصفاقه ومش باخد فلوس فضه وربع جنيه اعمل به ايه وحاجه اخر مسخره

طب وبعدين ؟؟؟

كده الشعب كله هايتحول لشحاتين قريب ونبقى نغني ونقول الشحاتين اهما بقى  

لا وفى بقى قصص مبتكره للشحاته او بالاحرى النصب
الى يجى يقولك انا جايلك  من طرف الحاج فلان وبنلم فلوس لفلان وطبعا بيقولك اسامي مثلا من جيرانك كده يعنى  وبيدخلوا البيوت كمان


اظرف حاجه بقى  لما واحد راح لجوزي يقوله انا  اخوك فى الله فلان
وانا كنت تاجر وفلست وقصه كده طويله  عريضه  وايه بقى ؟؟
كان مسطول ... اه والله يا جدعان كان مسطول ورايح يقوله انا اخوك فى الله ومربي دقنه وكده
واول مره قلنا ان بعض الظن اثم جايز هو الى عنده تخلف عقلي  لكن عشان كان مسطول تاني يوم راحله تاني وهو ناسي انه جه هنا قبل كده طبعا ما هو كان مسطول  وراح قال نفس الكلام بس بقى يومها كان فايق
شوفتوا الحلاوه ؟؟


العيال الصغيرين فى المناطق الشعبيه تمشي  تلاقي عيل بيقولك هات جنيه يا عمو وياخدوا ويروح يجيب شبسي يعنى مش ميت من الجوع الولد

ايه بقى ؟؟ اخرتها ايه

مين الى غلطان يا ناس فى الموضوع ده

مين غلطان ؟؟

فين محاضر ا لتسول ؟؟؟

فين  الكرامه الى كانت فى نفوس الناس

فين الوعي من الناس الى بتدفع للناس دي وتساعدهم على التنبله والبطاله ؟؟

احنا داخلين على رمضان  وانا عارفه ان ده الموسم بتاعهم ده هما انتشروا من دلوقتي اصلا

ارجوكم فى وجوه خير كتييييييره اوي والناس المحتاجين فعلا جوه البيوت تحسبهم اغنياء من التعفف

فارجوكم شحاتين الشوارع دول ما حدش يعبرهم

دول محترفين شحاته بالاحرى نصابين

ولولا انهم لاقيين الادين كتير بتتمد لهم ما كانوش سابوا اشغالهم وقعدوا يشحتوا

ارجوكم فكروا ان كل قرش هنتحاسب عليه حطناه فين

المحتاجين كتير والفقرا كتير واوجه الخير ومصارف الزكاه كتير كتير كتير

ارجوكم ما تربوش جيل من الشحاتين

يا ناس ده احنا انتشارنا فى الصين خلى الصينين يشحتوا بالعربي

الصينين المسلمين ماشيين فى المناطق المنتشر فيها العرب ولما يلاقوا واحد شكله عربي يقولوا مسلم مسلم وبيشتحتوا

 يعنى ولله الحمد هاتبوظوا العالم كله مش الشعب بس

شوية عقل يا اصحاب العقل

الاثنين، 12 يوليو، 2010

وأنا معاك

وانا معاك ...باحس ان زي نور الشمس

صحيح  منور.... بس عنينا اوقات تتوجع منه

باحس انى جنتك.... بس كتير احس انى نارك

باحس انى طايره جواك ... بس محبوسه جوايا

جواك... بابقى عصايه سحريه .. بلمسه منها الاقي قلبك منور

ما بقيتش عارفه انا لك شط ولا بحر

ما بقيتش عارفه أنا  سعاده ولا شقا

يا ريتنى اهرب يا ريتنى ابعد

يا ريتنى اقرب يا ريتنى ضلك

ما بقيتش عارفه

******************************

ملحوظه هامه يا قوم : دى انا مش عارفه تصنيفها ايه الحقيقه
عشان بس ما حدش قولي ده شعر مفركش وكده

هما كلمتين نطوا فى دماغي  كتبتهم ومن زمان

وبما ان وندا مسميانى شجرة  الدر وبتدلعنى دردر

فممكن نوصف الحاله العامه للكلمتين الى فوق دول بالعباره دي :

التردد .. التردد يا عزيزي ايبك ... مرض الجنس البشري