الثلاثاء، 29 سبتمبر 2009

حملة اتبرع وانت فى بيتك


السلام عليكم


الحقيقه انا اتوجهلي دعوه من الاخ طهر فؤادك صاحب مدونة رسول الله 1


والدعوه دي بخصوص الاشتراك فى الدعوه لحملة اتبرع وانت فى بيتك




وانا الحقيقه المتشفى دي بالذات لها مكانه خاصه


حيث انها تمثل حلمي فعلا ونفسي مصر كلها تبقى حاجه نظيفه ومتحضره زي المستشفى دي وادارتها


وكمان لان قدر الله ان يكون لينا فيها نقول ضلع بيتعالج هناك


بن اخو رضا ربنا يشفيه يارب ويشيل عنه هو وكل الى زيه


اسمه محمد ادعوله باخلاص شويه والنبى


المهم انا ما روحتش المستشفى دي لكن جوزي راح كتير وقالي كل كلمه بيقولوها فى التلفزيون عليها صح وفعلا التزام ونضافه حقيقه وفعلا بيعالجوا ابن الوزير جمب ابن الغفير


ومجانا وبمنتهى العنايه والحالات بتتكلف فعلا مئات الالوف حقيقى اي اسره مصريه لو كانت حتى ميسوره الى حد ما ما يقدروش على العلاج ده


فما بالك بقى بالمعدمين وما اكثرهم فى بلدنا ولله الحمد .


واكثر ما اسعدنى بجد لما عرفت انهم بيبنوا مستشفى جديده كمان


واحزنى اكتر واكتر سؤال بيلف فى دماغي :


الاطفال دوووووووول كلهم عندهم سرطان ليه ؟؟؟؟؟ نحاسب مين ونعمل ايه



لكن ما نقدرش نعمل غير اننا نعالجهم دلوقتي ونخفف عنهم المهم .



المشاركه فى الحمله هدفها هو تعريف الناس بطرق التبرع السهله والمنشوه على موقع المستشفى نفسه


ومطلوب من كل مدون عايز يشترك انه ينزل بوست زي ده كده تعريف بالحمله وكمان يحط بانر عنده فى المدونه فيه شعار المستشفى وبلنك يوصل لموقع المستشفى


زي البانر الى عندي على اليمين ده فوق


طهر فؤادك اتكلم اكتر وبتفصيل ا كتر


وده جزء منه بس اخدته من بوست طهر فؤادك


هنســـــــــــاعدهم ازاى :---
- ان شاء الله الفكرة ببساطة اننا عاوزين كل المدونات الى هتشترك معانا فى الحملة دى هتحط شعار المستشفى واللينك الخاص بالمستشفى على المدونة الخاصة بكل واحد هيشترك بأذن الله معانا وكمان فوق الشعار هتكون كلمة( اتبرع وانت فى بيتك ولو بجنية او دولار من هنا )


والناس الى مبتدئين فى المدونات هشرح لهم بطريقة مختصرة ازاى هيحطوا الصورة واللينك وهى( انكوا تفتحوا صفحة التخطيط فى مدونتكم وبعدين اضافة اداة وبعدين نختار من اضافة اداة اختيار اضافة صورة وبعد كدة لما تفتح نحط فى خانة اسم النموذج الكلام الى اتفقنا علية وهو" اتبرع وانت فى بيتك" وفى خانة وصل هنحط اللينك بتاع موقع مستشفى 57357 والى هو http://www.57357.com/Default.aspx?


PageContentID=8&tabid=155


وبعد كدة هنضيف الصورة بتاعة المستشفى وهى موجودة اعلى الموضوع بتاعى فوق وبس وجزاكم الله خيرا ) علشان فية ناس كتيرة متعرفش عن طرق التيرع الى هى كتيرة ومش معروفة وممكن تحقق عائد كبير جداا جداا ومش متركز عليها فى اعلانات التلفزيون والراديو ووسائل الاعلام وهدفنا فى الحملة دى اننا نوضح طرق التبرع المتعددة الى بدورها هتجيب عائد اكبر واكتر لو كل واحد استخدم ولو طريقة واحدة وهو فى بيتة وهقولوكوا نبذة عن طرق التبرع دلوقت :- ....


1 - البنوك :- (ودى متركز عليها كتير فى وسائل الاعلام ومش هنخوض فيها ) .


2 - انترنت الخير (هنركز اكتر عليها ):-يمكنك التبرع من خلال أستخدام ارقام انترنت الخير : 07775757 أو 07075757 بنفس سعر المكالمة العادية كما انه يمكنك حساب صافي قيمة ما تبرعت به بأستخدام عداد الخير ...


3 - التليفون (هنركز اكتر عليها ):- يمكنك الاتصال برقم 1468 أو 2357 من اي تليفون محمول او برقم 09009555 أو 09000957 و التبرع لصالح المستشفى اثناء استماعك للرسالة الصوتية . سعر الدقيقة جنيهان


4- بطاقة الائتمان (هنركز اكتر عليها ):- خدمة جديدة تقوم بها مستشفى 57357 لتسهيل التبرع بالتعاون مع بنك مصر و شركه Verisign العالمية لتأمين المواقع على الانترنت. يمكنك التبرع بأي عملة صدرت بها بطاقتك الائتمانية في أي بلد في العالم بما يعادلها من الدولار و ستقوم مؤسسه فيزا و ماستر كارد بتحويلها إلى دولار .فقط اضغط على اختيار دولار ,فنحن بحاجة إلى العمله الصعبة لتمويل عملية استيراد الأجهزة و المعدات الطبية .


5 - البريد المصرى (هنركز اكتر عليها ):- يمكن التبرع فى اى فرع من فروع مكاتب البريد المصرى لحساب رقم 26386

****


حملتنا على ال facebook ( ودى اهداء من مدونة قطرات ندى . جزاها الله خيرا ) :-
- احب قبل وماكتب لينك الجروب علشان ان شاء الله تشتركوا معانا فية احب اشكر المدونة وربنا يجزيها خير ودة مثال حى للعمل الجماعى و ياريت كمان ياجماعة الى يحب يشارك بعمل شعار للحملة وعندة معرفة بالفوتوشوب ويصمم شعار خاص للحملة يبقى جزاة الله خيرا وربنا يجعل عملة فى ميزان حسناتة ان شاء الله .واليكم لينك الجروب على الفيس بوك :-
1 -
http://www.facebook.com/group.php?gid=139959994897&ref=search&sid=100000133813777.2100342868..1


***********************************************



والى عايز يقرا تفاصيل اكتر يروح عن طهر فؤادك ويشوف هو قايل ايه فى البوست ده مدونتك هاتنقذ طفلك


واي حد عايز مساعده فى عمل البانر واللنك يقولي وانا تحت امركم


وربنا يجازيكم خير جميعا مقدما


وما تنسوش الدعاء بالله عليكم للاطفال دول

الأربعاء، 23 سبتمبر 2009

وربنا .. وربنا لأنيمك من المغرب يا مصر ... قصدي يا صين

تحدييييييييييييييييث

عيد ميلاد حنين القلب النهارده وكل سنه وانتى طيبه يا حنين وعقبال ميت سنه سعاده وهنا يارب وربنا يكمنا عليكى
وانا عملتلك يا جميل تورتايه على المدونه التانيه
طابخين ايه النهارده ؟؟
يلا روحي بس ما تلحسيش الكريمه عارفاااااااااكي
***************************************************************************






السلام عليكم

بعد العيد وبعد ما اكلتوا الكحك خلاص وانتختوا كفايه فى العيد

وعيدنا على بعض لما شبعنا

نرجع بقى نرغي وناكل دماغكم تاااااااااني

الحقيقه يا جماعه انا لازم ابلغكم وانتم حبايبى يعنى ما اقدرش اخبي عنكم حاجه

انى ان شاء الله اول حاجه اعملها لما امسك الحكم

فى الصين يعنى ( ما تستهبلوش بقى )

اول حاجه هاعملها انى انيم الشعب ده من بدري



ايوه يصلوا المغرب ويقعدوا ينعسوا على نفسهم لحد ما العشاء تأذن يصلوا ويناااااااموا

قاعدين بتعملوا ايه طول الليل يا ناس

كله ينام بدري ويصحي بدري

وهاصرف منبه مجانا لكل مواطن من نوع جديد مش صييييينى هاجيبه صعيدى ما عندوش تفاهم
بالمرزبه وفى وشك على طول لو ما صحيتش

نيجى للجد بقى

انا عايزه اعرف احنا ليه بقينا كده

البلد كلها نايمه لحد الظهر والعصر كمان

ايه فى ايه اتهبلتوا يا بشر ولا ايه

انا اخرج الصبح ما الاقيش ولا مشوار يوحد ربنا اقضيه ؟
الناس نايمين للظهر كلهم

وطبعا طبعا صاحيين للصبح فى الشوارع

لييييييييييه بقى

كل الدول المحترمه والمدن الكبيره لها مواعيد

الساعه مثلا عشره مساءا تلاقي كل المحلات قفلت

والى فاتح ياخد مخالف اااايوه مش هيصه

مافيش حد بيسهر كده زينا الا باريس
بس هما بيسهروا عشان السياحه بتاعتهم ما بتشتغلش الا بالليل

(ايه الممرضات عندهم كتير بياخدوا نباتشيات بالليل سياحه علاجيه . على طول نيتكم وحشه ؟)

سامعه حد فكيك بيقولك كده احسن


اصل فى حاجات لما بتكون فاتحه على طول يبقى احسن زي الصيدليات وكل حاجه


احنا كده لازم فى اي وقت نشاور نلاقي






لا يا حبيبى الحاجات الاضطراريه دي لها حل



مثلا صيدليات معينه مقيده انها خدمه اربعه وعشرين ساعه




(كان زمان عندنا فى المنصوره صيدليه واحده بس دلوقتي كلهم قاعدين وتوصيل للمنازل كمان )




كانوا فى ابو ظبي لما كنت هناك بيرتبوها تباعها بين الصيدليات الخدمه الليليه دي

ويعلنوا عن الصيدليات الليله يوميا مين عليه الدور النهارده فى الراديو والتلفزيون والجرايد


والسوبر ماركت برضه ما حدش بيسهر للساعه واحده مثلا الا لما يكون واخد ترخيص بكده

ايه بقى الميغه الى احنا فيها دي

انا بامشي فى الشارع الساعه 2 الظهر الاقي كل الشباب

اه الشباااااااب ( الفئه المنتجه فى المجتمع )المفروض يعنى الى هما من سن 16 سنه لحد مثلا 25 سنه

كلهم يادوب صاحيين من النوم والمخده معلمه فى وشهم وعنيهم مغشلقه من دخان السجاير الى طفحوه مساءا

يادوب يعنى لزق شعره وخرج

طب هايشتغل امته.؟؟؟؟؟؟؟؟ هاينتج امتتتتتتتته ؟؟؟؟؟؟؟ ما النهار خلص

يا ناس ربنا قال ايه

وهو الذي جعل لكم الليل لباسا والنوم سباتا وجعل النهار نشورا
الفرقان




وَجَعَلْنَا اللَّيْلَ لِبَاسًا وَجَعَلْنَا النَّهَارَ مَعَاشًا
النبأ


هى كده عايزين تغيروها ليه مش بمزاجكم

لازم تناموا بالليل وتصحوا بالنهار

كانت تيته الله يرحمها تقولي يا بنتى اصحي بدري ساعه واحده بس تلاقيها ابرك من خمس ساعات متاخرين

وده لما كنت باصحى الساعه عشره الصبح يعنى مش بانام للعصر

حقيقى مافيش احسن من النوم بدري والصحيان بدري

انا جربت العكس ايام ما بيكون عندي بيبى لسه بيسهر والافلام دي كنت خلاص قربت اتجنن وبقى شكلي شبه

الاشباح كده ووشي اصفر وتحت عنيه بقى اسود

السؤال بقى

ليييييه ما نطلعش قرار بان المحلات تقفل الساعه عشره مثلا ؟؟

وطبعا الى ما يلتزمش ويتقفش يدفع غرامه دوغري

المحلات والشركات وكل حاجه

خلاص الساعه عشره الناس تروح بقى بيوتها

هايسهروا فى بيوتهم ؟؟؟ ماشي يتفلقوا

بس هايصحوا بدري غصب عنهم يخلصوا مصالحهم لو كان عندهم مصالح
لان المحلات هاتقفل بدري

وكل واحد هاعمل حسابه يروح قبل ما المحلات تقفل عشان يجيب حاجته وهو مروح

ولما يناموا بدري يخفضوا استهلا ك الكهربا الى شركة الكهرباء بتصوت منه ووزير الكهربا قرب يطلع هو كهربا ء ذاتيا من كتر الاستهلاك

ولا تاخير ساعه ماثره فيهم ولا غيره هما صاحيين طول الليل وبس


عارفين لو الحكومه عملت كده ايه الى هايحصل

الناس هاتشتم وتقول ولاد الهوهو دول هايقطعوا رزقنا هو احنا ناقصين ده الشغل ما بيمشيش الا بعد الساعه عشره

لا طبعا يا شعب سطحي هى فتره بس انتقاليه وكل واحد بعد كده هايتربى ويجى يشتري حاجته بدري لما يعرف انك انت وغيرك هاتقفل بدري

ماهو هي هي

الى بيسهر للفجر فى محله ولا شغله لازم لازم هايروح ينام للظهر علىالاقل دايره وبتلف

الشعب ده محتاج يتربي يا جماعه الحكايه بقت اوفر على فكره وانا زهقت

وعليه قررنا نحن صبرني يارب انى اول ما امسك الحكم هاربي الشعب ده

وعلى راي آبي هانم بتنجاني
حكمة الامبراطوره ( ما انا هامسك الحكم بقى )


بس مش عندك يا آبي ما تخافيش انا منشنه على الصين زي ما انتى شايفه

الصباح رباح



والنهار له عنين



والليل ستار



وفوق البيعه

اصحاب العقول فى راااااااااحه

ومن تعبه عقله تعبته رجليه

والعقل زينه فى الباترينه

ولكن لا ننكر ابداااااااااااا

ان المجانين فى نعييييييييييييييم

السبت، 19 سبتمبر 2009

كل سنه وانتم طيبين يا اصدقائي



كل سنه وانتم طيبين يا اصدقائي الاعزاء


ربنا يجعله عيد سعيد عليكم جميعا وعلى اهلكم وعائلاتكم والمسلمين والدنيا كلها ان شاء الله


ويعيد عليكم الاعياد بالخير والبركه دايما


اييييييييدك انت وهو وهي استنوا لما اخلص كلام وبعدين خدوا كحك يا ساااااااتر


ايه كنت هاقول ايه


اه زي ما قلتلك السنه الى فاتت عيدوا وافرحوا وزقططوا وصالحوا نفسكم وصالحوا بعض وعيدوا على بعض


وكلوا كحك وصلوا رحمكم وفرحوا اهاليكم وعيالكم وزوجاتكم وازواجكم وعيالكم وافرحوا بلاش نكد عارفااااااااكم


والعيد فررررررصه وحجه حلوه عشان كل المتخاصمين يتصالحوا ويتعايدوا وتقولوا يلاااااااا بقى عيد


ويلا بقى كلوا كحك بس ما تحفوش بقى عشان يكفي



وعشان ما تقلوش حارماااااااااكم من حاجه جبتلكم بالونات اهوووووو


بندقيات ومسدسات لا مافيش خلصوا كل سنه وانتم طيبين


صواريخ ومفرقات لا لا برضه مافيش احنا ناس سلميين
سامعه صوت مغرض هناك بيقول عديات ؟؟!!!
اتجننتوا ولا ايه فى ازمه اقتصاديه شدو الحزام بلاش كلام فااااااااااارغ

كل سنه وانتم طيبين


ومتشكره اوي على انكم اصحابي وعلى انكم موجودين فى حياتي

الثلاثاء، 15 سبتمبر 2009

مش تمثليات .. لعلكم تعقلون




سلام عليكم




كل سنه وانتم طيبين يا جماعه رمضان فى اواخره واتمنى يكون كان رمضان سعيد ومبارك عليكم وتعيدوا على خير وربنا يعيد عليكم الايام الحلوه دي بالخير ان شاء الله



طيب انا بقى فى كلمتين واقفين فى زوري مش هارتاح الا لما اقولهم طبعا واكل دماغكم



ممكن حد يفهمنى ايه الى بيحصل ده فى رمضان فى الشوراع والمساجد والبيوت والهبل الى ماشي فى البلد ده




اليكم بعض المشاهد الى بتغيظني وتعليقى عليها






انتى بتروحي تصلي التراويح ؟


لا يا حاجه والله ما بينفعش معايا النظام ده عشان العيال انا لو صليتها فى البيت يبقى من الله

ليه بقى ان شاء الله وانتى وراكي ايه


يا حاجه ورايا كتير والله انا ساعات باجي بالليل ما اقدرش اصلي اعمل ايه يعنى

لا يعنى ايه تعملي ايه ؟دى سنه زي ما بتقدري تعملي شغل البيت والعيال تقدري تصليها


يا حاجه سنه مش فرض يعنى اذا كان الفرض لو انا تعبانه ممكن اصليه وانا قاعده

لا مش مهم شغل البيت المهم تصلي التراويح طبعا



منين جابت طبعا دي حد يقولي يا ناس






الاقي المحلات قافله لحد الساعه تسعه وعشره اصل عشان التراويح يا فندم



الله فى ايه



مين يقول كده ناجل الشغل ونفضل فاتحين محلاتنا لحد الفجر وفى وقت الشغل اصل احنا بنصلي


طيب ما الرسول صلى التراويح مره واحده بس فى جماعه وغير كده كان بيصليها لواحده



ما تصلوا فى بيوتكم اخر الليل لما تخلصوا شغلكم ومصالح الناس ؟؟!!



عمر بن الخطاب هو الى عملها فى جماعه طيب ماشي عمر بن الخطاب كان شعبه شبعان ومرتاح وزي الفل عقبالنا كده ان شاء الله



عمر بن الخطاب على عينى وراسي وحبيبى والله بس السنه هى سنة رسول الله مش صحابته الكرام



المشاهد المفزعه بقى
في
صلاة التراويح وصلاة التهجد



راحه تصلي ولابسه عبايه شيك اوي ولابسه نص كيلو دهب وميك اب على خفيف كده على اساس انها مش حاطه عيب دي راحه تصلي وريحة البرفان جايه اخر الشارع والعربيه والخدامه مافيش مانع



مش حقد يا جودعان والله لكن يعنى هي بقت كده ؟؟ نقلبها بقى تفاخر بالعربيات والخدمات واللبس والدهب ؟؟



مشهد اخر(يفقع برضه)



انتى بتصلي التراويح فين ؟؟


فى الجامع الفلاني



يا شيخه لا انا باروح الجامع العلاني اصل الجامع الفلاني ده بقى خنيق كده والناس الى فيه بقوا بيئه الجامع العلاني بقى هو الى ماشي اليومين دول



اه يا مرارتي الى شلتها من ست سنين ياني


ماشي اليومين دول ؟؟ قولوا انتم دول ايه ؟؟



المساجد

واه ثم اه ثم اه من المساجد وميكروفناتها الى ربنا مبارك فى عددها



صلاة العشاء والتراويح لحد الساعه 9


ودرس بعد الصلاه


وعلى الساعه واحده نبدأ صلاة التهجد بقىىىىىىىىى ايه هاتكفروا ده احنا فى رمضان مش هاتصلوا تهجد

ويادوب يبطلوا نص ساعه يتسحروا وجري على الميكروفونات تاااااني قرآن الفجر والادان الاول والادان التاااااني



اييييييه عشان الناس تقوم تصلي الفجر

لا اله الا الله

الناس الى بتصلي فى بيوتها تعمل ايه طيب تصلي ازاي ده احنا ما بنبقاش سامعين بعض فى البيت والله بدون مبالغه



لو ما كناش نقفل الشبابيك كلها بالازاز ما نسمعش بعض

نموت بقى نفطس عشان تستريحوا


ما حدش يقولي ما تنزلوا تصلوا



هو مين بنى ادم فاضي لدرجة انه يقضي فتره ما بعد الفطار كلها فى المسجد مين يقول كده

ده احنا كلنا مطحونين فى الدنيا فى اشغالنا وبيوتنا يعنى ما وصلناش من الرفاهيه لسه ان الشعب كله يتفرغ للعباده نص اليوم

ولو كان حد فينا فاضي كده ما يحرمش باقي الناس من حياتهم يا اخي تعبد براحتك انا ذنبي ايه


واحد شقيان طلعان عينه طول النهار من حقه يرتاح ماهو الشغل ده عباده والله


ولا يكلف الله نفسا الا وسعها انتم هاتخلوا الناس تكره نفسها ليه يا جدعان

ممكن يجيله يوم ويقوم الله برضه ويصلي ويتعبد وكل حاجه بس مش كل يوم كل واحد له ظروووووفه


لييييييييه تعملوا كده ليييييييه


هى تمثليات ؟؟ ده بينكم وبين ربنا والله




المشهد التالت

عزايم ايه وكحك ايه الى الناس شغالين فيه طول رمضان ده رمضان ده شهر عباده لازم الواحد يتفرغ للعباده


الله ؟؟!؟!؟!؟
هو يجرى ايه لو الواحد عمل عزومه بغرض افطار صائمين ... هو دي مش عباده ؟؟
هو يجرى ايه لو الواحد عمل كحك بغرض ادخال الفرحه والسرور على اهل البيت والعيال ... ما ينفعش تبقى عباده ؟؟؟
هى العباده مصحف وسجاده وسبحه بسسسسسسسسس


طب ازاي ؟؟ كان الكون يعمر ازاي

ما كان ربنا خلقلنا الاكل والشرب كده جاهزين بقى وهو قادر على كل شيء عشان نتفرغ بقى احنا للعباده

القرآن


جميل فل حاجه حلوه اوي اوي اننا نختم القرآن فى رمضان بس خد عندك الاتي:


يا انسه ممكن تجبيلى مقاس اصغر من ده



تقوم وتبصلي باعياء واستغلاس كده وهى بتقفل المصحف وبدون ما تتكلم تروح تجيب المقاس وترجع تاني تفتح المصحف وتقرا

ايييييييييه عايزه تلحق تختم المصحف فى رمضان


وشغلك يا هانم الى ائتمنك عليه صاحبه مش عباده ؟؟


وانتى قاعده تقري بالشكل ده وسط محل كبييييييييييير كده فاهمه ايه من الى انتى بتقريه

ولا هى ور ور ور ور وخلاص ولا ايه ؟؟؟

من فضلكم اقروا كل يوم صفحه واحده لا لا ايه واحده بس تدبروها واعقلوها ويا حلاوه لو تعملوا بها

ما يبقاش بنقرا واحنا كالحمار يحمل اسفارا وبس نسمع فى المكاتب والتليفونات انا خلصت كام جزء وختمت مرتين وختمت عشر مرات


الامام ابن حنبل بلغه ان احد تلامذته بيختم القرآن فى ليله



فبعت له وقاله اذهب واقرأ القرآن اليوم كأنك تقرأه علي



لما رجع تلميذه كان قرأ عشر اجزاء بس






فقاله ارجع واقراه كانك تقرأه على رسول الله صلى الله عليه وسلم



فرجع وقاله انه لم يكمل حتى جزء واحد




قاله اذهب اليوم واقرأه كما لو كنت تقرأه على الله عزو وجل


فرجع التلميذ وقاله باكيا انه ما كملش الفاتحه طول الليل ؟؟؟!!
تدبروا لعلكم تعقلون
ربنا بيقول ايه
انا انزلناه قرانا عربيا لعلكم تعقلون



تدبروا القرآن ارجوووووووكم وبلاش التمثليات والهبل الى شغال ده والله العظيم ما هو ده المقصود من العباده والتعبد ولا دي الطريقه الى المفروض نعيش بها فى رمضان






انا مش باقول ما تصلوش فى الجامع


لكن كمان مش كده الوضع كله مش صح


فكروا شويه من فضلكم قبل ما تسنوا سكاكينكم عليا


عارفه انى طولت عليكم بس عادي عادتي ولا هاشتريها



جبتوا لبس العيد ؟؟

الثلاثاء، 8 سبتمبر 2009

الى افراد عائلتي الكرام واصدقائي واي حد تاني


سلام عليكم




عشان تصدقوني بس ان اسكار كان عنده حق




اليكم هذا الاعلان الهام جدا والى كل من يدخل هذه المدونه ان يعلقه حلق فى ودنه طول عمره






وعلى وجه الخصوص افراد عائلتي الكبيره الجميله على الاخر




انا باكتب فى مدونتي دي الى انا عايزاه مش الى اي حد تاني عايزه




باكتب كتير مواقف شخصيه حصلتلى انا شخصيا وتخصنى انا شخصيا وما دام انا طرف فيها من حقي اكتبها من غير ما ارجع لحد فيكم




وانا مسؤله عن كل كلمه على المدونه دي قدام ربنا وقدام القانون وقدام التخين فى البلد دي




الى فيكم شايف ان اي حاجه باكتبها بتمسه شخصيا وبتنتهك خصوصياته يتفضل يكلمنى وجها لوجه




او يتفضل يروح يرفع عليا قضيه ولو كان له حق عندي ياخده




عادي القضايا مش معناها ان احنا مجرمين ولا بلطجيه بالعكس ده اسلوب حضاري عشان كل واحد ياخد حقه




انا ما باغلطش فى حد وما باكتبش غير الحق




ده انا حتى كتير بازوقه عشان ما اجرحش حد وده مش عيب ولا نفاق وانما حفاظ على شعور الاخرين




صراحه بدون بجاحه




انا مش باقول كلمه وانكرها ولا امسحها ولا اقول لا ما قولتش




اي حد من عيلتى او اي حد يعرفنى كويس يعرف انى اقول الى انا عايزاه ولاي حد وما بيهمنيش




انا لا باخبي شخصيتى ولا مخبيه على اهلي وعيلتى ان ليا مدونه




ويظهر ان هى دي المشكله




بمعنى انى لو كنت شتمتكم حتى وانتم ما تعرفوش طريق المدونه كان هايبقى عادي




والى خايف من نشر موقف عمله معايا او مضايق او مكسوف او اي حاجه تانيه يبطل يكلمنى




يتبرى مني ويبعد عني وانا هابقى اغنيله




للمره التانيه الى له حق عندي يتفضل يجى ياخده




واعرفوا ان لو ليا حق عندكم هاخده ان شاء الله




ولو اتنازلت عنه فى الدنيا (بمزاااااجي )




هاخده منكم فى دار الحق يوم الحق بيد الحق




وحسبنا الله ونعم الوكيل










الاثنين، 7 سبتمبر 2009

قال الحكيم اسكار : انا محاط بشله متخلفه

سلام عليكم
اخبار الصيام معاكم ايه ؟
ولله الحمد البلوج كله بيصوم وهونايم ولما بيصحوا بيفطروا ويرجعوا ناموا تاني
انا عندي 3 بلوجات اكتر نسبة مشاهدات فى البلوج عندي بلوج المطبخ حاجه زي الفل الشعب ده يا ولاد والله
المهم انتم تنوروا فى اي بلوج ولا يهمكم يا بشوات
الحقيقه انا عندي انفلونزا ووجع فى النافوخ فوق العاده ومش عارفه ارغي ولا احقق وادقق ولا اتناقش ولا اتكلم من عقلي خالص مالص بالص
بس انتم وحشتوني قلت اجي اسلم عليكم كده واقولكم على ما يجول بخاطري فى هذه اللحظه بالذات
انا زهقااااااااااااااااااانه
ايوه زهقت من كل حاجه
زهقت من التخلف والغباء
والشخصيات الرخمه
والشخصيات الى ما بتفكرش
والشخصيات الى بما بتفهمش
والشخصيات الى بيستهبلوا
والشخصيات الى سايقين الهبل على الشيطنه
والعيال ا لمدلعه
والابهات والامهات الى حاطين اديهم فى ا لمايه البارده
والتواكل والكسل والتناحه والصفاقه
والعواطليه فعلا ومعنا
وكل حاااااااااااااااجه قرفت من كل حاجه من الحاجات دي
اعمل ايه ؟؟
حد يدينى حل
ما عدتش قادره استحمل ولا اسمع ولا اعرف ولا اتناقش ولا اتكلم
اعمل ايه ؟؟
اهاجر طيب ؟؟
جايز يكون ده الحل ؟؟؟؟؟؟؟؟؟؟؟؟
اعمل ايييييييه
عارفين فيلم الليون كينج ؟
الكارتون اه
الاسد اسكار قال كلمه خااااااااااااالده باحبها موت وارددها بين طياتي بين الفينه والاخرى
قال انا محاط بشله متخلفه
والعاقل الرزين ابو بال طووووووويل بوفاسا قال اعمل معاه ايده يا زازو
وزازو حكيم عصره قاله كل عيله فيها واحد سيادتك متخصص دايما فى افساد الاوقات السعيده
اعمل اييييييييييييييييييييه؟؟؟؟؟؟؟؟؟؟
حد يقولي اعمل ايه ؟؟
ونكتفي بهذا القدر من الخنقه عليكم