الاثنين، 31 مارس، 2008

18- شباب وبنات فى سرفيس سلطه كبيييييييير

أنساتي سيداتي سادتى وكل الحبايب يعنى :
فى البوست الى فات فى كلمه كان نفسي ارغي فيها شويه بس ما رضيتش اطول عليكم بس الكلمتين واقفين على قلبي انتم عارفين .
والكلمتين بقى بخصوص البلوه المجتمعيه بتاعة العلاقات بين الشباب والبنات وطريقة معاملتهم مع بعض والى بقت عباره عن طبق ... لا سرفييييييييييس سلطه كبير كله عك وهبل ما حدش عارف مين صاحب مين ومن حبيب مين ومين متجوز مين ولو متجوزه عرفي ولا شرعي . كله داخل سرفيس السلطه .
المهم انا هاحكيلكم قصه عجباني موت من سيرة الرسول عليه الصلاة والسلام مع زوجاته والى انا شخصيا مفتووووونه بها وشايفها مدرسه زوجيه واجتماعيه عميقة جدا .
المهم نقول القصه ونناقشها كلمه كلمه :
كان الرسول عليه الصلاة والسلام معتكف فى الغار وذهبت اليه صفيه لتكلمه وفضلت ساعه ولما جت تخرج خرج معاها الرسول يوصلها لخارج الغار فكان فى اثنين من المسلمين معديين فقال الرسول عليه الصلاة والسلام: على رسلكما انها صفيه بنت حيي.فقالا سبحان الله يا رسول الله فقال الرسول (ان الشيطان يجرى من ابن ادم مجرى الدم وانى خشيت ان يقذف فى قلوبكما شرا)
يا سلام القصه دى فيها معانى جميله اوى تعالى ناخدها واحده واحده
اولا ان صفيه كانت عند الرسول اثناء اعتكافه عادى يعنى مش عشان بيعبد ربنا يبقى نعض الى يجى نحيتنا زى ما بعضنا بيتخيل
ثانيا انه قام عليه الصلاة والسلام يوصلها لباب الغار مش قالها يلا فرقينا بقى عطلتينى وكده يعنى لا فى ذوق وأدب وترفق .
ثالثا بقى وده المهم عشان ده موضوعنا وهو ان الرسول عليه الصلاة والسلام اتقى الشبهات يعنى فسر موقفه فورا للناس مش قال بقى ده أنا الرسول ماحدش ممكن يظن فى غلط وكمان وضح ليه هو قال كده مش عشان هو مش واثق من نفسه ولا مثلا ظانن شر فى نية الى شافوه لا قال ان عارف ان الشيطان زى ما احنا بنقول شاطر وممكن يأثر على تفكيرهم وهو بكده سد باب فى وجه الشيطان .
حلو الكلام ؟؟؟ اه حلو انا شايفه انه حلو
طب تعالوا بقى نسمع الردود فى الايام الجميله الى عايشينها دي :
واحده مثلا تلاقيها واقفه ساعه مثلا بتكلم واحد فى الجامعه وبعدين تقولك ايه:
ده فلان ابن خلتى، أو ده جارنا ومتربيين مع بعض من واحنا فى كى جى وان
يا سلام طبعا ده مش مبرر ابدا انك تقفى تتكلمى معاه فى الشارع وبعد كده تقولى: (انا طالما واثقه من نفسى ومش باعمل حاجه غلط ما يهمنيش الناس )
يا حلولي وسد ابواب الشيطان ما جاتش على بالك ؟؟؟ مش بس أبواب الشيطان على الناس وعليكى انتى كمان !!!!!
وطبعا نفس الكلام باقوله للشباب مش البنات لكن الولد بقى رده بيبقى ساعات يفرس زى مثلا :
وأنا ما لى هى الى واقفه تتكلم هى حره
وكأن الموضوع يخصها لواحدها انما هو ما يمسوش حاجه ليه مش عارفه
أو مثلا الرد التالى الى برضه يفرس: ايه المشكله يعنى لما تقف معايا تكلمنى هو انا هاكلها ايه التخلف ده .
طب اسأله كده لو هو شاف اخته واقفه تكلم واحد ساعه ولا اكتر ولا اقل ساعتها هيبقى برضه ده موقفه؟؟؟
طبعا لا اقل ما فيها هيابادر بسؤال فى ريبه مين ده وليه وعشان ايه......... وده لو هو بارد يعنى.
ولما نقول كده يقولك :مش كل الناس زى بعضها
يعنى ايه مش كل الناس زي بعضها يا ابنى ؟؟؟؟ يقول : يعنى هى واحده تربيتها مختلفه وظروفها مختلفه مش زي اختي وهي بتقبل كده خلاص
السؤال هى موافقه وانت ايه ؟؟؟؟ موقفك ايه ؟؟؟ او مبدأك ايه ؟؟؟ قانونك الى ماشي عليه ايييييه ؟؟
أنا مش باقول انك تمشي مبوزه وما تكلميش حد من زمايلك فى عمل ولا دراسه اطلاقا . ولا لما واحد يوقفك فى الشارع من زمايلك يسألك الساعه كام تمسكي مكرفون وتقولي ده زميلى وبيسألنى !!!!
لا بس كل حاجه ولها حدود ولها شكل لائق ولها اصول كلنااااااا عارفينها وكنا بنعملها زمان . ليه بطلناها ؟؟؟ ليه بنستهبل ؟؟؟ ليه بقى عادي البنت تتصل بزميلها فى البيت ؟؟؟؟ وليه بقى عادي يتصل عليها وبعلم اهلها وبشكل متكرر مش مره ولا صدفه ولا ظرف ؟؟؟؟
ليه بقى عادي اننا نسيب الولد يلعب ببنات الناس ونقول بناتنا غير بنات الناس ؟؟؟؟
ميت ليه وميت سؤال عايزه اوجهه للناس فى هذا الصدد
وده على فكره جانب واحد بس من المشكله فى علاقة الشباب والبنات
الجوانب كتير وان شاء الله نتكلم عنها .
كنت ناويه اكمل كلام عن كتاكيت الشعب فى الجواز بس النقطه دي بالذات حبيت اتكلم عنها وابرزها شويه .
شكرا لكم جميعا ونفعنا الله واياكم ووفقنا لما يحب ويرضى

الأربعاء، 26 مارس، 2008

17- هما الناس مش لاقيين بعض ليه ؟؟؟؟؟؟!!!!!

السلام والتحيه على الناس المستخبيه
وبعد بالنسبه للبوست الى فات يا كتاكيت امسحوها فيا انا ما كانش ده يوم قررت احكيلكم فيه حواديت من غير هدف زهقت من الاهداف وكنت بافك دماغي واللُك فى الفاضي يعنى هي جت عليا انا . وبعدين انا ماليش دعوه انا قايلاكم من اول المدونه ان انا رغايه وباتكلم كتير والمدونه اصلا اسمها رغي وقد أُعذر من أَنذر .
نرغي بقى . دلوقتي انا بعد الخبره الطويله العريضه دي وسط البنى ادمين الكتير الى اعرفهم فى الدنيا دي . لاحظت ان الناس تايهين ومش لاقيين بعض . أه يعنى كلهم بيدوروا على بعض ومش عارفين يلاقوا بعض . ما حدش فاهم ؟؟؟!!!
طب ندي مثال (بيان على المعلم ) :
انا مثلا وجوزي بقالنا يجى سنه بندور على حد يشتغل معانا مش لاقيين . ومع ذلك اينما تذهب تلاقي ناس مش لاقيه شغل وقاعدين عاله على المجتمع . يبقى دول ايه ؟؟؟؟ اثنين بيدوروا على بعض مش لاقيين بعض .
اتكلمنا احنا عن البطاله الاختياريه قبل كده (المصطلح الى انا اخترعته ) وقلنا هما ليه مش لاقيين بعض .
الى لسه ما اتكلمناش فيه ومحتاج عرائظ طويله وعريضه هو ان الشباب والبنات هما كمان تايهين نفس التوهه دي .
يعنى انا كل ماحد يشوفني(مش عارفه ليه ) يقولي شوفلنا عروسه يا ام مريم كأن رئيس حزب عروسه لكل مواطن .
وبرضه اينما ذهبت الاقي بنات قاعدين مستنيين بن الحلال من كل الاعمار والطبقات . طب ايه ؟؟؟؟
الاقي واحده بتقول انا اهم حاجه عندي انه يكون علىدين وخلق بس ما لقيتش حد كده الناس بقت وحشه !!!!!
والتاني بيقول ما عادش فى بنات كويسين انا ما يهمنيش الى انها تكون واحده محترمه وعلى دين ومن اصل طيب وحتى مش مهم الجمال بس هى فييييين ده انا دايخ بقالي خمس سنين !!!!!!؟؟؟؟
الله ؟؟!؟!؟!!؟!؟!؟ طب ايه ؟؟؟؟؟ طب ماهما الاثنين بيدوروا على نفس الحاجه ا هو اخلاق ودين وكلام ولا احلى ولا اجمل من كده . طب ايه مالهم هما بيدوروا فين بالظبط ؟؟؟؟
طيب عشان نضيق نطاق البحث احنا هانتكلم عن الناس الصادقين مع نفسهم اولا ومعانا وفعلا عايزين الدين والاخلاق بس وطبعا يكون فى قبول نسبي . التانيين الى بيقولوا كلام بس وبيضحكوا على نفسهم دول ما لناش دعوه بيهم دلوقتي لانه فى فى دماغهم كتاكيت هانتكلم عنها مره تانيه .
طيب تفتكروا ايه سبب الناس الى مش لاقيه بعضها ؟؟؟؟؟
انا بعد فحص وتحميص(حلوه دي؟) ودراسه للطرفين اكتشفت حاجات كتير قد تكون مجتمعه او منفرده فى كل حاله منهم :
أولا : هى ان تكون اساسا مفهوم الاخلاق عند البنات غير مفهومها عند الشباب .
اه يعنى الشاب عايزه محجبه اه ومتدينه اه بس مش كئيبه ومعقده الدنيا وتصعب عليه حياته مثلا ةوهي صعبه خلقه والعكس كمان بالنسبه للبنت.( ده مثال قيسوا على كده حاجات كتير )
ثانيا :ان يكون كل واحد فيهم بيدور فى المكان الخطأ .
يعنى لما تكون عايزه واحده اخلاق ودين ما تروح تدور على واحده ــ بتعبير بلدي باحب اقوله عشان افوق المستهبلين ــ تمشي معاه سنتين ثلاثه وبعدين تستغرب هى ليه طلعت مش تمام ؟؟؟ وطبعا الواحده تبقى عشره وتقول ما عادش في بنات محترمين . ما انت الى رايح تدور على الدهب عند الحداد يا ابنى . وبعدين انت مستنيى ايه من واحده اقل ما يكون كذبت يجى مليون كذبه طول سنتين مثلا على اهلها بسبب علاقتها معاك ؟؟؟؟ تبقى هي ايه يعنى ؟؟؟؟
والعكس برضه بالنسبه للبنات ما تفكروش ان الشاب الى بيدخل فى علاقه حب مع بنت بدون صفه رسميه مش غلطان لا طبعا نفس درجة الخطا طبعا ولو ما كانش بيكذب على اهله كفايه انه لم يتقى الله فى بنات الناس واكيد هو كمان مش اهل للثقه منها .
اكيد لو دوروا فى مكان صح ودخلوا من الباب دوغري وقالوا توكلنا على الله ونعم بالله وكيلا هايلاقوا بعض من غير ما يبقى الجواز على السكين والمداق كمان ساعات .
ثالثا : انهم يكونوا بيدوروا اه بس وهما فى منتهى الرعب من الجواز وعايزين جرانتيه (يعنى ضمان كل واحد وعلامه بقى) ابدى ان الجوازه الى هايقدموا عليها دي هاتعيش العمر كله زي الجنيه الكاوتش .
طب ليه ؟؟؟؟؟ مافيش توكل على الله ليه ؟؟؟ احنا ناخد بالاسباب والتوفيق من عند ربنا . واحد يقولي طب افرضي انا اتجوزت واحده وكنت واخد بالاسباب وما اتوفقناش وطلعت جوازه اي كلام ؟؟؟؟ ابقى اعمل ايه ؟؟؟؟
مش عارفه ايه المشكله ابقى طلقها ياعم واتجوز غيرها انت هاتروح جهنم ولا هاتتجوز .
اوواحده تقولي افرضي التجوزت وطلعت جوازه ندامه ؟؟؟؟ على راي ماما القاعده فى الخزانه ولا الجوازه الندامه .
اقولها لا مالكيش دعوه بماما الخزانه دي للفراخ يا حلوه مش للبنات . اتقي الله وخدي بالاسباب واعملي ا لى عليكى ولو حبيتى تتراجعي فى اي مرحله عااااديتقدري .
تلاقي صوت اهبل من كل واحد فيهم يقولك ويبقى اسمي مطلقه ولا كنت مخطوبه ؟؟؟؟؟ ما انتم عارفين المجتمع.
اه ما احنا عارفينه عندهم كتاكيت فى مخهم مالكوش دعوه بهم لازم نغيرها ونرجع تاني للصح .
رابعا : تكون الاحوال الماديه مش تمام . طب وايه يعنى على اد لحافك مد رجليك . كانت جدتى الله يرحمها تقول حاجتين لما الواحد يبدأ فيهم ربنا يسهلهم الجواز والمباني وتعقب ودى حكمة ربنا عشان الدنيا تعمر . ( كانت عظيمه )
وبرضه عايزين نغير افكار المجتمع عن ان الى ما بيجيش قبل الجواز ما بيجيش تاني . لا كل حاجه بتيجى الحمد لله . بس انتم ما تركبوش على نفس العيال لو تقدروا على حاجه اعملوها ما تقدروش سبوهم يبدأوا حياتهم بس وبعدين يعينوا بعض .والله المستعان يا سيدى .
دي الحالات الاكثر شيوعا فى حالات تانيه كتير بقى مش هارغي فيها عشان الناس اتخنقت من الموضوعات الطويله بتاعتي .
لسه بقى فكروني نتكلم عن الكتاكيت التى تنموا داخل عقول المجتمع فى ناحية الزواج
واشوفكم على خير

الثلاثاء، 25 مارس، 2008

16 - اسبوع هاديء جدااااا

السلام عليكم يا اهل الله يا الى هنا . مش عارفه اكتب شوفلكم حل فى الموضوع ده الاكتئاب عمال يستفحل فى مخي والهام مش معبراني باين عليها مكتئبه زيي .
واصلا بقالي كام يوم بالعافيه بادخل ابص هنا وارد بسرعه على اي حد واطلع اجري بتهئلي انا كده بقالي اسبوع باين . ما علينااااا اهي اياااااام .
بصوا اناهاحكيلكم على الى جرالي فى الاسبوع الى فات عشان كانت ايام لطيفه بصراحه .
نبدأ من اول يوم الاربعاء الماضي :
كان يوم لطيف جدا من بدايته بتهيئلي كان يوم عادي مدارس ومذاكره وما الى ذلك وصويت قدام ولادي عشان يناموا شويه العصر عشان بالليل عندنا فرح .ايوه فرح لسه فى ناس بتتجوز . بس دي كانت خطوبه عوائليه كده يعنى ،ابن اخت رضا . ا لمهم بدأنا رحلة العذاب وتلبيس العيال ساعه خناق على اللبس عشان مش عاجبهم رايي ومش عاجبنى رايهم . وبعدين ساعه تانيه زيها اختيار التسريحه ونفس خلاف وجهات النظر الى فات . المهم روحنا الفرح وزي ما قلتلكم كده اتفرست هناك من الى شوفته بس عادي حال كل الافراح .
اخر الليل ختمت بحاجه مش حلوه ان اخو رضا تعب جامد واخدنا وروحناه جري وكان حالته صعبه الله يشفيه ودمنا نشف والحمد لله ورجعنا البيت الساعه واحده تقريبا ونمنا مقتولين .
الى بععععععععععده يوم الخميس :
ده بقى كان يوم عظيم الشأن اي والله . طبعا ده كان يوم المولد النبى الشريف كل سنه وانتم طيبين صحيت الصبح على الساعه 10 كان عندي ميعاد جلسة علاج طبيعى( هابقى احكيلكم عليها بعدين ) روحت وجيت بدأت الشغل لان ماما كانت عازمانا واختي طبعا على الغدا يوم الخميس زي كل خميس بس يعنى الخميس ده وصايه شويه عشان المولد النبوي وعيد الام . وكمان لان برضه حماتي عازمانا يوم الجمعه وطلبت مني صنيتين مكرونه بالبشاميل بالحجم العائلي . المهم خلص الشغل وكلنا بحمد الله .
وبعدين اختي الله يصلح حالها خدت ولادي وراحوا يجبولي هدية عيد الام فتحوا الحصلات بقى وجابولي هدايا عظيمه جدا والاهم من كده انهم اشتروها فى يجى ساعتين كده وده فى حد ذاته هديه حلوه اوي .
بعدين كلمت حماتي قالتلى انهم بيعملوا محشي وقالتلى ما تيجى عشان تاخدي كمان الديك الرومي تسويه عندك قلنا ماشي لميت العيال وروحنا وعملنا شويه فى المحشي وانسحبت رغم انف الى مش عاجبهم انسحابي . ورجعت بقى سويت اسم الله عليه الديك شويه قبل ما انام . المهم نمت على الساعه 6 صباحا تقريبا .

نيجى بقى لليوم الوسطاني الى هو الجميل بتاع الاسبوع كله : صحيت مفزوعه من النوم الساعه واحده على رساله من صاحبتي بتعيد عليا على اعتبار انى ام يعنى . وجرييييييييت عشان راحت عليا نومه وقفلت المنبه حتى رضا نزل الصلاه ومش صحاني .
جري ورا جري ورا جري واخيرررررررررا الساعه 2 كده قدرت ابطل جري شويه واروح اغسل وشي واتوضا واصلي . وبعدين رجعت اجري تاني . وعلى الساعه 5 كان الاكل خلص وبرد شويه وخدناااااااه ولميت العيال وخدت النمليه معايا وروحنا كلنا ايييييييييه بقى الى حصلنا ؟؟؟؟؟
دخلنا ركنا العربيه وبعدين كان قدمنا عربية اخو رضا قلتله لو مامتك بصت من الشباك هاتقطعكوا عشان راكنين ورا بعض كده . قالي خليها على الله بقى نروح فين يعنى . لقينا واحد من الشباب الصغنن نازل يقول اطلعوا وما تجبوش حاجه اصل خطيبة عمو مغمى عليها . استر ياااااااارب . طلعت ابص للبنت لقيتها مش مغمى عليها دي عندها حالة تشنج . بعد ما لقيت البيت كله فيه حوالي 30 روح بيعيط وفى واحده فى اوضه تانيه بفقوا فيها من الخضه . الحمد لله البنت غمضت عنيها وراحت التشنيجه . روحت قلتلهم يا قوووووووووووووم فااااقت وردت علينا اهدوا بقى . بس نص البيت تقريبا اغمى عليه . من هول الصدمه حقيقى مش هزار .
لان البنت كانت بتموت فى اديهم حالة تشنج ونيموها على ظهرها وده غلط كانت هاتبلع لسانها وازرقت وموال كبير كبير كبير .
جبنا الدكتور شافها قام خرجنا الى كانوا بيفوقوها بالصلاه على النبى رجاله قلبها جامد مووووووووت اغمى عليهم برررررررضه والدكتور بقى مش ملاحق يفوق مين ولا يعمل ايه وقعدنا فى الموال ده بس نفوق الناس الى اغمى عليها من فرط الانفعال والخوف يجى ساعتين .
وطبعا اهل البنت جم واترعبوا عليها ( بس الحمد لله بعد كم هائل من الفحوصات قالولها ما عنديش حاجه ) فيظهر انها كانت عين وصابتها ورب العرش نجاها . الحمد لله
المهم اتغدينا مش عارفه امته يومها ولا عارفه كلنا ازاي اصلا . وبعدين ختمت الليله فى خلاف فى وجهات النظر مش حاد اوي بس بناء على فرسه من استهبال البشر لكن يبدوا ان موقفي كان حاد لكن ما حدش اتعور الحمد لله .
وانتهت بعقد النيه من حماتي بعدم عمل تتجمعات سياسيه كده تاني عشان الى حصلنا ده عين وصابتنا يا اخويا .
ومشينا من هناك طلعنا على بيت عمي الكبير عيد الام كل سنه وانتم طيبين . ورجعت البيت على الساعه 11 جاهدت اني افضل عايشه لحد ما انيم العيال وبعدين اخدت حمام سخن ومش فاكره حصلي ايه بعد كده لكن انا صحيت الصبح على صوت بنتى بتقولي ماما مش هانروح النادي ا لنهارده ؟؟؟؟؟؟؟؟؟؟

وده كان يوم السبت الجميل : كنت واعداهم اوديهم النادي يوم السبت مع اصحابهم واصحابهم اتصلوا يسألوا . لكن انا صحيت بقى لقيت عندي مغص كلوي قلت يا فتاح ياعليم يا رزاق يا كريم . طبعا قلت لها يا مريم قولي لها ان ماما تعبانه ومش قادره النهارده .
وبعد جهاد مع الالم شويه وانا باجهز الفطار اخدت حقنة مسكنه وعلى اخر النهار بقيت احسن لكن كان يوم فى مجمله هادييييييء جدا .
الاحد : يوم بررررررررضه لطيف بعد المدارس والسندوتشات والباصات وما الى ذلك . نمت شويه وصحيت علىالتليفون اخو رضا بيسأل عليه وهو مضطرب الصوت والاحاسيس .
أنا :خير يا ابنى. قالي :بتوع تنفيذ الاحكام جم اخدوا الواد الى شغال فى المحل !!!!!!!!
أنا: ايه ده لييييييه ؟؟؟ ( ده عيل اصلا عنده 16 سنه ) قال : مش عارف هما جم سألوا على صلاح اخويا قام الاخ ده اتبرع وقالهم انا صلاح خدوه هو ومش معاه بطاقه .
أنا : صلاح طب صلاح عليه احكام ايه ؟؟!!!!! والواد العبيط ده قال انا صلاح ليه . قالي : أنا عااااااارف مش فاهم حاجه فين رضا .
بصيت حواليا وما لقيتش الموبايل قلتله ده نزل كلمه بقى على الموبايل .
شويه وسمعت صوت رضا لسه بره جريت وقلتله على القصه ا ذبهل نفس اذبهلالي . وجري بسررررررعه راح قسم البوليس .
نص ساعه ولقيت مرات اخوه الى مطلوب القبض عليه جايه تجري وبتقولي صلاح قالي انزلي روحي لام مريم .
حكيت لها الى حصل وقلت لها ما تخافيش تلاقي مراته الاولانيه رافعه عليه قضية نفقه . ( طبعا ما كانش متجوز انا باهزر )

المهم بعد شويه اكتشفنا ان كان عنده قضيه من 3 سنين تبع المحل والرخص والمواويل دي وكانت خلصت وخد فيها براءه بس عشان احنا بلد متخلف زي ما انتم عارفين بيحصل فيه كده .وانتهى الموضوع على ذلك .
وبابا قالي انه حصله تقريبا نفس الموضوع وكان هايتسجن عشان ما دفعش رسوم اثنين جنيه ونص لان المحصل كسل يدور عليه بقى قام عمله امتناع وحجز وتبديد كمان على اثنين جنيه ونص بالصلاة على النبي .

وبعدين اتغدينا عند اخوه لاننا وسلفتي الصغنونه مرات الاخ المطلوب فى قضيه سياسيه ده انقضينا على سلفتنا الكبيره مش عارفه ليه بس زي ما تقول كده غلاسه الصغنونه كانت رايحه هناك وانا ما صدقت وشبط فيها عشاني بقالي شهر بانوي اروح ازورهم وانتهى اليوم الحمد لله نهااااااايه سعيده حتى بعد النقاش مع سلفتي الكبيره حول الخلاف فى وجهات النظر الى حصل يوم الجمعه والى كان سببه زي ما قلت انا على راي خلتى فرنسا ( نسوان شلت مش عارفه تربي ) .
باقي بقى امبارح ما حدش يسألنى عليه عشان انتهي بصويت وصريخ وعياط وشبه انهيار عصبي لعده اسباب مجتمعه اهمها انى بالعم خالد الحمام الايام دي وااااااااااااااااه ياااااااااااااااااني .
طبعا رغي فاضي كله مالوش اي لازمه لكن اهو بدل ما اتناقش فى حاجه شبه المود بتاعي دلوقتي واجيب لكم اكتئاب حاد مزمن . ولو مش عجبكم البوست ابقوا قوليلي من باب العلم بالشي ء مش هامسحه ولا كأنى سمعت حاجه عادي .
اه كنت عايز اخد رايكم فى حاجه . انا عندي شوية بحوثات كده صغنونه على اد علامي بحوثات اسلاميه ايه رايكم ابقى انزل منها فى المدونه هنا ؟؟؟ ولا نعملها مدونه مستقله ؟؟؟؟ ولا ما نكتبهاش خالص اصلا .
لا بس هى كبرت فى دماغي اكتبها على البلوج اختاروا بقى هنا ولا فى مدونه تانيه
واشوفكم على خير يا قطاقيط

الخميس، 20 مارس، 2008

15 - شوية حاجات فرساااااااااني موت

بصوا بقى انا اصلا عشان نبقى على نور شايله المراره من اربع سنين يعنى ما عادش عندي حاجه تتفقع وعليه بقى هاقولكم على شوية حاجات مدعمه بمواقف من الحياه وتقوليلى على حل .اعمل ايه في الفرسه دي فى غير وجود المراره ؟؟؟؟؟؟؟؟؟
* أول حاجه فرساني : زمان فى العصور السحيقه كنت اشوف الرجاله بالصلاة على النبي الى بيرقصوا فى الافراح كده طول وعرض ويرقصوا بعصايه وبعد شويه انحرفوا وبقوا يرقصوا بحركات غريبه كده برجليهم ويفتحوا جاكت البدله ما علينا اهو كانوا بيرقصوا .
دلوقتييييييي الرجاله الحيله او الى اسمهم كده بيرقصوا بوسطهم لييييييييييه ؟؟؟ منظر مقزز جداااااااا حاجه تقرف ( اصل انا كنت فى فرح النهارده )
* تاني حاجه : البناطيل الزفت الى بيلبسوها دي الى واقعه دي اخرتها ا يه طيب ؟؟؟؟
قريت مره مش عارفه فين ان الموضه دي اصلها ابتدعها مصمم شاذ جنسيا وكان فى السجن والمساجين بناطيلهم بتبقى واقعه كده أو باين المز بتاعه فى السجن كان عنده مشكله مع استيك البنطلون ( المز = مذكر مزه)
طب مااااااالنا احنا ومال الناس دي ؟؟؟ فى اي اهبل فى الى لابسين ا لبناطيل دي عارف كده ؟؟؟
*ثالث حاجه : ايه المرض النفسي الى عند البنات الى هو تبقى الجو برد مووووت ولازم تطلع اي منطقه كده زكاه عن صحتها فى الهواء الطلق .( يا اما من فوق عند ياقة القميص - او بين الجيب والبوت - او بقى تكون لابسه بادي لازق فى جسمها لدرجة ان خروم جسمها باينه من تحت القماش) بيحصلهم ايه يعنى لما يطلعوا حته فى الهواء الطلق ؟؟؟
* رابع فارسه : ايه التشيرتات الجاااااااز الى عليها ترتر الى الشباب لابسينها دي ؟؟ ايه الوكسه البني دي؟؟؟؟؟ امال الرقاصه تلبس ايه لما الرجاله (اول الى اسمه كده يعنى)يلبسوا ترتر ؟؟؟
* خامس نقطه : ايه الداء الزفت الى بقى فى الناس ولاد وبنات انهم يبينوا الاندر وير ؟؟؟
مش عارفه ايه مشكلته مع الموضوع ده ؟؟ بس شكلها مشكله عالميه على فكره . لان رضا لما راح الصين (رضا ده جوزي) قالي انهم هناك بيبجلوا الاندر وير جدا جدا وخصوصا القطعه الاندر يعنى وحتى اسعارهم غاليه اوي وماركات وكده يعنى .
قلتله اشمعن ؟؟؟؟ قالي يمكن عشان بيبان دايما ؟؟؟؟ ( لا ما تخافوش لسه عايش بعد ما قالي كده )
* سادسا : كان زمان على ايامنا احنا يعنى في العصور السحيقه برضه كان فى قطعه كده متوفره فى الاسواق اسمها كومبيل !!!!! اه فاكرينه يا شعب ولا ايه ؟؟؟ ما علينا الكومبيل ده كان متوفر بشكلين طويل تحت العبايات والجيبات وقصير تحت البناطيل وكده يعنى .
خير اللهم اجعله خير اختفت القطعه دي . تلاقي الواحده من دول لابسه حلو اوي وميت فل واربعتاشر وهى مش قصدها على فكره بتيجى كده معاها وبعدين ترفع ايدها تظبط الايشارب - اي والله الايشارب موجود وبصحه جيده - تلاقي بطنها بانت . طب ايه ؟؟؟؟
هاحكيلكم حكايه عشان خاطر خيخه حبيبتى عايزه تعرفها .
جوزي كان فى القاهره من اسبوع كده وتحديدا فى جامعة عين شمس ولما رجع قالي انا قررت اعمل دراسات عليا . قلتله طب وده من ايه ؟؟؟ قالي كده عشان اعلي من مستوايا وهاقدم فى عين شمس . طبعا اختكم لمااااااحه وكنت عارفه هو كان فييييين . لا ما حدفتوش بسكينه اخف شويه .
وبعدين قالي انا عايزك تعملي اعلان بالبنط العريض على النت فى اي منطقه زحمه ان البنات الى لابسين محترم دول -مالناش دعوه بالتانين دول قالعين قالعين- يخلوا بالهم لان ظهرهم بيبان وساعات الاندر وير كمان لما يوطوا طالعين او نازلين من الميكروباص مثلا. قلتله يعنى هما مش حاسين ؟؟؟ قالي مش معقول دول بيبقوا لابسين محترم اوي !!!!!
قلتله ليه هى الخلايا ا لعصبيه بتاعتهم نهاياتها مختلفه عننا ؟؟ ما حسيتش بسرسوب هوا كده لطش فى .... قفاااااها . قالي اه صحيح ده الواحد السطوح عنده فاضي بس اي نسمه تعدي فوق باحس بيها .
وبعدين بقى تساءلنا اين ذهب الكومبيل وذهبت ا يامه ؟؟؟؟ وتذكرت صراع مرير مع واحده هبله اقنع فيها انها تشتري فى هدوم فرحها كومبيلات وهى تقولي لا مش بالبسهم وقلت فكروني نبلغ عنه منظمة حقوق الاندر وير عشان يحموه من الانقرااااااض .
مجموعة بقى فرسات مختلفه : ليه الناس بتستهبل ؟؟ ليه الناس حشريين ؟؟؟ ليه الناس قليلة الادب ؟؟؟ ليه الناس بيشتموا بعض اشنع الشتايم على سبيل الهزار ؟؟؟؟ ليه الاهالي شخصيتهم ضعيفه مع اولادهم ؟؟؟ ليه الناس فاكره الاطفال اغبياء ؟؟؟؟
ليه العيال بتقل ادبهم على اهاليهم ومفرغين عنهم منهم ؟؟؟ ليه الاستنطاع بقى موضة العصر؟؟؟؟
اه يا مرااااااااااااارتي ياريتنى كنت خدتها من الدكتور يومها وعملتلها مقااااااااااام
يلا بقى كفايه انتم رغاييين اوي ايه ده

الثلاثاء، 18 مارس، 2008

14-ماليش نفس أرغي ؟؟؟؟؟؟؟؟؟؟!!!!!!!!!

طبعا انتم ملاحظين ان انا ساكته سكوت مالوش اي لازمه وبصراحه بقى انا من امبارح كل ما اجي هنا افتح المدونه واجيب صفحة الرسائل الجديده دي واقعد ابصلها واكتب عنوان واشيله واحد تاني ومش عارفه اكتب خاااالص ... ماليش نفس

طب حد فيكم يسألنى ليه ؟؟
اقولكم ليه ؟؟ لان انا غالبا بارغي فى مواضيع اجتماعيه طب ارغي ازاي فى مواضيع اجتماعيه ولا غيرها والناس مش لاقيه تاكل ؟؟؟؟
حقيقى والله الناس جاعت منظر طابور العيش فى الشوارع بقى يحسر وعيش ا ستغفر الله العظيم لا يتشاف ولا يتاكل والادهي من كده انك كمان بتوصل انك تدي اي عامل من المخبز رشوه عشان تاخد عيش اصلا !!!!!!!!
كل حاجه غلت الاكل وغير الاكل جوزي بيقولي انا باشتري الكرتونه مثلا ب 100 جنيه النهارده وابيعها بكره ب 110 وتاني يوم اشتريها ب 120 ؟!؟!؟!؟!! يبقى هو كسب ايه ؟؟؟ والناس تعمل ايه ؟؟؟؟؟ تشتري القلم الى بنص جنيه بجنيه ازاي ؟؟؟ هما مش لاقيين ياكلوا طيب هايكتبوا ازاي ؟؟؟!!!!!
زمان كانت لما الاسعار ترتفع الناس تقول حوشي يا حكومه . دلوقتي الحكومه تحوش ايه ولا ايه ؟؟؟؟ اصلا ما عادتش الحكومه لها حاجه باعوا كل حاجه الموضوع خارج اديهم.
طب يدوا فلوس للناس ؟؟؟ طب دول الموظفين . طب والباقيين ؟؟؟؟ واصلا لو وزعوا فلوس فى الشوارع هايحصل تضخم اكتر والاسعار تزيد اكتر ؟؟؟!!!!!!!

الازمه عالميه؟؟؟؟!!! ماشي بس اشمعن احنا الى متنيلين اوي كده ؟؟؟؟
عارفين ليه ؟؟؟ لاننا احنا بقينا ولا حاجه .
بقينا زي الحال الى اتكلم عنه الرسول صلى الله عليه وسلم :( يُوشِكُ الأمم أَنْ تَدَاعَى عَلَيْكُمْ ، كَمَا تَدَاعَى اَلأََكَلَةُ إِلَى قَصْعَتِهَا فَقَالَ قَائِلٌ: مِنْ قِلَّةٍ نَحْنُ يَوْمَئِذٍ قَالَ: بَلْ أَنْتُمْ كَثِيرٌ، وَلَكِنَّكُمْ غُثَاءٌ كَغُثَاءِ اَلسَّيْلِ، وَلَيَنْزِعَنَّ اَللَّهُ مِنْ صُدُورِ عَدُوِّكُمْ اَلْمَهَابَةَ مِنْكُمْ، وَلَيَقْذِفَنَّ اَللَّهُ فِي قُلُوبِكُمْ اَلْوَهْنَ، فَقَالَ قَائِلٌ: يَا رَسُولَ اَللَّهِ، وَمَا اَلْوَهْنُ؟ قَالَ: حُبُّ اَلدُّنْيَا وَكَرَاهِيَةُ اَلْمَوْتِ)
عارفين يعنى ايه غثاء السيل ؟؟ السيل وهو نازل معاه مخلفات قش وتبن وما الى ذلك بيكون كتير وهايش لكن ضعيف لو دست عليه كده يبقى ولا حاجه .
اهو ده حالنا . احنا بقينا ضعفاء .مافيش موارد اقتصاديه طبيعيه بكفايه نصدرها يعنى مثلا او حتى تكفينا احنا . مافيش انتاج صناعي يذكر مافيش انتاج زراعي حتى مكفينا احنا . مافيش تبادل تجاري بالوضع الصحيح الناجح وبالحجم الكبير الى يدي قوه اقتصاديه . مافيش حتى قوه بشريه اغلب المجتمع دلوقتي طالع مش فاهم حاجه اصلا شهادات متعلقه على الحيطان و خلاص . الى معاه دبلوم دلوقتي بيقولك انا مؤهلات ما اشتغلش حرفه يدويه. والى معاه مؤهل عالي بيقولك انا ما اشتغلش انا اي حاجه بعد ما صرفت دم قلب اهلي على التعليم سنين طويله وتعبت فيه انا لازم اشتغل بيه .
وفى النهايه مافيش ناتج قومي فعلي . او على الاقل مافيش ناتج يضاهي الاستهلاك القومي حتى ............ بقينا بناكل اكتر ما بنشتغل بنصرف اكتر ما بنكسب بقينا فى وهن وضعف من كل النواحي
حتى الوضع السياسي بقى ضعيف جدا جدا وفاشل . اي عيلين دلوقتي يعملوا اعتصام بينفذوا لهم طلباتهم عشان يخرسوا ما يعملوش دوشه .
حتى الديييييين الناس بعدت عنه والى قرب منه خد قشوره ومسك فيها والى توغل فى الدين يمكن فاهمه وفاهم قواعده ومبادئه غلط وواخده دراسه ولا سياسه ولا واجهه مش واخده معامله وحياه وايمان فى القلب وبين العبد وربه . طبعا الحمد لله فى ناس لسه كويسه لكن للاسف البيض الفاسد يطفوا على وجه الماء .
ما حدش يقولي سودتيها فى وشنا وما قلتيش الحل عشان انا اصلا مش لاقيه حل
او على الاقل مش لاقيه حل سريع يسد جوع الناس الغلابه .
لكن هى دي صورة المجتمع الى احنا فى من وجهة نظري جاي انا غلطانه لكن مش على طول الخط.
جايز فى ناس منتجه وناس محترمه لكن برضه مش على طول الخط ومش بالكم الكفايه .
جايز حكامنا غلطانين وفيه فساد وفيه كل حاجه لكن كمان احنا مش صح احنا اصلا نستاهل كده فكيفما كنتم ولي عليكم .
بالله عليكم زي ما رفعتم اديكم يوم كاس الامم المتنيله على عينها وبقيتوا كلكم على قلب رجل واحد تقولوا يا رب مصر تكسب وتجيب لنا الكاس .
يااااااااارب اعيش واشوف المصريين كلهم ولا العرب كلهم ولا اطمع واقول المسلمين كلهم على قلب رجل واحد فى الحق والعدل وبلاش يمسكوا سلاح ويبذلوا انفسهم واموالهم وانما بس يرفعوا ايدهم ويدعوا من قلوبهم وهما على قلب رجل واحد
ان يرفع الله عنا الكرب وان يرفع الغمه عن المسلمين اجمع وان يكف عنا ايدى الظالمين وندعوه ونرجوه ونتوسل اليه برحمته وغفرانه أن يستعملنا ولا يستبدلنا .
قولوا امييييييييييييين وكفايه عشان قربت اعيط واسفه على النكد بس ما اقدرش اتنكد لوحدي من غير ما انكد عليكم .
نشوفكم عن قريب يارب

السبت، 15 مارس، 2008

13- قوانين ستاتيه عجيبه

هييييييييه اخيرا جيت مشوار طويل اوي بس جيت يعنى فى الاخر . اخواني واحبائي وكتاكيتى الاعزاء بعد البوست الى فات والاحساس البشع من الرجاله الى قروه انهم مهضوم حقهم وانى انا متحيزه وباعطي دروس للستات ياكلوا دراع اجوازهم ازاي .
فقرر انى اشن حملى من الهجوم على بنى جنسي من باب تحسين العلاقه مع النوع الاخر عشان انتم عارفين ان جوزي بيقرا المدونه ومش عايزين بقى نعمل قلق عشان انتم عارفين ما حدش لاقي جواز الايام دي .
المهم هانرغي النهارده على السريع عشان فاضل ربع ساعه والمنبه يضرب وهايقوم يصلي ويسبنى .
وقبل ما ارغي احنا اتفقنا ان كل قاعده لها استثناء . مش عايزه دوشه حول الاستثناءات
هانرغي عن مجموعين قوانين كده ستاتيه عجيبه وغريبه فى اغلبها عدائيه شويتين .
عدائيه ؟؟؟؟؟ اه اه عادائيه ومتحفزه وبيعتبروها من الثوابت زي ايييييييييه ؟؟؟؟؟
* شوف يا عم حماتي دي عمرها ما هاتحبني وعلى رأي المثل ( لو الغله تيجى اد التبن الحمى تحب مرات الابن ) اه وعشان كده الواحد لازم يحرص منها من الاول وحبذا لو نبين لها العين الحمرا .
طب ليه كده ما تجربي الحلول السلميه الاول ما يمكن تطلع ست لطيفه وتحبك وتحبيها او حتى تعيشوا فى سلام نسبي ؟؟؟ واكرمي فيها زوجك يا ستى .
* سلفتي ؟؟؟؟ يا باااااي اكيد بتغير مني ومش طايقاني هى يعنى هاتحبنى ليه ولا تحبلي الخير ليه ده حتى بيقولوا ( مركب الضراير سارت ومركب السلايف غارت ).
طب ليييييه يا ماما هو قانون يعنى ان السلايف يكرهوا بعض ؟؟؟تخيلوا وصلت ان مره حماتي عشان باقول لسلفتى بهزرا يا سلفتي تقولي ما تقوليش سلفتك كلكم اخوات الحمد لله . كأن الكلمه دي تنم عن عداء وضغينه ساحقه .
* لا ما هو ما دام اتجوزتي لازم تنسي الدلع وتنسي الخروج واعرفي ان ايامك فى الدنيا بعد كده عذاب وشقاء .
طب ليه كده طيب هو انتى رايحه معركه حربيه عادي ممكن تعدي عليكى اوقات صعبه لكن هاتعدي وتفضي وتروقي وكل حاجه ايه السوداويه دي .
* أنتى مخطوبه ؟؟؟ طيب يا اختي عايزه تتجوزي ليه انتى بتعيشى احلى ايام حياتك عيشيها على مهلك بكره تتجوزي يعنى الى اتجوزوا خدوا ايه ؟؟؟
طب ليييييييه يا امي كده يا ربي حد عارف الغيب ما يمكن الى جاي يكون احسن واسعد ما تسيبى البنيه تتعشم فى الخير
* الناس كلها باصينلي وحاسدينى مش عارفه على ايه مع ان فلان ده عنده وفلان عنده وفلان عنده وانا بس الى باتحسد.
طبعا فلان وفلان المذكورين اعلاه ماتوا مفلسين فى ظروف غامضه . وطبعااااا هما من قرايب جوزها ( جابهة الاعداء).
* ده فوق العاده الوحشه اوي بجد عند اغلب الستات فى تنغيص حياة الاخرين والتدخل الشنيع فى حياتهم . زي مثلا انتى ازاي ساكته لجوزك ده ؟؟؟ قوليه كذا وقوليله كذا .
عمري ما شوفت واحده بتقول كلمه عدله ولا كلمة حق لصاحبتها ولا اختها ولا بنتها ( الا قليلا طبعا )
* العاده التانيه الاشنع الكيل بمكيالين . فى حاجات كتير اوي اوي اوي . يعنى نفس الموقف تحكم فيه بحكمين مختلفتين باختلاف الاشخاص مثلا .
( زي مثلا ان بنتها من حقها تزور اهلها مرتين فى الاسبوع انما مرات ابنها لو راحت مره واحده يبقى مالوش لازمه تقطيع السكك رايح جاي )
* التفاخر والتقليد وتحت الاثنين دول حطوا مليووووووووون خط
أمنية حياتي الاقي عند الجميع مش الستات بس افتراض حسن النيه مع ا لناس اولا واذا ثبت يا ستي عكس ذلك ابقى اتبعي ما يحلوا لك (بس من غير سكاكين ) لكن الاول جربي حسن النيه بلاش التحفز مع الناس خصوصا اهل زوجك .
وعلى فكره يمكن عشان انا قلت كام مثل شعبي تقولوا ان الكلام الى انا قلته كان زمان وعلى مستوى الناس البسيطه فى العلم والثقافه .
انما الحقيقه بجد هى لا . هو موجود على جميع المستويات مع اختلاف الطريقه الى بتتحسب بها العداوه والتحفز مش لازم يكونوا حافظين الامثال دي الا انهم بينفذوها بجد تقريبا ده استعداد وراثي ( مسألة جينات مساكين مالهمش ذنب ).
اي واحده فيكم هاتزقل طوب تستصغر الطوبه الى هاتزقل طوبه كبيره هاعرفهااااااااا .
والمنبه ضرب خلااااااااااااص

الأحد، 9 مارس، 2008

12-احنا ..... وهما ( الستات والرجاله)

السلام عليكم يا قطاقيط والله واحشني . اي والله مع انى مش عارفه انتم مين اصلا . بس او واحشني ما كلتش ودانكم من الرغي بقالي يومين .
النهارده انا قلبت كده فى البلوج كتير وقريت اجزاء من مدونات كتير اوي ولقيت كلام حلو لناس كتير ما شاء الله باين علينا هانبقى كويسين يا ولاد فى يوم من الايام لسه فى ادمغه صاحيه الحمد لله فى امل . بس انا لما بيعجبنى مدونه باعلق عليها مش زي ناااااااااس . المهم ربنا معانا جميعا ومع كل فكر وضمير صاحي .
ودائما وابدا ادعو الله ان أرينا الحق حق وارزقنا اتبعاه وارنا الباطل باطل وارزقنا اجتنابه. لان فى ظل الحياه الى احنا عايشنها سهل اوي الواحد يتوه ما يعرفش هو واقف فين .
الا لو لقى كميه هائله من التراب فوقه وعادم عربيات كاتم نفسه وزعيق ودوشه وزحمه وناس صوتها عالي وكلسات عربيات لا منقطعه ولها اصوات عجيبه يعرف انه فى شارعنا . ده العنوان عشان لوحب حد يجي يزورنا .

ها هانرغي فى ايه كتاكيت ؟؟؟؟
بصراحه انا فى موضوع كده نفسي أرغي فيه بس المشكله انى مش هاتعرفوا تسكتوني .
بصوا انا هسأل سؤال وانتم بقى عليكم الاجابه ( أنا مش هاقول ولا كلمه هما يادوب صفحتين بس وهاسكت)
السؤال : هو ايه الفرق بينا وبينهم ؟؟؟ هاتقلولي طب مين احنا و مين هما ؟؟؟؟ انا هاقولكم يووووووووووه ده فى احنا كتير وفى هما كتييييييييييييير .
فى احنا الستات واحنا العرب واحنا المصريين واحنا المسلمين وغيرهم كتير ما جوش مع الهام .
وفى هما الرجاله وهما الى مش عرب وهما الى مش مصريين وهما الى مش مسلمين وغيرهم برضه نفس الموضوع.

ها تحبوا نتكلم عن ايهم احنا وهما ؟؟؟؟ عااااااااااااااارفه والله عارفه مش عايزين وجع قلب ولا مصريين ولا عرب ولا مسلمين بلاش وجع قلب ياما قلنا ومش مقصر معاهم حاجه( بس هاتكلم عنهم برضه ان شاء الله )

خلينا الى مش وجع قلـــ....... لا الى فاتوا مش وجع قلب ده وجع دماغ وضمير خلينا نايمين فى العسل نوم حلو النوم .

ندخل على وجع القلب الى بصحيح .
ايه الفرق بينا احنا الستــــــــات ....... وبينهم هما الرجــــــــــــــاله ؟؟؟؟؟؟؟؟؟

الستات عندهم شعر ...................... والرجاله فى الغالب قرع .
لكل قاعده شواذ ما حدش يقولي انا مراتي قارعه ولا واحده تقولي انا جوزي بشعر . ما لناش دعوه احنا .
ندخل على الجد بقى :

* أولا من ناحية الاقبال على الجواز : البنات كلهم عايزين يتجوزوا بس يا اما مكسوفين يقولوا يا اما بقت كرت محروق من كتر ما رسمت على ناس وفي الحالتين هى قاعده يعنى مستنيه عدلها .

الرجاله كلهم هايموتوا على الجواز لكن بقوا عاملين زي المشتري الخايب الى يقف يقلب فى عربية التفاح لما يموت صاحبها من النقطه وبعدين يسيبها ويمشي (ويبقى يا اما مش معاه فلوس التفاح يا اما ما بيعرفش يهضم الاكل النضيف يا اما حاسس نفسه لازم ياكل حاجه اعلى من كده من الفضاء الخارجي ) أي راجل يقول هو فين التفاح هاقوله مشيها برتقال ما تزعلش ولا كوسه حتى موافقين ده الكيلوا ب 4 جنيه .

* بعد الجواز بقى : الستات لما بيتجوزوا هى سنه واحده وتبدأ عليهم علامات البله المنغولي والهدوم المقطعه والايشاربات الغريبه على راسهم وكل ما العيال تزيد عيل تظهر عليها علامات اكتر من البله المتعدد الجنسيات .

الرجاله بعد ما يتجوزوا بتبان عليهم النعمه كل شويه اكتر من الاول وتلاقي هدومهم بتتكوا كده وجزمهم ملمعه وريحة البرفان بتهفف حواليه . بس بيحلق دقنه بالعافيه غالبا لانه بيبقى حاسس ان حلاقة الدقن ظلم واقع عليه هو وبنى جنسه وكل ما يتقدم فى السن يأفلط فىنفسه زياده.

* الاجازات : الستات لو هى موظفه ممكن تاخد اجازه من الشغل اسبوعيه ولا يوم عيد العمال . لكن يا حبة عينى بتقضيها اشغال شقه ولا تجيبلها 5 كيلوا قلقاس تقطعهم و5 كيلوا بسله تفصصها وتحطهم فى الفريزر او باميا لو فى الصيف المهم . طيب مين يديها اجازه من شغلتها الاساسيه البيت ؟؟؟؟؟ ده سواء هى لها شغلانه تانيه ولا لا ما تفرقش خالص . مسؤليه غير منتهيه تماما حتى وهي نايمه المسؤليه لا تنتفي عنها .
الرجاله بقى : يوم الاجازه الاسبوعيه ده يا لهوي بيبهدلوا نفسهم . كل يصحوا يناموا تاني . ويمكن يتهوروا ويقروا الجرنال . ويبص بقرف كده وزهق ولو عملوا قدامه عرض السيرك القومي ولاده ما يتحركش فيه شعرايه . ويقولك ايه مش يوم اجازتي ؟

* فى الشغل : الستات فى كتير من الاوقات بيستهبلوا ويطالبوا بالمساواه وهما اصلا مش بيشتغلوا فعلا زي الرجاله ولو زنقتها فى شغلانه جامده تقولك الله انا الى هاعمل كذا ما الرجاله اهم قاعدين عيب عليكوا وبعدين بعد خمس دقايق تتشاكل مع المدير عشان زود زميلها عنها فى الحوافز والمكافئات.
اما الرجاله ما بيعملوش كده خااااااالص لكن اه واه لو ست قلة عقلها وفكرة تشتغل كويس زيهم وتنجح يصبوا جام غضبهم على الستات كلهم حتى الى في ا لبيت على المسكينه دي ويقولك ايه يعنى هى فاكره عشان بتعمل كده هاتبقى راسها براسنا لا الست ست والراجل راجل والرجال قوامون على الناس ..........واي كلام فى البتنجان وهما مش فاهمين اصلا يعنى ايه الايه؟؟؟؟؟؟؟؟؟؟؟؟؟؟؟؟

* فى المصيف : الستات بيشتغلوا طول النهار يطبخوا ويخلوا بالهم من العيال ولما يروحوا البحر تقعد تلمهم زي الكتاكيت من على الشط كل شويه وتفضل قاعده تاكل الى يطلع من البحر وتصور الى ينزل البحر وترجع البيت تحمي العيال وتغسل هدوم الشعب المصري كله وتأكل الى جم من البحر جعانين تاني وتنضف الشقه كلها عشان الرمل ما يبهدلش ا لعيال ا لى استحمت ............. هو لسه فاضل ايه فى اليوم ؟؟؟ لو عرفت تنام يبقى كويس .
الرجاله بيصحوا بالعافيه الظهر يتمطع شمال ويمين ويقرا الجرنال الى وصى مراته تبقى تجيبه من الواد الى بيعدي ا لصبح وياكل ويروح البحر ويرجع ياخد شاور ويقعد فى التراس يتفرج على التلفزيون ويقزقز لب ويمكن يكون معاه اخوه ولا صاحبه يقعد يلعب معاه طاوله ولا شطرنج ويا دماغه العاليا .

* فى الرغي : الست لما تكون رغايه بتبقى مسليه ( اه ولا كلمه) انما الراجل لما بيكون رغاي يا لهويييييييييي بيقول كلام وقصص دمه خفيف موووووووووووووووووت .

* فى التركيز : الست ممكن تكون بتنقى الرز وبتذاكر للعيال وفاكره ان اللحمه على النار وبتكتب مدونه (هههههه) وكل شيء ماشي كويس اوي
الرجاله بقى لو كان بيتفرج على فيلم اجنبي واتكلم حد فى الشارع ممكن يصور قتيل عشان مش عارف يركز . واه لو كان بيشتغل . وأه ثم أه ثم اه لو كان بيتفرج على ماتش تبقى وقعة اهله سوده الى يكح عند الجيران.

* فى دور البرد : الست لما بتتعب بتفضل لاخر نفس تجاهد نفسها وتاخد حبيتين مسكن وانتى بايوتك وانتى هستامين وتقوم تحمي العيال وتطبخ وتروح الشغل وتخدم البيت عادي جدا .
الراجل لما ياخد دور انفلونزا يا ابوياااااااا بيبقى حاسس بظلم بين . وينام فى السرير وياخد كل انواع ادوية البرد ويشرب حاجات سخنه ويقول ااااااااه ياني طول الليل وكل خلق الله يجوا يزوروه وياخد اجازه من الشغل اسبوع وفى نص الاسبوع حالته تتحسن تكون مراته اتعدت منه بس هو برضه نايم وهى الى بتخدمه .

يا لهوي ايه كل الكلام ده كفايه كده اصل انا سرحت .


السبت، 8 مارس، 2008

11- يا سلام لو نبقى دوغري

السلام عليكم
ايه يا جماعه في ايه هو انا باكلم نفسي هنا ؟؟؟!!! كل الناس تقرا المدونه من بعيد لبعيد ويجوا يناقشوني فيها فى مكان تاني غير هنا . لا شكلي بقى وحش يعنى يرضيكم جوزي يقولي ما حدش بيقرا المدونه الا أنا وواحد كمان ساعات بيقراها جبران خواطر( قصده على الأستاذ احمد) الى يقرا بوست يرد عليه ويقول اي حاجه انشاله يصلحلي الاخطاء المطبعيه . ايه ده الناس تقووووول ايه مقطوعه انا على النت ماليش حد . ست سنين على النت كده هدر . أما نشوف الشغل بقى .ناس مش بتيجى الا بالعين الحمرا
( اصلح حالكم بقى تعلقوا وتناقشوني عارضوني وافقوني اي حاجه عيب كده بقى ) دي عشان الناس الى بتيجى بالمسكنه .
ها يلا نرغي بقى . مش عارفه هو فى موضوع كده خانقنى ومن زمان عايزه اقولكم عليه بس أرجع اقول مش دلوقتي ورانا رغي اهم بس بقى خلاص الخنقه زادت والظاهره انتشرت انتشار مريع .
تخيلوا ان انا بقيت اخاف افتح الأميل بتاعي ؟؟!!!! اه والله . لا مش في عفاريت ، بس الناس الايام دي مخها مش عارفه جرى فيه ايه . يادوب افتح الميل الاقي الناس بتكلمنى عادي جدا فى البدايه منهم ناس يعرفوني من زمان سنين مثلا ومنهم ناس ما تعرفنيش او عارفاني ونسيانى ( اصل انا اميلى مولد يعنى عليها مئات الاميلات وهابقى اقولكم ليه)
المهم الناس دي - الا قليلا منهم - لحوحين بطريقه بشعه جدا جدا . فى طلبات عجيبه وغريبه من نوعها اسمعوا عينه من تسلسل الحديث :
ـ ممكن تفتحي الكاميرا عشان اشوف الى بتكتب الكلام الذوق المحترم ده شكلها ايه ؟؟؟
ـ باقولك انا تعبت من الكتابه ممكن نتكلم مايك ؟؟؟
ـ ما عندكيش صور لولادك ؟؟؟ أنا : ايوه اتفضل شوفهم اهم على المحادثه ( ده لو كانوا مش محطوطين اصلا) طب مافيش صوره لكي بقى ؟؟
ـ هو انتى بتدخلي امته عادة؟؟؟ أنا : ماليش مواعيد حسب ما ربنا يسهل . طب ممكن رقم موبايلك عشان ابقى ارنلك لما اكون هنا ؟؟؟
- هو انتى اسمك ايه ؟؟؟ أنا: ام مريم . أنا باحب الناس تقولي ام مريم .
طبعا انا بصرف النظر عن رايي فى صحة الطلبات دي من عدمها الا اني باعتذر للناس دي بمنتهى الذوق انى مش باتكلم لا مايك ولا كاميرا ولا بادي صوري لحد ولا رقم تليفونى ولا باخد رقم حد ولا صور حد .
طبعا بيسألوني ليه بكل تعجب . طبعا انا عشان مش اشرح وجهة نظري لكل حد باقولهم اعتبروها حرية شخصيه ورأي شخصي . انى الاقي حد يحترم الراي الشخصي ده - الا قليلا- اطلاااااااقا ، ليه؟؟؟ مش عارفه .
ده غير اني مش لاقيه اهميه اطلاقا للطلبات دي انا ليا ست سنين على النت عمر ما ساورنى فضول حول شخصيه معينه باكلمها انى اعرف اسمها ولا شكلها ولا اي حاجه اصلاااااااا بالكاس بسأل عن السن والعمل والحاله الاجتماعيه اذا استدعي الحديث ذلك . ويمكن بعد خمس دقايق انسى المعلومات كلها . مش لا مبالاه مني بالشخص لكن فعلا عدم رغبه مني فى معرفتها يعنى الحكايه ما تفرقش( ده غير الزهايمر انتم عارفين السن ) .
غير ان ايه عادة الالحاح دي ؟؟؟ انا اكره الالحاح جدا فى الاتجاهين لااحب الح على حد ولا حد يلح عليا .
واصلا ما طول عمري عندي اميل اشمعن الايام دي الناس جرالها كده ؟؟؟
انا طول عمري بادي اميلى لاي حد يطلبه عادي والى يطلع مش تمام بعد كده حظر وحذف ويتحول وجوده الى عالم النسيان ده سبب انى عندي اميلات كتير . كلهم ناس محترمين وأفاضل الى اعرفهم ( والى ما اعرفهمش احسبهم ذلك )
ليه ما بنحترمش الرأي والرغبه الخاصه للاخرين وبنعتبرها مجال للمساومه ؟؟؟ ولا احنا اتعودنا على الفصال فى كل حاجه ؟؟؟ واتعودنا على ان الكل بقى كلمته مش واحده وله عشر كلمات ؟؟؟؟ حقيقى مش عارفه .
بتهيئلي لاننا اتعودنا ندور على الى مش حقنا عشان ناخده ؟؟
ولا يمكن عشان اتعودنا نتنازل عن حقوقنا وما نحاولش اننا ناخدها بايدينا ولكن نقعد نعيط ونقول خدوا حقنا ؟؟
ويمكن كمان عشان ما عندناش حاجه نعملها مفيده فبنضيع وقتنا فى اننا نلح ونساوم ونفاصل ؟؟؟
يا سلام لو نبقى دوغري كده وكلمتنا واحده ومحترمين نحترم نفسنا ونحترم الرأي الاخر حتى لو كان غلط من وجهة نظرنا . ونمارس حريتنا ونحترم حرية الاخرين .
يا سلام لو كنا نخلي وقتنا دايما له قيمه وثمن ونخليه دايما وقت مثمر مش رايح فى الهوا .
يا سلام لو نحترم القوانين ( الالهيه والوضعيه ) ونفذها من نفسنا من غير ما يبقى فوق راسنا شاكوش .
وأأأأأأأأأأأأأأه يانى . عرفتوا ليه ان اسمي صبرني يارب ؟؟؟؟؟؟؟؟؟؟؟؟؟؟؟؟
والى لقاء اخر ان شاء الله

الأربعاء، 5 مارس، 2008

10- قلة أدب .......... ولا قلة حيله !!!!!!!!!

السلام عليكم وحشنى الرغي مووووووووت. بس مش عارفه هاتستحملوني ولا ايه حاسه ان انا هاكتب كلام دمه تقيل وخنيق لان دي حالتى حاليا . مش مضروبه لا . بس ولادي تعبانين شويه وامتحانات الشهر الاسبوع الجاي وكل على كله دعواتكم لاختكم الرغايه الغلبانه الى مش مطحونه .
ايه رايكم انا عايزه اتكلم عن قلة الأدب . اها انا عندي احساس شنيع ان العيال بقوا عندهم قلة ادب متناهيه. ومش عارفه ايه الحل بصراحه . حتى مش قادره اقول هما منظرهم كده وخلاص . لان قلة الأدب دي نتيجه لازم لها أسبابها وعندي رغبه ملحه انى القي بالمسؤليه فعلا على الكبار الاهالي يعنى . الى المفروض يربوا عيالهم .
كمان حاسه بكارثه انا الناس عادت بتكسل تربي العيال ، أه والله بيكسلوا (بيقولك هو احنا لسه هانقول ونعيد . احنا يعنى كان مين علمنا ولا مين قالنا بكره العيال لما تكبر تتعلم وتعرف لواحدها ) مع ان مش دي الحقيقه لان مواقف التوجيه والتربيه اغلبها بتكون غير مباشره وعليه مش لازم الطفل يفتكرها كلها. يعنى هو ما اتعلمش لوحده فعلا وحتى لو كان فيبقى الظروف مثلا علمته فى حال عدم تواجد الظروف نفسها يبقى لازم نكون احنا موجودين بقى نربي .
طبعا كل واحد بيقول فى نفسه ان انا سوداويه وان العيال اهم طالعين ميت فل وسبعتاشر ... ده أنا حتى ولادي بيطلعوا من الأوئل وحافظين قرآن وبيقولوا مامي وبابي وقبل ما يناموا بيشربوا اللبن ويقولوا الورد ويقولوا لمامتهم نايتي نايتى ؟؟؟؟!!! منتهى الأدب والاخلاق الى في الدنيا !!!!!!!!!!
طيب انا هاعرض عليكم مجموعة مواقف وتحكموا هى أدب ولا قلة أدب ومين الى غلطان فيها ::
ــ الولد ( 6 سنين مثلا): مامي أنا عايز جنيه . الام( وهى وسط الناس بقى ومرسومه على ورقة مسطره) : هاتجيب ايه يا حبيبى . الولد : هاجيب شيبسي بالشطه واللمون . الام : خد يا قلبي . بعد ربع ساعه ... مامي (هاتي جنيه). الأم وهى بتجز على سنانها :ليييييه يا حبيبى . الولد بمنتهى التناحه والصفاقه : ايه هاجيب شيكولاته زي كوكو . طبعا احراجا من الناس هاتديله . امال الناس يقولوا عليها بخيله ؟؟؟ ولا الناس يدوه هما ؟؟؟ ولا يقولوا عليها مش معاها ؟؟؟ ولا يقولوا علينا مش أم رؤوم ومفتريه وبتاكل عيالها ؟؟؟ . وتتكرر القصه .
ومافيش مانع ان الام المرسومه على نفس الورقه المسطره دي تكون خدت لها شتمتين ولا ضربتين فى وشها ولا بوكس فى بطنها ( اصله متعلم جودوا في ا لناتي) وتبدأ التعليقات السخيفه من الحاضرين ما تزعلهوووش حرام عليكى ما كل العيال كده ايه يعنى ....... الى اخره الى يخلي الولد يحس انه والدته لو رفضت تبقى امنا الغوله وآكلة لحوم البشر.
( فى رأيي مهما كانت الظروف لازم تلتزمي بقوانينك معاه وتكوني صارمه وما تخافيش منه عشان قدام الناس والا هايستخدم السلاح ضدك ) .
ــ ندخل على الاكبر شويه . البنت ( 12 سنه مثلا ) : بابي فى رحله المدرسه عاملاها وهانطلع اسكندريه 3 أيام . الأب ( الى مش فاضي وخارج او بيتفرج على الماتش ) : نعم 3 أيام ودي فين . البنت(بمسكنه زياده شويه) : أليكس يا بابا . الأب باقتضاب حاد : لا طبعا مافيش رحلات وبيات بره . البنت والدموع هاتفط من عينها : ليه يا بابي بس ما كلا صاحباتي راحيين يعنى اشمعن انا وبعدين ما المشرفين معانا وسوسو بنت انتى لولو رايحه . الأب بثوره: اها قولي كده بقى بتقلدي البنت التلفانه بنت خالتك دي . وينده على الأم : انتى يا هانم تعالى شوفى بنتك ............... الأم : جرى ايه يا محسن وايه يعنى انت عايز تعقد البنت ما كل البنات على كده الايام دي . وبعدين ما لها سوسو دى بنت أخلاق ومتربيه وبنت ناس وابوها وكيل وزاره ولا انت هاتعيب فى لولو وجوزها كمان . وبعد الخناقه والتعارض والتضارب ينتهي الأمر لحاجه من اثنين لا ثالث لهما .
يا اما الأب يصر على موقفه والبنت ما تروحش الرحله بدون ابداء اسباب حقيقه بدل سبب سوسو بنت لولو .(وساعتها يتحول الاب فى نظر البنت ـ بايحاء من تعليقات الام وحكايتها للقصه فى التليفون للولو وخلق ا لله كلهم ـ الى وحش كاسر ومعقد نفسيا واجتماعيا)
او انه اول ما يسمع صوت الشوط التاني بدأ يقولها : باقولك ايه اتفلقوا بنتك اهي وانت حره فيها قطعيها وارميها فى الشارع ما تقرفونيش لكن خليكى فكره انك انتى الى هاتبوظي البنت وبتكسري كلامي عليها .( وفي الحاله دي يظهر الاب بسلبيه بشعه ولا مبالاه بالبنت اصلا وبعد عاطفي واجتماعي عنها ) . ده غير انها هاتروح الرحله كمااااااان .
وطبعا البانوراما كلها بتشتغل قدام البنت ويمكن قدام العيال كلهم ..................
نكبر شويه ؟؟ الولد 18 سنه : مين يا ماما الى جه بره ؟ الام وهي مدخلاله الشاي : لا ده عمك فلان . الولد بمنتهى الصفاقه : يوووووه دلوقتي بابا ينده عليا عشان اسلم عليه . الأم : باقولك ايه ما تبقاش ترد هابقى اقوله انك نمت هو يعنى ما هو كان هنا اول امبارح . ( مع ان لما اخوها بيجى كل يوم بتبقى عايزه تصحي الجيران يجوا يسلموا عليه )
وطبعا تقدروا تعكسوا الادوار تماماااااااا .
البنت 16 سنه وانت طالع : ماما تعالى شوفي اللبس الجديد الى انا جبته . الام : ورينى يا اختي ..... اه حلو اوي بكام ؟؟ شوفي هو كان التايير معروض اول السيزون ب 700 جنيه بس انا جبته فى التخفيضات ب500 جنيه . الام : نعم؟؟ يعنى صرفتى الفلوس كلها ؟؟ وترجعي لسه عايزه سابو وشنطه وعشر ايشربات يتلفوا مع بعض ؟؟؟ البنت : اعمل ايه يا ماما ده طلع عينى وصوابعي فأفأت انا ونها صاحبتى ودي ارخص حاجه لقيناها . الأم : طب ادخلي يا اختي قيسيه . (طبعا فى واحد قاعد على بعيد يقرا الجرنان هايتنقط من الفرسه ) . البنت وهى منفرجة الاسارير : ها ايه رايكم ؟؟ الام : حلو اوي تصدقي هياكل منك حته . بس الجيبه دي مش ضيقه شويه ما كانش فى مقاس اكبر ؟؟ البنت : ضيقه ؟؟؟!!!!! ضيقه ايه يا ماما؟؟؟ دى على مقاسي بالظبط اكبر من كده تبقى مهروله!!! وبعدين البنت هناك قالتلى ان القماش ده بيوسع . الأم : طب والبلوزه دي مش مفتوحه ؟؟ لازم تلبسي تحتها حاجه . البنت باستهبال : أه طبعا يا ماما هابقى البس عليها بادي او انزل الطرحه عليها امال هامشي كده ؟؟؟!!! ....ها ايه رايك يا بابا ؟؟ الأب وهو يتفحص ال 500 جنيه بحسره : لا ضيق روحي هاتي المقاس الاكبر زي ما ماما قالت . البنت ببجاحه وهى ماشيه : يوه بقى انتم مش عاجبكم حاجه ابدا كل ما اجيب لبس تقولولي وحش ؟!!!!!!!!!!!! خلاص ابقوا انزلوا معايا بقى حاجه تزهههههههههق. وطاخ .... ده باب اوضتها .
وفى الغالب مافيش حاجه بتتغير وبيفضل التايير زي ما هو حتى لوتخنت عشره كيلوا فى الاجازه وبقت بتدخله بصبونه .
بتهيئلي لو قعدت من هنا للصبح اقول مواقف مش هابطل . كتيييييييير اوي، والام اوالأب فى حالة استسلام من اول كيس الشبسي لحد التايير ونوع العربيه الى ابوه هايجبها له كمان والعروسه كمان وحياتك.
بصراحه بقيت اشوف قلة ادب من العيال حتى الصغيرين جدا فى السن والى انت يصبحوا فى الثلاثين من عمرهم وقاعدين لسه لاهاليهم تصرف عليهم وهما على نفس العجرفه وقلة الادب وقلة المسؤليه .
ما عادش الاب والام بيحرصوا على الاصول الى اتعلموها ويعرفوها لاولادهم ويربوهم ويعودوهم عليه الاصول والاخلاق وكل الحاجات الحلوه الىكانت فينا زمان .
تخيلوا ؟؟؟ ما عدتش باسمع حد بيقول لابنه عيب ما تشتمش اخوك الكبير !!!! وما عدتش باسمع ام بتقول لبنتها ما تعمليش زي الناس ولا زي البنات التانيين انتى حاجه تانيه!!! وما عدتش باسمع ام بتتكلم باحترم عن جوزها واهله قدام اولادها على الاقل الا نادرا .
وما عدتش باشوف ام واب بيتفاهموا فى الامور الخاص بتربية الابناء لواحدهم من غير اشراك الابناء فى ذلك الا قليلا
ما عدتش باشوف يوم العيد الصبح اسر متجمعه من كبيرها لصغيرها يعيدوا على اهاليهم .
ما بقاش في حاجه اسمها التزام ومسؤليه واحترام وصلة رحم واصول اجتماعيه .
بقينا بنقيس نجاحنا فى تربية الاولاد بمقاييس تانيه خالص .
بيجيبوا كام فى الثانويه العامه ؟؟؟ حافظين كام جزء فى القرآن(يعنى كدبوس كده منظر) ؟؟؟ دخل كليه من كليات القمه ولا لا ؟؟؟ بيتدرب فى احسن نادي فى البلد ومعاه عضويه ؟؟ مأمنين له مستقبله وعنده شقه وعربيه ؟؟؟ بياكل احسن اكل ويلبس احسن لبس وكل طلباته مجابه ؟؟؟؟
كل دي حاجات حلوه أوي أوي تواجدها ،لكن مش دي المقياس . فى استفاد ايه واتعلم ايه فى المدارس مش جاب كام بس؟؟؟ . فى بيعمل بالقرأن ويتدبره ويقيم الفروض ولا لا . فى دخل الكليه الى بيحبها وهاينجح فيها ولا لا . عملت انا الى عليا وهيأت له مناخ كويس يقدر يكون فيه انسان محترم ومنتج ومؤمن قبل كل شيء ولا لا ؟؟؟ وعلمته يصنع رغيف ولا اديته انا رغيف كل يوم ياكل وما بيعرفش يعمل حاجه تانيه ؟؟؟؟
المقاييس اختلفت ولا العيال اتهبلت . ولا الاهالي بتستعبط ؟؟؟ مش عارفه
واكثر ما يثير حنقى على الناس انهم يبرروا الخطأ بانتشاره . ما كل العيال كده وكل الناس كده ؟؟؟؟؟؟؟!!!!!!!!!!
سيظل مبدأي انتشار الخطأ لا يبرره ابدااااااا ولا يجعله يوما صحيحا .
وكفايه كده عشان انا خلاص هنجت وكمان دمي تقيل موت النهارده وعارفه انكم اتخنقتوا مني تماما .
واشوفكم على خير

الأحد، 2 مارس، 2008

9-اتجوز تاني وما تصدعناش

السلام عليكم ورحمة الله وبركاته

أنا جيت اخيراااااااااا . طبعا فكرتوني مت او تهت وانا جايه او دخان الطبيخ كتر عليا ؟؟؟ لا الحمد لله انا لسه متواجده بس كان عندي شويه حاجات كده باخلصها على السريع. هاتتعودوا على اختفاءاتي كتير ده عادي. بالاضافه الى التواجد المستمر لاولادي الهاديين جدا فى البيت يومي الجمعه والسبت بيبقى جو ملائم اوي للتركيز.



لحد دلوقتي مش عارفه لسه أنا هاتكلم عن ايه ؟؟؟؟!!! شويه كده يمكن الهام تاهت وهي جايه .......!!!!!

اخيرا جاتلي فكره بس مش من الهام دى من الذاكره لانى كنت ا تكلمت عنها قبل كده فى منتدى مش فاكره ايه ولا فاكره قلت ايه لكن تعالوا نرغي حولها .
شوفوا هو الموضوع متعلق بالزواج التاني لكن بقى مش بموقفي تجاهه ولا بتفحيصه وتمحيصه وموقف الدين منه والكلام الذي قتل بحثا ده .
لا انا بقى عندي نقطه معينه ومحدده عايزه اتكلم فيها :
ليه الرجل مهما كانت ظروفه وافكاره ومشاكله بيداعب خياله دايما الزواج التاني ؟؟؟!!!!

مش فاهمين قصدي صح ؟؟؟
طيب نرغي الاول ،دلوقتي انا باسمع كلام بابقى مش عارفه اضحك عليه ولا احدف الىبيقوله باي آله حاده؟؟؟ زي ايه ؟؟؟
والله انا بافكر اتجوز تاني . طب اتجوز . اصل بصراحه: (بداية الحجج بقى وتبرير المواقف مع انه مش مطلوب منه اي تبرير)
عد بقى الاسباب الجوهريه::: اصل التعدد هو اصل الزواج لان الايه بدأت بكلمة مثنى (هايطلع على التاني على طول ) .
الى بعده : اصل التعدد سنه عن الرسول عليه الصلاة والسلام(خلص كل السنن ووقفت على دي واصلا مش صحيح لان الرسول قال خذوا عني امور دينكم ) .
الثالث : اصل الستات عددهم بقى اكتر من الرجال ودى من علامات الساعه لازم بقى نعدد عشان نحل مشكلة العنوسه .(اذ فجأة كده بقى قلبه على المجتمع وهايضحي عشانه وخلص كل الواجبات فاضل حاجه واحده)وطبعا مش محتاجه اقول ان الكلام ده تعبان ومافيش خلل لسه فى النسب بين عدد الرجال والنساء فعلا وزي ما في نساء معنسين في رجال معنسين يبقى مش الحل هو التعدد. اوت دي كمان .

الرابع:وده بقى مواله كبييييير لانه هايقولك كلام يقطع القلب:انا مش مرتاح فى حياتي ، زوجتى العزيزه غرقت فى الحلل والاولاد ( تفتكروا مين غرقها اصلا) وتركتنى حقى اتزوج بواحده تعوضنى افتقاد الحب.(طب لما التانيه تغرق فى الحلل برضه هاتعمل ايه ؟؟؟ او يقول انا مراتي ما بقتش زي اول ما اتجوزنا اتغيرت بقت عامله زي طبق الملوخيه البايته الى ملحها قليل ؟؟؟!! طب حضرتك مش ملاحظ انك زي طب الكشري البايت الى من غير دقه ؟؟؟
طب ولما تبات الملوخيه الجديده هاتعمل فيها ايه ؟؟؟!!

ايه رايكم ؟؟!! اظن بعد ما يقنع نفسه ومن حوله بالكلام الجميل المسبك ده يبقى هو كده بريء وماحدش يلوم عليه والاهم هو نفسه ما يلومش نفسه لاي سبب من الاسباب .
مع ان ما حدش طلب منه ده ما الى عايز يتجوز يروووووووح يتجوز( الجدع فيكم يورينا نفسه) هو لّّك فى الكلام وبس . انت مش مطلوب منك تبرير عايز تتجوز روح اتجوز ماتصدعناش .

طبعا انا عارفه كويس ان الشرع اباح التعدد . لكن انتم معايا فى كلمة اباح ؟؟؟ أباح التعدد يعنى سمح بالتعدد ولكن لم يأمر به ولا شيء . والى بيتكموا اساسا فى النقطه دي من ناحية الشرع هم ابعد ما يكون عن تطبيق الشرع فيه . وزي ما اعطى الاسلام الحق للزوج انه يعدد الزوجات فكمان اعطى حق للزوجه انها ترفض الاستمرار معاه حتى بدون ابداء اسباب. ومش حرام ولا حاجه عليها عادي جدا .

وطبعا مافيش اي مبرر من الى فاتوا يقول انه يتجوز فى السر من غير علم زوجته الاولى حتى لو برر لنفسه انه كده احسن لها هي ( انا مش عشااااااااني عشاني هو) عشان ما يجرحهاش (الواد حساس وعاطفي الاخر).

المهم دول بقى الناس الى لقت حجه نشوف التانين بقى دول يا عينى غلابه حالتهم تقطع القلب لانهم عارفين ان التعدد مش سنه ومش هايحل مشكلة العنوسه (متفتحين وفكرهم عالي ) وزوجاتهم ستات زي الفل وهما بيحبوهم جدا وكل شيء ميت فل واربعتاشر . طب ايه ؟؟؟ فين المشكله ؟؟؟!!!
المشكله انهم رغم كل شيء فى داخلهم ولو فى مكان بعيد كده هايموتوا ويتجوزوا تاني ؟؟!!!! ليه الله اعلم !!!!
حاولت اعرف على فكره بس ما قدرتش اليكم ما دار بينى وبين نفسي ::
..قلت يمكن لما يتجوز اثنين يمشي الرجل نافش ريشه ويثبت للناس كلها انه راجل ونص ؟؟!!! يجوز !!!
..او يمكن عشان يحس انه متفوق على غيره وخصوصا المرأه بانه متجوز اثنين وهى لا ؟؟ يجوز برضه .
..ويمكن برضه من باب استخدام الرخص والحقوق والاستفاده منها ؟؟ يعنى زي كده الى يلاقي علبة تونه وعليها عرض خاص اثنين بسعر واحده يشتريها وهو ما بياكلش التونه اصلا ؟؟؟ الله اعللللم !!!

المهم انى ما عرفتش اجاوب فى الاخر على السؤال وقلت اكيد هذه الاجابه تكمن فى بير مالوش قرار فى نفس الرجل (مسيرنا نوصله برضه ما وراناش الا هما).
بس اظاهر ان مش بس حلم الجعان عيش ..... لا ده حلم الشبعان برضه عيش

( هششششش شكلها من الاخر طفاسه) ما تقولوش قدامهم يا بنات
والى لقاء اخر ان شاء الله (بنات اسألوا عليا الا يموتوني الطفسين )