الثلاثاء، 29 مارس، 2011

الليبراليه ..واشياء اخرى

طبعا اكيد اكيد كلنا شايفين دلوقتي الكلام الى بيتقال على الساحه كل كلمه واختها قضيه لواحدها والله وكيل نص الناس مش فاهمه الى بتقوله ولا الى بتسمعه

فبعد ما شوفت اهوال من كلام الناس على الفيس بوك وتعليقات حقا عجيبه ومريبه  اتقالت سواء عندي فى الفيس بوك تعليقا على فيديو اهبل لواحد اقل ما يقال عنه انه متخلف (اه بقى انا باشتمه انا حره ياعم )...او تعليقات بقى مرميه فى كل مكان فانا حبيت فى البوست ده ان شاء الله اتكلم عن الليبراليه بالمختصر المفيد
وبالتفسير الى اتمنى يكون سهل والناس تقدر تفهمه


الليبراليه : كمعنى لغوي مشتقه من من كلمة liber   والى بتعنى باللاتينيه حر ... من هنا جت تسميتها بليبراليه او حريه

طيب يعنى ايه بقى الليبراليه كمنهج ...خلينا نعتبرها اولا منهج فكري وبعد كده نطبقها بقى المجالات المختلفه(سياسيه اقتصاديه معتقديه )

الليبراليه كفكر هى بتقول ان هناك حريه مطلقه ...مطلقه من وجهة نظري يعنى من كل النواحي وعلى كافة الاشكال

طيب ماشي الكلام ده لكن على ارض الواقع مافيش حريه مطلقه طبعا !!! دى حاجه مستحيله اصلا ان يكون فى بنى ادم فى الدنيا او كيان سياسي او اجتماعي او غيره عنده حريه مطلقه تماما

امال ايه ؟
انت خدت حريتك ؟؟ انت دلوقتي حر تقدر تختار مصيرك ..تقدر تقول رايك ..تقدر تعيش زي ما تحب ...اه

طيب تعالى بقى  انت لازم تعرف ان حريتك تنتهي عند حرية الاخرين
وحرية الوطن جزء من حريتنا ... وحريتك مقيده بانضمامك لاي مؤسسه  او دوله اول كيان

بمعنى لو كنت مثلا جنسيتك امريكى فانت بانتمائك للكيان الامريكى عليك واجبات ولك حقوق ...(تلزمك بها قوانين الكيان كما تضمن حقوقك فيها نفس القوانين )

ولو كنت مسلما فعليك واجبات ولك حقوق

ولو كنت زوج  ولو كنت تعمل فى المنصب الفلاني ولو كنت ولو كنت الف قيد مضروب حوالينا

عايز تتحرر من القيود تماما خالص بتاتا البته ؟؟ اه ماشي حوش بقى واشتريلك جزيره كده فى وسط البحر مترين فى مترين حتى واقعد هناك بقى خليك براحتك  على الاخر لا يمكن ان يقيدك ساعتها غير قيودك الفكريه ومعتنقاتك الدينيه مثلا(تبقى رقيب نفسك يعنى )  وما الى ذلك..

يعنى برضه ممكن تبقى لوحدك وعندك قيود على حريتك ؟؟  ااااااه طبعا

والقيود مش لازم تكون اذلال او كبت حريه او غيره وانما هى نظام  نخضع له لمصلحتنا الفرديه احيانا  او لمصلحة كيان اكبر احنا بننتمي له

بمعنى قد تكون مصلحتك الشخصيه ومصلحة فلا ن وفلان وفلان ..اننا نمشي على نظام معين يكفل لنا تحقيق هدف معين يصب فى مصلحه عامه للمجتمع مثلا او للكيان الى بننتمى له

او كما يقول مفكرون الليبراليه :

أن مصلحه المجتمع ككل تتحقق حتما من خلال عمل كل فرد فيه على تحقيق مصلحته الخاصة...

ايا يكن عشان انا صدعتكم

فى رايي ان الليبراليه فى مجملها او فى اصلها هى الحريه او التحرر ..... ولكن هى لها مناهج كتير اوي تلاقي فى ليبراليه كلاسكيه وتلاقي منها عصري وتلاقي منها مطوره ومنها ذات مباديء اشتراكيه وهكذا

بمعنى ان الواحد لما يجيب بدله ويلاقيها مش مقاسه ..فياخدها يقيفها على مقاسه ..تظل هى بدله برضه لا تتحول الى فستان وانما بدله على مقاسه

كذلك الليبراليه او اي منهج تاني عشان تطبقه  لازم يكون له طابع خاص يتلائم ومحل تطبيقه ...

حتى الدين الاسلامي لو خدنا الموضوع بفكره شامله وبدون تحيز الفكر المنهج الدينى الاسلامي فى حد ذاته من وجهة نظري وناس كتير يتفقوا معايا فى ذلك وحتى غير مسلمين ..فكر عظيم جدا ومتكامل الى حد بعيد وتطبيقه ممكن ببساطه وسهوله كمان

لكن للاسف الشديد فى تجارب كتيره قدامنا حصلت ظاهرها تطبيق الشريعه الاسلاميه او المنهج الاسلامي ولكن فشلت وفى رايي فشلت لسوء التطبيق ولتفصيل المنهج على مزاج واهواء واتجاهات مطبقيه ومش طبعا لقصور المنهج لا سمح الله

والحقيقه انا مهما تفرقت الاتجاهات والتيارات والجماعات لا ارى دين اسلامي الى في كتاب الله وسنة نبيه ...وليا عنين ومخ اعرف اميزهم واتدبرهم ...وباقي من تشعب بعد ذلك الله اعلم بما هم عليه بقى من صح او خطأ (ده راي شخصي بحت )

نرجع لموضوعنا ان قد يكون الفكر او المنهج فى اساسه حميد ولكن تطبيقاته المختلفه غير حميده بالمره وتبقى دائما مقولة  نيلى الخالده فى فوازي رمضان (النظريه صح والتطبيق غلط )

وعليه ارجوكم قبل مهاجمة فكره معينه او منهج او شخص او اي حاجه تحبوا تهاجموها انشاله صباع رجلكم الصغير ..اعطيهم من وقتك نص ساعه قرايه تفهم ايه الموضوع من اكتر من مصدر ارجوكم يا جماعه  خلينا نتغير ارجوكم وبلاش العلم البؤيئي والمهاجمه الغير مبرره والانسياق ببساطه ورا كل واحد يزعق ويجعر ويجعجع بكلمتين فارغين

وصدقونى انا لا عايزه الى يحكم مصر يطلع يقول انا ليبرالي ولا اسلامي ولا مسيحى ولا اي اتجاه معين من الاتجاهات
انا عايزه الى يحكم مصر يطلع يقول انا مصري ...انتمائي الاول مصري....ولائي الاول لوطني ..مصلحة وطني وشعبه فقط

عايزه رئيس جمهورية مصر العربيه  يكون بيمثل الاغلبيه الساحقه فى مصر ...الى هما مين ؟؟ الى عارف يرفع ايده  ميييييييييييييين..

الى هما ناس مصريين مالهومش اي انتماءات فكريه او معتقديه او سياسيه  ..ناس متدينين اه لكن مش متعصبين ...

غالبيه عظمى مسلمين ايوووه ...مسلمين بس مسلمين بلا اله الا الله محمد رسول الله ...وكتاب الله وسنة نبيه ..لا هما اخوان ولا هما سلف ولا جهاد ولا اي حاجه من دول

اه الناس دي موجوده .. وقد يكون بعضهم عدده كبير ...ولكن رغم انف الجميع تظل الغالبيه العظمي مش اي حد من دول
 وان شاء الله هاتفضل كده عشان هى دي فطرة وطبيعة الشعب المصري

ومصر دوله اسلاميه بشعبها غصب عن التخين فى الدنيا دي كلها ...بالماده التانيه او من غيرها ... افهموا بقى

كان فى حاجات وتعريفات تانيه كتير عايزه اتكلم عنها بس كفايه كده النهارده ونكمل المره الجايه ان شاء الله ان كان في عمر



الثلاثاء، 22 مارس، 2011

ماذا بعد ؟؟ ....يلا ورانا شغل كتير

زي ما قلتلكم البوست الى قبل الى فات ايا كانت نتيجة الاستفتاء فالمهم ان الاستفتاء حصل وورانا شغل كتير كتير

طبعا لكل الى بيتكلموا فى حوادث تزوير كلام مش حلو خالص وبيشكك فى النتيجه وفى نزاهة القضاء وده فى رايي مش صح اطلاقا لانه مافيش اصلا حاجه بتطلع بدون تحاوزات ميه فى الميه ده فى اكثر الدول تقدما وديموقراطيه بتحصل حوادث تزوير يعنى فخلينا نقول ان نسبة الخطا معقوله  حتى موضوع الدفتر ده مش دليل على حاجه زي ما انتشر رد القاضي الى قال انه الدفتر مش مهم وبيتسلم للشرطه  وما الى ذلك

التزوير الحقيقى الى حصل فى نظري هو تزوير فكرى  وده بعد الى حصل من السلفيه والاخوان والى انا حكيت عليه فى البوست الى فات واكتر منه كتير سمعته بعد كده من الناس الثقات فى محافظات تانيه غير الدقهليه

وما زلت مقتنعه ان الحزب الوطني كان يستغل جوع البطون اما الاخوان والسلف فهم استغلوا جوع العقول وفى الاثنين المواطن الغلبان مالوش يد فيه فقد كان مقموعا لعقود من الزمن

بس خلاص خلصنا بقى من الكلام التعبان ده وكفايه كده ولو كلامي مش عاجب السلف والاخوان فمش مهم ما يبقوش يقرولي تاني..مش عايزه صداع اكتر من كده

المهم
هانعمل ايه ؟؟؟ فكرتوا ؟؟؟

قبل كده اتكلمت عن الحزب سريعا .... عارفه ان كل واحد هينام ويقوم يقول جالي هتف فى المنام بيقولي اعمل حزب ..ما ينفعش الكلام ده لازم تحصل توعيه ان ده مش وقته لازم نوحد كلمتنا  تفتيت الاصوات مش فى صالحنا اطلاقا مطلقا

ارجوكم يا جماعه خلونا نعمل حزب بروح التحرير حزب مصري بسسسسسس مصري مالوش اي انتماءات ولا افكار تانيه فاهمنى ؟؟

خلينا نعمل حزب عنوانه شباب الثوره باي اسم بقى  خلى الناس تلتف حواليه
فاكرين لما جينا نبدا الثوره قلنا  ايه ؟؟ يوم 25 يناير  اطلعوا من العشوائيات وخلوا هتفاتكم بتقول رغيف العيش والبطاله والجواز وجايع الناس كلها مش هتفات بتقول اصلاح سياسي ولا بتنجان

وقد كان ...

وفى رايي هو ده سبب نجاح الثوره ان الشباب طلعوا اتكلموا بوجايع الشعب الحقيقيه

انا باطلب من ائتلاف الثوره الى مش عارفه صوتي يوصلهم ازاي ولا هما مين تحديدا  انهم يشكلوا حزب سريعاااا
حزب يبقى له مكان فى كل بلد فى مصر  شبكه قويه واثقه انكم تقدروا تحققوها وضموا لكم ناس لهم شعبيه فى  دوايرهم واختاروا متحدثينكم عشان تكسبوا قلوب الناس البسيطه

اتمنى ان الحزب ده يكون توجهه او اهدافه الاتي

الجعان يلاقي ياكل
المريض يلاقي علاج
العريان يلاقي ستره
الشريد يلاقي متوى
البطال يلاقي شغل
الشباب يلاقي جواز
الشعب يلاقي امان داخلي
وكل ده يحصل بكرامه للجميع
وعلى الصعيد الخارجي

بدون اي زحلقه فى الكلام
انا عايزه السياسه الخارجيه  ايا كانت شكلها تدينى حاجتين
اولا ضمان تنفيذ السياسه الداخليه السابق ذكرها
ثانيا  عودة مكانة مصر ومواطنيها  عربيا واسلاميا وافريقيا بل وعالميا ايضا


ده الى المفروض احنا محتاجينه الفتره الى جايه وعليه ارجوكم عايزه حزب يقول الكلام ده الهي يستركم توحيد فى الصفوف بالله عليكم زي ما كنتم فى التحرير كده بتقولوا هتافات واحده عايزه برضه اداء الحزب ده يبقى جماعي وكلمه واحده بتتقال فى اسكندريه تتسمع فى اسوان

ومرشح واحد لكم فى كل دايره من فضلكم عشان الاصوات تلتف حول شخصيه واحده واختاروا المرشحين بعنايه اوزن بميزان حساس بين الصلاحيه والكفاءه والقبول عند الناس ...القبول عند الناس مهم اووووووي فى المرحله دي وياريت تختاروا حد اصلا له قبوله فى منطقته وبعدين تضموه ومباديئكم لما تكون زي الى انا قلتها مش هايختلف عليها اثنين

فعلوا كلوا بنى ادم تقدروا توصلوله وواعملوا مؤتمرات مش فى القاعات المكيفه وانما فى الشوارع مع  الناس انزلوا الشارع وكلموا الناس
عايزه الحزب ده يبقى اعضاؤه مش اقل من مليون بنى ادم قبل دخول الانتخابات يا جماعه واظن احنا خرجنا ورا الشباب فى ميادين التحرير 13 مليون ياريت مليون منهم يؤمن فكر الحزب وينضلم ليه وانا منهم لو ان الحزب كانت هى دي مبادئه



نيجى لانتخابات الرئاسه
الحمد لله تعالى عندنا شخصيات محترمه اوي ناويه تترشح ... انا اميل كل الميل لاننا نخلي الرئيس يختار نائب له وينتخب معاه فى بطاقه واحده
بالتالي الشرفاء الى ناويين يرشحوا نفسهم ارجو منهم التنسيق مع بعض بحيث برضه نتفادى تفتيت الاصوات حيث اننا محتاجيت تكتيل الاصوات مش تفريقها على مرشحين كتير

عندنا 3 مناصب اهم من بعض   رئيس الجمهوريه  نائب رئيس الجمهوريه   رئيس الوزراء

بالتالي الناس  الى عايزه ترشح نفسها للرئاسه كلهم  لو نسقوا  مع بعض لما فيه مصلحة الوطن الى حاليا فى امس الحاجه لقلوب وطنيه بالمقام الاول ومش بيهمها اي مصالح او امجاد شخصيه  ونطلع من الهيصه دي كلها بمرشحين اثنين بس محترمين ومعاهم نائب ورئيس وزراء محترم برضه و ما يحصلش تفتيت اصوات ولا سيما ان نفس الى عملوا تكتل لا اخلاقي من وجهة نظري على كلمة نعم هايعملوا تكتل برضه وهايدوا صوتهم لشخص واحد فقط
يبقى عشان يكون فى توازن لازم يكون فى قصاده كمان شخص وراه تكتل مهم عشان نحقق توازن معقول فى القوى المطروحه فى الساحه وقتها

مش عارفه اقتراحاتي ممكن توصل ازاي لكن انا باقول والباقي على ربنا وعلى كل من بيقرا كلامي
يعنى بتهيئلي ده تصور اولي ومش عارفه قدت اوصلكم جزء من دماغي ولا لا
وطبعا يهمنى اوي اسمع منكم مقترحاتكم ما تبخلوش بيها عليا
يا شعب مصر العظيم من فضلكم صحصحوا  معانا ورانا شغل كتير اوي

تحياتي للجميع

السبت، 19 مارس، 2011

صوت الحريه بيناااادي

السلام عليكم

ايووووووووووه دي ايدى

انا ادليت بصوتي ..ايوه صوووووت والله صووووت عشت وشوفت اليوم ده يا ناااااس

الى ما نزلش ينزل حالا حالا حالا ..احساس جميل اوي

انا من ساعتها ماشيه فى الدنيا اقول  فى كل شارع فى بلااااااادي صوت الحريه بيناااااااادي

فرحانه اوي يا نااااااس الاقبال الى شوفته الى اللجان فظيع اقبال بصحيح ومافيش بلطجيه ومافيش منع تصوير ومافيش خناقات ومافيش اي حاجه الناس واقفه بصبر فظيع فى الطوابير

انا ما نمتش من امبارح غير ساعتين وقمت صليت الفجر وقعدت مش عارفه انام لحد ما جوزي جه ينزل قالي هانزل اروح مشوار واجيلك قلتله لااااااااااااا العب غيرها معااااااااااك لازقالك لحد ما تودينى ..ماهو مش راضي يودينى وحدي ... وقد كان لزقتله من الصبح لحد العصر لما وداني نيهاهاهاها .... مبسوطه اوي يا جدعاااااااان

المهم هاقولكم الى شوفته بقى النهارده سريعا

عديت على 3 لجان زحمه موت موت موت ... ناس كتير بس واقفين طوابير فى  الغالب عاملين طابور ستات وطابور  رجاله

فضلنا ندور على لجنه فاضيه شويه مافيش فى الاخر لقينا لجنه الستات فيها قليلين شويه فرضا قالي باقولك ايه ادخلي صوتي انتى عشان اخلص من زنك نيهاهاهاهاها

اللجنه الى انا صوت فيها كان منتشر فيها السلفيين مش عارفه ايه السر بس هما كانوا كتير

مستفزين لاقصى درجه بس حصل قدامي موقف بشع واحده واقف للستات الى داخلين يصوتوا كلهم تقولوهم قولوا نعم علموا على الدايره الخضرا فراحت واحده من الي واقفين قالتلها ما ينفعش كده كل واحد حر  اتكلمي عن نفسك بس ...تتخيلوا تعمل ايه ؟ الهانم المنتقبه ؟؟؟ راحت شايله ايدها ورازعاها قلم
ااااااه والله طبعا الناس حجزوا وكده وكان فى بره اثنين عساكر كده شرطه تدخلوا في الامر
الحقيقه انا ما شوفتش القلم بعينى لكن حماتي شافته وجوزي شافه وانا شوفت بقى الكلام مع العساكر

منتهى قلة الادب بجد الى هما بيعملوه ده

المهم دخلت اللجنه وصوت الناس الى فى اللجنه محترمين اوي الصناديق مقفوله الورق مختوم اللجنه فى قاضي بيتحققوا من الشخصيه فى ستاره بس ما حدش بيستعملها اوي كفايه الواحد ياخد جمب

كله تمام يعنى مافيش اي مشاكل

وانا خارجه بقىىىىىىىى  لقيت واحد تيييييييييييييييت  واقف يقول المنقبات يجوا على طول على باب ما يقفوش فى الطابور ؟؟؟!!!!  طبعا انا كنت خرجت من اللجنه خلاص ما ينفعش ارجعله بس قلت للناس ما تسكتولوش الراجل ده يعنى ايه المنقبات ما يقفوش فى الطابور منين الامتياز ده يا يهنى يا سيد امك انت  كان نفسي ارجعله بصراحه  بس الحرس مش بيدخل حد تاني

المهم هاقولكم الى سجلته النهارده
واحده قريبتى عمرها خمسه وستين سنه تقريبا  عفاكم الله مريضه بقالها سنين وقعيده على كرسي متحرك بل انها لا تستطيع الجلوس اكتر من دقائق هى دايما نايمه على ظهرها ..... عرفت النهارده انها راحت الاستفتاء رغم كل الصعوبات الى ممكن تقابلها فى ده بجد ....حلوين اوي

اختي راحت صوتت فى لجنه داخل المعهد الدينى بالمنصوره وده تابع للازهر طبعا ومن الحاجات الى لفتت نظرها هناك ان كان فى قسيس رايح يصوت فى اللجنه الى فى المعهد الدينى مع ان فى على بعد امتار لجنه تانيه  داخل مدرسه .....حلوين احنا اوي

السلف والاخوان ....اخس اوي اوي اوي ليه كده ؟؟؟

السلف هل اصبحتهم بما تفعلوه الان خلف للسلف الصالح فعلا ؟؟؟؟

الاخوان المسلمين.... تهانيا لكم فقدتك كل من كان يكن لكم احتراما او بعضه من العقلاء

الوطني  العبوا بعيد مستقبلكوا ضاع

الشعب المصري ...... تعظيم سلام للشعب المصري وكالعاده تكتب التاريخ على راي المحروس بتاع ايطاليا

مبروووووووووووك يا ناس مبروووووووووووك  طعم الحريه

فى كل شارع فى بلاااااااااااااادي         صوت الحريه بيناااااااااااادي



الجمعة، 18 مارس، 2011

(لا للتعديلات الدستوريه)



اخيرا وبعد حيره كبيره كبيره كبيره  استخرت ربنا واستقريت على انه لا للتعديلات الدستوريه

مش هاتكلم كتير فى موضوع قتل بحثا هاقول بعض نقط سريعه

اولا : دستة كتاكت نبشت فى دماغي لما قالت بس لما لقيت هذا الكولكشن الغريب ...اخوان سلف جهاد فلول الحزب الوطنى ....وكلهم اتجمعوا على كلمه واحده وبيقولوا نعم ؟؟؟!!!

نعم الله عليهم او مش مهم

ثانيا : الكلام المروج له والى من نوع لو قلنا لا هانرجع للدستور بدون تعديلات...او هاندخل فى نفق مظلم ...او هاتعلن الاحكام العرفيه ؟؟؟!!! ايه البتنجان ده ...هو احنا عيال هاتخوفونا بابو رجل مسلوخه ما تتكلموا كلام عاقلين بقى

ثالثا: لما قريت مواد الدستور المعدله مع انى ماليش خبره حسيت ان فيها ثغرات وسالت ناس لهم خبره شويه فى القوانين واكدولي ظنوني

رابعا : والى خلاني حسمت الامر ان بعد البحث لقيت ان نعم هاتدي شرعية للدستور المرقع وتنزع مننا احنا كشعب الشرعيه الثوريه..اما لو قلنا لا هايكون الاعلان الدستوري  غصب عنهم مؤقت لانه ما اخدش شرعيه باستفتاء  شعبي وايا يكن ان كنت  اعلم ان حل هو الخاطيء وحل  لااعلمه جيدا اختار الخاطيء؟؟ باي منطق ؟؟

خامسا : انا الداعيين الى نعم بدعوى  الاستقرار ..هم غالبا نفسهم الداعين الى وقف الثوره واخلاء التحرير لنفس السبب ..الاستقرار والخوف من الفوضى

سادسا : لا اصدقهم فى ادعاء شيوع  الفوضى باختيار لا ..وعدونا بالفوضى والفراغ الدستوري بدون مبارك ...واصرينا وازحناه عنا ..وعدونا بالفوضى لو اقيلت وزارة شفيق ... وما عبرناهومش واتشال وابدلنا  الله خير منه ....وعدونا بالفوضى لو حل جهاز امن الدوله ... وحل واصبح وجودهم غير شرعي ولسه زي ما احنا ما جرلناش حاجه

بالتالي لما يوعدوني بالفوضى لما اقول لا مطلوب منى اصدقعهم ليه ؟؟!!! برضه ابو رجل مسلوخه ؟؟؟

سابعا : وصلت الى قمة القرف من جميع الاتجاهات الى استخدمت الدين لتحقيق مكاسب سياسيه والتاثير على الناس وان قول نعم واجب شرعي ... ايه القرف ده مش هاتحترموا عقول الناس بقى
وتخويف الناس بررررضه بالغاء الماده التانيه من الدستور ..برضه ابو رجله مسلوخه ... مع ان حتى لو قلنا نعم الدستور المؤقت مفروض هايتلغى وهانعمل غيره ولو فى نيه تتشال هاتتشال ...مسخره
ثامنا : ناس سياسيين انا بارتاح لرايهم ولضمائرهم رايهم لا من البدايه هما حسموا امرهم لكن انا حسمت امري امبارح بس ...وطبعا لو جد جديد مستعده اغير رايي ولو كنت قدام الصندوق ..بس لو جد جديد

بس كده خلاص  ده ملخص سريع للى فكرت فيه فى الكام يوم الى فاتوا

والى كل من يختلف معايا ويقول نعم وفى نفس الوقت يحترم كلامي يا اهلاااا وسهلا بك والمهم نقول راينا

والى كل من يختلف معايا ويتريق على رايي او يتساخف عليا ... اعرف على طول انه لمؤخذه اهبل

سواء ان كان نتيجة الاستفتاء بنعم او لا

اعزائي شباب الثوره مطلوب مننا عمل عمل عمل ...نشاط سياسي وانتشار سياسي وتواجد قوي

امنية حياتي تكوين حزب سياسي معتدل ينتسب لشباب الثوره الحقيقيين ويكون هدفه الاساسي فى المرحله القادمه
الجعان ياكل ...المريض يتعالج ....العريان يلبس ... الشريد يلاقي متوى... الناس تتعلم ...الشباب يتجوز


ومع كل ده علاقات خارجيه محترمه تعمل لصالح الوطن ....فقط لصالح الوطن

مش عايزه يكون له اي انتماءات سياسيه ولا دينيه ولا اي هباب بسسسسسسس يكون كده

الشعب المصري كله كده مالوش انتماء سياسي  محدد وعليه كل الاحزاب والتيارات الى على الساحه لا يمثلوا القاعده العريضه من الشعب المصري

يلاااا بقى خلينا نشوف الى ورانا وبطلوا كلام فى لا ونعم  خلصنا

الأحد، 13 مارس، 2011

دستور يا اخوانا

السلام عليكم

طبعا الان الوضع غير مستقر تماما وانا قلقاااانه اوي اوي بس يعنى عندي امل فى ربنا كبير ربنا ينتعنا بالسلامه

عايزه اتكلم معاكم النهارده عن الدستور بس قبل كلامنا عن الدستور عندي كلمتين عايزه اقولهم لكم بخصوص الجيش

الناس محتاره من اول يوم فى الثوره ..يا ترى الجيش معانا ولا علينا ولا عايز ايه بالظبط
الحقيقه انا حاليا عندى يقين ان الجيش زي الشعب بالظبط ناس منهم مقتنعين جدا بالثوره وناس لا

الناس الى مش مقتنعين فريقين  ..فريق فاسد ومستنفع بالفساد الى فات ..وفريق تاني شايف انها ثوره عيال او انها هاتخرب البلد ...يعنى نفس موقف الشعب
ولكن...
انا برضه حالهم حال الشعب الجزء المقتنع بالثوره وعايز يحميها اكتر واكبر واقوى
حتى لو كان جزء من قيادات الجيش مش معانا وانما عارفين كويس ان الظابط الى هايكون على ارض المعركه مش هايكون معاهم

طيب نعمل معاهم ايه ؟؟ من وجهة نظري المتواضعه بقى يا شباب .

احنا عملنا ثوره ..المفروض ان الثوره هلى الى تحكم البلد دلوقتي لانهم هما الشرعيه الوحيده دلوقتي فى البلد
الجيش بقى ما ينفعناش ...اه لانه محايد ..ينفعنا فى حماية البلد عموما انما يحكم لا ..احنا دلوقتي عايزين حكم متحييييز للثوره  ...اه متحيز للثوره حقنا يا جدعان احنا مش عملنا ثوره ولا كنا بنلعب استغمايه فى التحرير

بالتالي الحل دلوقتي الى شايفاه مناسب هو مجلس رئاسي من اثنين مدنيين وواحد  عسكري
هنختاره زي ما حصل مع عصام شرف نقدم اقتراحات ويختاروا منها الشرفاء والكفاءات كتير كتيركتير

لما يكون عندنا مجلس رئاسي بقى متحيز  للثوره ويعمل  لنا الى احنا عايزينه وما يخضعش لاي ضغوط من اي نوع وما يكون مداس على رجله ولا على راسه بطحه لاي حد خصوصا من فلول النظام القديم

ساعتها بقى نبقى فضينا وعندنا وقت وعندنا دماغ نفكر فى موضوع الدستور ...مستقبل مصر الحقيقى

الدستور

انا كنت قعدت افكر فى موضوع التعديلات وكنت كتبت بوست بالفعل عن التعديلات وما كنتش عارفه اكون راي فيها وقلت اسمع منكم وتسمعوا مني لكن جدت ظروف واتاجل البوست واتغيرت الافكار فقلت نبدا من جديد

التعديلات المطروحه  الى احنا المفروض هانستفتى عليها يوم 19 مارس ..نعم ؟؟؟ ازاي ؟؟ طب هى فين يا معلمي ؟؟  لحد الان مافيش بيان رسمي بنص المواد المعدله ؟؟؟!!! انا قريت وسمعت اكتر من حاجه وفيهم اختلافات طب مين صح


طيب اقول الى لاحظته

اولا  مجلس الشعب ..ما جابوش سيرة ال 50% فلاحين ولا مقاعد المرأه ولا كل  هذا الهبل ..طب ايه ؟؟
هما دول الى هايختاروا اللجنه التاسيسيه ؟؟!!  والمرشحين للرياسه وكل ده ؟؟ طب  ازاي؟؟

ثانيا : دى بقى نقطه شوفتها مختلفه فى حاجتين او مره نشرت التعديلات فى جرائد قالوا ان الطعون على عضوية مجلس الشعب تكون امام محكمة النقض ..ده كويس ...لكن فى المؤتمر الصحفي لطارق البشري قال المحكمه الدستوريه والحكم نهائي لا يجوز الطعن عليه  .. دى مش حلوه ...ليه ؟؟ ما ياخدش درجتين ليه نقض ودستوريه مثلااااا ؟؟

ثالثا :سلطات رئيس الجمهوريه ما حدش  جه ناحيتها اوي برضه غير 3 نقط ابرام المعاهدات واعلان الطواريء وتعديل الدستور !!!

رابعا :الاحزاب ؟؟!!! ايه هايبقوا ازاي مين فين ...امال هانعمل انتخابات بمين ؟؟ الوطني والاخوان ..وشوية الكتاكيت الى على الساحه ؟؟؟  ده يبقى استهبال


خامسا : السيناريو المطروح  والى بيقول نعمل انتخابات برلمانيه بعد شهرين ؟؟!! نعم طب مين وازاي وفين

لعلمكم هو ممكن بس هاتبقى اميشن امبوسيبل محتاجه مننا نعمل بهلونات عشان نقنع الناس المحترمين فى كل الدواير انهم يترشحوا ..لان دلوقتي الى موجودين على الساحه هما الحزب الوطني اه طبعا لسه موجودين بقرفهم وبلطجياتهم  وسلطاتهم كلها .....والاخوان .. انا ما باتعاملش مع الاخوان على انهم بعبع لا ..بس برضه مش عايزاهم يبقوا هما اغلبية المجلس ولا حتى ثلث المجلس .. وده مش لراي شخصي او مصلحه شخصيه وانما المفروض كده اصلا مايكونش فى اتجاه معين هو الى مسيطر الفتره الجايه فقط لانه مافيش غيره  .

سادسا : المحافظين ونظام الحكم المحلي ...نعم ؟؟؟ ايه عايز تسيب العصابه دي فى البلد واحنا بنشتغل فى دستور والانتخابات والجو ده ؟؟؟ ده لا ممكن ابدااااااااا

سابعا : بالنسبه للماده الخاصه باشتراط الجنسيه المصريه وعدم حمل غيرها حتى سابقا ولا هو ولا مراته ولا ابويه.....انا شايفاها شروط صعبه اوي ...بس بيرن فى دماغي كلمة طارق البشري لما قال احنا بنطبق الشروط دي على ظابط بدبورتين فى الجيش ..ورئيس ا لجمهوريه ده هايبقى القائد الاعلى للقوات المسلحه ..ما يبقاش عليه الشروط دي ؟؟!!!
حقيقى لسه محتاره فيها النقطه دي 
                                                              
كمان حكاية الحكم يكون برلماني ولا رئاسي ما اعتقدش هاتفرق كتير اوي لو كان سلطات الرئيس محجمه ويبقى حكم ديموقراطي فعلا مش بتنجاني زي الى احنا كنا فيه


طيب انا دلوقتي واقفه اشد فى شعري فى النص لانى مش عارفه اقرر
لكن فى قدامي صوره مش عارفه هى هاتكون صح ولا لا
لكن اعتقد انها هاتكون مناسبه ....وطبعا عايزه اسمع رايكم

نستعرضها كده ونشوف:

اولا: زي ما قلت فوق مجلس رئاسي ويتفضل الجيش ومتشكرين لحد كده ومش يخلينا نتسرع عشان هو مش فاضي يقعد لنا...والمجلس الرئاسي مع الحكومه الى موجوده دلوقتي يسيطروا على البلد ويمشوها وينقذوا البلد اقتصاديا وهاتمشي فل والله

ثانيا : تجميد عمل الحزب الوطني ..وحرمان اعضاؤه من العمل السياسي والانتخابات جمعاء  لمده من خمس لعشر سنين ...كفايه الى عمله  فينا 

ثالثا : فتح الباب لتكوين الاحزاب ..عشان يبقى فى مناخ سياسي يسمح باقامة انتخابات محترمه ومجلس شعب محترم يمثل الشعب بصحيح

رابعا : الحكومه والمجلس الرئاسي  يختاروا اللجنه التاسيسيه الى هاتحط دستور جديد نوووفي على الزيرو عشان زهقنا المستعمل المرقع يا ريت ...على راحتنا بقى ما البلد ماشيه والناس بتاكل مم والتنميه عادي والاقتصاد عااادي
والدستور لما يتكتب ينزل رسمياااا مكتوب بصياغته الاساسيه ونتناقش فيه لمدة شهرنقطعه من غيرما يكون  فى امن دوله يعملنا حوادث وفتن عشان نتلهي فيها عن الكلام فى الدستور ...وبعدين نصوت على الدستور وطبعا كان بودي اننا نصوت على المواد ماده ماده ..بس مش عارفه ايه صعوبة موقف زي ده فى الحاله الى احنا فيها دي

خامسا :الانتخابات الرئاسيه  بقى وتكون حسب الدستور الجديد ونقعد برضه شهرين ثلاثه نقلب فى المترشحين ونسمعهم ويسمعونا ونقرر برااااحتنا ..وبعقلنا مش بقلبنا نبطل نستدعي خالتي عواطف بقى فى الامور السياسيه الى زي دي ..وبعد ما نختار  الرئيس  نقوله يلا يا حلو ظبط نفسك  بقى واختار نائب ورئيس وزراء  وشكلوا الوزاره 

وسادسا : ونكون ساعتها بدأنا فى ترشيحات مجلس الشعب ..ونكون بقى اتنصحنا والناس اتنفست الحريه وبقى فى احزاب حره .ومستقلين محترمين ...والاقي واحد مرشح نفسه محترم بقى من نفسي بدون اي اتجاهات ولا اي مطامع غير خدمة الوطن والمجتمع ياااااااااارب بقى

 وخلال ما كل ده بيحصل .ولحد ما  الوزاره الجديده تحلف اليمين قدام رئيس الجمهوريه المنتخب .....والى اتخيل انه ممكن ياخد مننا سنه ..اه عادي ورانا ايه يعنى

تكون بقى الدنيا  ماشيه ...اه وزاره شرف تشوف شغلها صح ...تحاسب كل المخطئين وتصلح  الى انكسر وتجيب حقوقنا الى اتنهبت وتعمل تنفس صناعي للاقتصاد بتاعنا .. والاوضاع الخارجيه المنيله فى المنطقه
وتنفس صناعي للاحوال الداخليه اجمع بداية من لقمة العيش لحد الفتنه الطائفيه

وعملية استئصال داخل جهاز الشرطه لا بديل ولا فكاك منها ..وعملية مسح باستيكه لجهاز امن الدوله الفااااسد


وطبعا لان الدستور الجديد هاحقق احلامي .. اه وهايبقى  عندنا محافظين منتخبين ومجالس محليه منتخبه وحكم محلي حقيقى ..
وانتخابات نقابيه حره وانتخابات مجالس ادارات حره وانتخابات لرؤساء الجامعات والعمداء حررررره

كل ده بقى يتعمل تباعا ... ونفضل كده نرتب ونوضب فى البلد لحد ما تبقى تمام نبدا نشم نفسنا بقىىىىىىىىىىىىىىىىىىىىى

 يهمنى اوي اسمع رايكم

انتم عارفين انا مش متخصصه انا بس باتصور واتخيل ازاي ممكن الدنيا تمشي
متاكده ان فى منكم ناس متخصصه وتعلم اكتر مني عايزه اسمع رايكم اوي عشان اقدر اكون راي ونساعد بعض كلنا فى ده

اسفه لانى طولت عليكم بس يعنى الامرجد خطير(حلوه جد خطير دي اوي )

يلا عايزه اراااااااائكم ما حدش يكسل

الاثنين، 7 مارس، 2011

امن الدوله

فى الحقيقه انا لما باكون متعصبه اوي مش باعرف اكتب فى المدونه
جايز اهيص على الفيس بوك اصوت واعيط على تويتر  انما ما اعرفش اكتب فى المدونه مش عارفه ليه
جايز لانى باحب اكتب فى المدونه  بعقلي اكتر

وبحاول  كمان ما اكتبش والاحداث سخنه حيث ان بيكون لسه الامور ما اتضحتش

امن الدوله

من زمان وانا عارفه ومتاكده انهم اساس الفساد وانهم دوله لوحدهم وانهم بكل تاكيد اعداء الشعب الاوائل

وايام الثوره كل مصيبه كنت باشم فيها ريحة امن الدوله ..الى انا باعتبرهم كلاب النظام ربوه عشان يسيبوه على الشعب لكن الحقيقه الكلب كبير لدرجة ان صاحبه كان بيخاف منه ويعمله حساب

يوم سقوط وزارة شفيق قلت الدوووور يا ناس على امن الدوله مش هانعرف نعمل حاجه من غير ما ينتهي ده

بس عرفت ان شباب التحرير قرروا يكون الاسبوع ده مطلبه المحاكمات ...ما عجبنيش الكلام اوي رغم اهمية المحاكمات طبعا  عشان التجميدات للناس دي عشان البورصه لو فتحت اصولنا ما تتبعش لاجانب بتراب الفلوس

لكن برضه امن الدوله كان واجعني ونفسي نخلص منه عشان المكائد الى شغاله ضدنا دي تتوقف على الاقل

المهم سبحان الله بمجرد اعلان اقالة شفيق حسبى الله ونعم الوكيل اترعبوا هما وبدأوا فى الحرق والفرم وده الى اثار الناس وبدأت باسكندريه وانتهت بلاظوغلي

الحقيقه انا كنت سعيده جداااااااا فى اليوم ده كنت شايفه رمز للفساد بينهار ايا تكن النتائج والاسباب  فالجهاز طبعا بينهار بعد المقرات فعلا كانت مفجاه لهم لكن بعد كده كان فى توقع وكانوا مستعدين وفارمين وحارقين ومفضيين المقر من المعتقلين كمان وسايبين المقر بشوية مستندات هبله ودخلوا مخابئهم كلهم فى انتظار الفرصه للخروج تاني من وجهة نظري
لكن ده كله ما يمنعش انى فرحانه انهم خافوا مننا  على الاقل ...لكن متاكده ان كل واحد فيهم شايل شوية مستندات تنفع للضغط على شخصيات معينه ومعتبرها سلاحه ..ومتاكده انهم قد يكون لهم خطه للعوده والانتقام بشكل او باخر
لانى مقتنعه انهم اشخاص متجردين من انسانيتهم  كا لهم سلطات غير محدوده جردوا منها وهايحكموا من منطقهم ان الشعب هاينتق منهم بالتالي هايفكروا ينتقموا هما ...من العبيد الى ثاروا عليهم طبعا  احنا يعنى

لكن برضه دي خطوه كان لا بد منها ..محتاجين تحركات سريعه يا ناس ما ينفعش البطيء ده ..مش كان يبقى احسن لو كان الى حصل اول امبارح ده حصل من شهر فات ؟؟ كنا هنفاجئهم كنا هانستريح منهم فى مراحل الثوره ....فلو سمحتم يا مسؤلين عايزين تحرك اسرع ..تحقيقات  وجهاز قضائي قوي وسريع ..وجهاز شرطه صاحي وشريف وقوي

المستندات ... الحقيقه ما اقدرش اقول للناس لا تلهثوا وراءها هو كان فى حد يتخيل الى بيحصل ده ؟؟ دي مصر كلها لها ملفات يا جدعان .. ده انا كان نفسي اروح امن الدوله هنا فى المنصوره عشان اجيب ملفي ..اه اكي ليا ملف طبعا هو انا قليله ولا ايه J

طبعا انا مش مع  تداول المستندات دي مع اشخاص ..متخيلين المستندات الى فيها مثلا تقارير عن شخصك وتليفوناتك وتحركات واسرارك كلها  تقع فى ايد حد ممكن يستغلها ضدك ...هو مستند مصر كلها بقى ممكن يقع فى ايد مين ما نعرفش
كمان هما سابولنا الملفات الى تعمل قلق بس مش الى تفضحهم هما بلاوي اسود بكتير من الى احنا بنلعب بيها دي
يعنى فلان كان على علاقه بفلان والفنانه الفلانيه اتجوزت فلان فى السر وفلان كان متعاون وفلان كان موالي لنا وبيكتب تقارير فى اصحابه ..وهكذااا

هاديلكم مثال : حد على تويتر قال  انا معايا دلوقتي تقرير بيقول ان فى علاقه بين زوجة مسؤل ومش عارف اعلامي ولا ايه كده  ومحتار انشر ولا ما انشرش
الاجابه ببساطه ..ما تنشرش طبعا ...لان  حياة ناس على المحك
وما ينفعش نعتمد على تقارير بيكتبها افسد الفاسدين فى البلد
فقد يكتب بعضهم تقارير غير صحيحه لانتقام شخصي او لتحقيق اغراض ومنافع شخصيه
دول طغاه فاسدين
متخيل المخبر ولا الظابط ولا الامين الى بيشتغل فى امن الدوله ده وساكت على البلاوي الى فيها تكون اخلاقه ايه ؟؟
بالتالي ما ينفعش نفكر كده وما ينفعش ننساق لكده

عموما ياريت صوت العقل بقى يتغلب ونبدا نفوق من نشوة حل امن الدوله ونفكر بقى فى المهم فى الى جاي

طبعا وعلى راسهم التعديلات الدستوريه ..من فضلكم اقراوا فى الموضوع ده وافهموا التعديلات دي حقا   وتبعيتها عشان تقدروا تصوتوا عليها لما يحصل الاستفتاء نكون جاهزين براينا
بقالي كام يوم عايزه اكمل موضوعي عن التعديلات الدستوريه وانزله بس مش لاحقه من الاحداث عموما ان شاء الله فى اقرب فرصه

كمان من فضلكم وللامانه الى معاه مستندات وملفات اخدها من اي مكان ياريت يسلمها للجهات المسؤله ايا كانت اهمية المستندات دي من عدمها ..ونسيب الناس تشوف شغلها ونتمنى انهم يكونوا على قدر ثقتنا فيهم

كلمة اخيره للناس الى كل شويه مش عارفين يحددوا الجيش مع الشعب ولا مش مع الشعب

عايزه اقولكم  ثلاث حاجات تفهموها كويس :

1.    الجيش مافيش حد تاني دلوقتي هو ممكن يكون معا ه اصلا ولا اتخيل طمعهم فى الحكم لو كان كده كانوا شقطوه من زمان

2.    وكمان حاجه ايا كانت نزاهة القياده في القوات المسلحه لحد فين الا ان  يبقى غبي لو فكر يعادي الشعب لان الى هاحصل هانبقى زي ليبيا كده مثلا الكتائب هاتفضل تنشق وتلتحق بالشعب لان اساسا الجيش جزء من الشعب

3.    احنا مافيش قدامنا دلوقتي اي خيار غير اننا نثق فى الجيش بس مش ثقه عمياء وانما ثقه مفتحه ..لان ببساطه مافيش قوه غيره متماسكه فى مصر غير الجيش .. ولو ما كناش ناخده لصفنا هايبقى فى مواجهتنا فالموجود دلوقتي فى رايي افضل الخيارات المتاحه

نهدا شويه يا جماعه ونركززززززز عشان هانقرر مصيرنا فى خلال ايام

الى اللقاء ان شاء الله فى التعديلات الدستوريه