الجمعة، 29 أكتوبر، 2010

يوم فى الأرياف

ازيكم يا اصدقائي
حاسه ان فى فايرس ماشي فى البلوجز يا جماعه بطلنا نكتب ونتابع ليه
هو انا صحيح شايفاكم كلكم على الفيس بوك بس والله انا ما عنديش نشاطات هناك يعنى
عموما يارب نحترم نفسنا جميعا ونرجع نكتب ونتابع بعض

انا الحقيقه جه بالي موضوعات كتير كتير اتكلم فيها بس ما تعرفوش ليه كده يا اخواتي ماليش مزاج اتكلم جد
قلت اديها فى الهايفه يا نانانس   بس ما تاخدوش عليها

هاحكيلكم يوم من ايام حياتي معلم فى ذاكرتي جدا

طبعا رغم ان انا من الاكاليم على راي البت شيما الندله مساها الله بالخير   الا انى من المنصوره نفسها وماليش اصول فى بلاد ارياف للاسف  بالتالي لحد هذا اليوم ما كنتش روحت بلد ارياف قبل كده.. وكنت اقعد احقد على  البت زميلتى فى ثانوي الى كانت تقولي احنا بنروح البلد يوم الجمعه وكده يعنى

وقبل الكليه كمان ما كانش ليا اصحاب من الارياف بالتالي  ده كان عالم  مختلف بالنسبه لي

واحده صاحبتى من بلد قريبه مننا كانت زميلتى فى الكليه وقالتلى خطوبة اختها وطلبت مني اساعدهم بقى فى شرا الفستان والحركات دي وفعلا قد كان ومحسوبتكم كانت متخصصه يعنى مش اي كلام .. المهم جه يوم الخطوبه وطبعا انا معزومه بس هيهات بابا عمل موال وصاحبتى واهلها اتصلوا عليه وضمانات وحوارات جامده اوي على ما روحت

المهم روحت بقى  مش عايزه اقولكم على ما وصلت البيت  كان فى خماشر واحد سألنى انتى عايزه مين .. لدرجة انا شكيت فى نفسي هو انا عندي 3 عيون ولا ايه يا جماعه للدرجه دي شكلي مريب

فى البيت بقى المفروض هانجهز حاجة العروسه عشان نروح الكوافير فى المركز الى قريب منهم وانا باقول يلا هانتاخر وكده يعنى  ...  فلمينا الحاجات وراجعتهم ويلا يا بنتى

راحت جدتها وقفت وقالت حاجات الحقيقه ما فهمتش هى قالت ايه خالص هى كبيره فى السن واللهجه بعيده عليا بالتالي ضعت فى النص ... بس يعنى الى فهمته من الموقف ككل وتعبيرات المحيطين ان فى حاجه المفروض نستناها وحد طلع يجيبها من فوق .. كنت شاكه كده انى سمعت كلمة برسيم . بس قلت تؤ مش معقول اكيد ما فهمتش

المهم  لقيت الى طلع نازل ومعاه  حزام طويل كده طوله بتاع متر ونص  والحزام ده من القماش وهو مش مصمت ده محش حاجه من جوه مش عارفه هى ايه .. وبعدين راحت جدتها قالتلها خدي البسي على وسطك ..( فهمتها لوحدي دي )
انا مش فاهمه تلبسه فين .. المهم العروسه اعترضت وزعقت وقالت ما ينفعش هايبان من تحت الفستان .

قوم انا زهلت ... اييييييييه فى ايه مين ده الى هاتلبسه تحت الفستان يا جماعه بتاع ايه ده .. طبعا جدتها ردت عليا وانا ما فهمتش فماماتها قالتلى  ده عشان ما تتربطش .. فانا بصيت كده وقلتلها اه يعنى اعمل ايه

قالتلى هى تلفه كدهو على وسطها تحت الفستان وخلاص ... وبعدين سألتها تاني طب فهموني ده عشان ايه طيب ... قالتلى عشان ما تتربطش ... قوم انا وبدأت اتعصب قلتلها ويعنى اييييه ما تتربطش.

ويااااااريتنى ما سألت ... اه يا ريتنى ... راحت مرات خالها ( ايوه ماهو كان شعب مصر كله مشترك فى الحديث ده ) مرات خالها بقى تبرعت انها تفهمنى كده اون اييير قدام الشعب ده كله  وكملت الحديث جدتها  مشيره الى ابنها الماثل امامانا انه يا حبة عين امه اتربط وداخوا بيه  .... اه والله جرالي كده .... قوم انا بصوت خفيض (على راي البت ريم ) قلتلها هى دي مش خطوبه يا جدعان ولا أنا مش فاهمه ولا ايه

فاكد الجمع ان ده بيحصل حتى فى الخطوبه ويمتد مفعوله ويستمر ويستمر ويتوغل وينتشر ... المهم اقنع فى طنط مامتها يا ستى انا ليكى عليها هاقرالها قرآن عيب يا طنط الكلام ده يا ستى حرام ... مافيش ولا كانى موجوده

قوم فكرت كده وانا افكاري ما تخرش المايه ... وقلت عمو ايووووه هو عمو ابوها .. راجل طيار سابق وعايش طول عمره فى القاهره  .. وجريت زي ابطال افلام الكارتون عمووووووو انقذنى النجده

يا عمو الحكايه كذا وكذا والعروسه هاتعض مامتها جوه وده كلام فارغ يعنى  يا سيدى انا هاقرالها المعوذتني والكرسي ... ولو كانت طلعت اغنية يا ساتر استر من دخول الحاره كنت غنيتهالها

قوم الصدمه العصبيه بقى ان عمو يقولي ... لا لا يا اسكتى اصل انتى من البندر ما تعرفيش بلدنا ... الناس هنا وحشين اوي  ... وراح موسع كده الجمعه ومزعق فى البت عشان تلبس الحزام والى اكتشفت ان صفته انه تحزيمة البرسيم يعنى انا كنت سمعت صح للاسف

المهم العروسه كانت هاتنتحر فوقفت كده وقلت ايه الغباوه دي ما احنا راحين عند الكوافير وهى هاتلبس هناك انا باقنع الناس دي ليه اصلا .. ما انشاله ما اقتنعوا ... وروحت قلتلها ايه يا بنتى ما تسمعي الكلام بقى فى يومك ده هاتي يا طنط خلاص خلاص انا هالبسهولها فى نفسي حطيه يا بنتى فى الشنط يلا وغمزتها بقى تخرس عشان نمشي وخلاص

وطبعا ولا عبرتهم البت كانت لابسه فسان تحفه  قماشه ناعمه جدا وضيق لحد الخصر اتهبلوا دول ولا ايه هههههههههههههههههههههههه

والفرح كان فى مكان واسع جدااا قدام بيتهم وعاملين بقى فراشه وكده وبعدين خلص الفرح بدري بدري طبعا وكان فى كتب كتاب قبل الهيصه دي
ولما خلص الفرح   روحنا قعدنا فى بيت العروسه والعريس موجود .. وجالي شبه تخلف عقلي من الكلام الى اتقال والى مش هاعرف اقوله هنا الحقيقه .... وطبعا فى صورة هزار .. اه والله هزار .. بس شروع فى .... ماشوها قتل

ام هند الى غظني وقاهرنى قالك العروسه لازم تروح لبيت اهل العريس بقى سيرا على الاقدام  ومعاها اهلها  عشان ده كتب كتاب

طب يا جماعه هاو كام العروسه فستانها له ديل امريكاني (طويل شويه من ورا) هاتتمرمط كده طب ما نروح بعربيه قالوا لاااااااا ده قريب

لاخت العروسه صاحبتى طب ما تخليكى انتى هنا معايا وبلاش نروح ... قالت لا يمكن ابدا لازم اروح وانتى طبعا امال هاتقعدي هنا لوحدك ... ونزلت روحت معاهم ... ولن اقص عليكم بقى كنت  هاقع كام مره والبت صاحبتي الى اساسا  طول ركبتي كانت مسكاني من ايدى يا اخويا  وانا ماشيه باصه فى الارض احاول اتبين موضع قدمي

وطبعا طلع مشوار لطيف خااااااااااااااااااااااااااالص .. اقولهم ده قريب يا مفتريين انتم المسافات بتاعتكم غير بتاعتنا ولا ايه .

بس اكتر ما عجبنى بجد هناك ... عندهم ترابط اسري فظيع جدا بحيث ان العيله كلها اساسا عندهم من الصبح ... ناس بجد طيبين جدا بالذات جدتها ... الخضره والاراضي الزراعيه عشان انا باموت فيها ...  العيش  الى طنط بتعمله والفطير الى جدتهم بتعمله بصراحه فظيع ... فوق كل ذلك جالي عريسين وانا فى الفرح ده  .. بس يا خساره كان مكتوب كتابي ... فالواحد حس انه لقطه يعنى ههههههههههههههه

وخدوا بالكم  انا وهى لسه اصحاب جدا اينعم بنشوف بعض كل كام سنه مره عشان احنا الاثنين متجوزين وكل واحده عندها ربع دستة اشرار بس بنسال على بعض بالتليفون وبينا صلات عائليه قويه كمان

مش عايزه بقى عقد نفسيه وحد يطلع يقولي بتتريقى على بتوع الارياف وكده والله مش باتريق ده مجرد هزار باقوله لهم حتى الى خلاني اكتب صديق ليا اكتشفت انه من نفس البلد وكنت باحكيله اليوم وقالي لازم تكتبيه وكده 

اي خدمه يا عم محمد كتبنا اهو 

وده ما يمنعش اعتراضي على الايمان بالسحر بشكل مبالغ فيه تماما ومعالجته بتتم بشكل غلط

تحياتي لكمن يا حلوين  

الأربعاء، 20 أكتوبر، 2010

حب لا يهرم مع السنين



سألونى اتحبين؟ ...قلت بل أنا عاشقة وكلي حنين

قالو يوما سوف تندمين.. فالحب ان دام.... له انين

فتسائلت بعين البراءة ..لما؟ انى ارى حبه لي يقين

قالوا كم ادمى الحب من قلبلك قلوب العاشقين

فقلت وكلى خوف: وهل كانوا مثلي مؤمنين؟

ودعوت ربي.. ان إخلف ظنهم فانت لي معين

ورحت القى بذكراهم فى عقلي الدفين

فانى اريد ان اعشق بقلب خالي من الخوف اللعين

وملأت قلبي بحبه ورويت ظمأي من نهر المحبين

ورأيت حبي فى عينيه وشعرت به بين انفاسه واليدين

قالوا مرآة حب.. قد تخدعك كما فعلت فى السابقين

فلم القى بهم بالا وقلت: للخير فى الدنيا ناكرين

راعيت حبي ونما بين ضلوعي كما ينموا فى الاحشاء الجنين

فما زلت التاع لفرقاه ولو ساعة رغم السنين

وما زال قلبي يرقص طربا للقائه فى كل حين

وقلت يا ايها القائلين اصبح حبى عين يقين

قالوا وأنى لك تعلمين؟

قلت وعدنى رسول الله بفراسة المؤمنين

وشكرت واياه رب العالمين

ودعوناه ان يرد عنا كيد الحاسدين

وان يجعل لكل مؤمن حبا لا يهرم مع السنين

الاثنين، 18 أكتوبر، 2010

جاري احمد

النهارده هاحكيلكم حكايه حصلت معايا انا شخصيا  طبعا مغيره الاسامي الا يطلعلي حد يرفع عليا قضيه
هههههههههههههه

كان ليا جار  يعنى اول معرفتي بيه كنت انا فى الكليه وهو حلو كده عشر سنين يعنى
كان بيقولي يا ابله  وما كنتش اعرفهم الحقيقه اوي يعنى  بالشبه كده عارفه انهم جيرانا

المهم يعنى سنين عدت مش كتير اوي يعنى انتم عارفين انا اصلا عندي 18 سنه والواد ده كبر وبقى في الجامعه

وبعدين حيث ان انا من المصريين القدماء الى ابتكروا وصلات النت الدي اس ال للبيوت وما كانش لسه فى حد بيعمل كده آن ذاك فهو قصد جوزي واخد من عندنا وصله .. وبقى اوقات يكلمنى فى  التليفون النت قاطع كده يعنى.. كان ولد مؤدب واخلاق وذوق  الحقيقه

المهم يعنى دار بينى  وبينه مناقاشات مره على احد المنتديات الى دعاني هو اكتب فيها  وحسيت ان دماغه شاطه شويه  بس يعنى مش مشكله عادي

بعد فتره كنا فى رمضان لقيته مربي دقنه وكده قلت عااااتي .. فى العشره الاواخر قابلنى انا ورضا وقاله انا هاروح اعتكف فى المسجد وبتاع برضه قلت عااااتي الواد اتخرج وقاعد لسه مش بيشتغل واهى سنن يعنى برضه.

لكن للاسف بعد هذا الاعتكاف الولد انقلب حاله .. طهقنى فى عشتنى مناقشات على النت طبعا .. حتى بابا ورضا ما عتقهومش برضه ... مناقشات بقى عن الدين والسلفيه .. وما ادمى قلبي انه بعد ما طلع روحي مره فى الكلام وقال سلفيه ولا عشرين مره .. فى الاخر قالي هو اصلا يعنى ايه سلفيه ؟؟؟؟(وش بيشد فى شعره )

المهم اختصارا  هارسملك صوره للشاب ده حاليا وبعد حوالي 3 سنين من الاعتكاف اياه  والصوره دي وصل لها تدريجيا لعلمكم

دقن طويله .. وجه عبوس .. بطل يقول سلام عليكم لو كنت على باب البيت صدفه ... بقى قليل الذوق جدا فى الكلام مع رضا   وبيزق فى  الكلام وحاجه قرف ....مراته لابسه طبعا نقاب خمس طبقات واستك  هو جايبها كده على الجاهز .. ايوه مراته اتجوز من سنه ... غالبا ابوه بيصرف عليه لان اكيد تحفيظ القرآن فى الجوامع ما يفتحش بيت(ليسانس اداب هو وكان نفسه يشتغل مترجم وكان بياخد كورسات وبيدور على شغل بس ده قبل الاعتكاف)
 .. من آن لاخر نسمع صوت زعيق وصويت ويوقولوا احمد بيتخانق مع ابوه ... اه اه اه والله حصل

واقولكم كمان اخته لبست النقاب وابوه واخوه ربوا دقنهم وكده يعنى

اخر موقف فاكراه له .. انه اتخانق مع اخو مراته وحماته وشتيمه وقلة ادب وصوت عالي فى  الشارع واحد الجيران قال انه زعلان من حماته لانها كانت عازماه على الفطار فى رمضان واكلته سمك مقلي والسمك المقلي كان بطنه فيها تووووووووم اي  والله فيها توم .. وبعد ما اكل التوم وهو مغيب تقريبا مش  هايعرف يروح يصلي التراويح فى المسجد ... تقريبا ما عداش  عليه الجزء بتاع الحديث الى بيقول فليميتهما طبخا  البصل والتوم يعنى

حزينه من قلبي على الدين والى جراله
حزينه من قلبي على الشباب وعقولها المغيبه

مضايقه منهم ومخنوقه من المشايخ الى معبيين دماغهم
مضايقه من كل ولي امر وراع غافل عن رعيته

حسبى الله ونعم الوكيل

الثلاثاء، 12 أكتوبر، 2010

الزوجة المصرية

ازيكم يا اصدقائي

النهارده عايزه افش خلقي الحقيقه فى نقطه معينه لاحظتها فى مجتمعنا الحبيب ما عندكوش فكره انا باحبه ازااااااي

الفكره دي انا باشوفها خاصه اكتر بالمجتمع المصري طبعا مش كل الناس لكن نقول الاغلبيه العظمى والله اعلم

الا وهى ان الست المصريه هى ام  اولا    ثم  زوجه  والباقي مش مهم

يعنى الكلام ده
الاول اقولكم مقوله انا دايما باقولها  لما نتكلم عن اختلاف الشخصيات العربيه اقول يعنى مثلا الزوجه المصريه ام فى المقام الاول  والزوجه السوريه زوجه فى المقام الاول  اما الزوجه اللبنانيه بقى بالصلاة على النبي مزه فى المقام الاول  J

بقيت الزوجات العربيات بلاش بقى الا يزعلوا J  لا الحقيقه ما خالطهومش كفايه عشان احكم

الحقيقه بدأت احس ان المجتمع بقى وحش مفترس وبيفرض نفسه على الجميع وايا من يخالف قواعده الغير سليمه اصلا يبقى معرض للنهش من جميع الاتجاهات ومش مبالغه والله انى اقول نهش دي حقيقه

وده يمكن راجع لان ما حدش فعلا بيسيب حد فى حاله وكل الناس بتدخل فى حياة كل الناس بطريقة تضايق كل الناس

هاتكلم عن الزوجه المصريه  الى بجد ومن غير مجامله  ولا تحيز فعلا مظلومه  حتى لو كانت مقصره فى بعض النواحي  لكن لو فكرت تصلحها  ما بتلاقيش دعم بالعكس بتلاقي مهاجمه

هاقولكم القانون الى بيعتنقه المجتمع فى حال الزوجه المصريه

المجتمع المصري بيقول الست المصريه هى ام وما دام بقت ام فده مقدم على كل شيء فى الحياه بشكل مبالغ فيه
يعنى  اي اجراء تاخديه فى حياتك موجه لكونك تكوني حاجه غير الام مش مسموح لك  حتى لو كان الدور ده هو زوجه ولو لابو ابنائك
كل الى المجتمع عايزه منك تكوني ام متفانيه مضحيه تمحي شخصيتك واحتياجاتك وحياتك كلها فى سبيل امومتك

ومش معنى كده ان الست الى بتعمل كده المجتمع بيديها نيشان الامومه ...اطلاقا مطلقا

ده المجتمع بيوجه لها اصابع الاتهام مباشرة فى حال الزوج عينه زاغت ولا اتجوز عليها ويقولها اخس عليكى كده  تهملي جوزك ؟؟؟ برضه انتى غلطانه ماهو من حقه يعيش

ولو الست بقى مدهوله ومتخلفه عصريا  وفكريا  برضه يوجهوا لها اصابع الاتهام المباشر فى انها اهملت نفسها حتى اصبحت  بلا هويه فكريه

طيب هى تعمل ايه ؟؟؟  ترضى المجتمع ازاي ؟؟

انتم عارفين المجتمع ده مين بالنسبه لها ؟؟

المجتمع ده امها  وابوها واخواتها وجوزها  وصاحباتها  وكل من هم حولها  ... وما تقلوليش  هى غلطانه انها سمعت كلامهم
امال تسمع كلام مين .. ماهو غصب عنها لازم تثق فى الناس الى حواليها او جزء منهم ...

حتى لو حاولت تخرج من النطاق ده  بتلاقي مهاجمه شرسه جدا  لدرجة انها فى وقت من الاوقات بتشك فى نفسها وتقول يعنى مش معقول انا بس الى صح وكل الناس غلط مؤكد انا غلطانه وبتسلم بالامر الواقع حتى لو ما كانتش مقتنعه بده


حد فيكم جرب يقف كده مع نفسه ويحس نفسه واقف فى جزيره قاحله  وحده وسط البحر وامواجه العاليه ؟؟

اهو ده الاحساس الى ممكن يحسه حد افكاره تخالف افكار المجتمع او الناس الى حواليه

عارفين لو الواحد لقى فى الجزيره دي شخص واحد بس يقوله اثببببببت انت صح  وعندك حق

ممكن يقدر يستحمل ويكمل .. بس لو ما لقاش البنى ادم ده فى صورة اخ او صديق او زوج  او ام  مش هايقدر يكمل لواحده
هاينسحب ويدفن افكاره ويحاول يتعايش مع الكون الى حواليه بطرق كتيره غير قناعاته وفطرته

الام فى مصر مش مسموح لها تكون اي حاجه غير ام  حتى لو ابدى بعض الاشخاص مشاعر تانيه غير دي

لكن الحقيقه ان الام  مش مسموح لها تكون غير ام

لو فكرت ام مثلا انها تروح تتعلم كمبيوتر او لغات او سواقه ... تلاقي حد بيقولها ليه انتى عايزه تشتغلي ؟؟؟
(الشغل هنا ممثل فى انها برضه تجيب فلوس تصرفهم على ولادها ) اه لتفكروا حاجه تانيه
لو قالت مش عايزه اشتغل ... تلاقي الامتعاض على وش الى قدامك طب وبتتعلمي ليه ؟؟ ما ولادك اولى بالوقت ده !!!!!

مليون حد قالي الكلام ده بخصوص تواجدي على الكمبيوتر والانترنت . واخدي كورسات فى اي حاجه وتعليم السواقه وزياره اصدقائي   واي حاجه باعملها مش على مزاج المجتمع الكريم ... مش ولادك اولى بالوقت ده ؟؟؟

الله هم العيال لما بيجوا الدنيا بيشتروا اهاليهم ؟؟ ولا سيما الام طبعا الاب لا ده بيجري فى الدنيا ومن حقه يرفه عن نفسه ويقعد مع اصحابه وينام ويانتخ ويتعلم ويسافر وكل حاجه

اما الام لازم تكون مضحيه بكل ما هو عزيز وغير عزيز كمان وبشكل مبالغ فيه

مع العلم ان ده مش صح ومش كويس عشان الابناء على المدى البعيد بس الى يفهم

الامومه شيء جميل وشيء مقدس ومقدم على كل شي ... ده حقيقى

بس بنقول مقدم على كل شيء يعنى فى حاجات بعده مش الجدول لكله يتمسح من بعدها

الامومه مش معناها  الغاء كل النشاطات الحياتيه الاخرى  فى سبيل الامومه فقط

الامومه غريزه طبيعيه فى البشر خلوها تمشي زي ما هى  وتاخد حجمها الطبيعى

تبقى الست ام  وزوجه وابنه واخت وصديقه ومتعلمه ومثقفه  ولها هوايات ولها حياه شخصيه متميزه مش ممسوخه
ايه يضير الامومه فى ذلك ؟؟

احنا ليه بنبالغ فى كل حاجه لحد لما نمسخها ونخليها فاشله

تسعه وتسعين فى الميه من المجتمع لو عرف ان الام سابت عيالها مع اي حد ولو كان جوزها ولا امها وخرجت مع اصحابها مثلا يوم  .. تفك   عن نفسها تغير جو تحس انها شخص تاني غير ماما وبس

هايمتعضوا ويقولوا وهان عليها تسيب عيالها ؟؟؟ او يقولوا شوف الهيافه والنبى ...  او يبادر بالسؤال  : وده فايدته ايه المشوار ده ؟؟؟   صدقونى حتى لو اظهروا عكس ذلك ده بيبقى جواهم

والمشكله ان المجتمع بيغير فطرتنا وافكارنا بياثر علينا
بيدخل قناعات جوانا
قناعات ضد الفطره .. قناعات قد تكون فى بعض الاوقات هدامه
تلاقي الست نفسها اوقات هى الى حاسه انها لو فكرت تكون اي حاجه غير الام فهي كده بتعمل جريمه
المجتمع بتاعنا توحش فى الظلم

بقت الى بتتجوز بعد موت جوزها او طلاقها وهى عندها عيال متهمه
وتلاقي الف من بيمصمص شفايفه ويقول ولازمته ايه ما كانت قعدت  تربي عيالها
وهو نفسه المجتمع الى طول ما هى قاعده من غير جواز متهمه واوقات متهمه فى شرفها بدون داعي


المشكله ان فى النهايه بتلاقي المجتمع عامل مع  بعضه زي ما كانوا عاملين فى جحا
عارفين حكاية  جحا وابنه والحمار ؟؟ بالظبط  كده صدقوني فى النهايه مش هاتقدروا ترضوا الكل

                                                   وبناءا على ما سبق ذكره

 انا قررت من زمان اكون نفسي اولا
ارضي ربنا
ارضي نفسي
ارضى الى يهموني  على اد ما اقدر مش اموت نفسي يعنى
وطزززززززز ومليون طززززز فى اي حاجه تانيه

بس اوقات وغصب عني ومن كتر الضغط
باجي على نفسي لحساب الى يهموني

بس برضه لازم اكون نفسي مش مسخ على هوا المجتمع

الأربعاء، 6 أكتوبر، 2010

له فى خلقة شؤن


انا مؤمنه تماما بان مافيش حاجه بتحصل في الكون ده اعتباطا وانما كل حاجه بتحصل مخطط لها ومقدر انها تكون بامر الله وعلمه ولحكمته



وله فى خلقه شؤن



احيانا بيحصلى موقف مثلا واستغرب اوي واقول ليه ؟؟ ليه حصل ده ؟؟ وافضل شايلاه فى الذاكره على جنب كده واقول مؤكد له عوزه بعدين



اسمحولي النهارده عايزه اسجل حاجه هنا معاكم جايز فى يوم احتاجها



مره من حوالي سنه ونص كنت فى البنك المفروض هما الى طالبينى عشان شوية اوراق فدخلت على الموظف وعرفته بنفسي انا فلانه رحب بيا وقالي طب اتفضلي معلش دقايق اخلص العميل الى معايا



العميل ده رجل متوسط الطول ورشيق القد وعمره اديته الخمسينات عنده شعرتين كده مهتم بيهم ومطولهم وقالبهم على جنب عشان يداري الصلعه ومعاه بنت اموره كده فى العشرينات قدرت انها بنته



لاحظت انه لما سمع اسمي رفع عنيه وبصلي قلت جايز يعرف حد من العيله



المهم الموظف استاذن وقام لقيت العميل ده بيبصلي وبيقولي هو حضرتك من عيلة كذا

قلتله ايوه .. الى من المكان الفلاني .. قلت ايووووه



قالي انا والدتي من عيلتكم .... قلتله اهلا وسهلا يا فندم .... طيب نتشرف بك



قالي انا فلان ..... قلت وانا باحاول اركز : عمو فلان يبقى لك ايه



الراجل اندهش ورفع حواجبه لفوق وقالي عمو فلان؟؟؟؟؟ ده يبقى اخويا الصغير



وبتقولي عمو ده انتى هاتكبرينى كده .... ضحكت وقلتله اعمل ايه طيب ماهو صاحب عمي وطول عمري باقوله يا عمو ده عمي دلوقتي عمره 57 سنه



المهم كلمه من هنا على كلمه من هنا ك عرفت عيلته كويس بس هو ما كنتش اعرفه لانه كان مسافر بره طول عمره لكن عارفاه بالاسم



عرفنى ببنته وحكالي على الايام الخوالي ايام ماكان فى الكليه وكان زميل اعمامي فى السكن فى القاهره

سابلي ارقام تليفوناته وقالي انه مسافر بعد 24 ساعه لو ما عرفش يشوف فيهم بابا اول ما ينزل مصر تاني هايكلمه هو او عمي



واعطيت تليفوني لبنته فى حال احبت تتواصل وافترقنا ورجعت البيت حكيت لبابا ولعمي فى التليفون وبلغتهم السلام والتليفونات



وبابا حكالي قصة حياة الاخ ده وقالي انه عاش طول عمره بره مصر وكان ابوه لما يقابل بابا يقوله انا زعلان على فلان طول عمره متغرب ما عملش اي حاجه غير فيلته الى كل ما ينزل اجازه يهد الى بناه ويبنيه تاني وفى الاخر بعد لما فرشها كان بيقضى فيها الاجازه بس.. وانه من سنتين كده مراته توفاها الله بعد مرض .....



وبعد سنه من مقابلة البنك دي جه عمي وقالي انه الراجل ده اتصل عليه وقاله انه بمصر وانه نازل يعمل فحوصات وانه تعبان

فسألت عمو تعبان لاي مدى يعنى عنده ايه . فصدمنى وقالي نازل يدور فى عملية زرع كبد



المهم عمو راح يزوره وروحت معاه ومش عارفه ليه ارتبط عاطفيا بالقصه كلها



بصراحه على اد ما باحب زيارة المريض وثوابها على اد ما احيانا بتتعبنى نفسيا

الرجل تقريبا خس النص وصحته تعبت جدااا وما عادش قادر ياخد نفسه وحالته بقت صعبه جدا



استضفنا فى فيلته الجميله على النيل .. واستقبلتنا ابنه اخرى له



الفيلا زي المهجوره والموبيليا متغطيه والدنيا مكركبه



واستضافنا فى اوضته لانه مش قادر يقعد معانا فى الرسبشن



وبنته الهاديه الاموره جداااا قالتلى ان اختها الى انا شوفتها من سنه اتجوزت وقبلها اخوها وهى الى باقيه مع ابوها بس بتدرس فى الكليه

بالتالي هى قاعده فى مصر فى بيت العيله مع اعمامها وبتيجى الفيلا لما يكون باباها موجود بس



طبعا سبتلها تليفوني وطلب منها ضروري تكلمنى ونزور بعض لان بصراحه البنت صعبت عليا اوي بوحدتها وكمان مامتها متوفيه



المهم رجعت قعدت مع عمو وصاحبه المريض الى كنت قلت اكيد لما قابلته السنه الى فاتت كان تعبان بس مش باين عليه



اصل مش معقول فجأه كده عايز زرع كبد



لكن الراجل حكالنا حكاية مرضه والى بدأت بان رجله بتوجعه ووارمه فعمل

تحاليل وفحوصات ودخل من شارع على حاره مع الدكاتره وهكذااااااا فى خلال اربع شهور فقط



وبعد كام شهر من الزياره دي يا جماعه وبعد رحلة علاج مضنيه الراجل ده توفاه الله تعالى



ومش عارفه لحد الان انا ليه قابلته واتعلقت بقصته وبشخصه المتفائل المقبل على الحياه وعنده امل لسه انه لما يرجع من غربته هايعيش في مصر ويستقر وينعم بحصاد السنين



وما بيروحش من دماغي شكل الفيلا الجميله اوي والى فى نفس الوقت خاويه على عروشها



ما بيروحش من دماغي كمان بنته الصغيره الوديعه الوحيده



ما بيروحش من دماغي تفاصيل قصته مع المرض وهو بيحكيها باعياء



ولا بانسى نظرته ليه واحساسي انه كان مشفق عليا وحاسس انى ماليش ذنب اقعد مع العواجيز واسمع كلامهم الممل وما يعرفش انى مش راحه مجرد صدفه انما مش عارفه ليه انا روحت مع عمو لما قالي انه رايح عنده



حقيقى مش عارفه ليه اثرت فيا جامد القصه دي ومش عارفه اصلا ليه قابلته ولا ليه انشغلت بحاله ؟؟؟!!!



الله تعالى اعلى واعلم



الى كل مغترب من واحده جربت الغربه قليلا .... ارجوكم خلوا بالكم من سنينكم وعمركم ما تخلوش الغربه تسرق عمركم وتعيشوا طول عمركم تستعدوا للحياه القادمه بعد الاستقرار وتنسوا تعيشوا الحاضر



تحياتي لكم يا اصدقائي ومعلش لو نكدت عليكم



وادعولي من فضلكم ربنا يقدرلي الخير