الأربعاء، 31 مارس، 2010

امتلؤا فخرا يا قوم .... ووحشتوني جدا

السلااااااااام عليكم

ايه ده مش معقووووووول كده وحشتوني يا جماعه بشكل مش معقول حاسه ان دماغي تتصارع داخلها الافكار عايزه تنط تطلع لكم هنا مليون حاجه عايزه اتكلم فيها والله


بس اختكم محتاسه حوسه عجيبه الشكل فكروني ما عدتش ابيض الشقه تاني خلاص كفايه مره واحده فى العمر


انا نقلت قبل كده من مكان لمكان انما ابيض شقه وانا فيها لم تحدث من قبل



عااااااااااااااااا سبوني اعيط شويه والنبى

والمفروض برضه ندور على حلول بقى



يعنى نشوف عفش بيت يكون خفيف كده يا اخوانا يعنى كرتون بلاستك اي حااااااااااجه اصل انا شلت اثقال لحد ما اتهديت وطلع عنيا والله لو اعرف كنت اتجوزت بحصيره وقله يا اخويا






وكمبيوتر طبعا ما اقدرش اعيش من غيره


هاقول ايه يعنى لو كان فى ورايا مدونين ياكلوا الزلط كان كل واحد فيهم جاب فرشته فى ايده وجه عمل معانا كنا خلصنا يا اخواتي

بس عموما احب اعلمكم ان محدثكم الان اسطى معلم اد الدنيا فى النقاشه بس اكتر من شبابيك وارتفاع مترين وربع كده من الحيطه ما اوعدكوش اعمل الحقيقه


دعواتكم بقى كده زي الشطار بجد تدعولي ان ربنا يسهل واخلص الشقه الى مش عايزه تخلص فى سنتها دي


وان ربنا يسترها معانا على صعيد اخر


المهم انا طبعا مش فاضيه اكتب اي حاجه عن اي حاجه بس قلت ما اجلكوش بايدى فاضيه برضه عيب يعنى

فجيبتكم الكليب ده تشفوه وتمتلؤا فخرا وحنانا ... قصدي فخرا واعتزازا وتقولوا نحن العرب المسلمون

وان كان هذا الكليب يصيبنى بالحسره على ما كنا وما اصبحنا عليه




واشوفكم على خير ان شاء الله يا حلوين

ما تنسوش بجد ادعولي ان ربنا يسهلنا الصعب ونخلص الموال الى احنا فيه

والاهم ان ربنا يسترها معانا وييسر لنا الخير ويبعد عننا الشر (الى هاينسى يدعي مش عايزه اقولكم هاحصله ايه ؟ خليها مفجأه بقى )

الخميس، 18 مارس، 2010

الحمامه البيضاء .... كنز


السلام عليكم يا اصدقائي

بقى فى دماغي يجي خماشر موضوع عايزه اتكلم فيه متحوشين ومش لاحقه اتكلم على فكره حد يتكلم بدالي شويه مش فاضيه

اولا وباديء ذي بدء تدعولي ربنا يعنى اصل اخوكم مزنوق زنقه هباب فى البياض والدنيا عندي ضلمه على الاخر
لعلمكم انا باكتب من تحت الانقاض

ثانيا ندخل على الرغي بقى

عاااااااااااااااا ما عادش اسمها رغي

طيب زي بعضه نخليها ندخل على الندى بقى

ايه بقى موضوع الحمامه البيضا

بقى احنا يا جماعة الخير  كنا مربيين حمام من كام سنه كده
رضا اصله غاوي حمام وبالتالي ضحك  عليا واشترى جوز حمام وقالي بس لمريم تلعب بهم وتتفرج عليهم وحطهم فى قفص زي قفص العصافير كده بس كبير على السلم وطبعا واحده واحده بقت اوضه مليانه حمام يا حلولي

طبعا انا بره الليله دي ماليش فيها خااااالص من كل كام اسبوع مره اطلع اتفرج عليهم من بعيد لبعيد
(بدون اي تريقه ما باعرفش امسك اي كائن حي فيه النفس باشعر واصرخ واطلع اجري )

المهم مره رضا قالي فاكره الحمامه البيضاء الى انتى كنتى بتحبيها ؟
قلتلها ماالها ما تقولش مااااااتت
قالي لا مولفه بقالها كام شهر ومش بتبيض مش عارف ليه
قلتله طيب اخدها اوديها لدكتور امراض نسا ولا ايه

فسأل واحد من الى بيربوا الحمام قاله يااااه دى حاجه زي الفل
دي كنز دى بقى بتربي الحمام الصغير كويس جدا

دي بقى تخليها عندك ا حتياطي
ممكن حمامه من الى عندك تموت وهى راقده على البيض
او حمامه لسه هبله واول مره تبيض فمش بتعرف تاكل ولادها كويس فتسيب لها بيضه واحده وتاخد التانيه تديها للحمامه الى مش بتبيض دي

او اصلا تاخد بيض بتاع حمامه من الى هو انواع غاليه وبدل ما تعطل هى وترقد وبعدين تقعد تأكل فى الزغاليل الصغيره تقوم تدي البيض للحمامه البيضا ترقد هى عليه وبالتالي الحمامه الاصليه تبدأ تبيض تاني اسرع وهكذا

وفعلا رضا عمل كده وقالي ان الحمامه لما حطلها البيض بدون اي مشكله رقدت على البيض فعلا وهى ووليفها كمان كانوا بيتناوبوا عليه عادي ولما فقست اكلته عادي جدا
واستمرت على كده فعلا

بتهيألي واضح انا قصدي ايه من الكلام ده

حقيقى مش عارفه ليه كل اثنين ربنا ما اعطاهمش من فضله اولا ما ياخدوش طفل او اثنين يتمى يكسبوا فيهم ثواب
ويسعدوا هما كمان بيهم
ليه نفضل سنين وسنتين ممكن يوصلوا عشر سنين مثلا وزياده
بنجري ورا العلاج والحقن المجهري واطفال الانابين  ونضيع عمرنا كده

ماشي ماشي عارفه والله
عارفه ان كل واحد عايز ولد من صلبه وكل واحده نفسها تحس الامومه فى قلبها
ما قلتش لا
اجري ودوري واتعالجي واعملي كل ده
بس وانتى فى حضنك طفل يتيم غلبان هايطلع فى الغالب مشرد منبوذ من المجتمع من غيرك انتى واسرتك معاه
مش  هاتخسروا حاجه بالعكس
حتى لو خلفتي
وحتى لو كان نوع المولود الى هاتخلفيه هايبقى مختلف عن الى انتى اتبنتيه
ما فيش مشكله والله
يعنى بالله عليكى لو لا قدر ا لله اخوكي ولا اختك ولا اخوك ولا اختك توفاه الله مثلا وسابولك ابنهم ولا بنتهم مش هتاخده تربيه وسط ولادك ؟
ولا هاترموهم فى الشارع
كتير اوي اوي حالات كده يا جماعه
كتير اوي واحد متجوز سابقا وعنده اطفال وواحده متجوزه سابقا وعندها اطفال وبيتجوزوا ويعيشوا عادي
اه معلش هايبقى فى خايله شويه يا سيدى بجملة
اساسا حتى الاخ والاخت لازم يبقى عليهم رقابه مش هاتتساب كده
وفى النهايه انت قاصد وجه كريم
ومش عايزاكم الله يصلح حالكم تقولوا اصل لو ولد هايحبس حرية الست لما يكبر
واصل لو بنت هاتحبس حرية الاب
( طبيعى مجتمعنا متحفظ حتى داخل العائله الواحده )
الهي يصلح حالكم بلاش فيلم العذراء والشعر الابيض
الموضوع مش كده خالص

ليه الاقي واحده قعدت 15 سنه تجري لحد ما خلفت
طب ما فى ال15 سنه دول تكوني ربيتى طفل او حتى اثنين وعديتى بهم لبر الامان
وابنك  الى من صلبك يجى على مهلك

انتم عارفين
انا اعرف لحد الان 4 حالات تاخر فى الانجاب لخمس وست سنين بدون اسباب معلومه
ولما كنت باحلل الموضوع الاقيه زياده فى التوتر لاسباب كتير اهمها انها منتظره الحمل بقلق

تخيلوا لو واحده قعدت كده عشر سنين مش لو كانت شغلت نفسها بعد اربع سنين مثلا كانت زمانها خلفت من زمان
طبعا انا هنا باقصد كفالة يتيم
تبنى بالرعايه
ولكن مش بوهب الاسم

من فتره بسيطه كتبت شيماء مدونة شوية فضفضه عن موضوع التبنى
هى كان لها راي فى موضوع التبنى جايز نابع من ان اليتامى واللقطاء صعبانين عليها

وهو ان ليه ما نشوفش حل لموضوع التبنى ويبقى التبنى حلال

وقالت قياسا على زرع الاعضاء خلونا نوصل لاتفاق مع الازهر ونشوف حل لموضوع التبني

وطبعا ده ما ينفعش بتاتا البته
الايه واضحه وصريحه
وادعوهم لابائهم

ما ينفعش فيها اتفاقات دي

انا اقترحت  عليها حل فى الرد على موضوعها هناك هاقوله لكم هنا عل وعسى يكون فيه الشفا

والحقيقه الحل ده كان بابا اقترحه على شخص ربنا يكرمه لقى لقيطه فى مكان مهجور وصعبت عليه وخدها رباها وسط ولاده
وكان قلقان من فكرة ان الاسم وانها لما تكبر  هاتسأل وهايبقى صعب عليها تعرف  الحقيقه وصعب المجتمع يتقبلها

الاقتراح بقى

هو انك بطلب بسيط وقت عمل اوراق التبنى
تخلي نهاية اسمها زي نهاية  اسمك
يعنى تضيف بس على اسمها لقب العيله بتاعتك
بالتالي لما تكبر وتسأل البنت قولها والله يا بنتى انتى ابوكي كان اخويا كان ابن عمي كان اي حد وتوفاه الله فى حادث هو ومامتك وما لكيش حد الا احنا
وانا خدتك اربيكى وسط ولادي
ويكون كمان باقي ولاده عارفين كده والاصحاب والمعارف عشان الكل يتفق على نفس الروايه وما يأذوش نفسيه البنت
من هنا نكون ما عملناش مشكله فى الانساب ولا خالفنا اوامر الاهيه
وكمان بدل ما نقعد نهاتي مع المجتمع بحاله نقنعه ان الطفل مالوش ذنب
وما يبقاش الطفل لما يكبر لصيق به لقب (ابن حرام )
للاسف الشديد ده الى بيحصل


وعلى فكره الشيخه فاطمه الكتبي الله يصلح حالها زوجة الشيخ زايد آل نهيان الله يرحمه
رئيس دولة  الامارات سابقا  عشان الى مش عارفه

كانت عندها يجى عشرين ثلاثين بنت كده بتربيهم من ايتام الامارات وكان الكل بيتكلم عنهم بيقول بنات الشيخه فاطمه
وكانت برضه فى الاوراق الرسميه الحقت عليهم لقب عيلتها الى هو الكتبي

واحتذى بها كتير من الامرا ء والشيوخ هناك وعملوا كده


نداء حار الى كل حمامه بيضاء
شوفيلك زغلولتين ربيهم الله يخليكى انتى والزغلول الكبير
اكسبي فيهم ثواب واسعدي نفسك وعيشي حياتك واسعي برضه ما حدش قال لا

تصوروا البوست ده لايق على عيد الام

الى ماجابش هديه لمامته يروح يجيب يا ولاد ما تزعلوش مهمهاتكم فى عيد الام

واي واحد هايطلع يقولي عيد الام حرام على مستوى البلوجر كله
ساضرب باحترام الرأي الاخر عرض الحائط واقوله
................
بلاش كفايه عليه الحائط

وكفايه عليكم كده برضه بطلوا رغي شويه صدعتوني

الثلاثاء، 9 مارس، 2010

الحشريه وقلة الذوق

السلام عليكم

رفهت عنكم اهو ودلعتكم





تعالوا بقى قدامي على المقصله بما انكم جزء من الشعب الى انا باعاني منه ده



مش عارفه انا هاعمل ايه لما امسك الحكم فى الصين يعنى

دلوقتي يا ناس انا خلاص هاطق
 

فى ثنائي منتشر فى المجتمع خلاص ما عدتش طايقاه





الا وهما



الحشريه وقلة الذوق




ودايما دايما افتكر ياسمين عبد العزيز فى فيلم مش فاكره اسمه(عادل قالي دلوقتي اسمه ثمن دستة  اشرار) وهى بتقول


 

من يوم ما جيت وكل الناس بتتدخل فى حياة كل الناس بطريقه تضايق كل الناس


عندي احساس بشع بان في ناس فاضل انهم يقولوا للمحيطين بهم ممكن تسمحلي اعيش تحت جلدك ؟؟



ومع العباره دي وش ساقع بااااااارد بابتسامه صفرا





بجد مش ممكن الشعب ده انا اينعم ما عاشرتش شعوب كتير



ولما كنت فى الامارات كنا كلنا غرب حتى اهل البلد تحسوا انهم واخدين على معاملة الاغراب



فمش قادره احكم بقى



هل احنا الشعب الوحيد الى حشري بالشكل ده ؟؟





ولله الحمد كل واحد عنده الى مكفيه مشاكل ودوشه اييييييه بقى الى يخليك ترشق مناخيرك فى حياة الاخرين



الواحد اوقات الظروف تحطه فى موقف تخليه غصب عنه يدخل فى قصه مالوش فيها ناقة ولا جمل بس ما يقدرش ينسحب



صدقوني الواحد بيذوب خجلا لما يضطر عشان يفهم الموضوع يسأل مثلا عن حاجه هما ما قالوهاش من نفسهم





نفسي اعرف بقى أي شخص حشري فى الحياه بيعيش مع نفسه ازاي





لا وايه بقى 99% من الاشخاص الحشرين بيكون يصحبهم مع ذلك كمية من قلة الذوق لا باس بها امال هايبقى ساقع وصدغ ازاي




فانا بقى هاقولك اهم مظاهر الحشريه عشان الى عنده جزء منها يحاول تخلص منها



وزي بعضه مش هاقعدكم على الكرسي الكهربائي عشان تقولوا اعترفوا لنفسكم كفايه



عشان تعرفوا انى متسامحه



اكتر حاجه بتضايقنى وتعصبنى جدا



الكمبيوتر بتاعي



اهو اهو اسمه ايه ؟ الكمبيوتر بتاعي مش مشاع والله



أي حد ممكن يدخل يلاقي الجهاز مفتوح مثلا فيقوم رايح قاعد قدامه واميلات بقى مفتوحه ومواقع ودنيا



وبعدين بقيت انا وامري لله سقيعه شويه ولما حد يعمل كده اقوله بعد اذنك اقفل اميلاتي واقفل واسيبه



ابقى معديه كده



الاقي هاذوها الشخص مثلا فاتح الفيلات بتاعي مثلا وبيقلب فيها عادي جدا



وبعدين بعد شويه يدخل على قائمة المواقع المفضله



حبه كده ونلاقيه داخل على الصور وهنا بانفجر بقى خلاص واقوله عننننندك لحد هنا واربط



ومن اكترالتصرفات سخافة برضه تكون بتتكلم فى التليفون مثلا وتلاقي فى شخص مركز معاك بكل جوارحه وممكن بما انه قليل الذوق يشترك معاك فى الحديث كطرف تالت



ولا بقى لما تليفون يرن تلاقي حد بيديلك التليفون وهو بيبص على اسم الى طالبك يا ابويا على الغتاته



يجيلك رساله تفتحها وتقراها وتقفل الموبايل تلاقي شخص قاعد مركز معاك من اول ما جه رنة الرساله اصلا ولما تقراها يبقى قاعد باصصلك كده باستفسار مستنيك تقول الرساله من مين



الله هى غتاته ؟؟؟



تلاقي بقى شخص تاني غتيت اوي قاعد مع واحد بالكاد عارفه مثلا ويقوله وانت بقى بتلعب فى كام كده يعنى فى السوق ( يعنى حجم عمله فى السوق كام )





او يقوله امممممم والشركه بتاعتك دي بتكسب كويس ؟؟ كاااام كده يعنى فى الشهر؟؟؟



نخش على الحريم بقى وما ادراك ما حشرية الحريم



تلاقي ما تعرفش الحديث مشي معاها ازاي وتوصلك فى الاخر انها تسألك بكل بساطه مثلااااا عن مرتبك كام



بتصرفي كام فى الشهر؟؟؟ هو مصاريف المدرسه بتاعة ولادك كام ؟؟؟ هو انتى بتوديهم فى الباص ليه يعنى ما تنزلى انتى ولا ابوهم وصلوهم بالعربيه؟؟



مطلوب من الواحد يرد يقول ايه طيب ؟؟؟



انتى بتسهري ليه مش ولادك بيناموا بدري عشان المدارس ؟



انتى بتصحي الصبح وجوزك خارج ؟



انتى طابخه ايه النهارده ؟ يا شيخه ده يبقى تقيل فى الهضم


 

انتى بتلاقي وقت تقعدي على النت ؟ مش جوزك وبيتك اولى بالوقت ده ؟؟



انتى بتاخدي كورسات ؟؟ ليه يعنى ؟؟ انتى عايزه تشتغلي ؟؟ ولا لها لازمه الكورسات بلا قلبة دماغ





مايصحش برضه تكتبي كذا مالهاش لازمه
 

الله هى دي تخصك ده موضوع يخصنى انا ؟ ......ماشي بس برضه مالوش لازمه



الله مالوش لازمه عند مين ؟؟؟؟ عندك انت طب انت ايش اخششك ؟؟!!



حلوه الشنطه دي جديده ؟ ..... ايوه اتفضلي



منين وبكام ؟؟ ...... مش عارفه والله اصل جيالي هديه



هديه ؟ من مين ؟؟؟



!!!!!!!!!!(احيانا باقول احيانا تانيه ما باحبش اريح الصنف ده )



وممكن جدا لو قلتلها من اختي مثلا



تقولي بجد طب ممكن اساليها كده جايباها منين ؟



او الانقح بقى لما تقولي طب خليها تجبلى واحده زيها



(وش بيشد فى شعره من الفرسه )




 

تبقى عندك ضيفه لطيفه ظريفه



وتقومي لاي سبب تدخلي مطبخك ا و حتى اوضة نومك تلاقيها فجأه وراكي ومافيش مانع لو تمد ايدها وتتفرج على الميك اب بتاعك وتجرب البرفان وتسألك منين وبكام



وما يعجبهاش لون الروج



واحتمال تقترح عليكى تغيري نظام الاوضه عشان يبقى السرير جمب الحيطه والعيال ما تقعش



مع انه سريري انا مش سرير العيال





معلش حتتين بس قلة ذوق احسن بينقحوا عليا



انت فين ما بتسأليش..... معلش اصل كنت تعبانه ؟



ايه ده عندك ايه ؟ ..... عندي كذا





يووووووووووه ده انا كنت كده الاسبوع الى فات ................ وتكمل حكايات عن نفسها من غير ما تقول للطرف التاني سلامتك من الاه




تيجى تقدم تحيه لشخص ما تلاقيه من قبل ما توصل لحد عنده بيقولك ما باشربوووووش أو ممنووووع منه





والادهى والامر الى تقولك يوووووووووه جوافه هى ورانا ورانا ما سايبنها فى البيت




والاسخف والاسخف الى يدوق الحاجه او يشمها ويمتعض كانك شربته جاز ويقولك بقرف ؟؟؟ ايه ده ؟؟



 

خدوا عندكم الحته السخافه دي قويه بجد



منين جايبه العبايه دي ؟؟ تطريزها اول مره اشوفه .... ده انا الى مطرزاها




الله هو انا كل ما اسألك تقوليلى انا الى عاملاها ؟ خلاص ما تعمليلى بقى



(كنت الاول بارد بذوق بعد كده باقولها لا مش فاضيالك وش كده )




الحته دي كمان معلش والنبى




 

التورتايه الى كنتى عاملاها يوم عيد ميلاد فلانه(حد قريب مني ) ....... مرسي عقبال ما نعمل لست الحسن بنتك يوم فرحها







وتبدا فى سرد حكايه طويله عريضه مريعه مؤداها ان فى حد من اصحابها او اقاربها الى انا بالكاد اعرفهم عنده مناسبه والمفروض انا بقى اعزم واقولها اعملللللك انا



ولو سقعت وما عبرتش ... تطلبها صراحة ...( كنت زمان باتحرج وادبس دلوقتي باقول معلش مش فاضيه )







طولت عليكم صح



معلش اصل انا مبقوقه من الشعب هاموت هاموت خلاص



طب انا شلت المراره من اكتر من ست سنين



اخرتكوا ايه معايا كده



انا تقريبا فى الاخر هاعمل استئصال عقل جاي الواحد يرتاح





اه البتاعه  الى فوق دي تقريبا اسمها قصافه
دي عشان اي حد مناخيره طويله وحشري هاقصله مناخيره بها طبعا

شايفااااااااااكم الى حطوا اديهم على مناخيرهم 
هاجيبكم هاجيبكم 


الاثنين، 8 مارس، 2010

شبح فارس الاحلام .... فى مجلة رؤيه

السلاااااااام عليكم يا اصدقائي

انا مش قلتلكم من يجى اسبوع ان ابراهيم العدوي عاملكم دعوه تروحوا تشوفوا النيو لوك بتاع المجله عنده


ايه ده ما حدش بيسمع كلاااااامي ليه فى الدنيا دي

اقطع نفسي

يلا بقى روحوا مجلة رؤية

شوفوا الاطلاله الجديده  لرؤيـــــــة

وانا ليا هناك قصه من فضلكم عايزاكم تقروها وتقلولي رايكم عشان انا اول مره انشر النوع ده

القصه اسمها        شبح فارس الاحلام  

        
يلا سمعوني رايكم هناك احسن ابراهيم يعضنا




السبت، 6 مارس، 2010

دفى القلوب

دفى القلوب ده يبقى ايه ؟



بسمه صافيه .... كلمه صادقة ؟



حضن جامد .....وروح مسامحه ؟



صوت دندنه قريبه ....ودمعه بس مسكره ؟



وقلب دقاته حنينه ... تسمعها تلمس الدفا





الأربعاء، 3 مارس، 2010

اهلا بكم فى البيت الجديد

سلام عليكم

ازيكم يا اصدقائي الاعزاء

طبع انا لسه باقولكم اسفه على القلق الى سببته لكم  والله غصب عني

وعشان انا ما باحبش اكون مثار غموض وقلق ومين وفين ازاي

وناس كتير سألوني مين ضايقك لان الواضح الجلي طبعا انى بامثل فيلم الهروب الكبير وكده يعنى

الحقيقه هي كده برضه وانا فعلا هربانه وفعلا فى ناس ضايقتنى بس مش من المدونين اطلاقا

الحقيقه انى غلطت غلطة عمري وكنت دايما باحب ادي  مدونتي لكل الناس الى اعرفهم من عيلتى وكنت بافرح انهم متابعينى

وده لانى تقريبا متخلفه عقليا او هبله او مجنونه رسمي

الحكايه دي عملتلى مشاكل كتير  كتير كتير فى العيله الكبيره الطويله العريضه الكتيره الخنيقه 
وبقيت حاسه ان كل واحد متبرع انه يحط ايده على بؤي وانا باتكلم وباكتب
وكل واحد شايف انه مافيش مشكله انه يوجهلي نقد بشكل سخيف جدا
وكل واحد شايف ان من حقه بل من صميم اختصاصه التعديل فى حياتي

 وخلاص بقى زهقت من الموضوع ده جدا جدا ومش قادره استحمل القرف ده

واساسا اساسا القلب مش ناقص والحكايه مش مستحمله بقى 

فانا قلت ااثر السلامه واهرب من هناك واغير اسمي واسم المدونه ومكاني

وهى دي الجريمه الكامله

وقد كان  ومن فضلكم بعد كده تكلموني باسمي الجديد وتحفظوا المدونه عندكم بالاسم الجديد  عشان مش عايزه لخبطه ما تبوظوش الخطه بقى

مش عايزه كلام من نوع استسلمتى و كنتى كبري دماغك والكلام ده

عشان كل ده حصل وانا استنفدت كل الطرق والمحاولات الى اقدر عليها وخلصت خلاص

انا عارفه انى جايز هاخسر قراء ومتابعين باعتز بهم لكن عسى ان تكرهوا شيئا وهو خير لكم

بس والله العظيم يا ناس انا كنت بارد على اميلاتكم وانا حنفيات الدموع شغاله على اخرها

طبعا اصحابي وحبايبى والى اميلاتهم عندي اصلا انا بعتلهم وصله من المدونه على طول

وعليه اكتر الرسايل الى جاتلي على الميل من حبايب ما اعرفهمش منهم مدونين ومنهم غير مدونين او حتى اعرفهم بس ما كنتش اعرف انهم متابعينى ولا ان يهمهم يعرفوا مدونتى الجديده عشان لسه يتابعوني

حقيقى ما كنتش متوقعه  يا جماعه والله  وانا متشكره اوي اوي اوي  بجد انكم هنا ومعايا

شكرا يا اصدقائي
وشكرا لكل الناس الى قلقت عليا وكلموني على الميل او بعتوا اميلات او اتصلوا  متشكره اوي اوي بجد

ويارب دايما منورين حياتي

وطبعا البوستات ا لقديمه انا هانقلها ان شاء الله هنا كلها
وكنت نقلتها بس كانت فى مشكله فيها مش فاهماها فشلتها وهاعيد الشغل من الاول

طبعا محتاجه يجى شهر على  ما اظبت التمبلت واللوجوهات واللينكات

برضه يا ولاد النقله مش سهله
الواحد نقل 3 مدونات بسلطاتهم وبابا غنوجاتهم

وللمره مش عارفه الكام
شكرااااااااااااااااا