السبت، 31 أكتوبر 2009

اخر الكلام للتجمع فى المنصوره يا قوم( تحديث تاني بخصوص جمعية رساله)

تحديث تاني
يا جماعه انا قربت يجيلى تخلف عقلي من البلد دي والى فيها
المهم
مديرة جمعية رساله كلمتنى من شويه واعترض على انى قلت ان هايبقى معانا مندوب من رساله وهياخد التبرعات
مع ان الى قال كده واحده من الى بيشتغلوا فى رساله والله مش انا الى الفت الكلام ده وهى كمان الى اقترحت الكلام ده
لكن مديرة الجمعيه قالت لا ما عندناش اي حاجه من هذا القبيل
الى عايز يتبرع يجيب الفلوس لمقر الجمعيه
برضه انا باكرر انا مش بالف من عندي الكلام الى انا قلته فى الاول كان من واحده من الى بيشتغلوا فى الجمعيه
والكلام الى انا قلتله دلوقتي برضه من مديرة الجمعيه
وكمان اضافت ان التبرع بالدم مش محتاج حاجه منهم وان احنا نروح كده مننا لنفسنا للمستشفى ونتبرع ومافيش داعي نقول يا رساله
شكرااااااااااا لجمعية رساله التعاون الرشيد
وليها فى ذمتهم كام مكالمة تليفون على كام ساعة ضاعوا
على قلة فايده
طبعا ما تقلقوش كله شيء ماشي تمام والتجمع فى ميعاده وفى مكانه عادي
لكن النادي جايز اغيره عشان نادي النيل مش من مقامنا
ههههههههههههههههههههههههه
وبالنسبه للتبرعات العينيه والماديه الناس الى بتسأل يتفضلوا يجبوها واحنا هناخدهم من ايدهم ونروح مقر رساله
ولو ما قبلوش ياخدوا التبرعات تعالوا نقف فى وسط الشارع ونقول يا تبرعات
هاتلاقي من الغلابه الف مصر كلها غلباه اصلا
خلاويص كده بقى
*************************************************************
تحديييييييييييث
معلش يا جماعه نسيت اقول فى البوست الاقتراح الى حطه احمد البنا وانا شايفه انه اقتراح معقول اوي وهو قاله فى ردود البوست الى فات
وبيقول فيه :
ان التجمع فرصه للنقاش مع الزملاء الشباب والعواجيز والنص نص فى حاجات كتير بس الوقت يسمح وياريت اللى عنده اصدارات منشورة من دواوين او روايات يجيبلى معاه نسخ وهدفع والله وعندى فكره لا افكار كتيره عايز اطرحها على المدونين المحترمين بس مش هينفع هنا ..لما يكتبلنا ربنا اللقاء الاخوى ده اسمحولى اطرحه وكل واحد يدرسه براحته وعموما اجندة الاقتراحات هى
- عمل مجله شهريه باسم مدونين مصر تتناول اعمال مختاره من كل المدونات الجاده صاحبة الموضوعات المميزة وهيتم طباعتها على نفقتنا برموز بسيطة لن تتعدى كل واحد 100 جنيه مثلا لحد ماجيب دعم ليها من جهات اعلاميه ودى انا بسعى ليها مع القنوات المختصه فى الاعلام وباذن الله هتحصل
- طرح شعار جديد وموجه اعلاميه تحت شعار - احترم مدونة غيرك - وده من باب احترامنا لبعض وعدم التعدى على افكار بعض خصوصا لو تناقضت مع فكرنا والاختلاف يكون فى حدود الاحترام
- عمل سوق بسيط فى كل تجمع لبيع كتب الاعضاء المدونين اللى ليهم اصدارات فى الاسواق ومفيش مانع نشجع بعض وقت اللقاء ونشترى كتب بعض بجر رمزى ولو بنص التمن وده هيبقى دعايه لكل واحد بيكتب لان اللى هيشترى كتاب بسعره المخفض لانه مدون هيعمل دعايه ليه فى محافظته وبالتالى الدعايه هتكون متبادله بين الناس كل واحد او واحدة يعمل دعايه للتانى
- مساعدة الشباب اللى عايز يطبع كتب وشايف انه شغله يستحق النشر ومن ناحيتى انا متبرع بالمتابعه وتقييم الكتب المطروحة وعرضها على كبار المثقفين بمختلف كتاباتهم لتقييم الكتب وكمان هوجهه لدار النشر اللى تتبنى الطباعه والتوزيع وده من باب مساعده اى حد من المدونين نفسه يطبع بس مش عارف ازاىوغيرها من افكار حاسس انها هتفيد الكل واتمنى تلاقى قبول للنقاش واللى عاجبه الكلام يجيب معاه شغله على سى دى او مطبوع ونتكلم يومها فى التفاصيل
******************************************************

السلاااااااام عليكم

بعد اللف والدوران والمرواح والمجي شمال ويمين وخناقات ونشد فى شعر بعض اسبوع اهو لحد دلوقتي

قررنا خلاص (اه والله تصدقوا )

ان التجمع ان شاء الله هايكون يوم الجمعه القادمه الموافق 6/11/2009

وهاتنضم الينا البت خيخه واي كلام جدعنه منها يعنى وها نعمل التبرع المره دي عندنا فى المنصوره

ورحمة بشعب البلوج الغلابه المتبهدلين فى التجمعات والمفلسين من التبرعات

هاشحت عليكم اهو هههههههههههههههههه

المهم تفاصيل اليوم العظيم الشأن ان شاء الله

اولا ان شاء الله هانتبرع فى مستشفى اطفال المنصوره والى هى تابعه لجامعة المنصوره

وحسب التقرير البحثي انها اكتر مكان بيحتاج دم عشان امراض الدم عند الاطفال واتفقت انا مع الجماعه بتوع جمعية رساله
هايبعتوا معانا حد من عندهم عشان يسهلنا الدخول وما الى ذلك

وبالنسبه للتبرع المادي هاتتفضلوا الى ربنا مقدره على حاجه يجبها معاه وهايكون معانا مندوب جمعية رساله ومعاه دفتر الوصولات هياخد منكم التبرع ويديكم الوصولات

والمفروض ان التبرع هايكون لصالح قوافل الخير الى بتنظمها جمعية رساله


المواعيد بقى

يوم الجمعه الساعه العاشره صباحا هاكون انا قدام المستشفى هناك مستنيه حضراتكم


الناس بتوع المنصوره الى هايتاخر منكم عن الساعه عشره يعرف انى هاقتله

اه انا مش باحب اقف لوحدي اولا


وثانيا عشان ندخل نبدأ احنا تبرع على ما الناس المسافرين يجوا

طبعا الجماعه المسافرين يحاولوا يجوا بدري على اد ما يقدروا واول ما توصلوا المنصوره تتصلوا عليا

وهايكون الرقم ده معايا يوم التبرع ان شاء الله

وهافتحه يوم الخميس برضه عشان الى عايز يقولي أي حاجه بس هاقفله بالليل عشان انام ما انتم رخمين انا عارفه

وده اميل صلاح العمري مسدس صغير لو حد عايز يقوله حاجه برضهsasa198512@yahoo.com


المهم هانخلص التبرع قولوا على صلاة الجمعه هانروح نصلي فى مسجد السلاب ان شاء الله عند الجامعه برضه


وبعد كده هانطلع على كوك دور نتغدى برضه قدام المسجد على طول

وبعد كده هانطلع على نادي النيل باذن الله (يارب اوصل للمدير بكره ) ونقعد بقى هناك نلعب استغمايه وكده



بالنسبه للناس الى من خارج المنصوره

هاتنزلوا من وسيلة المواصلات الى انتم جايين فيها هاتلاقوا التاكسيات على طول والميكروباصات كمان

فى أي مكان فيه موقف هاتلاقوا كده لو ركبتوا تاكسي تقولوا لبتاع التاكسي الجامعه عند مستشفى الاطفال وهاتنزلوا تلاقونا فى وشكم على طول

عشان بتاع التاكسي ما يخمكوش هما 2 جنيه وزي بعضه ممكن 3 حسب المشوار عشان بس ما ياخدكوش لفتين ويقولك عشرين جنيه يا بيه عارفاااااهم

والي جاي بعربيته يسأل والى يسأل ما يتوهش او يتصل على أي حد فينا واحنا نظبطه

خلاص يا قوم كده كله تمام ؟؟؟؟؟؟

لسه حاجه فكروووووووووني

اه على فكره الاقتراحات خلاااااااااص فنيتوا خلصت انا كده جبت الاخر

ما اسمعش صوتكوا بقى

الاثنين، 26 أكتوبر 2009

تجمع مدونين فى المنصوره (تحديث تاااني انضمينا لخيخه )


خيخه اخدت راي الناس يا جماعه وقالت اوووك هاتيجى المنصوره وعلييه
فاحنا كده استقرينا على يوم الجمعه الجايه الموافق 6/11/2009
واي حد عنده اعتراض هاعوره بقى
وبالنسبه للترتيبات ادوني فرصه بقى اكلم الناس وارتب نفسي وارد عليكم بتفاصيل وترتيبات اليوم
ما اسمعش صوت حد فيكم بقى
****************************************************************
تحديييييييث : جرى البحث مع خيخه يا جودعان عشان نوحد اليوم
يعنى هى عندها تبرع بالدم يوم الجمعه الي بعد الجايه ان شاء الله يوم 6/11
فبما اننا ان شاء الله ناويين على تجمع فى المنصوره كان المفروض يوم السبت 7/11
فقنا نضرب عصفورين بحجر واحد
ونجيبهم فى المنصوره عندنا نشربهم شاي وناخد منهم دم
ههههههههههههههههه
وخيخه قالت هاتعمل عندها على المدونه استطلاع راي
الى موافق على انه يروح التبرع بالدم فى المنصوره يتفضل برفع يده
مواااااااااااااااااااافقه
هاتلاقوا الاستطلاع هنا يا قوم عند
على ايدك اليمين وانت داخل كده
***********************************************************************************************
سلاااااام عليكم


ازيكم يا حلوين


الحقيقه انا قلت بقى الى ما نعرفش نروحلهم نجيبهم هما لحد عندنا بالعاااااافيه


لا لا بالذوق يا حلوين وعلى راسنا


المهم انا سبتكم اهو تعملوا كل التجمعات بتاعتكم وفاتيما قالتلى ادينا فرصه ناخد نفسنا شويه من التجمعات


بس لقيت مسدس صغير بيقولي ان فى مجموعة مدونين عايزين تجمعوا فى المنصوره فنوحد بقى اللقاء وكده يعنى


المهمممممم بعد المداولات بينى وبين مسدس صغير وداليا قوس قزح


اليكم كل الاقتراحات الى توصلنا لها وعليكم انتم بقى تختاروا عشان انا احترت


اولا بالنسبه لليوم

فاحنا استقرينا على يوم السبت 7/11

الى هو السبت الى بعد الجاي ان شاء الله


ثانيا بقى الاقتراحات بالنسبه لليوم نفسه هايبقى ازاي


مسدس صغير قال كفايه مجرد لقاء نتعرف على بعض ونقعد مع بعض شويه عشان الوقت والناس الى مسافرين


قوووم داليا قوس قزح قالت كلا البت لازم نشاط خيري


قوم انا روحت لخيري قصدي لجمعيه رساله الخيريه وسألتهم على الاماكن الى ممكن زيارتها فى المنصوره ويكونوا محتاجين فعلا مساعده


اكتشفت الآتي


ان الملاجيء عندهم فلوس بس الى ماسكينها حراميه وحاجه زفت على الاخر


وناس كتير بتروح وبتودي حاجات عينيه كتير للعيال والعيال محتاجين بس توجيه يعنى حد يدوام على زيارتهم ويعطف عليهم ويوجههم

سواء ملجأ ا لكبار او الصغيرين


دار المسنين كذلك المشكله مش ماديه برضه برضه محتاجين زياره بس وكده


المهم قالتلى ممكن تروحوا مستشفى الاطفال بيكون فيها مثلا من 160 الى 180 حاله

بيكون منهم حوالي 100 حاله محتاجين مساعده ماديه او علاج


وبنعرف من خلال كلامنا معاهم وسؤال الناس الى بتشتغل فى المستشفى نفسهم

وبناخد معانا العاب بسيطه كده واحنا رايحين بالونات حاجات كده وهانروح تحت شعار الجمعيه هناخد منهم حد معانا عشان يجيبولنا التصريح بالزياره طبعا



وكمان قالولي فى جمعية رساله انهم بيعملوا حاجه اسمها قوافل الخير بيشتروا حاجات مواد غذائيه وسلع معمره وجهاز للعرايس وحتى كمان مواسير مايه وحاجات كتير اوي ويروحوا بالعربيات دي على بلاد كامله تحت خط الفقر منسيه

موجوده على حدود المحافظات وفى الادغال

ومش عندهم خدمات ولا مايه ولا صرف ولا حد فاكرهم اصلا


وقالت لو تقدروا تساعدونا احنا بنجهز لقافله هاتتكلف 80 الف جنيه وعرضت عليا اننا ممكن نروح معاهم فى موضوع القافله ده بس طبعا ده بهدله يعنى ما ينفعش يوم التجمع لانه سفر تاني اصلا



صلاح العمري بقى الى هو مسدس صغير اصحوا معايا


اقترح ا ننا نتقابل فى اي مكان ونتغدى سوا وكده ونزور مقر الجمعيه او حد فينا بس الى يروح يسلم التبرعات الماليه الى ربنا يقدرنا عليها للجمعيه لموضوع قوافل الخير


وبلاها الزيارات الى هتاخد وقت وتعطل الناس الى جايين من سفر وفى نفس الوقت فى حاجه مفيده فعلا وناس محتاجه فعلا



وبالنسبه لباقي اليوم

احنا نبدأ اليوم الساعه 11 عشان الى مسافرين يلحقوا يجوا


ولو هانعمل زيارات طبعا هاتكون الاول ونقول نخلصها على الساعه واحده


ونروح اي مطعم قريب نتغدى وزي ما تحبوا بقى لو تحبوا نروح نادي الاطباء مثلا نقعد شويه او اي مكان تقترحوه بالنسبه للناس الى من المنصوره يعنى عارفين الاماكن يقترحوا عليا


وبعدين على الساعه خمسه نقولكم روحوا بقى كفايه عليكم كده

هههههههههههههههه


ولو روحنا مستشفى الاطفال اليكم المطاعم القريبه المقترحه


جرين كورنر _ كنتاكي _ بيتزا استيشن _ كوك دور _ مؤمن


مترتبين حسب الاقرب من المستشفى


بالنسبه للاسعار تقريبا كلهم قريبين من بعض من 25 كده وانت طالع


شوفوا بقى هاتعملوا اييييييه عشان انا احترت بقى ومش عارفه اختار


عايزه اخد قرار فى خلال يومين عشان استقر وابدأ ارتببببب


يلا بقى سمعوني رايكم بسرررررعه
اه وما تعشموش نفسكم بالصوره الى فوق دي عشان الهدوء ده مش موجود بتاتا
دي تلاقيها متصوره الفجر مثلا

الثلاثاء، 20 أكتوبر 2009

لمسة حب


الدنيا برد اوي اوي


دخلت جوه البطانيه بسرعه ومدت رجلها بالرااااااحه وقربتها من رجله عشان تتدفى على بعد عشان ما تزعجوش

فجأه حرك رجله ولمست رجلها فسحبت رجلها بسرعه بعيد عشان ما يبردش هو

فمد رجلليه هو

وهو نايم وبدون ما يحس ولا يفكر


وحضن بيهم رجليها عشان يدفيها


كانت قلبها هايتحرك من مكانه من كتر الحب الى حسته منه دخلت جوه حضنه الدافي وهمست فى ودنه

باحبك اوي

قالها بصوت ملخبط ونايم باموت فيكى يا حبيبتى

اعتقد هى دي اجمل واصدق وادفى لمسة حب


باهديها في هذا اليوم التاريخى


لاجمل واعظم واحن انسان دخل حياتي
واقوله كل سنه واحنا طيبين
والعشر سنين الجايين يكونوا احلى من الحلوين الى الفايتين


السبت، 17 أكتوبر 2009

مجانية التعليم


السلام عليكم يا مدونينا الكرام


حد يعرف ايه هى مجانية التعليم


حد فيكم شافها ؟؟


انا عن نفسي ما شوفتهاش سمعت عنها بس


مع انى كنت فى جامعه حكومي برضه من الي هى المفروض انها مجانيه


المهم خلينا نجيب الشريط من الاول


التعليم المجاني الى احنا عايشين فيه من بداية عهد الثوره ده عمل ايه ؟


عمل كلام جميل اوي اوي فى الناس وكل الناس بقت بتتعلم والغني زي الفقير و و و و وباقي الكلام الحلو الى باسمعه


طيب خلونا نركز كده ونشوف


هل حال التعليم من بداية التعليم المجاني لحد دلوقتي اتصلح ؟؟


لا بلاش اتصلح فضل حتى زي ما هو ؟؟


الواقع الجلي انه من سيء الى اسوأ طبعا ولا فى حد عنده راي تانى ؟؟


يعنى يكون حد له شوق في حاجه


طبعا قائمه من الاسباب الى اولها واخرها قلة الموارد ونعمل ايه ما انتم الى ما تسمعوش كلام ماما كريمه وعددكم فى الطالع وصحتكم حلوه وكده يعنى


طيب ماشي


حد يقولي بلد مين هبله عامله التعليم الجامعي مجاني


حد تاني يقولي بلد مين هبله عندها تعليم جامعي قليل القيمه زي تعليمنا


والنبى بلاش تقولولي جزر القمر جامعتهم تقطع القلب واحمدوا ربنا والحركات دي


انا شايفه ان التعليم المجاني حلو وجميل اوي بس مش كل التعليم


نخلي التعليم المجاني ده مثلا لحد الاعداديه


والباقي بقى الى عايز يكمل يشتغل ويكمل اهله مرتاحين يكمل


انما يبقى الشعب كله داخل الجامعه والشعب كله مش عايز يشتغل حرفي والشعب كله عايز يبقى باشا وهو اصلا طالع من الجامعه شايل ختم على قفاه انه دونكي كبير ما بيعرفش يقرا حتى كويس ؟؟


طب وبعدين ؟؟


العيل الى معاه دبلوم دلوقتي بيقولك انا معايا شهاده اشتغل صنايعيى ؟؟؟!!!


والا الباشا الكبير بقى الى مش لاقي ياكل وبيقطع من لحم ابوه الحي عشان ياخد مصروفه بعد ما اتخرج من الكليه وبقى زي الجدار عشان مش لاقي شغل يناسب الختم الي على قفاه .


كان زمان قبل المجانيه ما تفكروش كانت ظالمه اوي زي ما بيصوروها


عمي الكبير قالي احنا كانت مدارسنا اه كلها ولاد البهوات الى فيها انما كانت فى منح للمتفوقين


كان العيل الى عايز يتعلم وعارف ان ابوه مش هايقدر يدفعله يقوم يجتهد ويذاكر ويتفوق فياخد اعفاء من المصاريف


يعنى ولاد الفقرا المتميزين علميا كانوا بيتعلموا مجاني برضه


طيب كتر خير ابو الثوره عملوا تعليم مجاني


الشعب كله اتعلم ؟


لا برضه


طيب ايه رايكم فى الاقتراح ده يا جماعه بصدق


ان التعليم يكون مجاني لحد الاعداديه بس مثلا

والتعليم الثانوي الفني ده ينضف عن كده ويبقى تعليم بحق وحقيق وما يبقاش مجاني برضه يبقى مدعوم بس وله مصاريف قليله


اما التعليم الجامعي بقى يا ترفع عنه المجانيه اصلا يا اما برضه يبقى بنظام الدعم الحكومي


دعم بس مش مجاني من الاول والاخر


ما حدش يقولي هى الناس نااااااقصه والمصاريف هاتبقى غاليه والبتنجان ده


العيال فى الجامعه بياخدوا دروس فى كل المواد ده انا هاموت من الغييييييييظ


يدفعوا فلوس الدروس للجامعه ويبقى فى دراسه محترمه


والعيال طلبة الجامعه التنابله الخايبين النايبين دول يهزوا نفسهم ويقوموا يشتغلوا


بدل الانتخه والنوم للعصر والسهر فى الكافيهات والصرمحه مع البنات


ولما يتخرج يقف بعين جامده يقولك انا مؤهل عالي عايزنى اشتغل بياع فى محل ؟؟؟ هاو كام ؟؟؟



انما دلوقتي

اتفرج يا سلام


شوف يا حبيبى انت ما لكش دعوه باي حاجه الى تطلبه مجاااااااب بس اهم حاجه تذاكر


ليه ياعم هو هايذاكر لك انت ولا لنفسه غيرو المبدأ خلوه يحس انه بيذاكر عشان نفسه اولا


حتى البنات بقوا طالعين تنابله مش عارفين يتحملوا مسؤلية بيوتهم بسبب الدلع ده


امال مش لحد 22 سنه (ده لو فالح يعنى ) انسان مستهلك من الدرجه الاولى ؟؟


الاقي واحد بيقول الواد قال بيقولي انا عايز اشتغل فى الصيف


طب ياعم وماله ما يشتغل


لا يا اخويا مش عايزين منه شغل بس يتنيل يذاكر هو

هو انا محتاج منه شغلللللللللل ولا انا قصرت معاه فى حاجه


اهو انت كده يا اخي قصرت معاه

حرمته من حق العمل والاعتماد على النفس والاحساس بالمسؤليه


خلي بالك

لو كان الى بيشتغل مثلا بيصرف على نفسه 400 جنيه فى الشهر حتى لو كان ده كل مرتبه


فالى مش بيشتغل تاكد انه هايصرف على نفسه ضعف المبلغ ده وهو ما بيقبضش خاااااالص


الله ما الفاضي يعمل قاضي


والقرش بيجى سهل هات ياحاج خد يا حبيبى


بتسم بدنه وانت بتديله القرش ؟؟ طب وايه يعنى جلدهم تخن


بره بيعملوا كده خدت الثانويه العامه يا حبيبى

طب يلا بره اشتغل بقى وورينا حلاوتك


ما قلتش اطردوهم بس على الاقل عودوهم يشتغلوا


نرجع تاني لموضوع التعليم


واقول يا ناس لازم نشوف حل


احنا كده شغالين بنفرخ عيال هبله ومتخلفه للبلد وخلاص على كده


وكل واحد شايل الختم على قفاه وماشي نافش ريشه ونفسه كبرانه على الشغل اوااااااااانطه


ياريته بيعرف حاجه


هو راح الكليه وخد دروس خد المذكرات حفظهم او فهمهم حتى ما تفرقش المهم انه ذاكر عشان يمتحن مش عشان يفهم


دخل اللجنه دلق الى عباه فى دماغه على الورقه وطلع من الامتحان ابيض يا ورد وخد الشهاده


وما حدش يقولي الغلابه مش هاتتعلم


اكلوا الغلابه الاول وبعدين فكروا فى علامهم


مش كاملين المعاني الغلابه وناقصين التعليم بتاعكم الفاااااااشل ده


وما حدش يقولي الجامعات الخاص موجوده


انتم عارفين كويس ان الجامعات الخاصه اسعارها مبالغ فيها جدا وكمان اغلبها نظام بيع شهادات والحركات دي


وبعدين انا مش بس عايزه التعليم الجامعي يبقى نضيف


لا انا عايزه المدارس كمان تبقى مدااااااارس


التعليم يبقى تعليم

الى الاهالي بيصرفوه فى الدروس يدفعوه فى المدارس والعيال تتعلم بصحيح بدل قرف الدروس دي


وغباوة اغلب مدرسين الدروس الخصوصيه الى كل هما الواد هايجيب كام عشان اهله يدفعوا المعلوم


احنا اصبحنا شعب مدمن على الدروس الخصوصيه


والمشكله اننا كمان اصبحنا حاملي شهادات فقط لا متعلمين ولا نيله


عنفك الخط ونقول كلام يمس القلب


اخرنا يعنى بنفك الخط


مش كددددددده ولا ايه ؟


على الله تقولوا ايه


الثلاثاء، 13 أكتوبر 2009

بصت فى المرايه ....



بصت فى المرايه .....


بصت فى المرايه وابتسمت وقالت الحمد لله . وقالت اللهم احسن خلقي كلما احسنت خلقي

بصت فى المرايه وقالت يا ساااااااتر شكلي غلط وانا مكشره


بصت فى المرايه وابتسمت ابتسامة حلوه اوي لما افتكرته وهو بيبص فى عنيها ويقولها بكل صدق انتى جميله اوي


بصت فى المرايه وقالت الله يخربيت البهدله انا شكلي بقى عامل كده ليه.


بصت فى المرايه واستغربت وقالت لنفسها ايه الحلاوه دي يا بت


بصت فى المرايه وضحكت لما افتكرت واحده غلسه كانت بتقول على واحده تانيه ان وشها نور بعد الجواز وافتكرت كمان حديث للرسول عليه الصلاة والسلام وقالت سبحان الله جاااااااايز برضه


بصت فى المرايه وبكل الغضب قالت لنفسها غبيييييييييييييييه


بصت فى المرايه وقالت فى نفسها مش مشكله بس دمي خفيف


بصت في المرايه وقالت وبعديييييين واخرتها ايه ولحد امته ؟


بصت فى المرايه وقالت والنبى انا حلوه اهو امال ايه بقى


بصت فى المرايه ولفت وشها شمال ويمين وقالت لنفسها وصدقتيه ماهو بيثبتك يا هبله


بصت فى المرايه وقالت يا اختي عليا وعلى جمالي


بصت فى المرايه بعد ما اتلمعت واتافلطت على الاخر وقالت يا خسارتك فى البهدله يا بتعه


بصت فى المرايه استغربت كده وبحلقت اوي وبعديين هزت كتافها وقالت جاااااااااايز برضه


دول كلهم ممكن يكونوا شخصيه واحده ؟؟


تفتكروا ؟؟


جايز


طيب انتم بتبصوا فى المرايه وتقولوا ايه ؟؟


ياريت كل واحد فينا يبص فى المرايه ويقول لنفسه الحقيقه


ياريت نقدر نصارح المرايه


وما نبصش فى المرايه واحنا مغميين زي البنت الى فى الصوره فوق دي


كل واحد وواحده يقعد على كرسي الاعتراف يلا ويقولي بيقول ايه لما بيبص فى المرايه



السبت، 10 أكتوبر 2009

احمد حسن البنا .... الف شكر


سلام عليكم




ازيكم يا قوم




او يا جودعان عشان خاطر استاذ احمد




استاذ احمد حسن البنا




الكاتب الجميل الفنان




الي عملي اهداء جميل اوي وذوق ودمه خفيف اوي ربنا يكرمه




وكتير عليا والله




يعنى عشان ما اعيش على الناس بقى هاعتبرها مجامله لطيفه منك


ههههههههههه






فى البوست ده هاتلاقوا الاهداء




انا والله محرجه ومش عارفه اقول ايه




بس انا حبيت اشكره واقوله ربنا يديم الخير والمعروف دايما




ومتشكره اوي


وربنا يكرمك ويوفقك ان شاء الله


الثلاثاء، 6 أكتوبر 2009

احنا الى كتب كتابنا كان مخدماتي .. مش مأذون


السلاااام عليكم




ازيكم وحشتوني والله ليا زمان ما اكلتش دماغكم


ايه رايكم فى عنوان البوست

دى عباره عن مقوله خالده لمعالي زايد (الى انا مش باحبها اصلا ) بس اعظم كلمه قالتها فى حياتها فى فيلم مجهول كده مش فاكره مع مين

المهم

كانت دايما تقول لجوزها كده

ده احنا الى كتب كتابنا كان مخدمااااااتي مش ماذوني

هى صحيح جمله معبره جدا جدا

بس انا لما دققت كده لقيت انه لاااااا كمان ولا حصلناها

طب حد فيكم عنده شغاله ؟

طب اليكم عشر فروق جوهريه بين الزوجه والشغاله :

اولا الشغاله بتاخد مرتب محترم اي والله محترم احسن من الموظفين فى بلدنا للاسف الشديد

الزوجه بتاخد ايه ؟؟ بتاخد كلمتين فى جنابها ممكن ؟؟!!


ثانيا : الشغاله لها يوم اجازه فى الاسبوع وحتى لو مقيمه المفروض القانون بيكفل لها ساعات راحه يوميه ونوم واكل واجازه سنويه كمان

الزوجه بقى يا حبة عين امها شغاله اربعه وعشرين ساعه فى اليوم 365 يوم فى السنه ولا عطل ولا اجازات حتى وهى نااااااااايمه

المفروض تكون فى وضع الاستعداد يعنى اون ديموند على طول . ويا حبذا لو نامت تحلم انها بتغسل الاطباق .

ثالثا : الشغاله ما بتذاكرش للولاد ولا بتوديهم للدكاتره ولا بتشتري لهم لبس ولا الافلام دي كلها

الزوجه بتعمل كل ده يا حبة عينى فوق البيعه كده .

رابعا: فرضا الشغاله بتشتغل شغلتين كل واحده نص يوم فبتاخد مرتب من الشغلتين طبعااااااا

الزوجه بقى لو فكرت تشتغل فهى بتشتغل نص اليوم الاولاني وتاخد مرتب تصرفه على البيت الى شغاله فيه نص اليوم التااااااني وتطلع منفضه برضه ولله الحمد .

خامسا : الشغاله بتلاقي الى يقول حرام اكلوها كويس وحرام لبسها وحرام عاملها كويس ولو ضربوها ترفع عليهم قضيه وتطلع عنيهم


الزوجه قطع فيها براحتك يا معلم هاتلاقي مليون لسان عايز قطعه بيقولها استحملي واصبري وربي عيالك وايه يعنى ماهو جوزك برضه


سادسا : الشغاله بتلبس اي حاجه وشكلها مش مهم وبتخلص شغلها وتروح او تنام

الزوجه هيهات . لازم تشتغل شغل الخدامين ده كله وبعدين تبقى فى نفس ذات الوقت حلوه ولابسه شيك وفاتحه بؤها اثنين متر بابتسامه عريضه والا تبقى زوجه مهمله فى نفسها ومش مراعيه حق جوزها .


سابعا :الشغاله لما بتمرض بتاخد اجازه ولو كانت مقيمه عندك هاتمرضها وتجيبلها الدكتور و العلاج


الزوجه تمرض ما تمرضش مالناش دعوه البيت ماشي عااااادي بس زي بعضه بنجيب لها الدوا


ثامنا : الشغاله مش هاتمن عليها بالفلوس الى بتصرفها على اكلها وشربهاولبسها ومرتبها لو كانت مقيمه


الزوجه تقدر كل يوم الصبح تعايرها انك أنيها وبتصرف عليها هى وعيالها (على اساس ان ده مش فرض عليك غصب عنك وان العيال دول هى جايباهم من السوبر ماركت لحسابها)


تاسعا: الشغاله تقدر فى اي وقت وبكل بساطه تمشي وتسيبك تتفلق انت وعيالك والى خلفوك

الزوجه للاسف ما تقدرش تعمل كده عشان عيالها وعشان المجتمع كله هايحكمها ويحكم عليها بالاعدام لو عملت كده


عاشرا : لو قليت اصلك وعملت حاجه مش تمام مع الشغاله هاتروح النار اولا وجايز الشغاله تبتزك وجايز تفضحك وتبقى فضيحتك بجلاجل


الزوجه حاجه ببلاش كده وياريت تامر فيك ده انت بتتامر وعينك على ابو سيلكون يا طفس


بس خلاص كفااااااااااااايه


البوست ده اهداء مني لجمعية المرأه المتوحشه وعضواتها الحلوين


دوروا على حقوكم يا بناااااات


اي خدمه يا رجاله


فى تأليب نفس اكتر من كده ؟؟


باهدي النفوس بس
هواااااااايه

اه والصوره الي فوق دي انا لطشاها من البت خيخه

السبت، 3 أكتوبر 2009

قصة خلق آدم عليه السلام .... على الرؤيه


سلام عليكم يا مدونينا الكرام




هى اسلوبها بسيط مناسبه اكتر للاطفال




الى هناك يا قوم