السبت، 29 مايو، 2010

لو معاك مليون جنيه


لو معاك مليون جنيه
كنت تعمل بيهم ايه
قولي بس على الي بتحلم بيه
 
 
كنت تاكل ايه ؟كنت تلبس ايه ؟
كنت تشتري عربيه جامده وتعمل بيه
ولا تشتري بيت فى المدينه
وتتجوز بت حلوه وتملا اديها صيغه
ولا اقول خدلك فيلا فى مارينا
رد قالي :
بس حيلك على الاحلام شويه
كل ده بمليون جنيه ؟؟
 
انت نايم ولا ايه ؟؟
هاتهم انت وانا عارف هاعمل ايه
 

 =====================================


صحيح قلولي
لو صبحنا الصبح كل واحد مننا معاه مليون جنيه
كام واحد فينا هايوضب نفسه وحياته بشكل عاقل من غير ما يبوظ الدنيا
وكام واحد هايخربها ويقعد على تلها
والبلد هايحصل فيها ايه
السوق هايحصل فيه ايه ؟؟
اقولكم انا
هاتحصل حاله جنونه من شراء الاطعمه والسلع الاستهلاكيه
هايحصل تمرد على الاعمال
هايحصل ارتفاع جنوني فى الاسعار من كل ناحيه
الدنيا هاتبوظ خالص خالص
البلد هاتخرب
السوق هاتبوظ
الناس اخلاقها هاتتغير
العيال هايبوظوا
 
هى دلوقتي لا مش بايظه طبعا ده ماشيه زي الحلاوه
بس تفتكروا بعد ما كل واحد ياخد مليون جنيه
مش على الاقل بعد ما يفرقعهم ويبوظ بيه الاقتصاد العظيم الجامد بتاع البلد
هايبقى على الاقل يعنى عنده بيت يتاويه وعربيه وبياكل لحمه زي خلق الله عادي ؟؟
على الاقل تسعين فى الميه من الشعب هايبقوا كده
صح ولا لا ؟
بعد سنه واحده الامور هاتستقر وهاتبقى ميت فل وخمستاشر
مجنونه انا صح ؟
سطحيه
عايزه اخرب الدنيا
 
قولولي بجد لو خدتم كل واحد فيكم مليون جنيه تعملوا بيهم ايه ؟؟
انا لا مجنونه ولا سطحيه وعارفه انها تبقى كارثه لو صحينا الصبح كل واحد فينا فى ايده مليون جنيه
بس ارجع وابص قدامي
واشوف ناس بتنحت الصخر عشان بي ياكلوا
واشوف ناس بيتعذبوا ويتهانوا ويتبهدلوا عشان هما ربنا اختارهم لابتلاء المرض
باشوف اطفال شوارع مش لاقين اللقمه الحاف
باشوف جواعى
باشوف يتامى قاطمين ظهر امهم
باشوف يتامى فى دور ايتام محبوسين بدون اكل ولا رعايه ولا احترام لادميتهم
شايفه شباب وبنات زي الورد قاعدين من غير جواز لحد سن الاربعين غالبا لضيق ذات اليد
شايفه ناس كتير متبهدلين فى بلاد الله كلها املا بس انه يكون عنده بيت ولا يقدر يعيش حياه كريمه
شايفه الناس اخلاقها باظت والعيال مستقبلهم ضايع من قبل ما يبدأوا حياتهم اصلا

شايفه ناس بتتعذب بدون اي سبب مقنع

حد يدينى سبب واحد بس

يخلينا نرضى بكده
 
 
 طبعا انتم عارفين انا باتكلم على مليون جنيه صينى
اه حتى شايفين الصوره الى فوق ؟

ايه ؟؟ مافيش جنيه صينى؟؟!!

لا ما انا هابقى اغيرلهم العمله هناك واخليها جنيه

الخميس، 27 مايو، 2010

الليالي المصريه

السلام عليكم

الليالي المصريه  دي دعوه موجهه من الدكتور اسلام مدونة حانعيش يعنى حانعيش

حاجه على غرار ليالي الحلميه اهداء مننا للكاتب اسامه انور عكاشه  ربنا يشفيه

والحقيقه انا عاجبنى فكرته وفكرة العمل الجماعي اننا كل واحد هايكتب ليليه 

وهو الحقيقه مقترح انها تكون الف لليله مش عارفه بيعمل فينا كده ليه
هههههههههههه

وهو بدأ فعل امبارح وكتب الليله الاولى

وانا اتشرفت وكتبت التانيه  وانشاء الله ينشرها عنده

ياريت تبصوا علينا وياريت تشاركونا كلكم

هنـــــــــــــا    تفاصيل الفكره عند الدكتور اسلام

وهنـــــــا    اول ليله من الف ليله ان شاء الله

مش عايزه حد يكسل ويطنش كله يتفضل يشرفنا ويشارك معانا


السبت، 22 مايو، 2010

انا هاخد حقي ناشف




انا اينعم سناني على اد حالها بس يعنى مش معنى كده انا ما اقدرش اخد حقي ناشف  ما دام حقي اخده زي ما انا عايزه

طبعا انتم عارفين انا ماليش فى السياسه ودهاليزها العظيمه الى احنا يا شعب يا غلبان  مطاوع  مهاود ما نقدرلهاش وسايبنها فى ايد امينه (غير يسرا طبعا)

وعليه فاحنا ننبط هنا ونقعد ساكتين ونتلهي فى  اكل عيشنا حلو ؟؟؟

لا مش حلو عشان ما عادش في عيش اصلا ناكله كشعب غلبان ومطاوع ومهاود يعنى

انا صحيح فهمى على ادي وعلامي على ادي بس للاسف الشديد عندي ودان وعنين وحاجات غريبه كده

فانا وانا قاعده كده بقالي فتره شايفه ملايين لا لا قول مليارات عماله تعدي من فوق راسي وانا قاعده ومافيش ولا مليون واحد على سبيل الخطأ وقع فى نفوخي كان الهمنى مليون فكره زي الى نزلت على نافوخ نيوتن لما وقعت عليه التفاحه

رجل الاعمال ده اسم الله عليه دفع مش عارف كام مليون للفنانه دي اسم الله عليها برضها  كمهر وبعدين رجل الاعمال التاني  دفع برضه كام مليون عشان يقتل الخاينه

وده ضحك على البنك الفلاني بكام مليار وكت على بره وده وده وده وده
وانا اقول ماشي ماشي يا بنى ادمين

بلاش حقد يا بت وما تبصيش للناس فى لقتمتهم

ولكن الى وجع احساستي بقى انى وانا باعمل سيرش على موضوع معين  اتكعبلت فى هذا المقال الى اصلا قديم بس وجع احساسياتي يا جودعان واثر على مشاعيرى

بيقولك ايه بقى التربيه والتعليم بتتخانق مع الماليه (وده سنة 2009)

طلبوا يا حبة عين امهم 36.1 مليار جنيه  انما الماليه الشريرين اعطوهم 31.6 مليار بسسس

يعنى هو بقى كان يجيب منين الاربعه مليار وشويه دول الفرق يسرق ولا يسرق
ولا يعنى يقطع من لحمه
ولا يسيب التعليم يبوظ هاه   يسيبه يبوظ
اما عالم مفتريه صحيح

فقام عمك الحاج الجمل عظم الله اجره  قاله يا عمونا يا غالي ما ينفعش كده
انا مش قايلك انى عايز ازود اجور المعلمين عشان ينصلخ حالهم ويبطلوا يقشطوا الناس
وعايز اجور بمبلغ 28.3 مليار جنيه  تقوم تقولي لا كفايه 26.4

حالتهم تقطع القلب بصراحه

بس السؤال هو احنا لو وزعنا مبلغ 26.4 مليار على ال80 مليون كلهم على بعضهم يطلع نصيب الفرد كام ؟؟؟
مش عارفه الحقيقه انا صحيح  معايا بكالريوس محاسبه بس ما باعرفش  اعد الارقام دي ما خدنهاش الحقيقه
لو  حد فيكم يعرف يعد ويحسب يقولي  نصيب الفرد يبقى كام  من ال80 مليون مش من التابعين لوزارة التربيه  والتعليم بس


ومن ضمن البنود الى قريتها فى الميزانيه جابتلي شلل فكري ومشاعيرى

ان الميزانيه المخصصه لهيئة الابنيه التعليميه 1.7 مليار جنيه

هو اينعم الحديد بقى فى السما وبقينا فى عب عز  قصدي وبقينا فى عز انما يعنى ال 1.7 مليار دول فى سنه واحده على هيئة الابنيه بيعملوا بيهم ايه ؟؟

وانا اذكر فيما اذكر اخر مدرسه دخلتها  الى هى مدرسة المنصوره الثانويه بنات  كانت المبنى الاساسي الى فيها هو قصر الشناوي باشا الى متامم من ايام الثوره العظيمه

وباقي المدرسه مباني صغيره كلها على بعضها لما تطبقها وتحطها فى جيبك ما يعملوش نص مليون جنيه باسعار دلوقتي    والارض طبعا بلوشي يا معلمي جنينة  القصر

ايه بقى ؟؟؟


طب  انا عندي اقتراح احنا نوقف الصيانه والمباني الجديده لمده عام فقط

ايوه عام واحد فقط
وال 1.7 مليار جنيه دول نوزعهم على الشعب وكل واحد ياخد حقه ناشف وانا متاكده ان ساعتها الطلبه احسنلهم يروحوا يتعلموا بره اصلا
وان الابنيه التعليميه مش هايجرالها أي حاجه خالص


بلاش  بلاش انا اصلي علامي على ادي وبابص تحت رجليا ما عنديش طوووووول نظر


فى نفس ذات المقال الى يشل ده

قريت البند ده
21 مليون جنيه لبرامج السكان وتنظيم الاسره  (ده برضه فى سنه واحده والله )

تنظيم الاسره ؟؟؟ ليه

ده لو تم صرف لوب دهب لكل مواطن  فى  البلد دي  (اه حتى الرجاله ) ما كانوش اتكلفوا 21 مليون جنيه يا جرع

كانوا نزلوا  وسائل منع  الحمل  على الرقم القومي ( يعنى كل واحد يروح يطلع رقم قومي يدوله وسيله مناسبه )

ما احزننى اكتر واكتر واكتر  انى قريت بعدها الخبر الى بيقول

رجب  طيب اردوغان بيشجع الاتراك على الانجاب وهايصرف  مكافآت لليخلف اكتر


بلاش تنظيم الاسره   قلتلكم انا بابص تحت رجليا

كلام تاني قريته منقول على لسان البهوات بتوع المجلس فى محادثه مستفزه جدا عن ملاين ا بوهم الى بيفرقوها على بعض

قوم واحد فيهم قال  ايييييييه

بيقولك خلال 30 عام الماضيه تم انفاق  عشرين مليار جنيه على 14 مشروع استصلاح  وكلهم فشلوا

وانا مصدقه الخبر ده عشان انا شوووووووووووووفت بعينى

شوفت الحسره فى  تقسيمات الاراضي المستصلحه حوالينا  مسخررررررررره حاجه تحسر  شوفتهم بعينى والله

متقسمين وداخل لهم مايه ومتوزعين على الجمعيات والجمعيات بتبيع وتشتري فيهم وتقلب رزقها  ومن  ايد لايد تكبر وتزيد وهى زي ما هى تلال رمل

الى استصلح منها نسبه بسيطه جدا جدا


المهم نطلع من ده كله بايه

ان انا عايزه حقي ناشف

انا مش هاعمل زي هاني رمزي فى  عايز  حقي  واقول نبيع البلد ولا نبيع الممتلكات

فيها حاجه يعنى لو نوقف انشاء مدارس جديده لمدة سنه ؟
ونوقف نصرف على تنظيم الاسره سنه واحده
والاستصلاح والاستهبال

سنه واحده
ونفرق فلوسهم على  الشعب الغلبان المهاود

يشم نفسه مافيهاش حاجه دي هو حرام ؟؟

لعلمكم انا فكرت فيها بجد ومش بشكل سطحي ولا حاجه انا عارفه كويس تباعية موقف زي ده

فى  زيادة الانفاق القومي والسوق وكل حاجه

بس برضه انا عقلي وتعليمى  على ادي   فعشان كده قلت اسألكم برضه واشوف رايكم اديكم برضه متعلمين ومتنورين يعنى

طبعا اكلت دماغكم وصدعتكم بس  عادي هابقى اصرفلكم على البطاقه شريط بنادول ( اه مع الوسيله )

الثلاثاء، 18 مايو، 2010

تاج الثأر للكرامه

السلام عليكم يا اصدقائي

الحقيقه عجبتنى فكرة ستيته جدا جدا  وهو تمرير تاج الثار للكرامه 

ملخص الفكره هى اننا كمدونين ننشر  الكليبات الى تحت  دي فى حمله للمطالبه بحقوق الاسرى  المصريين
والكليبات دي  اجزاء من برنامج سري للغايه
الحقيقه انا شوفتها من  سنين  على قناة الجزيره(ايام ما كنت باشوفها) اول ما اتذاعت واكأبتنى جدا

واول حد شوفت عنده الموضوع كان ستيته وهى دعت لتمرير  الكليبات دي بينا كتاج

والفكره عجبتنى  فعلا جدا
وادي الكليبات اهي

الجزء ا لاول



الجزء ا لتاني





حقيقى حاجه توجع القلب وحاجه تقرف اه حاجه تقرف الى احنا فيه

بس خلوا بالكم العالم كله عنده حق يدينا  على قفانا يا نااااااااااااس

مش  احنا الى مدينهم قفانا ؟؟؟

طب انا موقعي المتواضع ده انا عايزه حقي ومش  هاسيبه ومش  هتنازل  عنه ومش بانساه

ومن يوم  ما شوفت الحلقات دي من سنين ومش بانساها ومش هسامح فى حقى حتى الموت

اينعم انا مش عارفه اعمل  حاجه قاطعه بس ادينا بنقووووووووول وهانفضل ان شاء ا لله نقول 

ويارب يجي يوم ويجي حد يقدر يعمل حاجه اكتر من كده

وطبعا بامرر التاج  ده لاصدقائي












صيدلانيه طالعه نازله


اتفضلوا يا بهوات عايزه شغل شغل شغل  ايه النوم الى انتم فيه ددددددده حتى الاضراب بتاع 17 مايو كنتم نايمين نوم بشع ايه ده

اصحواااااااااااااااااااااااااا

السبت، 15 مايو، 2010

اضراب 17 مايو ... لا تفسد ابدأ بنفسك




السلام عليكم


السنه الى فاتت زي الايام دي يا جماعة الخير  الدكتور اسلام  ايوب  مدونة حانعيش يعنى حانعيش

دعى الى اننا نعمل اضراب  يوم 17 مايو

بيقول ايه الاضراب ده

بيقول اضرب عن الفساد

فسادك الشخصي اولا

يوم واحد فى السنه جرب تعيش انسان بدون افساد وفساد

اعمل الى عليك كما يجب ان يكون بدون حجج ولا شماعات لاخطاءك وتبريرات لممارسة الفساد

كل واحد يروح شغله فى معاده ويعمل الى عليه
كل طالب يروح كليته ومدرسته ويتعلم ويفهم ويذاكر كما يجب ان يكون

كل عامل يدي الشغل حقه وبلاش كروته واهمال فى مال مش هو صاحبه

كل ست  تدي لبيتها وجوزها وعيالها حقهم كما يجب ان يكون

كل  واحد ما يقولش اشمعن انا
ما يقولش مصالحي هاتقف من غير رشوه

ما جاتش من يوم

يوم واحد بسسسسسسسس من غير فساد ولا افساد

السنه الى فاتت كتب الدكتور اسلام البوست ده يوم الاضراب

والدكتور اسلام هايقولكم عنده في مدونته  ايه الجديد السنه دي ؟
17 مايو هايوافق يوم الاثنين

همتكم معايا يا اصدقائي المدونين بجد عايزه الناس تسمع صوتنا واليوم ده يكون كل مدون منزل البانر ده عنده على الاقل
ولو بوست كمان عن الموضوع يبقى كتر خيركم يعنى

يلا عايزه شغللللللللل

وتحياتي الكبيره اوي لدكتور اسلام صاحب الفكره والدعوه للاضراب الايجابي ده

والى كان عايز يخلع ويدبسني لكن هيهاااااااات


وكل سنه انتى طيبه يا ريم وفاتيما وداليا قوس قزح  والبت اختي  واي حد عيد ميلاده الايام دي
ومعلش ما عرفتش اعمل معاكم واجب عشان الظروف وكده  زي ما قلتلكم

ولكل مدون سولت له نفسه انه يخلع ويسيبنا  يستناني البوست الجاي بعد الاضراب هاقطعكمممممممممممممممممممم



الأربعاء، 12 مايو، 2010

واجب عزاء

سلام عليكم يا مدونينا الاعزاء


واجب عزاء باقدمه  للاستاذ  عمرو بدر    مدونة حبشتكنات فلسفيه

لوفاة والدته ربنا يتغمدها برحمته ويدخلها فسيح جناته ويعظم اجره فيها

البقاء لله يا استاذ عمرو
استاذ عمرو اخ غالي وصديق عزيز  وهو   ساب التدوين بقاله فتره بس انا متاكده ان اي حد دخل مدونته وقراله مش بينساه

وبعد اذنكم تدعوا لوالدته الله يرحمه بكل دعاء طيب وربنا يتقبله ان شاء الله

الله يرحمها وموتى المسلمين جميعا

الاثنين، 10 مايو، 2010

نظارة شمس


سما
طول عمرها ما بتحبش تلبس نظاره شمس بتحس انها بتخنقها وما بتخليهاش تشوف الدنيا كويس بالاضافه انها بتكتم على نفسها فى الحر وتحررها

فقالت طب حل وسط انا اجيب نضاره جراي  فتبقى فاتحه وتشيل شويه الشمس وفى نفس ذات الوقت تكون شايفه الدنيا كويس
بس لقت ان النظاره الجراي مش بتشيل عنها برضه ضوء الشمس الشديد خصوصا فى ظهر يوم صيفي حار
وبرضه كاتمه على نفسها هياها بقى  فبطلت برضه تلبسها

بس هى اصلا كانت طول عمرها ما بتخرجش كتير من بعد ما خلصت الكليه بقت تخرج قليل وبالليل ايه هايخرجها فى عز الحر ولا فى الشمس الحارقه  مافيش حاجه ضروريه للدرجه دي كله ممكن يتعمل بالليل

اه قصدكم زمان وهى لسه فى الجامعه مش فاكره ما كانش ضوء الشمس بيضايقها للدرجه  جايز عشان قلبها كان اخضر كانت حابه نور الشمس وعوده طري كان ما يهموش الرياح    احتمال برضه

المهم تروح الايام وتيجى وتضطر سما انها تخرج كتير وفى الشمس الحارقه

وفى مره كانت عنيها تعبانه جدا من مشوار فظيع عملته امبارح وحاسه جلد جفونها تعبان مش قادره وكانت لازم تخرج تاني وتواجه نور الشمس تاني

فاشتكت حالها لاختها  اختها قالت لها انتى عبيطه ولا ايه ما تلبسي نظاره شمس هاتريحك
وبعد مناقشات وشرح من سما لاختها انها ما بتحبهاش وليه...  اقتنعت سما برأي اختها على مضد بشكل مؤقت  وخدت منها نظاره تجربها النهارده بس وهى بتقول لنفسها انا عارفه انى مش هاطيقها  غير كام دقيقه

وفعلا كل شويه سما تزهق من النضاره وتشيلها بس تاني ترجع الشمس تلسعها فترجع تلبسها

بعد كام يوم سما اشترت نظاره شمس من اول محل نضارات قابلها وجابتها المره دي غامقه

واتعودت عليها بقى ساعات بتزهق منها وتشيلها دقايق لكن بترجعها تاني

اكتشفت سما ان الدنيا مختلفه بالنظاره الشمس
احساس غريب انك تكون شايف الناس وهما مش شايفينك

كأنك بتتفرج على الناس الى حواليها من كاميرا تجسس وبتشوف هما بيبصولك ازاي او حتى بيبصوا لشخص تاني  ماشي جمبك ازاي

ايوه ماهو الناس مش بيبقوا شايفين عنيك بتبص فين

هو صحيح الدنيا بالنظاره بتبقى قاتمه والنظاره بتمنع الضوء الشديد والتراب  اه بس  كمان بتمنع الهوا

بس تخيلوا بعد فتره سما بقت تحب اوي تلبس النظاره  لدرجة انها لما بتخرج بالليل بقت نفسها تلبس برضه نظاره شمس

اصلها كانت بتستخبى فيها

يعنى مثلا طبيعى لما تركب  تاكسي  ساعات  تشيل النظاره عشان الضوء بيكون اقل وفرصه عنيها تشم شوية هوا

تلاقي سواق التكسي السخيف حاطط خمستاشر مرايه  وعامل زي الى بيشتغل فى المخابرات وبيراقبها

تقوم تآثر السلامه وتنزل النضاره على عنيها وتلزق وشها فى الشباك  هروبا من السخافات  واملا فى ان شوية هوا يدخلوا من الشباك ويعدوا من تحت النظاره

تفتكروا النظاره دي افادت سما ولا كتمتها

تفتكروا سما احلى بالنظاره ولا من غير النظاره

تفتكروا  ممكن فى يوم سما تدمن النضاره وتفضل لبساها ليل ونهار وحتى جوه بيتها ؟
طب تفتكروا لو ده حصل هى هاتستحمل

تفتكروا سما لو حبت تستغنى عن النظاره هاتعرف ؟؟ هاتقدر ترجع زي زمان ؟؟
ولا خلاص القلب الاخضر ما بقاش اخضر  وبقى يهرب من الشمس خايف تحرقه  وعوده الطري شد ونشف وبقى يهرب من الريح لتكسره ؟




الجمعة، 7 مايو، 2010

السيامي أوشه وموشه



كان يا ماكان فى سالف العصر والاوان كان فيه اخين توأم ولد وبنت

لما اتولدوا فكروهم كائن فضائي وكانوا هايرموهم  اصلهم كانوا ملزوقين فى بعض

ايوه شكلهم غريب اوي  بس الدكاتره قالولهم انهم ممكن ينفصلوا ويبقوا عاديين

فاهلهم استغربوا اوي اول مره يشوفوا اثنين لازقين فى بعض كده

واحتاروا يسموهم ايه   سموهم  اوشه وموشه  وماكنوش مصدقين انهم هايعيشوا اصلا

وكانوا اوشه وموشه اول سيامي من نوع مختلف دايما السيامي بيبقى يا بنتين ولا ولدين
ويمكن ده خلاهم حاله مهمه بالنسبه للدكاتره

وفضلوا اوشه وموشه عايشين مع بعض سنه كامله ما شافوش بعض خالص  لكن عايشين مع بعض

بيناموا مع بعض ويصحوا مع بعض  حتى بيجوعوا مع بعض وكانوا لازم يرضعوا كمان مع بعض

وحلا للمشكله دي كانت مامتهم ترضع واحد من صدرها والتاني حد تاني قعد قصادها يرضعه بالبزازه

والرضعه الى بعدها يبدلوا

مش شايفين بعض بس سامعين بعض وحاسين بعض  سامعين دقات قلب بعض

اديهم ما لمستش بعض لكن هما لامسين بعض من جوه  . جوه جسمهم
جوه اوي  اوي

اوشه وموشه بعد سنه من عمرهم  عملوا عملية الفصل وبقوا كائنين منفصلين

لكن جسديا

بس فضلوا سامعين بعض وحاسين ببعض  بيجوعوا فى نفس الوقت وياكلوا فى نفس الوقت

ويعيطوا فى نفس الوقت ويناموا مع بعض  ويصحوا مع بعض

لا وبقوا شايفين بعض كمان

كان يوم غريب لما شافوا بعض اول  مره

قعدوا يبصوا لبعض وكأنهم بيشبهوا على بعض

وتحس كل واحد فيهم بيقول للتاني ايه ده هو انت ؟؟

انت الى انا حاسس بك من يومها ؟؟

تصدق كأنى كنت بادور عليك مش لاقيك

على فكره هما كمان قالوا الكلام ده لبعض فى نفس اللحظه

وفضلوا عنيهم متعلقه بعنين بعض بتروح في نفس الاتجاه فىنفس الوقت

وكأنه عايزين يدخلوا جوا بعض من عنين بعض


اوشه وموشه  كانوا بيلاحظوا بعض على طول مركزين اوي مع بعض

ومره كانت مامتهم وباباهم كل واحد مستلم واحد منهم وبيغيرله البامبرز


و اوشه بيبص لموشه كده  وبيراقبها كعادته  فى الخباثه  فاتخض جدا  وقال يااااااه ايه ده ؟؟؟!!

يا ترى مين عور موشه كده يا حرام ده شكلها مسكينه اوي  طب دى بتعمل بيبى  ازاي دلوقتي

قوم موشه لاحظت انه بيبص عليها قوم قالتله فى بالها ايه يا ابنى خليك فى حالك وفجأه هى كمان بصتله باستغراب

وعنيها برقت اوي وقالتله اييييييه ده يا مامي ايه الى طالعلك ده ؟؟؟!!! بس هى فتحت فى

 الضحك بقى انت كنت بتشتغل رجل مطافي فى بطن مامي ولا ايه
هاهاهاهاهاهاها

قوم بصلها كده وقالها اجري  اجري شوفي انتى مين عمل فيكى كده

تقوله عمل فيا ايه ما انا حلوه اهو ما تبصش انت على علبة اللولي بتاعي لو سمحت

اوشه قعد يضحححححك ويقولها ايه ؟؟ اسمها ايه يا اختي علبة اللولي ؟؟

موشه قالتله اه علبة اللولي مامي بتقول عليه كده وهى بتغيرلي مالكش دعوه انت وطلعتله لسانه وادته ظهرها

وهوب بدأت عياط جامد عشان مامتها تلبسها بقى وبلاش فضايح اكتر من كده

وهكذا اطفالي الصغار او الكبار مش مشكله
فضلوا اوشه وموشه عايشين كده مع بعض
سامعين بعض حاسين بعض شايفين بعض

بيكتشفوا الدنيا مع بعض ويعلموا بعض
ويعلموا على بعض

ما يبطلوش خناق مع بعض على كل حاجه
وما يبطلوش لعب مع بعض برضه

بس فضلوا شايفين بعض لأ مراقبين بعض
وسامعين بعض لا برضه
 سامعين دقة قلب بعض
حاسين بعض وفاهمين بعض

كانت معكم نوتي الفتانه بالاشتراك مع الصديق العزيز جولدن