السبت، 27 فبراير، 2010

انا نوتي الفتانه


هالوز عليكم

طبعا انتم فاكرني صبرني

هع هع لا انا مش صبرني

انا قرينتها

نيهاهاها هاها نيهاهاهاهاها

صبرني فين ؟؟ لا مشغوله مش فاضيالكم عقبال عندكم بتجهز عشان تبيض الشقه

وانا انتهزت الفرصه دي عشان اجي بقى ارغي مكانها شويه وبالمره افتن عليها كام فتنه كده اصلها خنيقه وخنقاني الحقيقه

اه لسه ما عرفتوكش على نفسي

انا اسمى نوتي الفتانه
عندي 18 سنه ........ اااااااااه بس امال انتم فاكرنى قد صبرني ولا ايييييييييه
والى فوق دي صورتي وانا فى كي جي تو

وطبعا باين من اسمي صفاتي الشهيره

وعليه فانا قررت انى افتن لكم على صبرني بقى وهابهدلها
اه نداله بقى .مش انا قلتلكم خنقانى
ده مبهدلاني يا جودعان

طبعا انتم فاكرينها هاديه وعاقله وعماله تكتب كلام عاقل ورزين والى فيكم شافها ممكن يقول فى عقل باله ده شكلها بريء كده وهبله

الحقيقه بقى غير كده خالص هى اينعم هبله مافيش مشكله انما هى مش هاديه اطلاقا وبتاتا البته ده شعنونه على مجنونه رسمي وساعات بتبقى مفتريه اوي .وما بتبطلش زعيق وصريخ طول النهار قدام عيالها الشعانين زيها . وعصبيه جدا وبتهيئلي انها ممكن تاكل دراع أي حد

ولا المطوه الى شايلاها يا خراااااااابي مفتريه اوي

ده جوزها ده بيستحمل بلاوي
وسمعته كذا مره بيبصلها وهى بتتشعنن كده ويقول فى سره
مجنووووونه والله
والقرين بتاعه قالي انه كل شويه يقوله سيبك منها ياعم ما تردش عليها ده مجنونه
اه ما القرين بتاعه صاحبى انتيمى يعنى ياما ضربنا حشيش سوا

وبعدين نفسي تبقى منظمه شويه مجنونه فى كل حاجه ممكن تقعد ترتب فى الشقه ساعتين وتهبطنى معاها راحه جايه وبعدين تنكشها فى نص ساعه هى وعيالها العفاريت

اه هى كمان بتنكش والله وكل ما اكلمها واقولها اتعلمي النظام شويه تقولي باقولك ايه ما تصدعنيييييييييش ما باعرفش اعيش بالمسطره انا

وبعدين انا عايزه افهم هى لازقالكم هنا ليه دى كل ما يكون عندها دقيقه فاضيه تجري تقعد هنا مجنونه دي ولا اييييييه . اقولها اتهدي يا بنتي روحي اقعدي تحت البطانيه وامسكي الرموت وقلبي واتفرجي على أي هلس ادى مخك اجازه وجربي الانتخه . تنفضلي برضه تيجى هنا يكونشي هو ده ادامن الانترنت الى بيقولوا عليه ولا ايه
الادمان شاع فى البلد برضه

ولا بقى ما اقلكوش عندها عقده نفسيه مركبه من التدخين والمدخنين . يووووووووه خنيقه تشم ريحة الدخان فى البنى ادمين من على بعد مترين
ولو شمت دخان نفسه بقى تقعد تكح وتدمع وتصدعنا

وكل ما تكتشف ان حد تعرفه بيدخن تتقفلها يومين على كده وتقولك ما كنتش احب حد باحبه يطلع بيدخن مش انا باقولكم هبله . ما كل واحد حر وبعدين ماله الدخان قشطه حتى وبيدفى الجو
ولا لما تشوف مزه بتدخن يا لهووووووووي تصدعنى بقى دى مزه رقيقه ما ينفعش تدخن وتطلع دخان يع من بؤها ومناخيرها كده .
مش عارفه ايه الهبل ده ما انا باضرب حشيش اهو وباعمل دماغ خيال زي الفل سيبكوا منها بلاش دوشه

ولا بقى اقولكم على الهبل المتقع بتاعها .

الله فرحانه اوي انى بافتن عليها نيهاهاهاها

من حيث الهبل بقى عندها نقطة ضعف هبله اخر حاجه . بتقولك ما عنديش اخوات صبيان وكان نفسي يبقى عندي اهيء اهيء
بتنجان جدا ههههههههههههههههههه
وافضل اقولها يا بنتى كان هايقرفك وانتم صغيرين ويتخانق معاكي ويصدعك مافيش فايده

وبعدين أي حد بقى يقولها انا حاسس انك اختى ويثبتها بكلمتين اخوه من دول . عرق الاخوه ينقح عليها موت وتصدق بقى وتعيش الدور وحاجه اخر هبل

فاكرين الواد الى كان ضحك عليها وعيشها قصة مرض مريعه وياما عيطت عليه سنه ونص فلقتنى كان برضه داخلها من السكه دي واحن اخت واحسن اخت لما فلقنا .
وغلبت اقولها بيضحك عليكى وشكله بيشتغلكم اخر حاجه بس هى كانت بتنفضلي بررررررررررضه هرياااااني تنفيض

وتقولي هو حر حتى لو بيعمل كده حسابه عند ربنا انا ما اقدرش اكذبه

ولعلمكم لسه برضه دي نقطة ضعفها ولسه عرق الاخوه ده بينقح عليها كل شويه
بس اقولكم الحق برضه انا حقانيه هى ساعات بيطلع معاها حق وبيبقوا زي اخواتها بصحيح وناس خنيقه زيها كده برضه


وبعدين اكتر حاجه بتخنقنى منها حنفيات الحنان بتاعتها بايظه خالص عايزه جلده وساعات بتبقى عايزه تتغير اصلا
واي عيل عبيط ممكن يضحك عليها ويقلبها فى خمسه سته لتر حنان ويمشي
خنيقه مووووووووت غلبت فيها اعلمها تكبر الدي وتطنش

وتقول اااااه عندك حق يا بت يا نوتي انا ما عدتش هاعمل كده ابدااااااا لازم اتعلم الطناش والانتخه وانا هاعمل واسوي
وفى الاخر يطلع كل الكلام فاتشه واوانطه وبترجع فى كلامها

ايه تااااااااني ايه تااااااااااني مش عارفه

فكروني افتن عليها بايه كمان

يا خرااااااااابي ده جت جت جت

هاتموتنى من الضرب
مش باقولكم مفتريييييييييييييه

اوريفوار عليكم بقى فوتوكوا بعافيه

لو افتكرت حاجه هابقى اجي تاني

مع تحياتي لصديقى العزيز جولدن الى اوحالي بفكرة البوست

الاثنين، 22 فبراير، 2010

البرادعي .... انا عايزه من ده يا حزمبل


السلام عليكم يا اصدقائي


طبعا انتم عارفين انى ماليش فى السياسه ولا التطبيل اطلاقا
بس انطلاقا من مبدأ
انا من البلد دي
هاتكلم عن البرادعي

اول ما بدأوا الناس يتكلموا فى موضوع البرادعي ويهللوا ويسقفوا وكان تبريراتهم فى كده مش منطقيه بالمره بالنسبه لي عشان نعمل كل ده

وكنت متغاظه اوي اوي من الناس وباقول بطلوا تسقيف وحاولوا تفكروا وتفهموا ولحد الان مش عاجبنى الى بيحصل والتهليل الى فى رايي نصهم مش فاهمين حاجه الى بيسقفوا

بما ان المنادين بالبرادعي تقريبا من الشريحه المثقفه كان نفسي نكون موضوعين اكتر ونقول والله لو البرادعي عايز يرشح نفسه لانتخابات الرئاسه يجى يورينا نفسه ويعرف عن نفسه وفكره وطريقه وبعد كده نتفاهم

انما كان الراجل لسه حتى ما ابداش استعداده انه ممكن يعمل كده واحنا شغالين تطبيل وتهليل . كنا ما نعرفش ايه هى توجهاته ولا افكاره وبرضه بنهلل

كانت كل مؤهلاته الى باسمعها من المطبلاتيه انه كان فى هيئه دوليه وهما يعنى هيختاروا واحد وحش ؟؟؟؟

وده امعانا منا فى نظرية عيش بصمجي وريح دماغك

بندور على حد نمشي وراه ونقول موافقه وخلاص

انا كان املي الوحيد فى البرادعي انه عنده ميزه واحده مهمه اوي اوي انه خارج الحلقه بتاعتهم خاااااااالص جاي من عالم اخر ودى ميزه لنا اه. لكن بتصعب الامور اكتر

شوفت جزء من لقاء له من كام يوم قلت ضاع الامل يا ولدي وحسيت انه مش عارف يتكلم وقلت لا مش ناااااافع شكله الراجل ده

كانت كمان فكرة انه عايش بقاله عمر مقلقه شويه لكن بالمقارنه بالبدائل قلت مين فيهم عاش معانا ؟؟؟!!!

امبارح منى الشاذلي عملت معاه لقاء حبيبتى منى دي يا اخواتي

انا ما شوفتش اللقاء كله شوفت اغلبه ( اه نمت شويه فى النص )

لكن كنت فى اخر اللقاء قاعده باقول هيه هيه هيه وباغنى اغنية سعاد حسنى الخالده

انا عايزه من ده يا حزمبل انا عايزه من ده .

انطباعي عن البرادعي من لقاء امبارح استنادا الى كلامه واحساسي الشخصي

انه محترم وعاقل وفاهم ونضيف

وعن توجهاته وسياسته من وجهة نظري صح ميه فى الميه وهى بتتلخص فى جمله واحده

قبل ما نعمل أي حاجه فى الدنيا لازم الجعان ياكل والمريض يتعالج والباقي كله يجى بعد كده

(ما ينفعش نعمل تنميه فنيه وثقافه لناس جعانه والله يا ناس )

عجبنى جدا جدا رده على منين هاتجيب موارد (اصل مش هانستهبل يا ناس احنا مواردنا مش قليله )

كان فى حاجه واحده قلقاني ا لحقيقه الراجل مستكين كده وهاااااادي خفت وقلت الحكايه مش هاتنفع ولا ايييييييه

اصل الهدوء ده عايز السكينه فى الحلاوه . والحلاوه خلصت من زمان طب ايه بقى

وبعدين بقى فى اخر اللقاء لما منى قالتله هاتقدر تعمل مؤتمر شعبي وهاتقدر تقابل الناس فى بيتك
رد عليها رد جامد جدا
كنت عايزه اقوله زي البت شيما اموت انا فى الراجل الحمش

انا يوم الانتخابات الرئاسيه الى فاتت كنت كل ما اقعد اتفرج على المسخره الى بتحصل واتابع فصول المسرحيه الهزليه الى كانت شغاله

ارفع اديا للسما واقول ياااااااااارب . يارب من عندك حاجه تحصل غير متوقعه . حاجه خارج دايرتهم .

حاجه تخلي خيوط الماريونيت الى فى اديهم تقع ولا تتشنكل فى بعضها وحركتهم تتشل.

تكونشي هى دي الحاجه يا ولاد ؟؟

خلص اللقاء وكلي امل الحقيقه انه باينه ممكن . اه والله ده شكله فى امل لسه . اه اه امل من بتاع زمان ده .

مافيش دقيقه وجه رضا من بره باحكيله اللقاء ( ايوه انا المراسل الخصوصي طبعا )

باقوله منى الشاذلي بقالها اربع ساعات بتتكلم مع البرادعي .
قالي هاااه ايه الاخبار
قلتله حبيته يا اخويا حبيته

قالي خسئتى وبتقوليها فى وشي

وبعدين حكيتله الكلام وانا مفعمه بالامل ( حلوه موت مفعمه دي )

فقام تطوعا كده منه راح محطم امالي وقالي هع مش هايحصل طبعا . الدستور بيقول انه لازم يبوس رجل اعضاء مجلس الشعب والحكم المحلي اولا عشان ينفع يرشح نفسه . ودول بالظبط افراد الفريق اياه بالاشبال كمان

وهكذا استمرت المناقشه يجى ساعه وهو بيحطم فى امالي . وبعدين قالي اوعدك لو غيروا الدستور انا هابقى ارشح نفسي للرئاسه لما افضى

قلتله الللللللللللله طب انا هانتخبك بس تخلينى رئيس الوزراء

قالي لا طبعاااااااااا

قلتله طب خلااااااااااص انا كمان هارشح نفسي ولا حدش احسن من حد اهو حتى لو انت الى كسبت ساعتها تبقى
تخلينى وزيرة الخارجيه زي الحاجه هيلاري اهو حلو مش وحش برضه

قالي هعععع لا يا ماما لاااااااا . دى كانت مرات الى قبله مش مراااااااته هو .

وبكده تكون كل امالي اتحطمت ؟؟؟

لا طبعا كلا البت . عندي امل فى ربنا بجد ان ربنا يرحمناااااااااااا . احنا اينعم نستاهل الى بيجرالنا بس والنبى غلابه يارب ونفسنا نشم نفسنا .




الأربعاء، 17 فبراير، 2010

مروه وامجد (الجزء الخامس والاخير )

سلام عليكم
اولا متشكره اوي اوي يا جماعه على التهنئه بتاعة عيد ميلادي ومتشكره يا ريم على الكلام الكتير عليا
ومتشكره يا واندا على التصييح هههههههههههه
ومتشكره لكل الناس
وعلى فكره النهارده مش بس عيد ميلادي ال31
لا عيد ميلاد المدونه كمان
والى عرفتنى بناس كتير اوي باحبهم ا وي وباحب وجودهم فىحياتي جداااااااااا
شكرا لكم بجد انكم هنا
******************************
وندخل على امجد ومروه وما تعيطوش من طول البوست بقى لانى كنت عايزه اخلص القصه النهارده
امجد ومروه بعد العتاب الطويل مروه اقتنعت انها برضه زودتها شويه وايه يعنى لما يوم ما يرنش عليها يرجع
وبرضه اتفقت معاه ما تبقاش كده وراه منين ما يكون وما تخنقوش واقتنعت ان زمان غير دلوقتي والحال اتغير ولازم هى كمان تتغير وتعقل بقى وتهدى و و و .....

وامجد برضه وعدها ما يزعلهاش تاني وانه ما كانش يقصد بس اصله متوتر شويه الايام دي وهى برضه ضغطت عليه و الى اخره من كلام التثبيت المعهود فى هذه الظروف .

وفعلا العلاقه بين مروه وامجد خدت بقى منحنى جديد ومرحلة جديدة .

مروه فى ازمتها الي فاتت ما كانتش بتكلم حد وما كانتش عارفه تشكي لحد غير ربنا . ولقت فى ده راحه نفسيه
وحتى بعد انتهاء المشكله قررت تكون اكثر علما بالدين وتتقرب لربنا اكتر وفى يوم من ذات الايام وبعد سماع خطبه للشيخ المشهور الى طالع موضه الايام دي (ايوه ايوه ماهو حسب الموضه كل حاجه فاكرين ايه ) راحت مروه قعدت تفكر وتقلب فى دمغها علاقتها بأمجد وقالت كما قال الشيخ يبقى انا باعمل حاجه حرام

وعليه قررت انها تقول لأمجد انهم لازم يبطلوا يتكلموا فى التليفون ويبطلوا سنسنه وفى الجامعه كمان مالوش لازمه بس كانت خايفه من رد فعله وحاسه انه ممكن يتصايق ومش بعيد يقفش معاها وتبقى موال

لكن برضه قالتله .... بس الى حصل ان امجد ما زعلش ولا حاجه بالعكس ده فرح جداااااا وشجعها وقالها انه طبعا ما يحبهاش تعمل حاجه هى شايفاها غلط وقالها بس هابقى اطمن عليكى كل فتره وكده يعنى وكان فرحان بها اوي ( زي ما يكون كان حاسس برضه ان دي حاجه مش صح ) وطبعا طبعا الموضوع ده استمر شهر كده وتدريجيا رجعت ريما لعادتها القديمه (تقريبا كانت الموضه راحت )



خلال السنه دي مامة مروه اصبحت عارفه وبدأت تسأل هو مين ومنين وفين وازاي و .............. ويقدر يعمل ايه وهايتقدم امتتتتتتته وهكذاااااااا من جميع مراحل التطور الطبيعى للحاجه الساقعه .

وطبعا كتير كانت بتزنق على مروه وتعمل معاها مشاكل وساعات تكون متعلقه بعلاقتها بامجد وتروح مروه تعيط لامجد والحقيقه كان بيزعل عشان مروه اوي ويتاثر ويتمنى من قلبه ان الايام تعدي عشان يخطبها رسمي ويرحمها من المشاكل دي .


وعدت السنه الاخيره من الدراسه له ولها اهدى فى العلاقه واركز كتير لا تخلوا من المشاكل بررررررضه والقفشات لكن بتعدي بقى زي ما يكونوا خدوا عليها وتحت شعار مرفوع من طرف واحد (مروه غالبا ) الى بيحب لااااازم يسامح امااااااال الحب يا اخويا الحب .

وخلصت السنه والحقيقه امجد كان متحمس وبيدور على شغل من قبل ما النتيجه تطلع ومروه كمان كانت بتدور على شغل
والنتيجه طلعت والقلق شغاااااال منها وطبعا هو حاسس بده .

ومامتها شغااااااله ضغط وزن وتضيق وكلام يسم .

عاشت مروه فى قلق شويه عشان كانت خايفه امجد يروح الجيش ويبقى كده الحكايه هاتطول اكتر لكن الحمد لله خدت تاجيل زي دفعته كلها تقريبا .

وامجد قال لاهله وابوه قاله يا ابنى مافيش مشكله بس اشتغل الاول بس كمان افرض هاتخطبها طب وهاتلحق ازاي فى سنه ولا اثنين توفر مصاريف الجواز انا برضه مهما ساعدتك مش هاقدر ده اصلا فى حال ان اهلها وافقوا على انك تخطبها سنه ولا سنتين


امجد طبعا طمن باباه انه ان شاء الله كل حاجه تمشي زي الفل وسمعه كلمتين كده من بعيد لبعيد انه من حقه ان اهله يساعدوه الدنيا كلها على كده دلوقتي امال يعنى هايعمل ايه؟؟؟؟!!!

ومامته قالتله طب يا ابنى مش تقولنا هى اسمها ايه ولا ابوها مين ولا ساكنه فين نسأل عليها ولا حاجه ؟؟؟

بصلها باستغراب واستعجاب وقالها نسأل عليها ؟؟!!! ليه هو انا باقولك انها واحده قابلتنى فى الشارع وبعدين هو انا هاتجوزها هى ولا هاتجوز ابوها واهلها ؟؟!!

عموما ماشي ماشي هابقى اجيبلك البيانات دي كلها

مامته قالتله تجيبها ؟؟؟ ليه هو انت ما تعرفهاش اصلا ؟؟!!!

قالها امجد : ...... لا طبعا عارفها .... هابقى اكتبهالك يعنى .

امجد باباه كان موظف كبير اد الدنيا مركز اجتماعي محترم جدا ومرموق ومامته كذلك وطبعا زي ما انتم عارفين حال كل من مثله هما مستورين الحمد لله .

مروه باباها كمان موظف ومن فتره كده كان سافر السعوديه عقبال عندكم وعمل قرشين حلوين وبنى بيت فى بلدهم حاجه زي الفل ومامتها ست بيت وتعز الدهب الى بيشخلل فى اديها مووووووت .

واشتغل أمجد فى شركة ادويه صحيح المرتب على صغير شويه بس لو صبر واجتهد فى امل وضعه يتحسن ده غير انه مافيش غير كده وهو لازم يشتغل عشان ما ينفعش يروح يقول لاهلها انا عاااااااااطل يا جودعان وعايزه ا تجوز بنتكم .

وبعد الترتيبات والحيثيات والسؤلات والاعتراضات

اه اهله كانه معترضين ومش عاجبهم باباه مش عاجبه انه يخطب بدري كده وهو لسه مش معاه ولا مليم ولا قبض ولا مره حتى
ومامته مش عاجبها النسب .... اه شكلهم كده يا امجد ناس بيئه انا سألت عليهم خلي بالك .

واهلها كانوا معترضين
باباها مش فاااااااااااهم انا اوافق ازاي على واحد ما عندوش شقه حتى يعنى هاتتجوزوا فين ؟!!!
مامتها : نعمممممم دبلتين وفاتحه والخطوبه بعد 6 شهور لا يمكن ابدااااااا لو ما كانش يجيبلك شابكه تضرب شابكة المزغوده بنت عمك الى اتخطبت الشهر ا لى فات انا مش هوااافق ابداااااااااااااا

الا ان امجد ومروه اصروا على موقفهم وضغطوا على اهاليهم لحد لما حددوا معاد يروح فيه امجد واهله بيت مروه

واتفقوا ان اول زياره تكون تعارف دون الدخول فى تفاصيل الا ان برضه الى فى نفس كل واحد فيهم كان طالع على وشه لا مش وشه بس كان فى كلام كده بيترمى فى الهوا زي الفل

بعد الزياره
ابو امجد مقاس بوزه كان مترين وربع . ومامة امجد بتقول كده يا امجد كان نفسي اجوزك واحده تكون بنت عيله كده واهلها يشرفوا دول بيئه اوي يا امجد شوفت الست مامتها والى كانت عماله تعمله بالغوايش الى فى ايدها وطريقة كلامها عامله ازاي
وابو امجد منفجرا : ولا ابوهااا ده كان ناقص يشتمنا يا ابنى . وبيكلمنا كاننا رايحين نشحت منه .
حاجه مش ممكن والله
وامجد عمال يصلح من هنا ويثبت من هنا ويسكت من هنا وهكذاااااااااااا

ابو مروه معلن عن البوز التمام اياه : ايه الكلام الفاااارغ ده . حتة عيل وما حلتوش حاجه وجاي عايز ايه مش عارف . وان شاء الله لو ابوه الى منفوخ ده ساعده فى الجواز هاتعيشوا ازاي بمرتبه ده ؟؟

مامة مروه بينها وبينها : هو ده الفالح الى انتى مصدعاني به . ايه ده يا بت ده ما حلتوش حاجه ولا الست امه دي يا اختي شكلها كده مناخيرها فى السما ومرسومه على الفاضي .
لما نشوووووووووف اخرتهاايه معاكي

ومروه بدورها بتصلح وتثبت وتزوق وتروق ويااااااااا مسهل

وفى اللقاء التاني :
الاتفاقات والحسابات كل حاجه تقريبا كان صعب الاتفاق عليها من اول الشبكه ومعاد الخطوبه ومعاد الفرح التقريبى والشقه الى هاتبقى ايجار مؤقت واتفاق الجهاز مين هايجيب ايه والمؤخر والخ الخ الخ الخ

وكل ما يصلحوها من ناحيه تبوظ من الناحيه التانيه وطبعا طبعا الحوار لا يخلوا من كلمه تلطش كده وعصبيه من هنا وزغدين فى جنب مروه ودموع محبوسه فى عنين مروه وتنهيده طووووووويله من امجد
وزعيق من هنا وشد من هنا وجذب من هنا وقلة ذوق ساعات وكلام رخم برضه ساعات والحقيقيه الجو كان مشحون جامد جداااااا

وانتهت الجلسه ولم يتفقوا تقريبا ولكن ارجأوا الامر لحين ا لتوصل لاتفاق يرضى الطرفين

ونزل امجد واهله والموقف كان محتدم جدا عند ا لطرفين

والحقيقه ان امجد كان مضايق من اهل مروه اوي
وكمان مروه كانت مضايقه من اهل امجد

وبعد كده فضل يحاول مروه وامجد يوصلوا لاي حل يرضى الطرفين وكل واحد حيران مع اهله وما حدش فيهم برضه ناوي يغضب اهله وده اتفاق بينهم من الاول
لا هى تنفع تتجوز بغير رضا تام من اهلها ولا هو كمان يقدر يخالف اهله .

فى ا لحقيقه المشكله فى الاخر ما بقتش بس بين اهل مروه واهل امجد المشكله كمان بقت بين مروه وامجد نفسهم

امجد ما استحملش من اهلها ابدا انهم يضايقوا اهله وكان حاسس انهم غلطانين دايما وكان متوقع من مروه انها تكون واقفه الى جانبه وهى كمان تغلط اهلها( هى اصلها كانت دايما فى صفه وبتقتنع برايه وبتسمع كلامه دى حتى كانت بتشتكيله من اهلها لما يزعلوها فى حاجه ) لكن ده ما حصلش طبعا

مش بس كده دى مروه كمان كانت حاسه ان اهله هما كمان غلطانين وكانت فاكره امجد هايكون احن علياه من كده وانه هايكون فى صفها وينصفها ( ماهو كان دايما حنين عليها وبيحبها وما يقدرش يستغنى عنها وياما هى وقفت جمبه وسمعت كلامه واستحملت كتييييييير منه وعشانه الدور عليه بقى ) لكن برضه امجد ما عملش كده

الحكايه كبرت اوي والمشكله المره دي مش بين اثنين بيحبوا بعض . المشكله المره دي بين عيلتين والاثنين الى بيحبوا بعض حتى زعلانين من بعض .

مروه حاولت تتمسك بامجد لكن حست فجأه انها بتيجى على كرامتها . ووجعتها اوي الحته دي .
وخلاص امجد بدأ هو الانسحاب الصريح
وفى اخر مره شاف فيها مروه

وبثبات استغربت له اوي مروه . قالها مش هاينفع نكمل مع بعض .

ومروه وهى بتتقطع من جوه: قالتله فعلا صعب نكمل مع بعض . صعب اوي.
وما عرفتش تكتم الدموع اكتر من كده

دموعها وجعت امجد بس هو كان واخد قرار حاول يكمل كلام لكن ما عرفش يقول ايه
وهى كمان حاولت تنفي الدموع وحاولت تكون ثابته زيه بس كانت دموعها بتخونها كتير

امجد مشي.. مشي لواحده ... ومروه كمان مشيت لواحدها فى اتجاه تاني

ما عادش خلاص طريقهم واحد ....
****************************************
تفتكروا كل واحد فيهم هايكمل مشواره ازاي ؟؟
تفتكروا كل واحد فيهم هايقدر يحب تاني ؟؟
تفتكروا مين الى غلطان ؟؟
وليه قصة الحب دي فشلت ؟؟

واخيرا تفتكروا امجد ومروه هايتقابلوا تاني ؟؟؟
ولو اتقابلوا ايه هايحصل ؟؟

السبت، 13 فبراير، 2010

مروه وامجد (الجزء الرابع)


مروه حاولت تتهرب من مامتها وتتحجج باي حجج فارغه لكن مامتها بقى شدت عليها وضغطت عليه مره بالحنيه وبالشده شويه

مروه قالت لمامتها قشور كده عن الموضوع ما قالتش كل حاجه وكمان اكدت طبعا لمامتها على براءة العلاقه

وانهم خلاص هانت فاضل سنه وما قالتش طبعا ان العلاقه قديمه ولا حاجه و زوغت من السؤال ده

مامتها الحقيقه تقبلت الموضوع وحاولت تهديها وتعرف كمان ايه المشكله الى بينهم

لكن مروه قالت لها انها مافيش بس قفلت معاه فى الكلام وطلبت من مامتها تسيبها مع نفسها شويه

وكملت مروه عياط مع نفسها وحيره وتعب والم وكل حاجه

بعد كام يوم بدأت تحاول تخرج من الحاله دي عشان الى فى البيت

ولقيت كمان فى البيت كلام عن سفر ومصيف وكانت ناسيه وطبعا كان لازم تسافر معاهم

وكلمت ندى صاحبتها ولقت ندى عارفه المشكله من امجد

وندى زعلانه منها اوي انها ما كانتش بترد عليها وكمان لانها عرفت من امجد مش منها

مروه قالت لها : معلش يا ندى والله ما كنت عارفه اتكلم مع أي حد ولا اقول أي حاجه بس انا عايزه أشوفك ضروري قبل ما اسافر

لما ندى راحتلها مروه اول سؤال سألته لها : أمجد قالك ايه بالظبط .

ندى : قالي انك هبله يا حبيبتى

مروه : انا باتكلم جد يا ندى قوليلى بالظبط قالك ايه

ندى : ولا حاجه والله قالى انكم اتخانقتم كالعاده عشان سبب هايف تافهه مالوش أي لازمه عاااااادي ايه الجديد

مروه : لا يا ندى الحكايه اصلها مش موضوع موقف وبس انا حاسه انه متغير بقاله فتره مش عارفه ايه الى حصل
صدقينى انا مش عارفه اوصفها بس هو عامل زي ما يكون بيكلمنى من غير نفس طب خلاص انا يعنى ما عنديش كرامه هارمي نفسي عليه بقى

ندى : يا بنتى بطلي هبل والله ده كلمنى كان مضايق اوي وهو بيحبك اوي يا مروه بلاش هبل بقى

مروه : مضايق اه يادوب يضايق طبعا اموت انا فى نفسي وهو يضايق .

ندى : بطلي هري فى نفسك يا ماما عايزاه يعمل ايه طيب يقعد يعيط زيك ؟؟ ولا يجى يغنيلك ظلموه تحت الشباك ؟؟؟

مروه : بطلي تريقه بقى انا باتكلم جد . ما اعرفش يعمل أي حاجه .

ندى : يعمل ايه ماهو اتصل عليكى ما ردتيش كلمنى ما ردتيش عليا يعمل اييييييه يجي يسال عليكى ابوكي ؟

مروه : اه اتصل مره واحده ما رديتش خلاص بقى ما صدق الله يرحم زمان .

وفضلت ندى تتكلم معاها كتير وكانت شايفه ان مروه مكبره الموضوع وطبيعى انه مش هايفضل زي زمان كانوا صغيرين والحكايه لسه جديده وطبيعى يركزوا ويعقلوا ومش معقول طول النهار رنات وتليفونات

مع ان هو الى بدأ بالتليفونات والرنات والملاحقه المبالغ فيها والهبل المتقع المعروف فى الاوقات دي الا انه هو اول ما اتخنق به

مروه بدأت تهدى من كلام ندى وحاولت تقنع نفسها انه عادي الا انها ابت على كرامتها انها تروح تكلمه اطلاقا وقالت انا كمان ما عملتلوش حاجه وهو الى ما بيتصلش وانا مش متصله

وبعد يومين سافرت مروه المصيف مع اهلها وهى مصره على نفس الموقف

امجد
رايح جاي مبووووووز ووشه اتفقنا شبه علبة ا لكانز المنداس عليها

وطبعا اخوه هاريه : ماااالك يا فالح عامله فيك ايه المزه شكلها كده مطرقعالك صح ؟ والله يا بيضا مطرقعااااالك . اصل الشراب المقلوب الى فى وشك ده ما بيظهرش الا كده .

وامجد كالعاده يقول بس يا خفيف مش رايقلك والله. واحيانا يزقله بالى فى ايده عادي جدا

امجد بيفكر كتير مش عارف يقرر يعمل ايه ؟

امجد بيكلم نفسه : منتظره هى بقى حضرتها انى اروح اكلمها انا . ليه هو انا عملت فيها حاجه ما هى الى كانت بتقول شكل للبيع .
بس بصراحه انا اصلا كنت مخنوق وهى اصلها مش بتبطل خنقه فيا . مش عارف انا حاسس انى زهقت حاسس انى كل يوم باتفرج على مسلسل عربي واحتمال تركي بطيء ورخم وفاكس جدا .

بقينا بنقول نفس الكلام وبنعمل نفس الحاجات وحاسس ان احنا بقينا اثنين دمهم تقيل مش عارف ليه .

يعنى ايه الكلام ده ؟؟ يعنى انت ما بقيتش بتحب مروه ؟؟؟ ( ده ضمير امجد )

لا باحبها بس مش عارف انا حاسس كده ليه ؟؟!! ومش عارف هاقدر اكمل كده ولا لا

يرجع ضميره يجيبه من قفاه تاني : يعنى ايه هاتطلع ندل ولا ايه وبعد الحب ده كله تخلى بيها وتسيبها وانت عارف انها بتحبك اوي . ده انت ندل بقى ؟؟

امجد : لا طبعا مش ندل ومش ها عمل كده لان انا اصلا باحبها برضه بس جايز انا مضغوط عشان .... عشان ايه ؟؟ مش عارف بس انا نفسيتى زي الزفت الايام دي

وبررررررضه مش هاكلمها انا المره دي انا ما عملتش فيها حاجه هى الى غلطانه اتكلمت اتكلمت ما اتكلمتش خلاص هي حره تبقى هى الى مش عايزه بقى .

ندى اتصلت على امجد لما رجعت من عند مروه وقالتله انها حالتها النفسيه وحشه وبتعيط ومبهدله نفسها يا ابنى ليه كده والحب راح فين بس ما كنتوش بتستحملوا على بعض نسمه .

وامجد لا تنازل ولا استسلام وما رضاش يتنازل عن موقفه ابدا بتيتا البته وعرف منها انها مسافره .

وفضل الحال على ما هو عليه لمدة اسبوعين كمان فوق الاسبوع الى فات يعنى 3 اسابيع
ودي اطول فتره خصام حصلت بينهم
لا مروه كانت حاسه بطعم فسحه ولا مصيف ولا عارفه تضحك ولا ضحكه من قلبها
ولا بتبطل عياط كل ما تخلى بنفسها . وكلها حيره بجد ومش عارفه ترجع فى كلامها وتكلمه ولا هو كده ما صدق وخلاص تحاول تطوي الصفحه .


وامجد ما زال على الوش المقلوب اياه . بس كان بيقول لنفسه الحكايه كده خلاص جابت اخرها وواضح انها خدت قرارها ومش هاترجع تاني . وفضل امجد يبحلق فى الفراغ الحلزوني ساعات وساعات ويعانى من حالة من الفراغ العاطفي ولسعة مراره على ما ضاع .

وندى يا عينى حيرانه تتصل على كل واحد شويه مافيش فايده وبعدين سكتت فتره كده وكان يبدو انها يأست منهم

لكن استمرت تكلم مروه عادي وبطلت تجيب لها سيرة امجد بناءا على طلب مروه

ورجعت مروه من المصيف وبعد كام يوم اتصلت عليها ندى

وقالت لها: بيقولوا النتيجه هاتبان بعد يومين سمعتي ؟

مروه : معقوله ما حدش قال حاجه طيب نبقى نتصل نسأل بقى .

ندى : لا بصي ايه رايك بكره انا راحه مشوار قريب من الكليه هاعدي عليكى ونروح سوا ونسأل على النتيجه امته برضه لما نروح احسن

مروه : ماشي انا حتى زهقانه وعايزه اخرج .

واتفقوا على المعاد وراحوا الكليه . وسالوا على النتيجه وطلعت لسه عليها عشر ايام على الاقل .
وبعدين فجأه بصت مروه لقت امجد قدامها .

بصت مروه نظره ناريه لندى كلها اتهام للتآمر عليها .

ندى : بصتلها وقالت لها ايه ماليش دعوه انا قلتلك حاجه يا ابنى ؟

امجد : قالهم ايه فى ايه ؟ قلتيلى ايه ؟

ندى : مافيش حاجه عادي احنا كنا جايين نسأل على النتيجه . ازيك يا امجد

امجد : الحمد لله ازيكم اخباركم ايه ؟ النتيجه ما ظهرتش مع ان الواد هاني اخويا قالي انها ظهرت .

ندى : اممممممم طب وانت جاي تسأل على النتيجه ليه انت حولت اداب ولا ايه ها ؟؟ ليه ؟؟ ليييييه يا مجنينى .
وطبعا اطفالي الحلوين

لا لا قرائي الحلوين يعنى اول لما امجد ومروه شافوا بعض راحوا مغنيين لبعض الاغنيه الى شغاله دي فى سرهم وندى طبعا خرجت من الموضوع وراحت تلعب مع الاسد

وهاتك يا عتاب فى بعض وهاتك يا تقطيع وشويه كده ولما الحكايه كانت هاتقلب بعياط مروه وفضايح فى الجامعه قرروا يروحوا ويكملوا كلام على التليفون

ويدفعوا ابو مروه وابو امجد المساكين فاتورة التليفون ويقولوا الخلفه والى خلفوها والى عايزين يخلفوا واحتمال يقولوا هى الجوازه كانت غلط من الاول
اتكلموا كتير اوي واتعاتبوا واختلفوا واتفقوا

على ايه اتفقوا ؟
المره الجايه

ايه القصه الى مش عايزه تخلص دي ؟؟؟

فكروني ابطل اكتب قصص

الأربعاء، 10 فبراير، 2010

مروه وامجد(لجزء التالت)


قلنا الحب حلو وفضلنا نحب ونحب ونعطف ونسنسن ورسايل وتليفونات وفرح وحزن وضحك وبكا واهي كانت ماشيه .

بس بعد شويه يمكن سنه وتدريجيا ومش مره واحده الامور اتغيرت

كان امجد بيفتح عنيه كل يوم يتصل عليها ويتطمن عليها وطول اليوم رنات وكل شويه مسجات وقبل ما ينام لازم يتصل عليها
دلوقتي مروه هى الى بتسأل فى الغالب
دلوقتي مروه هى بتطمن فى الغالب
دلوقتي مروه هى الى بتصالحه لما يزعلوا على طول

تحس انهم كمان بقوا هاديين او بقوا مملين وسعات تبص تحس ان امجد زهقان ومروه قلقانه

المهم تبصلهم تحس انهم اتغيروا

مروه يوم كانت زعلانه من امجد امبارح خرج مع اصحابه ورجع متاخر اوي وما رنلهاش يطمنها ولما رنتله بعتلها رساله قالها ما رضيتش اقلقك لما اتاخرت مع انه عارف انها مش ممكن عنيها تغمض قبل ما تطمن عليه

مروه صحيت الصبح قالت مش هاتصل ولا ممكن ابداااااااا وانا زعلانه بقى

وتاني يوم ما اتصلتش

والحقيقه امجد كمان ما اتصلش ساعه ساعتين الظهر فات والعصر فات وهى قاعده بقى تقطع فى نفسها

ما سألش عني

ما كلمنيش ... ايه ده ما بقيتش مهمه ؟؟ نساني لما ما اتصلتش ؟؟؟

ولا جايز ما صدق !!!!!؟؟؟؟ معقوله كده ؟؟!!!!

وفيييييييين المغرب كده اتصل عليها امجد

أمجد : ايه انتى فين انتى تعبانه ؟؟

مروه ببوز 3 متر الا ربع : لا مش تعبانه ولا حاجه

امجد : امال انتى فين النهارده ما اتصلتيش ولا رنيتى يعنى

مروه: يا سلام ولسه فاكر تسأل دلوقتي؟؟

امجد : اه ده انتى نفسك هفاكي على خناقه ولا ايه

مروه بعصبيه : ده انا برضه ؟؟ يعنى ترجع امبارح وما ترنليش والنهارده ما تسألش عني لحد دلوقتي وانا الى غلطانه ؟؟

أمجد : انا قلتلك امبارح ما رضيتش اقلقك والنهارده انا كنت مشغول فى ميت حاجه من الصبح وانتى كل يوم بتكلمينى ما اتكلمتيش ليه

مروه : اه هى غلطتي انى عودتك اتصل انا كل يوم ما كنت بتتصل عليا انت كمان ولما كنت اتاخر عليك خمس دقايق كنت بتتصل انت ايه حصل

امجد : يووووووووووه بقى . ده موال بقى سخيف وخنيق انتى عايزه ايه بالظبط .

مروه : سخيف وخنيق طيب ايه جابرك ما بلاش منه .

أمجد وهو بيجز على سنانه : مرووووه قلتلك كذا مره انا ما حدش يقدر يجبرني على حاجه اصلا .
ويتابع وبدأ بكا مروه يكون له صوت تقريبا : مروه من فضلك انا اتعصبت دلوقتي وانتى كمان متعصبه مش هانعرف نتكلم خلينا نهدى ونبقى نتكلم بعدين .

وقفلوا فعلا التليفون ومروه ما كانتش مصدقه نفسها هو في ايه وايه حصل امجد ليه اتغير

ولا انا الى اتغيرت ولا ايه حصلنا

قفلت وهى مش عارفه الى على خدها دى دموع حسره ولا دموع خوف

حتى مش عارفه دي دموع ولا مطره نازله على دماغها تفوقها من الحلم الجميل


وفضلوا يومين لا بيتكلموا ولا بيتصلوا ببعض
امجد بيخانق دبان وشه الى اصلا شبه علبة الببسي المداس عليها بعربيه (فاكرينها؟)

ومروه بوزها مترين ومش بتخرج من اوضتها وقالت لهم فى البيت ان عندها برد
وفضلت يومين تقريبا نايمه فى السرير بتفكر فى مليون فكره وبتحسب مليون حساب والدموع مش بتفارق عنيها

تاني يوم امجد اتصل عليها لكن هى ما ردتش وما كررهاش تاني

مامة مروة راحه جايه عليها كل شويه تسألها اجيبلك تاكلي طب اشربي حاجه سخنه
مروه تقريبا ما بتاكلش ولا بتشرب
مامة مروه قلقانه مش عارفه فى ايه ما ياما جالها برد

مامة مروه دخلت عليها كالعاده وخدالها الاكل فتحت النور واصرت مروه تقوم تكلمها
مروه كانت مستغرقه فى العياط ساعتها ما عرفتش تداريه
مامتها اتخضت اوي وجريت عليها ومالك يا مروه فى ايه
وحاولت مروه تهرب

بس مامتها ضغطت عليها وهى كانت محتاجه تفضفض

وهى بقالها يومين مش بترد على التليفون ومش بتكلم حتى صحابها


كانت نفسها ترمي نفسها فى حضن مامتها وتبكى بحرقه
....
.
ونكمل المره الجايه يا شطار

الأحد، 7 فبراير، 2010

مروه وأمجد(الجزء التاني)

الى مقراش الجزء الاول يروح يقراه



امجد ومروه ما حابوش بعض من اول مره انما بصراحه اثروا فى بعض هما الاثنين روحوا يفكروا فى بعض

بعد يومين امجد لقي حجه يروح بها الكليه عند مروه وطبعا قابلها صدفه ما سألش ولا حاجه على الدفعه بتاعتها فين
ووقف قدام المدرج صدفه يستنى صاحبه مش مين المهم انها كانت صدفه.

خاف يقول انه جايلها مخصوص اصله خايف ترفضه ما كانش متاكد انه شاغلها زي ما هى شغلاه

المهم شاف مروه وسلموا واتكلموا مش هما بس هما واصحابها كمان و الصدف اتكررت وما بقتش صدف بعد كده عادي
واميلات بقى وشويه وتليفونات كمان وكل ده وامجد ومروه بيقربوا من بعض اكتر وبيتعلقوا ببعض اكتر

والحقيقه هما الاثنين رغم كل شيء ما صرحوش لبعض بحبهم لكن بقت واضحه جواهم

بس خلال الفتره دي اتكلموا كتير اوي وامجد بقى عارف مروه بتفكر ازاي ومروه كمان بقت عارفه امجد بيفكر ازاي
وبصراحه امجد كان مؤثر ومقنع اوي وكانت غالبا مروه بتقتنع برأيه . حتى انها تلقائيا بدأت تغير فى لبسها شويه ماهى كانت محجبه اه بس حجاب من اياه الى مع اقل هدوم ممكنه واكتر عدد ايشاربات ممكنه

يعنى من الاخر امجد اثر فيها جامد ومروه كمان كانت كلها حيويه وامل وطموح عالي واقدام وده برضه اثر فى امجد اوي وعلى طموحه واماله جدا

واخر يوم في امتحانات مروه ومع توقع البعاد (اصل مروه مش مممممكن ابدا تقابله بره الجامعه الحكايه مش سايبه هى) شافوا بعض وقالوا لبعض كل حاجه من اول ما بصوا فى عنين بعض

كان امجد هايتجنن من الفرحه عشان اتاكد ان مروه حاسه بيه فعلا ومروه كانت مانعه دموعها بالعافيه دموع فرحه ولا ايه هى ما تعرفش لكن كانت حاسه ان قلبها بيرتعش والدموع ماليه عنيها

وطول الاجازه برضه استمرينا فى تليفونات واميلات لكن مقابلات بره لا حتى امجد ما طلبش منها اصله عارفها وما يرضاش برضه لها انها تعمل حاجه غلط (برضه نتقابل فى الجامعه حاجه وبره حاجه تانيه )

بس ده ما يمنعش ان مروه راحت كام مره كده الكليه فى الصيف مره تسال على النتيجه ومره تجيب النتيجه بام عينها ومره تسال على كورسات الكمبيوتر الى عاملاها الكليه كده يعنى

المهم مشيت الايام وزاد الحب وبقى تقريبا مروه وامجد مع بعض على طول لو مش مع بعض فى الكليه يبقوا مع بعض على النت او على التليفون

بشكل تلقائي بقى امجد لازم يعرف تحركات مروه كلها ما تروحش فى حته ولا بتخرج من البيت من غير ما تقول لامجد ولو قالها ما تروحيش فى حته بتقوله حاضر بتسمع كلامه طبعا (اصل حلو اوي احساس انه بيغير عليها اصل ده فى رايها زياده حب ) وكمان هى برضه بتكون عارفه هو فين دايما

لكن مش معنى كده ان الحكايه فضلت كده ماشيه على طول حلو

لا كانوا بيتخانقوا لاسباب كتير مروه لبست حاجه مش عاجباه . خرجت من غير ما تقوله . هو هزر مع زميلته فى الكليه بزياده او رنتله وطنشها . وهكذا وممكن يتخاصموا يومين ومروه تعيط لما تشبع وامجد وشه يفضل شبه كانز البيبسي الى العربيات دايساه ....وهكذا وهكذا

وكانوا بيتصالحوا هما الاثنين ما يقدروش يبعدوا عن بعض وساعات ما كانوش يكملوا اليوم خصام وامجد لما يحس انه زعلها كان بيلوم نفسه اوي ويتصل عليها ويصالحها وهى كمان كانت بتعمل كده

امجد ما كانش بيتكلم كتير عن الجواز ولا بيدى وعود وقالها انا مش عايز ادي وعود كتير عشان انا لسه ما خلصتش الكليه وما اقدرش اديلك وعود لكن انتى عارفه انى هاعمل كل حاجه فى وسعي عشان نفضل سوا انا باحبك وما اقدرش اتخيل حياتي من غيرك.

مروه فرحت قوي وقالت راااااجل بيحترم الوعود وكفايه انه وعدني نفضل سوا وانا متاكده وواثقه انه ان شاء الله هايكون اد المسؤليه ونبدأ حياتنا سوا

وطبعا مروه كانت رافضه أي عريس يتقدم لها وتقنع اهلها انها مش عايزه تعطل نفسها عن المذاكره ومستقبلها وكليتها . وكانوا بيقتنعوا

امجد ومروه كانوا طايرين ببعض وامجد كان يقعد بعد كل مره يتقابلوا او حتى يتكلموا فى التليفون ويسنسنوا لبعض يجى ساعتين كده يغمض عنيه ويحلم بيها ويبقى مش مصدق نفسه انه لقى الحب ده وان عايش الاحساس ده فعلا

ومروه كمان كانت حاسه ان ربنا بيحبها عشان لقت انسان زي امجد وبرضه ما كانتش مصدقه نفسها وكانت بتسأل نفسها هو صحيح نغمة دقة قلبي كده فعلا ولا انا باحلم ؟؟!!!
وتحلم هى كمان باليوم الى هايجمعهم بيت واحد وتحلم وتحلم وتحلم وتنام وهى بتحلم وعلى وشها ابتسامه هادية وناعمه ورائعة

حلو اوي الحب ده
تلقى القلوب الخضرا ترتعش من كلمه
وفى العيون فرحه بترقص شايله دمعه
من شبّاكه بس.. نحس الشمس جايه تدفي حلمنا
ومع دقاته بس... نشوف النجوم تلمع لنا

ونكمل المره الجايه ان شاء الله

الاثنين، 1 فبراير، 2010

عيييييييييييييييب اوي


سلام عليكم

ازيكم او مش مهم

اصل انا زعلانه منكم بصراحه ............... اه كلكم

مبروك على الكاس يا ناس بس مش كل الناس الناس الى بتعرف تفرح بس الناس الى بتشوف الجانب المشرق بس
أو بمعنى اصح الناس الي عايزه تشوفه

كان فى كارتون الاسد الملك جمله خالده للمدعو زازو

كان بيقول لبوفاسا : كل عيله فيها واحد عظمتك متخصص دايما فى افساد المناسبات الحلوه

كنت عايزه انا اضيف عليه بقى غير الهتيفه والمطبلتيه زي بتوع زفف الانتخابات كده
واضيف كمان انه ساعات مش بيبقى واحد
لا ده ممكن تطلع عيله بحالها بيحبوا ينغصوا الحياه على نفسهم


من امبارح كل ما حد يكلمنى يقولي نزلي بوست ردي على الناس حتى فى تعليقات البوست الى فات حد قالي قلولنا الحقيقه عن اللقاء


بس والله مافيش على بالي كلمه اكتبها غير حاجه واحده بس


عييييييييييييييييييييييييييييييييييييييييييييييييييييييييييييييييييييييييييييييييب


أه والله عيب


انا الى عندي عن اللقاء والى شوفته هناك والى حسيته عندكم فى البوست الى فات ما عنديش حاجه تانيه اقولها

وكل واحد حر فى رايه

اما عن ملحقات اللقاء فانا عايزه تعويض بقى عشان صوتي رايح من الكلام فى التليفون امبارح ونفسوياتي قفلت مش عارفه اكتب واكمل القصه

ومشاعيري نواحيكم دلوقتي ا نى عايزه ادور الضرب فيكم الحقيقه


ومضربه عن التعليق او حتى قراءه اي بوست عند اي حد متعلق بالقاء لحد ما تبطلوا لوك لوك مالوش لازمه

وباتاسف لكل الناس الى علقوا عندي فى البوست الى فات عشان ما عرفتش ارد عليهم ودي اول مره اعملها والله

ما قلتلكم نفسوياتي قفلت

وبس خلاص امشوا بقى