الأربعاء، 29 أكتوبر، 2008

قوامة الرجل .. ما هي ؟؟( على الرؤيه )

شوفوا موضوع مدونتي الاخرى
رؤيه اسلاميه متواضعه

الأحد، 26 أكتوبر، 2008

أنا اصطادت سمك !!!


السلام عليكم ايها المدونون


ايوه العنوان ده بصحيح انا روحت اصطادت سمك .


يوم الجمعه روحنا كلنا كده والعيال وبابا كمان وروحنا نصطاد سمك . بصراحه يا جماعه كانت رحله جميله جدا . لا اكتر من جميله

والعيال كانوا هايزقلوا من الفرحه . وامهم والله .


روحنا مكان كده غريب ما اعرفش رضا توصله ازاي اساسا. المفروض انه اسمه العصافره والمفروض انه هو مدينه جديده صناعيه وكمان زراعيه لان بيمر عليها ترعة السلام .


بصرف النظر عن كونه مشوار جامد شويه الا ان الرحله كانت جميله واتمنى اننا نكررها ان شاء الله.


وشايفه حد بيسأل هنااااك يعنى جبتوا سمك ؟؟؟


ايوووه بلااااافخر

بس طبعا مش هو السمك الى فوق فى الصوره ده بس شبه والله بس السمك الى جايبينه بقى متفاوت الاحجام جدا وياما رمينا سمك صغير بقى اوي فى الميه تانيه يلعب مع اخواته هناخده نعمل به ايه

جبنا سمك يجى اربعه كيلو والبت رحمه بنت المحظوظه جابت اكبر سمكه وبعدها على طول جابت سمكتين مع بعض وهانشوي وهانقلي بقى ونقطع نفسنا


ومستر خالدعاش حياته مع الطبيعه بقى والبقر والحمير الى معديه وكان حاسس نفسه فى حديقة حيوانات الجيزه.


احنا قعندنا نصطاد حلو اوي بتاع ساعتين وشويه كده وبعدين فجأه السمك ا ختفى .

اه والله بجد اختفي .


ايه يا جدعان في ايه ؟؟؟ ياعم السمك تعالى كل ده حتى العوم بيجوع يا اخي

ايه يا بابا هو في صيام ولا ايه النهارده .


المهم اكتشفنا فى الاخر ان فى سوء فى الاحوال الجويه قادم الينا فى الطريق السمك طلع اذكى مننا وحس بالموضوع قبلنا ونزل استخبى طبعا

ما فهمناش الا لما جالنا تليفون من ماما قالت لنا وهى بتعيط تعالوا بسرعه احنا عندنا عواصف وبرق ورعد ومطره وطبعا حاسه اننا بقى هناك عندنا اعاصير . بس احنا كن الجو ميه ميه يعنى المهم رجعنا بقى وقلنا بارك الله فيما رزق .


طبعا فى مجموعة نقط بقى توقفت عندها وانا في الرحله دي منها الحلو ومها الوحش


نبدا بالحلو يا حلو انت يا حلو


اولا: اكتر حاجه لفتت نظري وعجبتني ان كان كل ما حد يعدي علينا فى الحته المقطوعه دي وهو راكب حماره كده وبيتمختر يقولنا سلاااااااام عليكم . افشاء السلام . والله كانت بجد حلوه اوي ما حدش عدى وما قلناش سلام عليكم بابا قالي الارياف كلهم كده والله اعلم .


ثانيا : ترعة السلام يا ولاد شكلها يفرح وحواليها اراضي وخير كتير حقيقى .


ثالثا : الشمس والهوا النضيف والخضره حاجه جميله اوي اوي ما تحرمو نفسكم منهم


رابعا: الخروج مع الاسره كمان حلو اوي ما حدش فيكم يخرج ويسيب بقيت اسرته صدقوني كلنا محتاجين نخرج ونشم هوا .





نيجى للوحش خد عندك ياعم وما تزهقش :


أولا : الحيوانات النافقه الى شوفتها على الطريق وعلى جنب الميه الى كنا بنصطاد منها والى اكتر من واحد وبجميع مراحله حاجه تحزن


ثانيا :ترعة السلام الى فرحتني فوق دي عرفت انها مش متفعله ميه فى الميه عشان ناقصها خمسه كيلو بس . بس مش فاضيين احنا نعملهم احنا هانقطع نفسنا ولا ايه ؟؟؟!!


ثالثا : الطرق الى كنا مسافرين عليها فيها وصلات زفته زفته لا نور ولا رصيف عدل ولا اشارات ولا اي زفت ده غير المطبات الصناعي على طول الطريق من غير علامات ولا نيله لكن ممكن تلاقي علامه من غير مطب عاااااادي


رابعا :المجاري المائيه عموما على طول الطريق مافيش لها اي عنايه حاجه قرف وزباله عليها وناس بتحمي البهايم والتوكتوك اه والله والتوكتك بيعاملوه زي الحمار بالظبط ومنزلينه الترعه يستحمى هههههههههههه

وفى قنايات صغيره كده البوص مغطيها تقريبا يعنى ما خدناش بالنا انها مايه اصلا .


خامسا : في وسط القاعده الجميله دي بقى طلع لنا واحد الله يصلح حاله شغل ماكينة مايه بالجاز ولا بايه مش عارفه خنقنا بالعادم وصدعنا بالصوت . كان مالها الساقيه ام جاموسه اموره ولونها بامبي كده يا ولاد .


وبس خلاص مش فاكره حاجه تانيه


لكن نتيجة الرحله دي ان العيال ماسكين فى زمارة رقبة رضا عايزين يروحوا تاني .

لا انا مش ماسكه فى زمارة رقابته لما مسكة العيال تفشل ابقى ابدأ انا .


وكمان من النتايج ان تضخم عندي حلمي انى اخد ارض صغيره وابنى عليها بيت كبير واعيش فيها واكل من خيرها واشم هوا نضيف واعيش ولو نص يوم بعيد عن المدنيه .

بس مش عارفه هاقدر فعلا ولا لا .


صدعتكم طبعا كالعاده انا هابقى انزل على فكره بنادول مع البوستات

تحياتي لكن واتفضلوا معانا سمك

الجمعة، 24 أكتوبر، 2008

جديد المدونات التانيه




تحديييييييث





=================================================


انا كنت قلت بلاش اعمل اعلان للموضوعات ا لي بتنزل فى المدونات التانيه هنا عشان ما نعملكوش قلق


بس واضح ان ما حدش عرف انها نزلت


وانا يهمني الناس الى قروا الجزء الاول من الزنا يكملوا من فضلكم


فقت اصدعكم بقى عشان الموضوع ينزل في الريدر بتاعكم لو كنتم حطين المدونه الرئيسيه بس










وكمان ابقوا شوفوا برضه الموضوع ده عند فرنسا والرايق والضاحكون يمكن تضحكوا شويه















الثلاثاء، 21 أكتوبر، 2008

كلهم فوزي


يعني الاول احب اعتذر لكم عن ارهاقي لكم بالبوستات ورا بعضها
طبعا حاسين ان في ماسورة رغي ضربت عندي
لكن والله هى جت كده المناسبات جت ورا بعضها
حتى فى مدونة الضاحكون نزلوا البوست الجديد بتاعي النهارده في وسط الزحمه
صبرني القديمه ماتت ...من النهارده فى صبرني جديده
ابقوا شوفوه
زهقتوا ؟؟
طب خلاص بلاش تشفوه
نيجى بقى لموضوع البوست النهارده
الحمله الى اطلقها الاخ سوووو
وقال اشمعن يعنى هما كلهم ليلى ما احنا كلنا فوزي ومتفقلطين ومتبهدلين وليلى مطلعه عينا
قلنا ماشي مافيش مشكله احنا عازينلك كل خير يا فوزي قصدي يا سوووو
وأنا قررت اشارك فى يوم كلهم فوزي
كمشاركه وجدنيه واحنا ما نرضالهمش الظلم ابدااااا
وفى اطار فعاليات اليوم تم عمل لقاء مع الفوزي الوحيد فى حياتي الاخ رضا
وكان تفاصيله كلأتي :
أنا : يا ترى يا اخ رضا انت بتحس فعلا انك فوزي ؟؟؟
رضا : طبعاااااا ده كلنا فوزي . فوزي جدا خالص
أنا : طب امته بتحس انك فوزي .
رضا : بصراحه انا باحس انى فوزي جدا لما باروح القاهره .
أنا بانشكاح: ليه تفتكر هناك ليلى شاده حيلها
قالي : لااااااا . لما باروح اركب المترو بيبقى في عربيات للستات وكلها فاضيه ورايقه وقاعدين هما مأنتخين فيها
فى حين باقي عربيات المترو كلها مشتركه وزحمه موووووووت وفيها ستااااات
طب اشمعن ما يبقاش فى عربيات كمان رجاااااله بس ؟؟؟!!!
ولاد البطه السوده احنا ؟؟؟
ومن هنا نطلقها مدويه لازم يعملوا عربيات مترو رجاله بس عشان هما عايزين يأنتخوا هما كمان فى المترو وبعدين خايفين على نفسهم من التحرش
وده كان راي المواطن فوزي قصدي رضا
=====================
لا بجد فعلا انا شايفه انهم فوزي بجد كلهم أو اغلبهم فى حاجه واحده بس
ان بما ان ليلى المجتمع ككل راكب على نفسها وخانقها
ففي ليلات كتير بتطلع علي فوزي كل الى اتربت عليه غلط
حقيقى وبطلع عين الى خلفوا فوزي بكل دم بارد
وانتم عارفين بقى ان كيدهن عظيم
وبتبقى حاسه انها داخله مع فوزي حرب مش مع فوزي بس
لا مع فوزي واهله واي حاجه من طرفه
حرب غالب ومغلوب
حرب فيها جرحى وضحايا قد تكون قلبيهما
بيبقى في تحفز يعنى للمشاكل والهبل
والله انا ما زلت مصره ان مش فوزي خالص هو الى ظالم ليلى
هو يمكن يكون بعضهم هو المساعد على ظلم ليلى او احد ادوات الظلم
الا انه ابدا مش هو الى ظالمها
ليلى بتظلم نفسها وبتسمع للمجتمع كله بافكاره يظلمها
ومن هنا اطلقها مدويه يا ليلى خدي بالك من فوزي مالكيش بركه الا هو
فوزي عايز يقف جمبك بس مش عارف ازاي
دوري انتى على حقك وعرفيه حقك عشان يقف جمبك
وعنينا لك يا عم فوزي قصدي يا عم سوووووو
تحياتي لكم
ويارب ما حدش يفجر المدونه من كتر الرغي

الاثنين، 20 أكتوبر، 2008

زي النهارده فرحي يا جدعان


سلام عليكم


طبعا يا جماعه انا ما باعرفش اعمل اي حاجه فىا لدنيا من غير ما ارغي معاكم عنها


فجيت اقولكم ان النهارده عيد جوازي


عيد جوازي التاسع


شوف الصمود يا اخي


وعقبال كل الى ما اتجوزش يارب يتجوز والى اتجوز يحصل السنه التاسعه زي ويحصل الميه كمان فى سعاده يارب


اسمحولي احكيلكم عن يوم فرحي عشان انا مبسوطه النهارده


أنا اولا ما عملتش حفله وكده يعنى انا سافرت لرضا وهو كان فى الامارات

سافرتله وهو كان استلم الشغل بقاله اربعين يوم فقط

طبعا خيرني تيجلي ولا تستنى لما انزل بعد سنه ونعمل فرح وكل الحركات


شور انتم عارفني لااااازقه انجليزي قلتله لا وراك وراك يا نجم

وسافرت رغم اعتراضات وتسجيل تحذيرات من ناس كتير

بس الحمد لله عملت الصح


طبعا وانا باحجز الكوافير والاستوديو كان الناس بتصوت عشان المواعيد

صحيت الكوافير من الساعه 8 صباحا عشان كانت المفروض اتواجد فى المطار الساعه 4 عصرا

طبعا لازم اطلع من المنصوره على الساعه واحده مثلا

وصحيت بتاع الاستوديو برضه

ايوه اتصورت لوحدي خفت على ما اروح هناك اكون شكلي باظ بقى ولزق بس حصل خير

وخرجت من بيتنا الساعه 8 الصبح وانا باعيط وماما بتعيط والبيت كله بيعيط عشان مسافره بقى وكده


وقعدت اعيط عند الكوافير لحد ما زعقت فيا وقالتلى مش هاشتغل

ويهديكى يرضيكى وجابولي صاحب المحل عشان انا كنت فى قسم المحجبات المهم بقى سكتوني وعملولي ماسك وقعدوني فى مكاني هادي شويه نص ساعه

وبدأوا شغل

انا انشغلت بقى معاهم فى اختيار الالوان ورشق مناخيرى فى كل حاجه

وطلعت واتصورت

وما هانش عليا امشي الا لما ارجع بيت بابا تاني

طبعا الشعب المصري كله كان جاي عايز يجي معايا المطار بس الحمد لله خدت نص الشعب بس

وطبعا كان شكلي وانا ماشيه الساعه واحده الظهر بالعربيه وانا لابسه عروسه اهبل جدا ومثير للجدل


ولما روحت المطار وبعد الوداع والعياط وكل حاجه

طبعا من اول ما طلعت من العربيه وانا فرجه بقى

بس اول ما دخلت الصاله بقى لقيت حد بصوت عالي بيقول عروسة الخليج جت (طيران الخليج يعنى)


أنا استغربت وقلت ياربي هما عرفوا منين لكن عرفت بعد كده ان ماما قالت لهم فى التليفون


والست رخمت عليا فى الوزن عشان ماما كانت عطاني اكل كأني راحه مجاعه بالاضافه لهدومي كعروسه

وبعدين دخلت الطياره ولله الحمد

وعمو الطيار جه سلم عليا وباركلي

وكان قاعد جمبي واحده رخمه اوي وجوزها رخم برضه والله مش عارفه ليه


وعاملوني معامله خاصه بقى المضيفات دلوعني خالص

وانا بصراحه كنت هاموت من الجوع والتعب

اكلت اكلي كله ونمت كمان شويه


واخيرا وصلت

بصراحه هناك فى المطار كان ناقص يشلوني

ناس ذوق ذوق ذوق صراحه

فى خمس دقايق كنت بره المطار


لقيت رضا واقف ومعاه ناس كتير اوي ما اعرفهمش

والناس يا عينى كان عندهم كبت ما صدقوا شافوا عروسه ركبنا العربيه وورانا عربيات كتير بتوع اصحابه بقى وكده وهات يا كلكسات بس واحنا بره البلد عشان جوه البلد ممنوع عقبلنا ياااااارب .


ونظرا لظروف ماديه باحته الغيت الحفله الى كان مرتب لها على مركب فى ابو ظبي

واكتفينا اننا لفينا شويه بالعربيات وسمعنا شوية قر ونق حلوين من الناس فى الشارع ولله الحمد


ورجعنا البيت ومعانا ناس اصحابنا وقرايبنا هناك ونص ساعه والمولد انفض والعروسه للعريس ...
وضربنا الديك الرومي ولله الحمد
هههههههههههههههههههههههههه


بصراحه الوحش الوحيد فى حكاية الجواز بره اننا كنا حاسين اننا مقطوعين يا عينى الاسبوع الاولاني كله

كل الناس مكسوفين يجوا يزورونا مع ان حنفي قصدي ابو رياض يعنى ما تغلطونيش بقى
كان مطبق ورديتين ونزل الشغل رابع يوم الفرح .

هههههههههههههههههه


بس ومن يومها يا سيدى الفاضل وانا لابده فى رقبة رضا

وادين له بما يقرب من نص عمري معاه

ايوه محصلة الخطوبه والجواز 12 سنه يعنى نص عمري الا 3 سنين

كان فيهم نعم الرفيق والصديق والاب والاخ والزوج والحبيب

اتعلمت منه كتير واثر فيا كتير


تعبنى كتير وتعبته كتير

بس كمان اسعدني كتير واعتقد اسعدته كتير

واتمنى له كل خير وكل حاجه حلوه يارب


بس عايزين متبرعين بقى

حد ينزل يشترلنا تورته عشان مكسله اعمل

وحد يجبلنا ورد

ويا حبذا لو شمعتين لونهم احمر زي الي فى الصوره دول


عشان انا مش عارفه اخرج ماما رايحه لدكتور الاسنان

او حد يجى ياخد العيال بقى وخلاص

هههههههههههههههههههههههههه


تحياتي لكم وربنا يسعد الجميع يارب

الأحد، 19 أكتوبر، 2008

انا مع ليلى فى حد معانا ؟



السلام عليكم


اول امبارح ياجماعه وانا بالف على مدونات الحبايب قابلني لوجوا عند فضفضه بعنوان


انا ما فهمتش اساسا مين ليلى ولا عايزين منها ايه


لكن لما روحت هنا وراسلتهم فهمت وعليه انا هافهمكم الى فهمته للي ما يعرفش


يوم كلنا ليلى يوم خصصه الناس المنظمين للموضع على البلوج هنا وعلى الفيس بوك عشان كل المجمتع يتكلم


عن او موضوعه ايه . موضوع مشابه لفيلم عملته فاتن حمامه عن روايه وكان اسمها فى ا لفيلم ليلى


وكان موضوع الفيلم ما تعانيه ليلى خلال حياتها لانها اختارت ان تكون نفسها انا ما شوفتش الفيلم لكن ده الى فهمته من كلامهم


المهم انا باعتباري احد المشاركين المفروض انى انزل بوست اقول فين انا من ليلى وعلى الموقع فى استطلاع راي اتمنى كلكم تتفضلوا تعملوه .


نتكلم بقى عن ليلى الى جوايا انا او امته انا باحس بالم ليلى :


انا والحمد لله ما عنديش مشكله شخصيه بعينها مع حد سواء من الاهل او الزوج او اي حد لانى مااسمحش لحد اساسا يعمل معايا اي حاجه تنتقص من حريتى المشروع او حقي الشرعي فى الحياه .


اما وانى احد اعضاء المجتمع الى انا شايفه انه مجتمع معوج وعايز تقويم واصلاح خصوصا فيما يختص بشون المرأه فيه .


ما حدش يقولي انتى تبع بتوع حقوق المراه الى بتجيبهم هاله سرحان.

لا خالص دول ناس اساسا ما عندهمش مخ . الى بيناقشوا ليه الستات يعملولهم يوم لواحدهم على البسين ؟؟؟!!! ويوم الرجاله يبقى مفتوح للكل؟؟؟

طبعا اخي عليهم ناس وحشين ما عندهمش دم


أما امته باشوف ليلى فى المجتمع عندنا شوفوا عندكم المواقف دي :


لما الراجل مراته تموت : ممكن يتجوز على الاربعين مثلا والمجتمع هنا يقول ومالوا راجل برضه وما ينفعش يعيش لوحده .

انما لو ليلى لو اتجوزت بعد سنه من موت جوزها : المجتمع يقولك يا سلام يعنى كانت مستنيه السنويه باليوم ؟؟ هى يعنى كانت عاينه العريس تحت السلم ؟؟(مافيش مانع يتهموها بقى انها كانت مرتبه معاه من قبل ما جوزها يموت بقى)

وتلاقي برضه فىناس رايهم لو كانت هي عندها عيال انها كانت المفروض تقعد تربي عيالها بلا جواز بلا بتاع .

================


الراجل لما بيطلق مراته : بيدور على واحده تكون انسه ما اتجوزتش قبل كده وتكون صغيره عشان يغيظ بها مراته الاولانيه ويرجع عقارب الساعه من الصفر تاني


انما المطلقه لو فكرت بس مجرد فكرت انها ترتبط بواحد ما اتجوزش قبل كده حتى لو كان مناسب لها فى السن وكل شيء تبقى امرأه لعوب وضحكت على الواد اكمنه يا عينى بريء وصغنن .

=================


لما الراجل سنه يتأخر فى الجواز : مافيش مشكله يفضل شباب وينفع يتجوز لحد ما يبقى عنده اربعين سنه ويقدر يتقدم لواحده عندها 20 عااااادي .

انما ليلى لو وصلت لما يبقى عندها 30 سنه تبقى عنست وبارت من وجهة نظر المجتمع والمفروض ترضى بشراب التوت .(الى ما يرضاش بالتوت يرضى بشرابه)

==================

لما الراجل يغلط قبل الجواز ولا حته بعده : المجتمع بما فيهم مراته بتغفرله بسهوله جدا ويقولوا راجل ومافيش حاجه تعيبه .

ليلى بقى لو غلطت ميت سكينه تحط على رقبتها وما حدش ممكن يسامحها ابدا حتى لو تابت وانابت .

مع ان الشرع بيقول الزانية والزاني الاثنين لهم نفس العقاب ونفس الاثم .


لما الراجل يكون ربنا موسعها عليه ويقول لمراته بصيغة من عليها بفلوسه انا معيشك احسن عيشه . عادي جدااااااا


لما تكون ليلى طالع عين اهلها فى الشغل وتشير ولو من بعيد الى انها تساهم فى ادارة البيت تقوم الدنيا ولا تقعدش ويقولك اهلها حتى برضه راجل والكلمه دي تضايقه


طب لما هو يعنى الرجوله واخدها بياخد منها فلوس ليه ؟؟؟ ما يسيبها بفلوسها على جنب ويورينا شنباته .

=============================


لما الولد يكلم صاحبته فى المدرسه او الجامعه وهى تتصل به على البيت عادي ده يعد مفخره من ناحية الام والاب .


أما ليلى ممكن لو ده حصل من طرفها يكسرولها ايد ولا رجل .

=================


الولد امه وابوه بيتباهوا انه مقطع لافف الدنيا وجريء وقوي وشاطر .


وليلى احلى ميزه ممكن يتغنوا بها انها ما تعرفش تروح لاخر الشارع لواحده وبتتكسف من خيالها .

==================


الراجل لما يتجوز يقول انا كده وان كان عاجبك


اما ليلى المفروض عليها تلغي شخصيتها وتبقى تابع وامعه لمجرد انها اتجوزت .

========================


الراجل لو ساب ولاده وبيته بالليل وراح قعد الكافيه مع اصحابه ولا حتى هلس فى اي مكان ولا لعب رياضه ما بيلاقيش عقاب يعنى من الجتمع ولا بيلوم عليه.


اما ليلى لو فكرت حتى انها تروح اي مكان لواحدها لمجرد الترويح عن نفسها او مارست اي نشاط اجتماعي او اي دور تاني غير كونها زوجه وام . المجتمع كله يقولها ولادك ا ولى بيكى


ولادهم هما الاثنين اولى بيهم . ومن حق الست انها تعيش حياتها كبنى ادمه من كل الجوانب ما تبقاش زوجه وام بس . والمسؤليه طبعا مشتركه .


الراجل لما يضحي يلاقي ميت واحد بيقوله يا اخي ما تعملش فى نفسك كده .


ليلى لما تضحي بحياتها وسعادتها وعمرها كلها تلاقي الناس بتسقفلها من كل الجوانب وبتشجعها تكمل لاخر الطريق وفى الاخر الطريق الكل بيدورلها وشه وما يسألش عنها وعما جنته . وما حدش ساعتها حتى بيفتكرلها تضحيه وبيقولوا وايه يعنى ما كل الناس كده .


ليلى نفسها بتظلم نفسها .


ليلى نفسها بتظلم اي ليلى تانيه تقابلها .


ليلى نفسها بتنسى نفسها .


ليلى نفسها تعامل نفسها كليلى.


يعنى ايه ؟؟


يعنى ليلى نفسها شايفه انها بشريه من الدرجه التانيه .

ليلى نفسها مش مؤمنه بنفسها كبشر متكامل له حقوق زي ما عليه واجبات .

ليلى نفسها اعطت الحق للمجتمع ككل انه يعاملها كده ويحطها فى المكان ده .

صدقوني ليلى نفسها محتاجه تغير فكرها


لان الناس يروك بعينيك اولا


لازم انت تشوف نفسك الاول صح عشان الناس يشفوك صح

اعتداد واعتزاز بالنفس وليس غرور



بادعوا كل ليلى عندها كلمه تقولها النهارده لنا تتفضل تقول

وبادعوا كمان نصفها الاخر على الارض انه يقول كمان ويناقشنا

احنا مش معتبرين الرجل هو جبهة الاعداء

لان زي ما قلنا المجتمع كله بنصفيه بيعامل ليلى غلط وبيظلم ليلى

عشان كده يا قيس ليلى محتاجلك فى اليوم ده تكون جنبها
خلينا كلنا مع ليلى ا لنهارده من فضلكم



وممكن اقعد من هنا للصبح اتكلم بس انا تعبانه وجيت اكتب بالعافيه

تحياتي لكم ولكل ليلى فى الدنيا

الخميس، 16 أكتوبر، 2008

اذا صدقت النوايا يسر الله السبل

السلام عليكم :

استكمالا يا جماعه لموضوع الرغي الى فات والى كان اسمه الناس ما بيتجوزوش ليه

فى الحقيقه الموضوع والنقاش الى دار حوله فى الردود خلاني حبيت ابرز نقطه معينه واتكلم فيها اكتر .

وهي نقطه الخوف من الفشل . او الخوف من الخداع او الوقوع فى شرك .

وفى الحقيقه الطائر الحزين قال كلمه بليغه جدا جدا وانا عن نفسي واخداها قاعده

اذا صدقت النوايا يسر الله السبر

وحقيقى انا مقتنعه بده جدا

لكن طبعا مش معنى كده اننا ندخل بدماغنا كده فى اي جوازه من غير ما نفكر .

لا طبعا احنا لازم نحسبها كويس اوي وندور ونفكر ونبحث ونفحص وبعدين بعد كده نتوكل على الله بقى ونوافق

بالنسبه للخوف من الفشل :

دايما اسأل الى بيقولوا كده سؤال واحد ايه اقصى ما يمكن ان يحدث ؟؟

انكم تطلقوا ؟؟؟

طب وايه يعنى ؟؟
طبعا كأني باقول جريمه

وتلاقي البنت تقولك ويبقى اسمي مطلقه ؟؟!! المجتمع مش هايرحمني ؟؟؟
يا بنتى طزززززز فى المجتمع
هو خوفك من المجتمع يخليكى تخسري حياتك ؟؟
وهو المجتمع هايرحمك لما تتحولي لعانس ؟؟؟

وتلاقي الشاب يقولي بالبساطه دي ؟؟؟ اطلق ؟؟؟ وتبقى اتحسبت عليا جوازه ؟؟؟
واخسر الى ورايا والى قدامي ؟؟؟ ولو كنت خلفت منها عيال تاخد الشقه وافضل طول عمري بقى على مشاكل معاها ؟؟؟

طب ليه يا ابنى ؟؟؟
اولا ما تحسبهاش فلوس كده اوي يعنى الارزاق على الله يمكن ساعتها ما يكونش يهمك فلوس يا سيدى ماحدش عارف
ثانيا : مين بس الى قال انك لما تطلق واحده تبقى على مشاكل معاها سواء بينكم عيال ولا لا
هو ليه ما بنخرجش بالمعروف
ليه ما نبقاش مسلمين متحضرين زي ايام الرسول عليه الصلاة والسلام عادي جدا ؟؟

اذا كان المجتمع مش متقبل حالات الطلاق والله احنا جزء من المجتمع ده احنا لازم نغير فكرنا اولا

ليه بنخاف ونترعب كده من الفشل فى الجواز

الصحابه كلهم كانوا بيطلقوا ويتجوزوا عادي بدون كل الافلام دي .

وكان برضه عادي انه يتجوز واحده مطلقه مش كانت جربانه بيهربوا منها

حتى لو كانت عندها أولاد

زي ما قال الرسول عليه الصلاة والسلام لام سلمه لما عرض عليها الزواج وقالتله يا رسول الله انى امرأه طاعنه فى السن ومصبيه
فقال لها : اما السن فانى اكبر منك واما العيال فلله ورسوله .

يا جماعه الى عايزه اقوله ان اقصى ما يمكن حدوثه هو ايه ؟؟؟ الطلاق ؟؟؟ طيب يجي بعده جواز يا سيدى تاني ايه المشكله ؟؟

ومبدأي دائما وابدا طز فى اي مجتمع يخالف شرع الله

ولو احنا كنا نعمل زي ما الرسول قال عليه الصلاة والسلام ونكون ذوي دين واخلاق لما قال عن من يتقى الله انه ان احبها اكرمها وان لم يحبها لن يظلمها

وكل من شرع في طلاق احله الله ما يعاديش الطرف التاني لا عادي خلاص مافيش نصيب ولو فى اولاد اولى ان يكون فى ود ومعامله حسنه بينهم وبما يرضى الله .

ويفضل هو يربي ولاده وتفضل هي تهمه وهو يهمها طول ما بينهم اولاد
بس مش لازم تكون العلاقات بينهم يا متجوزين يا اعداء
ليه طيب ؟؟؟
وحتى لو كانت خطوبه مثلا وانتهت
برضه بالاقي الناس بتتعامل بحساسيه زياده جدا جدا

ده يا راجل لو كانوا اثنين مخطوبي وقرايب وما يحصلش نصيب ممكن تفضل العائلتين فى خصام الى الابد .
ليه كده ؟؟ ليه نصعب الدنيا على نفسنا كده ؟؟

فين امساك بمعروف او تسريح باحسان ؟؟؟


وبالنسبه للخوف من الخداع او الخيانه :

برضه من ضمن الحاجات الى انا مقتنعه بها تماما

ان الطيبون للطيبات يعنى لو انت كويس ان شاء الله ربنا يوقعك فى واحده كويسه والعكس طبعا

وصدقوني سواء الجواز عن حب ولا زفت صالونات زي ما بتقسموه هايفضل برضه الجواز ده زي البطيخه ومش هاتقدر ابدا تعرف حقيقى الطرف التاني على حقيقته الا وانتم تحت سقف واحد

خليك او خليكى انتى كويسه اولا وبعد كده اطمن بقى وثق ان ربنا هايديك شريك كويس برضه

بس طبعا لازم تتحرى انت الكلام ده لازم تصدق النيه انك تدور على نصك التاني يكون يتقى الله ويكون ذو دين

ونتك على الكلمه دي ذووو دين وذااااااات دين

مش ذو لحيه ولا ذات نقاب ولا اسدال

لا الدين الدين مش مظاهر الدين فقط دون قلبه .

الدين الاخلاق والمعامله والفرو ض والواجبات والمسؤليات وكل حاجه حلوه مش مقياسه اللبس ابدا
ما يمنعش ان من ضمن الفروض الالتزام باللبس الشرعي احسن حد يفكر انى باقول الحجاب مش مهم .

وفى النهايه الهدى هدى الله ولو كل واحد عمر ما بينه وبين ربنا عمره ما يخاف من بكره ولا فى فشل ولا ضيق رزق
خليى دايما ما بينكم وبين ربنا عمار وخلي دايما قلبك مليان ايمان بالله وامان من الله
وبعدها مش هاتخاف لا من فشل ولا من خيانه ولا من الجن الازرق حتى

وتحياتي لكم وكفايه كده احسن تقولوا عليا رغايه

الأربعاء، 15 أكتوبر، 2008

طابخين ايه النهارده ؟؟؟ ـــ شوربة سي فود

اخواني المدونين والمدوناااااات :
انه ليوم جلل ان ازف اليكم خبر انشاء مدونتي الجديده
ايوه اخيرا
بقالي كام شهر باقول هاعمل مدونه وعلى ما تم المراد بقى
واتفضلوا بقى شرفونا هناك
النهارده الاكله فظيييييييييعه باعتبار انها اول اكله يعنى
شوربة سي فوووووود
اه الى يدخل المدونه يدخل برجله اليمين ويقرا المعوذتين
ويسمي بقى عشان كلها اكل المدونه
تحياتي للجميع

الاثنين، 13 أكتوبر، 2008

الــــــزنــــا ( الجزء الاول ) موضوع جديد فى الرؤيا الاسلاميه

تعريفه وحكمه ومضاره الاجتماعيه على مستوى الفرد ولامجتمع
موضوع جديد على مدونتي الاخرى

الخميس، 9 أكتوبر، 2008

الناس ما بيتجوزوش ليه ؟؟؟!!!

سلام عليكم :
عدنا الى الرغي مره اخرى يا حلوين . وحشني الرغي جدا جدا .

فى موضوع اعتقد انه بقى مهم جدا جدا كل الناس اتكلموا فيه . الا وهو ان ما عادش حد بيتجوز !!!! مش بس البنات لا
طبعا بنات وشباب والله قاعدين من غير جواز ولما تسألهم عن الاسباب تلاقيهم قالوا شوية حاجات كده ماسخه مش هى السبب الحقيقى .

فأنا بقى فى قاعده تمحيص وتحليل للموقف وصلت للنتايج الاتيه :

أولا : ان الازمه دي مش سببها الاساسي هو الحاله الاقتصاديه . ليه ؟ لان فى ناس كتير معاها فلوس بالعبيطه وبرضه
قاعدين من غير جواز .

ثانيا : ولا سببها انهم مش عارفين يحبوا ما بيتنيلوا يحبوا من وهما عندهم 18 سنه وبعدين يزهقوا من بعض لما يبقوا فى سن الجواز ويهيموا على وجههم بقى .

طيب يبقى ايه السبب ؟؟؟

انا من وجهة نظري شايفه ان الاسباب مش هي دي خالص ومن منطلق ان انا صاحبة موطن الرغي فانا كل الشعب المصري بيرغي معايا ويفضي عندي بلا بلاش كله نصه عشان الامانه .

بالنسبه للبنات اسمعكم بعض الى لقيته جواهم :

خوف فظيع جدا من الفشل . ايوه اصلا هى مش عارفه تتجوز عشان خايفه تفشل لان على حد تعبيرهم مافيش ضمانات للنجاح .
ده بالنسبه للفئه العمريه ما بين 20 و 35

اما الى اكبر من كده : فهما اساسا ما عادش يهمهم الموضوع وخايفين من التغيير . وعلى حد تعبير احداهم برضه انا لسه هاجيب واحد يتحكم فيا ويصدعني انا كده كويسه وعايشه وباشتغل وما عنديش ولا ساعه فاضيه .

ده غير بقى الى مستنيه انها تتجوز عن حب وتقابل فارس الاحلام الى هايخدها على حصان اخضر . ومش عايزه تتجوز جواز صالونات . وكلام الافلام العربي بتاع محمود يس ده .

وغير كمان المبدأ الى فى ناس بتعمل به وهو : القاعده فى الخزانه ولا الجوازه الندامه .

اما بالنسبه للشباب :

فهو خايف برضه بس مش من الفشل . لا في كتير منهم خصوصا العكاكين خايف ينضرب على قفاه . تحديدا شاف كتير خاينين ومنيلين بنيله ما عندوش ثقه فى حد وبرضه ما عندوش ضمانات .

وطبعا فى ناس مش معاه فلوس بس دول ربنا بيسهلهم ويتجوزوا ولو كبار شويه .


وفى اسباب مشتركه :

ومنها مكتب التنسيق الى فاتحينه للجواز والى خلى كل واحده تقولك انا دكتوره واتجوز محاسب يا للهول .
وطبعا كل نفس تصبوا للاعلى منها من وجهة نظرهم وبالتالي بتحصل دروبات فى الموازين .

من وجة نظري خريجي الجامعات كلهم ناس على مستوى ثقافي واحد مالوش دعوه بالتكافوء الاجتماعي الخاص بالجواز . دى خرافات بس احنا بنروج لها وعاشينها .

وكمان كل واحد سافر بره مثلا عشان يكون نفسه ورجع معاه فلوس بس بقى عنده 35 سنه لما يجى يتجوز بقى عايز يعوض الى فاته قوم يدور على واحده ورور كده عندها 22 سنه ولا حاجه وتتفلق بقى الى عندها 30

ولو الى عندها 30 طبعا سولت لها نفسها انها تتجوز واحد عنده 30 الا شهر يبقى ايامه وايامها سوده .
طب يعنى يعملوا ايه ؟؟!!! يتجوزوا مين ؟؟؟؟

عملت دروب كبير فى تواؤم الاعمار الحكايه دي على فكره مش هزار .

وثالث حاجه هى فكرة الناس عن الجواز يعنى البنات يسمعوا المتزوجات يقولوا الجواز وسنيه وايامه السوده وتفضل تقولها ما تستعجليش على الجواز يا اختي بدري القرف وتجيبى واحد يتحكم فيكى ويقرفك . وعيال يتعبوكي ويقرفوكي وما الى ذلك من سنفونية السخط على الحياه .

وعلى الجانب الاخر تلاقي برضه .بلا جواز بلا قرف هو شهر يا ابنى واحد وبعد كده هاتكره الصنف كله . كبت حريه ورايح فين وجاي منين وهات فلوس وودينى وهاتني وبعد شويه عيال ومصاريف وقطم وسط وخلق تسد النفس عن الحياه .

صوره كئيبه سخيفه مريعه تخلي اي حد عاقل يقول وعلى اييييييييه ما انا قاعد اهو بلا وجع دماغ .

وطبعا طبعا احنا عندنا جيل شباب من الجنسين ولله الحمد ما عندوش اساسا حب للمسؤليه ولا للجد والعمل جيل طالع عشان يرتاح ويأنتخ على حساب الناس
طبعا مش الكل لكن كتير منهم كده للاسف .


ده غير المشكله الام اصلا فى كل حاجه فى حياتنا اننا نسينا كتاب الله وسنة نبيه وبقى عندنا معايير تانيه كتير ماديه واجتماعيه وسطحيه للغايه بنحطها فى المقام الاول من حسابتنا للاسف الشديد .

باختصار يا جماعه الازمه مش ازمة فلوس وامكانيات ماديه فقط احنا عندنا افكار اجتماعيه غلط لازم نصلحها
عندنا اوضاع مذريه .
عندنا مشاكل فى نظري اكبر من كونها مشاكل ماديه وبس .

عرضت المشكله يمكن لما نعرفها نقدر نحط لها حلول ومستنيه اسمع رايكم الى يهمني ا وي

الاثنين، 6 أكتوبر، 2008

.زينب بنت خزيمه( على الرؤيه)

زينـــب بنـــت خزيمـــه

زوجة الرسول عليه الصلاة والسلام

موضوعي الجديد على مدونتي الاخرى

رؤية اسلامية متواضعة

شرفوني هناك

السبت، 4 أكتوبر، 2008

محسن ومحسنه

المكان : بيت محسن ومحسنه فى ساعة عصاري

محسنه : محسن اصحى بقى انت هاتفضل نايم طول النهار .

محسن : ايه يا محسنه عايزه ايه ما تسبينى انام شويه .

محسنه: لا يلا قوم بقى عشان انا عايزه اروح لماما .

محسن وفاق لها واتعدل لها: نعم ؟؟ ماما ؟؟ اشمعن ؟؟

محسنه : اصل اتصلت عليها فى التليفون النهارده لقيتها تعبانه هاروح اشوفها

محسن : يا سلام يااختي طب ما هو ماما هى كمان تعبانه من امبارح وانتى عارفه اشمعن ما قلتيش نروح هناك

محسنه : الله هو ايه ده ؟؟!!! اولا مامتك مكلماني الصبح وعاطياني كلمتين فى جنابي وما كانتش تعبانه . ثانيا طيب ما تروح لها هو انا قلتلك ما تروحش .

محسن : لا هانروح لماما النهارده ونبقى نروح لمامتك بكره .

محسنه: لانروح لماما الاول ماما تعبانه .

محسن : خلااااااااص مش راحين فى حته خاااااالص .

ويقوم وهو متنرفز ينط من السرير ويغسل وشه ويلبس ويخرج يروح لصحابه وهو بيشتم ويلعن على الجواز وسنينه وحماته والعيشه والى عايشينها .

=================
ايه كان يحصل فى الدنيا لو كان كل واحد راح لوالدته لواحده ؟؟؟

ليه لما مامته كلمته ما راحش هو لمامته وتاني يوم بيحاسب مراته انها ما قالتش تروح لمامته ؟؟؟ّّّ!!

رساله الى كل محسن فى الدنيا :

من فضلك انت عليك تبر امك وهى عليها تبر امها

ما حدش مفروض عليه بر ام حد تاني

لكن طبعا لا تنسوا الفضل بينكم

الفضل يعنى مش عافيه لا بالمحبه والحسنى

ومحسنه كمان غلطانه كان ممكن تقوله نروح لمامتك وبعدين نطلع على ماما مثلاااااا وتبقى ا تحلت المشكله لكن برضه الحق احق ان يتبع والاستهبال وحش .


وكمان كان ممكن لما عرفت ان مامته تعبانه تقوله روح زور مامتك من باب انها تحضه على بر امه وكان ممكن برضه تروح تزورها .

المهم نصفي النوايااااااااااا من الجميع

تحياتي لكم