الخميس، 28 فبراير، 2008

8-هو يعنى ايه رومانسيه ؟؟!!!!

السلام عليكم ازيكم وحشني الرغي جدا . ها ايه رأيكم فى العنوان برضه تبع إلهام العنوان ده وليد اللحظه . ايه بقى هي الرومانسيه ؟؟؟؟
اصل انا مش عارفه ليه الكلمه دي لما باسمعها من حد بتعصبني !!! اصل الى بيقولوها باحس انها طالعه منهم مش مسرحه شعرها كده او حاجه. تلاقي واحد يقولك ايه انا رومانسي وعايز واحده رومانسيه ( على شريط الرسايل فى اي قناه مالهاش لازمه ) او واحد يقولك انا مشكلتي انى أنا رومانسي جدا .
فأنا قعدت اقول يا ترى ايه هى الرومانسيه دي الى بيوصفوا نفسهم بها ويدوروا على حد عنده زيها . قلت يمكن مرض معدي ولا حاجه وعايزين حد زيهم عشان ما يعدهوش يجي معدي جاهز ؟؟؟
وبعدين بقى ا لعصفوره قالتلى ان الرومانسيه دي الى هو ؟؟؟؟ ايه ده ؟؟ تصوروا مش عارفه اوصفهم من وجهة نظرهم .
لكن انا بقى بعد ما العصفوره وصفتهم سألت نفسي . هى الرومانسيه دي ان الواحد يكون كده ضامم حواجبه وماسك ورده حمرا ومنديل قماش كبيييير وقاعد يسمع عبد الحليم ويعيط وكده يعنى ؟؟؟؟!!!
ولا انه اول ما يشوف او يسمع حبيبه يقعد يسنسن ويعطف ويبربش لحد ما يحول ؟؟؟؟!!!!
ولا بقى النوع الرومانسي على اخر عزمه الى هو بيحب طول عمره مع نفسه ويعيط ومذهبه فى الحب ايه ؟؟؟؟ احفظوا بقى . الحب من غير امل اسمى معاني الهبل .
المهم عشان ما اطولش عليكم انا بصراحه مش شايفه ابدا ان الرومانسيه تطلق على شخص عموما انما شايفه انها حاله . يعنى ممكن اوصف موقف انه رومانسي مثلا . انما اوصف شخص انه رومانسي الى هو ماله يعنى ؟؟؟؟!!!
انه بيحب الرومانسيه يعنى تقصدوا ؟؟؟ متاكده ان مافيش حد ما بيحبش الرومانسيه ولا في حد ما نفسوش فيها .
بس زي ما قلتلكم المره الى فاتت احنا كمجتمع عندنا مشكله فى التعبير عن الحاجات الجميله .
يعنى ممكن يكون واحد جد جدا جدا ولكن مع ذلك يعيش موقف او حاله رومانسيه للحظات حتى . انما الكلام الي الشباب شغالين طول النهار فيه انا رومانسي وانا رومانسيه والافلام دي .
والواحده فيهم تحسب انها رومانسيه بقى انها تقعد تبربش. تقوم يا عينى تفضل تبربش طول حياتها لحد ما تحول ولا حد سائل عنها فى يومها .
اه نسيت حكاية الرومانسيه دي بتفكرنى الفلانتشيييييين داي . يوم اهبل من الهبل اقف فى البلكونه ابقى مش عارفه اضحك على الهبل الى لابسين احمر ومحصبين ولا أعيط على الحاله الى وصلنا لها .
على فكره الى عايز يعيش موقف رومانسي مش لازم يستنى الطرف التاني يعيشهوله . لو جه فى مناسبه حلوه وجاب هديه بسيطه وحلوه وعملها مفاجأه ( اه مش خدي انزلي اشتري هديه اصل انا مش باعرف !!!!!) . او عملتي حاجه حلوه وقلتيله كل سنه وانت طيب زي النهارده يوم لما وقعتك من نظره واحده . اي حاجه يعنى . المهم الى عايز يعيش رومانسيه يقدر يخلقها .
وبالنسبه للمتجوزين من عشره عشرين سنه لو حاولوا يعملوا كده فجأه وهما ما كانوش بيعملوا كده الطرف التاني هايطلبلهم البوليس . ويمكن يحجزلهم فى مستشفى امراض نفسيه وعصبيه . فلو عملتوا كده توقعوا اي رد فعل غريب لكن ما تيأسوش . السور الى اتبنى فى سنين مش ممكن يتهد فى لحظه .
واشوفكم بقى مش عارفه امته لكن اشوفكم على خير يارب . والبوست ده الى يقراه يسيبلى ربع جنيه عشان ابقى اشتري ورد واضم حواجبي واسنسن شويه مع نفسي .

الثلاثاء، 26 فبراير، 2008

7- ساحرة القلوب غائبه

بسم الله الرحمن الرحيم
 بعد ما احتارت وحيرت الناس معايا عشان اختار موضوع للبوست . كالعاده لما بدأت اكتب الهام جت فجأه وقالتلى اكتبي عن بياع الفاكهه الى تحت البيت عندكوا . ( الهام دي الى كل الكتاب والناس دي بيقولوا عليها يعنى اشمعن انا )
ماله بقى بياع الفاكهه الى تحت بيتنا ؟؟؟ الراجل كتر خيره وشه سمح سماحه - اللهم احفظنا -مافيش بعدها سماحه مع انه واخدها - المطوه يعنى- عياقه كده فى خده بس عادي كل ما انزل اشتري من عنده لازم يحصل بينا مشاده كلاميه على الاقل بسبب خلاف فى وجهات النظر لانه معتقد اني حوله ومش شايفه التفاحه البايظه والبرتقاله الضاربه الى حطها فى الكيس . لكن انا مش حوله الحمد لله او لسه ما بقيتش .
لكن بقى انا عجبنى حاجه فى الاخ الى واخدها عياقه فى خده انه دايما تلاقيه منظم الفاكهه بتاعته وحاطط الفاكهه الحلوه السليمه الملمعه دي فوق كده ومخبي الضاربه تحت . انما ابراز الشيء الجميل ده حاجه عظيمه فلسفه عليا .
الاخ ده بكل بساطه بدل ما يقف يقول باثنين جنيه تعالى يا بيه . وفر على نفسه التعب وخلى البرتقال الحلو على الوش يتحدث عن نفسه وكتب عليه يافطه بالسعر ( بس مش هو ده السعر الى هاتشتري به ده سعر القفص البايظ الى وراه) .
طيب زهقتوا من اقفاص ا لفاكهه نشوف الرابط العجيب بين اقافص الفاكهه والاقفاص الصدريه ؟؟؟!!!!
السؤال ::: احنا ليه عندنا مشكله فى التعبير عن المشاعر والحاجات الكويسه ؟؟؟؟ انما لسانا 3 متر لو كنا عايزين نقول لحد انت مال عنيك باصه لبعضها ؟؟؟ وبكل شجاعه وهمه نقووووول : أنا اقول للأعور انت أعور فى عينه( أحيانا باعتبرها بجاحه مش صراحه) . طب ليه كمان ما تقولش للي عنده عنين اثنين انت عندك عنين جميله ربنا يحمي ؟؟؟؟!!!
عارفين ايه الكارثه فعلا ؟؟؟ ان الى انا باقوله ده بيحصل بين ناس المفروض يكونوا اقرب ما يكون لبعض، الازواج مثلا !! بين الاب واولاده !!!! والام واولادها !!!! حتى والله والاصدقاء والقرايب !!!! تلاقي مافيش تعبير عن موقفك ومشاعرك الحقيقيه الحلوه لباقي الناس السلك بيجى لحد الكلمه الحلوه ويقطع .
بالله انا مره واحد بيشتكى من مراته انها دايما متذمره وده بيضايقه وعندها احساس ان هو مش عاجبه حاجه ابدا . قلتله: وهو انت فعلا مش عاجبك العجب زي ما هي بتقول ؟؟؟ قال : أبدااا. قلت انا : طب هى جابت الاحساس ده منين ؟؟؟ هو : مش عارف .أنا: طب انت مبسوط منها ؟؟؟ حضرته : اه الحمد لله، فى حاجات بتضايقنى منها ساعات لكن فى المجمل هى كويسه . أنا وأنا عارفه الاجابه : طب انت عمرك اظهرت فرحتك بحاجه كويسه فيها زي ما بتظهر ضيقك من الحاجه الى بتضايقك ؟؟؟ قالي ( وده الصريح كمان والله) : مش عارف . قلت: إعرف الاول وبعدين لوم عليها .
حاجه تانيه شعور غريب عند كل المراهقين ان اهاليهم مش طايقنهم طب ليه ؟؟ سن صغير جواه طفل مش عايزه يظهر محتاج مشاعر اهتمام من الاخرين لكن فى السن ده بيبدأ الاهالي يبعدوا عن عيالهم عاطفيا وشويه شويه يبقى من المستحيل ان الاب او الام ياخد ابنه فى حضنه. وبعد مناقشات مع الطرفين وضغط عليهم شويه لقيت المشكله انهم بعد سنوات جفاء مكسوفين يعبروا عن المشاعر الحلوه الى جواهم وبيسقطوا ده على الطرف الاخر وجفاؤه مع انه هو كمان له دور فى الجفاء ده .
أرجووووووووكم يا جماعه نكلم بعض كلام حلو ونزوق كلامنا زي ما عمو بتاع الفاكهه بيعمل مش هايحصل حاجه ممكن نتكلم عن الوحش بس عن استحياء وبرفق وبهدوء( زي بتاع الفاكهه برضه الى بيدبس الناس فيها وهى مش حاسه لكن هايشوفوها برضه لما يروحوا ) وفى وقت مناسب من غير ما تخلي الى قدامك يكرهك ويكره نصحيتك خليى دايما الحلو يبقى على الوش ويبان اكتر .
فيه مسلمات اه . زي مثلا واحد يقولي هو فى حد يكره ابنه المفروض هو يعرف كده ؟؟؟؟ وواحد يقولي هو انا عشان مراتي تصدق انى باحبها افضل رايح جاي اقولها باحبك ؟؟؟ ما هى عارفه . بينى وبينكم وكلام سر الناس دي الى بتقول الكلام ده هاتموت وتسمع كلمه حلوه . بس مش عارفه زي ما بيكونوا مكسوفين يسمعوا ومكسوفين يتكلموا .
هو الكلام الجميل والتعبير عن المحبه وتعديد محاسن الناس كلما سنحت الفرصه بقى يكسف ؟؟؟؟؟
اشمعنا لسانا طويل فى تجريح بعض وما بنتكسفش وتندب في عنينا رصاصه ؟؟؟
عشان خاطري حتى لو بتتكسف او بتتكسفي جاهدوا نفسكم ودربوها عادي هايجى منها والله واتكلموا قولوا الى في نفسكم انتهزوا الفرص .
عارفين الازواج الى بيفتقدوا النقطه دي ؟؟ هما الاثنين مقصرين طبعا لان مافيش علاقه بتبوظ بسبب طرف واحد لازم يكون الطرف التاني كمان غلطان ولو بسلبيته . فى الاخر بقى كل واحد فيهم يبقى عنده جفاء من التاني حتى لو الطرف التاني حاول يقرب بينفر هو على سبيل الدلال مثلا او الاعتداد الزائف بالنفس او الهبل حتى مش مشكله . انما المشكله بقى ان ممكن الزوج الى كلامه بقى جامد جدا مع زوجته كلامه يبقى حاجه تانيه خالص مع زميلات العمل وده يجننها اكتر وتقولك ما هو بيعرف يطبخ القرع اهو جت لحد انا بقى ؟؟ وهو كمان يسمع ضحكها فى التليفون مع صاحبتها حتى يقول اه اضحكي يا اختي البوز ما يطلعش الا ليا انا !!!!!!! واه لو سمعها بتقول لامها ما اتحرمش منك يا ماما ........ طيب يا اختي خليها خليها تنفعك . سلسلة من الحاجات الى تخلي الحياه سوداء وتنذر بوجود بركان تحت الرماد .
قول لمراتك انتى احلى واحده فى الدنيا . قولي لجوزك انت اعظم واحد في الدنيا . قول لابنك انا بافتخر بك وباحمد ربنا انك ابنى . قول لامك وابوك لولاكم عليا كنت ولا حاجه وبوس اديهم . قول لصديقك انا ربنا كرمني بك وباعزك زي اخويا . مش مره لا مليون مره( العمر طويل ) كلما سمحت الظروف بالعكس ترصدها كمان واتصلب عشان تقول كلمتين حلوين . الكلمه الحلوه هى فعلا ساحرة القلوب . بس نتعلم فنها ومش بيجى مره واحده انشاله تتعلم فى عشر سنين المهم النتيجه .
صدقنى حياتك هاتتغير . هاتقول كلام جميل وتسمع كلام جميل اوي . جربوواااااااااااااا .
انتم لسه هناااااااا ؟؟؟ يلا كل واحد يفكر هايعمل ايه لما يروح .
وياريت لو كلامي اثر بالايجاب على اي حد فى حياته يقولي ولو فى ودني اصل ما تعرفوش قيمتها ايه عندي .
وأشوفكم على خير وسعاده يارب
وما تكتمش ابدا الكلمه الحلوه . الكلمه الحلوه أكبر ساحره للقلوب .

الأحد، 24 فبراير، 2008

6-خلى بالكم من دخان الطبيخ

السلام عليكم . ازيكم يا قطاقيط ؟ اه اه قطاقيط افرحوا بشبابكم شويه . ايه رايكم فى العنوان اول مره اختار عنوان بوست قبل ما اكتبه .
تفتكروا ايه اهمية دخان الطبيخ عشان نخلي بالنا منه شوفوا أنا عايزه اكلمكم عن المرأه النص الحلو فى المجتمع - اه حلو مش عايزه ولا كلمه - وهاقول كلمتين لكل البنات والستات يحطوها حلقه فى ودنهم . وكلمتين للرجال برررررضه يعلقوها فى الموبايل حتى ما لناش دعوه .

يا نساء العالم اياكم والتنازل عن انفسكن . التنازل ؟؟؟ اه اوعي تتنازلي عن نفسك . عارفه بتتنازلي ازاي ؟؟؟ انك تلغي شخصيتك ووجودك وتنسيهم وتذوبي فى شخصيات اخرى تحبينها اكثر من نفسك . خلى بالك اوي كل الناس هاتشجعك اوي وتقولك برافوا عليكى حتى لو ما كانوش هما الي انتى تنازلتي لهم عن نفسك ( ناس بتشجع كده وهى مش غرمانه).
طبعا تسألى من دوووووووول الى اتنازلت انا هنا اهو لسه . هاقولك مين بتحبيه اكتر من نفسك ولادك وجوزك وبيتك . اه ده كلام حلو اوي هما على راسنا بس وانتى محتفظه بنفسك .

ازاي تحتفظي بنفسك ؟؟؟؟
سؤال مهم برافوا عليكى . اقولك ازاي طبعا مش هاقولك الكلام الفارغ بتاع الناس الى بيجوا يجعجعوا بكلام سطحي ومتخلف . ( الى هو حافظي على رشاقتك اهم حاجه ومظهرك وسايري الموضه وما تبقيش معقده وريحة البصل وسمنتك فى الاكل كتير وكده يعنى) فكر الاعلام الهابط المسيطر على المجتمعات العالميه كلها .

لا اهم حاجه ان مخك ما يصديش . ما تخليش دخان الطبيخ يعمل غيامه على عقلك . اه بعيد عنكم دخان الطبيخ ده اثره وحش اوي لما ما تلمعيش مخك منه يا لهوي بيعملى بلاوي .
مش هاقولك بقى لازم تشتغلي وتحققي ذاتك وحقوق المرأه واخلعي جوزك وارمي عيالك فى الملجأ لا لا خالص . ياما ستات بيشتغلوا وموظفات لهم سنيييييين طويله لكن برضه ما بيشيلوش اثر الدخان بالعكس بيدخل عليه بقى كمان غبار الشوارع بيعمل بلاوي . لان طبعا انتم عارفين ان اغلب الوظائف الحكوميه مافيش فيها شغل اصلا ولاابداع ولا اي جديد بيروحوا يفطروا ويكتبوا ورقتين على الكمبيوتر يغلطوا فيها ويفكروا بقى هايروحوا امته وهياخدوا الحوافز امته .

لكن هاقولك خلى بالك من عقلك شغليه فى اي حاجه . اي حاجه غير الطبيخ والعيال والبيت وحلة الباميا باللحمه الضاني الى فى التلاجه .اعملي اي حاجه اقري فى اي كتاب شوفي برامج ثقافيه محترمه مش بس تسمعي الشيخ سالم بتاع قناة الناس . ولا تعيطى قدام حسان وهو بيدعي لا مش ده تشغيل المخ برضه .
بصي قطعي نفسك واعملي كل شيء فى الدنيا عشان تحتفظي لنفسك بساعه مثلا او نص ساعه حتى يوميه او حتى غير يوميه على فترات كوني فيها نفسك. اعملي اي حاجه بتحبيها وفكري وخلي لك راي ما تتنازليش عن رايك ونمي فكرك .
عارفه لو استسلمتى للمجتمع ككل من أول امك وزوجك واولادك وأصدقائك الى يمكن يقعدوا يعددوا مشاكلهم وينوحوا على ما اصابهم وفى الاخر يقنعوك ان الناس كلها كده بمعنى استسلمي ؟؟؟ عارفه ايه هايحصل ؟؟؟ بعد فتره طالت او قصرت هاتكون قالبا فارغا الا من القلب الذي احب من تنازلت لهم عن نفسك . وهاتبقي ساعتها مش قادره تسايريهم ولا تتكلمي معاهم حتى جوزك هاتلاقي نفسك بعيده عنه هو تفكيره اتغير ونمى مع الزمن والخبرات المختلفه وانتى زي ما انتى. وصدقينى هاتلاقي نفسك غريبه وسطهم وتلاقي الدنيا فضت حواليكى .
ناس كتير هاتعارضني وتقول احنا بنحب امهاتنا حتى لو كانوا مش بيعرفوا يقروا ويكتبوا اها بس بتحبها حاجه وتشاركها حياتها حاجه تانيه . لازم يكون لك اهتمامتك الخاصه الى تملي بها حياتك لما تفضى او تكاد تكون فاضيه .
ومش فاهمه ليه بنقول شعارات وبس من غير ما نفكر فيها زي التضحيه المطلقه وان الامومه انك تكوني لا شيء الا الام حتى انهم بيغفلوا دور الزوجه ودي مشكله كبيره . بيركزوا على دور واحد وهو الام مع المفروض ان الشخص ممكن يلعب ادوار اجتماعيه متعدده وده الصح والطبيعى .
والى تقولك مش مهم انا كفايه عليا اشوف ولادي كويسين وناجحين ؟؟؟!!! طب ليه ما يكونش انتى وهما ناجحين ؟؟؟
ليه تتنازلي عن نفسك بغير سبب ؟؟؟!!
مش معنى كده انى بانكر دور الام ولا تضحيتها لكن مجرد انها تربي ولادها اساسا بتضحي كتير . لكن لو فكرت مجرت تفكير فى تقدير ذاتها واستكمال عناصر شخصيتها هاتلاقي الى بيعارضها .
زي كتير من الناس ما بتقولي بدل ما انتى قاعده هنا روحي شوفي ولادك ؟؟؟!!!! هل معنى وجودي على النت اكون انا مش عامله كل واجباتي ومسؤلياتي ؟؟؟
ليه مش بيقولوا كده للستات الى بيشتغلوا شغل مالوش لازمه ؟؟؟ عشان بتاخد مرتب اخر الشهر ولا عشان الاعلام بتاعنا سقانا ان عمل المرأه حق مكفول لها . حتى لو كانت مش محتاجه المرتب؟
وليه مش بيقولوا كده للستات الى قاعدين متابعين كل المسلسلات الى فى الدنيا لدرجه ان واحده مره قالتلى انها متابعه 16 مسلسل ؟؟؟؟ تخيلوا ؟؟؟ اه والله العظيم كنا فى رمضان ومش واحده بس والله ناس كتير .
كمان مش معنى كلامي انى مش عايزه الستات يهتموا بمظهرهم لا طبعا بالعكس لكن مش هى دي المشكله اطلاقا لا الجمال ولا الميك اب ولا الموضه ولا اختفاء ريحة البصل هو الى هايخليكى شخصيه قويه ومحترمه وجميله وذات كيان وراي يحترم . انما طبعا لازم تهتم بنفسها وشكلها لكن مش بس شكلها هو المشكله .

ده كله كان الحلق بتاع الستات لسه الميداليه بتاعة الرجاله .
ارجووووووووووكم بلاش تلغوا شخصية الست لانكم انتم الى هاتندموا . وانت عندك 25 سنه عايز تحس انك بقيت راجل وتبقى انت كل شيء . وتبدأ بقى من اول الخطوبه . انتى بتدخلي النت ؟؟؟ لا بلاش النت فيه ناس مش كويسه .
انتى بتخرجي مع فلانه ؟؟؟ لا بلاش مع فلانه ولا غيرها لما تحبي تخرجي قولي وانا اخرجك يا ستى انا عنيه ليكى ( ده عنيه دي عشان الخطوبه بس ) الى اخره .
ندخل على الجواز : انتى رايحه عند خالتك فلانه تزوريها ؟؟ لا مالوش لازمه كلميها فى التليفون كفايه بصراحه كده انا مش باستريح لابنها . مش ده الى كان عايز يخطبك ؟؟؟
(مع انه هو طبعا بيدخل النت وبيخرج مع اصحابه رغم انه عارفه ان الواد فلانه ده واد بتاع بنات ووحش بس مش مشكله وبيزور عمته الى كان بيحب بنتها قبل ما يقلبها لما دخلت كلية طب وعقدته ). عااااااااادي
خلفت : مالوش لازمه الشغل جايلنا منه ايه مرتبك صغير هايروح على لبسك وحضانة للبيبى خليكى فى البيت احسن ومش هاينقصك حاجه . جيم ؟؟ جيم ايه يا ستى انتى كده حلوه عاجباااااااااني . .............. الخ .
وهكذا تبدأ انت فى امتصاص شخصيتها ومسخها وتخليها ولا حاجه لا فكر ولا شخصيه ولا جديد ولا اي حاجه بعد ما يبقى عندك 45 سنه تكون هى بقى مثلا 40 او اقل او اكثر وعندها 3 او 4 عيال . ودخان الطبيخ اشتغل تمام معاها .
وانت فكرك اتغير جدا وبعد ما كنت محتاج زوجه وحبيبه وام لاولادك الصغيرين . بقيت محتاج كمان شريك وصديق بعد ما اتفرقوا الاصدقاء القدامي وبقت علاقاتك شبه سطحيه بالناس . وتتلفت بقى ما تلاقيش غير زميلتك فى العمل الى عندها شخصيه وراي وحكمه وزوق وشايفه نفسها من كله وبتفهمك وبتلاقي عندها جديد وتلاقي عندك جديد وتبدأ دايره تبشر بمشاكل لا حصر لها . نداااااء ( احتفظ بشخصية زوجتك ونميها ده لا ينقص من قدرك ابدا لكن حافظ عليها واحميها فى الاخر هى لك واوعى تقطع حبل الاتصال الفكري بينك وبينها عشان ما تندمش ).
وكفاااااااايه بقى عشان هاتخنقوني .
والبوست ده اهداء الى صديقتى الى أخدت منها كلمة دخان الطبيخ والى نفسي تحاول تلمعه كل فتره ونفسي اشوفها .
وانا كتبت دلوقتي مخصوص عشان خاطر اثنين عزاز عليا في الشات الى بادخله وبيشرفوني هنا كتير هما ( على بالي - وندى)

السبت، 23 فبراير، 2008

5-رغي إمرأه غير مطحونه

ما لقيتش عنوان تاني عشان مش عارفه لسه أنا هاتكلم فى ايه تتصارع الافكار فى راسي -حلوه تتصارع - وعايزه اتكلم فى حاجات كتير اوي بس مش عارفه ليه مش راضيه تيجى معايا فى البدايه قلت ارغي واكتب الى يجى على بالي.

طبعا انا بقالي كام يوم ما كتبتش ولانى مش مطحونه زي ما قلتلكم احب اقولكم انى كنت فااااااااضيه جدا ومش باصرخ واصوت ولا حاجه اليومين الى فاتوا عشان كده ما عرفتش اكتب حاجه . واصلا انا مستاذنه بنتى فى الكمبيوتر نص ساعه عشان هى حاجزاه النهارده من اول امبارح باين .
هى دايما بتحب تحجز من بدري يعنى مثلا لو قلت لها روحي اعملي الواجب بعد ما تناقشنى شويه ان الوقت مش مناسب للواجب لان (فتيات القوه)-ده كارتون- شغاله وهى متابعاها وبعد مفاوضات يبقى تعمل الواجب بعد فتيات القوه ما تخلص فأول ماتخلص تجيلى وانا واقفه فى وسط الحلل واخوها الصغير قاعد فى حله منهم تقول: ماما ممكن بعد ما اعمل الواجب ابقى العب على الكمبيوتر ؟؟ انا: اه بس روحي اعملي الواجب الاول . هى بعد ما تروح لحد اوضتها وترجع : ماما ممكن تجبيلى اشرب او أي حاجه ( مش عارفه ايه اي حاجه دي ) . أنا وانا هاطق : اتفضضضضضضضلي . هى بعد ما توصل لباب المطبخ: ماما ممكن بعد ما اخلص الواجب والعب على الكمبيوتر وازهق منه ابقى اروح ازور شروق صاحبتي . أنا وانا باصوت : رووووووووحي اعملييي الواااااااااااااجب . هى وهى بتجري : يووووووه حاضر بقى . مشهد من حياتي مع رحمه إلى ما عندهاش رحمه بنتى الوسطى .

أه بما اننا بنرغي عن العيال بقى حصل حاجه مهمه اوي من كام يوم السرير بتاع خالد الى هو ابنى اتكسر كل شويه الاقي جاي جايب قطعه من السرير ويقول ماما ده قطع . وبعد ما كان السرير ده عقبه فى حياته لأنه ما بيعرفش يطلعه لوحده ولا ينزل منه لوحده لأنه سرير بيبى ومؤمن يعنى. هو خلع العمدان الجانبيه بتاعته مش عارفه ازاي مع انه سرير حديد ما علينا . هو دلوقتي بقى فى منتهى السعاده عشان بيعرف ينزل منه ويطلع .
ايه بقى المهم فى الموضوع عشان نتكلم فيه اكتشفت حاجه بجد مهمه . انا كنت لما اقوله يلا عشان تنام يا خالد يعيط ويقولي لا واتحايل عليه شويه وازعق فيه شويه لحد لما سعات كانت تنتهي ا ني اسيبه فى السرير يعيط شويه لحد ما يقتنع انى مش هاشيله من السرير واراضيه وينام اخيرا .
انما بعد ماالسرير اتكسر وبقى عنده حرية الدخول فيه والنزول منه لما باقوله يلا عشان تنام يا خالد يجري يطلع على السرير ويتغطى ويعمل انه نايم كمان . طبعا فى اغلب الاحيان بيقوم عشر مرات على الاقل واروح معاه تاني اوديه اوضته لحد ما فى الاخر ينام .
لكن الفكره هنا انه لما بقى حر ويقدر يمشي منه فى اي وقت بطل يعيط اول ماا دخله ينام ولانه فعلا بيحب ا لسرير ومتعود عليه ومش بيعرف ينام الا فيه . وجود الحريه دي خلته كمان رضى به من غير تحفظات . يعنى هو كان كل مشكلته ان السرير ده بيفرض عليه مش بيختاره هو ؟؟؟!!! على فكره هو عنده سنتين . طبعا السراير دي مش معموله عشان نحبس العيال فيها حبس انفرادي لكن مهم انه لما يكون نايم يكون متحدد اقاماته عشان ما يصحاش وانا نايمه يعث فسادا فى الارض ويمكن يولع فينا واحنا نايمين .
بجد فكرت فى الموقف ده . وقلت يااااااه حاجات كتير كانت ممكن تبقى احسن لو كنا بنختارها فعلا مش بنجبر عليها . يعنى مثلا كتير أوي بيحصل ان اثنين يتجوزوا مجبرين على بعض او طرف منهم مجبر ويفضل الطرف ده مش طايق التاني لمجرد فكرة انه مجبر عليه. ويمكن لو كان اختياره كان سعد به وعاش حياه عاديه وناجحه معاه ؟؟؟!!! يمكن الله اعلم.
كمان الواحد لما يكون الشيء من اختياره فعلا مش مجبر عليه باي شكل بيتحمل مشاكل الاختيار ده وسلبياته بصبر أكتر ويكون عنده دافع اكتر لانجاح الامر .
وعلى المستوى العام تفتكروا لو كنا (اخترنااااه اخترنااااااااه) بصحيح مش تمثيل كنا يمكن بلعناله الزلط ؟؟؟؟!!!!! وتفتكروا لو كنا حتى سابولنا فرصة الاختيار تاني ما كانش ممكن نختار الى هما عايزينه بس بمزاجنا . الشعب الامريكى اختار ابن رئيس الولايات المتحده السابق جورج بوش. بس مش عشان هو بس ابن جورج بوش لا عشان هو كمان كان شخصيه سياسيه بالفعل .( زي حلاتنا يعنى) لو كان هو انسب واحد فى الدنيا للمكان ده . هل لو اجبرنا عليه هانكون راضييين وقانعين به ؟؟؟

الخلاصه انى شايفه ان حق الاختيار والاختياريه عموما بين الامور بتدي مساحه من التوافق النفسي مع الاختيار ده . فى حين الاجبار على نفس الاختيار ده حتى لو كان هو احسن اختيار بيجيب نتيجه عكسيه .
بنفس مقياس سرير خالد . هو احسن مكان ممكن ينام فيه وآمن ومريح وهو بالفعل بيرتاح فيه . لكن مجرد اجباره وارتباط تواجده فيه بوجودي وقراري انا خلى عنده نوع من النفور منه . لكن لما بقى عنده حرية الاختيار فى النهايه اختاره برضه لكن بمزاجه .

وكفايه كده بقى واشوفكم قريبا بكل الخير

الثلاثاء، 19 فبراير، 2008

4-أنا اخترعت مصطلح جديد !!!!

أه والله اخترعت مصطلح جديد .وايه مصطلح من الى شكله له هيبه كده من الى بيطلعوا يقولوه البهوات الى ببدل وكرفتات بالشيء الفلاني مع منى الشاذلي ومعتز دول .
المهم الاختراع العظيم ده الي انا توصلتله هو نتيجه لخبره شخصيه وتحليلات كتيره وبحوثات -مش عارفه ايه هي -ولكن من موقعي هذا اقولكم ان احنا فى الأونه الاخير حصل تغيرات شامله فى المجتمع احنا طول عمرنا بنقول البطاله والشباب الغلابه الى مش لاقيين شغل ولا مساكن وماما كريمه هريتنا كلام عن تنظيم الاسره عشان الانفجار السكاني وما الى ذلك .
بعد شويه قالك لاااااااا مش السبب الوظائف لان دلوقتي فى حاجه اسمها بطاله مقنعه يعنى ايه بطاله مقنعه يعنى رسميا الناس بتشتغل فى الحكومه مثلا لكن الناتج بتاع يساوي صفر وعليه يبقى هو فعليا باطل وده بيعمل خلل فى منظومة الدخل القومي -ايه الكلام الكبير ده يا ولاد - يعنى من الاخر الى بياكلوا اكتر من الى بينتجوا .يعنى نتيجة البؤين دول ان مش الحل ان الحكومه تعين ولادكوا فى الحكومه ( اه هى الحكومه هاتعمل ايه ولا اييييييييه غلابه يا ناس غلابه ) ما حدش يقولي تقصدي ايه بغلابه يا ناس غلابه اقصد ان الحكومه هما الى غلاااااااابه ناس ايه الى غلابه دول بسبع أرواح زي القطط.

المهم خلينا فى الاختراع ما تجرونيش بره انا لقيت ان المشكله دلوقتي بقت اكبر في ايييييه ؟؟؟؟؟

بــــطــــــــــــــــــــــالــــــــــــه اختيـــــــــــــــــــــــــااااااريه . اي والله كده يعنى الناس مبطله شغل بمزاجها . ما حدش يزقل طوب انا هاقولكم على خبرتي الشخصيه فى الامر .

احنا بفضل الله تعالى بقالنا سنه بندور على حد يشتغل مش لاقيين اه والله !!!!! واحنا من سكان الدلتا وبلدنا مكتظه بالخلق القاعدين على الارصفه من كل صنف ولون . لكن هما مش قاعدين على اي رصيف لا ده رصيف البهوات والشهادات ، اه مش قاعد على الرصيف يعنى عشان هو مش مطلوب اطلاقا ده عشان هو باشا ما بيشتغلش اي حاجه كده .
تعرفوا كان جه فتره على الناس بجد كان الى بيتخرج بيشتغل اي حاجه ويقولك على ما شغل الحكومه يجى حتى لو مش اتخرج لو محتاج فلوس وعنده وقت فى الصيف بيشتغل ويقولك امال اقعد فى البيت اعمل ايه . دلوقتي الحمد لله المشكله اتحلت الانترنت كافيه ماليه الدنيا والدي اس ال ماليه البيوت والكمبيوتر بالقسط زي الفل . والشلل الفاضيه على اد ما تقول قول .
وفوق كل ده بقى الاهالي الى بتموت فى نفسها وتقوله ياحبيبى انت عليك بس تذاااااااكر وما لكش دعوه بحاجه اياكش نولع احنا . والواد ولا البنت حتى ما عليهم الا ضرب البوز التمام وقلة المذاكره وقلة الادب يومين وتلاقي اتخن موبايل فيكى يا مصر جه عادي جدا .
طيب فى رحلة بحثنا انا وجوزي عن حد يشتغل فى المحل عندنا قابلنا نماذج زي الفل اسمع ياسيدى :

أولا بالنسبه لوظيفه المندوب الذي يجيد السواقه بعموله لا تقل- ان عمل بقليل من الجد- عن 1000 جنيه شهريا : واحد قالي مره طب مش ممكن تخلوها 500 جنيه ثابتين وبلاش حكاية العموله دي ؟؟؟ منتهى الطموح لشاب عمره 20 سنه قلتله يعنى نعرف منين انك اشتغلت هانمضيك حضور وانصراف ده انت يا ابنى هاتستلم العربيه والبضاعه وتمشي .
والتاني اشتغل شهر وقال لاااااا انا هاشتغل سواق على تاكسي باشتغل لحد المغرب ولا شيل ولا حط وباكسب بتاع 600 جنيه فى الشهر . علما انه عنده 3 عيال بس منتهى الجد والاجتهاد فى العمل .

ثانيا بالنسبه لوظيفه بياع فى المحل : شوف يا سيدى 350 جنيه ؟؟؟؟ اه مبدأيا كده يا اخي وبعدين نشوف شغلك بس وان شاء الله هاتزيد احنا عندنا ناس بتاخد 500 بقالهم سنه معانا . لا ودول اعمل بهم ايه دول ما يكفونيش سجاير ؟؟؟
طب وانت بتشتغل لا لسه . طب امال مين بيديلك فلوس السجاير؟؟؟!! الحاج بقى ربنا يديه الصحه اعمل ايه بقى . وانت معاك ايه يا باشا ؟؟!! معايا معهد سنتين تخيل ؟؟!! اها متخيل ايه النصفه دي .
طب التاني :: ده بقى كان بيشتكيلى انا من انه بيشتغل شغل وحش ومتعب اوي ومش لائق خصوصا انه اخيرا بعد سنوات الجهاد الكتير مش عارفه عددهم خد بكالريوس تجاره . وبياخد 350 تقريبا . عرضت عليه انه يجى عندنا وياخد 400 قالي هو الشغل وقته اد ايه ؟؟؟أنا: من 10 : 10 وفى ساعتين غدا وممكن تاخد الدوام على بعضه وتروح الساعه 8 زي ما تحب . الباشا: لااااااا . ده انا باروح الساعه 6. أنا: طب يا ابنى ما انت بتخرج الساعه6 صباحا وبتخبط مشوار وسط الغيطان لحد ما توصل للمكان ؟؟!!! الباشا الدماغ: لا بس باروح بدري انام شويه واقوم اخرج مع اصحابي اقعد على القهوه !!!!!!!!!!!! أنا بكل فرسه: لا صح ده ما يصحش خليك بقى مرتاح.
طبعا دول الى انا فاكراهم شوفت اكتر من كده ومصايب اكبر من كده ومش فارقه اذا كان متجوز وعنده عيال ولا مش لاقي جواز ولا معاه دبلون ولا بكالريوس ولا اي حاجه مالهاش لازمه وعيب يتكلموا عنها وهما ما يعرفوش يكتبوا اصلا بجد مش هزار .
اه فى اطار الحديث عن الناس دي قابلت مره واحد على الشات ظريف جدا . حضرته مهندس اتخرج وقاعد من غير شغل لانه قرر انه ياخد ماجيستير .قلتله: طب ما تشتغل وتذاكر .رد الباشمهندس: لا مافيش وقت .أنا: ليه يعنى مافيش وقت ما كل الناس بتعمل كده . ده الستات الى بيحبوا يكملوا دراسه بيشتغلوا ويتجوزوا ويعملواماستر .هو: مش فى كليه زي كليتى انا فى كليه اصل انا كليتى صعبه وبعدين انا بالعب رياضه وباتدرب كتير. أنا: صعبه على مين عليك ؟؟ هو: اه طبعا . أنا : طب دخلتها ليه ؟؟؟ قالي عشان اتعلم وافيد المجتمع( علما انه فى الاول قال انا لازم اسافر بره مش قاعد فى البلد دي ) أنا: طب وذنب المجتمع ايه انه يتحملك عاله عليه لحد ما نص عمرك الانتاجي يخلص. وبعدين اذا كانت الرياضه عائق عن الشغل يبقى الشغل اهم. هو بعصبيه: ازاااااي العقل السليم فى الجسم السليم وانا لازم ابنى نفسي.
أنا : تبنى نفسك على حساب غيرك وبعدين انت عايز تسافر بعد ما تبنى . يبقى المجتمع كسب منك ايه . شوفوا الحته الىجايه دي !!!!! الباشمهندس العظيم الشأن : ما هو انا لما اسافر بره هارجع بقى افيد البلد ( وزغرتى يا الى ما انتيش غرمانه )أو غطينى وصوتي يا أمه .
طبعا هو مؤمن بوجهة نظره جدا ان المفروض المجتمع يحرسه بعنيه ويعلفه من دمه عشان يبنى نفسه عشان هايفيد المجتمع فايده ما بعدها فايده لانه تكرم وتشرف علينا وراح كلية هندسه .
انا اخترت بعض النوعيات مش كلها لكن صدقوني كتييييييير اوي وبنفسكم هاتشوفوا لو حد ما عجبوش كلامي هايرد عليا ازاي ؟؟؟
ده ما يمنعش ان فى ناس مجتهده ومبدعه ربنا يحميهم بس قله قليله ومحبطه كمان . وعلى فكره ده مش كلامي لوحدي ان ما حدش عايز يشتغل لا صدقوني اصحاب المصانع بيقفلوها من قلة العماله والكلام ده من بؤهم جوزي نفسه فكر يصفي نشاطه المتواضع وتحجيمه لانه مش لاقي حد يشتغل . يبقى دي بطاله اختياريه ولا لااااااا يبقى احنا عندنا مشكله فى التربيه والنشأ ولا لا ؟؟؟ دي بالنسبه لخيبة الشباب فى العمل . لسه خيبة البنات خليها فى مره تانيه اصلها خيبه مالهاش زي . ولو انهم دلوقتي بيشتغلوا بره البيت اكتر من الشباب بس جوه البيت ( برضه غطينى وصوتي يا امه ).
وكفايه كده النهارده قربتم تضربوني.

اه نسيت اقولكم على خبر عظيم جدا ان جوزي شرفني بالزياره وقرى المدونه ورد فعله ينم ان انها مش عاجباه مع انه قالي انها حلوه مش عارفه حاجه من اثنين بقى يا اما هو غيراااااااان مني النجاح الباهر الى حققته المدونه ( مش عارفه انهو نجاح باهر بس مش مشكله هما بيقولوا كده فى المناسبات دي ) يا اما هىكده فعلا والى قالولي انها حلوه بجد بيجاملوني وهاتضربوا .( طبعا الحقيقه انه متعود على الرغي بتاعه وحافظه )
واشوفكم يوم تاني مع رغي جديد وتكونوا بخير ومش مخنوقين مني .




الاثنين، 18 فبراير، 2008

3-لو تقولي ايه هى السعاده ؟؟؟؟

وحشتوني والله . نقول بقى ايه هى السعاده الى انا سألتكم عنها المره الى فاتت وسمعت اراء قليله منكم بس حلوه فعلا من سيزار وتشالنجر وبتهيئلي مش هاقول اكتر منها لكن اسمعوني برضه جبران خواطر.

انا من وجهة نظري المتواضعه شايفه ان السعاده هي عباره عن كوكتيل من الرضا ( حلوه كوكتيل دي ؟) اه هاقولكم بعض عناصر الكوكتيل ده :

اولا طبعا رضا ربنا عننا لأن فعلا لما الواحد بيحس ان ربنا راضي عليه بيحس بسعاده غامره طبعا لازم نعمل كل ما يمكن عشان ربنا يرضى علينا واحنا المفروض نكون عارفين كويس احنا نعمل ايه وما نعملش ايه
ثانيا نرضى بحكم وقدر ربنا بمنتهى الاستسلام والرضا الفعلي والامتنان كمان فعليا مش كلام بس.
ثالثا اننا نرضى عن نفسنا ازاي ؟ اننا دايما نعمل حاجه اي حاجه نشعر من خلالها بتقدير الذات(نحس ان لنا قيمه )
رابعا اننا نحاول نرضى الناس الى حوالينا بس من غير ما نيجى جنب رضا الثلاث حاجات الى فاتوا ( بمعنى نراضي الناس ونكسب حبهم ) .
ملخص الكلام ده كله باحبه اقوله فى آيه واحده اتكررت فى القرآن 3 مرات تقريبا (رضي الله عنهم ورضوا عنه ) صدق الله العظيم . ولو كملتوا ورا الايه دي دايما تلاقوا كلام عن الجنه والنعيم عشان كده باحب اقول بعدها فأرضاااااههم.
تأمل الكلام كده وشوف لو طبقته مستوى السلام النفسي الى هاتبقى فيه .
بالنسبه ليا انا فى رضا برضه مهم اوي من اسباب السعاده بس مش هاقولكم عليه (غلاسه)

انما احنا ولله الحمد بنتفنن فى ضياع السعاده من ايدنا وما نصدق نضلم الدنيا وننعي حظنا ونووح على ما فاتنا وبالمره ما قد يفوتنا ونلبس رداء الضحايا ونعيط ونغني ظلموه ونشوف الاجنحه الى على ظهرنا وما نشوفش فى الناس كلها الا الشوكه الى ماسكينها فى ايديهم ( الشوكه بتاعة الشيطان الى بيجبوه فى المسلسلات ماسكها دي ) .
واحنا احسن ناس نبكي على الي راح حتى لو كان الى راح ده كان اصلا معذبنا بس لما يروح بيحلو وما نشوفش ابدا الحلو الى في ادينا لا نشوف الى في ادين الجيران .
ونحب نعيش الدور اوي خصوصا فى الحب ونسمع كلام بقى من بتاع الافلام العربي منهم لله الحب من غير امل اسمى معاني الهبل يووووه قصدي الحب . والحب الاول والحب من اول نظره . والحب زي لطشة البرد والحب مش بايدينا وكده يعنى وتلاقي طبعا الى بيقول الكلام ده واحد عنده 15 سنه ومافيش مانع يكون بيحب واحده عندها 25 سنه عاااادي ومصدق نفسه . وممكن كمان يكون واحد عنده 45 سنه وبيحب واحده عندها 25 ومتجوزه كمان ويقولك انا مش عايز منها حاجه انا عايز احبها بس اصل الحب معنى ليس الا!!!!!!!!!!!!!! طب ليه عذاب النفس ده ما تحب حب طبيعى من بتاع ا لبشر الى هو من غير ما نعذب بعض ايه المشكله ؟؟؟؟( موضوع الحب ده كبير كبير عايزه قاعده لوحده)
المهم انك تلاقي ناس بتحب تعذب نفسها مش بس فى الحب فى العلاقات الاجتماعيه اسوأ حاجه بقى لما واحد يكون عنده احساس بالنقص وانتقاص الاخرين من قدره يا ربي بيعذب نفسه والاخرين كل ما تقوله ازيك يقولك انت مالك بتقولها من غير نفس ليه انت شكلك مش طايقنى شكلك مستقل بيا . وممكن يعيش الدور بقى اسبوع كده ولا حاجه يعيط على الموقف الرهيب ده .

بجد نفسي اعيش فى سلام نفسي متبادل وهدوء اعصاب من الناس واقبال منهم على الحياه عايزين ندور ونتلكك على سبب نقول من خلاله احنا سعداء . بدل العكس نتلكك على أي حاجه تكون سبب مقنع اوي لنا لنواح ونعي الحظ والعيشه والى عايشنها . ونفسي اكتر نحدد احنا عايزين ايه عشان لما نوصله نحس اننا عملنا حاجه تخلينا نرضى ونسعد بها.
والرغي النهارده مش عارفه دمه تقيل جدا وكتير وشكلكوا زهقتوا مني .
على فكره اول ما بدأت كنت هاتكلم فى موضوع تاني خااااالص بس الرغي بقى خدني كنت هاكلمكم عن مصطلح انا اخترعته خليه المره الجايه بقى .
اشوفكم فى كل خير وسعاده يارب

ملحوظه : انا جوزي جابلي هديه فى عيد ملادي حلوه مش هاقولكم هي ايه( نفس الغلاسه) بس بعد ما كتبت الجزء الى فات عشان الموضوع ده كان سؤال ناس كتير مش عارفه ليه .

السبت، 16 فبراير، 2008

2-عيد ميلادي النهارده

انا عيد ميلادي النهارده يا جماعه ال 29 مش عارفه احدد مشاعري الحقيقه تجاهه هي سلبيه ولا ايجابيه لكن عموما كل سنه وأنا طيبه برضه .
مش عارفه ليه رغم ان ولادي عاملين احتفاليه من الصبح طلعوا عينى فيها وخلوني ندمت اشد الندم على انى اتولدت وعاتبت ماما على انها عملت الفصل البايخ ده فيا وولدتنى زي النهارده او ولدتنى اصلا . ورغم انى حاولت اشعارهم بالسعاده البالغه الى انا فيها الى ان مش باين عليا السعاده خالص .

أنا مش كئيبه والله ولا حاجه ولا مش وش احتفال ولا كده لا . بس طبعا تفاصيل الاحتفال الخاص بعيد ميلادي لو تسمعوه . طبعا ولادي من الصبح وهما بيجروا فى الشقه ويقطعوا ورق ويلونوه عشان يرسمولي لوحات بيعتبروها الهديه بتاعتي . وسألوني بكل مسكنه وهدوء تقدري يا ماما تعملي لنا تورته احنا مش عايزين نتعبك بس عشان عيد ميلادك. قلتلهم قدام الزوق والظرف ده اه يا حبايبى هاعملكم . وبدأت فى عمايل التورته وهما الثلاثه واقفين معايا فى المطبخ والاماني والاغاني اشتغلت بقى لانهم عايزين يعملوا تورته زي الى بيعملوها فى العاب الطبخ على النت .
المهم الحمد لله بعد حوالي خمسين مره صرخت فيهم عملت التورته واتاكلت بحمد الله واليوم شارف علىالانتهاء . واخواتي اجتهدوا جدا انهم يغنوا ويعملولي حفله لكن وسط صريخ ولادنا فى النص وعياط الى عايز ينام والى عايز ياكل كانت حفله رائعه .
حتى لما جوزي سألنى اجيبلك ايه فى عيد ميلادك قلتله ممكن تشوفلي مكان اقعد فيه لوحدي ؟؟؟ قالي مش تطلبي طلبات تنفع تتنفذ ؟؟؟

ما علينا 29 سنه كتير والله عليا مش عارفه بيجينى احساس انى عجزت . لكن ساعات اقول قياسا على الانجازات الى انا عملتها فى حياتي يبقى كويس اننا لسه عندي 29 سنه . طبعا الانجازات دي انى اتجوزت وخلفت 3 عيال ما هو يا عينى ما حدش لاقي جواز الايام دي خالص والكلام فى موضوع العنوسه والتفكير فيه بيخلينى احس احيانا ان الواحد يجيب عيلين من الملجأ يربيهم من دلوقي وأبقى اجوزهم لبناتي وخلاص . حاسه ان الشعب كله بنات وشباب معنسين او مطلقين من الحالات الى الواحد بيشوفها .

فى الحقيقه المشاكل فى مجتمعنا بقت بالكومه تحتار تفكر في ايه ولا تتكلم في ايه حاجه تلغبط وتقريبا هو ده الهدف لغبطة الناس ما تسألوش هدف مين ؟ هدف الشريرين الى فى الخااااارج اه فى الخارج .
مش عارفه هل احنا بحالنا ده بقينا نمثل خطر على مين ؟؟ بسأل نفسي السؤال ده كتير احنا ليه مستهدفين ؟؟؟ احنا بنمثل خطر على مين ؟؟؟ يمكن الشريرين شايفين حاجه انا مش شايفاها ؟؟؟ جايز برضه !!!

طيب انا فى نهاية اليوم السعيد ده احب اسألكم ونفسي برضه هو امته الواحد اصلا يبقى سعيد ؟ وايه هى اصلا السعاده ؟ هل هى ان الواحد يرسم ابتسامه عريضه على وشه دايما ؟؟ ام انه يضحك بصوت عالي اوي ؟؟ ولا انه يمشي يقول انا سعيد ؟؟ ولا مايقولش حاجه ولا يعملش حاجه اصلا ؟؟؟
مستنيه اسمع ردودكم وهافكر انا كمان فى رد على الاسأله دي واشوفكم على خيران شاءالله




1-اول مره اكتب مدونه

بصراحه انا مش عارفه اعمل لها بدايه لكن انا اول مره اكتب مدونه والنهارده بس هاقولكم فكرتها وانا عايزه اكتب ايه وانا مين كمان وياريت ما اكونش ضيفه تقيله .



انا فكرت فى المدونه دي لانى دايما بيبقى عندي كلام كتير اوي عايزه اقوله عن كل حاجه بمعنى اصح رغي كتير اوي اوي عن كل حاجه يمكن حاجه تخصنى ويمكن حاجات تخص المجتمع او تخص العالم كله . هو رغي وخلاص هههههههههههه



اما عن عنوان المدونه انا اخترته لانه رغي زي ما قلتلكم ووصفت نفسي بانى امرأه غير مطحونه لان دي الحقيقه انا فعلا مش مطحونه بالعكس انا يمكن بالقياس على اغلب الناس مرفهه جدا . عايزاكم من خلال المدونه تعرفوا حياتي الغير مطحونه وفكرها عباره عن ايه وعليه تتخيلوا انتم المطحونين شكلهم ايه ؟؟!!



وعشان تكونوا عارفين المكان الىبابص منه على العالم وهاتكلم منه هاعرفكم على نفسي تعريف عام . انا مصريه وعمري 29 سنه ومتزوجه واحمل شهادة بكالريوس تجاره ( كلية الشعب ) ولا اعمل الى شغلانه بسيطه اوي هى انى ماما ل 3 اطفال . وده ملخص حياتي .



وان شاء الله اتمنى اننا نقضي اوقات مش رخمه ولا تتخنقوا مني ولا من كلامي ولو اتخنقتوا ياريت تقولولي عشان اكمل كتابه عادي بدل ما اتخنق انا ههههههههههههههههههههههه