الجمعة، 18 أبريل 2008

21-التاج ده جاني قلت اه يانى

سلام عليكم
ايه موضوع التاج ده كان بيقابلنى برضه فى مدونات لناس كتير وقابلنى الطاقيه بتاعة خيخه لكن مش عارفه هو عباره عن ايه
لكن اظاهر والله اعلم ان لما حد يهديلى تاج المفروض ارد عليه هنا فأنا هاعمل كده ولو انه تاج متعب يا فيس موون
التاج ده جاني من الجميله فيس مون . بس بافكر ابطل اقولها يا جميله خلاص هههههههههه
اتكلم عن نفسي يا لهوي يا بنتى انا رغايه يعنى ما بابطلش كلام تقومي تقوليلى اتكلمى عن نفسك .
ونقول التاج :
أولا:اذكر عشرة اشياء عن نفسك
ثانيا:اختر خمس اشخاص تهدى لهم التاج
ثالثا:لا تهدى التاج لمن اهداه اليك
رابعا:عرف اللى بعتلك التاج انك نزلته عندك
عشرة اشياء ؟؟؟ ايه ده هما كلهم هايطلعوا حاجه واحده فى الاخر .
طب نبدأ بالوحش ولا الحلو ؟؟؟؟ نبدا بالوحش الى نفسي اغيره بجد
اولا : عصبيه جدا جدا تقدروا تقولوا بابقى مجنونه احيانا نفسي ابقى بارده وهاديه شويه عشان انا الى تعبت من العصبيه دي قبل اي حد تاني .
ثانيا : صوتي عالي . مش عارفه اعمل ايه نفسي حد يظبطلى الاوبشنات بتاعة الصوت. بس انا طبقة صوتي عاليا سواء باتكلم اوبازعق او باضحك (الضحك ده بالذات مشكله ) . والصويت بقى وانا متعصبه قدام العيال مشكله اكبر واكبر .
ثالثا : رغايه . اه والله باتكلم كتير زي ما انتم شايفين عايزه ابطل رغي شويه بس مش عارفه ابطل اصله ادمان باين . حتى فى ناس ادمنو الرغي بتاعي برضه لو ما رغيتش يسألونى مالك في ايه ؟ وتلاقيهم كده ما يجلهمش نوم قبل ما ارغي فى ودنهم شويه .
فى حاجات بقى مش عارفه هى عيوب ولا مزايا بس انا بصراحه مش عايزه اغيرها .
رابعا : انا جريئه مش عايزه اقول جدا لكن هو انا جريئه الى حد بعيد لكن مش جرأه رعناء يعنى بعقل مش باحدف نفسي فى الحفره واقول هيه .
خامسا : انا شديده شويه . لا خليها شويتين لكن والله فى الحق يعنى ما اعرفش اطبطب على حد وهو غلطان من غير ما اقوله الاول انه غلطان واظبطه كلمتين جامدين وبعدين اطبطب بقى .
لكن على المستوى العام انا شديده حتى مع الولاد لكن مش قاسيه مع حد ابدا ومش عايزه اغيره لانى شايفه ان الشده دي لازمه ومهمه جدا .
سادسا : اجتماعيه جدا جدا . بحيث انى ممكن مثلا اصاحب واحده فى خمس دقايق وهى تحس انها مستغربه اني باكلمها ازاي وواخده عليها كده ببساطه .
مش عارفه ليه بس هو انا كده اخر مره روحت مع الولاد نادي اول مره نروحه واحنا مروحين بعد 3 اربع ساعات فى النادي كانوا العيال كلهم وامهاتهم بيعملولنا باي بابتسامه عريضه ووديه جدا . هههههههههههههههههههههه.
ومش عايزه اغيره برضه انا مبسوطه كده .
لسه كتير ولا ايه ؟؟؟؟؟؟
سابعا : صريحه جدا جدا . الصراحه الى هى صراحه مش بجاحه . يعنى مش هاقول للاعور انت اعور فى عينه . لانه اصلا عارف انه اعور . لكن ممكن لو لقيته سايق الاستهبال ومش عارف انه اعور او مش حاسس الفت نظره لان تقريبا نظره ضعيف .
اقول الحق لو على رقبتى لكن بقدر الامكان باحاول ما اجرحش حد . لكن دايما اقول ساعات فى جروح لما الواحد ينكشها يبقى كويس عشان بتبقى محتاجه تنظيف وتطهير وتقفل على نضافه .
نيجى للصفات العامه بقى :
ثامنا : باحب اتعلم كل حاجه فى الدنيا مش بالضروره نجحت فى كل حاجه حاولت اتعلمها ( ما حدش يفكرني انى فشلت فى اول جوله فى السواقه وقضيت شم النسيم فى فات فى قسم البوليس بس دي اول جوله لسه لم ايأس). باحب النت اوي عشان امكانية الاطلاع على اي حاجه فى اي وقت . باحب الابداع الفني عموما واسمع الاغنيه الحلوه والنغمه الحلوه والكلمه الحلوه بصرف النظر عن مين كاتبها رغم ان في ناس اغلب اعمالهم بتعجبنى .
تاسعا : علاقتى بربنا بينى وبينه مش هاتكلم عنها . لكن دينى باحاول اعرف الى يخلينى ارضى ربنا ويخلينى استحق اعيش فى خيره ونعمه عليا . وهافضل طول عمري ان شاء الله احاول اعرف واتعلم فى دينى واحاول اعلم الى اعرفهم كلهم الى انا اتعلمته .
عاشرا : واخيرا هيييييييييييه باحب المطبخ جدا جدا اطبخ واعمل حلويات واتعلم الجديد واكل مافيش مانع ( امال باعمل ابر صينيه ليه ) انتظروا قريبا مدونة طابخين ايه النهارده .
يااااااااه كان تاج بجد مرهق ما اتعودتش اتكلم عني . اي حد يعرفنى وعايز يضيف على وصفي حاجه يتفضل وليا حق الرد طبعا .
اهديه لمين بقى هو ده السؤال الصعب فعلا اختار مين ولا مين
بس هاحاول اختار :
نفسي ابعته للبلوجر كلهم وشكرا لكي فيس مون وشكرا للجميع والمهدى لهم التاج كمان مقدما .
تعديل هام فى الموضوع يا قوم فرنسا حبيبتى قالت ان التاج ده جاوبت عليه امبارح خلاص بقى انا مش قادره لازم ابعته لحد تاني غير فرنسا عشان برضه دي فرصصصه ما اقدرش افوتها انا عايزه ابعته للبلوجر كلهم اصلا
ونقوووول نختار مين يا ترى يا هالترى مفروســــه
اعلااااااااان هام
الى هايدخل هنا ومش هايروح يشوف الموضوع الجديد الى فى
رؤيـــه اسلاميـــه متواضـعــه البوست الجديد عن السيده خـديـجـــه بنـــت خـويلــد هانحطه على الكرسي الكهربائي

هناك 26 تعليقًا:

Anonymous يقول...

أوجزتى يا أم مريم أين الرغى ؟
أبو خالد

Anonymous يقول...

اللهم أجعل قوتى مثل قوة عدوى لتكون
الغلبة للحق و حده..
سعيد أنى أول و ثانى تعليق
أبو خالد

فرنسا هانم يقول...

اه
فرصه وضاعت منى
انا متشكره على تمرير التاج
لكن انا جاوبته امبارح
مش بقولك فرصه وضاعت منى

صبرني يارب يقول...

فرنسا ايه ده مين سبقنى خلاص لازم ننزل حد مكانك ده عايزه البلوجر كلهم يجاوبوه عشان اتعرف عليهم اكتر

وانتى نورتي يا جميل

صبرني يارب يقول...

تسلم يا ابو خالد ربنا يكرمك

وانا كمان سعيده بتنويرك وتشريفك المدونه

ahmed_k يقول...

انا شايف ده مش تاج بس دي جلابيه شامله الطاقيه والشووووووز ايه ده كله دى اعترافات وتحليل شخصيه وحاجات كتير , ويا ريت كل شخص يضع امامه مميزاته ويحاول ياكدها ويضيف عليها وعيوبه ويحاول يعالجها يعني حاسبوا انفسكم قبل ان تحاسبوا . وعايز اهنئك التعليقات علي ما تكتبيه بقت ما شاء الله وربنا يزيدك وعلشان كده بقيت اقرا مدونتك ولا اعلق ولكني لم افوت اي بوست كتبتيه مع خالص التقدير لكي يا ام مريم والسلام ختام

صبرني يارب يقول...

استاذ احمد

الله يكرمك يارب والبركه فيك .
لا لا اوعى تقول مش هاتعلق تاني كفايه نورك علينا يا استاذنا .

وانشاله نشوفك دايما باذن الله بخير وعافيه

مدحت محمد يقول...

مبروك التاج
دمك زى العسل

صبرني يارب يقول...

شكرا لك يا محمد وانت نورت المدونه وصاحبتها والتاج لايق عليه ولا ايه ؟؟
ولا اروح اتشاكل مع فيس مون الى دبستنى فيه .

FaceMoon يقول...

اية الجمال دة كلة عشرة على عشرة مية مية اجابات كاملة متكاملة
هههههههه وبعدين كل دة وتقولى دبستك دة انتى كنتى كاتمة فى قلبك وساكتة وبعدين انا اديتك فرصة لممارسة هوايتك فى الرغى وبعدين انا مقدرش اتشاكل معاكى اصلا انتى عايزة تتشاكلى اتشاكلى لوحدك بقى عشان انا بحبك خالص
عقبال التيجان التانية ان شاء الله
بهنيكى على البوست
تحياتى

صبرني يارب يقول...

فيس مون يا قلبي انا كمان والله باحبك كده هانعيش قصة حب وهاتي بطاقتك بقى عشان اوريها لجوزي ههههههههههههههههه

ايه ده شكلي طالع انى كنت كاتمه فى نفسي ؟؟؟ يمكن بس انتم عارفين انى مش باكتم فى نفسي ابدااااااا انا من فتره قريبه قررت انى اقووووووول كل حاجه لاي حد ما دام على حق
ساعات ناس ما بتقبلش الحق بس عاااااااادي باقولهم شوفوا حد غيري يضحك عليكم .بيتكسفوا بقى ويسكتوا .
تعيشي وتنورينى دايما يا جميله

صبرني يارب يقول...

أحمد علي

يمكن لو رديت عندك كلامي مش هايعجبك عن الاخوان المسلمين .

ولا غيرهم عاجبنى ما تفكرش انى تبع حد تاني لا خالص انا كده لوحدي اتركوني وشأنى مع الله .

وبعدين مش عارفه ليه مش استريحت يا جماعه للدعوه بالشكل ده عن مدونه تانيه من حتى السلام عليكم على اصحاب المدونه التى انت عليها وعموما نورت واكيد لو عرفت اجي مدونتك هاجي بس ما تبقاش تزعل من كلامي

أم أحمد يقول...

بصي ياقمر ... أنا هاجاوب التاج بالنيابة عن مفقوعة لاني انا وهي واحد ... خليها هي موحدة الزي

صبرني يارب يقول...

ام احمد

اوك نحن نؤيد توحيد الزي ههههههههههههههههههه
نورتيييييييييييي

خايف من الحقيقة يقول...

ان هجاوب التاج بس انا عندي سؤال
انت قلتي هتقولي الصفات السيئة صح
طب هي فين؟؟؟؟

Crystal Lobna يقول...

قريت البلوج كلها و حبيتها و عملتها Bookmark كمان عشان أنا خلاص أدمنت رغييك .
و أن شاء الله أنا حاكون موجوده على طول

صبرني يارب يقول...

خايف منور والله

الوحشه قلتهم والله الى انا اعرفهم فيا يعنى .
العصبيه والصوت العالي والرغي الكتير اوي ده

مش عارفه بقى دي عيوبي من وجهة نظري لكن أكيد الى بيتعاملوا معايا لهم وجهة نظر تانيه .
ومش هاقدر اقولكم راي الناس فيا تحديدا لان الناس منقسمين حولي ههههههههههههههههه
يعنى فى ناس رايهم انى مفتريه وناس بتقول انى طيبه اوي مش عارفه اصدق مين فيهم .
وناس بتقول انى طالعه فيها وناس تانيه برضه بتقول انى متواضعه وهكذاااا الله اعلم بقى انا على حق ولا لا .

وانا مستنيه اشوف التاج بتاعك يا استاذنا

صبرني يارب يقول...

كريستاله

حبيبتى قريتى البلوج كله مره واحده ؟؟؟؟؟

ده انا مااقدرش اعملها انا هههههههههههههههه
وادمنتى رغيي كمان وبعدين بقى اظاهر انا كلامي صح ان فى ناس ادمنت الرغي بتاعي خايفه يدخلوني ضمن حملة حمايه هههههههههههههههههههه.

يا كريستاله انتى تشرفينى وتنورينى يا جميل .
والف شكر لك على الاطراء الجميل ده

بت خيخة وأي كلام يقول...

انا جيت اهه علشان اعرفك انى جاوبت على التاج عندى
وعلشان كمان
اقولك انك فطستينى على روحى من الضحك بحكاية اول جولة تعليم سواقة قضيتيها فى القسم
دى بصراحة اجدد حاجة انا سمعتها
هههههههههههههههههههههه

المهم يا جميل الف شكر على التاج ومردودالك فى الافراح ان شاء الله
تحياتى ليكى
اختك خيخة

صبرني يارب يقول...

خيخه
كده يا خيخه بتضحكي عليااااااا

هههههههههههههههههههههههههههههه

ده كان يوم مشهووووود كان تاني مره اطلع بالعربيه لوحدي من غير رضا وكان رضا فى الصين كمان شوفتوا الحلاوه .

كان يوم لطيف جدا رغم الاحترام الكبير الى عاملوني به فى القسم مش عارفه ليه شكلى محترم تقريبا
الا ان كان فى ناس فى الحجز لمحتهم وانا خارجه من القسم ستات كمان شكلهم لطيف جدا جدا

عملت حادثه وانا خارجه من كوبري وفى ملف وعلى الاولاني ههههههههههههههههههه

بس ايه رجعت من القسم سايقه برضه العربيه ولا همني
هاروح اشوف التاج بتاعك اهو يا خوخه

وهاوريكى على ضحكك عليااااااااا

Ali-7ob يقول...

أم مريم
اول زيارة لمدونتك الجميلة
بس كله ده رغى انا صدعت هههه
بس انتى شبه خيخة اوى ولا خيخة هى اللى شبهك
على العموم انتوا فيكوا صفات كتيرة مشتركة حاسيتها اوى من البوستات القديمة
بس انا ليا سؤال ليكى يا ام مريم
معلش استحميله وانا لا اقصد التدخل فى شئونك والله
ليه الست بتكون متجوزة وعندها عيال ومعندهاش وقت تعمل اى حاجة فى الدنيا حتى الحاجات البسيطة
ومع ذلك بتعمل مدونة ومش كده وبس لا كمان بتهتم بيها اهتمام غير عادى
الاجابة:
1-لشعورها ان المدونة نوع من انواع تحقيق الذات
2-للحصول على الاهتمام من الاخرين لعدم شعورها بالاهتمام ممن حولها
3-للرغى وخلاص وتفريع طاقة كلامية مكبوتة
4- لاسباب اخرى
تحياتى ليكى
على حب

خايف من الحقيقة يقول...

والله هجاوب
المشكلة اني عايز اركز ومشغول لدرجه لا يمكن تصورها انا يوميا بخرج الصبح 6 صباحا
ارجع البيت 9 مساء ابص على الولاد وانااااام

اصلي عقبال عندكم اترقيت وبدل ما اكون مدير من بتاع روح وتعالى
عيني طالعه ما بين تطوير للقسم وتدريب الزملاء ودراسه الوضع العام وايجاد حلول
بس مبسوط
لاني شايف نتيجة تعبي قدامي في حياتي وولادي

الحمد لله

هجاوب في الويك اند

ممكن؟؟

صبرني يارب يقول...

ali-7ob

أولا نورت المدونه .
وخيخه دي حبيبتى انا يشرفنى اكون شبهها.

اما بالنسبه لاسألة حضرتك :
أولا انا الحمد لله متجوزه اه لكن باعمل كل حاجه فى البيت بنفسي فيما عادا باجيب واحده كل اسبوع او اثنين تنضفلي البيت لان شقتى كبيره ولاسباب تانيه كتير .
طبعا هاتقولي بتعملي ايه بقى كتير اوي اوي ناقص حاجه واحده انى ازرع فدان ارض قدام بيتنا واربي فيه فرختين ومعزتين وجموسه حلوب وابقى كده عملت اكتفاء ذاتي وحياتك .
مش هارغي كتير فى الموضوع عشان حاجة ماتهمكش ولا تهم باقي الناس .
لكن الحمد لله لا حاسه انى مقصره فى حق حد ولا عمر حد اشتكى مني ولا على المستوى العيله الكبيره حتى بالتقصير الحمد لله ربنا موفقنى .

ما عنديش وقت اعمل الحاجات البسيطه الي هي ايه ؟؟؟
ما طول عمر الستات بيبقوا ستات بيوت وعاملات كمان وبيتفرجوا على التفزيون ومتابعين مسلسلات ؟؟؟
انا ماليش فى المسلسلات طيب .
يا راجل ده فى واحده مره قالتلى انها متابعه حوالي 5 مسلسلات وده وهى موظفه
وفى رمضان كانوا 16 مسلسل

وباهتم بالمدونه كتير ازاي يعنى ؟؟؟
بالعكس انا كان نفسي اكتر اسرع من كده انا ساعات البوست بيقعد اسبوع على ما انزل واحد جديد .
كل الحكايه انى باكون فاتحه الكمبيوتر اغلب اليوم لاسباب كتيره وكل ما اجي ناحيته بابص على المدونه وارد على الناس

وبالنسبه لاختياراتك .
مافيش سبب خااااالص كده حلو ؟؟؟

اشمعن النت والتدوين هو الى محتاج سبب ؟؟؟
ما الناس طول عمرها بيتفرجوا على التلفزيون ويرغوا فى التليفونات من غير سبب .
اقرا البوست الى فات وانت تعرف اجابات ا وسع من كده على كلامك

ناس ايه الي تهتم بيا وكبت ايه ؟؟؟
مش انا خاااااااالص انا عايزه الناس تنساني شويه مش راضيين .
شكرا لك واسفه على التطويل

صبرني يارب يقول...

الله يعينك يا خايف ويقويك ومبروك الترقيه يا باشا وربنا يكتر من امثالك

وبراحتك فى اي وقت ترد كفايه تشريفك لنا بقبول التاج

mazlomen يقول...

مدونة هايلة واكثر من رائعة
ربنا يوفقك في اختيار موضيعك وحلو البوست اللي فوق بس هو للستات بس فمردتش اعلق فيه

صبرني يارب يقول...

مظلومين

شرفت المدونه كلها

علق مكان ما تحب

والبوست التاني للستات بس زي بعضه احنا فتحناه بقى وامرنا لله ما قدرناش عليهم والامن زي ما انت عارف الايام دي مش عشان ينفذ القانون .
عشان حاجه تانيه
نورت