الجمعة، 11 أبريل 2008

سؤال يغيظ جدا

طبعا حاسين انى دايما مفروسه ومتغاظه وكده يعنى عادي ما هو ده تقريبا سمة العصر والله نفسي ابقى بارده واعصابي هاديه على الاقل يومين ثلاثه اجازه شويه عادي بس اظاهر دى نعمه انا لسه ما استهالهاش .

قبل ما اقولكم على السؤال البوست ده ليس اكثر من انى بافضفض فمش عايزه حد يقولي لزمته ايه وفكرته ايه البوست .

السؤال بقى وله عده اشكال اشهرها :
* انتى متجوزه وبتدخلي نت تعملى ايه ؟؟؟ وشات كماااااان ؟؟؟!!!
* انتى جوزك عارف انك بتدخلي النت والشات ؟؟؟؟
* انتى جوزك مش بيضايق من انك بتدخلي النت والشات ؟؟؟؟؟
* انتى بتتكلمى فى الدين على الشات ؟!!!!؟؟؟ طب امال داخله الشات ليه ؟؟!!!!

طبعا انا باحاول اكون هاديه جدا ومؤدبه وانا بارد على السؤال ده بشتى اشكاله لكن لااخفي عليكم بابقى من جوايه نفسي احدف الى قدامي باي حاجه خصوصا انه كمان ما عندوش استعداد يسمع الرد .

وفى مجموعة اسأله بقى نفسي الناس دي تسألها لنفسها وتر د عليها قبل ما يسألونى انا :

- هو الى مش متجوزه بتدخل النت تعمل ايه ؟؟؟ تدور على عريس ؟؟؟ هو ده فايده النت وشغلانته فى الحياه ولا ايه ؟؟؟
هو لو الشات ده ولا النت حرام وغلط مش يبقى حرام وغلط على المتزوجه والغير متزوجه كمان ؟؟؟؟

- هو ايه وجه العجب ان جوزي يعرف اني بادخل النت والشات كمااان ؟؟؟؟ هو لازم ابقى كدابه واكذب على جوزي عشان يبقى وضعي مرضي بالنسبه للناس والمجتمع ؟؟؟
وايه الخطأ الى بيشوفني بارتكبه على الشات والنت عشان يستنكروا موافقة جوزي هنا ؟؟؟

- ليه المفترض ان جوزي يتضايق من الشات والنت ؟؟؟؟ عشان باكلم ناس ورجاله كمان يادي العيبه والفضيحه والجرسه ام حناجل ؟؟؟
طب اشمعن ما بيقولوش كده على الي مراته بتشتغل ؟؟؟ ماهو كمان موافق انها تخرج تشتغل وتكلم ناس ورجااااااله كمان ووجها لوجه مش من وراء حجاب ؟؟؟؟؟
ما حدش يقولي الشغل مهم والنت والشات لا . او الشغل اضطرار لان فى ستات بيشتغلوا من غير اضطرار ولا حاجه بتشتغل عشان تحقق ذاتها زي ما صفوت الشريف حفظ الشعب كله البؤين دول .
هل انا مش من حقى احقق ذاتي بالطريقه الى تعجبنى ؟؟؟ ولاتحقيق الذات بس فى الوظيفه الى هى بتروح تنقى رز هناك ؟؟؟
وهل تحقيق الذات وتقدير الذات ما يتحققش الا عن طريق حاجه مدفوعة الاجر ؟؟؟
وهل مبرر لو كانت الست هاتجيب فلوس يبقى مش مشكله لما تعمل حاجه غلط من وجهة نظر الناس وهى انها تخرج وتكلم رجاله ؟؟؟؟ ده ايه المبادي ء دي ؟؟؟

- ايه التعارض بين الكلام فى الدين والشات ؟؟؟؟
هو يعنى ايه شات ؟؟؟؟ حد عارف يعنى ايه ؟؟؟ الشات يعنى دردشه يعنى رغي يعنى كلام . والكلام حلاله حلال وحرامه حرام .
يبقى الشات فى حد ذاته مش حرام وانما يبقى حرام لو قلنا فيه كلام حرام . انما ايه الحرام لو كنت هاتكلم فى الدين او حتى هاتكلم كلام عادي بكل احترام ؟؟؟؟
الشات فيه ناس مش كويسه ومالوش لازمه احتك بهم ؟؟؟؟ طب ما كل الدنيا كده والشغل كده اي واحده كده من الستات الى بتشتغل لو سمحتم تقولي المكان الى بتشتغل فيه مافهوش حد زي الناس الي فى الشات ؟؟؟؟
وزي ما بيقولوا للست والبنت الى بتشتغل كل واحده بتحدد الناس تتعامل معاها ازاي والمحترمه تعرف توقف كل واحد عند حده . طب يعنى المحترمه ما تعرفش تعمل كده فى الشات والنت ؟؟؟

وهل عشان فى كل يوم والتاني واحده تطلعلنا بقصه انها خانت جوزها من خلال النت او بداية من النت يبقى النت هو الى متهم مش الخاينه ؟؟؟
وهل الخيانه كانت مستنيه النت والشات والموبيال عشان تبقى موجوده ؟؟؟؟؟
على فكره انا لو جوزي اعترض على وجودي هنا لمجرد انه مضايق ليس الا يعنى من غير اسباب تانيه غير انه بيتضايق انا هاسمع كلامه ارضاء لله تعالى وكمان لانى ماا رضاش اضايق جوزي ولا اخليه يعيش مضايق مافيش حاجه تستاهل كده .
لكن افتكر ان عمر بن الخطاب كانت زوجته مش فاكره مين فيهم بتخرج تصلي العشاء والفجر . وكانت هو بيتضايق من كده . لكن ما منعاهش ولا قالها . ولما الناس سألوه قالهم ما رضيتش امنعها لحديث رسول الله ( لا تمنعوا اماء الله مساجد الله ) ولما قالولها انتى بتخرجي تصلي بالليل وعمر بيبقى مضايق . قالت لهم : وما منعه ان يمنعني ؟؟؟؟؟؟

انا شايفه ان مجرد هوى النفس مش كفايه عشان تحرم الناس حقها الى ربنا ما حرموش . ايوه لان المبدأ بتاع انا ما ارضاش بكذا وكذا بدون مبرر ولا دليل . يبقى ليس اكثر من هوى النفس وبس .

ساعات باشك فى نفسي وفى رايي . لكن مش قادره اغير افكاري لمجرد معارضه بعض الناس لها بدون مبرر . وبدون اقناع وبدون حجه . انا بادعي ربنا دايما ان يرينى الحق حق ويرزقنى اتباعه ويرينى الباطل باطل ويرزقنى اجتنابه .

وعشمي فى ربنا انه يتقبل دعائي ومش هاتررد فى تغير افكاري لو اكتشفت انها غلط لكن لحد الان ما حدش اقنعني .

بصوا انا بساتحمل زقل طوب طول عمري على افكاري لكن النهارده بالذات الى هايزقل طوبه واحده هو الجاني على نفسه .


هناك 47 تعليقًا:

الـمُـهاجر يقول...

الأخت الكريمة
كنت في جولة بين المدونات واسترعى انتباهي موضوعكِ .. فلم استطع منع نفسي من وضع رد .. ورزقي على الله

استفزتني بشدة آخر جملة .. فاستسمحك تقبل كلامي بصدر رحب

الأسئلة اللي بتقولى عليها تغيظ هى اسئلة طبيعية ومنطقية جداً .. مش بيقولوا اللي ما يعرفش يقول عدس ..
اللي سأل مش شايف الصورة كاملة .. هو بيسمع .. فقط بيسمع ان النت هو كل ما حرم الله ، هو مش فاهم ان الحلال بيّن والحرام بيّن ..
شاف الصورة على طريقة ولا تقربوا الصلاه ونسى ان الآية لها تكملة .

العبرة في الشخص اللي بيستخدم النت لأن القلم اللي ممكن ارسم بيه مسجد هو نفس القلم اللي ممكن ارسم بيه جسد عاري

حكىَ عن نبي الله عيسى عليه السلام أنه مر وأصحابه على جيفة كلب ، فقال اصحابه ما أنتن جيفة هذا الكلب ، لكن نبي الله عيسى عليه السلام قال : انظروا الى أسنانه ما أشدّ بياضها .

الأخت الكريمة .. فقط استفتِ قلبكِ
ومادمتِ مؤمنه انك لا تفعلين شيء خطأ أو حرام .. فابسط شيء ان تضربي بكل هذه الأسئلة عرض الحائط

ربما لن يكون لي نصيب في العودة إلى هذه المدونة مرة أخرى .. لكني فقط قلت لك رأيي الذي وافق وجهة نظرك وافكارك .. لا خوفاً من جملتك الأخير .. ولكن احقاقاً للحق
ولا ننسى أنه من حام حول الحمى أوشك أن يقع فيها .. أي ان السقوط ليس مؤكداً
فقط كوني مؤمنه بأن ما تفعلينه صواب
وسيبي اللي يسأل يسأل

أسف على طول التعليق

لكِ التحية

محمد كمال يقول...

اختي الكريمة
لا أختلف معك
فلكل انسان منّا رأيه
ولكن
من سأل للعلم فلا تبخلي عليه بالتفسير
أمّا من سال للنقد السلبي دون ان يكون لديه الاستعداد للسماع فهذا00000
لا داعي لاضاعة الوقت معه
شكرا
محمد كمال

mayada يقول...

ياحلاوه ياولاد انا رقم اتنين
بصي ياام مريم
انا هقول رائي بصراحه مبدئيا
كل مكان فيه الوحش والحلو
يعني فيه جيران وحشين وفي جيران كويسين
اهل حلوين اهل كويسين
اصدقاء حلوين اصدقاء كويسين
الخ كذلك الشات في الحلو وفي الوحش
المهم الفلتر بتاع البني ادم
المهم انت وحش ولا حلو
انت بتخاف ربنا ولا لا
وبعدين اللي عاوزه تخون او تعمل
حاجه وحشه مش هتستني شات ولا كلام فارغ من ده دي وشها مكشوف يعني مش
هتضيع وقتها هباء
ام مساله الناس وسئله الناس
فالناس دي هتتكلم هتتكلم حتي
لو قاعده علي سجاده الصلاه
لان دي طبيعه البشريه
ده السيده عائشه زوجه الرسول
بن ابي بكر الصديق اتهموا
ولا كان في شات ولاكان في نت
ودي السيده عائشه مين مننا السيده عائشه ومين زوجها سيدنا محمد واباها الصديق
اما بالنسبه لرضا جوزك
فهو موافق علي كده يعني بتعملي
كل حاجه بعلمه وهو راضي يعني
انت راضيه ربنا عشان
راضيه جوزك ومبتخبيش عليه
ده اكيد اعظم من انك ترضي الناس
وتغضبي وتخبي علي جوزك
وعلي فكره اللي بيعمل حاجه غلط
هو بس اللي بيخبي لكن اللي بيعمل
الصح ومتاكد انه صح يبقي عمره ما هيخبي
واخيرا
لا يجب ان تكون في النور لتري
ولكن يجب ان يكون ماتراه في النور
تقبلي خالص تحياتي

Liberal Muslim يقول...

أختي أم مريم
معلش فيه ناس كده مريضة في عقولها .
أو عندهم عقد وبيحبوا يطلعوها علي الناس .
عقولهم القذرة المريضة - مع عدم تحفظي- بتصورلهم ان اي واحده تدخل الشات يبقي عايزه تتعرف علي شباب ، وده هو السبب اللي اصلاً بيخليهم هما يدخلوا الشات ، وللأسف اغلبهم بيمثل دور المحترم الطيب الغلبان المصلح الاجتماعي المتدين بعنف ...
وفي الأخر يطلع منهم للأسف .
يا ام مريم ماتحرقيش دمك ... والله الموضوع مايستاهلش .

اه علي فكره انا شيلت الناس اللي زي كده من علي الماسنجر وهما بيدخلوا المدونة هنا ... وهما عارفين نفسهم ... مش ناقصة تخلف وبله منغولي :)

فرنسا هانم يقول...

للاسف الشديد دى نظره معظم الناس للنت والشات
حتى ان بعض الناس يعتقدون ان النت صور وافلام فاضحه فقط

صبرني يارب يقول...

مهاجر
اسفه اولا عن اخر اخر جمله لك وللجميع بس انتم ما تعرفوش ماذا اواجه

ولاني شويه دماغي ناشفه مش قادره استسلم لهم لمجرد انهم معارضين ليس الا . وما عندهمش اي حجه ولا برهان .

ومع احترامي لحضرتك يااخي ا لفاضل انت بتقول الى ما يعرفش يقول عدس .
طب هو الى ما يعرفش يقول ليه اصلا عدس ولا فول ؟؟؟
انا رايي ان كل الى بيقول كده حاجه من اثنين يا اما اساسا ما يعرفش حاجه عن النت والشات يااما يعرف بس يعرف الجانب الى هو عايزه وبيدور عليه
لان كل واحد بيلاقي الى بيدور عليه

انا كتير مش باعبر الكلام يعنى وواسيب التخلف يعيش
لكن احيانا باتغاظ اوي واتنرفذ وبصراحه قرفت قرفت من الغباء

وكمان حاجه انا لا احوم حول الحمى . وان كان فى النت فتنه الى بعض الناس فالحمد لله هو لا يمثل لي ابدا فتنه .
واكيد انتم عارفين ان كل واحد فتنته تتمثل في شيء مختلف عن التاني حسب نقاط ضعفه .
وشكرا لكم على تشريفك المدون واتمنى انك تشرفنا تاني
وانت تطول براحتك ده هنا الموطن الاساسي للرغي والتطويل
وعلى فكره انا روحت احدى مدونتك وما عرفتش اعلق هو حضرتك قافل التعليق ؟؟؟
نوووووووووووورت

صبرني يارب يقول...

محمد كمال

شكرا لك لكن للاسف بتهيئلي ما قابلتك حد من الى بيسأل للعلم ابدااااااااا
وكله بينهى كلامه بعد النقاش الطويل انه مهما قلتى لن اغير رايي

وعموما فى الاخر باقول دع القافله تسير ..............

نووووووورت

صبرني يارب يقول...

مااااادي حبيبتى

بصي يا مادي احد الائمه مش فاكره مين فيهم . كان جالس مع تلاميذه وكانت واصله لسه قافله من العراق
فجاءه رجل منهم فسأله كيف وجدت العراق ؟؟؟
قال انهم اهل علم وتقوى وورع وتعلمت هناك كذا وكذا وكذا .قال له : صدقت

وبعد شويه جه واحد تاني سأله نفس السؤال : كيف وجدت اهل العراق ؟؟؟
قال انهم اهل فسق وبغاء وفساد و ..و...

فقال له الامام: صدقت
فاتسعجب تلامذته وقالوا كيف يا امام ؟؟؟
قال كل منهم وجد ما بحث عنه

من الاخر الناس الى بتقول كده هما نفسهم مش تمام غالبا او ناويين يبقوا مش تمام .

بس اهم بيقرفوني والسلام .
نورتي يا جميل

صبرني يارب يقول...

وائل

يا وائل انا مهما قلتلك على الاعداد الى بتاخد عندي بلوك ودليت مش هاتتخيل انت عارف ان دي هوايه اساسا .

لكن برضه ادينا بنشوف بلاوي تحرق الدم

مش عارفه مين بدخل المدونه مش عاجبك بس انا مقياسي فى الحكم على الناس هنا وفى اي مكان الخبره الشخصيه والمواقف المباشره
غير كده مش ممكن احكم على حد ما دام بيدخل هنا بادبه خلاص .
نووووووووورت يا وائل

صبرني يارب يقول...

فرنسا
واحشاني يا جميل

تعرفي حكاية الصور والافلام دي بالذات بتضحكني جدااااااااا

بالفعل فى ناس فاهمه كده حتى بابا كان متخيل ان السايبرات دول كلهم فاتحين عشان العيال يروحوا هناك يتفرجوا على حاجات من دي ومهما تقنعي فهي لا محاله
طبعا هو رايه انى غلطانه برضه وده يمكن من اكتر الحاجات الى بتنرفزني

الباحث عن الحقيقة يقول...

كل ده رغي
معلش الوقت مستأخر
ممكن استحجز دلوقتى واكمل بكره
اس السلام المؤقت
اه عندى موضوع جديد

صبرني يارب يقول...

يا باحث ده انا كاتباه وانا نفسي مصدود عن الحياه اساسا فين الرغي ده

انت تنور فى اي وقت واي مكان يا باحث

ولا شوفناك فى المدونه الجديده يا باحث مش عارفه اعمل لنك لها داخل ا لموضوع بس فوق كده على اليمين وانت داخل هاتلاقي مدوناتي الاخرى
رؤيه اسلاميه متواضعه

خايف من الحقيقة يقول...

الاخت الكريمه ام مريم

اولا : موضوعك مهم جدا
بس انا شايف ان الجهل ( بمعنى نقص العقل) وكمان التخلف ( بمعنى نقص المعرفه) هما اساس وجود الافكار المريضه في نفوس اغلبها مريض وبلا فهم لحقيقة الحياه

وكمثال
انا بدخا نت من حوالي 7 سنين بصوره يومية نتيجه لطبيعة عملي اولا و للمعرفه والعلم ثانيا

وعمري في حياتي ما عملت شات ابدا ( اصلا مبعرفش)

بس انا مش رافض الفكره


بالعكس
اذا الانسان عنده فكر عاوز يطرحه ايه المانع

المهم يا ام مريم
انك تختاري البشر الصح وتختاري الموضوع الصح

وانا شايف انك ناجحه في الحاجتين
علشان كده متزعليش
وبعدين ابو مريم
موافق ومؤيد


يبقى مفيش حد تاني لة راي مهم
صح
ولو هو مش موافق وسايبك
يبقى يستحق رفع القبعه تاني لانه سمح ليكي باررغم من انه مش مقتنع
وده دليل ثقه بنفسه وبيكي

اسف طولت بس صدقيني قلمك غالي وجودك مهم فلا تحزني

الباحث عن الحقيقة يقول...

أم خالد
كلاكيت تاني مره
صبرني يا رب
طول مانتي داخله روم اسلامي في الشات
وقافله الخاص ومش بتكلمي حد
وبتسمعي للدروس الدينيه
فده زى التعليم عن بعد
خاسرة انتى اتأخرتي في دخول الشات
وإلا كنتى سمعتي درسو اصول الفقة مباشرة على الهواء
انا بدأت في الشات بالدروس دي
وبعدين كل واحد ييجي يقول انا محضرتش امبارح ممكن تعيد
فده اللى طلعا في دماغي اعمل مدنة
بس للاسف حضرتك دخلتي الشات بعد انا ما خلصت
انا شفت اسم صبرني يا رب في الشات
وكنت هسألك هو انتى ولا غيرك بس انكسفت
المهم اقفلي الخاص
روم اسلامي
دروس او موضوعات دينية
معاكي شباب وبنات محترمه
الروم اللى شفت فيه اسم زي اسمك كان فيه دروس على مدى اليوم
اصول فقه وسيرة وتفسير
وطبعا لو زوجك معارض فطاعته هنا مقدمه لان طلب العلم فرض كفايه
اما لو تضيع وقت ورغي ..اظن مفيش داعي
ولو مش بتقفلي الخاص..برضوا ده مكان لا يخلو من الفتن
واكيد شفتى الاوضاع برضه ازاى
خدي بالك من نفسك
بالمناسبة كتكوت بيلعب في مخي
هل دخول الزوجة الشات او الزوج دليل او مؤشر على عدم وجود حوار فكري او في الامور العامه بين الزوجين؟
وهل ذلك لعدم وجود وقت عند الطرف الاخر للسماع؟
هرجع اشوف ردك على الكتكوت ده
ومبروك مدونة رؤية اسلامية متواضعة
هروح اشوفها اهو

صبرني يارب يقول...

خايف من الحقيقه

الله يكرمك ويريح قلبك والحمد لله رضا مقتنع بالفعل بالى انا باعمله. حتى انى فى مره كنت يأست من الناس وتعبت من كتر الكلام وحسيت انى بادن فى مالطه الى جانب تحمل قدر لا بأس به من الشتيمه ليا ولاهلي .أنا كمان كنت باتكلم فى الدين فى وقت ما حدش كان حد عملها على النت تقريبا كنت كائن فضائي ايامها .
وكمان لانى مؤمنه ان الكلام فى الدين مش فى الجامع بس يعنى مش فى اسلاميات بس .
وان الى بره الجامع محتاج حد يدخله الجامع . فكنت طبعا باسمع الشهد .
المهم انى قررت التخلي عن المهمه دي وقلتله قالي براحتك وقعدنا نتناقش شويه وبعدين قالي صلي استخاره ان كنت محتاره فى الموضوع وصليت استخاره وبعد كام يوم كده من التفكير نط فى دماغي كتكوت كبيييييييير
يقولي لما انتى وكل حد محترم يسيب الشات والنت للمفسدين مش يبقى انتم فضيتم الساحه للمفسدين دول ؟؟؟
وخليتوا اكبر مكان بيجمع اهم فئه من فئات المجتمع ( الى هما الشباب والمثقفين ) يبقى فى ايدين المفسدين ؟؟؟

وعنه ورجعت فى كلامي فى حرب ضاريه على المفسدين والبقاء للاصلح والحمد لله تعالى انا باقدر افرض وجودي بادبي واحترامي وكلامي الى له قيمه .

وعلى رايك خايف الباقي مش مهم يا خايف فعلااااااااا
وشكرااااا يا خايف جدااااااا

صبرني يارب يقول...

الباحث عن الحقيقه

شوف يا عم باحث بما ان ما حدش مفقوع ادي اكيد ما حدش تاني اسمه صبرني يارب وعموما بالنسبه للرومز الاسلاميه كنت بادخل موجه ويا رحمن لو كنت شوفتني هناك يبقى انا
بس انا بطلت اروح هناك لاسباب عده

المهم نبدأ الخناقه اقصد الرد يعنى عليك كتاكيتك

مين بقى قال لحضرتك ان المشكله فى كونها اسلاميه او لا ؟؟؟
وهو الكلام خارج الموضوعات الاسلاميه حرام ولا غلط ولا ايه ؟؟؟

طب ما انا على المدونه هنا باتكلم فى موضوعات اجتماعية عامة ؟؟؟

وبعدين ايه فى روم اسلامي وتسمعي درس فقه وقافله الخاص عشان الفتنه ؟؟؟

هو انا يا باحث بضفاير ؟؟؟ لسه عندي 16 سنه واحد هايكلمنى خاص ويضتحك عليا ؟؟؟
وبعدين انا قلتلكم الحمد لله انا النت والشات خاصة لا يمثل ليااي فتنه من اي نوع الحمد لله تعالى .

ولعاشر مره هاقولك الفتنه دي نسبيه بتختلف من واحد للتاني .

وانا ساعات باقفل الخاص فعلا عشان مش عايزه صداع ده عادي .
لكن قفله مش هو شرط صحة موقفي
لانى احيانا بافتحه اكلم واحده من البنات عايزه ترغي معايا شويه عايزه تسألنى على حاجه مش لازم تصيح لنفسها عام يعنى .
حتى لو واحد عايز يسألنى عن حاجه فى الدين مثلا كلهم على الاغلب شباب صغير من دور اولادي ولا حتى مش كده لكن انا بارد بكل احترام وبعد شويه باستأذن واروح العام .
خلوا الموضوع يكون هاديء شويه مش تنشن كده والناس خلاص هاتاكل بعضها والفتنه واقفه على باب كل حاجه كده .

ومش كل حاجه مش تبع الدين بشكل مباشر تكون رغي مالوش فايده .
وخلى بالك حتى لو انا باعمل شات محترم لمجرد التسليه مثلا دون التعدي على حقوق ربنا وحقوق الغير يعنى لا انشغل بلهو الحديث يعنى فده مش حرام برضه من وجهة نظري .
لكن كمان الاسراف فيه وفي اي حاجه غلط .

اما بقى حكاية الكتكوت بتاعك دي يا لهوي دي عايزه بوست لوحده .
طب انا عايزه زمتك يا باحث انت وكل الى هنا هل انا شكل واحده مافيش بينها وبين اي حد فى الدنيا تعرفه حوار ؟؟؟؟
اطلاااااااقا احب اطمنكم يا قوم عشان حاسه ان الناس كلها قلقانين عليا انا ورضا مش عارفه ليه .
انا ولله الحمد رغايه موت وبعدين بقى الرغي ده معدي يعنى ساعات باعمل تحفزيات لمعامل الرغي عن جوزي واخليه يرغي برضه .
وبنتكلم فى كل حاجه فى الدنيا فى الامور العامه والى مش عامه والبتنجان الى باربعه جنيه ووحش
وعارفكم كلكم واحد واااااااحد
يعنى مثلا لمااقوله باحث قال كذا يقولي باحث مين اقوله صاحب مدونة الفقه الى قلتلك عليه .
طب فرنسا يقولي مين فرنسا اقوله البنت السويسيه الجدعه الى انا خليتك مره قريت لها بوست .
طب خايف اقوله اه خايف ده الى قلتلك عليه بيكتب قصه حلوه وشكله كده كان بيشتغل فى المينا وياما شاف فيها فساد ماشي على رجليه ويعربد .
وهكذااااااااااااا.

كمان انا بقى اجارك الله حافظه كل حاجه فى شغله اسامي عملا وموردين وبضاعه بس الاسعار لا مش بتلزق معايا .
ومواعيد تسديدات ومواعيد قبض وكل حاجه وراشه مناخيرى فى الشغل بشكل وحش جدااااااااااااا . بس اعتقد هو كده مبسوط .
مش بادخل الشات عشان اعوض قلة الكلام ولا قلة الحوار ولا عندي نقص ولا عقد ولا حرمان زي ما بعض الناس بتقول ومتخيله ان ده الوضع العادي

والله اعلم الناس التانيه ايه ظروفها لكن اكيد انا مش حاجه طالعه لواحدها فى الدنيا
انا بالكم ستات كتيييييير على الشات متجوزين على فكره بس ما بيحبوش يقولوا عشان ما عندهمش الشجاعه يواجهوا المجتمع
وانا كنت زيهم لحد قريب وبعدين قررت اواجه مادام انا صح من وجة نظري

اي خدمه لك ولكتاكيت حضرتك باحث ونووووووووووووووووووووورت

الباحث عن الحقيقة يقول...

انا عايز اعرف
ليه لما بدوس على العنوان سؤال يغيظ بيدخلنى مدونتك التانية
هو بالاكراه ولا ايه
وبما ان رضا عارفني ابقي سلميلي عليه

Anonymous يقول...

أختى الفاضلة /أم مريم
تأخرت فى التعليق احتراما لفكرك العالى
و أنا معك وهى اسئلة غبية لا تعيريها
أدنى التفات ..صدقينى هى دعوات للتخلف ليس إلا ..فأى جهاز له و جهان أحدهم قبيح و الأخر مفيد للغاية..وفى عصرنا الحالى من الضرورة بمكان اللحاق بالتطورات و تلاحظين أن طلبة الطب و الصيدلة و الهندسة و الزراعة يستفيدون من النت بصورة و اضحة حتى عن الدراسة المنتظمة لذا أختى الكريمة
و اجب علينا جميعا مسايرة العصر و عدم التخلف عنه و مستقبلا كل أبنائنا سيكون للنت دور كبير فى تعليمهم و تطويرهم و ولى الأمر الناجح من يربى فى
أبنائه مراقبة الله فى كل صغيرة و كبيرة
تحياتى و احترامى و دمتى إنسانة كريمة..
أبو خالد

صبرني يارب يقول...

أبو خالد

حضرتك تنور فى اي وقت ما يكونش ابدا متأخر

وشكرا على ردك الجميل وربنا يكرمك

صبرني يارب يقول...

باحث عن الحقيقه
مش عارفه والله بجد لما بتدوس عليه بيطلع المدونه التانيه ؟؟
هههههههههههههههههههههه
ما كانش قصدي او اصلا انا ما باعرفش اعمل حاجه من دي بس مسيرى افضى واروح مدونة الاخ وائل واعيش فيها شهرين كده على ماافهم القصه .

ويوصل السلام ان شاء الله يا باحث

واحدة مفروسة يقول...

ام مريم... صباح الخير ...بصراحه انا مش عارفه اقولك ايه....ردودك..و موضوعاتك...بحسهاتجسيد عن ما يدور فى دماغى من رغى و من تعليفات
يبدو عليك انك انسانه معتدله فى تفكيرك .. و ده المطلوب...و زى كثير من الناس فى المجتمع...انا شخصيا ساعات ببقى نفسى ارد على راى متشدد...و مش عارفه اصيغه بطريقه لا تؤخذ على.....الناس بقت عجيبه جدا يا ام مريم.. و اللى بيلعبوا فى نفوخهم اعجب.. و ده لا ن الناس جاهله امور دينها المعتدل فبيبقى سهل عليها تللقى اى معلومه صحيحه كانت ام مغلوطه....
انا من امبارح فى حاله فرسه و بصراحه اكتئاب عالى جدا...و ححكيلك و افضفض لانك ممكن تتفهمى قصدى..امبارح واحده صحبتى ابوها فى السلك الدبلوماسى و خريجه مدارس لغات.. و قصه يعنى .. فوجئت بصديقه لها من ايام المدرسه و الجامعه اتنقبت...و عزمتها عندها فى البيت....الصديقه بدات.. فى انتقاد صحبتى فى و ضع صورة اولادها على ترابيزه ...عادى يعنى زى كلنا ما بنعمل ..بلاش ظلت توعظ صحبتى ازاى بنتها اللى عندها 6 سنين مش محجبه..وملبساها بحمالات..؟ الصديقه كان معاها ابنها 3 سنين ....بنت صاحبتى قامت بتلاعبه و بتبوسه... و راحت امه نهرتها بشده انه عيب و مايصحش تبوس الولد الصغير....
بصى بقى المصيبه الكبرى
قالتلها انا بحفظ الولد القرآن ....عادى
و حعلم الولد السباحه........عادى
وحعلم الولد ركوب الخيل........برضه عادى
اللى مش عادى بقى .. قالتلها و حعلمه لما يكبر الرمايه علشان يمكن هو اللى حيركب على حصان و يشيل سلاح و يجاهد فى سبيل الله ...........لا تعليق
انا اسفه طولت عليكى بس اعتدالك فى افكارك خلانى افضفض...و طبعا لم تخلوا مواعظها من بعض الافكار اللى سبق و اشرت اليها فى مدونتى ....سلام بقى و اسفه على التطويل مره تانيه

mony يقول...

السلام عليكم

الموضوع ده فعلا في بالي من فترة

و كذا مرة اتسئل عليه و مش عارفة ممكن يكون ايه الرد الصح

يعني انا اتسألت السؤال ده في البلوج بتاعي
و بصراحة ماعرفتش اقول ايه؟؟

طبعا انا عتبرت ان السؤال كان بيتسأل بحسن نية

بس فعلا جوزي ما يعرفش
مش عارفة لغاية دلؤتي مش عاوزة اقوله ليه
مش حاسة انه لازم يعرف يعني
علشان اكتب كل اللي جوايا بنفس الطريقة اللي انا حساها من غير تزويق و تجميل

و بعدين انا جوزي من الناس اللي بيتتريق علي كل حاجة
يعني هيستلمني كل ما اعمل بوست مش هخلص

و كمان شايف ان انا ماعنديش القدرة علي الكتابة و حتي لو عندي يبقي ماعنديش كلام اقوله

المهم اني فيا حاجة ناقصة


انا بعد ما عملت البلوج بتاعي بشهر تقريبا سألته ايه رأيك لو عرفت اني هعمل(خلي بالك من هعمل)بلوج ليا

رد بانفعال لاء طبعا
ليه
كده
كده ليه
هو كده!! هتعملي بلوج ليه؟؟ و هتقولي ايه يعني؟؟ انتي ماعندكيش حاجة تتقال

طبعا اتغاظت جدا و كنت عاوزة اغيظه و اقوله اني فعلا عاملة واحد
بس سكت و قلت لنفسي كفاية ان انا عارفة اني عملت
و لقيت كلام اقوله فعلا

و معظم الناس شايفين ان الست المتزوجة سطحية و كل ما يهمها انها تنظف و تأكٍل و تخلف و بس و المفروض ان ماعندهاش وقت تدخل فيه علي النت
و اقصي حاجة ممكن تعملها و هي علي النت انها تدور علي وصفات للاكل و بس

علشان كده بيكون الاستغراب

صبرني يارب يقول...

مفروسه
نورتي

والله يا مفروسه احنا شكلنا هانجيب دستة مرارات كاوتش هنا على البلوج ونوزعها مجانا .

وصاحبتك دي خليها تبعتلى الحلوه المنقبه دي عشان اخليها تندم اشد الندم على كونها صاحبتها من اصله .
اصل انا حافظه النوعيه دي اوي وبابقى عارفه الى هماهايقولوا من قبل ما يقولوا وباسكتهم قبل ما يقولوا .

ده بجد لانى كنت قريبه منهم . مش فكريا لا مكانيا ومظهريا شويه .
لانى كنت فى الجامعه باصلي فى المسجد بتاع الكليه واي مسجد تاني وكلهم عارفنى وطبعا بقى كان كل شويه واحده فيهم تيجى تنصحنى بقى عشان عندى ديفوهات مش كانت بتعجبهم .
زي مثلا انى محجبه بس اها مش مش محجبه بريشه . يعنى مش لابسه لا خمار ولا نقاب ولا اي حاجه من عدة الشغل خالص .
وشوية حاجات تانيه كده برضه المهم يعنى كانوا بيتكبسوا كبسه وحشه اوي .
واغلبهم يولون الفرار بمجرد التليوح لهم باظهار جهلهم المتقع بالدين اصلا ,

وصدقنى الناس دي موجوده لغيابنا احنا كمسلمين فاهمين وعارفين دينا كويس بما لا يسمح لحد انه يلعب فى عقولنا .

وخيل ايه ورماية ايه الناس هاتحارب بها ؟؟؟؟؟؟؟
وبعدين انا هاعلم ولادي برضه انشاء الله لو قدرت كل الحاجات دي بس مش عشان الحرب لان مش ده السبب الاساسي لتعليم الرياضات دي .

وبعدين بنت صاحبتك بتبوس الواد ؟؟؟ ايه ده قلة ادب فعلا . كويس انها ما شافتش الواد ابنى بيعمل ايه لما يشوف اي بنت صغيره بيبقى هاين عليه يبيع امه فى سوق الكانتوا. ويروح يلعب مع البنت وهات يا بوس واحضان ويمسك شعرها ويقولها اللللللللله جميييييييل .
وهو بنص لسان لسه .
وانتى تطولي براحتك هنا موطن الرغي يا بنتى .
نورتي يا جميل

FaceMoon يقول...

يابنتى والله ناس عندها عقد وكلاكيع فى عقلها لو يعرفوا قيمة ومعنى الحرية الشخصية مكنوش قالوا كدة بس انا كمان بقابل الكلام دة كتير بقابل ناس فاكرة ان النت والشات مجرد لهو واحاديث فارغة وملهاش لازمة وان النت كلة قلة ادب ومسخرة هما عندهم نوع من التخلف العقلى ومش عارفة حيشفوا نفسهم امتى بس هما مبسوطين كدة اوى بهنيكى على الموضوع الجامد خالص
ليكى عندى تااااج تعالى خدية بسرعة متتأخريش

الجواز و سنينه يقول...

يا ام مريم هاسألك سؤال انتى بس اللى تجاوبى عليه و حتى مش لازم تردى
انتى عايزه ايه من الشات ؟ اصل ده برضوا سؤال مهم ؟ و سؤال تانى انتى بتضايقى ليه منهم و انتى عارفه انك صح؟ و السؤال الاهم هل جوزك لو عمل شات مش هاتضايقى و لو شويه صغيرين ؟
لو رديتى على الاسئله دى محتمل تعرفى همه ليه مستغربين ؟
انا مش بقول انك غلط و همه غلط او العكس بس بسهوله اللى مش فاهم تفكيرك ماتتعبيش نفسك انك تفهميه انك صح
كفايه انك عارفه انك صح
و شكرا

Unique يقول...

بصي يا ام مريم انا مش هقولك ان الاسئلة دي متخلفة بس احنا ما زلنا في مرحلة من عدم النضج في فهم عالم الانترنت والتعامل معاه .. رغم ان فيه شباب كتير بيمثلوا نماذج مشرفة قادرة تستخدم النت صح وتحقق منه استفادة كبيرة في الدراسة والشغل وتطوير الشخصية الا ان فيه كتير تايهين في خيوط الشبكة العنكبوتية وهم دول اللي بيعكسوا صورة سيئة للمستخدم العربي
لكن احنا لازم نفضل واثقين في نفسنا وفي اختياراتنا خاصة لما بتكون ماشية صح
جميلة جدا الطريقة اللي عبرتي بيها عن رايك .. وانا معاكي في كل كلمة
سيبي اللي عايز يتكلم يتكلم
وربنا يهدينا جميعا
اختك الصغيرة

بت خيخة وأي كلام يقول...

انا عجبنى البوست ده اوى يا ام مريم
بجد يعنى بوست جاى فى الجون
وانتى تقريبا ماسبتيش فيه فتفوتة الا وقلتى كل حاجة ممكن تتقال فى الموضوع ده

عجبتنى اوى الحتة بتاعة تحقيق الذات
الكوبليه كله عجبنى جدا
حكاية ان تحقيق الذات مش بس عن طريق شغل ولا عن طريق شئ مدفوع الاجر
الحتة دى داخلة نخاشيشى ومكيفانى اوى

وكمان وجهة نظرك فى الشات عجبانى
بجد يعنى البوست ده انتى تستهلى عليه تسقيفة كبيرة اوى وانحناءة كبيرة اوى كمان

بحى فيكى وضوحك مع جوزك وبحى فيكى كمان انك مستعدة تتخلى عن موضوع التدوين لو حسيتى انه مضايق من الفكرة كلها

ربنا يكرمك يارب ويسعدك دايما
تحياتى ليك
اختك خيخة

دكتور حر يقول...

الله ينور عليكي يا أم رحمه


كان في حاجه لا بتنشاف ولا بتنحسن
لكن عليها الحساب كله
اسمها

التقوى
وبس

صبرني يارب يقول...

تنويه هااااااام

اولا وحشتوني اوي اوي لكن انا والله الايام دي مش فاضيه خالص خالص رضا تعبان شويه مع شويه كمان عوامل خارجيه زي الفل . المهم مش فاضيه خالص وربنا حتى مش عارفه انا جيت دلوقتي ازاي وأسفه لتأخيري علن الردعليكم .

ثانيا : حكاية تعليق محذوف دي انتم عارفين ان انا خايبه تماما فى الاجراءات بتاعة المدونه انا حذفت تعليق واحد كان ليا انا كنت من حيث اللخبطه الى انا فيها رديت على مفروسه وماني فى رد واحد وكان ملخبط الكلام فى بعضه فحذفته ورديت على مفروسه وما لحقتش ارد على ماني

اما الحذف التاني مش عارفه جه منين خايفه اكون انا حذفت رد حد وانا مش واخده بالي

فمن فضلكم لو كان حد علق هنا وتعليقه اتحذف انا متاسفه اوي اوي له وياريت يشرفنا بتعليق تاني واسفه ومسيري اتعلم بس اصبروا عليا افضالكم بس .
وطبعا انا عمري ما هاحذف تعليق حد الا لو كان فى كلام خارج وهابقى اقول انى حذفته وليه انما مش هاحذف كلام حد عشان معارضنى عشان فى ناس قالولي الكلام ده لما شافوا تعليقات محذوفه .
وشكرا لكم جميعا .

الشموع البيضاء يقول...

بجد تحياااااتى للكلام الرائع ده قلتى كل الافكار الى مقتنعه بيها وبيكون نفسى ارد بيها على كل الى بيعترضوا انا كمان على فكره خطيبى عارف مكان مدونتى وبيدخلها وبيقرا الى فيها وعادى لانه بيثق فيا وبيحترم افكارى
مش بالضروره ان ناس بتفكر بعقل مريض يشوفوا الاصحاء هم الى مرضى؟؟
وكمان احقاقا للحق
النت زى اى حاجه سلاح ذو حدين فيها ده وده المهم احنا بنستعملها فايه

صبرني يارب يقول...

ماني

حبيبتى نورتي والله انا يا بنتى شوفت الاخ الى كان بيسألك على المدونه بتاعتك فعلا على معرفة جوزك من عدمها واستغربت بصراحه من مكان السؤال لان البوست والمدونه ما لهاش علاقه تماما بجوزك مش عارفه ايه جابه على باله (فضول ليس الا )
ودايما باحس فى السؤال ده بهجوم غير مباشر .

وكان نفسي تقوليله مالكش دعوه بصراحه اصل انا باقولها كتير من الغيظ.

المهم لو عايزه نصيحتى فى حكاية جوزك لازم يعرف عشان حتى تقدري تعيشى فى سلام نفسي .
وموقفه هو مش عاجبنى تماما منك لكن مؤكد فى خطأ فى العلاقه بينكم والخطأ ده انتم الاثنين مسؤلين عنه بتفاوت النسب لكن انتم الاثنين مسؤلين طبعا .
حتى لو كانت مسؤليتك عن الخطأ تتمثل فى السلبيه فقط تجاه معالجة الخطأ من الطرف الاخر فده برضه خطأ .

وان شاء الله نوصل لطريقه نقوله بها على المدونه مش عشان نغيظه لا عشان نفرحه ونثبتله اننا عقل يستحق ان يحترم ولو كان هو شايف انك ناقصه حته فهو كمان كده لان ما حدش كامل طبعا من البشر .

وعلى فكره حكاية ان الست المتزوجه فى نظر الناس لازم يكون وظيفتها الاولى والاخيره انها تكون طباخه وغساله ومربيه لاولدها وملبيه لزوجها فقط دي فكره بتعصبنى تمام وعايزه لها بوستين او 3 على ما اخلص كلامي
ونورتي موني

صبرني يارب يقول...

فيس مون
تسلمى يارب ونورتي وشكرا على ردك

وحكاية التاج دي انا مش فاهامها بس هاجيلك ان شاء الله نشوف ايه الحكايه .

صبرني يارب يقول...

الجواز وسنينه
نورت اعتقد اول مره تشرفنا هنا .

اولا اسجل اعتراضي على الاسم بتاعك هههههههههههههههه

الجواز مظلوم معاكم اكيد انتم الى بتخلوه كده .

ثانيا : اسألتك على راسي هارد عليها

عاوزه ايه من الشات ؟؟
عادي نشاط على النت باعمله زي كل الناس بكل احترام باكلم ناس واشوف وجوه من البشر لم يتثنى لي معرفتها فىحياتي العاديه .
وبانشر موضوعاتي وباتناقش وباخد ثواب لم انشر موضوع دينى او حتى اجتماعي المهم النيه .
والنقاش مع الناس اقر انه فعلا وسع فكري ونمى تفكيرى وحفزنى على البحث فى كل موضوع اتناقش فيه او اتوقع اني حد يناقشني فيه من خلال موضوعاتي .

باضايق ليه ؟؟؟ عشان هما بيسألوا بشكل من الاتهام الموجه ليا مش لمجرد السؤال .
وغالبا بيكون بعد السؤال ده كلام مش لطيف ما بقيتش استنى لمااسمعه .

هاضايق لو جوزي عمل شات ؟؟
السؤال ده يا اخي الفاضل فى اتهام ليا انى ممن يأمرون الناس بالبر وينسون انفسهم .
واحسبنى غير ذلك . وطبعا مش هاضايق . انا جوزي بيخرج وبيشتغل وبيقابل ناس ستات ورجاله وسافر السعوديه والامارات والصين وفرنسا وسويسرا ومش دايماباكون معاه .
تفتكر الشات فيه اكتر من الى فى الدنيا دي ؟؟؟
طبعا مش هاتضايق وعلى فكره هو الى بدأ الشات وانا وهو عرفناه سوا وكنا بنقعد سوا لكن هو انشغل الايام دي .

وشكرا لك بصرف النظر عن كونك متفق معا لناس دي ولا معايا
اتمنى تكون رجعت تقرا ردي على كلامك
نورت

صبرني يارب يقول...

unique

نورتي
صوره سيئه للمجتمع العربي
اعترض الشات بره موجود فيه بلاوي زي الى هنا واكتر جربي واتفرجي عليهم .

وانا زي ما قلتلكم بحاول ما اعبرش الامخاخ التعبانه بس فى النهايه بيعصبوني واحيانا باقف محتاره فى النص .
لكن اسأل الله العون واقول اللهم ارنى الحق احقا وارزقنا اتباعه وارنى الباطل باطل وارزقنى اجتنابه .
ومن حسن ظني بربي احسب دعائي مستجاب .

صبرني يارب يقول...

خوخه حبيبتى

ازيك يا جميل واحشاني

متشكره على الاعجاب والكلام الجميل ده اخجلتم تواضعنا .

وبالنسبه للوضوح لو كل الناس تعرف قيمة الوضوح ده وترتبله كويس من بداية الحياه هاتبقى الدنيا اسهل واجمل من كده بكتيييييير .

وعايزه كل حد متجوز هنا يفكر كده لو كان هو بالنسبه لشريكه بالفعل كتاب مش هانقول مفتوح لكن قول سهل القراءه والعكس كمان شريكه كده له .
هايبقوا مرتاحين اد ايه نفسيا والواحد يغمض عنيه بالليل وهو نايم فى هدوء مش نايم فى جابهة الاعداء .
ويفتح عنيه الصبح ويقول الحمد لله .

ولنا كلام كتير فى الموضوع ده فى البوست الجديد وشوشة ستاتيت .
نورتي يا خوخه

صبرني يارب يقول...

دكتور حر

نورت والله واسعدنى وجودك

شكرا الف شكر على الكلمتين الحلوين دول اوجزت وانجزت فلا فض فوك .

صبرني يارب يقول...

انثى جامحه :

كده انتى دخلتى فى دائرة الخطأ يا انثى وحاولي تخرجي منها .

وكلمة فضايحه معايا كلمه تقول انك عايشه فى مشكله كبيره اوي مش من صنع جوزك لوحده لانى عندى مبدأ ان كل علاقه بايظه او فاشله لها طرفين
الطرفين دول بشكل او بأخر يتحملوا بنسب متفاوته مسؤلية فشل العلاقه دي وتخريبها .

والواحد عشان يقدر يصلح الحاجه الى تبوظ لازم يبدا بالاسهل والاقرب والمقدور عليه .
بالجانب الى يخصك . لكن بذكاء وترتيب ما يهدش المعبد وتابعى البوست الى جاي .
ونورتي

صبرني يارب يقول...

الشموع البيضاء
نورتي يا جميل

وربنا يكرمك ويسعدك انت وخطيبك وتفضلوا على الصراحه والوضوح طول عمركم .

د/اجدع بنوته يقول...

معاكى ف كل كلمه قولتيهااا

خصوصا بعض الشباب اللى بعض مايخطب

بيرفض تماما ان يكون لمراته او خطيبته اى نشاط ع النت
لا حول ولاقوة الا بالله

بس بعضهم بيفسر ده

انه ماشافش م النت غير كل وحش

فازاى يعرف ان فيه حجات حلوه بتتعمل عليه

تحياتى

صبرني يارب يقول...

بنوته نورتي يا جميل

صح انتى عندك حق فعلا هما بيرفضوا لانهم ما شافوش وما عملوش على النت حاجه غير الى هما شايفينه غلط اصلا

Sherif يقول...

أول مرة أدخل هذه المدونة

واسمحلى أن أنحنى لعقلك وقوة حجتك ..

الأصل فى كل الأشياء الاباحة وببساطة كما قال ابن تيمية

قبيحه قبيحح وحسنه حسن بمعنى أن كل شئ فى الدنيا له وجهان كما ذكرتى

أحييك على رجاحة عقلك ..

صبرني يارب يقول...

الاخ شريف

نورت المدونه و صاحبتها يا اخي الفاضل

وشكرا لك على الكلام الجميل اتفق معاه طبعا كليا وشكرا على الاطراء اخجلتم تواضعنا

Anonymous يقول...

الأخت الفاضلة
ارجو ان يتسع صدرك انتي و الجميع لهذا الرأي الذي اجده مخالفا لكل الآراء و لنناقش الرأي و لا نسفهه
نحن تربينا على بعض التقاليد ربما تكون باليه لكنها أصول لا نستطيع الفكاك منها فلا أجد رجلا يرضى ان يرى زوجته يحاول البعض ( و لنعترف ان هذا موجود بالفعل ) النيل منها
ربما ترد الأخت ( حاشا لله هذا لا يحدث )
لنكن صادقين مع أنفسنا ؟؟ إني أرى في هذه الفترة آراء غريبه تحاول أن تهدم قيمنا حياتنا ديننا .
فالحكمة التي تقول ( إذا بليتم فاستتروا ) تعني انني استخدم النت بكل ما فيه من فوائد فإذا وصلت إلى أشياء ربما أجد فيها بعض الإحراج فلا يكون هكذا !!!!!
عفوا إنني عندما أر مشهدا في التلفاز في فيلم أو غيرة و يكون المشهد خارج عن التقاليد فورا اقوم بتغيير القناة ألستم معي في ذلك أم استمتع بالمشاهدة مع زوجتي ؟؟
ردوا عليا يا عقلاء باعتباري مجنونا !!!!
ســلــ العاشقين ـــان

صبرني يارب يقول...

استاذي الفاضل سلطان العاشقين

اولا : حضرتك عايزه اقولك على حاجه مهمه اوي طزززززززززز فى التقاليد وفى المجتمع لو كان هي دي العقبه الوحيده فى كل حاجه فى حياتي وانا قررت من زمان ما ارضيش المجتمع على حساب نفسي . لانه اساسا ماحدش هايعجبه حالي على اي وضع من الاوضاع .

سوري فى التعبير لكن هو كده .

ثانيا : ان كنت ترى تحرجا من ان تستمع بالمشاهده مع زوجتك على مشهد خارج عن التقاليد
فأرجوا ان لا تكون تستمع به وانت وحدك .

سيدى الفاضل عفوا ما زلت لا استطيع تقبل فكرة انك لمجرد كونك رجل فان هذا يبيح لك المحرمات .
المشهد الغير لائق محرم عليك وانت وحدك وانت مع زوجتك وعلى زوجتك ايضا.

والشات زيه زي اي مكان ممكن يحصل انى اقابل فيه واحد قليل الادب يمكن على حد تعبريك يريد لينال مني ولكن ولا هو ولا عشره زيه ولا على النت ولا فى الحقيقه .

لكن اصدقنى القول يا اخي لو انت ماشي مع زوجتك فى الشارع ولمحت بطرف عينك واحد بيبص عليها حتى لو كانت لابسه خيمه مش بس نقاب وعبايه ولا اسدال ولا اي كانت المسميات .
هاتعمل ايه ؟؟؟؟

هاتمسك فى خناقه ؟؟؟
ولا هاتاخد زوجتك قلمين ؟؟؟

ولا هاتحبسها فى البيت وتقولها يا قليلة الادب ما اشوفش طرفك بره ؟؟؟

سيدى الفاضل : مازلت اوجه السؤال لكل الرجال بل للمجتمع المعوج ككل .

لماذا لا تحاربون عمل المرأه واختلاطها بالرجال كما تحاربون الشات وتواجدها مع رجال برررررررضه .
عشان الشغل بيجيب فلوس ؟؟؟

عفوا اي مهانه تقبلونها على انفسكم لو كان تفريطكم على حد تفكيركم سببه حفنه من الدنانير ؟؟!!!!

وما حدش يقولي الشغل مش زي الشات . عشان الشغل انيل من الشات وفيه كل النوعيات وفيه كل القرف
واي واحده اشتغلت ممكن ترد عليكم .

وعموما يا سيدى الفاضل لك عقل غير عقلي ولزوجي عقل احمد الله عليه ليس لكم مثله .

وشكرا لك على تفاعلك ولكن ارجو تقبل رايي كما تقبلت رايك .

Anonymous يقول...

الأخت الفاضلة / أم مريم
بعد التحية ،،
لقد توقعت كلامك هذا الذي وإن دل على شييء فهو يدل على حديث الرسول صلى الله عليه و سلم - فيما معناه " أن الدين سيعود غريبًا كما بدأ غريبا " فأدعو الله عز و جل ألا أكون على قيد الحياه عندما تسود الفتن فلا يعرف حينها الصح من الخطأ .
بخصوص الطزززززززززززززز فمليون طزززززززززززززززززززز في مجتمع لا يقيم للأعراف و القيم و الأخلاقيات وزنا
اختي الفاضلة إني أعيش خارج مصر و لكني اسمع و أقرأ أخبارها كل يوم فعلى سبيل المثال لا الحصر أشاهد الآن دريم 2 الطبعة الأولى أتدرين ماذا يقول ؟؟
يتحدث عن الصرعة الجديدة في الأفلام المصرية الجنسية الجديدة ، و كذلك يتحدث عن رجل ( ولا أظنه رجلا ) ينافس الراقصات في الرقص الشرقي ؟؟
هكذا صار الحال و من سيء لأسوأ و الرحمن موجود .
يمر في خاطرك الآن صورة لي ارهابي يريد وأد التطور الذي تحرزة المرأة أليس هذا ما يرد في خاطرك ؟؟
لا يا أختي لست ارهابيا أو منحلا أنا رجل تربى و رضع القيم و الدين و الأخلاق و هو صغير و يستحي عندما يرى شيئا مخالفا ، و لكني أبكي عندما أرى أحبائي ينساقون وراء أوهام خادعة بدعوى الحضارة .
إن من يضحكون عليكم بهذه الأقوال المهترئة هم الذين يسوقون إلينا نسائهم كبضائع و سلع تعرض على النت و على محطات التلفاز فأين ما يدعونه من حرية المرأة عندهم إن المرأة لديهم عبارة عن سلعة ولا تحصل على حقوقها لديهم سوى قلة يروجون لهن إعلاميا ليظهروا كأناس يطبقون الديمقراطية و لكي يا أختي أن تتابعي برنامجا مثل أوبرا لتتعرفي عليهم عن قرب !!!!
استميحكم إخواني فس الإطالة و سوف استكمل الرد قريبا
اترككم في رعاية الله و أمنه و حفظه و ألقاقكم على خير
ســــلطــــ العاشقين ـــــان

صبرني يارب يقول...

سلطان حقيقى حضرتك مش فاهم كلامي

وبخصوص الطز بتاعتك فهى ما تختلفش عن الطز بتاعتي خالص بالعكس

انا باقول طز فى حاجه مش فى صميم الدين .

واظن ده المفروض نعمله

وانا مش باقلد الاجانب اطلاقاا ناعارفه بلاويهم كويس

انا معجبه في الغرب بحجات معينه يمكن ابرزتهافى بوست ليا بعنوان احنا وهما العرب والغرب
اماالباقي فلا طبعا

بيعجبنى جديتهم فى العمل والتزامهم ونشاطهم وممارستهم الحريه وعلمهم وجرأتهم .

لكن اكيد ما بيعجبنيش الانحلال الى هما فيه .
وانا يا سيدى الفاضل لا انساق وراء احد فانا لست ممن يساقوا فمن يساق ليس من البشر الذين كرمهم الله .

اما ما تراه وانت خارج مصر لا يجعلك ابدا بداخلها يا سيدى الفاضل .
فقد كنت مثلك خارجها اتابعها من الخارج ولكن حين عدت اكتشفت انى مهما تابعتها اننى ظللت خارجها .

وما رأيته فى الطبعه الاولى ليس جديدا ولا مستحدثا

والافلام الجنسيه مش لسه جايه تظهر النهارده راجع تاريخ السينما لكن تقدر تقول انهاتعوووووود مش تظهر

المهم مش موضوعنا .
بقدر ما في فساد بقدر ما في الحمد لله خير

ومن فضلك انا اتبع نساء رسول الله وصحابيات جليلات اتبع خطاهم

واصر كل الاصرار على وجودي فى هذا العالم والمجتمع الذىاصبح فارغ القلب والعقل .

وارجوك راجع سيرة زوجات الرسول وسيرة ا لسيده نفيسه والصحابيات اجمع

ولسوف تعلم ان المرأه ليس هى المنوطه بفساد المجتمع على العكس

وشكرا لك وارجوك ان اردت النقاش فلا تلصق بي تهم انى اجاري الغرب وانشر الفساد وادعوا له .
فالله اعلم بمافى القلوب

Anonymous يقول...

MOSTAFAاوسكار لانى اتعلمت من الست دى كتيررر لازم نتقتدى بيهااا لانهاااا مش زى اى ست من بتوع النهاردة لا كن دى بتجسد روح انسانة مجوزة ورح ام لا ولاد وندعو الله ان يرزقنااا جميعاااا بمثل هذة الشخصية ذو القل المفكر والانسانة المسلمة و الطامعة فى مغفرة الله وربنااا يوفقهااااا ويهديهااا للطريق الصحيح امين يا رب العالمين