الخميس، 29 أبريل، 2010

ليـــــــه ؟؟ هاه ؟؟ ليه ؟؟؟

تصدقوا رغم انكم اندال وما حدش سأل عليا  الا انكم وحشتوني جدا

الواحد نفسه حلوه والله
هههههههههههههههههههههههه

لا لا باهزر طبعا فى ناس سألت  عليا على الميل والتليفون وعلى المدونه كمان  ومتشكره لهم

وطبعا انا كنت متغيبه عن المدونه وعن متابعة الحبايب عشان كان عندي كمية احداث مختلفه ومتلاحقه
الحمد لله اغلبها احداث حلوه الحمد لله

المهم
باعلن اسفي على انى نكدت عليكم البوست الى فات ونكشت على الموجع والله يا جدعان ما كانش قصدي . كل الحكايه الواحد اوقات بيطلع قدامه مواقف وحاجات ما بيقدرش يعديها

اه وعلى فكره فى حد عبيط  اهبل سألنى هو انتى صاحبة القصه ؟؟  بذمتكم انا عايزه ذمتكم صاحبة القصه دي شبهي حتى ؟؟
البنيه بتقول فى الاربعينات ( انا 18 سنه يا غجر قلتلكم ) وبعدين هى بتشتغل  انا خالي شغل  على راي ستيته  الانسان مش بيعيش حياته بس وانما بيعيش حيوات كتيره حواليه  ( تقريبا كانت كاتبه كده مش فاكره النص )

المهم يعنى حاولت بكل الطرق اكتبلكم حاجه فرفشه نعنشه كده ما عرفتش  دماغي مش جايبه والله
دورت فى دفاتري القديمه لقتنى هاغمكم اكتررررررررر  او هانشر حاجه تجبلي وجع الدماغ اكترررررررررررر

قلت اجي ارغي واكل دماغكم حبه

بصراحه عندي كام سؤال عمالين يلفوا فوق راسي زي الى كان بيجى فى توم وجيري زمان ده

اولهم والى سألته على الفيس بوك والناس جاوبوا كما توقعت :

هو احنا بنروح مدارس وجامعات وكلام من ده ؟؟؟ هاه ليه ؟؟؟

طبعا زي ما حصل على الفيس هالاقي الى بيقول عشان اخد شهاده والى بيقول عشان اشتغل والى بتقول عشان اتجوز واحد عليه القيمه

والى واخد الامور بسخريه وبيقولك عشان اقعد على القهوه  او عشان اقعد خاليه شغل كده

والى بيقول منظره كدابه

المهم كان نفسي حد واحد بس يوحد ربنا ويقول بنروح المدرسه والجامعه عشان نتعلم

أي والله نتعلم ... لان من وجهة نظري الى على ادها  ان التعلم فى حد ذاته هدف

غير بقى الشغل والجوازه والمنظر والمركز الاجتماعي   كل ده حلو وجميل بس مش هو الهدف الاول


السؤال التاني :
ليييييييه البنات دلوقتي  بيرقصوا رقصات غريبه ويعملوا حركات اعجب على اساس انهم بيرقصوا بالمطاوي ويغنوا اغنية شربت حجرين عا الشيشه باين ولا اسمها ايه

والشباب هما الى بقوا بيرقصوا بوسطهم ؟
تفتكروا ليه هاه ؟؟ ليه ؟؟


طيب السؤال التالت :
ده انا داخل عليا مود الامتحانات خالص  وخلوا باكلم كلهم اجباري مش عايزه استعباط

ليه فى ناس كتير اوي شايفاني صح  وناس كتير  اوي برضه شايفاني غلط  طب اصدقهم ولا اطنش الاثنين  واصدق نفسي ؟؟؟


السؤال الرابع :
هانفضل لحد امته فى ام البلد دي الى يفكر يمشي صح هو الى يطلع عين اهله ؟؟؟

ابسط الامثله والى تاعبه نفسيتى اليومين دول

انا قررت  اخرج من دايرة الدروس الخصوصيه  وما اطلعش ولادي مدمنين عليها زي باقي الجيل وقلتلهم اعتمدوا على المدرسه وانا كنت باذاكر لهم  رغم صعوبة ده عليا لانهم فى مدارس لغات وانا تعليمى عربي
بس قلت مش مشكله ادينى هاتعلم معااااااهم وبذاكر وحياتي عندكم زي زيهم وزياده

قوم ولاد التيت فى المدرسه  ما يكملوش المناهج ويقعدوهم فى البيت وكمان الحبه الى اخدوهم اخر كروته واستهبال رسمي وانا حاليا طالع عين اهلي باذاكر وادرس للاثنين وايام الامتحانات واكتر من نص المناهج  العيال ما يعرفوش عنها حاجه عشان خدوهم فى اخر عشر ايام وفى حاجات ما اخدوهاش اصلا

اعمل ايه انا فى البلد دي ؟؟؟ اطفش منها ؟؟؟   طب مش طفشانه وقاعده على قلبكم هنا يا انا يا انتم


السؤال الخامس :
الحرب الشعواء على المنتوجات الصينيه بصحيح يعنى عشان مصلحة الشعب وعشان الالعاب المضره للاطفال والحاجات المغشوشه   ولا عشان  ماما امريكا قالت  كده  كلنا نقول امين وراها

مش قادره ابلع حكاية مصلحة الشعب والالعاب المصنعه من الرسايكل وكده يعنى   خااااالص   طب يعنى الاولى نشوف  ماية المجاري الى الشعب بيشربها
بلاش مجاري مافيش مجاري يا كلاب يا بتوع الاشاعات
لعب الاطفال المصري حد يخطف رجله لاي مصنع لعب اطفال فى مصر ويسأله جايب البلاستك منين
مش عايزه استهبال على فكره يا بلد


السؤال السادس : هو انا ليه  غالبا كل لما اشوف برنامج حواري فى التليفزيون فى الاونه الاخير استحمر المذيعه والضيف بشكل فظيع واحس انهم بيستهبلوا وبيحاولوا يستعبطونا واصلا مش فاهمين حاجه وبيمثلوا
ليه هاه ؟؟ ليه ؟؟


السؤال السابع : هو ليه اغلب المتجوزين بيلعنوا فى الجواز وايامه ومع ذلك عايزين اخواتهم وولادهم يتجوزوا ؟؟
ما يرسوا على بر هو خير ولا شر  ؟؟

حلوه دي تنفع اغنيه


وكفايه كده اسأله عليكم عشان انا زهقتلكم بصراحه
اتفضلوا كل  واحد يكتب اسمه على ورقة الاجابه وما حدش يكتب بقلم الوان
والى هايبص فى ورقة الى جنبه هاعلم على ورقته

الجمعة، 16 أبريل، 2010

بدون كوب ماء

بدأ يومها كالعاده بجرس التنبيه المعتاد

فتحت عيونها بصعوبه لتطفيء الصوت نظرت حولها تتبين معالم المكان ثم تمتمت (أصبحنا واصبح الملك لله )

وغادرت فراشها ببطيء وهدوء وبعض الكسل

واهتمت بشؤن البيت والاولاد والزوج بهمه ونشاط وفتور فى أن واحد

ثم ذهبت  الى عملها  لتبدأ المعركه فى ساحه  اخرى بنفس الهمه ونفس الفتور

فتور نفسي هى تشعر انها تفعل كل شيء وفى نفس الوقت فهي لا تفعل شيء

قلبها؟
لا تعرف  كان ينبض ..... ولكن هى لا تعلم ماباله هو الاخر اصبح ينبض كمن فى بيات شتوي بالكاد ينبض

اما زوجها فهو الاخر على نفس الحال غير انه يمر بحالات عنيفه من التمرد  تنتهي دايما بعبارة منها (مطلوب مني ايه اعمله ؟؟)

 يشعران الوحده وهما الى جانب بعضهما ووسط ابنائهم واهليهم

حقا هى لا تدري ماهو المطلوب منها ولا حتى منه

قد تصب اعتراضاتها على أي شيء يفعله الزوج او لا يفعله حتى ولكن فى الحقيقه ليس هذا هو السبب  فما السبب ؟ لا تعرف

فد يصب غضبه وثوراته ايضا على ما تفعله هى او ما لا تفعله ولكن ايضا  بعد كل مشكله يوقن انه كان ممكن الا تحدث المشكله اصلا وليس سبب المشكله هو سبب ثورته الحقيقيه
فما هو السبب الحقيقى ؟؟ لا يعرف


اصبحا الاثنين عازفين عن بعضهما عن سعادتهما
بالاحرى عازفين عن الحياه
ولكن يحيووووها  فقط بلا حياه


هل حقا لا يدرون المشكله اين ؟

قد ينظر اليهم البعض قائلين (احمدوا ربنا ) وعيشوا

وبالفعل هم كاسره لديهم الكثير وهذا ما يجعل البيت قائما رغم كل شيء

قد يسألون انفسهم هل  العقد الرابع يحمل فى طياته حياه فاتره بطبعه ؟


ماذا يفعلون ؟
هل يرضون ويعشيون وتمر ايامهم وحسبهم عند ربهم ؟؟؟؟

بل ان الامر يستحق ان يقفوا وجها لوجه باحثين عن مشكلتهم الحقيقيه ومحاولين حلها
ومحاولين  ان يحيوا حياتهم  لا ان يجبرون انفسهم على بلعها حتى بدون كوب ماء  ؟؟؟؟

( ان علمت انه يتبقى لك فى العمر اياما معدوده فارجوك احرص على انت تحياهم دون الم على الاقل )

قال رسول الله صلى الله عليه وسلم : اعمل لدنياك كأنك تعيش ابدا واعمل لاخرتك كأنك تموت غدا
صدق رسول الله صلى  الله عليه وسلم

الأحد، 11 أبريل، 2010

انا جييييييييييييييييييييت ودهنت البيت

السلاااااااام عليكم
وحشتوني وحشتوني وحشتوني ( ورده  دي يا اخواتي ولا ايه )

بجد وحشتوني ووحشنى الكتابه موت موت

طبعا انا خلصت الشقه اينعم  ولكن مش خالص مالص يعنى

لسه فى كام شباك كده بس انا مطنشاهم دلوقتي  ولسه الفرش والترتيب بقى وما ادراكم ماهو

ولكن كل ده مش مهم

المهم انى تخلصت من علب  البويا فى الشقه ونضفت الشقه

وحاليا كل ازاز الشباك راكب  وممكن على بالليل يكون عندنا سراير مفروشه
واجيب العيال من عند  ماما بهدومهم وكتبهم وبابا غنوجاتهم

اه والله تخيلوا بعد العذاب والضنا

بعد البوست الى قبل الى فات الناس سألوني على  الميل ايه ده انتم بتدهنوا الشقه باديكم ؟؟؟؟؟!!!!!

وقلت اريحكم بقى واقولكم اينعم

انا ورضا ومعانا ربنا يا اخويا الى عملنا الشقه  كلها من الالف للياء

واخدنا القرار ده فجأه كده واحنا قاعدين نقول فلان بيقول يعرف واحد كويس طب هايخلص فى اد ايه
ولانى من سنتين تقريبا ممرت بتجربة مريره فى دهان شقة ماما والنقاشين الى عذبونا وطلعوا روحنا

واغلب الايام كانوا يجوا ثلاثتهم  على معاد الغدا يتغدوا ويشتغلوا ساعه ويروحوا
اماااااااال
انا الى كنت باطبخ لهم وذلك لان بابا قال (يعنى ابقى واقف معاهم واسيبهم واطلع اتغدى انا وهما قاعدين) قلتله لا طبعا ابسلوووتلي ودي تيجى

طب اليكم بقى الحاجات الى انا اتعلمتها من المفاضله بين التجربتين

فى حال انت بتدهن شقتك بنفسك هاتروح تشتري البويا الى على مزاجك  من المحل الى على مزاجك وتدربها كمبيوتر وتطلع نفس اللون الى انت عايزه
ولو جايب نقاش هايقنعك تجيب من المحل الى بيديه عموله ويقنعك انه يدربلك هو يدوي لان التاني غالي ويطلعلك فى الغالب اللون غير الى انت عايزه  ويحاول يقنعك به ومافيش قدامك غير حلين يا تحميه بجردل البويا الى بوظ لونها يا ترضى بالامر الواقع

لو انت الى بتدهن شقتك بايدك ت الى هاتدهن وانت الى هاتفضي الشقه وتشيل وتحط لما يطلع عينك وانت الى هاتفرش وانت الى هاتشتري الحاجه  هاتتبهدل من الاخر 

لو انت جايب نقاش انت الى هاتشيل وتحط وتفك وتركب وتحتاس وهو هايدهن بس طبعا حتى لو قالك ان هو الى هايعمل واهم انت بترسى عليك فى الاخر

لو  انت الى بتدهن شقتك هاتدهنها بلقمتك يا ضنايا يا اخويا 
انما لو جايب نقاش هياخد اجر طبعا ولو  كان ذمته خربانه هايسرقك لما يشبعك

لو انت الى بتدهن ممكن جدا مراتك تقولك ايه ده الجدار ده وحش  عايز وش تاني وانت يا عينى تقولها اه والله باقول كده برضه
اه بقى لو النقاش وانت اتجرأت وحبيت تعدل عليه ولا تقول ربع كلمه اولا هايطلعك مش فاهم اي حاجه وبعدين لما يزهق منك هايقولك يا بيه اللاكيه خلص ممكن تروح تجيب لاكيه ماركة النمله الحمرا وده مش هاتلاقيه الى فى مدغشقر بس ما تتاخرش بقى وخلي بالك من السلمه المكسوره  هع

لو انت الى بتدهن شقتك لو عملت ام الالي فى الشقه هاتقول الله حلوه والنبى وبتبقى فعلا حلوه
اما لو جبت نقاش من الفضاء الخارجي هاتفض كل شويه تقول كان المفروض عمل كذا ده طالع وحش ده طالع مش اللون وتبقى مقهور نفسيا ومش طايق الى هو عمله

لو انت الى دهنت شقتك بنفسك هاتتبهدل ويطلع عينك وتطلع روحك واي اكسسوارت  تانيه ممكن تطلع
ولو انت  جبت نقاش يعمل الشقه  هاتتبهدل ويطلع عينك وتطلع روحك واي اكسسوارت تانيه ممكن تطلع

الخلاصه يا قوم انا مرتاحه نفسيا لان احنا الى  عملنا الشقه من نواحي كتير والله
بس المشكله العظمى هى ان رضا اذ فجأة قرر السفر للصين لظروف الشغل وطبعا قضينا اسبوع من الجري والشغل الى يمووووووووت فى البيت طبعا والتجهيز لسفره كمان
وطبعا سافر وخلع وسبنى اكمل شوية  حاجات كده
ويسعدنى ويشرفكم ان انا دلوقتي بقيت اسطى نقاش ميه ميه اي حد عايز حاجه يقول
بس لعلمكم انا استشارات بس  اه عقلكم يوزكم على  حاجه اكتر من كده ولا حاجه

وان شاء الله لما اخلص فرش بقى هابقى  اصورلكم الفن التجريدى العظيم بتاعنا

وحشتوني جدا جدا ووحشني الرغي وهاريكم بقى  ان شاء الله


الأحد، 4 أبريل، 2010

احمد مهنى؟؟ .... شيلوا اديكم من على بؤنا


لو ما كنتوش خايفين صحيح

لو كنتم صح فعلا

لو كنتم ادنا فعلا

ما تحطوش اديكم على بؤنا من فضلكم

مش من حقكمممممممممممممم

بالطبع  اتضامن مع مهنى

اينعم انا ما قريتش  الكتاب بس ايا يكن

مش من حققققققققققققكم

حتى وان يكن أحد مخطيء

ماينفعش التحقيقا تحصل بالطريقه المروعه دي
يحققوا معاه ويبات فى بيته
يحققوا معاه ويطمنوا اهله
يحققوا معاه بدون انتهاك حقووووووقه
وما ينفعش الى بيحصل ددددددددددده

حاجه تقررررررررررررررف