الخميس، 30 يوليو، 2009

مقترح بشأن ضريبة الدخل




ايه رايكم فى الداخله الجامده دي


ايوه ايوه هى دي الحقيقه يا جماعه انا هاعرض عليكم اقتراح بخصوص ضريبة الدخل


طبعا بتقولوا هى صبرني مالها يا رجاله بتتكلم فى كلام كبير على سنها كده ليه


اقولكم يا جودعان والله انا باتكلم فى الكلام الكبير ده بس مش باحب اصدعكم معايا


انما بقى الموضوع النهارده فكرته والاقتراح ده اساسا بتاع بابا حبيبى


ادي ايه كنت سعيده لما اداني ورقه كاتبها بايده وقالي اقري دي وناقشينى فيها ولو حبيتى تنزليها على المدونه بتاعتك
هو بابا عارف انى عندي مدونه بس ما كنتش اعرف انه لسه فاكر او حتى حاسس انها حاجه كويسه يعنى لدرجة انه عاوز يعرض فيها فكرته


المهم ندخل فى الموضوع عشان ما تقلوش عني رغايه


طبعا ضريبة الدخل دي مفروضه على الشعب الغلبان الى مش لاقي ياكل ده


بس طبعا مش كل الشعب مش لاقي ياكل فى ناس مش لاحقه تاكل مين ولا مين


احنا نقدر نقسم الحصيله الى احنا المفروض بنحصلها من الناس الى قسمين


80 % من الحصيله يسددها 20% من الممولين (كبار الممولين ) الى هما حبايبنا الى بالك فيهم
20% من الحصيله بيسددها 80 % من الممولين (ودول الناس الخاضعين للشريحه الاولى من قانون الضرائب على الدخل )
الى هما الغلابه يعنى الى بيقلبوا عيشهم يادوب
وده حسب النسبه المعلنه من وزارة الماليه

طيب ده الوضع الحالي
ايه بقى الى بابا بيقترحه
ان احنا نعفي من الضرايب دي من لا يتجاوز ارباحه السنويه عشرين الف جنيه (55 جنيه يوميا ) يعنى يادوب بتهيئلي ياكل خصوصا لو كان رب اسره
وما نلزموش اصلا بانه يسجل فى مصلحة الضرايب من الاخر نشيله من دماغنا
لكن عليه نلزمه انه اذا تجاوزت ارباحه السنويه 20000 جنيه انه لازم يسجل والا يعتبر متهرب من الضرايب ويحاسب بقى باثر رجعي من يوم ما فتح النشاط بتاعه كله من الاخر يعنى نخرب بيته بقى لو اتمسك
وده على فكره بيحصل فى ضرائب المبيعات لو حد عنده فكره
طيب على كده بقى يبقى نلغي اصلا الشريحه الاولى من قانون ضريبة الدخل وتكون الشريحه الاولى 15% على ما يزيد ارباحه السنويه عن عشرين الف جنيه

ايه بقى فايده الاقتراح ده او نتايجه الايجابيه علينا


اولا بالنسبه لمصلحة الضرايب


* هايتم قفل والغاء 50% من ملفات الممولين الحاليين والى هما بتقل ارباحهم السنويه عن 20 الف جنيه


* طبعا تكاليف جباية الضرايب دي من الناس هاتتخفض لحوالي 50% برضه


(ماهو في جيش موظفين بحاله موجود عشان يحاسب الناس ويعمل الشغل ده كله وراحين جايين وقابضين واكلين نايمين شاربين على حس جباية الضرايب من الشعب الجعان ده )



وطبعا الكلام ده من شأنه انه يخلي الموظفين فى الضرايب يفضوا بقى ويروقوا للناس الباقيه ويشتغلوا صح ويحصلوا بقى من الناس الى بتدفع فعلا فلوس مش ملاليم


فى كما ن حاجه مهمه اوي انا لما اقول انا مش هاحسب حد اقل من 20 الف جنيه ربح سنوي طيب كل الناس المستخبين بانشطتهم هايطلعوا للنور ويعلنوا عن نفسهم ماهو مش هايتحاسبوا ولا خايفين من الضرايب


وما دام اعلنوا عن نفسهم غصب عنه لما يكبر وتزيد ارباحه عن عشرين الف جنيه هايسجل نفسه فى الضرايب عشان ما يقدرش يستخبى بعد ما اعلن عن نفسه وكبر خلاص ولو اتمسك هايقطموا رقبته وهايتخرب بيته


يبقى كده مصلحة الضرايب كسبت ان ناس تانيه هايسجلوا نفسهم تلقائيا وناس هاتدفع مش ناس مش لاقيه تاكل

اما عن النتائج المتوقعه بالنسبه للمجتمع :


انتم عارفين ولا شكلكم مش عارفين اصلا ولا فاهمين انا باقول ايه


المهم انتم عارفين ان احنا عندنا مشكله فى الاقتصاد المصري اسمها الاقتصاد المخفي او الغير مسجل او زي ما بنقول عليه اقتصاد تحت السلم


وده مشكله لانك مش عارف تحدده ولا تحسبه ضمن الناتج القومي والدخل القومي ولا قادر تقيس النمو الاقتصادي مثلا بشكل حقيقى لان فى جانب كبير منه خفي علينا غير مسجل


ده غير انك كمان مش عارف تمسكهم ولا تحاسبهم ولا تقولهم انتم صنعتوا ايه ولا بعتوا ايه ما انت اصلا مش عارف عنهم حاجه


وخلوا بالكم احنا كشعب كلنا بناكل من الصناعت دي


اه منها مصانع زبادي وجبنه ومخللات وحاجات زي كده مثلا دول غير خاضعين للرقابه ( ده على اساس ان فى رقابه اصلا )


عارفين ان الاقتصاد الغير مسجل والغير مراقب ده ينتج 80% من احتياجات المجتمع المصري من السلع الغذائيه
وان حجم العاملين فى القطاع الاقتصادي الغير مسجل ده ب 40 % من حجم العماله يعنى حوالي 8 مليون عامل


وهما كمان غير مسجلين كعمال ولا لهم تامين ولا غيره ولا حقوق حسب قانون العماله ولا اي حاجه بقى
وكمان القطاع ده طول ما هو مستخبي تحت السلم هايخاف يكبر هايخاف يظهر وبالتالي ده بياثر على تنمية قطاعات كانت ممكن تكون احسن من كده بكتير لو كانت منظمه ومسجله وظاهره للعلم



وللعلم احنا ما نقدرش نستغنى عن القطاع ده ابدا زي ما انتم شايفين امال هناكل منين ؟؟؟




والكلام ده يخلينا ينقول اد ايه هايكون الوضع احسن لو كانت الصناعات دي فعلا فى النور
نقدر ننميها نقدر نكبرها ونشجع الناس يدخلوا فيها جديد


الحاجات دي المفروض انها تكون مخططات كبيره وعلى شكل منظم مش هانحس اثره فى يومها لكن على المدى البعيد حتى مش بعيد اوي يعنى بالعكس


ده فعلا من شأنه انه يشجع الناس انه يعمل مشروع صغير
يبقى منتج مش مستهلك
يطلع للنور ويشتغل براحته


من الاخر ملخص المقترح عشان ما تهوش مني
ان احنا ما ناخدش ضريبة على الدخل من الناس الى يادوب عايشه نسيبهم دول يعيشوا ويقلبوا رزقهم
وخلينا نركز قوتنا وقدرتنا مع الناس التاني الى معاهم بجد الى الموضوع يستاهل ان احنا نروح نقف على بابهم ونقولهم هاتوا فلوس
انما نشغل جيش موظفين وحسابات وورق رايح وورق راجع ومحاكم وقواضي عشان فى اخر السنه تبقى الحصيله ايه هاتصفي والله على ما فيش ؟؟

ها حد فهم حاجه ؟؟؟
مش عارفه شايفه نص الى قاعدين شبه يونس شلبي فى العيال كبرت وهو قاعد السلم بيهزر راسه ومش فاهم حاجه
اصل انا ما جربتش اكتب كلام من ده قبل كده يارب اكون عرفت اوصلكم وجهة نظر بابا فى المقترح ده
مع تحيات محمد الخولي امين عام الغرفه التجاريه بالمنصوره سابقا
ده الى هو بابا يعنى سلام كبير يا جودعان لبابا حبيبى

الجمعة، 24 يوليو، 2009

تكاتيك وموتسيكلات



تكاتيك وموتسيكلات 

السلام عليكم 

ايه بقى الحكايه حد يفهمنى ؟؟

يعنى ادوني عقلكم جايز انا عقلي على اده 


انا بامشي فى الشارع الايام دي 

اي شارع فى مدينتى الى هى المنصوره 


الاقي التوكتوك ده ماشي كده وسط العربيات زي النمل 

والموتوسيكلات كذلك  

طيب ايه ؟؟

فين النمر ؟؟ لا ده له نمر ولا ده له نمر 

اه والله العظيم تلاته كده

جايز بعض الموتوسيكلات عليها نمر انما كتير من غير نمر 

والانكت من كده ؟؟ ان اصحابها بيقولوا ما لهاش ورق اصلااااا 


طب ايه ؟؟

لو توك توك من دول ولا موتوسيكل خبط حد يبقى نجيبه منين 

اقول والله التوكتوك كان مكتوب عليه عضه اسد ولا نظره حسد ؟


اهو الصوره دي فيها توكتوك من غير ارقام خالص 


لا بس اوعى مكتوب عليه اي ميس يو وسهر الليالي 

يعنى عاملين حساب السياح 
هع 

طيب ماشي توكتوك عشان ازمة المواصلات اوك يا معلمين بس الموضوع يبقى مقنن مش كدددددده 

الله هو مولد ولا ايه ؟؟
اه هو مولد للاسف وصاحبه نايم 

طيب ماشي التوكتوك فى البلاد الارياف وفى الاحياء الشعبيه فى الحواري يعنى من الاخر 

انما ازاي التوكتوك بس يا ناس على الطريق السريع ؟؟

على راي رضا نمل ماشي فى الشارع  

ازااااااي يا ناس على طريق سريع بس يمشي توكتوك 

اهو فى الصوره مش جايبه حاجه من عندي والله
 



طيب بلاااااش كده 

التوكتوك ده مين سايقه ؟؟ عيال

والله العظيم كلهم عيال ومش اي عيال  

لا لازم يكون عيل بلطجي

الله مش ماشي من غير لا ورق ولا رخص ولا يحزنون 

لازم يكون بلطجي وصايع ويعرف يفلت من المرور 

وهو ده الى بيوصل الناس 

وبيوصل العيال الى راحه الدروس 
وسجلوا بقى حالات السرقه والاغتصاب من العيال دي اد ايه 
وكل الى يقدروا عليه كل ما تحصل حادثه يلموا العيال بتاعة التكاتيك 

الله !!! طب ا يه ؟؟؟
انتم لازم تستنوا لما يعلموا على الشعب الاول ؟؟؟!!!

بلاش ده ولا دددددده 

عارفين ان التكاتيك دي شغاله بنزين طبعا 

طيب عارفين ان البنزينه بتكون فى شارع رئيسي طبعاااااااا

وكمان بالصلاة على النبى التوكتوك ما يقدرش يروح لحد البنزينه 

لسبيبين الاول والاهم هو انه على ما يروح البنزينه ويرجع لمكان شغله فى العشوائيات هايكون وهو راجع خلص نص البنزين

والتاني الى مش مهم انه جايز يتمسك فى الطريق (اه جايز طبعا انتم يعنى شايفين حد بيقول انتوا بتعملوا ايه ؟؟ ولا حد بيفكر فينا اصلا ؟؟)


يعملوا ايه يا عبد الرحيم يجيبوا بنزين منين يا عبد الرحيم ؟؟

فى قانون حاليا بيمنع ان البنزينه تدي بنزين لحد الا لو كان فى تانك العربيه دوغري 

ما ينفعش يعبى بنزين فى جركن ويمشي ممنوع يا ساده يا افاضل 

ولو عربيتك فضيت بنزين فى الشارع اولع بجاز مش مهم لحد ما حد يتعطف عليك ببؤين بنزين 

الى بيحصل بقى يا حلوين ان بقى في تجارة بنزين سوق سوده 

بشكل ا و باخر بيملوا جراكن البنزين الكبيره ويحطوها فى محلاتهم الى هى فى الغالب محلات غيار زيت بتوع كاوتش كده يعنى

والتوكتوك بيروح يعبى من هناك بضعف تمن البنزين الى فى البنزينه 

ولان احنا بلد منظم ونضيف زي ما انتم عارفين 

بتكون فين يا واد يا جمعه المحلات الى بتبيع البنزين دي ؟؟

فى كل حته 

تحت بيتي وبيتك ووسط تجمعات سكنيه ونص العيال الى واقفين فيها البانجو لاحس دماغهم 

يعنى عود كبريت الحي كله يولع بعون الله 

وسلملي على خالتك ام جمعه 


طيب الموتسيكلات ؟؟

كان زمان اشوف الى راكب موتسيكل ده راجل كده شقيان وتعبان وجايب الموتوسيكل عشان يوفر اجرة الميكروباص 

دلوقتي امشي فى الشارع تلاقي حبه عيال هبل راكبين موتيسكلات 

من حوالي خمس ست سنين كده 

كان ولاد البهوات كل واحد بيشتريله موتوسيكل الواحد فيهم اغلى من العربيه قشطه ؟؟

اه عيل وابوه جابله موتوسيكل وبيلعب بيه 

شويه شويه نزلت موتوسيكلات البلد رخيصه جدا يمكن بنص تمن الموتوسيكل العادي (مش بتاع البهوات ) واقل كمان

فين مين ا زاي يقولك صينى 

على ما اذكر انها كانت منحه صينيه باين والحكومه باعتها والصين قالتلهم يا خونه ازاي تعملوا كده ده منحه من الشعب الصينى للشعب المصري الى احنا عايشين على قفا انتختهم 
وكانت مشكله كبيره والاوراق بتاعة ا لموتوسيكلات ما طلعتش والناس فضلت ماشيه بالموتيسكلات كده فى البلاله

وحاليا تلاقي اطفال راكبين موتسيكلات وجري بيهم فى الشارع وخمسات وسبعات الى بيقولوا عليها دي واهرس فى الشعب يا معلم 

الى سايق ده معاه رخصه ؟؟ اشك

الموتوسيكل نفسه مترخص ؟؟ مش لازم يعنى هو انا يعنى هاروح به فيييييين 

وااااااااه يا نفوخي 


يا جدعان ارحمونا قننوا الحاجات دي تبقى بحساب 

تبقى لها اول من اخر ايييييييييييه بقى 

التوكتوك بيستشري فى البلد 

انا ركبت مره مع سواق تاكسي وواحد قاعد جمبه بيشكيله من عربيته هو وصاحبه النقل التقيل 

قاله ياعم بيعها وهاتلك توكتوك ..... اااااااااه ده بيكسب واي عيل يسوقه ولا تبهدل روح ورا مقطوره على السكك كل شويه

بقيت قاعده ابص للراجل واقول ايه ده الشعب اتهبل ؟؟!!!!

يبيع عربيه نقل ويشتري توكتوك 

وقلت لما اروح هاقول لرضا يصفي اشغاله دي ويشتريلنا اثنين توكتوك اجره والتاني ملاكي 

ويمكن امنجه نفسي واجيب لنفسي توكتوك ملاكي لوحدي اروح به السوق 


واخيرا يا حلوين اليكم هذه الصوره الرائعه الى مش ممكن تشفوها الا فى مصر 

ولما تشوفها تقدر تغنى بعلو صوتك وتقول يبقى انت اكيييييييييد اكيد فى مصر 

وباعتذر لكم كلكم  لو كنت مقصره معاكم فى متابعة مواضيعكم  او حتى الرد عليكم هنا الى هو بيكون اول اولوياتي والله على النت 
بس معلش انا الايام دي والله الحكايه ملخبطه معايا شويتين ثلاثه وعلى اخري فى الوقت  لولا ان الموضوع ده مكتوب من شهر فات ما كنتش عرفت انزل موضوع جديد 
ادعولي من فضلكم
كفايه كده ما تقعدوش ترغوا بقى 

الجمعة، 17 يوليو، 2009

انا جيت يا ولاد



سلاااااااااااااام عليكم

انا جيت يا اصدقائي


اه والله اخيرااااااااااا


طبعا بتقولوا كنتى فين من كام يوم انتى راجعه من يوم الثلاثاء

اقولكم اصل انا كنت باستريح من المشوار


لا لا مش السفر ده لا يعد سفر اصلا انما المصيف نفسه المفروض اخد بعدها فترة نقاهه يجى اسبوعين كده استريح


المهم لما افرجكم الحياه هناك


انا كنت باصيف فى بلطيم

دي فى كفر الشيخ وموقعها تحديدا ما بين البحر المتوسط وبحيرة البرلس


الحقيقه انا عندي مشكله عظيمه فى المصيف اولا انى باكره الزحمه جدا جدا وعليه فخيار راس البر وجمصه دول عذاب نفسي بالنسبه لي


وكمان احنا فى الصيف رضا بيبقى مشغول ا وي اوي وبيكون موسم شغل ما بيقدرش يسيب الشغل او على الاقل لازم يبقى تحت الطلب


فبنخاف نسافر في مكان بعيد عشان ما يبقاص مصيره انه يقضي الاسبوع سايق العربيه رايح راجع


المهم انا كنت من حوالي 27 سنه كده


اه والله بجد


سافرت مع بابا وماما بلطيم دي وكانت صحراء جرداء ذاكرتي مش جايبه غير لقطات بسيطه للبيت الكبير الى كنا قاعدين فيه من دور واحد اصلا

والمايه الى ما كانتش موجوده وكان بابا بيضطر يروح يجب مايه مش عارفه منين فى جراكن كبيره زرقا

والتل الصغير الى كان قدام البيت عندنا الى كنا بنطلع انا واختي الكبيره عليه ونلاقي شجر التين البرشومي ونقطف التين ونحط فى جيوبنا وننزل


الحقيقه دول بس الى كانوا لازقين فى دماغي

وبعدين كان فى صديق بيكلمنى على النت من كام سنه كده وقالي انه من كفر الشيخ وقالي بلطيم بقت حاجه تانيه وبقت مصيف زيها زي راس البر بس صغيره


من سنتين كده مسكت فى زمارة رقبة رضا كالعاده وقلتله ودينى هناك وفعلا راح شاف البلد وحجز هناك والحقيقه الى روحته من سنتين ده كان اهدى واجمل مصيف روحته فى حياتي لحد الان


حبينا نكرر هذه التجربه السنه دي والنبى هى بلطيم هى نفسها بلطيم بس ما تعرفوش كان في ايه السنه دي


بلطيم بلد هاديه فعلا وجميله وانا لا يعنينى من الامر الا البحر ومع ذلك هى برضه فيها مطاعم ومحلات واسواق ومعارض وسينما بس الى يبقى يروح يعنى


واهلها ناس طيبين جدا والله غير انك ممكن تشتروا كل حاجه من البلكونه بالسبت من الناس الى معديين من اهل البلد والى بيبيعوا طرح ارضهم البسيط جدا

والى ممكن يكون شوية مانجه بطيختين قرع عسلي شمام اصفر


وطبعا غير الصيادين الى بيعدوا بالسمك وبيستهبلوا ويضربوا السعر فى خمسه

هههههههههههههههههه

وكمان فى موسم التين تلاقي بنات صغيرين ماشيين كل واحده ماسكه حله صغيره شايله فيها تين جبلي الى هو احلى تين كلته فى حياتي بجد


بلد بسيطه اوي وانا باعشق الجمال الطبيعى مش الشطوط المرسومه بالورقه والقلم


هى بتبقى حلوه بس من وجهة نظري الجمال الطبيعى الفطري حاجه تانيه


والمنطقه الى احنا بننزل فيها لسه شط تحت الانشاء زي ما هاتشوفوا مافيش كورنيش لسه ولا حاجه
والمره الى فاتت لما روحنا كانت البلد هاديه جدااااا
لدرجة ان كان معانا بنت اخت رضا كانت تقولي ده ملللللللللل
بس انا كان عاجبنى الهدوء ده والليل يجى ما تشوفش الا النجوم مع البحر والبلكونه التانيه بقى بتبص على الشارع والناس والدوشه الى مش جامده برضه
غير ان السنه دي عشان حظي الجميل ربنا رزقنا بجيران اجاركم الله تعالى
سهر فى الشارع للصبح والمراجيح عيال وزعيق وصريخ
لدرجة مره الساعه 3 الفجر كانوا بيفرقوا صواريخ طبعا طلعتلهم بقى كنت هاغتالهم خصوصا ان لقتهم شباب كبار مش عيال
ده طول الليل
طول النهار بقى الاغاني
اللللللله
عمري ما شوفت كده جمال اغاني
من حق الكبير يدلع
وفلووووس
والكسكسي بيوجع بطني
وحاجه فل فل فل
مين الناس دي يا جماعه وبيغنوا ايه وبيقولوا ايه ؟؟؟؟
المهم


تعالوا افرجكم الصور الى انا لقطها والى قليله جدا للاسف ما كنت فاضيه كنت ماسكه البوفيه



اولا الصوره دي لقطها وانا قاعده على السرير بتاعي من الشباك




ودي برضه من نفس الموقع بس ساعة الشروق






والصوره دي من البلكونه الرئيسيه للشقه




البحر اهو لافف حولينا من كل ناحيه


بس بيقولك قليل البخت يلاقي الشقه الى باصه على البحر من كل ناحيه حتى المطبخ والحمام ما فيهاش هوا


اه والله يا اخويا ما فيهاش هوا تقريبا البحر ده صناعي ولا ايه


والشقه الى جمبنا كان فيها ناس اصحابنا ما رضيناش ناخدها عشان بتشوف البحر من الجنب بس كان فيها اعاصير هواء

طبعا هاريتهم حقد

هههههههههههههههههههههههههه


ادي اول عضمه لقيتها فى الكرشه


والصوره دي من على الشط لو دققتوا جوه كده تلاقوا ضرتي يووووه قصدي مريم واخده ابوها وداخله البحر وبطلعلي لسانها على اساس انها ضرتي فعلا

هههههههههههههههههههه

طبعا طول الوقت بتحارب عشان تستأثر بكل واحد فينا على حده وتوزع اخواتها فى اي حته ولما تكون مع ابوها انا من ضمن الناس الى بتتوزع





طبعا الرحله كانت جميله جميله جميله


يعنى بصرف النظر عن كون انا ورضا من قبل ما نروح بكام يوم ظهرنا واجعنا وقضينا الاجازه ندي لبعض حقن لما الواحد بقى شاكك اننا بنعمل دماغ مسكنات ولا ايه


او كمان بالنوسبه ليومي الجمعه والسبت الى جمعوا ما بين حر فظيع مريع شنيع وضيوف ونزله معويه للعيال الثلاثه


اه اه ضيوف فى المصيف صدقوا بتحصل فى احسن العائلات الى هى عيلتنا بس يعنى


ده طبعا غير الضيوف المقيمين من اول المصيف لاخره


طبعا قضيت يومين مع الحر والعبايه والايشارب والترجيع والاسهال والسخونيه حاجه زي الفل بصراحه


يوم الاحد الصبح قلت لرضا والنبى على قلبك يا اخويا تروحني بقى كفايه كده


حسيت انه اضايق بس اعمل ايه يعنى اموت نفسي ؟؟؟



اه نسسسسسسيت اقولكم ان رضا فى يوم السبت بررررررضه كان يوم جميل جميل جميل


كان بيلعب كوره مع عواجيز الفرح يوووووه قصدي اصحابه واخواته يعنى


وبعدين قام متفزلك وقااااال بيشوط الكوره بوش رجله على اساس انه ابو تريكه سابقا


لقيته جايلى بيعرج ورجله وارمه وحاجه فل اوي اوي واضطر ينزل يوصل الضيوف كمان الى مش معاهم عربيه لحد جمصه عشان يركبوا من هناك اسهل


يعنى بينا وبين جمصه بتاع نص ساعه كده بس الطريق تحت الانشاء لسه


مش باقولكم يوم خفيف ظريف لطيف ؟؟



بس عشان ما اكونش ناكره الجميل يا جودعان اقولكم انى نزلت البحر مرتين


سمعاااااكي منك لها له لا ما باعرفش اعوم بس كنت باطفو وده احساس جميل جدا


وطبعا انا عندي شروط عشان انزل الميه لا تتوفر بسهوله


وعليه ما نزلتش الا مرتين


والمره التالته نزلت مع البت مروه صاحبتى وطبعا البت يا جماعه شجاعه شجاعه وسباحه ايه وان ولا رانيا علواني فىزمانها


من اول الاسبوع باتحايل عليها تنزل معايا وبعدين فى هذا اليوم العظيم الى هو اخر يوم اصلا


اتمشينا وصلنا لمكان فااااااااضي مافيش فيه اي حد قلتلها تعالى بقى يا رخمه انزلي الميه شويه


اولا لاجل خاطرها مشينا يجى 300 متر والميه مش بتوصل الا لحد ركبنا


الله هو فى ايه هو الواحد ممكن يوصل لقبرص مشي من هنا ولا ايه


وبعدين باقولها جربي نامي على وش الميه والله سهله انا هاساعدك قالتلى لا يا ستي


يا بت ارفعي رجليكى من على الارض


تقولي لا الشبشب هايضيع


يا لهوووووووووي انتى نازله البحر بالشبشب يا بت


تقولي اه احسن ادوس فى حاجه

ههههههههههههههههههههه


وافرضي قنديل لدعني


قلتلها وايه يعنى هانبقى نعالجك ايه البت الرخمه دي


المهم قضيت حوالي نص ساعه هاموت من الضحك عليها بس اييييييييه قلعتها الشبشب فى الاخر وربنا


ده بعد ما لقيناه طالع على وش الميه واحنا واقفين





وكمان فى خروجه ما اقدرش انكرها بس ما كانش قصدنا


احنا كان عندنا ضيوف ونزلنا نشتري سمك فقلنا نروح السوق الكبير الى هو بره بلطيم المصيف وفى بلطيم البلد الى هى بلد ارياف بسيطه بس سواحليه وعليه فيها سوق سمك كبير او حلقة سمك يعنى


وروحنا اشترينا السمك واحنا راجعين رضا قالي الطريق ده جديد بس مش عارف مودي على فين تعالىنجرب جاير اسهل


طبعا وصلنا لبلطيم المصيف عن طريق راس الرجاء الصالح فى عز الظهر حاجه فل اوي


بس بقى الحسنه الوحيده اننا شوفنا بحيرة البرلس الجميله الهاديه الرائعه دي






ادي ايه بجد المكان هناك طبيعى جدا جدا مافيش حد بوظه ولا تحتى جمله



هو اصلا كده لواحده

والبساتين دي كانت على الجنب التاني من البحيره

من اجمل الاراضي المزروعه الى باحب اشوفها هى البساتين وخصوصا لما تكون فيها شجر طارح بجد منظر جميل اوي


وفضلنا نقول هانروح تاني البحيره الصبح بدري ونشوف الصيادين وهما طالعين بمراكبهم بس طبعا فى واحد طنش وما رضيش يصحى وقالي نامي نامي اصل لو خرجنا العيال هايصحوا

لن انسى له هذا الموقف ابداااااااااااااااااااا
وده كان جزاؤه





شايفين البت مريم برضه قبل الصوره دي بخمس دقايق كانت بتغيظ فيا ضرتي حقيقى يعنى


اه بالمناسبه بعد ما صورت الصوره دي كنت باصور صوره تانيه وانا نايمه جمبهم فخالد الله يصلح حاله زق ايدى الموبايل وقع فى عينى مباشرة ولقيت الدنيا ضلمت ولما شلت ايدى قالولي دم دم انتى اتعووووووورتي


اه يا عينى ضيعتوا مستقبلي


ايه رايكم بقى رحله سعيده صح ؟؟


جميله صح ؟؟؟


ااااااه يا مامايا


طبعا نتيتجه لما تقدم شرحه


انا قررت انى ماروحش مصيف تاني اقرب من مدغشقر


او اصلا ما اروحش مصيف خالص


وماله مصيف اليوم الواحد ساعتين ونروح ننام فى بيوتنا وخلصت


هيييييه دنيا


بس خلاص كفايه كده عليكم كده واستعدوا بقى للرغي عشان انا عندي كلام كتير عايزه اقوله طبعا محوشالكم


الاثنين، 6 يوليو، 2009

وحشتوني ولسه هاتوحشوني كمان


سلااااااااام عليكم


وحشتوني وحشتوني وحشتوني


ولسه هاتوحشووووني للاسف اكتر واكتر



ايوووووووون


انا جايه اسلم عليكم عشان انا مسافره بكره الى هو الثلاثاء 7/7


هيييييييه الايام بتعيد بعضها فى مثثل هذا اليوم كان خطوبتي السعيده


وطبعا ما كانش قصدنا بس هي جت كده


المهم انا مسافره لمدة اسبوع هارجع ان شاء الله يوم 14 /7


مش هاوصيكم يا ولاد على المدونه تاخدوا بالكم منها


عااااااااااااااااااا هاتوحشني


المدونات امانه في رقابتكم يا قووووووم


بجد لو حصل حاجه وانا مش هنا الناس الى معاهم تليفوني يبلغوني


يعنى حد يوزه عقله يقل ادب ولا حاجه


وانا هابقى اتصرف


وخدوا بحس البلوج كله يا اخواتي مش هاين عليا اسيبه


وهابقى اجيبلكم شوية رمل ومايه وصدف وكده على المدونه وانا جايه عشان ما احرمكوش حاجه


وعشان ما اقطعش بيكم يا حلوين انا سبتلكم بوست مع استاذ عمرو بدر


ان شاء الله هاينشره عنده فى مدونة بعبعه قالي هاينزله بعد كام يوم ابقوا شوفوا بقى




فوتكم بعافيه بقى هاقوم اجهز الشنط واحط النمليه على العربيه وامشي


اهيء اهيء اهيء


هاتوحشوني صعبان عليا امشي



يلا مش مهم بقى هاروح البحر واسيبكم (وش مطلع لسانه )

الجمعة، 3 يوليو، 2009

الأربعاء، 1 يوليو، 2009

رسالة من حواء مدونة ست من الصعيد الجواني

تحديث :
حواء عملت اكونت جديد يا شباب
ومدوووووونه جديده بالصلاه على النبى
مبروك عليكى يا اوختشي
وادي لنك المدون
************************************************************************
سلام عليكم
عندي لكم رساله من الاخت حواء صاحبة مدونة ست من الصعيد الجواني
ان فى شخص سخيف سرق الاكونت بتاعها
وفيما يبدوا انه حذف المدونه اصلا
فهي بتبلغكم يعنى ان الاكونت دلوقتي مش معاها عشان مش ضامنه هذا السخيف ممكن يعمل ايه
وكل واحد يخلي باله من مدونته بقى
استرها يااااااارب
واعرفوا ان الى بيسرق الاكونت ده فى الغالب بيدخل من على جهازك من خلال فايرس على جهازك
دايما استخدم الانتى فايرس وحدثه واعمل اسكان كل فتره
استرها يااااااااارب
الى هايعمل كده معايا انا هادعي عليه باقولكم اهو ماليش دعوه بقى