الأربعاء، 24 أغسطس، 2011

حديث مع الكنبه ( الجزء الاول)



اه حديث مع الكنبه عادي 
  
قلتلها مالك يا كنبنب قاعده متقريفه ... قالتلى والله يا اختي نفسي تخفوا الاكل شويه عشان بتفطسوني وانتم قاعدين فوقي

قلتلها اخس عليكى كنبه قليلة الاصل امال احنا جايبينك ليه  وروحت مكوعه عليها ومدياها نوم وتفطيس بقى  نيهاهاهاها

لا لا مش هو ده الكلام  طبعا

الحقيقه الحديث كان مع احد اعضاء حزب الكنبه المشهور  فى الايام الراهنه ( حلوه الراهنه ؟)

المهم  انا هاقول الحديث كما دار بينى وبيها دون اي اضافات  المسحوق بس

طبعا احنا اتخانقنا كتير من اول الثوره لحد دلوقتي ومن قبل الثوره والله. بس هى صاحبتى وحبيبتى  بس يا حبة عين امها ضحيه من ضحايا مبارك الله يحرقه

يعنى هى عارفه موقفي وانا عارفه موقفها بالتالي اول لما خلصنا فطار واتتمنا اكل المكرونه والمحشي والفراخ والكفته انتقلنا الى مائدة الحوار السياسي وهاتك يا خناق

هى يا حبة عين امها بس قالت . هأ الثوره .. عملت ايه الثوره .. وبصتلي وهى عارفه الى هايجرالها   واضافت :منكوا لله

أنا : اه طبعا مننا لله ... تصدقي انت يا بت والى زيك فعلا خساره فيكم الثوره  ..بس يلا اديكم اخواتنا يعنى

الكنبه : بلا نيله والنبى كان ماله مبارك عمل ايه مبارك عشان تعملوا فيه كده .. تعرفى تقوليلى عمل فيكى ايه مبارك ؟

أنا بهدوء ما يسبق العاصفه :  ليه هو ما عملش فيكى حاجه وحشه خالص ؟

الكنبه : لا طبعا بالعكس .. انا ما شوفتش منه اي حاجه وحشه ... كفايه الاستقرار .

أنا بنفس البرود : ام الاستقرار ... انتى خريجة ايه يا زفته  ؟

الكنبه : هندسه كهرباء

أنا : وكنتى بتاخدي هندسه كهربا بقى عشان تدرسي فى مدرسة ثانوي فنى ؟

الكنبه : بينى وبينك انا كنت فى الاول مضايقه بس دلوقتي مستريحه وباقول خير برضه

أنا : انتى بتاخدي كام يا حاجه ؟

الكنبه : 700 جنيه حلوين اوي ومبسوطه على كده

أنا : 700 جنيه بعد عشر سنين شغل ؟؟؟  طيب ماشي انتى شخصيا مش مضايقه من مبارك بس انا يا ستى مضايقه انا حره بقى .

الكنبه : ماشي ليه بقى انتى مضايقه منه ليه عمل ايه مش كفايه الاستقرار والامان ؟؟

أنا  والعاصفه بتزمجر جوايااااا:  ام الاستقرار فى الارض يا شيخه  ..هانستقر على حساب كرامتنا ؟؟ هناكل اللقمه متغمسه ذل ؟ لييييييه هى كانت بلد ابوهم ؟؟
الكنبه : اااااااااه نفس الكلمه  الى قاله حمزاوي .. اللقمه متغمسه ذل ..

أنا : يا ستى ما سمعتوش بس يعنى هو حمزاوي ده ايه ؟ تهمه ؟

يا بنتى بالله عليكى انتى مبسوطه بحال البلد  ايام مبارك ؟؟؟ ده مافيش حاجه واحده بس لما تبصي حواليكى فى الشارع تلاقيها صح
وانفجرت بقىىىىىىى
قلتلها انا عايزه حقوقي .. الراجل ده واخد حقوقي

الكنبه : قصدك السرقه يعنى ؟ ما حدش اثبت عليه حاجه  ايه يعنى لما يكون عنده قصر ولا بتاع

ردت عضوه تانيه فى نفس  الحزب : ده بواب العماره  الى جمبنا عنده بيت فى بلدهم وشاري شقه فى نفس العماره الى هو بواب عليها

انا : وانتى شايفه ان ده وضع صح ؟؟؟  شايفه ان مفروض بواب العماره يكون عنده املاك وشقه فى العماره الى هو حارس عليها .. وسكان العماره الى هما ناس يفترض انهم مرموقين فى المجتمع بالعافيه بيكملوا الشهر ؟؟ هى دي مش اوضاع مقلوبه  الحكومه هى السبب فيها ؟؟؟

الكنبه 2 : قالت ايوه .. بس يعنى ما كل الناس عندها بيوت  اشمعن هو الى بتعدوا عليه انه يكون  عنده قصر ده برضه رئييييييييس جمهوريه  يعنى

انا : يا ستى يبقى عندى عشرين قصر بس من ماله مش من مالي انا !!!!   وبعدين ايه رئييييييييس جمهوريه دي ؟؟  مواطن زي زيه انا وكل المصريين بنديله اجر عشان يدير البلد دي لصالحنا مش بلد ابوه هى ... يا بنتي الراجل ده مجوع الشعب ومطلع فلوسهم بره البلد وناهبهم ومافيش اي خدمات بتتقدم لهم
ده عميل ماجور علينا والله

كنبه1: باقولك ايه ما تقوليش بقى عميل وبتاع حرام عليك كده
 انا ورفيقتى فى الكفاح صديقتنا الرابعه فى القاعده دي  : فى نفس واحد ما تقولي اسفين يا ريس احسن
كنبه 1 وهى ميته من الضحك: اه والله انا باحبه فعلا وباقوله اسفين ياريس
مش عايزه اقولكم احنا الاثنين بقدرة قادر كنا راكبين فوقيها والبت كانت بتطلع فى الروح والله
وتستنجد بجوزها يا اخويا ولا سال عنها تقريبا ما صدق يخلص منها  مع انه من المعارضين لفكر

وقلتلها بذمتك ودينك يا مؤمنه انتى عايشه معانا فى البلد دي ؟

روحتي مستشفى عام قبل كده ؟؟؟؟

الكنبه 1: ايوه روحت مره بابنى مستشفى الاطفال ( انضف مستشفى حكومي فيكى يا منصوره بعد مستشفى الكلى )
وطبعا كانت راحه تعمل عمليه ومتفقه مع دكتور ودخلت بسهوله

أنا :  انا دخلت المستشفى دي اكتر من مره لما كنت عامله حملات تبرع بالدم ليهم وشوفت الناس واقفه على بابها متبهدلين اخر بهدله والناس بتعامل الغلابه اسوأ معامله .. انا طبعا دخلت بمجرد ذكر اسم نائب مدير المستشفى الى كنت واخده منه معاد ... انما الست الى واقفه ومعاها طفل فى ايده كانيولا وشكلها هى وهو فى هزال تام .. قالها مافيش انتظار جوه

المرضى دول ذنبهم فى رقبة مين ؟؟؟ الجواعى؟؟ العرايا ؟؟ المشردين ؟؟  العاطلين ؟

الكنبه 1:  وهو ده ذنبه ؟؟ ده ذنب الى معاه هما الى كانوا كده وبعدين احنا كتير ومواردنا قليله

انا وانا باصوت خلاص : ما تقوليش مواردنا قليله  احنا بنتنهب ليلا نهارا  ومافيش بلد عندها كل الى عندنا وحالها كده
عندنا زراعه اهملت وباظت .. عندنا مواد خام مسروقه .. عندنا مصانع اجهز عليها عشان ما تشتغلش ... عندنا مايه ... عندنا ثروه بشريه ... عندنا موقع جغرافي... اهميه سياسيه وسياحيه ودينيه  ... عندنا مساحه واسعه  وتنوع مناخي وتضاريسي ... مافيش اي حاجه من الحاجات دي مستغله .. العيب عيب اداره

الكنبه 1: طيب العيب عيب اداره يبقى ده مش عيبه هو عيب المديرين

انا وجالي خلاص انهيار عصبي : انتى يا بت حماره ؟ ما هو الكوتش هو مدير كل المديرين الطم منك ؟

الكنبه 2 : برضه هو عمل كتير يعنى هى البلد كانت كده من 30 سنه ؟

أنا وقاربت على الانتحار : لا كانت احسن من كده ... ايوه بالنسبه لقرنائها كانت احسن من كده بصوا حواليكم شوفوا احنا فين والى حوالينا فين

شوفوا حتى العرب الى كنا بنقول غرقانين فى التخلف .. بقوا انضف مننا ... ده انا اخر مره فتحت الجوجال ايرث وروحت ازور المكان الى كنت عايشه فى ابو ظبي من 8 سنين اتحسرت ... لقيت بلد تانيه غير الى انا كنت فيها

الكنبه: ماشي هما عندهم فلوس وعددهم قليل .. احنا يا ستى كتيييييير

انا : يادي النيله على كتير وهباب ... هى دي سبه ؟ يا بنتى دي مييييييييزه .. احنا نعمه مش نقمه ... الزعيم الصينى قالوله انت مجنون ازاي هاتعمل نهضه عندك وانت عندك ملياااار بؤ عايز ياكل ... قالاهم انا فعلا عندي مليار بؤ ... بس عندي اثنين مليار ايد ... وهو ده الى وقف الصين على رجليها .. ايدين الشعب ..افهموا بقى


الكنبه1: يعنى انتى عايزه تحمليه كل المسؤليه لواحده ؟؟

انا : اينعم هو اولا ... ومن ولاه ثانيا طبعا  ... كل شلة الحراميه دول لازم يتحاسبوا

ردت رفيقتى فى الكفاح  : يعنى يا بنتى هو مش المفروض رئيس الجمهوريه  يقدر انه مثلا لما يلاقي مشكله معينه ولتكن فى شارع من الشوارع يقوم يدي اوامر لوزير النقل انه يعمل هنا كبري مثلا او نفق يحل المشكله ؟؟

الكنبه 1: طب ما هو عمل كتيييييييير .. بس مافيش فايده

انا : ايوه احنا الى شعب ابن كلب مافيش فيه فايده مش عارف يتحكم ... تعرفي تتوكسي ؟؟

ووجهت كلامي للرفيقه الثوريه : قلتلها بالنوسبه لسؤالك .. الاجابه هى لا مش المفروض اصلا ن ده يحصل .مفروض ان يقول لرئيس الوزرا انا بلغني او شوفت مشكله فى المكان الفلاني حلها ... هو بقى يقول لوزيره .. ووزيره يعمل لجنه فنيه تكنوقراط  ويظبط نفسه  بقى

لكن الكلام ده لو احنا فى دوله محترمه ... انما كان ايام حسنى مبارك يا سلللللللم يا سلللللللللللم بس هو يشاور الصبح كانت تتوجد الميزانيات والشغل يشتغل وميه ميه

الكنبه 2( الهادئه جدا ): طب انتى تختاري مين لمرشحين الرئاسه ؟؟؟

ونكمل بقى المره الجايه يا حلوين عشان شكلكم زهقتم :)

الثلاثاء، 16 أغسطس، 2011

لا للمحاكمات العسكريه للمدنيين




اكتر حاجه مضايقاني حاليا ان فى رغي كتير وكلام مش منظم وهبل وعجن وتخبيط فى الحلل والمحصله فى النهايه صفر او حتى تحت الصفر بشويه

اه ماهو طول ما في الاف من المدنيين السلميين الثوريين  كمان وهما محبوسين فى السجن العسكري وبيتعذبوا كمان وبيضربوا وبيتهانوا يبقى احنا بننزل تحت الصفر

اسماء محفوظ سواء اختلفت معاها او اتفقت فهى ما حدش يقدر ينكر انها حره  ومن اوائل الناس الى نادوا بالثوره وعرضت نفسها للخطر لما طلعت وكلنا شوفناها قبل كل الرجاله الى بشنبات وقالت انا نازله التحرير

ونزلت فعلا التحرير قبل الثوره بكام يوم وما حدش راح ورجعت قالت انا نزلت لوحدي وهانزل تاني وكان لكلامها تاثير مهم اوي وقتها

بس يظهر ان موقفها الى كل شجاعه ده حسس كتير من الرجاله انهم لبسوا الطرح بالتالي هما دلوقتي بيشتموا فيها ويقولوا احسن تستاهل

والفكره مش اسماء محفوظ وحدها  الفكره هى كل مدنى يتحاكم امام محاكم عسكريه  اصلا

اما بالنسبه لموضوع اشمعن بتتحمقوا على النشطين اقولكم  لان ده حقهم  لانهم كناشطين بيتعرضوا فعلا للخطر اكتر مننا كلنا الى يمكن اغلبنا نايم فى بيتهم من اول الثوره دون عذر غير انه  مانتخ او خايف على نفسه

اه مانتخ وخايف على نفسه ومافيش مانع يقنع نفسه كده بكلمتين حلوين يخلوا شكله حلو قدام نفسه  وهما ان الثوره دي  ولا ثوره ولا يحزنون والثوار دول شوية عيال تعبانه وان كلهم هبل واغبيا ومش عارفين يعملوا ثوره صح وهو طبعا لانه شخص  فظيع لا يمكن يشارك فى الهبل ده ...واووووووووخ نام يا ضميره

النشطين من حقهم علينا اننا نحميهم  ونقف كلنا فى ضهرهم  لانهم مهمين لنا وللمجتمع مش النهارده بس ومش هما بشخصيهم انما بمعنااهم ... لو احنا سبناهم دلوقتي يمكن يياسوا والى بعدهم يخافوا يطلعوا ويقولوا  هانطلع ازاي ولمين وعشان ايه ... انما لو كل واحد عارف انه يوم ما يقول كلمة حق بصوت عالي هانكون وراه  كلمة الحق هاتفضل صوتها عالي

ارجوكم ما تبيعوش بعض ..فى النهايه مش هاتلاقوا حد يقف جمبكم مهما كان اتجاهك او صفتك او دينك اقف جنب المظلوم ..عشان تلاقي حد يقف جنبك

عيب اوي الكلام السخيف الى باسمعه من جميع التيارات سواء اسلاميه او غيرها فى حق النشطين

عيب اوي تنكروا عليهم دورهم فى الثوره حتى لو اخطأوا بعدها  ما حدش ما بيغلطش لكن ما تنكروش عليهم دورهم

كل النشطين ولو حتى ناشطين من منازلهم كان لهم دور فى الثوره  بلاش نعتبرهم رموز او ابطال لكن لازم نحترم دورهم وما ننكروش

فكروا كويس لو كان الى زي اسماء محفوظ ووائل غنيم وغيره وغيره من الشباب الى طلعوا يوم 25 يناير اول ناس  ما طلعوش وخافوا واستخبوا  كان الشعب هايطلع ورا مين ؟؟

ايوه احنا طلعنا وراهم وورا صوتهم وكلمتهم الى سمعناها او قرناها  يمكن ساعدتهم عوامل كتير لكن هما كان عندهم شجاعة البدايه ودي نقطه تحسب لهم

فى النهايه احب اقول ان نفسي بجد يتم الدعوه لمليونيه حقيقيه وياريت تكون بعد رمضان  عشان الناس صايمين ومانتخين دلوقتي
مليونيه ترفع شعار واحد فقط لا للمحاكمات العسكريه للمدنيين

والدعوه تكون لكل المصريين ولكل البنى ادمين على ارض مصر  على كافة طوائفهم وافكارهم وديانتهم  واحزابهم
الى موافق على عنوان المليونيه ومطلبها الوحيد  وهو لااااا للمحاكمات العسكريه للمدنين  يطلع يقف معانا  ويقول معانا نفس الكلام ده وبسسسسسسسسسسس

ارجوكم وحدوا الصف والكلمه والمطلب بدل ما يصطادونا واحد ورا التاني

الى بيحصل دلوقتي هو تخويف للثوار واصطيادهم فردا فردا واتجاه اتجاه عشان فى الاخر الكل يدخل جحوره والباقي فى السجن العسكري

من فضلكم فى الوف مرميه فى السجون العسكريه مدنين ما عملوش اي حاجه غير انهم طالبوا بحريتهم
ارجوكم ما تضيعوش حق الناس دي
هما كمان لهم اهل زي اهالي الشهدا ولا تحبوا نستنى لما يموتوا نبقى ندور على حقهم ؟؟

انتم عارفين احنا لو رجعنا لايام الذل والقمع تاني  بجد مش عارفه ممكن يحصلي ايه

قبل الثوره بكام شهر انا دخلت بجد فى حاله نفسيه زي الزفت بسبب انى حسيت انى عايشه مش من حقي اعمل اي حاجه فى الدنيا
جوزي كان مانعنى اكتب فى السياسه وبعد شويه منعنى انظم لقاءات خيريه وبعد شويه منعنى اصلا احضر لقاءات  وكل شويه يحذرنى من الكتابه بتاعتي وانى حتى ما المحش لاي حاجه فى السياسه

انا عارفه انه كان خايف عليا وانه فعلا كان عنده حق فى خوفه عليا لكن كانت المشكله انى عارفه
عارفه ان احنا كلنا بقينا نخاف نخاف على روحنا وعلى اهالينا وعلى عيالنا
بنخاف نتكلم بنخاف نفكر بنخاف نحلم وشويه شويه الخوف يزيد ونلاقي نفسنا محبوسين فى زنازين من صنعهم
ارجوكم مش عايزه ارجع كده تاني

ما تسمحوش لهم يصطادونا فرادى ... ما تسمحوش لهم يكتموا اصواتنا تاني

الجمعة، 12 أغسطس، 2011

الحريه .. الامل الباقي




مفروض فى تدوين يومي بس طبعا انا مدونه خايبه زي ما انتم عارفين
خلونا نتكلم عن الامل الباقي  

انا ليا يجى سنه ويمكن اكتر دائما وابدا حالتي وصفها  اما خائفة يحدوني الامل .. او آملة يحدوني الخوف

يعنى الاثنين امل خائف بس فى اختلاف فى النسب  لكن دايما عندي امل ودايما خايفه

مش الخوف الى هو جبن وانما الخوف الصحي الخوف الحذر

كنت قبل الثوره  اقول دايما فى امل ..يقولولي بيتهئلك  مافيش انسى ولو حصل تغيير هايبقى الدم للركب

كنت برضه عندي امل ..واقول يااااارب تخرج من اديهم ..يارب من بين ايديهم سدا ومن خلفهم سدا  ..وتفلت من اديهم بس هفوووه نكون مصحصحين لها

والحمد هى كده خرجة من اديهم ..والحمد لله برضه العراك الموجود على الساحه يقول اننا مصحصحين لهم

ما حدش يقولي لا ما فلتتش ولسه فى اديهم ..لا هما دلوقتي بيحاولوا يمسكوا الخيوط تاني  بس مش عارفين

عاملين زي سمير غانم فى المتزوجوين يصلحوا الجاكته البنطلون يضرب

وادينا وراهم والزمن طويل

القوى الدوليه يهمها نفضل بعبلنا كده وعايزين يعملولنا تغيير وهمي تغيير وجوه ومافيش مانع من شوية رتوش وشوية  مكياج   يحلوا الدنيا شويه عشان الناس الى انفجرت دي تهدى

لكن تغيير وديموقراطيه والشعب يعمل الى هو عايزه ..لا مش عايزين كده عشان معروف توجه الشعب ايه اصلا

القوى الداخليه الفاسده التابعه للنظام السابق او المنتفعين من وجوده  اعتقد انهم دلوقتي  فريقين ...
فريق بيحاول ينجو بنفسه  يا مسجون يا خايف يتسجن وكل امله دلوقتي انه يطلع منها سليم

وفريق تاني الى ما كنوش فوق اوي والى بيسموهم طابور خامس بيحاولوا بقى يلمعوا وشهم بشوية ورنيش لون تاني ويغيروا جلدهم ويعوموا  مع الموجه الجديده

الفريقين الحقيقه مش شايفه منهم خوف  الاثنين هايندثروا  مع مرور الوقت ان شاء الله

اما بقى القوى الداخليه الى طلعت من القمقم الى هى كانت سنين مكبوته طالع عينها و مكتوم نفسها والى هاتموت دلوقتي عشان تستولي على السلطه
والى هما طبعا ما يطلق عليهم التيارات الاسلاميه  ( طبعا فى تيارات تانيه لكن دول اقواهم واكبرهم قاعده )   عاملين زي لما تكون حابس عصافير وتفتح لهم القفص فجأه كلهم بيطيروا فى نفس الوقت فى اتجاهات متختلفه وبهبل وبدون وجهه معينه
كمان فى مشكله كبيره  ان بعضهم مخترق بشكل بشع من الاجهزه الامنيه لانهم كانوا مركزين معاهم اوي السنين الى فاتت

طيب ايه داعي الخوف منهم ؟؟
الحقيقه انا شايفه انه برضه مافيش منهم قلق جامد .. عن نفسي لو الشعب فعلا فعلا بكامل ارادته  اختار الناس دي مافيش مشكله ... لكن المشكله الحقيقيه  والى كل الناس خايفه منها انه يحصل استغلال للدين فى التاثير على راي الشعب والى بطبعه ميال للدين بفطريه دينيه معروفه عننا

لكن انا برضه مش قالقنى الموضوع ده  لانه فى حال اننا دلوقتي ركزنا على ارساء قواعد حريه وديموقراطيه حقيقيه فعلا  من دستور وقوانين  مش هايبقى فى مشكله خالص  لان حتى لو الشعب انضحك عليه مره مافيش مشكله بعد اربع سنين هايكون اتقرص كويس وعرف الحقيقه  ويتعلم ويختار تاني صح ان شاء الله

طب الفلوس الى اتسرقت دي مش هانرجعها ؟؟
قوم ارد عليكم اقوله لا طبعا هو هبل ؟ مين دوله هبله فى العالم ترضى تديكم مليارات من بنوكها حتى لو كانت بتاعتكم ؟؟
ما عادش عندي امل فى رجوع الفلوس

طب العداله .. الناس الى سرقونا مش هنحاسبهم ... اقولكم الحقيقه  ما عنديش امل برضه اوي ان ده يحصل فى الظروف الحاليه لان بكل بساطه الى ماسكين البلد دلوقتي منهم اصلا وكل الى بيحصل ده  بيامنوا نفسهم ماشي برضه .. احنا هانعمل الى علينا  ونحاول نحاسبهم  خصوووووصا  فى حق الشهداء
ما عنديش ثقه فى عدالة البشر  لكن عندي ثقه كامله فى عدالة ربنا الحمد لله

وعلى ما سبق فانا مش فاضلي غير حاجه واحده بس خايفه وقلقانه عليها .. الحريه

وده الى لازم نركز عليه دلوقتي  ... الانتخابات ..الدستور.. قوانين الانتخاب ... وعشان نعمل كل ده لازم نفضل احرار
لازم ما نسمحش ان حد يسلبنا حريتنا تاني ... ما حدش يقولنا روحوا شوفوا شغلكم واحنا هانعمل وهانسوي

ما حدش ينتهك حقوقي الانسانيه والمصريه كمواطن مصري

ما حدش يسجنى بدون حكم ... ما حدش يعذبني ... ما حدش يحط ايده على بؤي ويمنع كلامي

عشان نقدر نحقق الحريه الى بنحلم بيها لازم نكون من جوانا احرار  ..تفكيرنا حررررر

افكر فى حريتى وحرية غيري   مش اطالب بحريتى واصادر على حرية غيري باي مسمى من المسميات

انا مصريه  زي جموع الشعب المصري  ماليش اي انتماءات سياسيه ولا فكريه

مش عاوزه اي اتجاه بعينه هو الى يحكم او يشارك فى حكم مصر

لكن عايزه انول حريتى ... وعايزه الشعب كله ينول حريته ويختار حكومته الى يعتقد انها هتحقق له اماله



الخميس، 4 أغسطس، 2011

انجاز ... رغم كل شيء



محاكمة المخلوع ... كانت حلم بعيد المنال من كام شهر كده

رغم ان فى اصوات متشائمه وسوداويه وبتطفي فرحتنا دايما بكل حاجه نعملها ..الا ان بعضهم حتى النهارده كان فرحان
وبضهم بيعبر عن خوفه وقلقه بمزيد من التشاؤم

وتسمع بقى الى بيقولك هأ وايه يعنى بيتحاكم ماهو مش هايحكموا عليه بحاجه

مين مبارك ؟ ده مش مبارك ده قرينه . قصدي شبيهه  مبارك تلاقيه بياكل موز فى البيت

ولا الحليوه الى طلع علينا من محاميين الشهدا وقالك حللوله دي ان ايه وقارنوه بعلاء وجمال اصل ده مش مبارك مبارك مات من 2004

كل ده كلام فى البتنجان طبعا لان الى كان فى المحاكمه النهارده هوووو مبارك هووو بغباوته يا عالم انا هاتوه عنه

الحقيقه حتى لو حصل وما حكمناش عليه بحاجه ولا حتى طلع قرينه الى بيتحاكم احب اقولكم اننا حققنا انجاز فظيع على المستوى العالمي والعربي

يكفي اننا كنا حديث العالم اجمع النهارده ..لما عملنا ثوره ونضفنا الميدان وحاكمنا الى قتلنا بكل عدل

يكفي انى من سنه كنت لما افكر اعمل نشاط خيري اكون متاكده ان امن الدوله اضاف ذلك لملفي

وللبهوات الى بيقولوا  ارحموا عزيز قوم ذل ..احب اقولكم لكم أذل قبل ان يذل

وللى بيقولوا بلاش الشماته  من فضلكم دي مش شماته ده شفاء الصدور

ربنا سبحانه وتعالى قال : قَاتِلُوهُمْ يُعَذِّبْهُمُ اللّهُ بِأَيْدِيكُمْ وَيُخْزِهِمْ وَيَنصُرْكُمْ عَلَيْهِمْ وَيَشْفِ صُدُورَ قَوْمٍ مُّؤْمِنِينَ
صدق الله العظيم

ادخلوا المستشفيات شوفوا الالم الحقيقى المرض الحقيقى الغلب الحقيقى  مش هايصعبوا عليكم الى مسجونين فى طره

ادخلوا السجون والمعتقلات شوفوا المعذبين بصحيح المهانين عن حق المسلوب حريتهم وكرامتهم بدون وجه حق  مش هاصعبوا عليكم

امشوا فى الشوارع شوفوا التعب والغلب على وشوش الناس

ما حدش يقولي هو مش مسؤل عن كل ده  عمر بن الخطاب كان بيقول لو عثرت دابه فى الفرات لاخذ بها عمر يوم القيامه
واحنا شعبنا كله ماشي يتكحول  ويتكعبل على عينه  ولا حياة لمن تنادي ولسنين طويله

انا فرحانه اوي  ان ربنا استجاب لدعائي  لانى كنت فى عز اليأس قبل الثوره باقول مافيش حاجه بعيد على ربنا

وهايجى يوم وناخد حقنا من كل ظالم

ارجوكم افرحوا بالانجاز ده ... احنا اسقطنا ناظم قوي ظالم ديكتاتور وحاكمنا رموزه محاكمه علنيه سمعناها وشوفناها كلنا
النهارده احنا كنا حديث العالم كله
الانجاز ده يستاهل نفرح بغض النظر عن كل الاعتبارات

وما تنسوش ان المعتصمين فى التحرير لولاهم ما كانت المحاكمات دي حصلت ولا بقت علنيه ولولا اصرارهم على الاعتصام من قبل التنحي ما كان التنحي

وادعوا بالصبر لاهالي الشهدا الى دمهم كان تمن لاننا ان شاء الله نوصل لحريتنا

وما تنسوش الثوار المعتقلين الى بينضربوا ويتهانوا عشان احنا نرفع راسنا فوق

الاثنين، 1 أغسطس، 2011

عن الاخوان نتحدث



اولا  رمضان كريم وكل سنه وانتم طيبين وربنا يعوده عليكم بالخير يارب

وحشتوني جدا جدا ووحشتنى المدونه والكتابه فيها
وزي ما بتقول صديقتى العزيزه ستيته يبدو ان تويتر بال140 حرف بتوع فعلا حارقا للافكار 

جاتلي دعوه على الفيس بوك للمشاركه فى شهر التدوين اليومي وطبعا انا مش ضمناني خصوصا اننا فى رمضان لكن انا قلت لما اشترك واحترم نفسي بقى واحاول  اكتب تاني بانتظام



ثانيا بقى ندخل فى موضوع البوست

الاخوان

طبعا خلال الفتره الى فاتت ويمكن من بداية الثوره او قبلها حتى رايي فى الاخوان ثابت وما اتغيرش ولكن مش عارفه ليه لما باقول رايي بصراحه ده بيدعوا ناس كتيره جدا للهجوم عليا بشكل شرس جدا حتى لو كانوا مش اخوان

الحقيقه مش عارفه امته هانسمع  بعض  بكل بساطه ومش مهم نقتنع ببعض لكن يفضل الود قائم بل اكثر من الود كمان

بداية انا مش معاديه للاخوان ولا لاي اتجاه تاني بصرف النظر  عن مرجعية اي تيار الدينيه والسياسيه كل واحد حر ولكن .. من حق انتقده او اخالفه براحتي بدون ما يصبغ  ذلك بصبغه  معاديه لدين او لله كمان

والى غلبت اقوله للناس كلها انا ليا اصدقاء اخوان وسلف بل ان اختي الكبيره والله اخوانيه هى وجوزها  وعادي جدا على مائدة السياسه والفكر بنتعارك فكريا ونشد فى شعور بعض  وعلى مائده المحشي بنقعد عادي نعمل محشي وناكل محشي  مافيش اي مشكله

اقول بقى رايي فى الاخوان نفسهم وبلاش رغي

الاخوان جماعه معروف اصلها والمفروض انها جماعه دينيه ولكن من بداية الامر وهى لها وجود سياسي وده انا لا انكره على اي حد فى الدنيا ايا كان  التواجد السياسي حق كل واحد وكل تيار
حتى انى لا اعارض قيام احزاب على اساس دينى ما دام انا باكفل حرية الاحزاب

 ولكن اذا انت كداعيه للدين وحامل راية الاسلام  دخلت عالم السياسه فهل عليك خلع عباءة الدين داخل موقعتك السياسيه والقول بان الخديعه فى الحرب مباحه .. ولكن حين يوجه اليك النقد بصفتك فصيل سياسي ترفع سبحتك فى وجهي قائلا لعنة الله على الكافرين ؟؟؟

حدد موقفك هل انت رجل دين دائما حتى سياسيا ام انك تخلع العباءه وترتديها  وقتما تشاء ؟؟

السؤال الذي هو مثار جدال دائم : هل الاخوان يعقدون الصفقات مع السلطه ؟؟
رايي انا الشخصي : نعم ونعم ونعم ..تاريخيا نعم  .. وفى الماضي القريب نعممم.. وفى الحاضر نعمممم

حد بقى يقولي دلائل اقولك ده حضرتك تحليل سياسي ان صح التعبير لك ان تاخذ به ولك ان تتركه

ولكن انا بما رايته من الاخوان على مر سنين عمري فقط يؤكد ليا انا شخصيا انهم يعقدون الصفقات مع النظام مهما كان النظام

واظن انه لا يخفى ابدا ان الاخوان عقدوا الاتفاق مع الملك ومن بعده عبد الناصر واداهم بمبه والسادات واخدوا نفس البمبه  وما اقتنع به شخصيا انهم برضه  عقدوا الاتفاق مع نظام مبارك واخدوا نفس ذات البمبه  بشكل او باخر
خلينى اقولكم تحليلى ولكم الاقتناع من عدمه طبعا انتم احرار

ايام لما كنت فى الكليه انا يعنى تقريبا فى اواخر التسعينات الحقيقه مش عارفه ليه انا كنت فوتوجينيك بالنسبه للاخوان كل شويه الاقي واحده جايه تقولي الاخوه وانضمي لينا وكلا م من هذا القبيل  الى اكيد عدى على معظمكم ..جايز لانى كنت مواظبه على الصلاه فى المسجد كانوا حاسين انه يجى مني

المهم انه فى الوقت كان ردي عليهم دايما لما تقولي انضمي لنا ..هو من انتم ؟؟؟  بجد والله كنت اسالهم انتم مين اصلا ؟؟؟  انتم اخوان يعنى ؟؟
تتفزع البنت كانى قرصها تعبان وتقولي لا لا اخوان ايه يا ستى احنا مش اخوان ولا غيره احنا بس مجموعه من الناس معتدلين متوسطين ملتزمين بدين ربنا ...  اقوم انا اقولها يا راااجل طب ما انا ملتزمه بدينى انتى شايفه فيا حاجه غلط ولا ايه ؟؟   وغالبا بتنتهي المناقشه على انه انا مش بانضم لحد انا مع نفسي

كان فى انتخابات سنة 2001 تقريبا ؟ الحقيقه انا كنت بره مصر ما حضرتهاش حضرت بقى انتخابات 2005  واذ فجأة لقيت نفس ذات الناس الى كانت بتقرصهم التعبان لما تقولهم اخوان  معلقين يافطه كبيره قدام بيوتهم ولا محلاتهم الاخوان المسلموين يهنئون اهالي المنصوره الكرام بالاسراء والمعراج (مثلا ) مع تحيات المهندس فلان الفلاني .. كده وش ؟ الاخوان المسلمين كده وش ؟؟؟

كان ايامها بقى بنتكلم عن الاشراف القضائي على الانتخابات وبنقول يا مهووون تكونش دي ضغوط دوليه ؟؟ عشان تحقيق الديموقراطيه ؟؟
بس ادورها فى دماغي لا برضه دوليه مين ..ده امريكا (باعتبارها اقوي صوت دولي )هرست العراق بكلمة  الاستبداد اكيد مش هاتتمنالنا الديموقراطيه ؟؟!!

الله هو مش جماعة الاخوان المسلمين اصلا تعد جماعه محظور عملها فى مصر ؟؟؟   الله امال ازاي الحكومه سايبنهم كده بكل بساطه ؟؟
فجاه الشوارع اتملت نفس الصور ونفس الاشخاص الى عهدتها من عشر سنين فى الانتخابات ولكن كان بيتحط بوسترات لهم وجمبها بوسترات تانيه عليها سيفين ومكتوب الاسلام هو الحل ...يعنى مش الاخوان كمان
لكن فى 2005  بقى كانت وش كده فلان مرشح الاخوان المسلمون

لا وكمان ايه ؟ مقرات ثابته وواضحه للاخوان المسلمين ومنهم واحد جنب بيتى  ويافطه كبيره ونور وهيصه !!!!

ايه ده  انا فين ؟؟؟!!!  انا كنت لسه راجعه من بره باقول يا هادي فى الدنيا هنا  ....الحقيقه حاولت افهم واسمع من الاخوان تفسيراتهم من الكبير فيهم للصغير والله  انى اقتنع بكلامهم لا ممكن ابدا وتصريحات المرشد وغيره وغيره ايه ده فى ايه ..ما لقيتش اي تفسير وقتها غير ان الاخوان عقدوا صفقه مع الحكومه

لكن الصفقه دي برضه ازاي وليه ويستفيد بيها ليه النظام ؟؟  ده كمان سابهم يدخلوا المجلس فعلا بعدد ما كانوش يحلموا به

طب استفاد ايه النظام ؟؟؟ طب الاخوان دفعوا ايه ؟؟؟؟؟

الحقيقه ما لقيتش تفسير وقتها مقنع ... لكن كان عندي قناعه تامه بان الاخوان عقدوا صفقه رغم محاولتهم لاثبات عكس ذلك بدليل واحد مين هايعقد الصفقه ؟؟ ده العريان فى المعتقل اصلا ... برضه كل ده ما يدخلش دماغي يا محترم
احدهم قالي اصل الدعوه فى الاول كانت تستوجب السريه ودلوقتي تستوجب الاعلان  عن انفسنا  والجهر !!!!  نعم ؟ لا بجد نعم ؟؟ دعوة ايه ؟؟؟ ركزوا هى دعوه ولا سياسه ؟؟؟

ومع ذلك هما فى الانتخابات  فرحوا يومين فى المرحله الاولى والتانيه وفى التالته اخدوا على دماغهم وطلعوا بالتزوير منها

ايامها فرحوا اوي برضه وقالوا  انه نصر الله والفتح  الاراده الشعبيه اختارتنا ... وقلتلهم انا عشم ابليس فى الجنه لان كل الحكايه انكم قصاد الوطني بس ..الناس لما بتختار بين الوطني والاخوان بتقول الاخوان لان مافيش غيركم على الساحه

وروحي يا ايام وتعالى يا ايام واخيرا فهمت الصفقه دي استفاد منها النظام فى ايه ... كان ايامها بقى حيلتها(جمال يعنى) استقر فى مصر  وقال امسك الحكم وعشان يكسب دعم امريكا والغرب كان لازم يرعبهم  قالهم اهو ادي الحريه والحياه الديموقراطيه شوفتم عملت ايه ؟؟؟  لو احنا سبناها الاخوان هايمسكوها وهاتبقى ليلتكم طين فى المنطقه .
الامريكان ولا غيرهم ما يهمهمش مين الى هايحكمنا ولا اخوان ولا بتنجان لكن كل الحكايه ان الاخوان  والتيار الاسلامي دايما دايما معتبر امريكا فى كفه واحده مع اسرائيل وبيعتبرها عدو بالتالي امريكا لها حق تخاف من ان الاسلاميين يمسكوا الحكم فى مصر لان ده هايضر بمصالحها فى المنطقه

كده نظام مبارك من وجهة نظري عمل صفقه مع الاخوان الى ما بيتعلموش من الاقلام الى بياخدوها واستغل مبارك الاخوان كفزاعه للغرب لكسب تايدهم ودعمهم لمخطط التوريث لحيلتها  والاخوان كسبوا برضه وقتها مقاعد البرلمان ..مكسب وهمي مالوش اي بعد  طويل المدى..عادتهم دايما يبصوا تحت رجليهم

راح الزمان وجت الثوره

الحقيقه انا فى اول الثوره كنت فرحانه جدا جدا بموقف الاخوان وباقول ايوه كده يا عاااااااطف اخيرا فهمت
كنت شايفه تدخل  الاخوان والاسلاميين فى الثوره من اولها هايكون مدعاة لاعتبار ده انقلاب سياسي ويروح قايلك الارهاب وجماعه محظوره ولم يا جدع على المعتقلات وخلصت
وفرحت اكتر بمشاركتهم فى الوقت المناسب وعجبنى ايامها تصريحاتهم الى كانت منظمه وثابته على موقفها

اينعم انا استندلتهم اووووي لما قبلوا المفاوضه مع عمر سليمان ..لما بص فى عنيهم كده فى التلفزيون وقال انا متاكد الاخوان مش هايضيعوا فرصة التحاور على المستوى ده ...بس رجعت قلت برضه هما فصيل سياسي مقهور عاش فى الضلمه سنين طويله ومن حقه يطلع دلوقتي ويدور على اثبات وجوده لان فى التفاوض معهم من قبل الحكومه اعتراف ضمني بوجودهم وانهم مش محظوره ... وخصوصا انهم خرجوا وقالوا ما اتفقناش ..فقلت ايوه كده يا وديييييع

لكن الى حصل بعد كده بقى من وجهة نظري مخزى ...بتهيئلي مافيش حد عنده مخ يقول ان موقف الاخوان دلوقتي من الثوره والثوار لا يصرخ فى وجوهنا بوجود اتفاق اوصفقه بين المجلس العسكري والاخوان

مش عيب على فكره السياسه كده صفقات ..لكن العيب يا اخوان انكم تتفقوا معاهم علينا ...العيب انكم تصموا اذانكم عن اصوات الشعب وتجروا ورا مصلحتكم كجماعه .

سؤال بس باقوله بينى وبين نفسي كتير
اما آن للاخوان وغيرهم من التيارات السياسيه ان الوحيد الذي يستحق عقد الصفقات معه هو الشعب ؟؟؟

انا عارفه انهم حاليا عندهم تخبط وده عادي ... هم دلوقتي كمن عاش فى كهف مظلم لعقود عديده وخرج لنور الشمس فجأه ...طبيعى يصاب بانعدام رؤيه وتخبط لفتره

لكن ده مش معناه برضه انهم يعقدوا صفقات على حساب الشعب ويطلعوا علينا بتصريحات يفوح منها رائحة الكذب عيب والله

بعض الناس بتقولي انتى متحامله عليهم ليه اكتر من باقي التيارات ...ردي عليهم ان اولا الاخوان المسلمين هما اهم تيار سياسي  حاليا ,, وثانيا لانهم مصرين صبغ صورتهم بالمثاليه والنورانيه ..... واظن من على لسان واحد منهم قريب كان بيقول الاخوان المسلمين تيار سياسي طاااهر ....طبعا غنيتله يا ام المطاهر رشي الملح سبع مرات
لان مافيش حاجه اسمها تيار سياسي طاهر اصلااااااا السياسه سياسه
 ده غير استغلالهم فعلا للدين بشكل سخيف  ورفع راية الاسلام وكانهم حامي الحمى
والمغالطات السياسيه وكل ما تواجههم بيافطه ولا منشور مكتوب عليه الاخوان المسلمين يقولك لا ده تصرف فردي
ولما يطلع حد  منهم تصريحات يقولوا تصريح فردي
ولما يتزنقوا يقولك اصل العاطفه  ما نقدرش نمنع جموع الناس من التعبير عن عاطفتهم
ده كلام ؟؟؟ دي مسخره سياسيه يا اخوان عييييييييب بقى انضجوا ارجوكم

دائما وابدا هافضل اقول   ان الاخوان المسلمين جماعة او تيار ولاؤه الاول لنفسه للجماعه ومصلحة الجماعه

سواء ان اداروا ذلك بذكاء سياسي ام لا

وهاقول للاخوان المسلمين انفسهم كان ممكن تكونوا فى صف الشعب وتكسبوا فعلا لكن انتم دايما تختاروا غلط

اعزائي الاخوان لقد خسرتم صوت كل ذو عقل من خارجكم والان بداتم تخسروا كل ذو عقل من داخلكم

خساره كان ممكن نكون احسن من كده يا اخوان

اسفه انى طولت  عليكم 

وكل سنه وانتم طيبين ورمضان كريم ... هاتفطروا ايه النهارده ومع مين؟؟؟ اعترفوا جميعا