الاثنين، 21 أبريل 2008

22- وشوشة ستاتيت (الجزء الاول )


السلام عليكم ورحمة الله وبركاته

ازيكم يا ايها المدونين والمدونات والزائرين والزائرات بس خلاص كده نص القاعده تطلع بره .

اه الرجاله من فضكلم يطلعوا بره عشان الموضوع ده من اسمه اهو زي ما انتم شايفين موضوع بتاع الستات .

لا البنات خليكم ما انتم ستات المستقبل .

يلا شكر الله سعيكم يا رجال روحوا اقروا موضوع الرؤيه الجديد صلة الرحم يلا نشوفكم بعد شويه

مش تقطعوا فى نفسكم بقى بعد شويه هابقى اعملكم موضوع ونطلع الستات بره انا حقانيه على الاخر .

نبدأ وشوشه بقى رغي برضه بس وشوشه يعنى بالراحه (ولا كلمه هاوطي صوتي مش عشان قلتلكم ان صوتي عالي بقى )

شوفوا بقى يا ستاتي يا حلوين من خلال حياتي الطويله العريضه ورغيي العظيم مع ستات كتيير هاقولكم بقى على خلاصة افكاري انتم حبايبى ما اعزوش عليكم .

ندخل فى الجد بقى . امنية حياتي فعلا اشوف المتزوجين كلهم او حتى معظمهم سعداء ببعض ومطبقين الايه : وجعلنا لكم من أنفسكم أزواجا لتسكنوا اليها وجعلنا بينكم مودة ورحمه

4 كلمات هنا ركزوا فيهم ( من انفسكم - لتسكنوا - موده - رحمه ) بس ده ملخص الحياه الزوجيه الى المفروض تكون على اختلاف ظروفها ده الاساس يعنى .

فى حاجات صغيره يا بنات احنا بننساها او بمعنى تاني بنتاجاهلها هانقول شوية مبادي كده صغننه ويارب تكون مفيده .


شايفاااااااااااااااااااااك اطلع بره قلنا النهارده القاعده ستاتي .


أولا : الايثاااااار : الايثار ده مهم اوي فى اي علاقه وديه اصلا بين اثنين مش بس المتزوجين (الايثار :تفضيل الطرف التاني وتقديمه على نفسك ) . ده اساس العلاقه متفقين ؟؟؟

ثانيا : الكلام : ايوه كلام لازم تتكلموا مع بعض كتير فى كل حاجه واي حاجه ما تخليش ابدا السلك يتقطع خليكى دايما اون لاين معاه اتكلموااااااااااااااا فى كل حاجه كل حاااااااااااجه .كمان لو حبيتى تسمعى كلمه حلوه ما تسنهوش يقولها عشان غالبا مش هايقول قولى انتى كلمه حلوه عشان تسمعى زيها .وما تنسيش اهمية ساحرة القلوب

ثالثا : المشاركه : مافيش حاجه اسمها ماليش دعوه او مالكش دعوه من اول ما تعرفي الراجل ده عايزاكي تلزقي فيه ولا اللازقه الانجليزى . ما تسبيهوش ابدااااااا اقولك بلاش الانجليزى . الزقى فى رقابته زي القراضه (مش عارفه هى ايه بس بيقولوها كده ) اعرفي كل حاجه عن الشغل عن اصحابه عن اهله عن الناس الى قابلهم فى الشارع

وانتي كمان قوليله كتير عن كل حاجه عملتيها وبتعمليها اي وقت ما تبقوش مع بعض فيها حاولوا تعيشوه برضه مع بعض .اتفرجوا على الماتش مع بعض واحكيله بعد الماتش على الموضه الجديده فى الميك اب والبرنامج الى شوفتيه عن طريقة عمل البتنجان المخلل .

حتى لو كلامه قليل شدي الكلام من بؤه واربطي طرفه على صباعك وشدي بقى كلمه كلمه يا حلوه .

وتهتمي بكل حاجه تهمه شغله امه اهله اصاحبه الماتش البرنامج الى بيحبه كل حاجه هو بيحبها لازم تشاركيه فيها وتحاولي كمان انه يشاركك اهتمامتك . من غير حاجه هو لو حس مشاركتك له هايبقى كده معاكي .

من الاخر ترشقي مناخيرك فى حياته ما تطلعيهاش ابدا بس من غير ما يحس عشان ما يتخنقش منك خليكى ذكيه .

رابعا : تعيشوا مع بعض مش تبقوا اغراب فى بيت واحد . تاكلوا مع بعض (تستنيه لما يرجع ويستانكي ). تناموا فى وقت واحد وفى مكان واحد (مش مهم لما يصحى من صوت العيال عااااااااادي) . وتحاولوا تصحوا فى وقت واحد . مش جايلك نوم بررررررضه ادخلي نامي هو كده (مش انا قلت تلزقيله ؟؟؟) ما تتعبونيش بقى .

خامسا : ايااااااك وانك تشتكيه لاهلك ولا تقولي عنه اي حاجه مش تمام وهو قاعد قدام اهلك ولا اهله كمان بس قدام اهلك الطامه الكبرى واه لو حس انك بتشتكى لمامتك بقى منه موال تاني وهايكره امك اصلا ويحس انها سبب كل المشاكل .

سادسا : اياااااك والخصام الطويل . الخصام اقصى مده له 12 ساعه بعدها اموتك لو ما اتصالحتوش وتتفقوا على كده رسميا . مافيش نوم وانتم متخاصمين . البعد بيولد الجفا ومافيش حاجه بتتنسى . اتكلموا واتعاتبوا فى يومها وصفوا الجو واتفقوا تنسوا واتعودوا تعتذروا لبعض انتم الاثنين . اعتبروا ده مبدأ واتفقوا عليه فعلا مش ضمنيا .

يا سيدى قلنا بررررررررررره هاعملكم موضوع لوحدكم بقى

سابعا : تهادوا تحبوا . ما بيجبلكيش هديه ؟؟؟؟ عادي مش مهم . يوما ما هايتكسف ويجيب لما يلاقي شكله وحش . اتصلبي واعملى مناسبه . عيد جوازك . عيد ميلاده . فى مثل هذا اليوم خطوبتنا ولا اول مره شوفتك فيها ولا اول مره بربشت وانا باكلمك كده يعنى اي حاااااجه .

مش لازم هديه يا ستىىىىىىى احتفلي انتى انشاله تعملي طبقين كستربالشيكولاته اي حاجه .

قدامك بتاع ست سبع سنين على ما يبدأ يتحرج بقى ويبقى يجيبلك هو هديه فى المناسبات دي ده لو افتكرها يعنى .

ثامنا : اياك ثم اياك تنتقضي اهله وبالذاااات ماماته خصوصا فى اول الجواز هو اصلا عنده استعداد فظيع انه يصدق انك ما بتقبليش اهله ومش طايقاهم . فلو عندك كلمه حاولي تبلعيها وتقولبيها بحيث تبقى مش هجوم مباشر وبرضه خليكى ذكيه .

تاسعا : خليه دايما يحس انك محتاجه له فى كل حاجه ما تقدريش تستغنى عنه وكونى كده فعلا ده منتهى السعاده عنده وعلى العكس كمان خليه برضه يحس انه محتاجلك دايما فى حياته كلها حتى شغله . حاولى تفهمى فى شغله وتتكلمى فيه .مخك مهم اوي شغليه.
ده غير طبعا انك لازم تمدحي مجايبه (ما تقوليش ياما جاب الغراب لامه ) قولي تعيش وتجيب يا ابو نسمه كده يعنى .
خليه دايما يحس انه مجهوده مثاب عليه . حتى لو جاب الفاصوليا زي الكاوتش لما يجي ياكلها هايعرف الحقيقه وابقى ساعتها علميه بقى يشتريها ازاي . هايقبل الكلام ماهو بياكل كاتوش ياا مي .

عاشرا : لازم تكونى كل الادوار والشخصيات خليكى هاديه احيانا وعاصفه احيانا ومنظمه ومهرجله , عقله ومجنونه, كبيره وصغيره , جميله ولا, خليكى مراته واخته وحبيبته وصاحبته وامه ومديرة اعماله وسكرتيرته وكل حاااااااجه كل دور له وقته خليكى ذكيه. عادي ممكن تكوني كده ما تقوليش ازاي .

وقبل كده ده يا ناس احنا لما نكون داخلين على جواز نبقى داخلين على حياه سلميه مش حرب ولازم يكون فيها غالب ومغلوب لا احنا عايزين نعيش كويس يا ناس ما تعذبوش نفسكم .

وعلى فكره فى حاجات مهمه كتييييييييييير اوي لسه عايزه اتكلم فيها لكن المره دي كفايه كده واعتبروا دي اول حلقه من الوشوشه .


سوده بنت زمعه

زوجة الرسول عليه الصلاة والسلام تعالوا نتعرف عليها اكتر فى مدونتي الاخرى

رؤيه اسلاميه متواضعه

هناك 38 تعليقًا:

دكتور حر يقول...

طلعت منها

عوضي على الله

وربنا عالمفتريااااات
:))

حنين القلب يقول...

السلام عليكم
بجد بوست هايل واحسن حاجه انك طلعتى الرجاله بره علشان مش يفهموا اللى احنا نويين عليه.
انا بعمل تقريبا 80% من اللى انتى بتقولى عليه يعنى الهدايا الاتنين بنجيب لبعض الكلام فى الشغل والاهل والبيت وكله كله بنتكلم والحمد لله بس مش بحب ارشق مناخيرى جامد ليتخنق منى ولا حاجه.بس هسمع كلامك من هنا ورايح وارشقها وكمان بالنسبه لامه احسن حاجه انك تحبيها حتى لو كانت وحشه لانك بحبك لامه هتخليه هو يحبك ومش تتصنعى او تمثلى انك بتحبيها لالالا حبيها بجد مستحيل تحبى حد ومش يحبك ممكن تضرب فيكى ابر ممكن تقومه عليكى تقولى معلش اهى زى امى ولازم استحملها وعلى فكرة انا بحب حماتى جدا جدا لانها هى اللى جابت ليه جوزى برضه والنبى مش من حقى احبها؟؟؟
يلا طولت عليكى سلالالالام

mohamed يقول...

أولا أنتى خطيرة على جنس الرجالة جدا عارفة لية؟ لانك بالنصيحة الذهبية
الى قلتيها دلوقتى حتخليهم أسرى حرب
وكلهم هيفقدوا الارادة والماضة ويدوب
حبا وتقديرا للهانم الى معاة ويبقة
مش قادر يشوف غيرها ولايسمع غيرها ولايحب غيرهاولو مش هيا قدامة هيبقى زى العيل التايه الى بيدور على أمة.
ثانياأنا عايز ألفت نظر بنات حوا الى ضرورة تحديد نوع شخصية الرجل من الاول
فمثلا الرجل الانانى الذى تعود على الاخذ فقط ويعتبر نفسة محور الكون وأنة لة كل الحقوق ولاحق لاحد غيرةلايمكن معاملتة مثل الرجل المعطأ الشهم الذى يعتبر الواجب والقيام بة أصل من اصول حياتة مثل الاكسجين الذى يتنفسة

عموما كفاية كدة ولو عايزة تسألىأنا موجود

بس هقولك حاجةأنا علشان فاهم كويس
عملت فى نفسى مقلب جامد عارفة اية هو؟

متجوزتش

يلا سلام!!

Ali-7ob يقول...

ام مريم
اولا كده وقبل اى شىء لازم نتفق على حاجة ان انا قريت البوست كاملاوهاقرا
الجزء الثانى لما ينزل ان شاء الله
تقولى بقى للستات فقط للرجالة فقط ماليش دعوة
اصل بحب النصائح دى جدا
بحس ان الدنيا حلوة كده ومافيهاش مشاكل وياسلاااااااام
بحس انى بتفرج على فيلم خيال علمى
هههههه
بس بجد معلومات ونصائح حلوة بأحييكى عليها
الا انى معترض على التدخل الزائد فى حياة الزوج بدافع الاهتمام
الراجل برده بيحب يحس انه حر ومش مقيد ولا ايه
تحياتى ليكى وفى انتظار الجزء الثانى
على حب

أبو خالد يقول...

أم خالد/
تحياتى
أنا مش هعلق أنا جاى معى كرت دعوة
لتشريف حضرتك لى فى المدونة الوليدة
مطلوب تصفيق حاد و تشجيع

صبرني يارب يقول...

دكتور حر

بص انت ممكن تقراها بس ما تقوليش انك قريتها ههههههههههههههههههههههه

انا عامله حساب الاجزاء الى جايه مش عارفين هانقول ايه فيها مش مضامنين .

نورت يا دكتور

صبرني يارب يقول...

الاخ محمد

انا خطر برضه طب وايه يعنى لما يبقى من غيرها تاييه ما هو ده المطلوب

وبعدين هو الواحده لما تكون راشه فى حياة جوزها وهو بيحبها وهى بتحبه يبقى يتخنق منها ليه ؟؟ هو فى حد يتخنق من نفسه ؟؟
وبعدين لما يتخنق شويه احسن من انهم يبقوا اثنين مالهمش دعوه ببعض .

وبعدين ما اتجوزتش ليه انت الخسران
عشان تعرفوا ليه البنات مش بيتجوزوا

الرجاله اهم خايفين من الجواز مش عارفه امال شنبات ايه بقى الى عمالين يبروموا فيا يا بووووووووي
ههههههههههههههههههههه
نورت يا محمد

صبرني يارب يقول...

حنين القلب

نورتي يا جميل

بصي هو انا ما قلتش ما تحبهاش لا لا اطلاقا بس حتى مامتك الى هى مامتك انتى ممكن تختلفى معاها فى الراي ويجى وقت تقولي ماما غلطانه عملت كذا وكذا مثلا .ولو بينك وبين نفسك
انما بقى حماتك انصحك ما تفكريش تنتقضيها فى اول كام سنه كده اصل بجد بيبقى عنده استعداد يصدق انك بتكرهيها حتى لو ما كنتيش كده .
وعموما انا كمان باحب حماتي وحماتي بتحبنى زي ولادهاوزي ما انتى بتقولي كل حاجه تهون ما دام خلفت لنا الحاج رضا يعنى .
ولما ترشقى وتلزقي يا جميله خليكى لازقه حنينه يعنى وهو مش هايتخنق ولا حاجه مالكيش انتى دعوه .
وتابعى الاجزاء

صبرني يارب يقول...

ابو خالد

انت تشرف بتعليق ومن غير تعليق

انا روحت المدونه والف مبروك يا استاذنا

صبرني يارب يقول...

ali-7ob

ماشي بس الجزء الجاي من الوشوشه يمكن نمنع دخول اي حد ولو علق نقعده نفس الكرسي الكهربائي بتاع كل مره .

وعلى فكره انت شكلك مش متجوز . لو متجوز كنت تعرف ان الراشقه اللطيفه الجميله دي مش تخنق ولا حاجه .

بالعكس دى مشاركه كل الناس بتفتقدها ما حدش ابدا يكره انه يكون له ونيس فى كل حاجه ومش اي ونيس حضرتك .

ونووووووووورت

فرنسا هانم يقول...

ملحوظه
وانا داخله لقيت رجاله بيقرواء من بعيد
نزلوا الستاره عيب كده
وشكرا على النصايح الغاليه
بس المفروض الست تشوف حماتها شويه مش فى اول الجواز بس
لا طول فتره الاقامه الزواجيه

صبرني يارب يقول...

فرنستي حبيبتى

مش انا كل شويه اقولهم بره ماحدش يا اختي بيسمع الكلام .

انا ما اقصدش تشوف حماتها ولا ما تسمعها اول الجواز بس

لا لا انا باتكلم على كلامها مع جوزها عن حماتها . هو ليه ما حدش فاهم الموضوع ده ؟؟؟

لما يكون عندك تحفظات على حماتك وده وارد طبعا يبقى بلاش تقوليها ابلعيها احسن خصوصا اول الجواز
ممكن بعد مثلا سبع ولا عشر سنين مثلا تبقى تتحفظي كده من بعيد لبعيد انما فى اول الجواز اياك يا حلوه .
هايصدق على طول كلام امه واخته ان مش معقووووووووول مراتك هاتحبنا وانك مستقصداهم وبتوحيه عليهم .
مش كل الناس كده لكن اغلبهم

نورتي يا فرنسا

FaceMoon يقول...

الله الله ابدعتى بجد
مش عارفة اقول اية انتى عملتى دليل كتبتى فيه كل الاسباب لنجاح الزواج
وعلى فكرة محدش طلع وكلة قرا البوست من جمال الكلام الرجالة مش بيسمعوا الكلام المفروض كنتى تقوليلهم البوست فيه سم قاتل لا تقرأ هذا البوست عشان يخافوا ويسمعوا الكلام
تحياتى وابدعتى

mony يقول...

يا هلا وغلا يا ام مريم

ايه الدرر المصونة ديه يا بنتي

انا بأه في واحدة من قرايب جوزي لما جات تباركلي لما اتجوزت(من 6 سنين) قالتلي الكلام الجميل ده كله ومن ساعتها بنفذه بحذافيرة ربنا يجعله في ميزان حساناتها و في ميزان حسناتك

مستنين الجزء الثاني

ahmed_k يقول...

انا مش حكتب تعليق- بس هو الموضوع عن ايه؟

صبرني يارب يقول...

فيس مون الجميله

حبيتى ربنا يكرمك وبعدين احنا ننبه انهم يخرجوا وهما وضميرهم بقى لكن الجزء الجاي ان شاء الله هانوقف عسكري على الباب .

صبرني يارب يقول...

موني

نورتي يا جميل عود حميد

كويس اوي ان فى حد بيقول الكلام ده غيري لعروسه لسه فى مقتبل حياتها .

ده الواحد بيسمع تعليقات سخيفه جدا
واحده تقولك عيشيلك يومين حلوين قبل ما يبدأ الهم
والتانيه تقولها اتفقى معاه من الاول يديكى مصروف عشان تعمليلك قرش لواحد

والى تعبر لها عن مدى الشقاء الى مستنيها بعد شهر العسل .

والى تقولها فرحانه ومنشكحه على ايه بذمتك وتحسسها انها قليلة الادب عشان فرحانه انها اتجوزت .

ومافيش مانع لو تقولها خلى بالك ما تبقيش خايفه زيينا بينيله العين البنفسجي من دلوقتي بدل ما يركبك هو واهله .
وتبوظ الجوازه بقى والحياه كلها بالافكار ا لسوده دي .

صبرني يارب يقول...

استاذنا احمد

نورت . الموضوع زي بعضه بقى اقروه المره دي بس المره الجايه كلمتى لا ممكن تنزل الارض ابدااااااا .

رئـــــيسـة حزب الأحلام يقول...

السلام عليكم
انتى لية طردتى الرجالة ماخلى الكل يسمع النصايح دى وتحياتى

صبرني يارب يقول...

رئيسة حزب الاحلام

انا باهزر بس والله وبعدين هما ما بيسمعوش الكلام اوي كده يعنى دول مزاج عندهم يخالفوا الستات الراي

ونورتي يا جميل

la3lahakhier يقول...

مااااااا شاء الله ايه ده كله
اول زيارة بس بجد مدونتك تحفة
بصى بقى مش عايزين نقطع على بعضيتنا داحنا وليات اه
هههههههههه
كل التحية اختى الكريمة

صبرني يارب يقول...

لعله خير

نورتي يا جميل والله

نقطع على بعض ازاي بس ده احنا هانوصل على بعض ان شاء الله
حزب الستات يا يعيش

la3lahakhier يقول...

ههههههههه
الف مرة يا ست الكل
كل التحية حبيبتى

خايف من الحقيقة يقول...

ان اسف جدا فضولي خلاني ادخل اقرا وانا مش مدعو
ولساني هيخليني اعلق واكشف نفسي
بس بجد اسلوب رائع في شد الانتباه ومستني الباقي

سوري

مش مستني الباقي اصلا انا مقرتش الاول
هو انا فضولي

لا طبعا

صبرني يارب يقول...

خايف من الحقيقه

نورت والله فضول ايه بعد الشر .

شكرا على الاطراء ونورت .

وفينك الويك اند خلصت وما شوفناش جديد ولا الى على على بقى ومش هانشوفك الا كل شهر مره ولا ايه
ربنا يوفقك

الباحث عن الحقيقة يقول...

البوست بتاعنا هينزل امتى
بقى كده بتنصحيهم وتعرفيهم السر
يعني مش هنلاقي حجة نطفش بيها من البيت ولا ايه
طب واللى عايز يتجوز تاني يتلكك يعني
وطب ولما الست تحس ان جوزها بيتلكك تعمل ايه
تعمل بتنجان محشى بقى مش مخلل
هههههه
سلامات

صبرني يارب يقول...

باحث

اها اصل انا كده ما يتبلش فى بؤي فوله على طوووووووول .

والبوست بتاعكم حاضر اول ما افضى هانزل البوست بتاعكم قبل الجزء التاني كمان ولا يهمك يا باشا .
بس ادعيلى افضى

mayada يقول...

انا قايمه نايمه في المدونه دي البوست
ده نزل امتي خياااااااااااااااانه
يام مريم
كلام جميل بس مين يسمع مين يقرا مين
يكتب
كله عمال يشخبط ياامك مريم
تسالي بتشخبطوا ليه يقوا
ظروف الحياه الايام اللي احنا
عيشينها هم العيال الناس مخنوقه
وغظب عن عنيها مش عارفه تعيش مبسوطه
تحياتي مستنيه البوسط التاني
بس ابقي قولي قبلها عشان اجيب الامن المركزي وامن البلوج

صبرني يارب يقول...

مادي يا عسل والله انا ما انا نفسي مش عارفه نزل امته
ولا عارفه اصلا انا باكتب ازاي فى الوضع الى انا فيه الحمد لله

ماهو يا مادي الى انا باقوله ده لتخفيف ضغوط الحياه والله .
عارفه لما يكون طول النهار ماشيه على شوك وفى الاخر تلاقي سرير ريش نعام تنامي عليه ممكن تستحملي الشوك طول النهار املا فى ريش النعام .
انما لما يبقى كل شوك يبقى مالهاش نهايه يبقى مالهاش مبرر للعيشه اصلا .

زي ما تقولي كده لازم نطري على قلبنا يااختي عشان نعيش هههههههههههههههههه
نورتي يا جميل

سلوى يقول...

أولا : الايثاااااار
ثانيا : الكلام
ثالثا : المشاركه
رابعا : تعيشوا مع بعض
سابعا : تهادوا تحبوا
ثامنا : اياك ثم اياك تنتقضي اهله
الحاجات دي مشتركه بين الطرفين .. مش واحد يبقى عنده إيثار والتاني أناني
مش واحد بيتكلم والتاني تمثال
مش واحد بيشارك والتاني في عالم تاني
مش واحد بيفتكر ويهادي والتاني زهايمر على طول
مش طرف بيحترم التاني وأهله والتاني مش يعرف يعني إيه احترام أصلا
لذا أقترح على حضرتك تفتحي الباب علشان الرجاله تخش أهي تسمع برده وتستفيد .. بعد إذنك طبعا
عاشرا : لازم تكونى كل الادوار والشخصيات
مش صعب على فكره
الصعب إنك تلاقي اللي يستحق إنك تعملي كده علشانه

*****************
وقبل كده ده يا ناس احنا لما نكون داخلين على جواز نبقى داخلين على حياه سلميه مش حرب ولازم يكون فيها غالب ومغلوب لا احنا عايزين نعيش كويس يا ناس ما تعذبوش نفسكم .

الله ينور عليكي .. قلتي أحلى كلام
فعلا المسأله مش غالب ومغلوب
دي سكن وود ورحمه
ثلاث كلمات فيهم كل شئ .. وعلاج كل شئ .. وطريق كل شئ طيب
زي ما ربنا قال
عفوا ع الإطاله

صبرني يارب يقول...

سلوى
اولا نورتي المدونه

ثانيا لو كان صبر القاتل على المقتول يا سلوى

الفقره الاولى الى انتى قلتيها دي انا بالفعل كاتباها فى البوست الجديد فعلا بالاضافه الى شويه نقط بعدها والبوست الجديد موجه للرجاله .
وانا بس باقول للستات بس باهزر معاهم وهما عارفين وقروه كلهم

انا ما قلتش ان طرف واحد يعمل كل حاجه والتاني لا
لكن المشكله ان الى بيحصل ان فجأه يكف الطرفين عن عمل اي شيء يقربهم من بعض وفضل كل واحد يستنى التاني وساعات لما طرف منهم يبدأ يحس للاسف بجمود التاني فيرجع فى كلامه ويستمر الجمود والجفاء .

أما عن صعوبة انك تلاقي حد يستاهل . فأنا عندي قناعه والله اعلم بصحتها من عدمها . وهى ان سبحان الله تعالى لا يظلم احد ابدا . وان كل واحد بياخد الى يساويه نسبيا فى المزايا والعيوب .

عشان كده دايما انصح الى خايف من انه يختار غلط اقوله خليك انت الاول كويس وانت ان شاء الله ربنا يوفقك لواحده كويسه .
وشكرا لك يا سلوى ونورتي
والبوست الموجه للرجاله تحت الانشاء عشان كل واحده تجيب جوزها فى ايدها المره الجايه .

canary يقول...

بس يا حبيبتى انتى مش شايفه انى لوفضلت لزقاله اوى كدة زى ما نصحتينى ممكن يرمينى من الشباك؟؟
انا معاكى فى ان الزوجه لازم تكون دبلوماسيه وذكيه ومتجبش سيرة اهل جوزها نوهااائى
بس حكايه اللزقه دى . شويه يعنى .
بصى امرى لله انا هنفذ كلامك اللى انتى قولتيه كله
بس هطلب منك خدمه واحدة بس
ابعتى العريس لو سمحتىىىىى

سلوى يقول...

يا عزيزتي أنا عارفه إنك بتهزري
لما قلتي إن البوست للستات بس
بدليل التعليقات الرجالي

أنا بس قصدت إن الكلام ده موجه للإتنين
مش ينفع نقوله لحد وحد لأ

يعني معروف إني ديمقراطيه تعسفيه
هههههههه

يعني لازم كل طرف يعرف إيه له وإيه عليه
بما يرضي الله

*************

أما عن صعوبه إننا نلاقي حد يستاهل

فأنا متفق معاكي جدا

أنا على يقين إن كل واحد بيأخد على حسب نيته

ويمكن لو حضرتك كنتي زرتي مدونتي تأملات قلب
هتلاقي فيها بوست طوييييييييييييييييل
اسمه نصفك الآخر
عن الحكايه دي

**********
بس أنا زعلانه زعلانه منك
إزاي تقولي كل واحده تجيب جوزها في إيدها وهي جايه

يعني أعمل إيه أنا الوقت بقى
يعني دي حاجه زي الدخول بالملابس الرسميه كده
ههههههههه
ماليش دعوة إعمل لي استثناء

أحييك على موضوعك
تحياااااااااااااتي

صبرني يارب يقول...

كناري

لا ما تعرفيش انتى حكاية اللازقه دي مهمه ادي ايه. وبعدين ديى لازقه انجليزى مفيده اوي ومريييييييييحه اوعى تلزقى بصمغ صينى يععععع زباله .

العريس يا قمر عنيه هاتي بس انتي المواصفات ربع ساعه ابعتهولك
نورتي يا جميل

صبرني يارب يقول...

سلوى

انا لسه هاكتب بوست للرجاله
اصبري شوفي انا هاقولهم ايه

انا بس ما احبش اوجه الكلام للطرفين فى وقت واحد لانه كل واحد فيهم بيفكر بشكل مختلف

وبعدين انا قلت كل واحده تجيب جوزها اه من الى متجوزين

انما الى مش متجوزين يبقوا اول ما يتجوزوا يجيبوا اجوازهم هنا نعزمهم على شاي ويقروا المدونه .

واي واحده عايزه تبعت البوست لجوزها من غير ما يعرف من المجهول الى بعته تدينى اميله بس وانا ابعتهوله ولا يهمك ههههههههههههههههههه

نورتي يا سلوى

mostafa rayan يقول...

بصي يا ست صبرني يارب
اولا : سوري ان اخترقت القاعدة وقرأت كلامك رغم اني راجل معلش خليها عليكي المرة دي
ثانيا : انا معاكي في كل اللي بتقوليه ولما هخطب هخلي خطيبتي تقرأ الكلام دة
بس اللي مختلف معاكي فيه موضوع انها ترشق له دي الراجل بيحب مساحتة من الخصوصية والوحدة ماينفعش الست تكون لازقة له زي القراضة ولا اللزقة الأنجليزي كدة ممكن يتخنق
تاني حاجة حكاية انها تلعب كل الأدوار وتكون عاصفة .. طيب عاصفةدي يعني ايه
تغضب وتثور يعني انت عارفةان الستات مجانين اصلا ودماغهم مش معاهم ممكن يعني لما تكون عاصفة تموت الراجل
بجد ياريت تفهمينا قصدك ايه من كلمة عاصفة دي
وتحياتي ليكي

صبرني يارب يقول...

مصطفى ريحان
نورت

اولا قانون اللزق ده لا يمكن ابداااا اتنازل عنه مهم اوي وحيوي

وبعدين مين قال انه هاتنعدم الخصوصيه لا طبعا مالهاش علاقه الخصوصيه بالموضوع ويعنى ايه بقى الراجل بيحتاج مساحه من الخصوصيه . ما البنى ادمين كلهم كده ستات ورجاله ؟؟؟ ولا انتم بس الىمحتاجين خصوصيه واحنا كائنات فضائيه معدومة الحقوق على وجه الكره الارضيه ؟؟!!

بنات شامه ريحى تعبيرات انويه فى كلام الاخ مصطفى .

المهم اللازقه الانجليزى حنينه ومفيده للصحه ما تتنازلوش عنها يا بنات .

ثانيا : بقى الستات مجانين وعقلهم مش معاهم ؟؟
أنا مش هارد عليك انا هاسيب الاياااااااام ترد عليك لما يطلع عليك الجنان الحقيقى بقى .

اما حكاية عاصفه دي انا اقصد منها انها ما تكونش على وتيره واحده على طول لان احسن صفه فى الدينا ممكن تتحول الى خانقه لما تكون دائمه على نفس الوتيره تسبب ملل
عادي الحياه لازم يكون فيها ده وده البحر يوم هاديء ويوم لا عشان كده البحر مش ممل ابدا .

نووووووورت يا مصطفى وخلي بالك المدونه الى بتبقى للستات بس بيبقى نازل معاها هديه ساطور ونص كيلوا اكياس .

nour shahen يقول...

بوست فعلا جميل واجمل ما فيه طريقة كتابته السهله البسيطه اللى توصل الفكره للقلب قبل العقل ربنا يوفقك حبيبتى
تقبلى اعجابى بكتابتك الجميله