السبت، 26 فبراير 2011

سلاح الفتنه

انظمتنا العربيه تستخدم سلاح الفتنه ..وما اقذره سلاح

ما شاء الله حاسه ان الانظمه الحكوميه العربيه كلها اخوات فى الرضاعه كانت بترضهم جموسه واحده ....كلهم متخرجين من نفس المدرسه التييييييييييييييت لتفريخ خونه ومتسلطين ومتعجرفين

فى ليبيا هذا المجنون القذافي بيثير الفتنه بين القبائل ومن اسبوعين سبقوا الثوره بيسلم القبائل هناك اسلحه عشان يضربوا بعض .. بس قدرة ربنا بقى ورحمته ان انقلب السحر على الساحر وهم الان يد واحده ويحاربونه باسلحته

حتى ان احمد قذاف الدم جه مصر يحرض قبائل السلوم على الذهاب للحصول على اراضيهم التى ذهبت الى قبائل اخرى فى شرق ليبيا حين حدث تعديل الحدود
وعرض عليهم دعم مالي وسلاح لكنهم رفضوا ومشي وهو قفاه يقمر عيش
وبالمناسبه احذرمن انه اعلن انه انضم للثوره وعايز ياخد قوافل طبيه ويروح ليبيا من مصر .....اظنها خدعه والله اعلم

فى اليمن ...صالح صحى فيهم الانفصال وقال اهم ده المشكله انهم عايزين ينفصلوا ...امعانا فى فضل الله انقلب عليهم الامر وقال اليمنين الجنوبيين مش هاننفصل امشي انت وبعدين نبقى نفكر نعمل ايه احنا بس انت امشي الاول

فى البحرين ... انها فتنه وسنه وشيعه وهايشتغلوا ....قالوا الشيعه طييييب احنا هنختار زعيم لنا يكون سنه عشان ما تقولوش حركه شيعيه ...كبسه يا عم الملك

تكرار نفس المقرر القذر الى هما حافظينه حاجه تقرررررررف يا حكام العرب بجد

فى مصر  وما ادراك ما مصر وامن الدوله فى مصر..من قبل الثوره حتى والاسافين شغاله عشان المسلمين والمسيحين يقعوا فى بعض  اولا عشان الحكومه تتذرع بالارهاب وتلم كل من يقولها بم قبل الانتخابات الرئاسيه
وثانيا عشان  ننشغل فى بعض عن الي هما ناويين يعملوه

بعد الثوره ..السلفيه (حسبى الله ونعم الوكيل ) قبل التنحي كانوا بيقولوا حرام الخروج عن الحاكم

الجمعه الى فاتت كان راسهم المريض  لامم حواليه لامه هنا وقاعد يقول الدوله الاسلاميه وبيلمح ان السلفيه هايقتحموا المجال السياسي ونحكم احنا وياحليله يا حليله ......تعليقى انا تييييييييييييييييييييييييت

اضافة الى  ان السلفيه عمالين يلكو فى الكلام الخاص بالماده التانيه من الدستور  والخاصه بالشريعه الاسلاميه

الحكومه عاجبها اوي اللغط ده عن الماده التانيه وقال ايه عاملين استفتاء على موقع الاهرام ..الاهرام التعبيريه  ها ؟؟

هالبت احنا يا ولاد ما زال شكلنا غبي  .... ده  حاجه غريبه جدا فعلا
طيب استكمالا لفضل الله تعالى ورد كيدهم الى نحورهم ..المسحيين ناس منهم قالولي اصلا ما يهمناش  الغاء الماده التانيه لانها بكل بساطه _وده رايي_ بتقر واقع

حدش اهبل بيرط فى الكلام ده الاا السلفيه والاهبل منهم الى بيصدقوهم
وهو كان حد يا هبل جاب سيرة الماده التانيه فى التغيرات ؟؟ ما تتوكسوا بقى وما تفضحوش نفسكم اكتر من كده يا سلفيين وتبينوا عمالتكم وتعاملكم مع الجهاز المشبوه المدعو بامن الدوله

رايي الشخصي فى الماده التانيه ....

لو كل واحد حط لسانه فى بؤه واهتممنا اكتر بتركيز دعائم الحريه ووسائل ضمان استفتاءات وانتخابات تشريعه ورئاسيه نزيهه وحره .....بعد كده مافيش مشاكل

لو انهم عملوا استفتاء حقيقى على الماده التانيه للدستور – مش استفتاء هزلي تعبيرى على الاهرام -  ايه الى هايحصل ؟؟؟  اظن غالبا هايحصل اقرار الماده التانيه واستمرارها لاننا غالبية مسلمين ولو ستين فى الميه فقط من المسلمين وافقوا على وجود الماده التانيه هاتكون الغلبه لهم بالتالي نخرس بقى يا ريت ؟؟

لو حصل تصويت عليها انا هاقول تستمر الماده التانيه ...اولا لانى مسلمه اقتنع تماما بان تطبيق الشريعه الاسلاميه فيه مصلحة الجميع ان شاء الله حتى المسيحيين .. والعاقلين منهم عارفين كده

ثانيا : لان وجودها فى الدستور شايل عننا بلاوي احنا فى غنا عنها دلوقتي .... مش مجال تفصيلها

فى حال انا كان رايي ان الماده دي تفضل لكن الاغلبيه فى انتخابات نزييه اختارت الغائها اييييييه العمل ؟؟

قدامي حلين (عاقلين )  اما اظل فى البلد وانا مقتنعه برأي واحاول اروج لفكرتي و قضيتى واحاول اقنع الناس بها  الى ما شاء الله
واما امشي واشوفلي بلد تانيه تكون بتقر المبدا ده الشريعه الاسلاميه الحق ..والى لحد الان من وجهة نظري لسه مش موجوده .
كده خلص الكلام عن الماده التانيه  وياريت اسمع رايكم

وكلمه هاموت واقولها ....مش لاقيه يا المجلس الاعلى للقوات المسلحه للابقاء على امن الدوله غير ان زي ما قالي صديق عزيز ....اصل كله متصوووووووور يا باشا .....

وما حدش يقولي الامن ....فين الامن وفين الدوله ............لن يهدا لي بال الى بانتهاء مهزلة امن الدوله

الى حصل امبارح من القوات المسلحه من مواجهات للشباب فى التحرير مش فاهماه حقا وحتى بعد اعتذارهم انا مش مسمحاهم ولازم يقدموا تبرير وتوضيح يقولوا ازاي ده حصل وليه وايه الاجراءات الى خدوها عشان يضمنوا عدم تكرار ذلك

عفوا يا قواتنا المسلحه ..بطلت تعاطي العاطفيه فى السياسه ...

الجمعة، 18 فبراير 2011

كيف تعود الشرطه؟

كيف تعود الشرطه؟


بل بالأحرى كيف ننقذ الشرطه

تتعالى اصوات الان فتقول يجب علينا كشعب ان نعود الى الشرطه ان نتقبلهم ان نجلهم والى اخره من كلام التلفزيون المصري الذي ما زلت اشتم فيه رائحة النظام العفنه

السؤال الان : ما ذا فعلت الشرطه حتى تعود الينا او نعود اليها ؟؟
ماذا راينامن الشرطه بما فيهم جهاز امن الدوله المشين غير غرف جهنم والتعذيب والعجرفه والتسلط بل وقلةالادب عموما فى التعامل مع افراد الشعب جميعا والتعالي عليهم ؟؟

ونعود مره اخرى الى سؤال الناس حول كيف تعود الشرطه؟

اولا :  الافراج عن معتقلي 25 يناير عن اخرهم ..فلم نسمع عن ثوره نجحت ابطالها محتجزين بايدى مجرمين ومعذبين ..والافراج عن باقي المعتقلين السياسيين بدون احكام قضائيه

ثانيا : تفكيك جهاز امن الدوله وفتح مقراته وتفتيشها والتحفظ على المستندات واستجواب القيادات والعاملين بسجونهم ومعتقلاتهم ..وانهاء مهزلة التعذيب التى تجرى بها

رابعا : ا لتحقييق الحقيقى فى الاحداث السابقه اثناء ثورة 25 يناير ..ولا سيما جمعة الشهداء والاربعاء الاسود و التحقيقات تعلن على الجميع ونعلم من هو الجاني ويعاقب عقاب يليق بما فعله من جرائم

خامسا : غربلة جهاز الشرطه عموما .. الجميع فى جهاز الشرطه بل حتى من عوام الناس يعلمون من هو الظابط الفاسد المرتشي المريض نفسيا المجرم المسيء للانسانيه وليس جهاز الشرطه فقط ..ويعلمون ايضا من هو الظابط الشريف ...وعليه يمكن ان تتم هذه الغربه خلال ايام معدوده..ويتم استبعادا هؤلاء المجرمين الفاسدين  او ايقافهم عن العمل لحين التحقيق بشانهم

سادسا : وجود جهاز رقابي محترم وقوي ومعلن للجميع لمحاسبة جهاز الشرطه وكل من يتبعهم وتقبل شكاوي المواطنين

سابعا :حملة توعيه تطلقها وسائل الاعلام هدفها ان يعلم الناس والعامه حقوقهم من جهاز الشرطه ولا يسمح اي مواطن بالتجاوز معه من جهاز الشرطه ويتوجه بالشكوى للجهاز الرقابي اذا حدث تجاوز


حين يتم ذلك او حتى البدء والشروع فى العمل عليه وتقديم خطه من الوزاره لنا بذلك قد نقبل ثانية بوجود الشرطه فى الشارع المصري

والى كل من يعتبر ان السرقات حاليا تتم لان الشرطه كانت تحمينا سابقا

الشرطه كانت تحمي النظام ..حتى انها غيرت شعارها الى الشرطه والشعب فى خدمة الوطن

لا اعلم ما هو تفسير كلمة الوطن عندهم هل هو مصر الارض والشعب  ام هو النظام الفاسد ولي نعمتهم

السرقات التى تحدث الان  ..تحدث لانهم اشاعوا الفوضى واخبروا المجرمين ان البلد فى حالة انفلات امنى ويستطيع كل سارق ان يسرق كيفما يشاء

تحدث كما يحدث الان ان الفلاحين يخلعون القمح من اراضيهم  حتى يزرعون مكانه كتل خراسنيه ..لان البلد اصبحت سايبه .... كما اشاعوا هم فى وسائلهم الاعلاميه من اول يوم للثوره

ان كنتم تريدون اصلاح فعلا وتريدون ان تعود الشرطه الى ميدان العمل وتفعيل دورها
هذا هول الحل

فهل من مجيب ؟؟؟

الأحد، 13 فبراير 2011

نسمات الحريه

تصدقوا انا مش عارفه اكتب

والله مش عارفه اكتب هاكتب ايه ولا ايه ولا ايه ده عايزالي خمس سنين على ما ابطل كتابه

اولا مبروك
مبروك يا شعب مصر عليكم مصر

ومبروك يا مصر عليكى ولادك الى اتولدوا من جديد فى التحرير

مبروك يا ناس الحريه ونسايمها الى هاله علينا

ثانيا  يارب يارب يارب كملها بالستر  علينا ويتمها على خير ونفضل طول عمرنا نقول كان اعظم يوم هو 25 يناير وكان اجمل يوم لما سمعنا خبر تنحي الرئيس الظالم


يا جماعه انا فرحانه اوي اوي اوي بشكل لا تتخيلوه
ايام لما كان النت مقطوع انا كنت باكتب  تدوينات يوميه يمكن لحظيه
خلال الثوره انا قضيت اصعب لحظات حياتي واسعدها ايضا

ما كنتش بانام ولا باعمل حاجه اصلا قاعده متنحه قدام الاخبار اوقات اتفائل وافرح واوقات اقلق واوقات ابكي بحرقه واوقات اتجنن وافضل ازعق واكلم نفسي

يمكن الى متابعنى يعرف انى مش باتكلم فى السياسه على مدونتي الا نادرا ومن بعيد لبعيد لذلك ناس كتير استغربت اهتمامي بالثوره وكلامي فى السياسه عموما

الحقيقه مش كان بمزاجي مجبر اخاك لا بطل جوزي كان واخد عليا عهد ما اتكلمش فى السياسه  خايف عليا بقى والجو ده

الحقيقه من قبل الثوره بكام يوم اترجيته يحررنى من العهد عشان اقدر اشترك فى الجروبز واتكلم وانشر  رفض برضه لكن يوم 25 قلتله بص انا باقترح تطلقني لحد ما الثوره تخلص مش مشكله يعنى عندنا 3 طلقات J

من الاخر كان مسلوب حريتي ويعلم ربنا بسبب الحكايه دي انا كانت بتحصلي ازمات نفسيه كتير حيث انى اكتر حاجه تجننى حد يحط ايده على بؤي

آلمنى كثيرا جدا موقف بعض اصدقائي من الثوره وفهمهم الخطأ وكلامهم المستفز حتى انى حاولت كتير اتجنب الحديث معاهم عشان ما اخسرهمش وانا متعصبه وضغطي عالي وعلى اخر اخر اخري

اهالني كمية الناس الى صدقت التلفزيون المصري دون اي تفكير واهالني اكتر من نعتوني بعدم الفهم وانى اساسا اعرف ايه فى الدنيا ده انا اخري حلة محشي ودمتم ....هو صحيح يا ولاد انا شكلي كده ؟

الحقيقه كنت متفائله يا شباب بيكم وكنت حاسه ان هنعمل حاجه بس كنت خايفه عليكم اوي اوي

كنت باموت حقا مش كلام والله يوم الاربعاء الى كان مذبحه ليلا وفضلت اعيط طول اليل واقول يا عاااااااالم حد ينجدهم  وتساقط الشهداء حقا كان بيقتلنى فعلا

بعدين هابقى انشر تدويناتي لايام الثوره انشاء الله

دلوقتي ارجوكم يا ناس ... الى ما كانش مؤيد للثوره ورجع فى كلامه عادي والله يقول الحقيقه انا ما كنتش مؤيد بس دلوقتي اقتنعت مافيهاش حاجه ...مالوش لازمه نستفز الناس

كل واحد وله وجهة نظره

ونفسي اعرف المنادين للمتظاهرين او بالاصح الثوار الابطال الى وقفوا على خط النار انهم خلاص يرجعوا وكفايه لحد كده

الكلام ده بيتقال من اول خطاب لمبارك يوم الجمعه بعد ما كلابه قتلونا فى الشوارع وقالولهم خلاص يا جدعان هو حل الحكومه ارجعوا بقى
وبعد كل انتصار وكل تنازلات من الحكومه كانوا بيقولوا كده ارجعوا بقى
ولحد الان لسه بيقولولهم ارجعوا بقى

افهموا بقى ارجوكم ...الشباب الى هناك دول مش سيس العيال دي فاهمه هى بتعمل ايه الدنيا والزنقه والموت الى شافوه بعنيهم علمهم ..بما انكم قاعدين فى بيوتكم يبقى من فضلكم بسسسسسسسس سبوهم يكملوا

افهموا انهم اقويا لانهم فى التحرير .. افهموا انهم ما دام مشيوا مشوار الاحسن يكملوه دلوقتي مش يرجعوا وبعدين يبقوا يبدأوا من الاول تاني

لو كانوا سمعوا كلامكم من الاول ما كناش وصلنا لاي حاجه

دم الشهداء غالي كلنا كنا خايفين عليهم وربنا العالم عينى ما غمضتش يوم الخميس الى فات  لما عرفت انهم راحين العروبه لحد ما الشباب كلموني طمنوني وقالولي مافيش اي حاجه احنا تمام

لكن
ارواحنا لم تزهق فقط فى التحرير

ارواحنا كانت تزهق يوميا على يد النظام الفاسد واعوانه وايديه وكلابه... العباره فساد .. السجون والمعتقلات فساد.... حوادث الطرق والقطارات والحرايق فسااااااااد .... المصايب الاجتماعيه الى احنا فيها فسااااااد

صدقوني احنا كنا كده كده بنموت فى اديهم ...

لو الشباب رجعوا من غير ما يضمنوا اجراءات حقيقيه من الجيش لضمان حكم مدنى وتغيرات دستوريه وافراج عن معتقلين لا اضمن الجيش وما سيفعله بينا

انا لااقصد الجيش با كمله ..فالجيش انا راهنت عليه من البدايه .. ساورتنى بعض الشكوك احيانا بانه يمكن يقلواا عقلهم ويضربوا الناس لكن رجعت تاني قلت مش ممكن

عارفين ليه مش ممكن لان الجيش بتاعنا جيش وطنى ..... الكلام هنا على الجيش  المجندين والقياده الصغيره والمتوسطه .... دول يا ساده بيقبضوا نص مرتبهم وطنيه ... مش مرتزقه

اما جنرالات الجيش المصري فالكل يعلم انهم قد تكون مئات الالوف التى يتقاضوها كبدل ولاء للنظام الفاسد اعمت قلوبهم عن الوطنيه والحقوق
الى حاليا متولين قيادة البلد مين المجلس الحربى .. الروس الكبيره ... بيعصف بيا بعض القلق ان السلطه تحلى فى عنيهم ونعيش عصر نيله عسكرى تاني

عشان كده لازم ناخد ضمانات قد ما نقدر ..  الكوره فى ملعبنااااااااااااااااا افهموا عشان خاطري

ملحوظه هامه
انا باعتذر لاي حد اتعصبت عليه فى اليومين الى فاتوا  والتمسوا ليا العذر .. انا بطبقى يا جماعه عصبيه جدا
تقدروا تقولوا مجنونه
اعيانى التفكير فى البلد وحالها سنين والله اكتر مما تتخيلوا بكييييييت والله ياما على الى احنا فيه والمراره ما كانتش بتفارق حلقي
لما شوفت بارقة امل ناس بتحاول تموتها كنت هاتجنن
اضيفوا الى ذلك  الضغط العالي الى بيضيق خلقى اكتر والقلق الى انا عايزه اتعالج منه والله بجد كان بيقتلنى على الشباب فى التحرير
بالعافيه فى الايام الاولى كنت باعرف اخبارهم ...اقصد اخبارهم منهم شخصيا مش من على التلفزيونات والفضائيات

يعنى هحاول انسى صدمتى فى ناس كتير يعز عليا يكونوا بيفكروا كده بس طبعا هما احرار فى فكرهم وانا كمان حره فى فكري ورايي

وارجوكم اظن انا رايي واتجاهي واضح للجميع من اول يوم فى الثوره لحد الان .... من فضلكم الى شايف انه مختلف معايا ومش هايقدر يتعامل مع الاختلاف ده بهدوء فمالوش لازمه حضراتكم النقاش معايا خالص فى الموضوع ده
ولا اي موضوع تاني حاليا لانى مش عارفه افكر غير فى الثوره وما بعد مبارك وما الى ذلك

اسفه طولت عليكم
 ومبرووووووووووك يا مصر
ومبروووووووووك عليكم مصر

الخميس، 10 فبراير 2011

مدونة ثورة الغضب

السلام عليكم
البلوج بتاعي وحشنى اوي يا جماعه والله بس اعذوروني مش عارفه اركز واكتب اي حاجه مع انى عندي كلام كتير اوي اوي عايزه اقوله وكاتبه كلام كتير من ايام ما كان النت مقطوع
بس مش قادره اكتب وانشر دلوقتي حاسه انه مش وقت كتابه وقرايه خلاص مبحلقه فى الاخبار طول النهار

باكتب كلمات بسيطه على الفيس بوك والتويتر على اساس انهم اسرع

المهم ربنا يعديها على خير يارب ويتسرها مع ولادنا وابطالنا الى فى التحرير والى فى كل ميادين مصر ونصرنا ان شاء الله

انا كلمت النهارده المدون ادم نبيل وهو مرابط فى التحرير ربنا يجازيه خير هو وكل الى معاه
المهم هو طلب مني اعمل مدونه واسميها ثورة الغضب عشان ينزل وا فيها كل الصور والفيديوهات الى معاهم وكده
وطبعا انا عملتها فى ساعتها وده اللنك بتاع اهو http://www.thawrt25eg.blogspot.com/


وان شاء الله هنحاول نحط فيه اكبر كميه من الكليبات والصور والاخبار وليسجل الزمان ملحمتنا العظيمه

تحياتي لكن وادعولهم ارجوكمط
ط