الأحد، 30 أغسطس 2009

مبطلات الصوم .... على الرؤيه الاسلاميه




موضوع جديد على مدونتى




اتفضلوا اقروه ويارب اقدر افيدكم


وربنا يتقبل منا ومنكم صيامنا ان شاء الله

الخميس، 27 أغسطس 2009

فيلم الشيخ حسن





السلام عليكم


شوفوا بقى انتم تشوفلكم حل مش فاضيه ومش لاحقه ومش عارفه اكتب


والاغلس من كده مش عارفه اتابعكم فى مدوناتكم



بجد متاسفه لكل الناس لانى مش عارفه اتابع خالص الايام دي رمضان بقى وكل سنه وانتم طيبين



النهارده يا قوم هاقولكم على كلمتين كده فى بالي من زمان وفضلت متحفظه عليهم عشان اقولهم لكم ونرغي بشأنهم


الموضوع متعلق بفيلم الشيخ حسن



طبعا الفيلم ده فيلم قديم لحسين صدقى الراجل ده كان محترم اوي يا جماعه بجد حاجه مفتقدنها حاليا فى الفنانين بتوعنا بكل صراحه



له مجموعة افلام انا باعتبرهم افلام هايله جدا وبتناقش فكر حلو اوي


بصرف النظر بقى عن انتى مضايقه مني والكلام بتاعهم المجبس ده ما علينا خلينا فى الفكر




نركز اكتر على فيلم الشيخ حسن الى حسين صدقى كان البطل فيه وكمان حواره واخراجه واشترك فى تاليفه واعتقد انه من انتاجه وتوزيعه كمان




يعنى الراجل كان قايم بالفيلم تقريبا




اولا الفيلم بيناقش فكره ما حدش دلوقتي يقدر يتكلم عنها اطلاقا وهى فكرة اسلام بنت مسيحيه من اصل اجنبي ودي حاجه شئنا ام ابينا موجوده




والعكس موجود برضه ما قلناش حاجه عشان كده باقول كان عندهم وقتها الجرأه يناقشوا من غير ما يحسسوا على بطحه ولا حاجه



ثانيا داخل الفيلم بقى اتعرض لنقط معينه من وجهة نظري هى نقط مهمه وجامده جدا



خلينى اقولكم الاول ملخص للقصه وبعد كده اقولكم كام مشهد معلقين فى دماغي



القصه ان فى بنت هى واخوها اجانب وعايشين فى مصر ودوروا على مدرس لغه عربيه عشان هما بيدرسوا فى مصر وكان الشيخ حسن الازهري ده هو الى بيدرسلهم




البنت بتقع فى حبه وهو كمان بيحبها وبيتجوزها بعد طبعا مشاكل مع اهلها ورفضهم لكونه مسلم وهكذا بقى احداث الفيلم بتكمل



المهم بقى المشاهد الى علقت فى دماغي


اولا لما طلب يصلي وهو عندهم ولقى عندهم سجادة صلاه وما للموقف ده فعلا من اهميه انهم كون هما مسحيين لكن عايشين فى بلد مسلم ولهم اصدقاء مسلمين راعوا ده وحرصوا على وجود سجاده صلاه فى بيتهم



ثانيا : لما البنت وقفت تتناقش مع الشيخ حسن وتنقد الدين الاسلامي بكل حريه وهو كمان كلمها بكل عقل وهدوء واحترام للراي ا لاخر وناقشوا نقط مهمه جدا جدا


زي مثلا التعدد وقالها بكل بساطه احنا عندنا تعدد زوجات اه بقوانين وروابط وده افضل بكتير من وجود تعدد علاقات بدون روابط ولا قيود محدده وقال كلام تاني كتير شوفته كلام صح جدا



وكمان لما قالتله ليه بتضيقوا على الستات فى اللبس بالحجاب وكده .


قالها عشان نحافظ عليها ونحافظ على المجتمع ككل



قالتله طب وليه كل ده لو كل الستات لابسين عادي مش هايبقى فيه فتنه ولا حاجه الرجاله هايعتادوا على الامر


قالها ومين قالك اننا مش عايزين الفتنه ؟ ده احنا خايفين على الفتنه منكم



قالتله ازاي ده ؟



قالها زمان مش امروء القيس عمل قصيده شعر فى صباع حبيبته الى بان ما شوفناش حد عمل قصيده فى شاطيء استانلي مثلا


احنا عايزين الفتنه تفضل موجوده بس فى مكانها (يقصد بين الزوج وزوجته )




الموقف الى بعد كده هو لما هى بدأت تستفسر عن الاسلام وتسأله انت عايزنى اسلم قالها انا يسعدنى ده لكن لما تكوني عاملاه عن اقتناع مش عشان ترضينى وخلاص


وكمان هى فضلت تقرا فعلا وتسال مش الحكايه عبط وهبل ومدام باحبه اعمل اي حاجه



المشهد الى بعد كده الى فطسنى من الضحك الصراحه ولقيته حقيقى جدا فعلا هو موقف خالها القس لما استنجد به حسن بعد تفاقم المشاكل بينهم بعد الجواز




استنوا احكي لكم الموقف عشان تفهموا قصدي


ومبدأيا دي صوره من المشهد ده




اهلها راحوا ومعاهم البوليس وبلغوا انها مخطوفه وهى قالت انها مراته وطلعوا القسيمه ومشيوا اهلها وامها مرضت وهى حبت تروح تشوف امها


ابوها منعها وقالها روحي اطلقي منه وانا ادخلك البيت فراح الشيخ حسن استنجد بخالها القس وقاله انا متعشم فى عقلك وكده يعنى



الراجل اتكلم بكل هدووووء وعقل وميه ميه وقاله طيب لو كانت المشكله كده انتم عندكم طلاق وتردها عادي طلقها لحد ما تمرض امها وتطمن عليها وابقى ردها تاني ( كهين كهين يعنى ههههههههههههههه )



وراح الشيخ حسن عمل كده فعلا طبعا خدوا البنت وقالوله العب بعيد يا عم الامور وساعتها برضه خالها قاله وانا اعملك ايه بقى ده بنتهم وانت طلقتها ما اقدرش اتدخل ( مش قلتلكم كهن )



اوعوا المسحيين يزعلوا انا باهزر مش عايزه حاساسيه زياده وحركات من دي بقى



اخر مشهد فى الفيلم بقى الى بجد كان مؤثر لما البطله ماتت وهى بتولد ومنعوا من انه يشوفها ودخلوا لها خالها القس بس على اساس انها بتحتضر وقالتله انها مسلمه وطلبت منه انه يسلمها لجوزها


وطبعا هو كان عنده من الامانه انه فعلا عمل كده وسلمها لجوزها بعد وفاتها



وعجبنى اوي اوي اظهار القس فعلا بشكل مش وحش ولا غباوه ولا حاجه فى حين الفيلم بيتكلم عن الدين الاسلامي فى اغلبه بالعكس هما جابوه راجل حكيم ومحترم وعاقل ومؤدب وعنده ضمير ( كهين شويه بس عادي يعنى ههههههه )


وكان دايما الشيخ حسن يوقره جدا وهو بيكلمه ويقوله انت رجل دين وانا واثق فى عدلك وما الى ذلك


طبعا بتقولوا ايه الست القديمه الى بتتفرج على افلام قديمه دي



والله انا صدفه يعنى قريبا شوفته الفيلم ده ما كانش قصدي ولا كنت شوفته قبل كده اساسا


بجد فرحت لوجود فيلم محترم كده وراقي كده وده كان بيتعمل زمان على ادين ناس فعلا فنانين وفى نفس الوقت عندهم فكر واحترام


ورغم انه خلال الفيلم تلاقي المفروض طلعت بمجموعه لا باس بها من الاحاديث والافكار الاسلاميه الا ان الفيلم برضه مش ممل يعنى ولا افتقد جوانب الحبكه والقصه والدراما العاليه جدا


ياريت تتفرجوا عليه لو صادفكم



انا حاولت اجيب منه اجزاء ما لقيتش حاجه على النت


لكن هو بيجى على قنوات الافلام كتير



وكفايه عليكم كده عشان احنا فى صيام زي بعضه



(امال لو ما كناش فى صايم كنتى عملتي فينا ايه يا صبرني )


عادي كنت هارغي برضه زي كده وايه يعنى




موضوع جديد اهو يا خالو ولا تزعل اي خدمه





































الخميس، 20 أغسطس 2009

كل سنه وانتم طيبين .. تعالوا خدوا الفوانيس

كل سنه وانتم طيبين يا شعب البلوجر العظيم
اي والله عظيم فعلا
وما زلتم وحشينى جدا جدا ومش عارفه اتابعكم حق المتابعه برضه
ولسه مش عارفه هايجرالي ايه فى رمضان الحقيقه جايز اتلاشى
المهم كل سنه وانتم طيبين ويارب رمضان كريم ومبارك عليكم جميعا وعلى ولادكم واهلكم وحبايبكم والمسلمين والعالم كله ان شاء الله
انا جبتلكم فوانيس معايا شوفتوا الحلاوه بقى
مع ان احنا ما اشتغلناش فى الفوانيس السنه دي يعنى جايبالكم من بره شوفوا التضحيات بقى
ده فانوس مصري تقليدى شحط محط للناس الكباره بس الى هما يقدروا الفن الجميل
مدوا اديكم جبتلكم محل بحاله اهووووو
وعشان الاطفال برضه الى الصين لحست دماغهم جبتلهم شوية فوانيس بلاستيك بتقول حلو يا حلو باللغه الاكواويه اهو مش حارمااااااااااكم

وهذه مفجأة السيزون بقى يا رجاله عمك كرمبو وخالتك بايره عملوهم فوانيس الفانوس تمنه من تلاتين لستين جنيه حسب حجمه وزغرتي ياالى ما انتيش غرمانه
وشعب يستاهل الى يجراله


نفسي اعرف الملحق التجاري بتاعنا فى السفارات بيعملوا ايه ؟؟
البعثات الدبلوماسيه بررررررررره بيعملوا ايييييييييييه
الجماعه بتوع الصين اعتقد مركبين كاميرات علينا فى البيوت واحنا مرزوعين زي الهبل
نستاااااااهل ولا ما نستاهلش
حقها ولا مش حقها
ما علينا يا جدعان جايه اقولكم كل سنه وانتم طيبين ندخل فى كلام ملعبك
والياميش بقى اجازه السنه دي ما حدش يجيب ياميش
وانا ما عنديش ياميش ما تطمعوش فى الموسم الى ابويا جايبهولي
هههههههههههههههههههههههههههه
ارجوكم خلوا رمضان شهر كرم مش فى الماديات والاكل بس فى الاخلاق والتسامح من فضلكم من فضلكم
وكل خطوه كده تعملوها فى رمضان حاجه بس بسيطه باطلبها منكم قبل ما تخطوها اعقد النيه على انها فى سبيل الله تعالى
الى تعمل عزومه ما تقعدش تنفخ وتقول كان يوم اسود يوم ما وافقت على العزومه وهى مره وما عادتش هاتحصل تاني
لا ياا ختي انوي العزومه افطار صائم كده وخليكى حلوه
وابوس اديكم الستات الى راحه تصلي التراويح بلاش العبايات الى مليانه بربرق وميك اب وبرفانات فى الجاااااااااامع معلش يا اختي انتى وهي تعالوا على نفسكم حبه
وبس خلاص بقى سبوني انااااااااام
وكل سنه وانتم بالف خير ودايما يارب متجمعين على كل خير يا اهل البلوجر العظام

الأربعاء، 12 أغسطس 2009

الامهات من النوع ده هاعملهم مقصله .. والابهات كمان


سلاااااااام عليكم

الاول قبل ما ننصب المقصه ونشتغل واحشني يا جماعه بشكل مش معقول

وزعلانه اوي عشان مش عارفه اتابعكم واتابع مدوناتكم

انا كنت الاول فاتحه المدونه بتاعتي اووووول ذا تايم دلوقتي من كل يومين بافتح كده ابص عليها يا لحقت يا ملحقتش

حتى لما ربنا يفتحها عليا كده واقعد اقرالكم شويه عشان اعرف اخباركم ساعات مش باكمل الموضوع او مش اعلق

معلش بجد يا جماعه اعذروني الايام دي انا باخد كورس كمبيوتر وباودي العيال تدريب باسكت وشويه مناسبات عائليه لطيفه بالاضافه الى الاستعداد لرمضان


يلا بقى ننصب المقصله ونشتغل


شوفوا يا جماعه انا ملاحظه ان الناس خلاص بجملة الهبل الى بقى موجود بقوا خلاص مش بيفكروا فى صحة العيال

صحة العيال دي مش بس نوديهم اكبر مستشفى لما يسخنوا ولا نكيل لهم ادويه وحقن ولا نحاسب عليهم من الجراثيم القاتله ونغسل اديهم عشر مرات فى اليوم

لا لا اهم حاجه لصحة العيال فعلا الغداء المتوازن السليم النضيف المفيد الي فيه كل حاجه

والخضار الخضار الخضار
واللبن الحليب والكالسيوم عموما حط تحتها ميييييت خط
والعسل الابيض الصبح على الريق

انا ليه باقول الكلام ده ؟؟

عشان بقيت اشوف عند دكتور الاطفال عيال عندهم انيميا فظيعه وما عندهمش اي مشاكل الدكتور بيقول سوء تغذيه

ومره لقيت واحده صاحبتي ولادها كلهم مكسورين ومتجبسين وورا بعض

وهى كمان حصلتهم ؟؟؟!!!!

ايه يا بنتى مالكم ؟ قالتلي مش عارفه والله نصيب

ماشي يا ستى ما قلناش حاجه قدر الله وما شاء فعل

انا اقول الموضوع عادي لو الواد وقع مثلا من على ارتفاع مترين ثلاثه فاتكسر

انما مش عارف بيشاور بايده لفوق ايده خبطت فى الحيطه فاتكسرت ؟؟؟!!!

انتى بتشربيهم لبن ؟؟
قالت لا والله انا فعلا بعد كده هاهتم بالموضوع ده ؟؟؟!!!!

بعد ايه ؟؟ ده قربوا يبقوا مراهقين يا امي

اعرفوا يا جماعه ان عمر ا لبيت ما يكون قوي الا لو كان اساسه قوي

وانت بتربي طفل لازم تطلعه قوي

ارجوكم زي ما بتهتموا انكم تعلموهم فى احسن مدارس وتجبوا احسن مدرسين وتخنقوا فى العيال عشان يجيبوا فول مارك

لازم تهتموا ببناء جسمهم

كل حاجه ممكن نعوضها بعد ما يكبروا نعلمهم الى احنا عايزين نعلمه ليهم

الا الصحه وبناء الجسم لو ما اتاسسش وهما صغيرين انسوا بقى الاساس بيبقى بايظ

انا دايما اقول لولادي عشان اقنعهم يشربوا لبن وياكلوا بيض

الجاموسه بنحلبها مرتين فى اليوم
والبيضه بتبيض بيضه واحده فى اليوم

ربنا خلقهم كده سبحانه وتعالى عشان نشرب الصبح كوباية حليب وبالليل ناكل كوباية زبادي وناكل بيضه واحده في اليوم

والخضار يا ناس

انا مره قابلت ولاد صغيرين مش عارفين الكوسه والبسله

ليه عشان مامتهم مش بتحب الكوسه وباباهم مش بيحب البسله فهى مش بتطبخهم بقى بتكسل تعمل صنفين

طيب العيال دي ذنبها ايييييه ما ياكلوش الخضار وماي عرفهوش وعشان ما اتعودوش عليه هايطلعوا ما ياكلوهوش

والاقي العيال فى المدرسه عند مريم معاهم سندوتشات سوسيس ولنشون وبلا ازرق ما نعرف حاطين فيه ايه

لييييييييه بس

الطفل يفطر قرف من ده ليييييييييه

وياكله اصلاااااااااا لييييييييييه

ما حدش يقولي العيال بيطلبوه العيال اصلا ما كانوش يعرفوه انتم الى جبتوه واكلتوه للعيال وعودتوهم عليه

انا عندي العيال مش بيحبوه عشان مش متعودين عليه

مالها الكوفته بتاعة امي وامك ؟؟

مش الام بس الى مسؤله هنا لا طبعا

لكن بالنسبه لموضوع الاكل هى المسؤل الاول انما كمان الاب مسؤل عن الكل بقى عن الام وعن الاطفال لازم هو كمان يوجهها

ولا التقليد السخيف البايخ المقرف بتاع البيبسي على الاكل
ارجووووووكم لو حبيتوا تبوظوا معدتكم وجسمكم مش لازم تعملوا كده فى اولادكم كماااااااان

العيل من دول بقى عنده 15 سنه وعنده التهاب فى المعده ؟؟!!!!

ارجوكم يا امهات اطبخوا فى بيوتكم وبلاش الدليفري ابوس اديكم

خلوها مره واحده فى الاسبوع ولو بلاش يكون احسن

اطبخوا خضاااااار واكلوا العيال خضار

بالذوق بالعافيه يشرب كل يوم كوباية حليب وبيضه

حليب والنبى حليب طبيعى طازه

مش لبن مجفف وياريت كمان ما يبقاش معلب ومبستر وملعوب فى اصوله

لكن لو مافيش غيره مااااااشي

بس مش لبن بودره ارجوكم


ولو ولادك صغيرين اوي ولسه مش عاجبهم طعم الحليب

اعمليه بالكاكاو او نسكافيه وشربيه منه وقلليل الكاكاو شويه شويه لحد ما هايتعود على طعم الحليب

ولو ما اتعودتش لما يشربه كل يوم بالكاكاو احسن من انه ما يشربوش اصلا

واكليهم زبادي

واعملي كاسرت ومهلبيه ورز باللبن وام علي وكله بالحليب الطبيعى والنبى عشان خاطري بلاش استسهال

والبيض طبعا كل يوم بيضه لازم

والخضار

وحاولي تعوديه ياكل سلطه من هو صغير

وياكل جرجير وبقدونس وخس وخيار على طول اعطيله فى ايده

من وهو صغير ومن اول ما يعرف ياكل


يارب تكونوا فهمتوا


وعليه قررت نحن صبرني يارب

ان لو لقيت واحده فيكم ولا واحد فيكم ولادهم عندهم نقص فيتامينات او حديد او كالسيوم او اي حاجه


يبقى ان شاء الله هناخده نفسحه فى المقصله الشيك الى فوق دي


الجمعة، 7 أغسطس 2009

حفل توقيع كتاب الشاطر مفيش

السلام عليكم


انا روحت حفل التوقيع يا جودعااااااااااان


وزي ما حصلي المره الى فاتت فى تجمع خيخه للتبرع بالدم اليتيم الى انا حضرته ولقيت اقل عدد من المدونين حاضرين


حصلي كده برضه والنبى يا اخويا


احكيلكم الى حصل من اولها


اولا بما انى من المنصوره ابا عن جد فانا توهت وانا راحه المكتبه


مش عارفه على الوصف كانت راكبه معايا انى ادخل يمين مع ان الحقيقه انى ادخل شمال


المهم يعنى اتصلت على ابراهيم العدوي الى كل شويه يرنلي ويقوم داخل المكتبه يبقى خارج الخدمه واخيرا قفشته بيرنلي وكلمته طلعلي بره



وبعدين روحت هناك بقى شوفت صلاح مسدس صغير وعرفوني على المدونين الى موجودين هناك
رامز وخالد (يارب اكون افتكرت الاسامي صح )
معلش لو غلط يا شباب انتم عارفين السن


وقعدنا بقى سمعنا مصطفى حسان ومناقشة للديوان


وطول ما انا قاعده والتليفون بتاعي شغال بيستعجلوني اروح


طبعا ماما كنت سايبه لها العيال كانوا مطلعين مجانينها ومجانين الجيران كمان


وصلاح العميري هو الى كان دعينى للحفله دي قلتله طب هاتدوني نسخه من الكتاب طيب قالي عليا النسخه


طبعا انا نسيت انى قلت كده


بس صلاح ما نسيش وجابلي الكتاب اقنع فيا يا ابنى ما تعملش فى نفسك كده طب هات العشره جنيه ومالكش دعوه انت


متشكره اوي يا صلاح عقبال ما نحضر حفل كتابك انت كمان ان شاء الله او فرحك بقى اهم يا عم



وانا قريت الديوان كله على فكره وفعلا حاجات كتير عجبتنى مصطفى ربنا يوفقه ان شاء الله


وانا ماليش فى الشعر انتم عارفين لكن معنى الكلام عندي اهم حاجه فى كتابه شعر او غيره



المهم الحفل كان جميل ولو عايزين تشوفوا الصور


مصطفى منزل عنده صور انا ما صورتش للاسف اي حاجه


مدونة هرتله


ومتشكره لصلاح على الدعوه ولابراهيم انه جه ولكل الناس الى كانوا هناك ورحبوا بيا


بس خلاص


الثلاثاء، 4 أغسطس 2009

كل مدوني المنصوره والجيران والحبايب اجمع عندي هنا



السلام عليكم ايها المدونين الكرام



صديقنا وبلدياتي مسدس صغير قالي ان فى حفل توقيع كتاب لمدون زميل هنا فى المنصوره وان شاء الله تعالى ان لم يحبسني مانع انا هاروح الحفل ده وعايزه اشوف اكبر قدر من المدونين


بجد يا جماعه انا نفسي فعلا اشوف كل المدونين الى اعرفهم والى ما اعرفهمش

وكان نفسي احضر التجمع بتاع يوم السبت مع ستيته بس مش نافع شكلها


المهم ربنا يسهل ونقدر نروح حفل التوقيع الى فى المنصوره ان شاء الله تعالى وحقيقى احب اشوف الناس كلها ياريت الى يقدر يجى يشرفنا



وانا غشيت التفاصيل دي من عند مسدس صغير عشان الى هايجى يعرف التفاصيل





فرصة لمدونين المنصورة والدول المجاورة ان احنا نشوف بعض ونعتبره لقاء مدونين مصغر يوم الخميس الجاى الساعة 7 مساءً
ياريت كلنا نيجى ونجيب عشرة جنيه معانا عشان نشترى ديوان الراجل ده ونشجعه واللى معهوش العشرة جنيه . ديوانه على حسابى وموقع منى كمان..( واللى عنده اقتراحات نخلّيه يوم من أوله مثلا يقولنا ياريت ).. بس على فكرة الحفل ده اجبارى لكل مدونين المنصورة خاصة المنصورة والمدن القريبة منها .. ياريت كلنا نبقى متواجدين والغايب يقول للحاضر.واللى عايز ييجى من بعيد يبقى العشا على حسابنا كمان. ياريت. ويبقى صاحبى وحبيبى وكفاءة ..
التفاصيل :-
حفل توقيع ديوان: " حدوتة الشاطر .. مافيش ". للشاعر الجميل مصطفى حسان يوم الخميس القادم 6/8/2009 الساعة السابعة مساءً بمكتبة بوكس اند بينز، 7 ش جزيرة الورد - المشاية السفلية - أمام نادي الجزيرة - المنصورة........................
أماكن التوزيعالقاهرة:-البلددار ليلىعمر بوك ستورزالديوان - الزمالكالسندبادالكتب خان - المعاديسنابلالإسكندرية:-دار أكمل مصرالمنصورة:-
بوكس آند بينز