الثلاثاء، 14 يونيو 2011

كلمة السر ..الشرطه


فى خضم الاحداث السابقه والحاليه والهرس فى الكلام الى شغال  فى كل الموضوعات والمشاكل الاقتصاديه والامن و و و

الحقيقه  فى كل موضوع بافكر فيه عارفين البيضه الاول ولا الفرخه ؟  اهو كل الموضوعات كده وبعد ما تستقر فى اي موضوع  على ان الفرخه الاول تقوم تلاقي ان الفرخه عايزه قمحه والقمحه عند التاجر وهكذاااااااا تدوخ تااااااااني .... لكن انا مش عارفه ليه بعد كل دوخه اكتشف ان النهايه ان عايزين امن

خلونا الاول نفهم جهاز الشرطه بتاعنا عامل ازاي واتطور ازاي واتحول من انه فى خدمة الشعب الى انه فوق راس الشعب والى جابو الشعب

بعد ابو باشا وزير الداخليه  فى بداية عهد مبارك جه احمد رشدي  والى كان قوي جدا جدا ..وطبعا طبعا اديناله قانون الطواريء عشان يحمي البلد من الارهاااااب فى وقت ملاحقة التيار الاسلامي بعد مقتل السادات وبعض العمليات الى حصلت من منظمة الجهاد وغيرها وقتها  وكمان عشان ملاحقة تجار المخدرات الى كانت متفشيه فى البلد وقتها

وما كان من رشدي غير انه ربى جيل من الاسود ..اسود استخدمها ووجها فى الاتجاه الصحيح وقتها لموجهة الارهاب والمخدرات ..والحقيقه انه فعلا ما خلاش نمله تعدي بجرام مخدرات وكان ملبس تجار المخدرات كلهم طرح ومقعدهم فى بيوتهم ... بس خد بالك هو ربى جيش من الاسود ..اسود الشرطه لمحاربة الفساد اااه لكن كمان هو كان حاكم الاسود دول بقبضه حديد .. الى كان بيغلط كان بيتعلق ... بدون قانون ...كان الى ماشي قانون الطواريء الى هو قانون القبضه الحديد على الكل

طب راح رشدي (بعد سنتين تقريبا من توليه الداخليه )
.. الاسود يعملوا ايه ؟؟؟؟؟  والقبضه الحديد راحت وتوالى وزراء داخليه منهم الخايب ومنهم الضعيف ومنهم المجرم ... وكان ان الاسود استاسدوا على الشعب الغلبان وما دام حاميها حراميها فوووق وخايف على نفسه والمؤسسه العسكريه  مالهش دعوه بحراميها ولا بالشعب وقالت انا جيش بس يا صغنن
فكان من حراميها(الاسره الحاكمه ) انه خااااف واترعب وحاسس بعدم الامان حيث انه حرامي وخاين وعميل  فقرر يعمل جيش  شخصي وبدا يدفع بدلات ولاء كمان للواءات الشرطه عشان يحموه وتوجه الاسد المجرم لمن يدفع اكتر
واستاسدوا اكتر على الشعب الى هما المفروض يحموه وحموا الفساد الكبير والصغير بل  واشترك بعضهم فيه وانخرط للنهايه
وجهاز امن الدوله الى اخد ميزانيات وسلطات مفتوحه لسنين اتجسس على الكل وداس على رقبة الكل ما عادا الى كان بيديله بيقبضه ... طب حاليا والى كان بيقبضهم وياكلهم راح ؟؟  لا طلعوا لكل واحد من الموجودين على الساحه دلوقتي ملفه بقى وداسوا على صباعه ما كل واحد له وجيعه  والى مالوش وجيعه نستفله احنا وجيعه ونلبسهاله  والعيار الى ما يصيبش يدوش
ولسه عندهم ادواتهم من السنه ببدل ولا دقون حتى على وسائل الاعلام .وفلوس ومسؤلين فاسدين وكل حاجه لسه زي ما هى ما طارش غير الراس

الجهاز الامني الفاسد مهدد الكل وكلهم بيداروه السكات ...دي مسخره مش ممكن نسكت عليها ولا نسيبها تعدي
الجهاز الامني هو المشكله الحقيقيه دلوقتي ارجوكم حلوها واتكلموا فيها وركزوا عليها هى المفتاح لكل المشاكل


طيب عشان نحل المشاكل الى بتحصل دي لازم نحل مشكلة الامن ويا جدعان الله وكيل انا من اول الثوره ومن يوم 28 يناير بالتحديد مع انسحاب الشرطه قلت دول يقعدوا فى بيوتهم ونجيب غيرهم

بعض الناس اعتبروني هبله ..مع انى يومها سالت ظباط شرطه منهم المقدم محمد عبد  الرحمن منسق ائتلاف ضباط لكن شرفاء والى انا عضوه فيه  حاليا
سالته امكانية تطبيق اقتراحي من تخريج دفعه او اثنين بشكل عاجل من الشرطه بعد دراسه مكثفه لمدة 3 شهور ...وكذا الحاق دفعه منتقاه من اخر خمس دفعات من خريجى كلية الحقوق واللائقين للعمل الامني وتدريبهم فى اكادمية الشرطه لمدة ست شهور
ويكون عندنا جيل جديد وحقيقى من ضباط الشرطه قد يفتقدوا للخبره ولكن يمتلكوا الاخلاق الى افتقدها جهاز الشرطه
وفى الوقت ده نكون غربلنا جهاز الشرطه ده طلعنا كل الفاسدين على نجنب وبنحقق معاهم وواقفينهم عن العمل مش مرقينهم وناقلينهم شمال ويمين
والمقدم محمد قالي طبعا ده ممكن جدا ومافيش فيه اي مشكله بالعكس ده اقرب واسهل حل لكن مين ينفذ ومين عنده صدق نوايا  فعلا؟؟

مش فاهمه بصراحه المسؤلين بتوعنا انا حاسه انهم عمالين يلفوا حوالين نفسهم ومش عارفين يمشوا لقدام

اصحاب المصانع الى احنا بنتعامل معاهم بيقولوا انا مخفضين الانتاجيه للثلث تقريبا ..ليه يا جماعه ؟ قالوا عشان الامن... احنا بنشتغل شفت واحد واخدنا جزء من العمال خليناه حراسه  وكمان مش عارفين نتحرك ..عربياتنا بتتسرق على الطرق ومندوبينا بيتعرضوا للخطر ..وفوق كده الخسائر الماليه فى حال سرقة سياره بمواد خام او ببضاعه  ...مش عارفين نشتغل

الجماعه بتوع عجلة الانتاج ممكن والله تسيبوكم من الكلام عن المليونيات وعن المظاهرات وتروحوا تشوفوا حل للامن الى فعلا معطل عجلة الانتاج

السيد الوزير المحترم وزير الداخليه ..الحقيقه انا شايفه انه مش قادر يقوم بمهمته اذن يتفضل مع السلامه ونشوف غيره ولا مصر  عدمت الرجاله ؟؟  بعض الناس شايفه ان ممكن يشغل المنصب ده واحد من السلك القضائي وناس شايفه انه قياده عسكريه احسن ..الحقيقه انا رايي الشخصي من زمان ان القياده العسكريه هنا احسن لاسباب كتيره
منها ان مش بالسهوله دي تجيب حد مدنى تحطه على راس المؤسسه الامنيه الى ما بيعترفوش غير بالرتبه والبدله الميري ... وعليه يبقى من الانسب هنا القياده العسكريه

الناس اللطيفه الى بيتكلموا عن السياحه ... هايكون فى سياحه ازاي داخليه او خارجيه من غير امن رجعنا تاني لنفس النقطه  اهو الامن

الناس الى بتتكلم عن اختفاء السلع الغذائيه بحلول رمضان ..انتم هبل ؟؟ هو احنا بناكل كافيار ؟؟  احنا نص الشعب بياكل من عمل ايده ... والنص التاني بيستورد اكله ... طب المستورد مش عارف يستورد اصلا عشان فى ازمه فى السيوله عشان مش عارف يشتغل فى مصر ويوزع عشان قلقان من الوضع الحالي عشان عربياته بتتسرق وشركته مهدده  ومراكز توزيعه بتتكسر ...فمش عارف يستورد بكفايه ... فمش هانلاقي كورن فليكس فى السوبر ماركت خالص ..... الامن الامن الامن

وهكذااااا امسك كل موضوع وامشي معاه للاخر تلاقي مرده للامن ..الامن المتمثل عندنا فى جهاز شرطه ..جهاز شركه خاين وخايب وفاسد

كنت هاموت كمدا يوم لما عرفت ان فى ضباط قدموا استقالتهم تهديدا للوزاره  وردا على محاكمات الضباط ... وقال ايه الوزاره رفضت استقالتهم وقالتلهم نتفاهم ..طب لييييييييييييه ..ليه الدلع والمسخره ده ما يغوروا فى داهيه قلتهم احسن والله ...عاملين هما لينا ايه دلوقتي غير الارهاب وقلة الادب
وبعدها كمان سلسله من التاجيل فى القضايا ما لهاش اخر بالنسبه لقتلة المتظاهرين ؟؟؟ دي مسخره

عارفين انا باشبه جهاز الشرطه بتاعنا بايه ؟؟  بالمجرم الى انت اديته سيف وقلتله احمينى وكنت بتديله فلوس  وسلطه وكل حاجه وحماك فعلا وكان باطش بالمجرمين  لكن فى وقت معين(لما لقي الى يدفع اكتر  وما عادش محتاج منك سلطه هو ظبط نفسه ) ادور عليك انت شخصيا لصالح الى يدفع اكتر (الفاسدين)

ارجوكم حلوا مشكلة الامن والشرطه والى مش هاتيجى غير المحاكمات الحقيقيه وتطهير الشرطه  وان شاء الله كل الى بعد كده هايتحل ويبقى زي الفل ...ارجوكم يا من بيدكم مقاليد الامور .. واجهوا اخطائكم بشرف وما تخلوش خسيس يتحكم فيكم ويبتزكم ... اعملوا حاجه تقابلوا بيها ربنا ..

وتاني هاقول ..استرها معانا يارب احنا شعب غلبااااان وشاف بلاوي كتير