الاثنين، 29 ديسمبر 2008

الوقفة التضامنيه بالدعاء لغزه فجر الجمعه 2/1/2009

تحديييث
فاضل شويه صغيرين على الفجر يا جماعه
وانا قاعده اهو مستنياااااكم ومعاكم لحد ادان الفجر
تحديييييييييث : وهنـــــــــا الجروب على الفيس بوك لنفس الغرض
تحدييييث تاني: نمى الى علمى ان فى دعوه بالفعل من ناس تانيه مش عارفه مين لنفس الكلام وتكون فى فجر يوم الجمعه الجايه عشان كده انا غيرت المعاد عشان نكون اكتر عدد ممكن اوووووووووك يا جماعه ؟؟
يا جماعة ان شاء الله انا حددت معاد الوقفه التضامنيه بالدعاء لاهل غزه
يكون ان شاء الله يوم الجمعه فى صلاة الفجر
ومن فضلكم ندعي من قلوبنا
ومن فضلكم نحاول الالتزام بالوقت
نفسي احس اننا وقفنا كلنا على قلب رجل واحد عشان حاجه مهمه
لنصرة دينا ولنصرة اهلنا المكلومين
وزي ما ساعة ماتشات الكوره بتبقوا كلكم فى وقت واحد بتقولوا يارب
ياريت نسمعها مره عشان حاجه مهمه فعلا
وده دعاء انا كتبته وطبعا الى عايز يقول حاجه تانيه يقول والى عايز يقول ده ويزود عليه حاجه يقوووول
وطبعا ما تنسوش تدعولي كلكم فرصه بقى
هانصلي كلنا ان شاء الله
وبعدها ندعوا الدعاء ده
والى ما تعرفش تصلي تدعي مش مشكله
والى عايش بره مصر ياريت يحاول يدعي معانا فى نفس الوقت احنا الفجر عندنا الساعه الخامسه والثلث بتوقيت القاهره (عشان كده انا كنت محدد ساعه فى الاول مش أذان بس مين يفهم )
طبعا الى ما يقدرش يعمل كده يدعي بعد الفجر بتاعه وامرنا لله
يا ودود، ياذا العرش المجيد، يا فعالاً لما تريد أسألك بعزك الذي لا يرام، والملك الذي لا يضام، وبنورك الذي ملأ أركان عرشك أن تكفي المسلمين شر أعدائهم ، يا مغيث أغثنا، (ثلاث مرات)
اللهم إنا عبيدك وابناء عبيدك ، ناصيتنا بيدك، ماضين في حكمك، عدل في قضاؤك، نسألك بكل اسم هو لك، سميت به نفسك، أو أنزلته في كتابك، أو علمته أحداً من خلقك، أو استأثرت به في علم الغيب عندك، أن تجعل القرآن العظيم ربيع قلبي، ونور صدورنا، وجلاء حزننا، وذهاب همنا
اللهم اللهم عليك باعداء الدين. اللهم يا قادر يا قاهر يا قوي يا عزيز ،
اللهم عبادك المستضعفين في غزة تجبر عليهم اعداء الدين الملاعين والمنافقين الحاقدين اللهم فانصرهم على أعدائهم وفرج كربتهم وارحمهم ،
اللهم من يجيرهم سواك ومن يرأف بهم إلاك اللهم بك نثق وبقوتك نؤمن
اللهم زلزل الارض تحت اقدام اعدائنا اللهم شتت شملهم واجعل تدبيرهم تدميرهم
يا الله يا الله يا ذا القوة والملكوت ليس لنا رب سواك
يارب ارفع عن المسلمين اجمع الضر
يارب ولي علينا الصالحين
اللهم انصر المسلمين فى كل مكان
اللهم ثبتهم واضعف اعدائهم
اللهم نسألك الرحمه نسألك الرحمه نسألك الرحمه
لا إله إلا أنت سبحانك إني كنت من الظالمين،
لا إله إلا الله العظيم الحليم، لا إله إلا الله رب السموات والأرض ورب العرش العظيم
واللهم صلي وسلم وبارك على سيدنا محمد وعلى اليه وصحبه وسلم
طبعا يا حلوين الدعاء طويل شويه معلش انا استغرقت بس مش هاقصره طبعا مش هاتلحقوا تحفظوه ياريت تطبعوه او حتى تقروه ساعتها من الشاشه
والي يعرف يحفظ منكم يدعوا الى الله وهو ساجد
واوعوا تنسوا تدعوووووولي باي حاجه كويسه يعنى الى يطلع من ذمتكم حلو

غزه....... بدون جعجعه

سلام عليكم
حقيقى يا جماعه احنا ناس نجيد التسقيف والتطبيل فى الزفه مووووووت .
من غير ما نعرف اساسا هى زفة مين
دلوقتي فى كلام كتير اوي بيتقال فى موضوع غزه والى له والى مالوش بتكلم
فى ناس عندها استعداد تفكر وناس لا
السياسه للاسف لعبه قذره
ده فى عصرنا بس
انما الرسول علية الصلاة والسلام كان سياسي ناجح بدون قذاره
اه كان رسول ونبي الا انى ارسى قواعد دوله قويه سياسيه وعسكريا لقرون مضت بعده
لحد ما شرفنا احنا واسلافنا وبوظناها ولله الحمد
والحمد لله اصبحنا كما وصفنا الحبيب المصطفى كغثاء السيل
عارفين يعنى ايه غثاء السيل ؟؟
بعد ما السيول بتخلص مخلفات السيول بقى بتبقى ايه ؟؟؟
حاجات كده بايشه وضعيفه صح ؟
احنا كده بقى
وليس عن قله كما قال الحبيب المصطفى ولكن عن ضعف ايمانا
المهم كلام كتير عمال يتقال
مصر يجيلها ويتحط عليها قافله المعبر
مصر المفتريي عندهم جيش ومستخسرينه
مصر المفتريين عندهم 80 مليون شحط ما بيجوش يحاربوا ليه
مصر مصر مصر وكأن الدنيا كلها خلصت ما عادتش الا مصر
واحنا كشعب مش فاهم حاجه ومش واثق فى حكومته بنهلل وراهم ونقول ااااااااااه
عموما انا طبعا قلبا وقالبا مع اهل غزه ومع كل مسلم مقهور على الارض
والله وغير مسلم كمان
الا انى اخص المسلمين طبعا بشفقة قلبي اولا
نفتح المعبر اووووووك
انما تبقى الحدود ميييييغه لا طبعا .
دى مش حدود عربيه حتى خالصه
دى حدود مع دوله معاديه ومش اي عداوه
الى بيحصل ان بمجرد فتح الحدود الفلسطنين عايزين يدخلوا بعربياتهم وعيالهم وبيوتهم كمان
وكمان قوات حرس الحدود هناك ما تقدرش تفتح الحدود بالسلاسه دي يا جدعان لو في حرب
لازم تعزيزات توصلها
والى انا شايفاه انهم جابوا صور من الصبح للمعبر مفتوح
حتى ان فى واحد طلع اتحدى حماس انهم يصوروا معبرهم ان كان مفتوح اصلااااااااا وده حصل يوم الحج برضه
ارجوووووووووكم بلاش الجعجعه واحنا مش فاهمين حاجه
والى شايف نفسه جدع يروح يتفضل الطريق قدامه والمعبر مفتوح ويروح يحارب
لكن بصدورنا عريانه لو روحنا كلنا هانموت زيهم
وحكوماتنا حكومات كلها فاسده وضعيفه وامرها مش بايدها وكلنا عارفين كده
وبطلوا يا عرب تهبهبوا على بعض من فضلكم
يوما من الايم حطيت صباعي فى عين واحده فلسطينيه كانت معايا فى الكليه بتجعجع برضه وبتقول 70 مليون مصري مش عارفين يطلعوا اليهود من بلدنا
الصراحه البجاحه غاظتني وقلتلها 70 مليون مصري ربوك وآنوكى وعلموكى انتى وابوكى واخواتك وعيلتك كلها وعايزه تقعدي تبرطعي هنا انتى واهلك ونروح نحاربلك ورونا انتم الهمه الاول وبطلوا تهربوا من بلدكم .
مش باهاجم الفلسطنين يا جماعه دول مقطعين قلبي الا انى احق الحق برضه . ان كانوا هما اصحاب الارض نفسهم يدعوا انهم مكبلين الايدي ضعاف ما يقدروش يرجعوا بلدهم يحاربوا يبقى لسانهم في بؤهم بقى .
نفتح المعبر وناخد عندنا الفلسطنيين كلهم زي ما هما عايزين . ونكون نفذنا المخطط اليهودي بحاذفيره.
كل الناس كانت بتبارك للفلسطنيين على غزه
وانا كنت فى بالي باقوووووول مبروك عليكم الطحن عشان هما بيلموكم فى مكان واحد عشان يطحنوا على كيفهم يا حلوين .
عارفه ان كلامي مش هايجى على هوا ناس كتير لكن ده رايي
ولو سمحتم نعمل حاجه يمكن تكون اجابيه بدل النواح الى بتنوحوا ده
بادعوا كل مسلم او حتى اي دين انه يتضامن مع اهل غزه بالدعاء
ولانى طول عمري باتمنى من قلبي اني اشوف المصريين او العرب او المسلمين متجمعين على قلب رجل واحد
زي ما باشوفهم كده يوم كاس افريقيا ولا كاس اي حاجه تانيه من البتنجان المخلل ده .
واشوف كده اديهم مرفووووووعه لله فى وقت واحد وبيقولوا ياااااااااارب .
من فضلكم تدعوا بكل الطرق سواء هنا او على الفيس بوك للتضامن ده
ونختار وقت كلنا فى وقت واحد نرفع ادينا لله عز وجل وندعوا برفع الغمه عن اهل غزه وعن المسلمين جميعا
وليكن الوقت ده مثلا فى الثلث الاخير من ليلة الجمعه الجايه ولو حبيتوا نحدد ساعه معينه
وطبعا انا اخترت المعاد ه تحريا لاوقات الاجابه
ولو حبيتوا نوحد الدعاء كمان وانزلكم الدعاء هنا من بكررررررررررره
عايزه رايكم بسررررررررع عشان ما عادش فى وقت

السبت، 27 ديسمبر 2008

ليه نزرع فيكس لما ممكن نزرع لمون مثلا ؟؟


السلام عليكم
تكتب اليكم صبرني يارب فى نهاية ويك اند دمه تقيل والجو برد موووووووووت وانا لابسه شال سته متر فى سته متر وايشارب ملفوف كذا دور ولكلوك ومافيش فايده حاسه انى بدأت اتجمد بس بررررررضه باكتب البوست عشان تعرفوا انا باضحي فى سبيلكم اد ايه .

المهم النهارده جه على بالي يا جماعه موضوع كنت عايزه اتكلم فيه من زمان بس الاحداث متلاحقه بقالها فتره وهو اشجار الشوارع

ايوه مش اطفال الشوارع لا دول المسؤلين الله يعمر بيتهم خلاص كل واحد فيهم شايل واحد منهم على رجله وبيهشتكه . المهم انا دايما لما اسافر مع بابا طول عمري وانا صغيره بابا يفضل طول الطريق يشرحلي كل حاجه تقابلنا باله طويل اوي بابا بصراحه .

وطبعا انواع الشجر الى نقابله الى هو عارف اساميه برضه مش عارفه ليه مالهاش دعوه بتخصصه خالص . غير بقى المحاصيل الى مزروعه فى الاراضي على الجانبين حيث انى فى قلب الدلتا يعنى .

المهم بابا ربنا يديه الصحه يارب . من فتره كده اثار نقطه مهمه جدااااا .
قال باب: ليه بقوا يزرعوا شجر الفيكس ده اساسا ؟؟ طبعا انا ولا عارفه فيكس ولا بتاع
لمن لا يعرف ما هو شجر الفيكس هو الشجر المنتشر فى الشوارع
الى هو ده





المهم قلتله اشمعن يعنى يا بابا هو مزعلك ليه ؟

قالي لانه شجر عقيم . أينعم هو خضره دايمه بس يعنى ماهو فى شجر كتير خضره دايمه برضه

وخد عندك بقى اداني درس فى الشجر الى خضرته دايمه مثل ما يلي :


شجر الكافور : شجر خضره دايمه ونضيف وخشبه بيستعمل وجزوره وتديه يعنى لما تمد فى الارض تمد لتحت بشكل عمودي ما تتشعبش فى الارض وتبوظها وجامده جداااااا بيعملوها اسوار ومصدات للرياح والشجره نفسها بتستخدم فى العلاج وصناعة الادويه وزيت الكافور والكلام ده .






قالي كانوا بيزرعوها زمان على الطرق بين البلاد وجنب الترع الكبيره .بدأت تختفي للاسف


شجرة ام الشعور : او اسمها العلمي تقريبا التين البنغالي برضه دي صورتها





الشجره دي انا باحبها اوي مش عارفه ليه جماعه .


المهم هى شجره وارفة الظلال وخضرة دايمه ومش محتاجه رعايه فائقه بتعيش مع نفسها يعنى وكانوا بيزرعوها برضه على شط النيل وفروعه عشان تضلل وتمنع البخر وحاجات كده .



واسطرد بابا العزيز قائلا : ولا شجرة الجميز ياااااااااه الواحد ياما لعب تحت شجرة الجميز الى كانت جنب بيتنا واكل من عليها ووقع من عليها وقعد فى ضلها


وشجرة التووووووت الى كانت قدام بيتنا القديم ياما ماما صرخت من هدومنا المليانه بقع من التوت عشان كنا بنطلع الشجره ونحط التوت فى جيوبنا .


كل ده شجر دايم الخضره ومعمر ومثمر ومضلل ومفيد رااااااااح فين


انا بقى اضفت الى ذلك


شجرة الليمون لانى شوفتها فى ابو ظبي اي والله كده فى ابو ظبي الى كانت صحراء جرداء فى مطعم كده على شط البحر او قولوا جوه البحر وقدام المطعم كان فى حديقه مزروع فيها شجر لمون مش عايزه اقولكم على ريحة الحديقه دي جميله ازاي بسبب كام شجرة لمون وبرضه شجره دائمة الخضره ومثمره ومزهره كماااااان وزهرها ريحته تحففففه



كمان شجرة البرتقال نفففففففس الموقف تقريبا وبرضه كانوا مزروعين فى ابو ظبي فى اماكن كتير زي الشغل عند رضا مثلا وشجر فل كمان

والى طبعا منتشر فى ابو ظبي جداااااا النخل اها فين النخل عندنا ؟؟؟


فى ابو ظبي الزرع الى المفروض موجود عندنا ده فى وسط الطرق الى فى الغالب بيشلوه بعد كام شهر من زراعته عشان يوسعوا الطرق


اه هما بقى لااااااازم فيه فى النص كده نخيل ووورد وشجر حلو وهما يا عينى مستوردين التربه من باكستان وناقلينها من العين على قلبهم عشان يزرعوها يمينا ويسارا


طبعا كل ده كان ايام الشيخ زايد الله يرحمه احترم حاكم عربي شوفته لحد دلوقتي


وكان هناك القانون واضح وصريح ومنفذ بخصوص الشجر الى فى الشوارع وبأمر من الشيخ زايد ان الشجر فى الشوارع اي كانت ثمرته متاح للجميع استعمال ثماره لكن بدون الاضرار او اتلاف الشجر نفسه

احلى بلح كلته البلح الى بيستوى على نخلته والناس تطلع تاخده بايدها لانه اغلبه نخل صغير يعنى واحده زيي كده تطوله عادي ههههههههههه

اه والله بجد مش هزار


احنا بقى ولله الحمد شعبنا جعااااااان وقاعدين نصرف ملايين على شجر على راي بابا عقيم
طب ليه ما نزرعش شجر دائم الخضره وقابل للتقليم


وفى نفس ذات الوقت يكون مثمر ومفيد ؟؟؟


هااااااااااه حد يقولي انا لا بتاعة زراعه ولا ليا فيها

انا اخر عهدي بالزراعه كانت شوالي الزرع بتاعتي الى كنت مربياهم فى بلكونتنا فى بيتنا القديم على مر السنين والاخر لما جينا البيت هنا الله يسامحهم الى كانوا السبب جابو جدي اهبل كده وحطوه فوق السطح التهم مجهود السنون بتاعي كله حتى الصبار ابو شوك كله بشكوه المتوحش



المهم بلاش لك فاضي حد بقى يفتينا هل انا صح فى الكلام ده


ولا شجر الفيكس وامثاله من الاشجار العقيمه بريء ومفيد وحلو ومالوش زيي وانا الى جاهله ؟؟؟



الأربعاء، 24 ديسمبر 2008

التدوينه البيضاء

تضامنا مع مدوني تونس المعترضين سلميا على حجب او حظر بعض المدونات دون سبب معلن
ActionBlankPost

لمزيد من التفاصيل شوف البوست ده عند

الثلاثاء، 23 ديسمبر 2008

الطلاق ... على الرؤيه الاسلاميه

موضوع جديد على
ياريت تتفضلوا تقروه وجزاكم الله واياكم خير الجزاء

الخميس، 18 ديسمبر 2008

beans seed........بذرة فول


رغي رغي رغي مش معقول كده يا جماعه صدعتوني



ازيكم يا جماعة الخير منورين القاعده



هاحكيلكم النهارده مشهد من حياتي حصل امبارح بس اولا مشهد مأثر فيا اوي ولعب فى نغاشيش افكاري جامد وكمان ضحكت لما فككت من بعضي وقعدوا يربطوا فيا لتاني يوم .



امبارح وانا قاعده انا ورضا بنشرب الشاي بعد الغدا وهربنا كده بعيد عشان الشاي ما يدلقش علينا المهم . بعد حديث ممتع على الاخر عن الشغل ومشاكله الرخمه . دار الحديث الآتي :



رضا : ما تيجى يا بت نفض الليله ونروح ناخد ارض ونزرعها ونعيش فى الشمس والهوا ولا تجاره ولا سوق ولا وجع قلب البنى ادمين



انا :اووووك ما انت عارف ده اقتراحي من زمان . ناخد فدانين كده ونبني بيت حلو ونزرع وناكل مما صنعت ايدينا .

بس ياريت ينفع . ومدارس العيال والتزامات الحياه يعنى احنا هناكل بس مافيش مصاريف تانيه محتاجه فلوس.



رضا : وليه اثنين بقى ما احنا نخليهم خمسه ويبقى هو ده الشغل والبيت والاكل وكله على كله .ومدارس العيال يا ستى انا اجيبهم المنصوره كل يوم وارجعهم .ما انا هابقى فاضي شويه بقى



أنا :فااااااااالح هاتصحى الفجر كل يوم ؟؟؟ وبعدين لا انا ولا انت عمرنا كنا فلاحين ولا نعرف نزرع ولا نربي مواشي ولا الكلام ده .

ماهو لو كان فى كده اثنين شباب صغنن واحد ومراته مثلا نبنيلهم اوضتين فى الارض ويعيشوا هو يزرع وهى تربي الحيوانات كلها عشان انا ماليش فى الليله دي



(ملحوظه هامه انا مش بامسك اي حاجه صاحيه بايدى اطلااااااقا ولا فرخه ولا حمامه ولا حمار ولا اي حااااااجه جسمي بيقشعر وباصوت واطلع اجري . ورضا كان واحنا مخطوبين يقولي مش هاتجوزك الا لما تجيبى فرخه قدامي وتمسكيها وتدبحيها لكن هيهاااااااات . نزللللللللللت المره دي عشان احنا اتجوزنا فى الامارات مافيش هنا ك فراخ )



رضا: يا سلام يا اختي ما تتعلمي الله ده يبقى شكلك حلو وانتى بتحلبي الجموسه هههههههههههههههههههه



أنا : يا سلام يا اخويا لا طبعا كلا البت هههههههههههههههه انا احلب جموسه انا ناقصه وجع قلب مش لما اربي العيال ابقى اربي مواشي ودواجن .



رضا : امال هاتحلمي ببلاش انتى ولا ايه . ده بافكر اوديكى مكان مافيش فيه كهربا ومايه بقى عشان نعيش على الطبيعه القديمه .



أنا : نعم يا ضنايااااا . لا كهربا ومايه وتليفون ونت يا معلمي يا مش لاعبه ههههههههههههههههههه



رضا : نت كمان قشطه ماااااااااشي نتصرف فيها دي عادي



مريم دخلت علينا بقى



رضا : تعالي ناخد راي مريم ايه رايك يا مريم ؟؟



مريم : فى ايه يا بابا ؟



رضا : ايه رايك اننا نسيب هنا ونروح ناخد ارض مزرعه يعنى ونبنى فيها بيت ونعيش فيها ونربي حاجات بقى هاتي كل الحيوانات الى انتى عايزاها .



مريم : يا سلام طب والمدرسه وتيته وجدو هانسيبهم ؟؟؟



رضا : يا ستى المدرسه هاجيبك انا كل يوم وتيته وجدو لو شافوا هناك هايجوا يقعدوا معانا وبعدين احنا هانيجى نزورهم بقى عادي .



مريم : مش عارفه بقى يا بابا. بس كده هايقولوا علينا فلاحين بقى ونبقى فلاحين ؟؟؟



أنا : ايه يا مريم مالهم الفلاحين وبعدين احنا نعمل الصح من غير ما نفكر الناس هاتقول ايه المهم ا حنا عايزين ايه والى احنا عايزينه ده حرام ولا حلال صح ولا غلط .



رضا : وبعدين هايبقى فى جنب الارض ترعه كده زي الى كنا بنصطاد فيها تقعدي فى اي وقت تصطادي .



مريم : بابا بقى ايه انت كده هاتخلينى اوافق . بس هانبقى نشتري منين الحاجات



رضا : ماهو فى هناك محلات يا بنتى امال الناس الى هناك عايشين ازاي ؟؟



أنا : ايه ده بجد فى محلات ؟؟



رضا: اه الحته الى انا باحكيلك عليها فى زيان فيها محلات وجمبها قرية شباب الخريجين وهى اساسا بلد ارياف يعنى فيها محلات على اد حالها كده .



أنا باهزر بقى : طب فى هنا مول حلو كده يعنى ولا ايه ؟؟؟ هههههههههههههههههههههههههه



مريم : طب فى هناك مطاعم يا بابا ؟؟؟



رضا : يا خراااااااااااابي مطاعم ايه يا بنتى ابقى تعالى المنصوره فيها مطاعم ماهو البلد دي نص ساعه من المنصوره يعنى مش مشكله .



أنا : اه يا مريم وتبقي تزرعي هناك بقى فى الارض على طول مش فى علبة حلاوه هههههههههههههههههههههه



(التجربه بتاعة القطن بقى عاملاها الايام دي واخدتها فى المدرسه الى صورتها فوق دي )



مريم وهى مندمجه: اه والله يا ماما احنا نجيب beans seed ونحطها فى الارض .



رضا : نعمممممممممم بين ايه يا اختي ؟؟؟؟ بين سيد ده ايه يا حلاوه . بنقولك جموسه ونحلبها تقوليلى بين سيد ؟؟؟؟؟!!!!



انا طبعا هاموت من الضحك خلاص باطالع فى الروح: ههههههههههههههههههههههههههه



مريم باستغراب : ايه فى ايه يا بابا ؟؟!! مش هى اسمها كده يا ماما ؟؟؟



انا وانا فطسانه : اه يا حبيبتى هى كده فعلا احنا بس بنهزر ههههههههههههههههه بس بالعربي اسمها بذرة فول



مريم : خلاص يا بابا مزرعه ماشي بس حيوانات لا انا باخاف منهم .



رضا : ما ينفعش يا مريم الحيوانات بيشتغلوا فى الغيط كمان .



مريم : هو يعنى ايه غيط يا بابا ؟؟؟!!!!



رضا : يا خراااااااااااابي اقولها ايه دي هههههههههههههههههههههههههه



***************************************************



ايه رايكم فى الحلم ؟؟ على فكره نفسي فيه هاموت عليه بس عشان نعمل كده لازم نصفي الشغل هنا بتاع رضا خاااااالص ونروح هناك ومش عارفه هايعجبنا ولا لا وهانقدر نعيش هناك ولا لا مش عارفه محتاره على فكره بجد



ولو ان انا عارفه ان رضا لما بيتخنق من الشغل بس بيقول كده وبعد كده بيرجع فى كلامه هيييييييييييييه اهي احلام يلا بقى لو ما حققتهاش فى الدنيا ابقى احققها فىالاخره



او نبقى نروح الويك اند عند عمرو بقى وخلاص فى وادي الملوك


الاثنين، 15 ديسمبر 2008

جزمه ....لكن اجدع من رصاصه !!!!

يعنى ما شوفتش قبل كده فى الاخبار ولا فى التلفزيون حاجه فرحتني ولا بردت قلبي زي جزمة منتظر بصراحه
يمكن لو كان ضربه رصاصه كانت تبقى نهايه خساره في البنى ادم ده
ومش بعيد كان يبقى شهيد الارهباب والحركات دي
هى كده حلوه اوي
جزمه فى خلقته بعد الى عمله فى العالم كله مش فى العراق بس ولا المسلمين بس
ولو حد خد باله هو ازاي اتغااااظ وجز على سنانه بعد اول جزمه
اد ايه كنت فرحانه بالمشهد ده يا جماعه
هايعيش بعاره طووووول عمره
وده راينا بقى
تقول ايه بقى بنعبر عن راينا بالجزم هممممممممممج
مش الى رمى الجزمه
لا الى اترمى فى وشه الجزمه والله هو الى همجي
ويستاهل شادر جزم قديمه بحالها فى دماغه
منتظر ربنا معاك ونشوفك منتصر ان شاء الله
ويردك لاهلك على خير
ملحووظه:
قلبي حاسس انهم عندنا بعد كده لو عملوا مؤتمرات صحفيه عندنا هايقلعوا الناس الجزم على الباب مافيش غير جزمه واحده الى هاتخدل هههههههههههههههههههه
ومش بعيد يحظروا التعامل فى الجزم فى السوق
ويمشوا الشعب حاااااااافي
اها ما هو احنا لو عملنا زي منتظر يبقى هانعمل خلل فى السوق
الجزم هاتخلص ومش هاتكفي الى عايزين يتضربوا بالجزم عندنا

الأحد، 14 ديسمبر 2008

زينب بنت جحش (على الرؤيه الاسلاميه)

فضوا نفسكم قيمة نص ساعه
وروقوا دماغكم اوي عشان محتاجين تركيز
وتعالوا نقرا موضوع
ام المؤمنين
زوجة رسول الله صلى الله عليه وسلم
على

الأربعاء، 10 ديسمبر 2008

تاج العيد

جالي تاج يا جماعه من الجميله اوي سالي حاجات جوايا
وكمان جالي من خالد همس الاحباب

وهو تاج جميل ومناسب للعيد وجو العيد

واليكم التاج


ماذا يمثل لك العيد ؟


يمثل عيد يعنى
مش عارفه يعنى ايه يمثل ليا العيد هههههههههههه


وما أكثر شئ يبهجك في مظاهر العيد ؟


تكبيرات العيد


اوصف لنا طقوسك في العيد .. من ليلة العيد لآخر يوم ؟


طب ده هاقوله فى الوقت الحاضر

طبعا فى ليلة العيد زيها زي الكام يوم الى قبل العيد بانضف فى الشقه واجهز فى هدوم العيال الجديده والى ناقصه بنطلون والى ناقصه شوز والى ناقصها توكه والافلام دي

ومهما بدأت بدري لازم تفضل التجهيزات لاخر لحظه

وفي السهره بقى بابدأ طبيخ عشان العيد


اول يوم العيد : باصحى اصلي الفجر واكمل الطبيخ ورضا بينزل يصلي العيد على مايرجع اكون جهزت الفطار

وعندنا بنفطر فطار متين اول يوم العيد ده فى العيدين


وبعدين باحاول جاهده اخطف نوم ساعه ان امكن

وفى العيد الكبير في الغالب بندبح اول يوم ورضا بينزل بقى بعد الصلاه على طول

ولما بيرجع انا باحتاس حوسه عجب باقي اليوم فى اللحمه وما الى ذلك

في العيد الصغير بننزل نعيد على الناس على الظهر كده
وباقي العيد بقى فى تبادل زيارات غالبا


احكي لنا أطرف موقف حصلك في العيد ؟

تصوروا مش  لاقيه حاجه تعد طريفه فعلا ؟؟؟
بس من حيث المفارقات العجيبه انى كنت وانا فى ابو ظبي باشتكى من الملل والعيد الهادي وانى مش لاقيه حد اعيد عليه ولا يعيد عليا

اما لما رجعت مصر وانا باقول يا عااااااالم يا هوووووووو شوية هدوء
يا جدعان شوفوا مكان نتقابل فيه كلنا بدل دوخينى يا لمونه ولفنا حوالين بعض طول العيد خلينا نعرف نخرج ولا نسافر ولا اي حاجه

مفاااااارقات الحياه


بتحرص على تهنئة الأهل والأقارب والأصدقاء بالعيد .. ولا مش بتهتم ؟؟
ايوه طبعا فردا فردا وبيت بيت حتى لو ما كنتش بالعهام يعنى


مين أول حد تزوره أو تكلمه في التليفون /الموبايل عشان تهنيه بالعيد ؟
اول واحد بازوره  بخلاف ماما وبابا الى معايا فى نفس البيت
بازور عمي الكبير

والرسايل باجيب اللسته بتاعة التليفون من اولها لاخرها وابعد لكل حد اعرفه


إيه الفرق بين العيد الحالي .. وعيد (أيام الطفولة )؟
يااااااااااااااااه الفرق شاااااااااااسع

العيد ده اصله بتاع العيال يا ناس
بس هو ما بيختلفش كتير من حيث البرنامج لاننا برضه فى العيد عند بابا فى البيت بيقتصر على تبادل الزيارات العائليه


كلمنا عن ذكرياتك في العيد تفتكر الحياة من غير عيد .. هتفرق كتير ؟؟؟

ما بلاااااااااااش

يعنى ما بين الحلو والوحش  فى العيد بتمشي هى كان بيبقى عيد وبتعدي وخلاص
وطبعا تفرق كتير


إيه أجمل رسالة تهنئة بالعيد وصلتك .. قلنا طبعااا بتقول إيه ؟؟ ومن مين ؟؟

تهنئة حاره مولعه بأعياد جميله مشخلعه وبمب وفرقعه لناس حلوه مطرقعه

من هبه صحبتي



احم احم .. لسه بتاخد عيدية ؟؟ من مين ؟؟ وبتديها لمين ؟
اه طبعاااااااا لسه باخد عديه
من جوزي
ومن بابا
وباديها لمين ايه ؟؟؟ وادي ليه انا باخدها ليا طبعا
هههههههههههههههههههههه


إيه رأيك في التاج ؟

جميل اوي ومن ناس  جميله اوي اوي وفى مناسبته ومكانه بالظبط


تحب تمرره لمين من المدونين ؟ اذكر على الأقل 10
يا لهوي عشره ؟؟؟

طيب جزاءا لكى يا سالي
انتى اول واحده اهااااااااا امال يعنى  احنا بس الى نقع فيها

حاجات جوايا

واحده مفروسه

داليا قوس قزح

حنين القلب

احمد k

احمد سكر

عمر حبشتكنات فلسفيه

اليس  اه منك يا دنيا

مولان

شوية كلام

موني زوجه شابه

زوجه مخنوقه

وبالشفا للجميع 

وطبعااااااا اي حد عايز التاج يتفضله

وكل سنه وانتم طيبين

الأحد، 7 ديسمبر 2008

بيتى فور ورقاق العيد ......فى المطبخ

تحديييييييييييث
نزل يا جماعه يلا بقى عشان تلحقوا تعملوه فى العيد




كل سنه وانتم طيبين يا جماعه والف خير وسلام


النهارده واخيرا وبعد ما طلع عينى نزلت البوست الجديد فى




وهو




معلش يابنات اتأخرت عليكم بس هو سهل ممكن تعملوه بكره ان شاء الله


واخيرا لقيت حل لموضوع الكاميرا ونزلت الموضوع بالصور


وكل سنه وانتم طيبين كمان مره


ومن فضلكم الى تعمل بيتي فور تقولي


وزي العيد الى فات هاقولكم من فضلكم دعوا المشاكل والخناقات والنكد جانبا وعيدوا وافرحوا وفرحوا الى حواليكم وربنا يفرح قلبكم دايما


وكل سنه وانتم طيبين والى هايدبح يجيبلي ريش ضاني عشان احنا مش دابحين ضاني وانا عايزه اشوي ريش ضاني وكبرت فى جماغي بقى


اه وعلى فكره يا جماعه بكره الصبح ان شاء الله هاينزل بوست الرقاق باللحمه المفرومه على طابخين ايه النهارده بس خلاص النهارده هنجت خالص


تصبحوا على خير

الاثنين، 1 ديسمبر 2008

قتييييييلة فى شارعنا ...... وانه حقا يوم عظيم شأنه

تحديث :::
ولله الحمد احب ابلغكم انهم مسكوا المجرم فى هذه القضيه وكانت واحده ست محترفه القصه دي ومسكوها وهى واخده بنت تااااانيه بس لحقوها ما ماتتش الحمد لله
وجابوها هنا الست الشارع ومثلوا الجريمه اه والله قدام بيتنا
وانا شوفتهم الصبح وانا بانشر وقعدت اقول مين الناس الى قاعدين قدام بيتنا دول على الصبح كده الساعه 7 صباحا اتاري كانوا مستنيين بقى الظباط عشان تمثيل الجريمه
طبعا الملخص الى فوق ده اورده لنا الفكاهاني الى كان اخر واحد شاف البنت وعم ابو بانوب الى قاعد بعربية كلينكس وما الى ذلك قدام بيتنا .
أي خدمه وقبل ما تيجى فى الجرايد يا جودعان
*************************************************************************************
ايوووه والله قتيله فى شارعنا

موضوع محزن جدا

اه قصدكم امال ايه هو الى يوم عظيم شأنه ؟؟؟

لا هاقولكم بعدين بقى فى الاخر لما نخلص موضوع القتيله

المهم فى بنت صغيره فى المنطقه عندنا تم العثور على جثتها مخنوقه فى مكان كده مقطوع قريب مننا

طبعا الدنيا اتقلبت هنا وخصوصا مخصاصا قدام بيتنا لان اخر مره شوهدت الضحيه كانت قدام بيتنا

طبعا البنت المسكينه الى امها يا عينى بتشوي سمك وابوها مبلط غلبان على اد حاله كانت لابسه حلق فى ودنها يجيله يجي ب 150 جنيه
وعشان المبلغ الطائل ده فقدت حياتها تمن لانها تلبس حلق من نفسها

طبعا دي قصه بتحصل كل يوم للاسف الشديد

لكن من يوم ما حصل كده والمباحث والامن ماليين الشارع عندنا وتمركزوا على رصيف بتنا تحديدا

وايه يا جودعان الشارع ماشي زي السااااااعه

لا في سواقين بيتخانقوا ولا بلطجيه عاملين فرده ولا ناس ملطعين على الارصفه

الشارع ماشي زي الفل

احنا الشارع بتاعنا موقف كبير للارياف يعنى على كل لون يا اورجانزا عشان البطسطه اتلغت خلاص

والسواقين مش عايزه اقولكم على ادبهم واخلاقهم العاليه والفاظهم الجميله واصواتهم الحلوه

والاخ مراقب الموقف هو واخواته الى عاملين بلطيه وفرده على الشارع كله

وانا طالعه فى مره انا ورضا لقيته بيركن العربيه فى الشارع من بره ومن غير غطا وكده

قلتله ايه ده مش هاتبيتها جوه وكده قالي لا ما احنا ساعتين ثلاثه ونازلين تاني (كنا رايحين نصطاد تاني ... أه اه بس ما لقيناش سمك غير فى كي جي وان )

المهم انا بصيت كده لقيت بتوع المباحث قاعدين على رصيف بيتنا ومستقرين يعنى وبيشربوا شاي ويأزأزوا لب
قلتله اه يلا اهو عمو بتاع المباحث واخد بحسنا.

ساعتها قلت يا حلاوه يا ولاد طيب ماهو ممكن اهو ؟؟؟

الامن والاحساس بان فى عيون ساهره على الامان ممكن اهو ؟؟

فيها ايه يعنى لما شله من المقاطيع دول يترزعوا هنا فى الشارع وفى كل شارع اصلا خصوصا لو زي شارعنا مليان قلق على طول زي شارعنا المبجل ؟؟!!

هو لازم تقع مصيبه وبلوى عشان تيجوا

طب ما تتهببوا تعملوا كده من الاول هو يعنى من قلتكم ؟؟؟

ده نص الشعب بقى امن دوله ومباحث وبيراقب النص التاني من الشعب ؟؟؟

طبعا احنا لو سبنا العربيه كده كل يوم هانصحى نلاقيها متأزأزه وواخدالها كام خبطه شمال ويمين (متأزأزه دي يعنى مسروق منها كل حاجه ينفع تتسرق )

وحصلت قبل كده مع ان فيها انذار ..........عااااااااااادي

وبابا اتقلب قبل كده فى الكاوتش الاستبن......... عااااااااااادي

وفى حرامي وربنا قعد اسبوعين كل يوم بالليل يلف على البيوت الى في الشارع يقلبها من على السلالم والاسطح ويسرق اي حاجه يلاقيها

انابيب بوتجاز او اي حاجه يلاقيها قدامه على السلالم

والناس كانوا بيشفوه ويجروا وراه وهو بيهرب من على الاسطح بتاعة البيوت

قلت مره لرضا طيب نكلم البوليس

قالي هايقولك امسكوه واحنا نيجى ههههههههههههههههههههههههه

قلتله طب ما الواحد يجيبله كلبشين ونأجر اوضه نعملها زنزانه بقى ونستقل وخلاص
ههههههههههههههههههههههه

تمام يا فندم الامن مستتب

مستتب خالص اوي جدا

بس خلاص خلص موضوع القتيله


اه صحيح يوم عظيم ليه بقى ؟؟؟

عشان فى مثل هذا اليوم العظيم من 29 سنه يعنى سنه 69 جاء الى العالم شخصيه فاذه وعظيمه

الا وهي شخصية رضا ابو رياض جوزي المبجل

اه اه النهارده عيد ميلاده وعملنا التورته وكالناها ما تطمعوش

ومشوها بقى 29 اها اوعوا تفكروا انه 39 عشان هو رايه انه عنده 29 اه.... فاااااااااهمين

يلا بقى سلام كفايه كده عليكم

السبت، 29 نوفمبر 2008

العلاقه بين الرجل والمرأه الاجنبيين... على الرؤيه الاسلاميه

يا ترى هل ممكن وجود نوع من
وهل العلاقه دي تكون حلال ولا حرام ؟؟
وتكون ازاي وشكلها ايه لو كانت حلال ؟؟
ياريت تيجوا تسمعوا وجهة نظري ورايي المتواضعين وتناقشوني فيه
على المدونه الاسلاميه
رؤية اسلاميه متواضعه

الأربعاء، 26 نوفمبر 2008

حكم ....بس الى يفهم وينفذ

هاقولكم شوية حكم يا جماعه تحطوها حلقه فى ودنكم
وعقبالي احطهم برضه بس تقريبا كده خلاص هاحطهم عشان انا خلاص وداني اتخرمت من كتر ما سمعت
اليكم خلاصة الحكم بقى عشان تعيشوا فى هدوء
ما ينوب المخلص الا تقطيع هدومه
اخرة خدمة الغز علقه
يا داخل بين البصله وقشرتها ما ينوبك الا تشم ريحتها
ما دام انت عارف الى فيها ليه تحط ايدك فيهاااااااااااا ليييييييييييييييييه؟؟؟؟؟؟؟!!
من تعبه عقله تعبته رجليه
اصحاب العقول في راااااااااحه ..أه بس المجانين فى نعيم.
واعمل الخير ارميه البحر
وطنش تعش
وهاكونا ما تاتاااااااا على راي تيمون وبمبه
على فكره انا كانت لازمه فى كلامي دايما اقول صبرني يارب
بقالي فتره بقى غيرت باقول اللهم افرغ علينا صبراااااااا
اي خدمه ان ما كنتش اديلكم خلاصة تجاربي ادي لمين يا ولاد

الأحد، 23 نوفمبر 2008

يعنى ايه تربيه جنسيه ؟؟

سلام عليكم

وحشتوني ووحشني اكل دماغكم رغي اوي .

النهارده ان شاء الله نرغي بخصوص موضوع مهم اوي قد يكون كل الناس تقريبا اتكلموا فيه ولكن من وجهة نظري اتكلموا فيه من ناحية واحده بس وهي التأييد والمعارضه لوجود التربيه الجنسيه فى المدارس .

وطبعا ياما اصوات علت فى الاتجاهين وبعصبيه اكتر من كونها بعقلانيه .

وخصوصا اننا فى مجتمع شرقى له طابع خاص بمجرد ذكر كلمة جنس فى اي موضوع يبقى قلة ادب وما يصحش وعيب وما الى ذلك كله.
حتى انه فى بعض المشاكل المتعلقه بالجانب ده من حياة البنى ادمين فاحنا بنفضل نترجها جانبا معلقه بلا حل بل ونتركها تتفاقم عشان عيب نتكلم فيها .

عموما وبصرف النظر عن حكاية عيب دي . فاحنا حاليا بصدد الكلام عن معنى التربيه الجنسيه اساسا.

التربيه الجنسيه هى امداد الشخص منذ طفولته بالمعلومات اللازمه حول جنسه اي نوعه وما يستدعيه ذلك من عادات سليمه يجب سلوكها واجراءات وقائيه لحماية الطفل والشخص حين يكبر ايضا.

على فكره ده انا الى مخترعه التعريف ده من خلال فهمي للموضوع .

المهم يعنى ايه الكلام ده

أنا هاديلكم امثله : يعنى لما الاب او الام يقول للولد وهو مثلا عمره سنتين ولا اقل حتى لا ما تلبسش توكه انت ولد التوكه بتاعة البنات . .... دي تربيه جنسيه

لما اقول للطفل عموما سواءا فى ذلك بنت وولد ما حدش يقلعك هدوم الا ماما وبابا وفلانه مثلا ولو حصل وحد عمل كده غصب عنك لازم تقول لماما .... دي تربيه جنسيه

لما اقول للطفل الى عمره 10 سنين خلي بالك من نفسك ما تروحش فى مكان مع حد انت ما تعرفوش ما تصاحبش ولاد اكبر منك كتير خلي بالك على نفسك ما تخليش حد يمد ايده عليك حتى لو كان بالهزار ..... دي تربيه جنسيه

لما اجي فى عمر 10 سنين للولد والبنت وجايز قبل كده كمان اديله التعريف التشريحى للاجهزه التناسليه للنوعين واعرفه هو جهازه بيشتغل ازاي وعلامات البلوغ وكل المعلومات المتعلقه بمرحله جديده من حياته .... دي تربيه جنسيه

لما يبقى عمره او عمرها 18 سنه وبيسمع ويشوف حواليه تعبيرات واحوال تثير فضوله واعياه الحصول على الصدق فيها حول الحياه الجنسيه للبشر من حقه ان يعرف كلام علمي يتناسب مع عمره وجسمه وظروفه كمان ...دي تربيه جنسيه

كل ده احنا لسه تقريبا ما وصلناش للعمليه الجنسيه نفسها صح ؟؟؟

والى احنا بنعتبرها عيب وما يصحش نتكلم فيها

رغم ان اساسا ده مش صح الا انه مش موضوعنا حاليا

العمليه الجنسيه فى حد ذاتها اخر فصل من فصول التربيه الجنسيه الى احنا بنتكلم عنها .

وحكاية اننا نحطها فى المدارس .
هو مافيهاش مشكله ابدا لكن بالنسبه لكونا دوله متخلفه ومجتمع معلش برضه متخلف
وعندنا نظام تعليمى فاسد ومتخلف برضه (الشله كلها تخلف يعنى ههههههههه)

يبقى لو حصل والتربيه الجنسيه نزلت فىا لمدارس هاتبقى مصيبه سوده ومهازل وبلاوي هاتحصل .

فضلا عن المناهج الغبيه الى هاتنزل والى يمكن يستوردوها عن غير فهم .

لكن من وجهة نظري ان موضوع حساس زي ده يكون الافضل فيه التعامل معاه بشكل خاص وعلى نطاق ضيق داخل الاسره بين الام واولادها والاب واولاده برضه .

لكن عارفين ايه المشكله ؟؟؟

ان الام والاب نفسسسسسسهم محتاجين يعرفوا الاول ايه هى التربيه الجنسيه وتكون ازاي . اه والله العظيم

صدقوني زمان ايام الجدود كانت التوعيات متوارثه فعلا وكانت موجوده على بساطتها وفقدانها للطابع العلمي الى انها كانت موجوده

فجأه سقطت مش عارفه ليه .وبقوا الام والاب يستحوا يتكلموا اولادهم .

صدقوني دى مشكله كبيره لان غياب التربيه الجنسيه دي مسببه مشاكل كبيره اوي:

اولها واخطرها التحرشات بالاطفال لو كان عنده وعي ما كانتش على الاقل ممكن تتكرر

المشاكل النفسيه والصدمات الى بياخدها المراهقين بمجرد البلوغ وعدم قدرة الاهل على احتواء المشاكل دي .

شوفت الام الى بتستنى لما البنت تبدأ حيض اصلااااا ويمكن تتصدم وتفكر نفسها هاتموت وبعدين يقتصر الكلام عن كيفيه مواجهة دم الحيض فقططططط!!!!!!!!!!!!.

وشوفت الولد الى بلغ واحتلم وما عرفش ايه ده ولما قال لابوه رزعه قلم متين !!!!!!!!!

عشان كده باقول ان الاب والام هما الى محتاجين تربيه جنسيه الاول عشان يقدروا يدوها لاولادهم .
ياريت نبطل نهرب من مشاكلنا

الحياء شعبه من شعب الايمان

لكن الخجل المرضي قد يقضي على الشخص يوما ما

طوووووولت برضه عليكم وانا ما كنتش ناويه والله
بس يلا انتم واخدين على كده

مافيش معايا بنادول كل واحد يجيب لنفسه بقى