السبت، 31 يناير، 2009

البقاء لله يا خيخه

البقاء والدوام لله وحده
توفاه الله يا جماعه النهاره والد نوران الشاملي بت خيخه واي كلام
الله يرحمه يارب ويتغمده برحمته ويدخله جناته ان شاء الله ويصبر اهله ويبارك فيهم
خيخه انما الصبر عند الصدمة الاولى
خليكى مش خيخه يا خيخه ربنا يجعلها اخر الاحزان ان شاء الله
ويارب ما حدش يشوف حاجه وحشه فى اهله يارب
ولكنه الحق كتب علينا

الأربعاء، 28 يناير، 2009

قلب ايمان.....الثامن


يا بتاع النعناع يا منعنع يا بتاع النعناع يا واد انت
دي كانت رساله داليا  لايمان
والى قريتها وقلبها بيدق وبعدها خدت نفس وضحكت ودخل عليها اشرف
اشرف : بتضحكي على ايه يا ايمى ؟
ايمان : مافيش داليا باعتالي رساله
بتقولي يا بتاع النعناع يا منعع يا بتاع النعناع يا واد انت 
اشرف : اهاااا استر يارب من النق والنقاقين . اظن ما هي عارفه المناسبه قبلي كالعاده .
ايمان : اها مش هى نزلت معايا اشترينا الحاجه وبعدين عااااااادي احنا ستات بنرغي فى كل حاجه يا روحي ما تبقاش كده .
اشرف : طيب يا اختي .
ايمان: باقولك ايه يا اوشي  انا عايزه اجيب خط جديد .
اشرف ضاحكا  : مش عارف اول ما باسمع اوشي دي بامسك قلبي ليه وانتى مكتره منها من امبارح.
ليه يا ستى ماله خطك عيط ؟
ايمان: لا بس نازل خط عليه دقايق مجانيه كتير وارقامه حلوه قلت اغير بقى 
اشرف : ماشي مادام دقايق مجانيه . بس تكلمينى بيهم .
ايمان : اكلمك يا روحي . امال اكلم مين .
استاذ محمود ماعادش بيبعت رسايل واصلا هو عمره ما تجرا يبعتلها وهى مش فى الشغل لكن لما ايمان ما تعرفش ليه خافت لما جت رساله داليا قالت اغير الرقم القديم الى كان محمود لما طلب منها مره انها ترن عليه عشان مش لاقي موبايله وطلع كان سايبه على مكتب واحد من الزملاء والله اعلم دي كانت حجه ولا ايه .
المهم ان ايمان فعلا تاني يوم وهى راجعه من الشغل جابت رقم جديد وفضلت  على نفس النهج مع محمود نهج التنفيض العالي جدا
وعلى نفس النهج مع اشرف نهج التعطيف العالي جدا برضه
حاولت فعلا بكل جهدها انها تقرب من اشرف تبقى صاحبته اكتر من كونها مراته
اشرف احيانا كان بيتجاوب واحيانا لا
ساعات ده كان بيزعلها ويحبطها  لكن كانت بتحاول تتخطى الحكايه دي
حاجات كتير ا وي اتفقوا عليها خلال الشهر ده زي مثلا :

ممنوع منعا بااااتا الخصام اكتر من يوم يعنى ما يباتوش متخاصمين ابدااااا
ممنوع منعا باااااااتا دخول حد بينهم فى اي مشاكل ولا اهله ولا اهلها ولا صحابهم
يحاولوا قدر الامكان يناموا فى وقت واحد ويصحوا فى وقت واحد
اديهم على ادين بعض عشان بدل ما ايمان تعمل كل حاجه فى البيت والعيال وفى النهايه بيكون مافيش وقت يقعدوا مع بعض
اصحابه مره واحده فى الاسبوع عشان يبقى فى مجال يخرجوا هما مع بعض برضه
ممنوع مغادرة الطرفين او احدهما لفراش الزوجيه والنوم فى اوضة العيال
وبقى يدور الحوار ده احيانا
ايمان : اشررررررررف ممكن تعمل السلطه
اشرف : ايماااااان حرام عليكى والنبى سبينى اشتح  شويه
ايمان : هاااااااا وبعدييين ما انا كمان نفسي اشتح يا اوشي هو انا يعنى
خشب
اهو مره كان بيعمل ومرتين لا بس مش مشكله اهو حلو برضه
ونشوف كمان المشهد ده:
اشرف بيتفرج على الماتش 
وايمان قاعده جنبه بتقطع كوسه
  
ايمان : اشرف يعنى ايه فاول
 .
اشرف : ايمان هارتينى اسأله مش عاااااارف اركز
ايمان بزعل مدلع : كده طب والله ما عدت متفرجه معاك تاني هيه بقى
اشرف وهو بيضحك ويبوس ايدها بالكوسه : لا يا قطه ما تزعليش. بس والنبى حوشي الاسأله لما يكون اللعب واقف
 .
وكمان بقوا يعدوا قدام الكمبويتر نص ساعه بس او ساعه بالليل ساعات مع بعض 
ايمان كانت بدأت فعلا تحس بتطعم التغيير وسعيده به
لكن برضه الدنيا ما تخلاش من القلق
زي النهارده كده
ايمان على باب الشغل : صباح الخير يا داليا .
داليا وهى بتقلد ايمان المبوزه : صباح النور يا اختي . ايه الشراب المقلوب ده ما شوفنهاش من زمان مالك .
ايمان : مافيش  يا داليا .
داليا : ايه الحكايه بجد ولا ايه ؟  فى ايه يا بنتى ؟
ايمان : والله ما انا عارفه يا داليا كل ما اقول قربت خطوه احس انى بارجع عشر خطوات
.داليا : ليه بس ايه الى حصل تعالى نقعد عندي شويه وقوليلى حصل ايه
ايمان عدت على مكتبها الاول وبعدين راحت لداليا وهى بنفس البوووووز 
ايمان : الصبح يا ستى باقوله يا اشرف ودي انت العيال اصل انا كنت باطبخ واتاخرت طلع فيا وقعد يزعق ويقولي انا كمان متأخر و و و ......
داليا: طب ليه مش انتى كنتى بتقولي انه حتى كتير الايام الى فاتت بينزل معاكم بدري نص ساعه عشان يودي العيال ويوديكى لاقرب مواصله ؟
ايمان : اه والله كان بيعمل كده .
داليا : لازم بقى فى حاجه ما يمكن زعلان منك فى حاجه تانيه ؟؟
قولي واعترفي عملتى فيه ايه ما انا عارفاكي ما بتستريش حيك .
ايمان : يووووه بقى ما عملتلوش حاجه يا ستى والله .
داليا : بذممممتك .
ايمان وهى بتبتسم وهى زعلانه برضه : يخرب عقلك اقولها ايه دي ؟
داليا : تقري وتعترفي . حتى لنفسك انك اكيد عملتى بلوى مسيحه .
ايمان : ماهو اعمل ايه بس يا داليا ما انتي عارفه ان الموضوع ده بيتعبنى لما تقرب البريود وبابقى اصلا متعصبه وروحي فى مناخيرى .
داليا : تاااااااااني اعمل فيها ايه البت دي ما بتتعلمش .
ايمان : الللللله باقولك بابقى تعبانه .
داليا : هو انا قلتلك حاجه . بس يعنى قولتيله انك تعبانه بهدوء وعقل كده  ولا هربتي كالعاده ولا استغبيتى برضه كالعاده
ايمان وهى بتبتبسم بكسوف: لا استغبيت كالعاده.
وتعقب بعصبيه مفجأه : بس  ما هو المفروض عارف يعنى
داليا :  يعنى ما هو عارف ما يمكن ناسي معادك ما يمكن اصلا مش عارف ويمكن حبكت الله ما تبقى تنطقي وتتكلمي زي البنى ادمييييين اتفاهموا يا بشر انتم بنص لسان ؟.......طب قوووووومي يا فالحه صلحى غلطك بقى
ايمان: يعنى اعمل ايه يعنى وانا هنا .
داليا : بت انتى كان بدري عليكى الجواز مش بس الجواز ده انتى فاشله سنسنه وتعطيف كمان .
ايمان : ماشي يا فالحه اشوفك بعد كده بشراب مقلوب وشوفي هاعمل فيكى ايه .
داليا وهى بتضحك : ماشي عادي ما كلنا لها الشرابات المقلوبه .
المهم قومي يا فالحه ابعتيله رساله كده حلوه  تليق على  الموقف
ايمان : اقوله يعنى  ؟؟؟
داليا : البت دي هاتموتني خلاص . قومييييييي روحي على مكتبك هابعتلك رساله  من عندي حلوه . بس حاولي تغيري فيها كده اي حاجه عشان تبقى طالعه من قلبك .
ايمان : طيب يلا سلام يا ملكة  السنسنه والتعطيف .
وبعتت ايمان الرساله واشرف قراها وابتسم بنص بؤ

وقال فى باله : يا سلااااام . طيب ماشي لبسنا السلطانيه يا ستى
 .
ورجعت الحياه بمبى تاني والحمد لله
وبعد كام يوم  اشرف كان نزل يشتري شوية حاجات وايمان بترتب اوضتها وتشيل فى هدوم وكده لقت كارت تليفون واقع على الارض
ايمان : شوف الولاد . اكيد ده الكارت بتاعي القديم ايه الى خلاهم طلعوه من الدرج .
والله كنت عايزه من عليه رقم .
ولما خلصت ايمان شغلها راحت جابت الشريحه وحطتها فى الموبايل عشان تجيب الرقم .
ايمان بعنين بتبرق : ايه ده ؟؟؟؟
الشريحه دي مش بتاعتي ؟؟؟؟!!!!
ايه ده ايه ده ؟؟؟؟
ايه الاسامي الغريبه الى  على الكارت ده ؟؟؟
وبتاع مين الكارت ده ؟؟؟؟
يتبببببع..................

الأحد، 25 يناير، 2009

قلب ايمان .... السابع

الكليب ده لايق على البوست النهارده
ايمان واشرف حاسوا النهارده انهم بيحبوا بعض اوي وانهم ممكن يكونوا سعداء اكتر فعلا

بس ايمان قالت فى بالها : أنا يمكن مقصره شويه ؟؟؟!!!! بس يعنى هو ليه ما فكرش برضه يسعدني زي ما انا عملت ؟؟ واشمعن انا ابدأ .


وأشرف فى باله برضه : يا سلام لما بتسلكي بتبقى عال يا ايمان . فى ايه يعنى لما تروقي عليه كده كل شويه...... يارب تفضل كده على طول وتبطل نكد ونوم شويه يمكن تعقل يا عم اشرف .


ايمان وهى نايمه على كتف اشرف ومغمضه عنيها : اشرف انت نمت ؟


اشرف : ها لا لسه شويه .


ايمان وهى بتبصله بسرعه : لا اصحى وفوق عايزه اقولك على حا جه .


اشرف وهو نصف نائم : حاجة ايه دلوقتي خليها الصبح اصل انتى الكلام معاكي اخرته نكد وانا ماليش مزاج اتنكد النهارده خلينا حلوين كده .


ايمان : لا والنبى عشان خاطري مش هانكد عليك ولا حاجه .


اشرف : طب قولي يا ستى


ايمان : بص يا اشرف انا مش عاجبني حياتنا كده وحاسه اننا بنبعد عن بعض ولازم نعمل حاجه .


اشرف : طيب ماهو انا اعمل ايه يعنى ما انتى السبب .


ايمان : لا طبعا مش انا السبب لوحدي احنا الاثنين السبب ولازم نغيرها احنا الاثنين برضه .


اشرف : طيب وايه المطلوب مني يعنى .


ايمان : شوف يا سيدى انا لازم افضي نفسي شويه عشان يبقى فى وقت نقعد مع بعض ونتكلم مع بعض احنا بقينا نقابل بعض صدفه .


اشرف : لو عايزه تسيبى الشغل براحتك ما انا قايلك من زمان .


ايمان : لا مش هاسيب الشغل وانت عارف انه برضه ايد على ايد رحمه والعيال مصاريفها بتزيد ولو سبت الشغل دلوقتي يمكن ما الاقيش غيره بسهوله .


اشرف : طب امال ايه ؟


ايمان : انا طبعا مش هاقولك ساعدني انا عارفاك كويس . بس اسمحلي اجيب واحده مرتين فى الاسبوع تشتغل بس بدالي شغل الفلبنيات الى انا باعمله ده . انا الشغل كتير عليا اوي يا اوشي والله .


اشرف : مش انا قلتلك نتكلم الصبح .


ايمان بدلع وبوسه حلوه : عشان خاطري يا اوشي هاجيبها وانت مش هنا هاتصرف انا .


اشرف : مااااااااشي زي بعضه بس وانا مش هنا وما لهاش دعوه بالاكل ولا العيال .


ايمان : ماشي كلامك . وحاجه كمان .


اشرف : استر يااااااارب .


ايمان وهى بتضحك : تخلي بالك مني شويه وتساعدني انشاله بقلبك وتعذرني انا والله باتعب .


ومن هنا ورايح ايدى على ايدك ورجلي على رجلك فى كل حاجه فى البيت وبره البيت .


اشرف : لا ده كده تبقى تكتيفه ارخم من تكتيفة الديك فى الحله .


ايمان بدلع : اخس عليك يا اوشي انا تكتيفه .


اشرف : احلى تكتيفه يا قطتي .


ايمان : بس خلاص كده بس ما يمنعش ان التغيير قائم وانت لازم تساعدني .وبعدين...... اشرف اشرف انت نمت ؟؟؟


اشرف : اوخخخخخخخخخخ.


ايمان وهى بتتاوب : طيييييييب تصبح على خير .


تاني يوم كان يوم جميل اوي حاولت ايمان تطبق فيه كل حاجه فكرت فيها واتكلم فيها مع داليا ومع نفسها ومع اشرف كمان .

وحاولت تطبق دايما نظريه لازم تدي من نفس نوع الى انت عايز تاخده .

وفعلا لما كانت بتقول لاشرف: باحبك

كان بيبتسم لها ابتسامه ودوده اوي ويقولها : باموت فيكى .


وكمان اشرف اقترح يتغدوا بره . وراحوا اتغدوا واتفسحوا فسحه صغيره وبعدين راحوا زاروا مامتها وبعدها طلعوا على مامته كمان .

ورجعوا البيت هلكااااااانين بس مبسوطين وايمان كانت فرحانه اوي اوي وحاسه انها فعلا بدأت تغير حياتها للاحسن .


وبعدين جت ايمان تظبط المنبه بقى عشان النوم والشغل الصبح لقت فى رساله قلبها وقع فى رجليها وفتحت الرساله................


يتبع يا قطاقيط

صفيه بنت حيي بن الاخطب .... على الرؤيه الاسلاميه

اتفضلوا يا حلوين على
عشان نشوف
قصة
زوجة الرسول عليه الصلاة والسلام
اثابنا واياكم الله

الخميس، 22 يناير، 2009

قلب ايمان ..... السادس




النهارده بقى الخميس وايمان وراها مليوووون حاجه عايزه تعملها وتفكر فيها بالاضافه للمسؤليات اليوميه من شغل والولاد والطبيخ .



الصبح قبل ما تنزل بصت لاشرف ا لى كان قاعد بيفطر وبيتفرج على الاخبار فى نفس الوقت وفكرت تسأله هو النهارده كام فى الشهر يا اشرف ؟؟؟





بس رجعت افتكرت كلام داليا لما قالتلها اوعى تحاولي تفكريه عايزين المفجأه تبقى صاااااادمه .



فرجعت فى كلامها






وقالت فى بالها خليها صادمه بقى احسن ولو انى شبه متأكده انه مش هايفتكر حتى لو سألته على التاريخ





وايمان نزلت بدري ربع ساعه واشرف كان منهمك فى طبق الفول والاخبار ما خدش باله نزلت ايمان وعدت الولاد على الحضانه .





وجنب الحضانه فى محل ورد ووصته يجهزلها صحبة ورد احمر وهاتعدي تاخدها وهى راجعه من الشغل .





ورجعت من الشغل وخدت الورد والولاد روحت جرييييييي .







ايمان بسرعه جهزت الاكل واشرف جه واتغدوا وناموا فكرت ايمان انها ما تنامش وتقوم تخلص اي حاجه واشرف نايم بس رجعت قالت فى بالها : لا انا هنام ساعه واحده عشان اقدر اكمل اليوم .










وايمان كانت بتوضب فى البيت كله وترتبه وبعدين :




أشرف : ايمااااااان فين الشاي بقى .


ايمان وهى جايبه الشاي : جاهز اهو . ايه انت مش خارج النهارده ؟؟؟



اشرف : اشمعن ؟!!



ايمان : ابدا عادي يعنى بسأل بس . كنت هاقولك تجيب شويه حاجات من السوبر ماركت .



اشرف : ماشي بس مش واخد حد من العياااااال .




ايمان بغيظ : ماااااشي ما قلتلكش خد حد هما يعنى هاقرصوك لو خدتهم . وبعدين اصلا هما عايزين يناموا مش هاقولك خد حد . اشرب الشاي يلا وقووووووم .



اشرف : طيب لما اسامه يرن عليا .




ايمان بغيظ اكبر وهى بتجز على سنانها : يعنى انت خارج اصلا اهوووو مااااااشي اشرب الشااااي .



ويخرج اشرف وايمان تجرييييييي تخلص الى وراها كله




وهى بتشتغل التليفون رن ردت وبتقول يارب ما يكون حد يعطلني :




ايمان : الو




داليا : الو يا فالحه هااااااا اخبارك ايه




ايمان : كويسه يا اختي . طلعان عينى شغل .




داليا وهى بتضحك : احسسسسسسسسن . المهم يعنى كله تمام ؟؟




ايمان : اه . بس قوليلى بقى الحاجات دي انتى بتعمليها طيب بتجيب معاكي نتيجه ؟؟؟




داليا بضحك وتريقه : لا انا قلت اجرب فيكى اشوف الحكايه دي شغاله ولا ايه




ايمان : لا بجد الموضوع ده متجرب ولا ايه .




داليا : اه متجرب بس فى حالات متستعصيه ما بيأثرش فيها وانتى شكلك مستعصيه قومي نامي يا بت .




ايمان وهى بتضحك جامد : طيب لما اشوف اخرتها معاكي .... بس بينى وبينك انا فرحانه وحاسه انى كان نفسي اعمل كده .




داليا : طب يلا بقى هاسيبك تكملي بكره بقى نعرف النتيجه يا متسعصيه هههههههههههه.




ايمان : طيب يلا بس ادعيلنا .








وتجري ايمان على المطبخ تزوق تارت الشيكولاته الى اشرف بيحبه والى هي عملته وحوالين القالب




شويه ورق ورد احمر جميل






وبعدين راحت عشت الولاد ونيمتهم واخدت شاور وبدأت الخطه الاساسيه




اخدت الورد وفرطت منه شويه وعملت بورق الورد الاحمر قلب كبييييييييره على السرير بتاعها وجهزت الشمعدنات بالشمع المعطر




وفى الحمام جهزت حمام سخن لاشرف بمايه فيها زيت عطري بريحة الورد اديتهولها داليا الاروبه .وشوية ورق ورد على وش الميه .




وشمعتين معطرين فى الحمام كمان .






وعملت سبت حلو اوي وفيه ورق كريشه مقطع على جليتر على ورق ورد برضه وشوية برفان كل ده فوق ازازتين برفان واحده حريمى وواحده رجالي مش غاليين




اوي لكن شيك وعلى ذوقها . وحطته فى ركن فى الانتريه .






وشويه حبشتكانات تانيه بقى ورقه جوا البجامه بتاعة اشرف مكتوب عليها باحبك . كده يعنى




مش كله من داليا كان في شويه حاجات من دماغ ايمان .... لا من قلبها كمان




وبعدين لبست القميص الجديد الروز _ لون التوينز الي اشرف شافها به اول م ره _ وفيه فيونكات كتير وكرنيش من تحت وشكله طفولي والى اشترته لما خرجت امبارح مع داليا بحجة تشتري حاجات للعيال .




وحطت ميك اب روز خفيف وعملت شعرها قطتين بالتوك الى شكلها ودان قطه اصلا .




المهم يعنى ان الليله دي راح فيها نص تحويشة ايمان لكام شهر عشان كانت ناويه تجيب موبايل جديد مليان حركات بس مش مشكله بقى الموبايل يتأجل بس ايمان واشرف اهم من كل حاجه




ووقفت قدام المرايه وابتسمت وقالت : كان له حق ينسى يقولي يا قطتى .




وبعدين طفت نور الشقه وفتحت بس نور خفيف فى الشقه كلها وجهزت موسيقى هاديه عارفه ان اشرف بيحبها وشوية معطر فى الهوا واول ما سمعت صوت العربيه ولعت الشمع كله وراحت استنت اشرف فى الانتريه .




اشرف دخل لقى الدنيا ضلمه والحكايه هاديه هز راسه بامتعاض شويه على ان الكل نام .


وبعدين شاف نور الشمع فى الانتريه ايمان ساعتها بقى جريت عليه فجأته .


طبعا اشرف كان مذهوووول


وقالها : ايه ده خضتينى يخرب عقلك . بس ايه ده ايه ده انت مين يا شاطره ؟؟




ايمان بدلع : أنا القطه ....قطتك يا قلبي .




اشرف : يااااااااااه انتى كنتى فين ما بتجيش ليه يا شيخه .........




يتبع ....














الثلاثاء، 20 يناير، 2009

قلب ايمان ... الخامس


فات كم يوم وايمان داخل الدوامه وقرارها الي خدته بالتفكير لسه بيلف ويدور فى دماغها ومش عارفه لسه هاتعمل ايه لكن ده ما يمنعش انها كانت فى الدوامه نفسها
ويوم الثلاثاء وهى في الشغل :::
ايمان : الو ايوه يا داليا ازيك ؟
داليا : الحمد لله يا ايمى ازيك انتى ايه فينك ولا نزلتي الصلاه حتى ؟؟
ايمان : الحمد لله على كل شيء اه ما نزلتش كان عندي شغل ساعتها نزلت بعدها
داليا : انتى فاصله شحن ؟

ايمان : لا قافله الموبايل من الصبح .

داليا : اشمعن هو لسه اخينا بيبربش برضه .

ايمان : مش عارفه انا قلت انفض للكل . المهم باقولك ايه ما تعرفيش تاخدي مغادره ساعتين وتنزلي معايا ؟؟

داليا : اعرف بس خير راحه فين ؟؟؟


ايمان : مافيش عايزه اتكلم معاكي شويه على رواقه . يلا قدامك نص ساعه جهزي فيهم نفسك

داليا : اوووووك خير يارب .

واخدوا بعضهم ونزلوا قاعدو فى نادي قريب من الشغل .

داليا : ايه يا بنتى خير فى ايه قلقتينى .

ايمان : خير ان شاء الله . انا فكرت كتير فىكلامك يا داليا وانا فعلا عايزه اغير حياتي مش عايزه اعيش ميته


داليا : طيب وايه مانعك ؟؟

ايمان : مش عارفه ابدأ منين وخايفه .

داليا : مش عارفه تبدأي منين دي فاهمنها انما خايفه من ايه ؟


ايمان : خايفه احسن اشرف يصدني او يصدمنى وخايفه اتصرف غلط وخايفه وخلاص


داليا : طيب ماهو عشان تنجحي فى الامتحان لازم تخافي من السقوط لكن مش هاتنجحي الا لو دخلتي الامتحان .

ايمان: اه عندك حق . طب نبدأ منين ؟؟؟

داليا :اه طب هانشرب الشاي اهو ونمخمخ .

ايمان : ماشي يا عبقرينوا هانم.
داليا وهى بتشرب الشاي : انتى عيد جوازك امته فكرينى؟؟؟

ايمان : عدى يا اختي من شهرين .

داليا :ايه ده ما قلتليش ليه يا بت ؟؟

ايمان: اقعدي ساكته انا كان عندي اكتئاب يومها .

داليا : ليه يا استاذة الاكتئاب والسواد النفسي .

ايمان : كده عشان اشرف ولا جاب سيرته ولا افتكره ولا كأن فى حاجه قعدت 3 ايام عندي ا كتئاب ولما قلتله قعدت يتريق عليا ويقولي انتى فاضيه وبتاع واتخانقت معاه بقى وقعدنا اسبوع متخاصمين .

داليا : ياااااااربناااااا طيب ما كنتى تخديه مطوه فى جنبه وهو ياخدك مفك جنب عينك احسن اهى ذكرى تدوم برضه .


ايمان بضحكه كبيره : بلاش رخامه الله امال اعمله ايه يعنى .


داليا : المهم اي مناسبه قريبه عيد ميلاده فى مثل هذا اليوم شوفتك لاول مره كده يعنى .


ايمان : ما بنعملش اعياد ميلاد مش بيقولوا حرام وبتاع .

داليا : حرمت عليها عشيتهم البعدا هايحرموا على الناس عيشتها .

ايمان : بس اه زي الاسبوع ده كانت خطوبتنا

داليا : حلوووووو اوي . تعالى بقى نتفق

ايمان : قولي يا فيلسوفة عصرك .


داليا : بصي الاول لازم لازم تغيري فعلا جدولك بحيث تناموا سوا وتصحوا سوا دي اهم حاجه بلاش نظام الفنادق الى انتم عاشين فيه ده وورادي النوم .

ايمان : ازاي بس ما انتى عارفه اليوم شكله ازاي
داليا : اتصرفي يا ايمان اولا لازم تشوفي واحده تيجى تساعدك فى شغل البيت ولو مره فى الاسبوع او مرتين وكمان اشرف لازم يساعدك ولو معنويا عشان يبقى فى مشاركه بينكم فعلا
ايمان : اشررررررف ؟؟؟؟ انتى بتحلميييييييي ده ما بيجيبش لنفسه كوباية المايه .
داليا : ماشي ماهو برضه انتى عليكى عامل كبير انتى الى عودتيه على كده من الاول ولازم لما ترجعي فى كلامك بقى يبقى تدريجى
يا بنتى ربنا عرفوه بالعقل مش معقول تقدري تعمل كل حاجه فى الدنيا لواحدك موظفه وست بيت ومربيه اطفال وفلبينيه و زوجه مش معقول هو اليوم 24 ساعه هاتخليه بالعافيه 48 اكيد فى دور منهم هايسقط منك .
ايمان : عندك حق انا عودته على كده .طيب انا هحاول اقنع اشرف بموضوع انى اخلي واحده تجيلى مرتين فى الاسبوع ولو انه بيقول انه ما بيحبش حد غريب يدخل البيت .
داليا: اه بس تقنعيه مش تتخانقي معاه ما انا عارفاكي بتنقطي دبش احيانا .
ايمان ضاحكه : يعنى اعمل ايه يعنى .
داليا : يعنى نقي وقت لطيف كده وتكوني قاعده معاه وايدك فى ايده وتقوليله بصعبنه كده انا باتعب اوي فى شغل البيت يا اشرووووووف . انا عايزه اجيب واحده تساعدني عشان افضالك شويه يا قلبي .
ايمان ضاحكه : اشروووووووف ههههههههههههههههه ايه ده . ده انا بتهيئلي يطلقني لو قلتله اشروف دي .
داليا : يا ستى قولي اي حاجه بس خليكى ناعمه شوووووويه يا ساتر على تماثيل الشمع .
ايمان : ماشي يا ناعمه يا غريبه .
داليا : بجد يا بنتى الرجاله عقلهم صغير اوي بيضحك عليهم بكلمه والكلمه الحلوه بتسحر القلوب .
ايمان: طب وهو يعنى انا ماليش نفس اسمع كلمه حلوه ؟
داليا : يا بنتى هى مزاد مين يبدأ المزاد ومين يزود . يعنى انتى لو قولتيله باحبك هايقولك ايه باكرهك يا رخمه ؟
ماهو هايقولك باحبك برضه هووووو كده لو عايزه تسمعي كلمه حلوه لازم تقولي كلمه حلوه .
ايمان : طب ما انا ساعات باقول وهو ما بيقولش .
داليا : يادي الخييييييبه يا بنتى افهمي هو انتى هتعملي دفتر يوميه ولا ايه للكلام الحلو بينكم . قولي وما تبطليش ابدا كلام حلو . هو زي ما هايتعود يسمعه هايتعود يقوله .
ايمان : طييييييييييييب لما نشوف اخرتك ايه معايا .
داليا : كمان لازم تعرفي ان قمة سعادة الرجل لما يحس انك محتاجه له وانك ما تقدريش تعيشى من غيره . ده لما يكون رجل سوي يعنى . مش هو سوي يا بت ولا اييييييييه .
ايمان : اه مستوي ليه ؟ هههههههههههههههه
داليا : بجد تعرفي عامله زي ايه ؟ زي الطفل الصغير لو طفل حتى غريب عنك وحسيتى انه محتاجلك ولو سبتيه هايضيع من غيرك مشاعرك هاتتحرك ناحيته وتتعلقي فيه اكتر .
ايمان : يعنى اعمل عيله ؟
داليا : اه هو فى احسن من المعيله . اجمل حاجه تكوني مع جوزك عيله وتكوني امه وتكوني صديقته وتكوني حبيبته وتكوني اخته وتكوني عشيقته كمان .
ايمان : اه كده دخلنا فى قلة الادب .
داليا : لا ده هو ده الادب كله . قلتيلى بقى عيد خطوبتكم يوم ايه ؟
ايمان : استنى هاحسبها ...... هايبقى يا ستى يوم الخميس الى جاي
داليا وهى بتغمز لايمان بعينها وتضحك : مافيش اسعد من كده ظروف بقى ؟؟
ايمان وهى بتضحك فى خجل : مش باقولك قليلة الادب .
داليا : تعالى بقى عشان نتفق على الترتيبات ليوم الخميس .
ايمان : ايه ده انتى هاتبقى معانا ولا اييييييييه ؟
داليا وهى بتضحك : ليه يعنى فاضيالك انا ؟ المهم يلا بقى عشان نتفع على خطة يوم الخميس .
ايمان : يا خططك يا دووووولي لا قولي بسرعه
داليا : شوفي يا ستى اول حاجه ...................
يتبع يا كتاكيت
جامده التعليقه صح ؟؟؟





الاثنين، 19 يناير، 2009

قلب ايمان ..... الرابع

الشمس طاله من شباكهم جميييله ودافيه ومنوره ومليت عليهم الدنيا و ........
ايمان مفزوعه : اشررررررررررف قوووووووووووم يا نهار ابيض الساعه سبعه ونص بسرعه انا اتاخرت اوي انا شكلي نسيت اظبط المنبه بتاعي بالليل .
اشرف : ايه فى ايه طيب طيب بالراااااحه قايم اهو .
وبسرعه ايمان لبست ما تعرفش ازاي ولبست الولاد
وقالت لاشرف: ابقى هاتلهم كرواسون من تحت وانتم نازلين ما لحقتش اعمل فطار
أشرف : نعم نعم وانا افطر ايه طيب . وكمان انا هاوديهم المدرسه لا هاتأخر كده .
ايمان : الله وانا اعمل ايه يعنى ما انا متاخره فعلاااا وانت معاك العربيه
اشرف : متأخره ؟ طب وايه يعنى هايحصل ايه لما تتاخر الدنيا هاتتهد وبعدين انتى الى نسيتى تظبطي ا لمنبه ذنبي انا ايه ؟
ايمان : أنا ناااااااازله اتصرف انت مره فى اي حاجه .
ونزلت وهى متعصبه ومتنرفزه وجرررررري على الشغل .
ولما وصلت الشغل وهى بتجري كلمتها داليا: نموسيتك كحلي يا حلوه متأخره ليه شايفاكي وانتى جايه
ايمان: راحت عليا نومه يا ختي .
داليا : احترت فيك يا زمن . ما كنتى امبارح بتعيطى منه .ههههههههههههههههه
ايمان : بس يا رايقه انتى .
داليا : طيب نشفتي الجبس كويس
ايمان : اه يا اختي هو اساسا ناشف خلقه ومستنيل على الاخر .
داليا : طيب اشوفك الظهر ان شاء الله ونشوف اخبار الجبس .
......................
ايمان وشها فى الشغل وتتحاشى النظر لاي حد اصلا . وجالها رساااااااااله .
فتحتها : بنصبح على الجميل ابو قلب تقيل
فى بالها : يادي النيله السوده طب اعمله ايه ده ؟؟؟
فكرت شويه وبعتتله رساله : اصبحنا واصبح الملك لله ولا حول ولا قوة الا بالله
بعتتها ولما وصلته فضلت تبص عليه وهو بيقراها ووشه اتغير وبصلها وابتسم لها ابتسامه صفرا محتاره ومحرجه
وهى ردت عليه بابتسامه غلسه جدا .
ايمان لما روحت وخلصت ماتش كل يوم واشرف والولاد ناموا بصت لاشرف وهو نايم :
وقالت فى بالها : ياريتك تفهمني . أنا عايزه احبك لا انا والله باحبك بس عايزه احس انى باحبك وانك بتحبني
وبتنهيده طوييييييله وبينها وبين نفسها:
انا لازم اغير حياتي انا مش هاعيش كده ابدا
يتببببببببع

السبت، 17 يناير، 2009

قلب ايمان .... الثالث

تنويه وتنبيه وتحديث وتحذير مهم اوي اوي اوي
القصه يمكن واقعيه جدا جدا يا جماعه لكن والله والله والله لا تعبر عن اشخاص حقيقين فى حياتي ولا حياة اي حد اعرفه ولا الموضوع متعلق باي واحد او واحده اعرفهم ولا كلمتهم ولا سمعت عنهم
يا جدعان احلف لكم ان حتى انا ما كنتش اعرف انى هاطول فيها كده واكتب احداث عامله كده ؟؟؟
يا لهوي كل شويه الاقي بلوى جيالي وانا قاعده كده
القصه من خياااااااالي الخاااااااااص
يا ربييييييي هايموتوني يا جدعان والله
=====================================================
استاذ محمود بابتسامه عريضه: صباح الخير يا مدام ايمان ...

ايمان بارتباك من مفجأه ظهوره قدامها وابتسامه باهته على وشها : صباح النور يا استاذ محمود .

استاذ محمود : ايه اتأخرتي ليه .. انا منتظرك من ربع ساعه ولا انتى بقى قاصده تقلقينا .

ايمان بارتباك اكتر من الاول وهروب بعنيها : اه اصل كان الشارع مقفول وانا جايه .

استاذ محمود : طيب يلا نطلع المكتب .

ايمان بابتسامه صفرا وملخبطه : نطلع المكتب .لا ماهو انا لسه هاعدي على داليا الاول اتفضل انت وانا هابقى اطلع .

وتطلع ايمان السلم بهروب شيك من استاذ محمود الى وقف شويه مش محتار ومش عارف يحدد موقفه . وهز راسه ومشي بنفس الابتسامه العريضه .

وتوصل ايمان مكتبها بعد شويه وتلمح محمود زميلها بيبص عليها وهى تهرب بعنيها بسرعه وتقعد على مكتبها تشتغل وما تبصش لاي حد خاااالص لكن من آن لاخر كانت بترفع عينها تبص هناك وتلاقيه اكتر الاوقات ماطط رقابته على اخرها عشان يشوفها
وبعدين تسمع صوت رساله وتقراها وتبقى مش عارفه تعمل ايه وتحس نفسها مخنوقه بدموعها وغصب عنها ترفع عينها على محمود وتحاول تبتسم ابتسامه صفرا بالعافيه ردا على ابتسامته العريضه الشغوفه جدا .

ايمان لنفسها وهى بتبص فى الساعه : يااااااه الساعه بقت 3 خلص اليوم اخيرا كان يوم ثقيل ورخم .

داليا : ايمان يا ايمان استنى انتى ايه مركبه عجل فى رجليكى

ايمان : ما انتى عارفه الى ورايا .

داليا :طيب باقولك بكره الجمعه هاتروحي لماماتك ؟

ايمان : لا ماما مسافره عند اخوها ليه ؟

داليا : ايه الرخمه دي مش انا قايلالك هاجيلك فى الويك اند .

ايمان :اه والله نسيت يلا هاستناكي سلام بقى .

وبعد تكرار نفس اليوم السابق تقريبا مع ايمان واشرف . بدأ يوم الجمعه والى بيبدأ برضه بشغل اسبوعي لايمان فى الشقه والهدوم والولاد اما اشرف بينااااااااام لحد صلاة الجمعه .

وعلى المغرب كده اشرف لبس واتظبط اوي وراح يقعد مع اصحابه شويه فى الكافيه

قائلا لايمان الى يادوب سألته هو رايح فين : اييييه موشح كل مره بلاش الواحد يفك عن نفسسسسسسسه .



وبعد شويه

ايمان : اهلا يا داليا اتفضلي ايه النور ده .
ووسط صريخ العيال بقى مع بعض والهيصه سلامات وطيبون .
ايمان : تعالى يا داليا نقعد جوه عشان العيال دول صداع اوي .
داليا بصوت هامس : هو جوزك مش هنا ؟؟
ايمان : لا يا حبيبتى راح الكافيه يقعد مع اصحابه شويه يفك علن نفسه .

داليا ضاحكه : طيب يا اختي ربنا يفكها عليها . انتى بتربطيه فى رجل السرير ولا ايه ؟؟

وبعد شويه رغي هنا وهناك .
داليا : تعالى بقى اقعدي انا شربت واكلت وعايزاكي فى موضوع مهم .
ايمان : خيييير يارب .
داليا : ايه يا ايمان مالك ؟؟انا خايفه عليكى انا حاسه انك بقتى مش طبيعيه حتى ضحكتك بقت تطلع ماسخه مالك يا بنتي

ايمان بتنهيده كبيره : والله ما نا عارفه يا داليا انا بجد تعبانه ومضايقه ومش عارفه اعمل ايه .

داليا : طيب ايه الى مضايقك وايه كمان حكايه سي محمود ده الى من يوم ما جه وهو عاملي فيها عبد الحليم وبيبربش على طول .

ايمان : محمود ايه بس . محمود ده تقدري تقوله انه نتيجه مش سبب .

داليا : طب ايه الاسباب ؟؟؟!!!

ايمان : مش عارفه انا حاسه ان حياتي بقت صعبه اوي وممله وزهقانه من كل حاجه بتهيئلي لولا ولادي كان زماني مت من الاكتئاب ويمكن كنت اتجننت وموت نفسي .

داليا ضاحكه فى محاوله فك الشحنه : ايه ده ؟؟ انتى اتجننتي فعلا باين . طيب نحجزلك فى المرستان من دلوقتي ؟؟؟!!

ايمان : انتى بتهزري يا ختي قريب ان شاء الله .

داليا : لا بجد انتى فى نعمه يا بنتى عندك ولد وبنت زي القمر وجوزك محترم واخلاقه كويسه وطيب والله وكويس ومستورين الحمد لله وبتشتغلي يعنى الحمد لله انتى احسن من غيرك
وان كان على الدوامه ما كلنا فيها انتى عارفه

ايمان : الحمد لله نحمده ونشكر فضله بس عارفه لو اضعاف كده دوامه والواحد يلاقي كلمه حلوه يسمعها ولا حضن دافي يستخبى فيه كانت تهون .

داليا : وليه كده طيب . ده اشرف طيب وبيحبك وما بيستحملش عليكى الهوا .

ايمان : تصوري انا ما بقتش عارفه هو بيحبنى ولا لا ولا حتى انا باحبه ولا لا !!!!

داليا : ليه بتقولي كده وليه الحياه وصلت معاكم لكده انتم متجوزين من ست سنين بس ما لحقتوش يعنى تقرفوا اوي كده من بعض .

ايمان : يا بنتى احنا خلاص ما عادش في بينا تقريبا كلام غير انا اقوله على طلبات البيت وهو يقولي على طلباته اكل وشرب وخلافه وبس على كده . لدرجة انى بقيت احس انى حتى باهرب منه ومش عايزه اكلمه حتى مش عارفه ليه .

داليا : يا خبر وليه وصلت الدنيا لكده ما هو دي غلطتك برضه مش غلطته لواحده . انتى لازم تعملي حاجه مش كده .

ايمان بعصبيه : هاعمل ايه انا ؟؟؟ اشحت منه الحب بس يا داليا انتى مش هاتحسي بيا انتى اصلك واخده ياسر عن حب ربنا يهنيكم ببعض انما انتى عارفه ان انا ما كنتش عرف اشرف قبل الجواز .

داليا : يا سلام لا طبعا مش هو ده السبب . انتى اكتر واحده عارفه ان ياسر خطبني بعد شهر واحد من شغلي فى الشركه القديمه ما لحقناش يعنى لا نحب ولا نعمل مجرد اتعرفنا . لكن بعد كده حبينا بعض انتى بس الى حاطه فى دماغك كده صدقينى .

ايمان : جايز مش انا باقولك انى ما بقيتش عارفه حاجه .

داليا : وبعدين ما انتى كنتى ايام الخطوبه بتحبيه ومبسوطه وطايره واول ايام الجواز برضه ايه الى حصل دلوقتي ؟ .

ايمان بدموع نزلت على خدودها وهى مش حاسه : مش عارفه يا داليا مش عارفه انا مخنوقه مخنوقه ومش عارفه اعمل ايه .قوليلى انتى اعمل ايه ؟؟؟

وفتحت فى البكاء فى حضن داليا

داليا : يخرب عقلك بس بس خلاص ما تعيطيش كده ايه يا بنتى طب اهدي بس اهدي ...... ايمان اوعى تكوني مخبيه عني حاجه ما اعرفهاش ؟؟

ايمان بصوت مليان بكاء: لا والله هو كده بس .

داليا : طيب خلاص اهدي بقى والله انده العيال يتفرجوا عليكى ويزفوكي ويقولوا الهبله اهي .

ايمان ضحكت والدموع فى عنيها وقامت مسحت دموعها وحاول تبطل بكا .

داليا : ايوه كده اعقلي وان شاء الله كل حاجه هاتتحل ما تقلقيش بس انا ليا عندك طلب .

ايمان : عنيه يا دولي .

داليا : لا مش عايزه عنيكى دلوقتي ..... محــــمــــــــــــود

ايمان : يووووووه بلاش السيره دي . خلاص انا عارفه هاتقولي ايه . انا نفسي ندمانه انى حتى فكرت كده ومش عارفه اعمل ايه

داليا : طيب يا فالحه . وطبعا اول حاجه تعمليها تستغفري ربنا كده وتعقلي وبلاش الهبل ده وسي بتاع ده من بكره ما يشوفش الا الوش الجبس عارفاه ؟؟

ايمان : من غير ما تقولي النهارده كان وشي كله جبس بس كان لسه طري على بكره يكون نشف .هههههههههههههههه
داليا : طيب لما نشوف بكره هاجي افتكش عليكى ههههههههههه..... يلا بقى قومي اغسلي وشك بدل ما جوزك يجي يلاقي كده وتعالي نشوف العيال عملوا ايه هناك زمان الانتريه بتاعك فى الشارع .

ايمان وهى بتحاول تضحك من قلبها : طيب يلا .

ايمان قعدت مع داليا والعيال وضحكت من قلبها وارتاحت شويه وبعد ما داليا مشيت قفلت الباب وفكرت كتير اوي طول ما هى بتعشي الولاد وتنيمهم .
وبعدين راحت اتوضأت وصلت وقعدت تقرا قرآن وتدعي ربنا انه يغفر لها ويلهما الصواب ويبعد عنها كل حاجه وحشه ويهديها وغصب عنها بكت جامد اوي اوي .
وصوتها علي شويه

وبعدين سمعت صوت اشرف : ايمان ايمان ايه مالك فى اييييييه ؟؟ بتعيطى ليه ؟؟؟ انتى تعبانه ؟؟ حد من العيال تعبان ؟؟؟
ايمان بصوت كله عياط برضه : لا لا مافيش حاجه يا اشرف كلنا كويسين انا بس كنت مضايقه شويه .

اشرف : يوووووووووه يادي النكد الازلي انتى يا بنتى واخده دكتوراه فى النكد العائلي . مضايقه ليه

ايمان وهى بتعيط اوي : مافيش لوحدي كده مضايقه .

اشرف وهى صعبانه عليه : طب تعالي قومي .
واخدها فى حضنه وطبطب عليها وهى غاصت فى حضنه اوي ومسكت فيه اوي
وقالتله : اشرف ما تسبنيش يا اشرف لوحدي عشان خاطري .
اشرف وهو بيحاول يضحكها : ايه ده هو انتى طلعلك عفريت فى الضلمه ولا ايه وانا مش هنا .
ايمان بتبتسم والدموع فى عنيها : بلاش رخامه بقى .
اشرف : طب يا قطتي قومي اغسلي وشك وفوقي كده .
ايمان : بقالك كتير ما قلتليش يا قطتي
اشرف : هو انا لازم اقول ما انتى عارفه .
ايمان : طيب مش هاتتعشى .
اشرف : يوووووووه مش عايز اتعشى كلت فى الكافيه بليله .
ايمان بوشوشه : طيب طيب ما تزعقش هاتصحي الولاد .
اشرف : لا يصحوا مين (وبشوشه خالص ) كلت فى الكافيه بليله .
............................................................................................

يتبع ان شاء الله

الأربعاء، 14 يناير، 2009

قلب ايمان ... الثاني

سلام عليكم سوري يا جماعه على التاخير بس والله غصب عني يلا بسرعه عشان اقولكم عن ايمان كلام كتير ......
خلصت ايمان الصلاه ومشيت هى وداليا وما اتكلموش خالص لحد ما وصلوا لمكتب ايمان الى كانت وشها متغير وباين عليها الضيق جدا من كل شي ء
ويمكن علشان كده اشفقت عليها داليا من الموقف كله وطبطبت عليها

وقالت لها وهى بتشد على ايدها : ما تزعليش مني يا ايمى انتى عارفه انتى عندي غاليه ازاي ..دول عشرة عشر سنين يا بنتى
عموما انا هاحاول ا جي ازورك فى الويك ايند ونقعد مع بعض شويه

هزت ايمان راسها بالقبول وحاولت تبتسم ابتسامه متألمه وقالتلها : ماشي يا داليا عارفه والله
.
وكملت ايمان الكام ساعه الى اتبقوا فى يوم العمل وهى وشها بدون اي تعبيرات، وتظاهرت بانشغالها بالورق والشغل الى قدامها وما شافتش اي حد حواليها او تعمدت ذلك لحد لما خلص وقت الشغل ومشيت ايمان
بسرعه الساعه 3

ايمان بتروح بسرعه عشان يادوب تعدي على الحضانه عشان تاخد نور(2) ومازن(4) من الحضانه وتمشي بعدها خمس دقايق لحد البيت وتطلع جري عشان تكمل الاكل قبل ما اشرف جوزها يجى من الشغل الساعه 5
اول ما ايمان بتدخل بيتها بتدخل دوامه كبيره ما بتلحقش معاها تفكر فى اي حاجه تانيه اول حاجه بتجري وقبل ما تغير هدومها تفتح البوتجاز وتحط عليه حاجات وبعدين تجري على الولاد الى بيبقى لهم الف طلب وغالبا بياخدوا حمام وتخلص ماتش الاولاد وتجري كمان تكمل الاكل وسط طلبات الولاد وتغير هدومها هى كمان لو كان فى وقت
وما تعرفش ازاي الوقت ده بيجرى كأنه دقيقه وهى بتجري فى كل اتجاه في الشقه ويجى اشرف من الشغل .
اشرف : سلام عليكم

الولاد فى وقت واحد وجري : بابااااااااااااااااا جه يا مامااااااا .

ايمان : وعليكم السلام .

وجري على بابا وينطوا على ايده الاثنين ويفتشوا كويس يمكن جايب معاه حاجه تنفع .
وهو بيبوس فيهم ويسلم عليهم

وبعديين وهو بيغير هدومه : يا ايمااااان اخبار الاكل ايه انا ميت من الجوع

ايمان بترد من المطبخ بصوت هادي : طيب حاضر ربع ساعه بس .

اشرف بعد ما وصلها المطبخ : ايه مالك انتى تعبانه ولا ايه .

ايمان بارتباك ومحاولة اظهار ابتسامه باهته : انا لا لا ابدا بس مرهقه شويه من الشغل .

اشرف : شغل ؟؟!!! شغل ايه يا ماما هو الى انتى فيه ده شغل ؟؟!! الله يكون فى عونااااااا .

ايمان فى بالها :بدأناااااااا

اشرف: هادخل اصلي العصر اجي الاقي الاكل جااااااااهز .

ايمان بغيظ : حاااااااااااضر على النار هاكلملك النار تخلص بسرعه .

خلصت الاكل وهى كل شويه تسمع استعجال من اشرف وهو قاعد قدام التلفزيون واتغدوا وايمان اكلت الولاد وشالت الاكل واشرف خلص اكل وجرررررررري على التلفزيون وكانت لسه ايمان فى المطبخ ينده عليها .

اشرف : ايماااااااان بسرعه الشاااااي عايز انااااااام .

ايمان : حااااااااااااااااااضر اصبر عليا يا اشرف

تخلص ايمان الماتش كااااامل واشرف دخل ينام والعيال وايمان وراه
وبعد خمس دقايق....

اشرف: ايماااااان حرام عليكي انا مش عارف انام خدي العيال دي وروحوا الاوضه التانيه سبوني ارتاح شويه دى مش عيشه دي.

ايمان اخدت الولاد وانسحبت للاوضه التانيه ونام مازن انما نور فضلت صاحيه ايمان قالت اهلا وسهلا شكلك نايمه فى الحضانه ومخمخه .

نور بحروف مكسره وابتسامه شقيه : اه نايمه فى الحضانه.

تضحك ايمان فى ارهاق وتبوس نور جامد اوي .

وطبعا ما نامتش ايمان الا غفوات خاطفه لمده ساعتين لحد لما مازن واشرف صحيوا
وبدأت ماتش تاني من طلبات البيت والعيال واشرف نفسه ...الى جه على الساعه عشره كده وجاله تليفون من واحد صاحبه ولقته بيلبس

ايمان : رايح فين يا اشرف دلوقتي ؟؟

اشرف : مافيش اسامه صاحبي اتصل عليا وهايعدي عليا ننزل نتمشي شويه مش عايزه حاجه من بره ؟

ايمان : طب ما تاخد معاك مازن ده قاعد زهقان على ما اخلص باقي الشغل الى ورايا .

اشرف : لااااااا باقولك نازلين نتمشى مازن هايتمشى ؟؟

ايمان بعصبيه : الله مش معاك العربيه .

اشرف بغلاسه: لااااااا مش عايز وجع دماغ .

ويخرج اشرف وتصارع ايمان مع الولاد وشغل البيت ساعه كمان من الزمن ما بين جري وصريخ وعياط احيانا ويرجع اشرف الساعه 11 وشويه يلاقي الكل نااااااااايم .

يبص عليهم ويظهر على وشه ابتسامة راحه يشوبها اسف

ويغير هدومه ويدخل المطبخ يدور على اكل يلاقي صنيه على عشاء خفيف ياخده ويقول : كتر خيرك والله .

ويهز راسه فى غير رضا: بتهيئلي لو كانت مربيه قطه كانت بقى اهم مني .....

ويتعشى اشرف وبعدين يعدي على ايمان الى نايمه جنب نور
ويقولها وهو بيخبط على كتفها بالراحه : ايمان ايمااااان. مش هاتقومي تنامي مكانك ؟؟

ايمان وهى غرقانه فى النوم : العشا فى المطبخ .
اشرف بضيق : عارف يا ستى اتنيلت كلت باقولك مش هاتتنقلي مكانك .
ايمان: لا يا اشرف مش قادره اقوم بقى خلاص خلينى هنا .
اشرف بضيق اكبر وزفرة كبيره : طييييييب خليكى يا اختي .
ويفتح الكمبيوتر ويقعد قدامه لحد الساعه 2 صباحا
وتبدأ ايمان يومها بعد كده ب 3ساعات الساعه 5 يعنى حيث الطبيخ ولبس العيال وسندوتشاتهم وفطار اشرف ولبسها وخروجها للشغل
وعلى باب المبنى ايمان رفعت وشها وقدامها مباشرة ومش عارفه جه منين..
بابتسامه عريضه من استاذ محمود :صباح الخير يا مدام ايمان
ايمان : ............
يتبع يا حلوين


وده كان مخلص متعب لكم اوي اوي يا جماعه عشان تعرفوا ايمان واشرف عايشين ازاي
واعتقد هى دي حياة كل النااااااااس الى زيهم فى اغلب واعم الايام صح ولا لا ؟؟؟
حياه صعبه ومتعبه وجافه ودواااامه ما حدش عارف يخرج منها
اسفه على الاطاله الممله
بس حبيت تشوفوا ايمان واشرف بعينى