الأربعاء، 11 مايو، 2011

الهبل الطائفي فى مصر

غلبتوني يا خلق ... يا ناس حرام والله ده انا غلبانه وعندي الضغط و3 عيال وابوهم

الواحد بيسمع كلام ينقط ويشوف كليبات تجيب شلل رباعي ويقرا كلام مكتوب يجيب تخلف عقلي

غلبت بقالي كام يوم اقول واعيد وما حدش بيفهم لييييييييييه مش عارفه

كل يوم اقول بس خلاااااااااااص ما عدتش هناقش حد ولا هاكلم حددددددد  بس مافيش فايده

هو احنا ليه ما بنتعلمش مما سبق ؟؟؟ الله ده غباء ده ولا هبل ولا ايه ... الله ده احنا كنا بناخد فى علم النفس ان ابسط واول واسهل طرق التعلم هى التجربه والخطأ  ... طب ايه ما شبعناش اخطاء ولا ايه

النظام السابق والى لسه لابد فى الدره وقاعد يناوشنا كان طول عمره بيستخدم كارت الفتنه وحواديت هبله وعبيطه زي حواديت زمان بتاعة ابو رجل مسلوخه وابو شوال الى بيلم العيال فى الشوال وامنا الغوله الى بتمص دم العيال وتاكلهم .. وصولا للاشكيف المخيف

وما زلنا فى نفس المسلسل الاهبل
 عك عك عك كله بقى عك وفى الاخر بكل بساطه يقولك اصلها فتنه طائفيه  وانا راي انها هبل طائفي والله
دلوقتي فى حد عنده مخ دلوقتي مش عارف ومتاكد بان النظام البائد واصابعه منهم خمس ست صوابع بيلعبها جهات خارجيه معاديه واولهم اسرائيل

فى حد عنده شك ان النظام ده كان عميل فعلا لاسرائيل وامريكا واي كلب بلدي يدفع اكتر ؟؟

طب الى يبقى عميل وخاين وبيقبض من بره اصلا لما تحط السكينه على رقابته هايعمل ايه ؟؟

هايستعمل كل سلاح قذر وفتاك فى ايده واستعمله قبل كده وبشرااااسه عشان يحلق اي حاجه او على الاقل يتعلق فى قشايه

وهو ده الى بيحصل دلوقتي بالظبط  بس بقى الفرق اننا اصلا بنفرر عندنا وضع اقتصادي منيل بستين نيله وقلق اجتماعي وامنى مقصود ومظاهرات فئويه وغير فئويه وهبليه وكل حاجه

وكمان بقى طلعلنا اعداء جداد  من الدول المحيطه الى مش من مصلحتها نجاح الثوره والا يبقى اشاره مؤكده على زوال ملكهم

هل تعتقدوا مثلا ان الولايات  المتحده الامريكيه دلوقتي قاعده بتلعب وحاطه ايدها على خدها زي الولايا مستنيه تشوف  الثوره هاتوصل لحد فين  ومين الى هايرسى عليه العطا  ابسلوتلي نوت اكيد شغاله من فوق الترابيزه ومن تحت الترابيزه وكله الله ينور

واسرائيل اظن اخدت صاروخين ارض جو فى اسبوع واحد مطيرين عقلها توقف الغاز والصلح بتاع فتح وحماس
حد متخيل مثلا ان سرائيل هتاخد الصاروخين دول وتقعد كده تقول اه يا مامايا  اكييييد لا دول لو ما اشتغلوش علينا صح يبقوا احنا هبل وعبط ان عاملين لهم قيمه كل السنين دي وفاكرينهم عدو وخصم قوي

طب الدول العربيه الشكيكه الى قاعدين على جمر كلهم اولا عشان خايفين يجي عليهم الدور وثانيا عشان امرائهم ومشايخهم متورطين للركب مع رجال الاعمال عندنا والقلبان الى عندنا دي هاييفتح ملفات اجاركم الله على ريحتها وخدوا بالكم الامراء دول لهم نفوذ وضغوط قويه على الحكومات دي  ... طب برضه الناس دي هاتقف ساكته ؟؟

وطبعا طبعا لما تتلاقي المصالح دي كلها يبقى هايتفقوا علينا ويطلعوا عين اهالينا زي ما انتم شايفين

طب الناس الى عماله تخرط على قلبنا بصل طول النهار والليل فى الفضائيات دول ما بيقلوش الكلام  ده ليه ؟؟؟
هالبت انا عقليه فاذه يا ولاد وانا ما اعرفش

طيب احنا بقى مفروض نعمل ايه ؟؟؟ ايه الحل ؟؟؟

اولا: الملف الامني المصري والى تولاه عم الحاج وزير الداخليه ... حد يقولي عمل فيه ايه ؟؟

ده لازم يتغير لازم كل مسؤل يعرف انه لما ما يعرفش يمشي الشغل يمشي ويجى غيره  وعموما انا شايفه ان شخصيته ضعيفه ومش عارف يسيطر على البلجيه المسميين بظباط الشرط  مش كلهم طبعا عشان ما تطبقش فى زمارة رقابتي انما ما تنكروش انهم اكترهم كده


ثانيا : هولاء المدعين السلفيه والسلف الصالح براء منهم انا مش عارفه هما سلفيين سلفهم الحقيقى مين يعنى
لازم يتادبوا كويس ويتلبوا كويس ويطلع عصام شرف كده وهو مكشر عن انيابه ويقولهم يا غجر انتم مالكوش اي صفه قانونيه هنا وكل واحد فيكم يحترم نفسه ويلزم مكانه ولما واحده تتصل عليك تقولك الحقنى يا عنتر زمانك تروح تبلغ الامن وتقول  روحوا فتشوا مش تفتش انت يا شاطر عشان كده عيب يا عين امك


ثالثا: المسيحين جميعا ياخدوا تنبيه شديد اللهجه بانه لن يتم التهاون ابدا فى اتخاذ الاجراءات اللازمه اذا ثبت ان اي كنيسه او دير يحتجز به اي شخص رغما عنه ايا كانت ديانته  وكذلك الاسلحه الغير مرخصه .. والناس الى اطلقت رصاص فى اي من الاحداث الماضيه يتعلقوا من رجليهم بجد ومحاكمات عسكريه واعدام لانهم اتسببوا فى قتل فعلا

وبكده يبقى المشكله انتهت

انما الطبطبه والمياصه الى احنا فيها دي ما تقولش غير حاجه واحده بس

ان فى تآمر من الجهات السياديه عموما فى البلد بتغذى الاحداث المؤسفه الى حصلت ودي حاجه اصلا اخطر  من اي شيء ان يبقى حاميها حراميها

واي حد يعتقد ان الى بيحصل قد يصب فى مصلحة البلاد بشكل او باخر وان سبوهم يادبوا بعض والكلام ده يبقى غلطان غلط بشع جدا

لان احنا كده بنستعمل نفس الطرق المشينه الى كان بيستعملها النظام السابق واصابعه القذره الملوثه بالخيانه العظمى

كل الاطراف غلطاااااااااانه كلهم غلطانين يا عاااااااالم ولاااازم يتحاسبوا بشده وحزم وقلمين وشلوطين واحتمال قطع رقبه

يااااااااااارب تعقلوا بقى ياااااااااااااااااارب تفهموا بقى

عندي كمان اقتراح مهم بعد انتهاء الازمه الحاليه عشان نخلص منها للابد بقى
الرسول عليه الصلاة والسلام فى صلح الحديبيه  اتفق مع قريش على هدنه وكان من شروطها اييييه ؟؟؟
ان لو واحد اسلم من قريش نرده ليهم انما العكس لا لو واحد رجع فى اسلامه وراح لقريش تاني مش هايردوه لينا

والرسول عليه الصلاة والسلام وافق  طبعا لان الظروف وقتها كانت تحتم علينا كده وكنا كدوله اسلاميه لسه فى المهد ومحتاجين للهدنه دي عشان نوحد صفوفنا ونبنى اركان الدين والدوله

طيب احنا ليييييييه ما نعملش اتفاقيه حلوه كده اموره ونسميها زي ما نسميها
نسميها عهد نسميها قاااانون اااااه ايه المشكله احنا هانعمل دستور جديد وقوانين جديده وهانبقى فله ان شاء الله
ايه المانع ان يكون فى قانون  يقول الى ياسلم ياسلم والى يتنصر يتنصر والى هايقول بم هانقطع رقابته لانه هايعد اييييييييه مشعل للفتنه
انا مش بتاعة قوانين ولا اعرف ازاي ممكن يتوضب القانون ده بس اعتقد انه ممكن اوي
ليه لا ؟؟ عمر ابن الخطاب رضي الله عنه كان بيسن قوانين مستحدثه وتعد قوانين وضعيه زي الى موجوده ايامنا بما فيه الصالح للمجتمع والدوله وبيغير فيها وبيلغيها ويحط غيرها
ايه المشكله ؟؟؟
حد يناقشنى فى الاقتراح ده من فضلكم  بيفهم فى القانون  عشان عايزه اعرف امكانية تنفيذه
بس كده يا اصدقائي الحلوين
اللهم بلغت اللهم فاشهد

يااااااااااااااارب استرها معانا يارب  احنا غلابه والنبى وما صدقنا نعمل ثوره

الثلاثاء، 3 مايو، 2011

ضباط لكن شرفاء

السلام عليكم يا اصدقائي الى واحشنى

انا زعلانه اوي بجد انى ما عدتش باكتب زي الاول بس لا ولن ايأس وهارجع ان شاء الله اكتب تاني كتير وارغي واكل ودانكم

المهم النهارده عايزه اعرفكم على  مجموعة ناس محترمين جدا شرفاء ناس عايزين من عينتهم كده شويه فى كل مصلحه وكل وزاره وكل مجال فى مصر

الناس دول هما حركة ضباط لكن شرفاء

وهما مجموعه من ظباط الشرطه الشرفاء ... الحركه بدأها واسسها المقدم محمد عبد الرحمن يوسف 

واهداف الحركه دي بكل بساطه وفى كلمتين  انهم كظباط شرطه وكل واحد فيهم فى مكانه بيجمعوا مستندات وادله تدين الظباط الفاسدين الى فى جهاز الشرطه وبيقدموها للنائب العام واجهزة التحقيق  للتخلص من العناصر دي وتظهير جهاز الشرطه

وكانوا ايام الثوره لهم فضل فى فضح كل جرائم نظام العادلي من داخله 

طيب انا بارغي فى المرغي ليه ؟؟؟

عشان اعرفكم جميعا بالحركه اولا ... وعشان انا املي يكون فى زي الحركه دي فى كل مكان فى مصر وفى اجهزة مصر كلها

القضاء   الصحافه   الجيش   الاعلام    الاثار  التعليم  الصحه   والوزارات كلها عموما

حملة نضافه لكل حته فيكى يا مصر

حركة ضباط لكن شرفاء...... ياريت تزوروا الجروب بتاعهم على الفيس بوك وتشوفوا بيقولوا ايه .... وطبعا الى عنده معلومه او مستند يقدر يساعد بيه ممكن يتواصل مع المقدم محمد عبد الرحمن ويشوف ايه الموضوع

والحركه من ضمن الجهات المدعوه لحضور المجلس الوطني  والى برضه عايزاكم تبصوا على الموقع بتاعه لان  انا شايفه انه محطه مهمه اوي لتجميع كل فئات المجتمع السياسي الى افرزتها الثوره تحت لواء واحد

فى النهايه هاسيبكم مع شوية فيديوهات فى تعريفات ومعلومات عن ضباط لكن شرفاء

ده فيديو تعريف بالحركه



والفديوهين دول ردا من المقدم محمد على وزير الداخليه الحالي والى اعتمد فى حكمه على المقدم محمد من خلال النظر فى الملف الذي صنعه العادلي وتلامذته