الأحد، 29 مارس، 2009

تاج من احساس طفله

تحديييييييث:
المهدى لهم التاج حسب ما قلنا اول عشره فى التعليقات غيررغيي انا وكيارا واستثناء الى جاوبوه
*****************************************************
وباشكرها على انها بطحتني بهذا التاج الجميل
ههههههههههههههههههه
ايوه اصل انا ما باحبش الامتحانات يا اختي
المهم نروح على التاج نجاوبه
اسمك ؟
اعتقد كل الناس عارفه اسمي بس انا بقيت احب اسمي الى بقاله خمس سنين لازق فيا صبرني يارب
الاسم المشهوره بيه وسط اصحابي
ايام الدراسه كانوا بيقلولي اصحابي والمدرسين يا خولي وده اسم عيلتى عشان كان معايا ناس كتير اسمهم زي اسمي
السن ؟
ثلاثون عام وشهر واسبوعين
مجال دراستك ؟
انا درست فى كلية تجارة قسم محاسبه
بكل حب دخلت الكليه دي واخترتها قبل ما ادخل ثانويه عامه مش دخلت مجبره بمجموع ولا تنسيق
اسم مدونتك؟
طيب يعنى هو انا مخبيه الاسم
رغي امرأه غير مطحونه
صورتك الرمزيه فى المدونه بتعبر عن ايه ؟
بتعبر عن انى باقول صبرني يارب
هل فكرت فى اغلاق المدونه ؟ والسبب ؟
يا لهوي يا مستهوي كلا البت لم افكر هذا التفكير الاسود
ده مدوناااااتي مش واحده انتم عارفين دول هما متنفسي الوحيد واستاذتي وطلابي فى نفس ذات الوقت
ولا يمكن ابدا بتاتا البته اكون فكرت كده قبل كده لكن الله اعلم فى الى جاي
ولو ان انا لا احد يقصينى عن مكاني اطلاقا
ايه رد فعلك لو حد قل ادبه فى التعليق ؟
باشيل تعليقه عشان دي مدونه محترمه حتى لو كان قالل ادبه على حد تاني وبارد عليه واديله فين يوجعه بس بادب برضه وانساه ولا كأني شوفته عاااااااااااادي الحكايه ما تستهالش ده انا حتى خدت حسنات على حسه
اسوأ مدونه ؟
دول عارفين نفسهم مش محتاجين نقول عليهم
وعموما هى اي مدونه صاحبها او صاحبتها لسانهم زفر واي مدونه لا تحترم اراء الاخرين فى نظري دول اسوأ بشر مش اسوء مدونات بس
هايحصل ايه للاميل بعد ما تموت ؟؟
مش عارفه جايز ابقى اوصي به للبت مريم هههههههههههههههههههههههههه
اديت الباص وور لحد قبل كده ؟؟
انا اميلاتي انا وجوزي ملخبطين على بعض واحنا عندنا كام باص وورد كده بنستعملهم وهو عارفهم وانا عارفاهم عااااااتي
بس مش معنى كده اننا نضايق بعض
السفر بالنسبالك ايه ؟
انا باحب السفر اوي لكن ما باحبش الغربه
لكن عموما انا اتغربت فتره بسيطه واتعلمت منها كتير وسعدت فيها كتير وتعبت فيها كتير برضه
الحمد لله
المود بتاعك ايه ؟؟
حاليا يعنى ؟؟؟
اكتئاب واحباط مصاحب للازمه الاقتصاديه العالميه واستهبال الناس المحلي
ههههههههههههههههههههههههههه
بتعمل ايه فى وقت فراغك؟؟
فراغي ؟؟؟
يعنى ايه فراغي دي هههههههههههههههههههههه
هو بعد ما يبقى الواحد عنده 3 عيال و3 مدونات يبقى عنده فراغ برضه هههههههههههههه
هو انا كل وقت فراغي باقضيه على المدونات بتاعتي والنت عموما لكن انا مش حاسه انه مجرد وقت فراغ باقضيه لا بالعكس ده انا باعتبره حاجه مهمه اوي لكن لانه ينفع يتأجل احيانا فبيكون فى اواخر اولوياتي اليوميه
انما ما اعرفش اعيش فى فراغ ما اقدرش اقعد وانا مش باعمل حاجه
الاكله المفضله ؟
كل الاكل الى انا باعمله بايدى باحبه
الصفات الى اخدتها من والدك ؟
الصبر والقرايه والصدق
الصفات الى اخدتها من والدتك ؟
النشاط والحركه والمطبخ وحاجات كتير تانيه بالاضافه الى العصبيه كماركه مسجله باين للامهات
اكتر ست حاجات بتكرهم ؟
اشمعن سته يعنى
الكذب
الضعف
قلة الادب وطولة اللسان
اذية خلق الله
الظلم
الكسل
اكتر ست حاجات بتحبهم ؟
حاجات ؟؟
ما ينفعش ناس ؟؟
طيب جوزي وولاد وماما وبابا كده سته ههههههههههههههههه
خلينا فى الحاجات
البحر : وده لوحده حاجات كتير سماه وهواه ورمله ومايته وموجه وسمكه كمان
سته اهم
ههههههههههههههههههه
شخصيتك نوعها ايه ؟
قويه
بس مش فتريه والله ههههههههههههه
لكن انا مؤمنه ان المؤمن القوي خير واحب الى الله من المؤمن الضعيف
وكمان عصبيه ومجنونه حبتين عاااااااااتي
لماذا دخلت عالم التدوين ؟
عشان ارغي طبعا ايه السؤال ده
هههههههههههههههههههههههههههههههه
كنت بادور على مكان اكتب فيه والناس تسمع صوتي اكتب بحريتى والى يقرولي يكنوا ناس بيفهموا وقد كان الحمد لله
احلى جمله قيلت فى وصف مدونتك؟
لا مش عارفه بقى اي حاجه تتقال عن مدونتي انا راضيه بها كل واحد حر فى رايه
أهمية التعليقات بالنسبه لي ؟
لا ده موضوع مهم جدا بالنسبه لي ولازم ارد على كل تعليق لوحده احتراما وتقديرا لصاحبه
وما زلت لما باشوف تعليق اي حد بافرح به زي اول تعليق جاني على اول بوست فى المدونه
وكمان قوة التعليقات (مش عددها ) بتدينى مؤشر لاهمية الموضوع محل النقاش عند الناس
احلى بوست كتبته ؟
انا كل بوستاتي حلوه
هههههههههههههههههههههههههههههه
بجد مش عارفه لكن انا ممكن اقول انى حبيت اوي بوستاتي الى كتبتها فى اول دخولي عالم التدوين
أفضل مدونه قراتها؟
فاضيين لحد سنة كام ؟؟
لا ما اقدرش اقعد اعد ده كتير اوي
وانا عايزه اقوم اطبخ الرز ههههههههههههههههههههههه
أفضل بوست قرأته ؟
عندي قايمه اسمها قرات لك فى مدونات الحبايب فى مجموعه حلوه من افضل ما قرأت .
الشغل بالنسبه لك ا يه ؟
انا حاليا باشتغل ماما
وده شغل انا اخترته لنفسي وبالنسبه هو اساسا حياتي كلها
لكن ده ما يمنعش انى نفسي اشتغل عشان اهرب من البيت شويه ههههههههههههههههههههههههه
بس مش هاين عليا اسيب الولاد
الانترنت بالنسبه لك ايه ؟
انبوبة الاكسجين تحت مياه المحيط
من غيره اغرق فى الحلل وانسى دماغي او اعينها فى الدولاب احسن
اااااااااخر سؤال ايه ده طويل اوي التاج ده
تمرر التاج ده لمين ؟
لاول عشره يعلقوا عليه ولاي حد عايزه
عارفين لوماعلقتوش عشان ما تجاوبوش
ههههههههههههههههههههههههههههههههههههههههههه
شكرا لكي يا احساس طفله على التاج ونردهالك فى الافراح وابعتلك تاج اطول من ده واعذببببببببك
ههههههههههههههههههه

الاثنين، 23 مارس، 2009

ازمة منتصف العمر(تحديث مهم يا قوم)

تحديث تاني مهم جدا
شهد شاهد من اهلها
وانا بامر على الاخوه المدونين كالعاده لقيت الموضوع ده فى مدونة هانعيش يعنى هانعيش
معبر جدا البوست ده وذو علاقه وثيقه بالكلام الى قلناه هنا ويلخص الموضوع ببساطه وهدوء جدااااا
*****************************************************************************************
تحديث هاااااااااااام صدر قرار من الباب العالي خاصتي (رضا يعنى ) انى اغير كلمة مرحلة الكهوله واخليها مرحلة النضوجه ههههههههههههههههههههههههههه
ايوه هو غيرها مش عاجباه
مع انه لسه ما تمش الاربعين
ههههههههههههههههههههههههه
**********************************************************************************************
السلام عليكم يا ايها المدونين الكرام

في موضع شاغلني بقاله فتره كبيره وانتم عارفني لما افكر فى حاجه هاتك يا قرايه ودعبسه وفرتكه واخيرا هاتك يا رغي فيه الموضوع لحد لما اكون عنه فكره مرضيه لدماغي الي جايبلي تعب القلب ده

المهم الموضوع زي ما شايفين هو ما يطلقون عليه عباقرة الزمان بتاعنا أزمة منتصف العمر

بصرف النظر عن التسميه دي وصحتها من عدمها الا انى شايفه انها موضوع كبير جدا ومش سهل تحليله

اولا : نعرف ايه هو منتصف العمر الى هو امته يعنى

ده من وجهة نظري المتواضعه عند الرجال من 40 الى 50 سنه وعند الستات من 35 الى 45 سنه

وثانيا بقى ايه هى ازمة منتصف العمر وملامحها وايه الى بيحصل فى الحقيقه مش لاقيه لها ملامح محدده

الا انها تكون فى هبل بيطبق على عقول الناس فجأه كده .

لا لا مش قصدي والله بس تلاقيهم فجأه فعلا بيتغيروا ويعملوا تصرفات مش من شيمهم وفى بعض منهم بيهد حياته كليا او يخربها وزي ما يكون قاصد يعمل كده .

وبعض الناس بتقول ان فى السن ده بيحصل مراهقه متأخره وان الى ما عاشش مراهقته (مش عارفه ازاي ما عاشهاش هو لازم يشرب سجاير ويضرب بانجو ويمشي مع بنات المنطقه كلها ولا يزور ام حسن كتاكت صديقة الطلبه عشان يبقى عاش مراهقته ؟؟؟).

المهم بيقولوا ان الى ما عاشي مراهقته بيرجع يعيشها بقى وهو عنده 45 سنه مثلا وده في رايي كلام يكيل بالباذنجان .

لان المراهقه مش لازم تتسم بالفسق عشان تبقى صح يعنى . يمكن تتسم بالرعونه او الاخطاء لكن مش لازم تكون منتهى الفسق والفجور مثلا .

انا شايفه ان هذا الراي بتاع المراهقه المتأخره راي مش واقعي تماما لان بالعكس كتير من يتعرضون لازمة منتصف العمر ومن بؤهم قالوا احنا كنا اشقيه واحنا شباب بس لما خلصنا الجامعه خدتنا الدنيا والحياه واتجوزنا وعقلنا بس ..........

بس دي بقى لازم يجي بعدها كلام كتير اوي وبيختلف من شخص لشخص هاسمعكم شويه

الاول احب اعرفكم ان ازمة منتصف العمر دي المفروض بيتعرض لها الجنسين الا انى من خلال بحثي ونخورتي فى نفوس البشر شايفه ان الرجال اكثر تعرضا لها فى مجتمعنا ليييييييييييه بقى ؟؟ هانقول لسه الكلام ده .

اسمعكم بعض ما سمعت من ناس فى العمر ده :

واحد كان عمره 41 سنه تقريبا قال: مش عارف انا جرالي ايه انا باقي ناقص عليا اقف اعاكس بنات فى الشارع .. انا خايف فعلا . ومش عارف انا باعمل كده ليه انا بقيت بافرح باي كلمه تتقالي من اي بنت صغيره من الى معايا فى الشغل زي العيال الصغيره

شخص آخر قالي انا فجأه حسيت انى مش عايش انا حسيت انى ثور مربوط فى ساقيه . كل يوم الف فى الساقيه من الصبح لحد بالليل باروح الشغل واشتغل وانجح وبارجع البيت اكل واشرب وانام وامارس حياتي الزوجيه بكل فصولها . بس حاسس انى باعمل كل ده وانا ميت وانا مش حاسس باي لذه ولا سعاده منه
حتى شغلي رغم نجاحي فيه الا انه بقى بالنسبالي ممل وخنيق . مش عارف اعمل ايه ؟؟؟!!!!! ومش عارف بيجرالي كده ليه ؟؟!!! انا خايف اكون باتبطر على النعمه وتزول من وشي زي ما بيقولوا بس والله انا حامد ربنا وشاكر فضله عليا بس انا تعبان اعمل ايه ؟؟؟؟؟؟؟؟؟ غصب عني

شخص ثالث وده صديق عزيز يعنى قالي شوية كلام بعدها قلتله دي ازمة منتصف العمر يا استاذنا .حسيت انه اضايق . وقالي : لاااااا دي والله ازمة عمر بحاله .

وفي اجابة الصديق ده انا لقيت بجد الاجابه على حاجات كتير كانت بتدور فى دماغي وهى ان ازمة منتصف العمر فعلا هى ازمة عمر بحاله لكن ........

بتتفجر عند نقطه معينه ..... طيب ايه السبب ؟؟ ايه سبب الازمه دي ؟؟؟ وايه يخليها تتفجر فى الوقت ده من العمر ؟؟

وجهة نظري ا لمتواضعه بقى

ان السن ده هو عبور لمرحله جديده والى هي حسب علم النفس وتقسيمه لعمر الانسان هى الكهوله

ايوه بينتقل من الشباب للكهوله(النضوجه) . فجأه بيلاقي نفسك كبير بيلاقي ولاده بيكبروا وولاد اخواته مثلا الى كان بيشيلهم ايه ده كبروا واتجوزوا وخلفوا !!!!! ايه ده هو انا عجزت ولا ايه ؟؟؟؟

طيب يعنى بس انا صحتي زي الفل والحمد لله ... بس ايه ده ؟؟ انا كده خلاص ما بقيتش شاب طيب ايه ؟؟؟ فين الفاني بقى في الموضوع ؟؟

انا كان نفسي اعمل حاجات كتير اوي وما عملتهاش ؟؟؟ طيب هاعمل ده امته ؟؟؟ طب انا سعيد ؟؟؟ لا ولا سعيد ولا زفت ده انا متنيل بستين نيله .

وبالنسبه للستات تبدا بقى الجنان الرسمي من انها مش واثقه فى نفسها ويا اما تبالغ فى الاهتمام بنفسها وتطرب لسماع المعجبين من حولها يا اما تعمل العكس تهمل نفسها اكتر واكتر وتبعد عن جوزها اكتر واكتر واكتر وتقول ما عادش بيحبنى اصل عجزت وطبعا هو ممكن يكون هو كمان فى نفس ذات المرحله العمريه الى ممكن يحصل فيها ازمة منتصف العمر .

وبالنسبه للرجال يبدأ اولا يثبت لنفسه بقى فحولته . ايوه ماهو احنا كشرقيين بنربط الرجوله والشباب بالقدره الجنسيه . عقلنا مقضينا على كده .

وكمان فاكرين هرم ماسلو ؟؟

لما قلنا ان فى الدرجه الثالثه من الهرم الى هى الحاجات الاجتماعيه لما قلنا ان بتبدأ تظهر تاني الغريزه الجنسيه بس بشكل عالي المستوى هنا مش عايز بس اشباع جسدي عايز كمان اشباع نفسي من الغريزه دي عايز الفه جنسيه ورضا جنسي من الشريك

وطبعا طبعا هايكون فى المرحله دي مر على جوازه من 10 الى 15 سنه والولاد كبروا والام مشغوله بهم . وهو طول عمره مكبر دماغه من العيال ومالوش دعوه بهم بيشتغل ويجيب فلوس بس .

سبل التواصل بينه وبين مراته قل . اها هو ما يهموش يسمع مواويل العيال مش من اختصاصه . وهى كمان ما يهماش اوي تتكلم فى الكوره ولا فى الاستمباط الى جت معيوبه من الصين .

كمان بقى في قيود حطينها حواليهم كتير مع وجود العيال واساسا هما بعدوا عن بعض تدريجيا وجايز بنوا بينهم سور كبييييييير من الجليد كمان وبقت خيبه

ومن هنا بقى تبدأ تطفو على السطح مشاكل كتير واحلام كتير ضايعه عايز الشخص يلحق يحققها ما خلاص بقى هاعيش امته ؟؟؟
وكمان الولاد كبروا دلوقتي اقدر اسيبهم

ويلاقي البنى ادم من دول الف سبب وسبب لتجريح شريك حياته ووصفه بكل حاجه وحشه عشان يهرب من لوم ضميره والمجتمع والشريك نفسه

ويلاقي كمان الف واحد ه عاجبها البيه المدير وبدلته وهيئته وعربيته ولسانه الحلو الى ما بيطلعش الا معاها اه ما هى حلوه وصغيره ولسانه بينقط سكر ومزوقه وبتفهمنى مش زي التحفه الى في البيت

(الى زمان كانت زيها وبتفهمه ومزوقه برضه وزي الفل بس هو غار عليها وقعدها من الشغل وقالها ما تتزوقيش عاجباني من غير ماكياج وقالها ما تكلميش صاحباتك دول مش مريحينى . وبلاش النت ده فيه قلة ادب . وبلاش تروحي ا لنادي وقتك وبيتك اولى بيكى وقالها ما تدخليش فى شغلي وما تاخديش قرارات فى البيت انا هنا الراجل وعمل منها كائن مالوش الا فى البيت والعيا ل والطبيخ )

وتلاقي الف واحد بصباص وزباله متجوز ولا مش متجوز يخرب عليها ويقولها اطلقي وانا اتجوزك ويلبس قناع الحب والفضيله ويقولها انا ما عشتش الا لما لقيت ويقولها جوزك ده ما يستاهلكيش ده انا كنت مكانه كنت شيلتك على راسي وعملت وسويت وهديت الدنيا عشانك .


وانا شايفه انها اكتر ظهورا عن الرجل فى مجتمعنا لان ببساطه الست فى المجتمع عندنا متحجمه واساسا احلامها محدده جدا وصغيره جدا ولو حاولت تثور على الاوضاع مش هاتلاقي حد ينصرها ابداااااااا وهاتكون مجرمه فى حق اولادها وبيتها وجوزها وتصب عليها اللعنات طول عمرها فده كفيل ان الازمه دي تتخنق جواها قبل ان تنفجر اساسا

اما الرجل فى مجتمعنا بالعكس لو عمل كده بيلاقي فريق من المشجعين والمتعاطفين معاه وكمان بيصبوا اللعنات على مراته الى ما عرفتش تحافظ عليه واهملت نفسها و و و و ..............
وكمان الرجل منذ نعومة اظافره مطلق ا لعنان والحريه لفكره وحلمه وامله خصوصا فى الناحيه الجنسيه

وهنا بتحصل الصدمه دايما لما الرجل الى شاف افلام جنسيه مبتذله وهبله بعدد شعر راسه يتجوز واحده اقصى حاجه شافتها زينات صدقى بتبوس عبد السلام النابولسي .
صحيح ده مش موضوعنا بس للاسف ان الصدمه دي بتفضل وبتستمر وما حدش بيعالجها والامور بتمشي زي بعضه فى اول خمس سبع سنين من الجواز على طريقة احسن من مافيش الا انها زي ما قلتلكم وقلنا فى هرم ماسلو ان بيجى وقت البنى ادم بيحتاج فيه اكتر من كونه اشباع جسدي

وطبعا طبعا بنصرف بنادول مع البوست عشان الصداع
بس وربنا انا الى عندي صداع وجايه من عند دكتور الاسنان حاشيه اربع ضرووووووس
وشكلي هدخل على منتصف العمر على الثلاثين هههههههههههههههههههههههه


اه نسيت اقولكم الاخ بيبرس الى كان لغى مدونته الى كان اسمها سهران لوحدي لاسباب مجهوله وشكلها ضغوطات خارجيه
رجع عمل مدونه تانيه اسمها سهران لواحدي 2
على غرار نورماندي توووو تووووووو توووو
هجوووووووووووم يا اعضاء الجمعيه على بيبرس


السبت، 21 مارس، 2009

امهاتي الحلوين ... كل سنه وانتم طيبين(تحديث)

تحدييييييييييييث مهم جدا يا جودعان البت مريم بنتى اول لما صحيت الصبح لقيتها عاملالي المفجأه دي وعاملالي كارت على الكمبيوتر
والله فرحت اوي بجد وهما جابولي هديه اه بس الكارت ده بجد كان مفجأ÷ حلوه ما كنتش اعرف اصلا ان مريم بتعرف تشتغل كده على الكمبيوتر
والاجمل بقى انها عملت لباباها كمان كارت
البت دي جدعه على فكره طالعالي
ههههههههههههههههههههههه
وعلى فكره انا نسيت افكركم امبارح انك تحاولوا تجيبوا كمان هديه بسيطه لباباكم عشان بجد بيفرحوا بها اوي
انا من كام سنه كده جبت لبابا هديه يوم عيد الام ولقيته فرح اوي اوي ومن يومها وانا لازم يوم عيد الام افتكره باي حاجه ولو صغيره
وطبعا ولادي قرروا بهذه المناسبه السعيده انهم يودوني النادي اه اه يودوني انا قال
المهم يعنى روحنا وادينا جايه مش شايفه قدامي





ايوه امهاتي انا عندي امهات كتير والحمد لله






ممنوع القر انا باقولكم اهو ربنا يديهم الصحه ويخليهم لنا






طبعا انا لازم اقولهم واحده واحده كل سنه وهما طيبين وكمان لازم احكيلكم عنهم












اول ام فى حياتي احب اتكلم عنها












هى جدتي الله يرحمها ايوه ايوه مش مشكله ما هى مامة ماما يعنى ماما مش هاتزعل






اصل انا كنت باحبها اوي اوي اوي بصراحه وكنت كمان باقعد معاها كتير اوي سواء وانا طفله صغيره او حتى بعد ما كبرت وهى كانت محتاجه حد يقعد معاها بعد وفاة جدي الله يرحمه والبيت فضي عليها بعد جواز الاولاد السبعه






تيته دي كانت طيبه بشكل مش معقول . يعنى كانت تلتمس الاعذار لكل الناس بجد وما تزعلش من حد ابدا يعنى قليل اوي اوي لما كانت تزعل من حد ولا تقول انها زعلانه عشان كده المرات القليله الى انا فاكره فيهم انها قالتلى انها زعلانه من حد او اشتكت منه انا مش بانساهم ابدا ولا ناسيه للناس الى زعلوها ابداااااااا انهم زعلوها






كانت بنت ناس . كانت حفيدة العمده(ايام ما كان فى عمد) نص المنصوره يبقوا قرايبها لانها كان لها 11 عم و11 عمه غير قرايب مامتها الى كانوا من اعيان البلد . ومع ذلك تيته كانت متواضعه جدااااااا بجد عمرها ما كانت تترسم على حد ولا حجه قاعده فى بيتها تستقبل الكبير والصغير والفقير والغني






اتعلمت لحد الابتدائيه بس ما كملتش اخر سنه وبالتالي ما خدتش شهاده وده لانها اتخطبت فى السنه دي واتكسفت تروح المدرسه وهى لابسه الدبله






وقالتلى انا رجعت من المدرسه وانا عندي 13 سنه لقيت في فرح في البيت والستات قاعدين يضحكوا ويتغمزوا وطبعا ده طلع فرحها وانه كان اخوها الكبير المتعلم ذو المركز فى الحكومه مصمم انها تكلم تعليمها بس ابوها ما رضيش وقاله البلد كلت وشنا من خروجها كل يوم على السكك (ههههههههههههههههههههه 13 سنه )






وبطلت تروح المدرسه الامريكاني العريقه لكن كانت دماغها صاحيه اوي وفاكره الى اتعلمته كله كانت بتذاكرلي انجليزى وانا فى اعدادي وبتقرا قرآن بصوت حلو وهى فاهمه كمان الكلام وحافظه احاديث وحافظه اعياد المسحيين كلها ومراسيمها لان مدرستها كانت تبشريه وقشطه يعنى






عاقله وحكيمه ومحترمه وطيبه وكريمه وكان عليها شوية مباديء مش بانساهم ابدا ولو قعدت اتكلم عنها سنه مش هايكفي الكلام وان شاء الله تعالى لازم اتكلم عنها تاني واحكيلكم عنها حكايات كتير اوي الله يرحمها يارب ويغفرلها ويدخلها جناته ووحشاااااااني اوي يا تيته والله









ماااااااامتي انا بقى






ايوه الى باهديلها اغنية شاديه الحلوه الى شغاله دي



ماما الى طلع عينها وخلفت اربع بنات طلعوا عليها القديم والجديد وعلى قولها بقالي 15 سنه باشتري فى جهاز بنات ولسه ما خلصتش واستحملت حاجات كتير اوي اوي عشانا وشقيت بجد معانا ولسه بتشقى بصراحه وبتتعب اوي واحنا مطلعين عينها



لا مش احنا بس امة لا اله الا الله . اصلها بنت تيته برضه بيتها مفتوح دايما للناس كلها والدنيا كلها متعشمه فيها لدرجة اننا ساعات نقولهم يا جدعان احنا ولادها سبولنا شويه بقى ارحموا يا بشر هههههههههههههههههه






طيبه اوي وطالعالي كده عصبيه ( ايوه هى الى طالعالي) بس قريبه وبتهدى وتروق بكلمتين . طبعا مش هاقولكم انا اتعلمت منها ايه عشان ما ينفعش يتعد



بس انا دايما اقولها كده يا ماما تفطمينى وانا عندي سنه ونص بس ؟؟؟ بيقولوا ان لبن الام بيزود ذكاء الطفل ... عجبك كده الى انا فيه دلوقتي ؟؟



عليكى ليا ست شهور ههههههههههههههههههههه تقولي يعنى كنتى هاتبقى اكبر من كده ايه هههههههههههههه



باحبك اوي يا ماما ربنا يديكى الصحه ويخليكى لنا ونفضل دايما مصدعينك












حماااااااااااااتي






ايوه مامتي برضه الحمد لله ربنا يشفيها يارب ويديها الصحه ويخليها لنا يارب .



مش تمثيل ده يا جودعان اينعم احنا بنختلف احيانا وبابقى عارفه اني ساعات مش عاجباها بس عادي ماهو امي برضه ساعات بابقى مش عاجباها باستنى شويه وبعدين اصالحها ما انا عارفه كل الزراير . بس انا عارفه ومتأكده انها بتحبنى زي ما بتحب اي حد من عيالها .



وهى فعلا ست قويه وقدرت رغم كل الظروف تربي 8 عيال ولحد الان واقفه فى وسطهم بعد وفاة جوزها ولسه بتجوز فيهم وتهتم بكل افراد اسرتها الى ما شاء الله كبيره ربنا يديها الصحه ويخليها لنا












ماما زينب






دي بقى مرات عمي الكبير . انا باقولها يا ماما برضه مش عارفه من امته من يوم ما عرفت اتكلم هى ربنا ما اعطهاش اولاد بس احنا كلنا ولادها بجد وهي فعلا بتحبنا وبتعاملنا على هذا الاساس وانا برضه باحبها واحترمها واحب عمي الى هو جوزها اوي اوي .وفعلا باعتبرها زي ماما . هى ياما دلعت فينا بصراحه وان شاء الله مره تانيه هاكلمكم عنها وقصتها مع الزمان .



وربنا يقدرنى وافضل اودهم وربنا يديهم الصحه يارب ويخليهم لنا .






الى فاتو دول الى بازورهم يوم عيد الام لاااااااازم واعمل الواجب .









وطبعا طبعا ليا امهات اكتر من كده بكتير (ممنوع الحقد ) بافتكرهم يوم عيد الام وادعيلهم بكل طيب






منهم خلاتي الاثنين الى لازم لازم اكلمهم اقولهم كل سنه وانتم طيبين واهزأ عيالهم لو ما جابوش لهم هدايا وراحوا زاروهم عادي فى من النوع ده يعنى .






ومنهم مدرساتي الى كنت باصاحبهم كلهم ولحد الان لو قابلوني بيعرفوني على طول وبالحضن والبوس وبنعمل فرح يعنى






ومنهم كمان جدتى لبابا الى ما شوفتهاش بس سمعت عنها كل طيب من الغريب والقريب وحسيت بمعانتها لانها خلفت 20 مره ومات منها كتير اوي اوي يعنى الحكايه صفت على سبعه وكلهم ولاد يعنى طلعوا روحها بالاضافه الى كميه لا بأس بها من الناس الى كانت مسؤله عنهم باعتبارها مرات الابن الكبير . الله يرحمها ونشوفها فى الجنه ان شاء الله لو كان لنا نصيب نروحها يعنى بس متعشمين خير فى ربنا ورحمته .






ومنهم ماما وفاء جارتنا فى البيت القديم الى طلبت مننا نقولها يا ماما عشان نفسها تسمعها .كان نفسها تخلف اوي بس بعد صراع مع المرض لعشر سنين توفاها الله . الله يرحمها يااااااارب ويجعله فى ميزان حسنتها ياااااارب .






وكفايه عليكم رغي بقى






سمعتوا الاغنيه ؟؟؟ كنت باغنيها وانا صغيره فى الحفله بتاعة عيد الام



هههههههههههههههههههههههه















الأربعاء، 18 مارس، 2009

صور من حياة الفاروق ..... على الرؤيه

اتفضلوا شرفونا على مدونتي الاخرى
شوفوا الموضوع الجديد فيها
ما حدش يزوع خلينا ناخد ثواب بلاش كده يا مدونين يا حلوين

الأحد، 15 مارس، 2009

من رد قلبي .... ايه الى اتغير ؟؟؟؟



سلام عليكم يا مدونينا الاعزاء
النهارده هانرغي بشان الفيلم الجميل ده
من كام يوم كده صباحا لقيت رضا جايب فيلم رد قلبي
ايوه بتاع انجى وعلي والسهوكه دي
المهم يعنى قعدت اتفرج على بداية الفيلم الى ما شوفتهاش كتير الى هى وعلي وانجي صغيرين وكانت عامله الدور بوسي وهى صغيره .
وبعدين لاقيتنى كملت لحد نص الفيلم كده مش عارفه ليه يعنى
لفت نظري حاجه مهمه اوي قلت اقولكم عليها يمكن انا فهمي تقيل
فاكرين ساعة لما علي راح يتقدم للكليه الحربيه ؟؟
وابوه راح يطلب من باش كاتب البرنس انه يطلبله واسطه من البرنس وباش كاتب البرنس قاله ما اقدرش اعمل كده
لكن هاشوفلك بقى باش كاتب الكليه الحربيه تقريبا كان معاه فى كلية الباش كاتبين
المهم راح علي يعمل كشف هيئه (الى هو كشف الواسطه يعنى ) وقابل هناك زميله
وزميله قاله انت وسطتك مين قاله باش كاتب الكليه
وزميله قاله انا بقى ماليش واسطه خالص وزي ما تيجى
المهم عشان ما تهووش مني
ساعة المقابله عم الحاج علي دخل وكلمه ونص وخرج وبعدين صاحبه دخل قالهم خطبه طويله عريضه كده وجه واحد فيهم يسكته قوم اتدخل واحد تاني كباره قاعد وقالهم سبوه يتكلم
وكان قاعد بقى يقولهم انا جيت من غير واسطه واملي ابقى ظابط جيش وبؤين جامدين كده
المهم يعنى ان علي وصاحبه دخلوا الكليه الحربيه من غير وسايط
سامعه واحد قديم زيي كده من القرون الوسطى حافظ الفيلم بيقول ان انجي كانت موصيه واحد من البشوات عليه
لا ما هو ابوها عرف وطين عشيتها وقال للباشا ده ما يسألش عنه
يعنى الاثنين دخلوا بدون واسطه ... فله ؟؟
واخو علي الى هو حسين دخل كلية شرطه عشان كان بيلعب رياضه باين ولا حاجه كده
وبدون وسايط وابوه جناينى !!!!
طيب ايه ؟؟؟
فين الظلم طيب ؟؟
طيب يعنى الكليه الحربيه كانت بوسايط ؟؟؟
وبياخدوا ولاد البشوات بس ؟؟؟
حد كده يا رجاله يقولي الكليات دي دلوقتي بيدخلوها ازاي ؟؟؟
ياريتها بوسايط بس
ده وسايط وفلوس كتير اوي وغير كده وكده لو كانت وظيفة الاب فى البطاقه حاجه اي كلام ما بيتقبلش
اه والله بجد
طيب ايه ؟؟؟
يعنى البشوات الى كانوا ماسكين الجيش ايامها كانوا بيقبلوا ناس من غير وسايط اهو
اه ماهم عايزين يعملوا جيش . ايوه الجيييييييش مش عايز ناس فافي
هايعملوا ايه بولاد البهوات الهياثم دول
طيب بالنسبه لنا حاليا مين بيدخل كلية الشرطه والحربيه والفنيه العسكريه وما الى ذلك ؟؟
ماهم الفافي برررررررررضه
طيب ايه ؟؟؟
طيب فين العدل الى حققناه بقى
فين المساواه ؟؟
مين يقدر يدخل كلية من دول دلوقتي من غير واسطه ومبلغ مالي مش عارفه وصل كام دلوقتي اخر ما نمى الى علمي كانوا 20 الف الشرطه
وكمان لازم يكون ابوه مش جناينى
طيب ايه الى اتغير ؟؟
وكنا فين وبقينا فين ؟؟
تعرفوا عمي الكبير الله يديه الصحه لما بيحكيلى على مدرسته والى كان فيها وطبعا مدرسته دي كانت من حوالي ستين سنه
حاجه يعنى خيال
وخدوا بالكم انا جدي كان راجل على اده مكافح جدا
كان ترزي محترم اه كان ترزي البهوات بس اهو ترزي
وكان مسؤل منه 7 عيال غير اخواته وما الى ذلك
اه حتى السبع عيال دول ا لى فضلوا من العشرين الى تيته الله يرحمها جابتهم
كلهم ناس متعلمين و مرموقين حاليا ولله الحمد اجتماعيا يعنى ما حدش فيهم من كبار رجال الاعمال ولا حاجه
ههههههههههههههههههههههه
المهم يعنى
عمي بيقولي ان المدارس ما كانتش مجانيه ولا كانت مصاريفها سهله
الا ان جدي كان بيصر انه يدخلهم مدارس وكمان هما كانوا بيجتهدوا عشان ياخدوا منحة تفوق
يعنى كان مش المدارس بفلوس بس
لا كمان الغلابه المتفوقين كانوا بيتعلموا
ومدرسة بابا صلاح عمي الكبير دي لواحدها عايزالها قاعده عشان تعرفوا احنا وصلنا لفين
والى نفسي اعرفه ؟؟
احنا رااااااااااااااااااااايحين على فين ؟؟؟؟؟
وبس كده كفايه عليكم رغي
صدعتوني
هههههههههههههههههههههههههههه

الخميس، 12 مارس، 2009

لوحة حب


السلام عليكم


من فتره من الزمان مش فاكره اد ايه اتناقشت انا واحد الاخوه المحترمين والى كان بيكتب شعر انه الشاعر او الاديب المحترف او المتمكن من ادواته يقدر يكتب باحساس غيره


يعنى مش ضروري يكون الكاتب هو بطل كل روياته . او يكون حتى احد افرادها .


ولا ان الشاعر مثلا يكتب قصيده عن خيانة الحبيب يكون حبيبه خانه


يعنى اقصد ان ممكن الشخص يتخيل حياه او مشهد او قصه ويتكلم من خلاله


المهم انه يقدر يحس باحساس الموقف ده ويجسده كمان لو كان حقيقى



وبعدها كتبت حاجه اثباتا للكلام ده وكان البطل فيها او الراوي رجل


ومش عارفه ان كنت فعلا قدرت اثبت وجهة نظري ولا لاء


انا نزلته قبل كده هنا فى المدونه بس كنت لسه مبتدأه تدوين ومش عارفه اتشال ازاي وما نزلتوش تاني برضه مش فاكره ايه الى حصل


المهم انا جبتهولكم تقروه وتقولولي رايكم فى وجهة نظري اولا

ورايكم فى الى انا كاتباه طبعا


وانا كنت مسمياها


لوحة حب



كانت طفله .


نعم كنت اذكرها كذلك ورأيتها ثانية ولكن ما هذا؟


فلم تعد طفله انها فتاه جميله يفوح منها عبير انثوي جذاب ,


فحدثتها بعينى ماهذا يا صغيرتى ؟ فأجابت بقلبها انه فعل صائغ الصبايا.


وتحدثت الي ....


ولكن ما هذا ما زال هناك طفله!!!


فى عينيها فى ابتسامتها فى ضحكاتها فى صدقها


.مرت ايام وايام وكنت افكر بها وكلما رأيتها تعجبت من ذلك التركيب الجميل ويزداد انجذابي لها,


وتحينت الفرص لاتحدث اليها وان أسمع حديثها الممتع واتعرف كيف صاغت الدنيا لها افكارها وحياتها.


وهنا اسرتنى........


كيف اسرتنى؟ ولما اسرتنى؟ لاادري!!


ولكنى بالفعل اعرف, انها جميله, انها انثى جذابه ورقيقه وحانيه.


ولكن الطفلة التى تطل فى عينيها تزيدها بريقا وتطفي صدقا على ابتسامتها.

هى ذات حكمه.

نعم رغم غضاضتها لها عقل مميز الملامح والافكار لا تملك الا ان تحترمه.

هكذا اسرتنى .....فاسرتها .


نعم اسرتها .


اسرتها بحب عظيم فاض علي جوانبها وملأ حياتها وحياتي وقلبي.


قلبي الذى ارحته فى احضان كفيها .

فهى تملكه كما ملكت انا قلبها واصبحت لي واصبحت لها .

ومن لا يرى الحب او يلحظه فانه يراه فى اعيننا ولو بيننا الف شخص ويسمعه يرقص على دقات قلوبنا.


وهاهي صغيرتى ارقبها تزداد عمرا وتزداد نضجا وعقلا وفى عينى تزاد جمالا وتألقا وما زالت تطل من عينيها الطفله الضاحكه الصادقه.

وما زالت تملأ حياتى وقلبى وانا لها كذلك .

فكل يوم ارفع رأسي الى الله احمده واشكره وارى رضاه بقلبي


سبحانه هداني الى ما هديت وما هديت نفسي


فيا طالبى الحب فى كل مكان وزمان فلتسترضوا الله فان الحب هدى من الله فاسألوه اياه سبحانه جل علاه.


تمت

**********************************


يلا قلولي رايكم بقى

********************************************


وبالمناسبه

بالنسبه للناس المهتمين والمحبين للادب

انا بادعوكم لزيارة الاخ




صاحب مدونتين






شايفه انه بيكتب كلام كويس ولانه تقريبا مدون جديد ما باشوفش فيكم حد هناك

قلت نبعتكم تستمعوا معنا

الاثنين، 9 مارس، 2009

عووودي يا هاااااااميس ...لا لا قصدي ياااااا موني

السلام عليكم
الاول كل سنه وانتم طيبين يا جماعه
المولد النبوي الشريف
واللهم صلي وسلم وبارك على محمد وعلى اله وصاحبه وسلم
وان شاء الله كل واحد فيكم يكون اكل حلاوة المولد
ومبيت ومأمن على الفته واللحمه او اي اكله متينه بكره
واي حد ............. هايقول الاحتفال بالمولد النبوي واكل الحلاوه حرام وبدعه بصوابعي العشره وفي عنيه على طول
وعلى راي رحمه بنتى .. ياماما بكره اجازه عشان عيد ميلاد سيدنا محمد الى هو الرسول والنبى يا ماما هو احنا هانعمله تورته ؟؟؟
ده اول هااااااااااام الى فات ده
تاااااااااااااني هاااااااااااااااام بقى
هااااااااميس ........... يوووووووووه قصدي موني
مـــــونـــــي
صاحبة
مدونة مذكرات زوجه شابه جدا
ومدونة مدام سلاموني
حبيبتى ورفيقة الجهاد المطبخي بتاعي
مدونه رقيقه وهاديه وفى حالها ولا بها ولا عليها
بس مش عااااااااارفه راحت فين اختفت يا اخواتي
مدوناتها بقالها كام يوم مش موجودين المدونتين الاثنتين
والنهارده سبتلها اوف لاين وما رديتش عليه
ومن الجدير بالذكر ان زوج المذكوره اعلاه هو الاخ تامر علي
صاحب مدونة الدنيا ريشه وقلم
وبما ان الاخ تامر علي متواجد هو ومدونته على هذا البلوج ولسه يعنى بخير والحمد لله فاحنا مضطرين للقبض عليه
يوه قصدي للعسكره هناك قدام مدونته عشان يقب بالبت موني الغلبانه لان احنا مش لاقينها ويقولنا راااااااااحت فين
اعضاء جمعية المرأه المتوحشه كل يسن ضوافره وسنانه ويجى هناك
الا تكون البت فى زنقه وعايزانا
بجد بجد زعلانه يا موني وعايزاكي ترجعي تاني للتدوين ولا تقولي حصل ايه يا جميل
ولو ما قلتيش هانخلصلك على الشاب بتاعك لانه لسه حدانا ااااااهو
تحياتي لكم
وتاني كل سنه وانتم طيبين