الخميس، 19 يناير، 2012

كده وكده



الصوره دي من تويتر طبعا وكلمه ليا كتبتها من فتره
ايوه هى دي الحقيقه

المجلس العسكري عايز يسلم السلطه كده وكده

وده مش اختراعات ولا انا بافتري عليه وانما هى تصريحات لما تجمعها على بعض تطلع كده فى الاخر

الاخوان بعد عقدوا الصفقه اتمام كالعاده مع المجلس العسكري .. مش عايزه تنصل من الصفقات هى شيم السياسيين ولا انتم مش بتلعبوا سياسه يا اخوان ؟

المهم بعد اتمام الصفقه راح الاخوان ساقوا فيها وقالك هانشيل وزاره ونحط وزراه وهانعمل ونسوي قام المجلس العسكري قالك عنددددددك مين ده ؟
وكالعاده نفس القلم بعد كل صفقه ... مجلس الشعب القادم هو مجلس تشريعى شكل لمهمه واحده هى اختيار اللجنه التاسيسيه وسن القوانين وليس من حقه حل الوزاره ... شكرااااا ادي مجلس شعب غير كامل الصلاحيات

طب اللجنه التاسيسيه : قالك لا ماهو احنا لازم نحط وثيقه اللجنه الدستوريه تمشي فى حزاها كده عشان برضه مش معقول نسيب دستور البلد يكتبه عدة اشخاص  على اساس ان العدة اشخاص دول عيال حافيه بتلعب فى الشارع الى ورانا مش لجنه تاسيسيه منتخبه او مختاره من برلمان منتخب من الشعب ولا ايتها حاجه
يبقى كمان اللجنه التاسيسيه غير كاملة الصلاحيات شكراااااااا برضه

طب رئيس الجمهوريه ... ااااه لا ده بقى احنا لازم نحد من سلطاته بموجب الدستور والقانون الجديد ايوووون امااااااااال حتى لا نخلق ديكتاتورا جديدا امااااااااااال ديموقراطيه يا جدعان
يلا بالشفا وكماااان رئيس جمهوريه بلا صلاحيات كامله  نفس الشكراااااااا

وطبعا طبعا الوزاره  اونكل جنزوري ملك الصلاحيات فى الارض الواقع بيقول ان هو كمان بلا صلاحيات كامله
حتى وزير بتروله خرج يقول مافيش ازمة بترول ..واتضح ان كل محطات البنزين عمو الى هناك بيقول للشعب ان ما عندوش بنزين وهو عنده جوه

يبقى نخرج من ده كله بايه ؟؟ ان احنا اصلا عملنا ثوره كده وكده تقريبا ... او ثوره فوتو شوب

وان المجلس العسكري بياخدنا على اد عقلنا ويقولنا ماشي اعملوا برلمان وانتخابات ومثلوا كده مع بعض يا ولاد والعبوا لعبة الديموقراطيه زي ما كنتم بتلعبوا بابا وماما زمان بس فى الاخر الحكم بتاعي

يكونش المجلس العسكري فاكر اننا خرجنا فى ثوره وولادنا دمهم ساح فى الميادين على يدك كلابهم عشان نشيله جمال مبارك من سكته ونديهاله على طبق من دهب ؟؟

طيب يسقط يسقط حكم العسكر ... مش هانسيبكم تركبونا تاني .. لازم تفهموا ان العهد ده ولى ومضى


لاقتناعي الشديد فى اننا بنعمل ديموقراطيه كده وكده انا ما صدمتش ولا اتفاجئت بانسحاب البرادعي وانا صورتلكم التويته عشان فى ناس عجيبة الدماغ قالتلى انتم قلتم كده بعد تنحي البرادعي التويته الى فوق دي عليها التاريخ ياريت نفهم ان انا وناس كتير لسنا اتباع البرادعي وانما احنا انصاره فى الحق ان شاء الله وما زلت اكن للرجل كل احترام وتقدير وتاييد لمواقفه

انا شاركت فى الانتخابات  سواء بالتصويت او بالمشاركه فى حملة الثوره مستمره
رغم انى عارفه انه هايبقى مجلس شعب كده وكده لكن شاركت لان المقاطعه لن تزيد الامر الا سوءا .. احنا قاطعنا سنين طويله وما عملناش حاجه برضه والمره دي مضطرين نخلينا مع الكداب لحد باب الدار ومش ضامنين ايه الى ممكن يحصل بكره كمان

فى النهايه احب اقول للجميع مش للمجلس العسكري بس .. احترسوا

الثوار راجعين يوم 25