الجمعة، 27 نوفمبر 2009

العيد فرحه ... وفته ولحمه





والله انا ما مخليه فى نفسكم حاااااااااجه


مهنياااااااااااكم ادي العيد فرحه بتاعة صفاء ابو السعود الى سمعاها يعنى العيد بالنسبه لي اساسا


ولو نزلتم تحت شويه هاتلاقوا طبق الفته المعتبر اي خدمه


كل سنه وانتم طيبين



اضحى سعيد عليكم جميعا يارب واحد وااااااااحد


طبعا مش هاعرف اعدكم ولا اقول مين ومين لكن ربنا عالم بالى فى قلبي للكل هنا


حقيقى انا متشكره انكم موجودين في حياتي


تاكدوا ان كل واحد فيكم اثر فيا بشكل او بآخر


يارب يكون عيد سعيد عليكم وعلى اسركم واحبابكم كلهم


وعلى المسلمين والدنيا كلها


وتكونوا صليتوا العيد كلكم وعيدتم على بعض


انا اول مره اروح اصلي العيد وانا معايا العيال


كنت فرحااااااااانه اوي لان روحنا اكبر ساحه بيصلوا فيها فى المنصوره الى هى الاستاد


وصدمت صدمه ما بعدها صدمه من كمية البشر الى هناك على جميع المستويات والاشكال والاصناف


الى فرحانين اوي


والى لما تشوفهم وبالذات الناس البسيطه منهم تحس ان وشهم بيقول فرحانين رغم كل شيء


وتكونوا اكلتم الفته واللحمه بتركيز كده والعمليه ظبطت معاكم


والى ما اكلش الفته انا جبتله طبق فته مظبط مربط اهووووو وبلحمممممممته ولسه سخن وحياتكم عندي


ووصيتي ليكم دايما عيدوا بضمير


وانسوا اي حاجه مزعلاكم وافرحوا وفرحوا الناس الى حواليكم


وبافكركم دايما ان العيد فرصه حلوه اوي لتصفية الخلافات والصلح خير تيجوا نتصالح وكده يعنى


وربنا يكرمكم ويسعدكم كلكم يااااااااااااااااارب

وهناااااااام بقى ما حدش يصحينى عشان انا ما نمتش لسه والله

افترااااااااا


الأحد، 22 نوفمبر 2009

الحكمة ... موضوع الرؤية الجديد



"ومن أوتي الحكمة فقد أوتي خيرا كثيرا "





الموضوع الجديد على




الى انا غبت عليها اوي وزعلانه من نفسي بقالي كتير


اتفضلوا شرفوني هناك

الجمعة، 20 نوفمبر 2009

تكعيبة الياسمين


تكعيبة الياسمين


نفسي افرد إديا للهوا وأغمض عنيا

نفسي أجري على شط البحر ... والموجه تلمس رجليا

نفسي اركب فرس يسابق الريح

وسط صحرا .... رملتها صفرااااااااا

نفسي اقعد تحت شجره ... واسمع صوت الطيور

واشم ريحة الزرع وترابه


نفسى أرجع بنت ست سبع سنين

أضحك .. وأملا الدنيا ألف ضحكة

و اقعد معاك على الحصيرة تحت تكعيبة الياسمينة

وساعتها أرسملك جوه إيدك قلب محنى


وكنت اقولك.. خلي قلبك دااايما ملك ايدك

وكنت يومها تقدر تحط راسك جوه حجري

و تحكيلى كلام كتيييييير... وتقولي خليه فى سرك

وكنت جايز يومها أنا أقدر احكيلك كتير

تحت تكعيبة الياسمين

انا قلت اطري على قلبكم بقى بعد الى حصلكم فى الايام الى فاتت واروق عليكم

اي خدمه ما تقلوش حارماااااااااكم من حاجه


الأربعاء، 18 نوفمبر 2009

الاسره الحاكمه ؟؟!!


الاسره الحاكمه


فاكرين الاسره الحاكمه

ايوه بتاعة زمان والبشوات الشريرين الى كانوا واكلين عرق الفلاحين

والى علموا على ظهور الشعب بالكرابيك

فاكرينهم ؟؟؟؟؟؟؟؟؟؟؟؟؟؟؟؟؟؟

انا بقى مش فاكراهم


هاحكيلكم على حاجه فرستنى اوي يا جماعه

من فتره كده البنك الى بنتعامل معاه بعتلنا تعالوا عايزينكم لاستكمال بيانات

وروحتلهم انا ورضا

لقيناهم بيدولنا استمارات كده وبيقولوا املوها

بصيت فيها وقلت للموظفه ايه ده كله عشان ايه

اسأله كتيره بقى


قالتلى ده بيانات مطلوبه لمكتب مكافحة غسيل الاموال وتمويل الارهاب (مكتب ا و حاجه زي كده مش فاكره والله )

قلتلها اوك

وقعدت اجاوب على اسأله تفرس الحقيقه لواحده زيي اصلا الحساب بتاعها يكاد يكون فاضي

حتى ايام ما كان فيه مبلغ ما فيش أي عبيط فى الدنيا يقول انه له علاقه بغسيل الاموال وهذا البتنجان

المهم قعدت اجاوب

خد عندك بقى السؤال الى جابنى لمس اكتاف

السؤال بيقول

هل لك صلة قرابه او أي صله بالاسره الحاكمه ؟؟؟

( الاسره الحاكمه العائله الحاكمه والله ما انا فاكره النص بس يعنى هى كانت كده )


حد يقولي ده ايييييييييييييييييييييه

اسره حاكمه ؟؟؟

بصيت للموظفه وقلتلها اسرة حاااااااااكمه ليه احنا فين

فين الديموكراتيه يا طنط

بصتلي بوش مش فاهم حاجه وقالتلي احنا ما لناش دعوه الورق ده جاي لنا من البنك المركزي

الحقيقه فاتت عليا اخد صوره من الاستمارات دي اوريهالكم بس لو روحت البنك هاسألهم عليها بجد


كلوا بقى فى نفسكم قولوا توريث ما توريثاااااااااش قولوا الى انتم عايزينه

باختصار هووووووووووواااااااا براحتكم

بابا ساعات يدينى الجرنال ويقولي اقرى كده النعي ده

طبعا فى الغالب بيكون النعي ده من الى بياخد صفحه كامله ده وحركات

النعي ده بقى تلاقيه لحد من البهوات ( اوعى تقول بشوات عيب مش اقطاعيين هما )

المهم

تلاقي بقى عم كل من واخو كل من وابو كل من ونسيب كل من

اقرا الاسامي يا معلم تلاقي الشله الحاكمه كلها موجوده واكتشفت من خلال الموضوع ده بجد صلات قرابه كتييييييير بين مسؤلين هذا البلد

وفجأه تلاقي نفسك عارف ليه الاخ ده مبلط فى الوزاره بقاله سبعة الاف سنه على التوالي

وتلاقي نفسك كمان فجأه وسط النعي اسامي بتاعة ناس بتقول ونسبنا الحكوووووووومه وبقينا قرايب

وتعرف برضه ساعتها نجمهم فى السما لييييييييه

كنت دايما اقراها واقول لبابا بتريقه الاسره الحاكمه

لحد ما قالوها هما وجابوا من الاخر وريحوا نفسهم

طيب مش كانوا يقولوا من الصبح بدل تعب القلب ؟؟؟؟؟؟

حد يرد علينا يا جماعه

حد يقولنا البنك المركزي ده بتاع بلد تانيه عندهم اسره حاكمه

حد يقولنا لااااااا مش بلد تانيه وانتم هنا عندكم اسره حاكمه وما تتعبوش نفسكم وتفكروا احنا مخلصين العمليه

حد يقولنا احنا مين وفين وليه وعايزين ايه وهانعمل ايه وهاتعملوا فينا ايه ؟؟؟؟؟؟؟؟؟؟؟؟؟؟؟؟

على فكره انا واخده علاج بينيم ومهيسة
حد يجهزلي شهاده بكده يا جدعان جايز احتاجها هناك


وطبعا مش محتاجين اقولكم من الصوره الى فووووووق دي انا باتكلم عن الاسره الحاكمه مييييييين
ايوووووووه برافوا عليكم
فى احد بلاد الاكواويين دول
كفايه كده بقى بلاش رغي على فكره




الأحد، 15 نوفمبر 2009

مصر هى امي

السلااااااااام عليكم يا شعب مصر

وصباااااح الخير عليكم

بس قلت اقول للناس مبروك وان شاء الله يكملها ربنا بالستر

حبيت بس اقول كلمتين لفوا فى دماغي امبارح

****************

شكلنا حلو اوي يا ولاد واحنا متجمعين على كلمه واحده

واحلى واحلى والكلمه دي بنقول فيها ياااااارب

احنا فيييييين مش كده على طول ليه

*********************

علم مصر والناس ماسكاه وبتقول مصر مصر حلو اووووووووي

ما عدناش بنعمل كده ليه ؟؟

انا اكتشفت ان علم مصر وحشنييييييييييييي

************************

الاغاني الوطنيه حلوه اوي يا ناس

من زمان جسمي ما قشعرش وانا باسمع اغاني وطنيه

عشان ما عادش فى اغاني وطنيه تحولت من مصر هى امي الى فوق دي والى كنت باغنيها فى حفلة المدرسه وانا صغيره

الى اخترنااااااك اخترنااااااااك

وياريتنا بصحيح اخترنااااااااه كانت تتبلع

لا يا ريتنا اخترنا اي حاااااااااااجه اصلا

********************

هانفضل طول عمرنا شعب غلبان وطيب وقريب

مزمار يجمعنا وعصايه تفرقنا

صعبنا عليا امبارح واحنا ما بنصدق اي حاجه عشان نفرح ونقول هيه هيه احنا مصريين ودي بلدنا وبنحبها

والله من حقنا اننا نحب بلدنا عشان حاجات تانيه كتير غير الكوره

ومن حق بلدنا تتحب برضه عشان حاجات تانيه غير الكوره

وعقبال الماتش الجاي ان شاء الله يعدى على خير

ونقول مبروك بصحيح بقى

الخميس، 12 نوفمبر 2009

التاج التاج التاج .... اوجاوبلك يا حبيبى التاااااااج

السلام عليكم مدونينا الكراااااااام
أولا وباديء ذ بدء
جائنا البيان التالي الى بيقول ان مفروسه الننوسه واحلى من البسبوسه عيد ميلادها النهارده
كل سنه وانتى طيبه يا مفروستي الجميله وعقبال ميت سنه سعاده وهنا يارب
وحشااااااااني يا بطه
وثانيا
جائنا برضه التاج التالي من دودو عاشقة الرومانسيه وحيث انها زنقتنى المزنق ده فانا مرقدالها برضه
هههههههههههههه
الى التاج السعيد
اسمك واسم مدونتك ؟
ما مكتوب على الصفه يا دودو بقى
احب الالوان ؟ الايام ؟ الارقام ؟
الالوان الازرق السمااااااوي
الايام والارقام عاااااادي كلها ايام ربنا والارقام برضه عااااادي
برجك ايه وتاريخ ميلادك ؟
ليه الاحراج ده
طب ينفع اقول تاريخ الميلاد بس ؟16 فبراير
الدلو يعنى من الاخر
اهم مميزاتك ؟؟
يووووووووه كتير ما انتم عارفين بقى ههههههههههههههه
لا اكتر حاجه باحبها فيها انى حقانيه الحمد لله تعالى ولو على رقابتي
واهم عيوبي ؟
ليه الفضايح دي كتيييييييير برضه فاضين لامته
عصبيه تقدروا تقولوا مجنونه . صوتي عاااالي حبتين . مش منظمه حبه واحده بس . وفى حاجات تانيه كتير مش فاكراها اكيد
حد جدع كده يعرفنى يطلع يقول هو
اكتر حاجه نفسها تبقى فيك ؟
نفسي اكون حاطه مراوح على قلبي واعصابي فى تلااااجه ويكون عندي قناعين ثلاثه كده ابدل فيهم عشان اعرف اعيش فى هدوء شويه
لا بس على فكره بعد التفكير العميق برضه كده مش هابقى مستريحه وانا اصلا ما نفسيش ابقى كده
لكن نفسي ابقى اكثر هدوءا فعلاااااااااااااا وابطل عصبيه وجنان حبه
ماهو مكانك المفضل ؟؟
مش هاقووووووووولكم عشان انتم قرارين بطبعكم
هههههههههههههههه
ايه هو هوايتك المفضله ؟
احتل النت المقام الاول حاليا فى قائمة هوياتي المفضله وبعد كده بقى يجى الطبخ والصيد والقرايه وفى حاجات كتير بس يعطوني حريتى
ما المقوله التى تؤمن بها ؟
يوووووه ده كتير اوي اقولكم شويه والنبى
اتقي فراسة المؤمن انه يرى بنور الله
ليس كل ما يلمع ذهبا
من يتقى الله يجعل له مخرجا ويرزقه من حيث لا يحتسب
وبشر الصااااااابرين
حرص ولا تخونش
اول عتبات السعاده هى الرضا
بس خلاص
اجمل هديه اتقدمتلك ؟
اممممممممممممم
مش هاقولكم برررررررضه لنفس السبب الى فوق عشان قرارين
اسعد يوم فى حياتك ؟واتعس يوم فى حياتي ؟
لا ما باحبش احسبها كده ابدا وما اعرفش ارد على السؤال ده ولسه الله اعلم بالاسعد والاتعس وربناما يجيبش تعاسه ابدا
موقف طريف لا يمحى من حياتك ؟
كتير يا اختي انا كل حياتي طريفه
ايه يا بت الاسأله دي
طيب اسمعي دي
مره كنت انا ورضا واحنا كنا مكتوب كتابنا خرجنا نقضي مشوار وبعدين قوم طلعت فى دماغنا نتمشى على الكورنيش
طبعا خالتكم صبرني ما تعرفش تمشي ساكته هاتك يا رغي ومناقشات بقى ايه من الى قلبك يحبها وحاجه يعنى موضوع عام بس ايه بقى المناقشه حميييييت وانا وهو شغالين بقى الله ينور واحنا ماشيين عاااادي جدا
قوم واد من الى بيمشوا على الكورنيش بورد مش عارفه مين ضحك عليه وقاله ان احنا بنعطف او كده هههههههههههههههههههههههه
فراح داخل علينا وبيقول لرضا ورد يا بيه
رضا بقى فى قمة الانهماك فى المناقشه الحاميه قاله ياعم اجري احنا لسه هنحب
الواد اتصدم ومشي وبعدين وقفنا كده احنا الاثنين بصينا لبعض وفتحنا فى الضحك
لسه مخطوبين وبيقوله احنا لسه هانحب امال بعد كده هاتقولي ايه يا واد عمي وكده يعنى هههههههههههههههههههههه
معاك ثلاث وردات تديهم لمين ؟
وبعدين فى هذا الاحراج
ورده لرضا وولادي يشموا فيها جماعه
وورده لبابا وماما واخواتي برضه جماعه
وورده لكل اصحابي القريبين مني اوي والى عارفين نفسهم ومش هاقولكم عليهم عشان نفسسسسسس السبب
معاك 3 رصاصات على من تطلقهم ؟
الاولى فى دماغ البقره الضاحكه
والثانيه فى دماغ ابنه
والثالثه فى دماغ الى يتشدد لهم
ايه رايك فى الحب ؟؟
الحب الحب الحب ؟ الحب حلاوته بالقنطار
ولمن تقول اجمل كلمة حب ؟ ده سؤال ده برضه
مش هاجاااااااوب عشان نفسسسسسسس السبب
هل من السهل انت تمثل الحب لشخص يحبك لعدم جرح مشاعره؟
لا طبعا اولا لانى مش باعرف امثل
ثانيا لانى لو عملت كده يبقى باجله جرح المشاعر فقط وكمان هاخلي الجرح يبقى اعمق واشد تاثيرا
المرأه فى نظر الرجل اهم شيء في حياته
الرجل فى نظر المراه هو محور حياتها اساسا
اسعد خبر سمعته هذا العام ؟ واتعس خبر ؟
مش عارفه مش لاقيه حاجه تعد خبررررررر جامد يعنى
اه استنوا لما البت حنين قالتلى انها حامل فرحت بشكل مش معقوووووووووول
عشان كده هاخليها تجيب بنت المره الجايه وتسميها على اسمي
هههههههههههههههههههههه
لمن تهدي التاج ؟؟
كل الى عايزه يتفضله مش عارفه بقى
عاجبك كده يا دودو بتدوسي على الزرار وتسبينى ارغي
اه نسيت اقولكم يا قراااااااااارين مين فيكم فقعنى العين التمام انا تعبانه من يوم ما سبتكم بؤي بيوجعننننننني
والدكتور قالي قدام اسبوع كده اعمل فيكم ايه دلوقتي
ماهو ما طلعتش من اديكم
يا حد عداااااااني يا حد فقعنى قرايه
اعترفوا بسرررررررعه الكرسي الكهربائي اهو على الجنب

الاثنين، 9 نوفمبر 2009

سبونا نكتب


السلام عليكم



طبعا بقالي شهر مش عارفه اكتب ولا ارغي ولا اكل دماغكم عشان التجمع



بس يستاااااااااهل الحقيقه الواحد واخد دفعه مركزه من السعاده من يومها



المهم عايزه اكلمكم فى موضوع مهم اوي شايلاه فى قلبي وكاتمه من يوم ما نزلت البوست بتاع لمسة حب



الحقيقه انا بتهيئلي كنت اتكلمت فى الموضوع ده قبل كده ايام قصة قلب ايمان



لكن يظهر ان الواحد لازم كل فتره يديكم الجرعه



بعد ما نزلت البوست بتاع لمسة ايد الاقي بقى ناس خفيفة الظل هو ده حصل بصحيح ؟؟؟



والى يقولي عيب ما يصحش كده



والى يقولي داري على شمعتك تقيد



ايه هو فى ايه ؟؟



هو انتم ليه كاتمين على نفسي كده ؟؟



سبوني اكتب



مش لازم ترشقوا مناخيركم بقى فى دماغي وتعرفوا ايه الحقيقى وايه الي خيال



انا باكتب اي حاجه وكل حاجه



باكتب حاجات حصلت فعلا



وحاجات نفسي تحصل



وحاجات نفسي ما تحصلش



وحاجات شوفتها فى حياة اشخاص تانيين



وحاجات من دماغي كده افتكاسات يعنى



مش لازم اديلكم تقرير بقى انا امته فكرت فى الكلام ده وليه وكتبته امته



خصوصا ان انا بقالي 8 سنين واكتر باكتب يعنى بلاش غلاسه



البوست بتاع لمسة حب ده انا كاتباه من زمان حتى يمكن ناس من اصحابي المدونين انا وريته لهم قبل ما انزل البوست بكتير



ولقيته حلو انزله فى عيد جوازي يعنى مش قصه بقى ما تصدعونيش



هو البوست اصلا مش تهمه يعنى ولا قلة ادب والله



احنا كاتبين الكتاب يعنى مافيش مشكله

ههههههههههههههههههههههههههههههه



بس يعنى برضه بعينكم مش هاريحكم ومش هاقولكم بعد كده انا باكتب ايه وليه ومين وفين



وعلى فكره انا عندي حاجات كتير مكتوبه زي كده وكنت باتجنب انشرها عشان الغتاته بتاعتكم دي



بس خلاص انا خدت قرار اطنشكم خاااااااالث خااااااااالث وانشر الى انا عايزه انشره



اكتر ما يضايقنى هو حشريتكم يا مدونين



انا هاعلق ورقه على المدونه من بره بتقول مالكوش دعوه

ههههههههههههههههه



ايام لما كتبت قصة قلب ايمان فاكرينها ؟

ما تتخيلوش الاميلات بقى والتليفونات كمان



انتى تقصدي مين



هو انتى ايمان ؟؟ طب انتى صاحبتها ؟؟



والى يقولي انتى تقصدي مراتي ؟ والى تقولي جوزي شاكك فيا اصل اسمي ايمان



طيب اعمل ايه فى الشعب ده ؟؟





ارجوكم بلاش اللوك لوك بتاع الحريم ده وبطلوا تشغلوا نفسكم بحياة الاخرين



مش معنى كده ان الحريم بس هى الى بتقول لا لا ماهو في رجاله بتلك لك حريم برضه



لما حد يكتب حاجه قيموا الموضوع عموما بصرف النظر عن كونه يخص حياته ولا حياة العفريت الصغنن الى مربيه تحت السلم



قيموا الفكره قيموا الادب مثلا مش تقيموا حياة الشخص



على الله اسمع تاني حد بقى بيكلمنى على ان البوست بيتكلم عن حياتي الشخصيه ما لم اشير الى ذلك صراحة



واعملوا حسابكم المدونه دي مزوده بساطور واكياس ومقصله ديجيتال وكرسي كهربائي



وعلى راي الست



اعطنى حريتى اطلق يداااااااااااااااااااي



الجمعة، 6 نوفمبر 2009

كان اجمل يوم


دي صورتنا فى نادي الاطباء كلنا ومش واضحه وتقريبا انا كنت قاصده ولا ايه عشان لو كانت واضحه ما كنتش هانشرها ههههههههههههههههههههههههههههه





السلاااااااام عليكم




كان يوم جميل جميل جميل بالنسباااااالي على الاقل





بالغيظه فى كل الناس الى ما جوش




بجد انا كنت فرحااااااااانه اوي يا جماعه عشان اليوم الحمد لله كان ناجح والناس كانوا مبسوطين وكفايه ان انا شوفتهم كلهم



نقول بقى احنا عملنا ايه




اولا هاقولكم الناس الى جت بغير ترتيب




فاتيما حبيبتى روح قلب ماما


داليا قوس قزح


خالد همس الاحباب


خيخه


بن حجر العسقلاني


أحمد حسن البنا


عاشقة وغلبانه


اميره على كوكب مهجور


دعاء مجرد حلم


بوبو / وكنج توت


محمد عبد الرحمن شحاته بلاد السحر والخيال


مصطفى محمد فك زنقه


ابراهيم العدوي كأنى اتكلم


صلاح العميري مسدس صغير


حلم كان


شيماء شعب لابد له من حكومه تشكمه

ساسو mourninig love


ميرا امرأه بعقل رجل


ليسندرا


ضياء abeautiful mind


محمد الغرباوي رحلة بحث


ساره طوبار محاولات للبحث عني


روح طفله مش عايزه تكبر


ايمان سما مصر


سوووول وبنت خالها
مياده ايامنا الحلوه
بنت المنصوره
استاذ عبد الجليل
ساسو الى كنت ناسياها وهي اول واحده اتبرعت



طبعا طبعا انا ناسيه ناس كتير لان العدد كان 30 تقريبا ودول الى انا لحقت اكتبهم والى انا نسيته بقى يستاااااااهل عشان فضلت اتحايل عليهم يكتبوا اساميهم


اليوم بقى


اولا روحنا على المستشفى واتبرعنا الحمد لله اغلبنا اتبرع وفى ناس طلعوا ما عندهم دم يا عينى


وفى ناس طلع عندنا دم بزيااااااااده يا صلاح يا عميري


وفى ناس ما رضيوش اصلا يعملوا تست الهيموجلبين احسن يتبسوا زي محمد يا ابراهيم يا عدوي


حلو التصييح ده صح ؟

الحمد لله كله مشي تمام فى المستشفى بالرغم من انى عملتلهم هوليله اول امبارح وروحت كلمت من اول نائب مدير المستشفى لحد العمال الى بيشتغلوا فى بنك الدم


الا انك ابتسم انت فى جمهوريه مصر العربيه روحنا لقيناهم مطلعين امعاء بنك الدم بره وبينضفوه ناس نضااااااااااف


بس حطولنا كراسي التبرع بره واتبرعنا والحمد لله تعالى وافتكر كده كان احسن حتى


وانا اتبرعت

نعم نعم نعم لقد فعلتها

بعد 13 سنه عمر الهيموجلبين بتاعي ما وصل 12 ابدا الحمد لله وصل واتبرعت وهبط هبط هبط وقعدوا يشربوا فيا عصير وفيييييييين على ما عرفت اخد نفسي شويه


بعد كده طلعنا على الصلاه وانا طبعا عشان قويه وكده ما قدرتش اوصل للجامع ورحنا على كوك دور على طول


اتغدينا والبت داليا كانت هاتلتهم الواد الى بيشتغل فى كوك دور عشان قال خليكوا فوق عشان ما اطلعش وانزل

هههههههههههههههههه


وبعد الغدا روحنا على نادي الاطباء الناس هناك اخر احترام بصراحه وعملولنا المكان الى قعدنا فيه ده عشان عشان نتلم كلنا فى مكان واحد


قعدنا شويه والاستاذ احمد حسن البنا

كان عنده موضوع عايز يناقشنا فيه


الراجل كتر خيره كان مهتم وجاي مخصوص عشان كده واعتقد ان الناس احبطته ومن الزحمه والدوشه ما حدش عرف يسمع اوي


وان شاء الله انا هابقى اناقشكم فى فكرته مره تانيه


وبعدين قعدنا نرغي ونرغي ونرغي


وبعدين ركبنا مركب فى النيل ساعة الغروب





وكان وقت جميل جدا جدا جدا


وبس خلاص خلص اليوم خدنا بعضنا ومشينا كل واحد فى سكته



ده بقى خالد همس الاحباب الى اصر اصر انه يلم مننا فلوس وياخدها ونقنع فيه بلاش كده يا خالد ليه كده يا خالد


قال ايدكم كل واحد على اربعه جنيه ماليش دعوه ودي صورته وهو بيعد الفلوس








الحقيقه طبعا انا دبسته هو وداليا قوس قزح يلموا الفلوس بتاعة المركب من الناس عشان انا كنت خلاص فضيت شحن



وناس كتير كتير كتير كتير كتير اتصلوا بينا لما جالي هسهس من التليفون


هاقول بعضضضضهم الى فاكراه طبعا



استاذ وليد مدونة عارفه مش عارف الكويت

وده حقيقى ربنا يكرمه كان بيسعى انه يوفرلنا نادي قريب لنا بس كتر التليفونات خلت الاخ الى المفروض يوصلنا للنادي ما عرفش يكلمنى



م . هاني ابو زيد السعوديه

كلمنا اكتر من مره وانا صحيته من النوم بالغلط هههههههههههه


أ عمر بدر الى اتصل علينا وما عرفش يجى ربنا يتم شفاه على خير يارب


بدراوي الي كان مقترح التجمع من الاول ما عرفش يجى مش عارفه ليه


شمس النهار الى برضه ما عرفتش تيجى


مفروسه حياتي


وحنين القلب


وعاشقة الرومانسيه

ابو خالد

وكلمتنى كمان امبارح احساس طفله من اليابان وسلمت على كل الناس



وناس كتير كتير كتير بجد مش عارفه احفظ ولا اركز دلوقتي مين اتصل بينا


الناس الى كانوا موجودين بجد انا سعدت بهم جدا جدا


البت داليا مصممه مش عايزه تاكل فى كوك دور ويا حبة عين امها كانت جايه فكره اننا هانتقابل على شط الترعه والبط والوز يكاكي من حوالينا وناكلها فطير ومورته وقشطه وعسل فاحنا احبطنا املها ولقت مافيش اي حاجه خالص من ده


البت خيخه من الصبح لاخر اليوم وهى ماسكه علبة الكيك الى كنت واخداه بتنتحر قدامه عشان بالشيكولاته . ولسانها فيه 3 متر زياده مش عارفين نستاصلهم ازاااااااي . بس عسل باموت فيها وبعدين انا كنت صعبانه عليها النهارده وقعدت تطبطب عليا وخدتنى فى حضنها كنت هنام ههههههههههههههه


صلاح العميرى بهدتله الصراحه كل ما اتزنق يا صلااااااااااااااااح بس عادي يعنى امال هايسبنى لوحدي ولا ايه


ومين كماااااان يا جدعان


اه وبوبو وكنج توت وابنهم الجميل وبوبو معلم فيها المسقعه بتاعتي اوي هههههههههههههههههههه وجوزها حييت فيها تكبير الدماغ جدا جدا جدا واحنا بنتناقش عقباااااااااااااااالي اعمل كده


اه ومحمد الغرباوي الى ما كنتش اعرفه وحقيقى حاسه انه شخصيه كويسه اوي وانا وداليا مسكنا فى زمارة رقابته وقلناله هانجوزوووووووك يعنى هانجوزووووووووك هههههههههههههههههههههههه وخلاص هو دلوقتي هايهرب يرجع الصحرا ارحم تقريبا



والبناتيت الصغنين ميرا وشيما وليساندرا وكل الشله عسولين اوي هاريتهم معاكسه


المهم يعنى كان يوم جميل جميل جميل


وانا اتبسط اوي بجد وحاسه ان الناس كانوا مبسوطين برضه


واتمنى نكرر الموضوع ده ان شاء الله


وبس كفاااااايه بقى كده رغي والى يفتكر حاجه يقول يا رجاله


والبت شيما اتكلمت هنا عن اللقاء


مش عارفه مين تاني كتب لسه



اقولكم شكرااااااااااااا لكل الى جه


وشكرا لكم جميع يا اصدقائي انكم موجودين فى حياتي فعلا


انا باحبكم اوي بجد


وعقبال كل مره متجمعين على خير ان شاء الله


الخميس، 5 نوفمبر 2009

بافكركم واكد عليكم تجمع المنصوره بكره ان شاء الله

ال


السلام عليكم يا ايها الناس






بافكركم بس بمعادنا بكره ان شاء الله فى لقاء مدوني المنصوره الذى اندمج مع الحمله الخيخيه للتبرع بالدم




شوف الحلاوه بقى




وان شاء الله هاتشرفونا فى المنصوره




وعشان اااااااااكد عليكم كل حاجه ان شاء الله تمام وزي ما احنا




اولا هانتقابل قدام مستشفى الاطفال بجامعة المنصوره الساعه 10 صباحا


وهافضل واقفه بره لحد عشره ونص كده ان شاء الله وبعد كده هاندخل جوه المستشفى فى بنك الدم عشان نتبرع




والى يجى فيكم بعد كده يدخلنا جوه او يتصل بينا على الرقم الى انا هاسيبه هنا




وبعد كده هانروح نصلي الجمعه فى مسجد السلاب




وبعد الصلاه هانروح كوك دور نتغدى ان شاء الله




وهنا تتغير الخطه




هانشوف بقى حسب وقتكم ومزاجكم واحنا فى كوك دور نروح نادي ولا نقعد فى كافيه


هانشوف لما نتقابل ان شاء الله




يعنى مافيش نادي النيل




اي حد هايجى من فضلكم يتصل عليا الصبح يقول انه جاي عشان يلاقي حد مستنيه بره




وعموما اي حد ناوي يجى فى اي وقت يتصل عليا قبلها عشان يعرف احنا فين تحديدا




وادي رقم التليفون الى هايكون معايا وقت اللقاء اهو تااااااااني






خلاص شلته خصلت الليله نيهاها




الرقم ده انا فاتحاه النهارده لحد الساعه 12 بالليل لا حد عايز يتستفسر عن حاجه




وطبعا بكره من الصبح هايكون مفتوح




خلاص كدددددددددده ؟




انا فى انتظاركم يا حلوين

وبهذه المناسبه السعيده
اهديلكم الاغنيه دي
عشان ما عرفتش انزلها على المدونه مش عارفه ليه
اغنية يا مسافر المنصوره

ههههههههههههههههههههههههه