فضل الوضوء..... على الرؤيه

احبائي اعزائي كتاكيتى المدونين

اتفضلوا قدامي على

الرؤيه الاسلاميه المتواضعه

خاصتي

شوفوا الموضوع الجديد

فضل الوضوء

على الله المح بيهزر راسه وينفض ويقول عارفين البؤين الى هاتقوليهم

شويه جنان ما يضرش ...بالعكس

السلام عليكم يا قوم

ايوه النهارده انا عايزه اتكلم عن الجنان

فيها ايه دي ؟؟

الاول قبل الجنان والمجانين

النهارده عيد ميلاد محاسن صابر حبيبتى

كل سنه وانتى طيبه يا محاسن وعقبال ميت سنه سعاده وهنا يارب

ودي حفله صغننه كده على ما قسم

ادي التورته

وادي الدي جيه اي خدمه

وحشاني يا محاسن ابقى تعالي بقى

يلا بقى نخش على الجنان تعالى يا محاسن اتفضلي معانا جنان هاينفعك فى عيد ميلادك

فيها ايه لما الواحد يتجنن شويه ؟؟

بجد انا حاسه ان الناس بقوا رخمين اوي ودمهم تقييييييل وبيرخموا على نفسهم وعلى الى حواليهم

وبعدين يشتكوا الملل والزهق والخنقه

طب احنا فى مجتمع خنيق اصلا وجاثم على نفس البشر وكل واحد راشق مناخيره فى حياة الاخر

ولسانه شغال الله ينور جلد فى الاخرين وتريقه على خلق الله

كل الى باطلبه من الجميع انهم كل من وقت للتاني يدوروا على وقت يتجننوا فيه شويه عادي يفكوا عن نفسهم

نسيب بقى التنشيه والبدله والتكشيره والشغل والجد كله ونطلع حبة جنان على الوش

على فكره حلوين جدا جدا

والله دورلك على حجه بقى

بالاعب العيال مافيش عيال لاعب الكلاب الضاله

طلعت تجري على الكورنيش فجأه ابقى قول باجري ورا حرامي عادي ماهم ماليين البلد يا عمي

طلعتي تجري على البحر ورا كابوريايه (وش بيغمز يا استاذنا ) عادي قولي ايه حامل وباتوحم ونفسي فيها

تبقى ماشي كده فى البيت فجأه وتقوم مزعق بتتتتتتتتتتتتتتتتتتتت لووومونى ليه ...

زقل مراتك بالمخدات مش باحاجه تانيه مش عايزين دم زقلي جوزك بآله حاده لا لا قصدي بالورد يعنى .

لما تتجمعي انتى واصحابك ما تبقوش رخمه ومنشيين وتقعدوا تكايدوا فى بعض بلاش شغل الحريم ده .

انتهزوا الفرصه لو لواحدكم وهزروا واضحكوا والعبوا انطلقوااااااااا

اتلم انت واصحابك على سطح بيتكم مثلا وحدفوا بعض ببلونات المايه بس كل واحد يبقى ياخد معاه غيار

هههههههههههههههههههههههههه

بلاش اصحاب بلاش جرس ابقى اعمل كده وانت العيال لو عندك عيال ما عندكش عيال استلف من اي حد عيلين عادي هايرحبوا بيك جدا (اهاليهم يعنى )

المهم تشوفلك طريقه تنفس بها عن نفسك عشان الكتمه وحشه .

الناس بقى يوقولوا عليك ايه مش مهم طلعهم من دماغك انت لو عملت حساب للناس هاتشيل الحماره على راسك زي جحا

مش عارف القصه دي ؟؟ طب خلاص مش هاحكيها برضه

مش لازم تمشي فى الشارع تزقل طوب ولا العيال يزفوك ولا توصل لمرحلة الصوره الى فوق دي

لا طبعا

لكن يعنى اعطوا كل حاجه حقها الشغل شغل

والهزار واللعب اخر هزار ولعب

المهم بجد يا جماعه ما تخنقوش نفسكم

الصيف جاي اخرجوا واتفسحوا وما تكسلوش يا كسلانين يا رخمه

اجروا والعبوا حتى لو كان عندك ستين سنه ايه يعنى ؟؟؟!!!

مش قادر تجري بلاي استيشن بقى وشوف نفسك

اتنفسوووووووووووووووووووااااااااااااااااااا

املى صدرك هواااااااا وطلعه بقوووووه

التعب والمجهود احيانا يبقى فى حد ذاته متعه

مافيش خروج وفسحه وانبساط من غير تجهيز وتعب وجري

كلنا محتاجييييييييين نغير دمنا

نغير الهوا الى بنتنفسه

مش لازم تروحوا تصيفوا فى مارينا عشان تبقوا مبسوطين

والله ولو تاخد المودام والاطفال وتقعد تحت التوته الى قدام بيتكم هاتبقوا مبسوطين ان شاء الله

الى عنده توته قدام بيتهم يبعتلي حبة توت او يندهلي وانا هاجي اطلع على الشجره بنفسي

يلا ورونا الجنان بقى

سلام يا قطاقيط

مالها قاعده العواجيز ؟؟؟

السلام عليكم يا جماعة الخير

النهارده يا اصدقائي الالداء (حلوه الالداء دي؟؟ تفتكروا لغويا صح ولا لا ؟؟ مش عارفه ما علينا )



النهارده هانتكلم فى موضوع مهم جدا



الاول هاحكيلم موقف حصل معايا فى الماضي القريب



فى احد الايام لابسه الاسدال وراحه اصلي ا لمغرب لقيت جرس الباب بيضرب فتحت لقيت عمي



هو مقيم فى القاهره ولما بينزل المنصوره بيكون عند بابا



المهم



أنا : اتفضل يا عمو



عمو باقتضاب وتقفيله عارفاها : لا انتى تقدري تخرجي معايا مشوار نص ساعه كده وتسيبى العيال تحت



انا من غير ما احاول اسال مين ولا فين وازاي : ايوه طبعا يا عمو بس خمس دقايق اصلي المغرب والبس وانزلك



وحصل فعلا حتى ما كملتش الخمس دقايق ولقيته بيستعجلنى وبيدور العربيه وانا عارفه انه ممكن يمشي ويسبنى عادي

هههههههههههههههههههههه



المهم نزلت معاه



قالي: انا رايح ازور والدة صديقى فلان (ده صديق عمره وانا عارفاه كويس طبعا وانسان جميل جدا فعلا ) وهو مش هنا مسافر بره وهى قاعده لواحدها حاليا مع مراته واقل حاجه يعنى انى لما انزل المنصوره اروح اعمل معاهم واجب .ومحرج اروح لوحدي عشان دول ستات عايشين لواحدهم .



بس البهواااااات ولادي مش راضيين يجوا معايا ولا هما ولا امهم . والبنت باقولها تعالى معايا تقولي اجي اعمل ايه اقعد مع شوية عواجيز ؟؟؟!! (دي عمرها 18 سنه )



انا تقولي عواجيز امال لما اكبر شويه هايعملوا فيا ايه ؟؟؟ هايرموني جنب الحيط ؟؟!!



البيه التاني كذلك مالوش مزاج يجى (وده عمره 24 سنه )



وامهم قالت مش قادره مع ان انا عارف ان لو كان المشوار على مزاجها كانت بقت اد عشره ونزلت



الكلاااااب انا لسه باصرف عليهم وباكلهم وما بيسمعوش كلامي امال لما اكبر فى السن ويكونوا هما بيصرفوا عليا مثلا هايعملوا فيا ايه ؟؟؟!!



الحقيقه انا كنت باحاول اهديه طبعا لكن باقل كلام لانى كان ممكن اتشتم ويفتح باب العربيه ويزقلني عااادي عمي وانا عارفاه .

هههههههههههههههههه



فهمتوا ايه من الموقف ده ؟؟؟



عرفتوا طيب انا عايزه اقول ايه ؟؟؟



شايفين ازاي الولاد ما فكروش باباهم عايز ايه ولا بيفكر فى ايه ولا حتى انهم يعملوا حاجه مش هاتكلفهم اي حاجه لانهم قاعدين فاضيين مش وراهم اي حاجه فى الدنيا .

هو ايه يعنى لما الواحد يعمل حاجه مش هاتكلفه اي حاجه لا صحه ولا فلوس ولا وقت مهم عشان يرضى مامته او باباه ؟؟

لا بلاش عشان ترضي اي حد او تسعد اي حد ؟؟؟ خصوصا لو كان حد كبير فى السن ؟؟!!



ايه المشكله ؟؟؟



طيب يا ولاد خدوها من ناحية ثواب زيارة ست كبيره فى السن ومريضه مثلااااا هاتاخدوا ثواب اهو عايزين ايه ؟؟

غير طبعا رضاكم لابوكم مثلا .



عمو كمان فى الطريق قالي كلمه عرفت انا ليه ولاده عملوا كده .



قالي طب الصغيره ماشي اهي لسه صغيره



انما الكبير وامه هما كماااااااااان مش فاهمين ؟؟؟



طبعا بكل حذر عشان مااتزقلش برضه قلتله : يا عمو الصغير بكره يكبر وبنتك مش صغيره اصلا دى كبرت والكبير ما بيتعلمش فجأه الواجب بمجرد ما يكبر لازم يتعود على كده من وهو يصغير ويعرف يعنى ايه الواجب والاصول والصح والغلط مافيش حاجه اسمها بكره يكبر ويعقل ويفهم مش بتيجى فجأه .



خلصنا مشوارنا وعمي قالي انه رايح مشوار تاني زيارة صديقه المريض الى قابلنى صدفه من سنه فى بنك وعرفني من اسمي الى اتقال قدامه صدفه وده لو قصه طويله نبقى نحكيها مره تانيه ولما عرفت انه اصاب بمرض عضال خلال السنه دي ولظروف كتير اصريت اروح مع عمو كمان لزيارته الحمد لله تعالى ربنا يشفيه ويعديها معاه على خير ويباركله فى عياله .



وعلى فكره والله العظيم القاعده مع العواجيز يا ولاد مش وحشه ولا حاجه بالعكسسسسسسسسسسسس ده جميله جدا



دول بيحكوا حكايات حلوه اوي ومسليه جدا بيتكلموا عن تاريخ وناس انتم ما شوفتهومش وكمان خبرتهم فى الحياه بتخلي كلامهم له طعم تاني . اينعم ممكن تسمعوا الحكايه خماشر عشرين مره بس برضه حلوه فى الاعاده افاده .



وبعدين فكروا كده احنا بكره نكبر ونعجز ودور علينا الايام ولا يعنى هاتفضلوا شباب وصغيرين



ومافيش حاجه بتروح والله صدقوني كله عند الله بس المهم تعملوا الحاجه وفى نيتكم فعلا انها خالصه لوجه الله تعالى



احلى حاجه بقى



انى رجعت لقيت بابا بيضحك اوي و بيقولي هو انتى اتقابلتى فى عمك ازاي

هههههههههههههههه



قلتله ايه ده انتم ما تعرفوش انه جالي فوق خدني ؟؟!!!!



قالي لا بس انا خمنت كده



وطلعت قلت لولاده فوق ايه انتم فاكرين انها هاتقوله لا ؟؟ لا طبعا انا ولادي متربيين ما يعملوش كده .



حسيت ان بابا فخور بيا اوي الصراحه وفرحت اوي ان الواحد بقى مفخره كده

هههههههههههههههههههه



ولما طلعت جيت اتكلم مع البنت لقيتها بتقولي نفس الكلمه اروح اقعد مع عواجيز اعمل ايه ؟؟؟!!



قلتلها ان باباها زعلان من الكلمه اوي وقلتلها الى قاله

الصراحه حسيت ان البنت زعلت ان ابوها فهم كده وبررت يعنى بكلمه ما لهاش معنى هو ابويا انما هما يبقولي ايه ؟؟!!



قلتلها ابوكى كنتى ارضيه ايه يعنى لما تعملي حاجه مش على مزاجك عشان ترضي بابا مش هاتخسرك اي حاجه



خصوصا لما لقيتى الموضوع قلب لمشكله



انا قعدت سنين وانا بنت اروح مع بابا فى العيد الف على قرايبه من بعيد ومن قريب وناس كبار فى السن وما اعرفهمش حتى ومش باشوفهم ولا بيشفونا الا فى العيد بس كنت باروح عشان ارضي بابا عشان برضه ما كانش حد بيرضى يروح معاه



ما تبقوش انانيين يا ولاد وافتكروا انكم يوم هاتبقوا ابهات وامهات



وانكم ان شاء الله هاتعجزوا وهاتبقوا مكانهم خليكم فاكرين دي اووووي



واعملوا زي ما القرأن ما قال


وَقَضَى رَبُّكَ أَلاَّ تَعْبُدُواْ إِلاَّ إِيَّاهُ وَبِالْوَالِدَيْنِ إِحْسَانًا إِمَّا يَبْلُغَنَّ عِندَكَ الْكِبَرَ أَحَدُهُمَا أَوْ كِلاهُمَا فَلاَ تَقُل لَّهُمَا أُفٍّ وَلاَ تَنْهَرْهُمَا وَقُل لَّهُمَا قَوْلاً كَرِيمًا


وَاخْفِضْ لَهُمَا جَنَاحَ الذُّلِّ مِنَ الرَّحْمَةِ وَقُل رَّبِّ ارْحَمْهُمَا كَمَا رَبَّيَانِي صَغِيرًا





وعلى فكره مش بس مامتك وباباك لا والله وعمك شالك وخالتك شالتك والست ام ابراهيم جراتكم وقرفت العيله كله وانت صغير اكيد طول عمرك مقرف اصلا عادي



بس خلاص كفايه كده



مش معقول الرغي بتاعكم ده على فكره صدعتوني


اه قبل ما انسى

نورا انتى وجوزك مش عايزه تصييح احسن مش هايحصلكم كويس باقولكم اهو

اقروا وانتم ساكتين

جويريه بنت الحارث .. على الرؤيه

جوريه بنت الحارث الخزاعيه

زوجة رسول الله صلى الله عليه وسلم

موضوع الرؤيه الاسلاميه الجديد

قدااااااااامي على هناك

سينما صامته ....امال فين شارل شابلن ؟؟؟!!

السلااااام عليكم

خلص الاضراب الحمد لله امبارح

عملتوا اييييييييه على الله تكنوا هديتوا وما عرفتوش تمسكوا نفسكوا

الحمد لله تعالى رغم انى اغلب الايام فى الحبس مع ربع دستة اشرار الا انى امبارح لفيت الدنيا على كعبي تقريبا من فرحتي ان العيال راحوا كلللللللهم دار التحفيظ وانا كنت لوحدي

المهم بما ان الاضراب عن الفساد خلص

فهيا بنا بقى نفسد شويه

ههههههههههههههههههههههه

الصراحه انا جيت اكتب كلام من بتاعي الى انتم عارفينه الى على راي واحد على طول بتزقلي طوب وتدي محاضرات كده ؟

اه انت انت

فقلت افرفشكم بقى واحكيلكم حدوته حلوه خفيفه لطيفه من ذكرياتي

مكان الحدث كان فى الامارات تحديدا ابو ظبي

من حوالي سبع تمن تسع سنين كده مش فاكره

طبعا انا كنت لسه وقتها باقول على السكر اوكر ههههههههههههههههههه

ويادوب مفارقه مصر وحضن ماما وقرويه ساذجه مش بقى راحت المدينه

نو ابسلوتلي

دى راحت قطعه من اوربا حته واحده ولكن مع اختلاف السكان طبعاااااااااا

مش هاطول عليكم بعد ما قعدنا بتاع سنه هناك كده يادوب خلال هذه السنه ربنا اكرمنا وسددنا الديون كلها الى علينا كنا مديونيرات جامديييييييين موت

وبعدين وخلفنا مريم والدنيا لطيفه

قووووووووم جبنا رسيفر بقى واستغنينا عن الدش المركزي الى يادوووووووب بيجيب عشرين قناه حاجه قلة ادب يعنى.........

الله يرحم ايام الاولى والتانيه ولما عليت معانا كانت بتيجى السادسه بتاعة الدلتاويه الفلاحين زي ما انتم عارفين

المهم جبنا الرسيفر وابو رياض قالك لا ممكن ابدا انا لازم اجيب رسيفر حاجه الاجه كده ديجيتال ومتحرك وكان اخر حاجه يعنى ايامها

جينا نركبه قالولنا لا يا فندم عند امه يا ادهم هنا مافيش حد بيعرف يركب التركيبات بتاعة المتحرك

القصصصصصصصد رضا عمله ثابت وقالي انا هاجيب 3 اقمار

ليه ياعم

يقولي كده عشان الاوربي

برقتله بقى واتعدلتله اووووووربي يا رضا كلا وفلا وحاشا ده لااااااا يمكن يدخل بيتى ابداااا اون ماي بدى (اي على جثتي )

قالي اييييييييييه انتى نيتك وحشه ليه هو انتى بتسبيلى خنننننننقه يعنى هاعمل به ايه

انا هاجيبه عشان ماتشات كاس العالم فى منها مش هايتذاع على المفتوح وحركات كده واخدلي بالك انت

المهم صدقته عشان حاجه واحده بس انى فعلا مش باسيبله خنقه

نيهاااااااهااااااااهاااااا

المهم عملي قايمه بقى منوعه وانا استمخيت اوي من الهوت بيرد الصراحه عشان كان فيه 3 قنوات فاشون كنت باحبهم اوي

وبعدين كمان عملت قايمه كده باربع خمس ست قنوات بتعرض افلام اجنبي

اينعم بيتكلموا لغات عجيبه كده وحتى الامريكانى مدبلج بهذه اللغات الغريبه لكن اهو كانت بتلطش معايا احيانا فى فيلم حلو انجليزى وجديد نوووووووفي

وده عصر ما قبل الكمبيوتر عندي وكان فى وحده قاتله هناك طبعا وفراغ مميت

كل ده ما دخلتش فى صلب الموضوع

قاعده بقى فى مره من ذات المراير باتفرج وباقلب كده فلقيت فيلم سينما صامته ...

قلت هيه هيه فييييييييين ايام ماما ساميه كانت بتجيب شارب شابلن ولوريل وهاردي

قعدت اتفرج بقى وايه الكلام الى بيطلع فى النص ده بالانجليزى حاجه عز يعنى احتمال نفهم

استنى شارل شابلن يجى ولا اي حد مافيش هما بنتين اخوات وصديقيهم

وفجأأأأأأأأأأأاه ان ان ان تشششششششششش

ايه ده يا جدع الحق فين الرموت غير الله يخرب بيوتكم ما اتفقناش على كده الله هو في كده

وفى سينما صامته كمااااااان

هما ايام السينما الصامته كان فى قلة ادب برضه كده

المهم قلبت وقلت بلااااااااه شارل شابلن وقعدت اتفرج على الفاشون وامري الى الله اهم اخرهم هايقلعوا بس مافيش حاجه تانيه

وبعدين بعد شويه

خدنى بقى فضولي وفى نفس الوقت انزعاجي ان فى سينما صامته قليلة الادب

فقلت يمكن مشهد وعدى

لما ارجع ابص كده

لقيته فعلا الاحداث ماشيه عادي والبت اتخانقت مع صديقها اصلا وضربته بالشبشب فقلت كويس اوي

ومن مسار الاحداث فهمت انه ظبطته مع اختها قشطه يعنى كان فى اختها كمان

شويه كده واختها بقى اصبح لها دور مهم اوي اوي الصراحه فى الفيلم فانا بقى اول ما لقيت الحكايه كده قلت يا فكيككككككك

وشلت ام الفيلم والقناه كلها من القايمه بتاعتي اصلا

ههههههههههههههههههههههه

قعدت اذبهل بقى

طبعا انا زي ما قلتلكم كنت قرويه ساذجه بقى اقصى ما شوفته الاولى والتانيه

بس قعدت اربع شهور فى دبي فى فندق فايف استار وكان رضا بيشتغل طووووول النهار ومحسوبتكم قاعده فى الفندق ليلا نهارا تكلم الحيطان

والتلفزيون بقى كان عباره عن باقة الاوربت الانجليزى فقطططططططط

وانا كنت خارجه من الكليه يادوب باقول ماما وبابا بالانجليزى واتزرووونوم كده يعنى

بس غصب عني بقى بقيت اتفرج هاقعد اعمل ايه يعنى اداعب الكلاب الضاله

كنت ساعات باخرج البلكونه اتفرج على البسين والى فى البسين يا اخواتي عليهم

لا ما تفكروش..... رضا ما كانش بيطلع البلكونه من غير اذن كتابي وتصريح ومعاه مرافق انا يعنى

وطبعا الافلام بتاعة الاوربت بتبقى جايه بخيرها مش مقطعه

ابقى متفرجه على الفيلم قبل كده وهو ميت فل وخماشر وكنت باتفرج مع ابويا

وفجأة هو نفس ذات الفيلم الاقي الناس الكمل الى كنت فاكراهم مؤدبين طلعوا قلالة الادب

وفى هذه الحاله تلاقينى اتكهربت وعماله ادور على الرموت وهو بيقع من ايدى كده يا اخويا لحد ما اغير المحطه على ما يخلصوا وارجع تاني

ماهو مفيش غيرهم بقى

هييييييييييييييه دنيا طول عمري مؤدبه

ودي كانت قصة الاميره القرويه الساذجه مع السينما الصامته الى مش مؤدبه

ارجو ان نكون قد اسعدناكم ورفهنا عنكم

اضراب 17 مايو .... لا تفسد اجمع عندي مدونينا

السلااااام عليكم

طبعا كلمتكم قبل كده عن الاضراب وفكرته وكان فى البوست ده

والنهارده بافكركم ما تنسوش الاضراب يوم الاحد ان شاء الله

ومش عايزه حد فيكم يقولي انا مش مفسد

بشكل او بآخر احنا متحملين جزء من الفساد ده

ارجوكم فكروا بايجابيه شويه بلاش حكاية التملص من المسؤليه ده

فى تصرفات بنعدها صغيره ومش بناخد بالنا منها

زي كده وصلة التى في مثلا الى اساسا هى مسروقه من المحطات المشفره

لما انا اشترك فيها ده جزء من الفساد

لما تهمل فى بيتك وعيالك وتنفضلهم ده فساد

لما تنمي وتغتابي الناس ده فساد

لما تفقعي زميلتك فى الشغل مقلب عن المدير ده فساد

لما تقعد على النت تكلم بنات وتكذب عليهم على الاقل ده برضه فساد

حاجات كتير اوي اوي اوي

د. اسلام صاحب فكرة الاضراب والدعوه له

صاحب مدونة حانعيش يعنى حانعيش

عمل سلسله بتتكلم عن الاضراب وبتشرحه اكتر بعنوان من فينا الظالم

وكمان عمل بوست يقولكم تشتركوا ازاي فى الاضراب ده هتلاقوه هـــنــــــــــــــــــــــــــــــا

طيب مطلوب منكم ايه بقى كمدونين متحملين مسؤلية التدوين

انكم على مدوانتكم من دلوقتي حالا اول ما تقرا البوست ده تتفضل تورينا الهمه

انك تعمل بووووووست ينزل فيه بانر الاضراب الى فووووق ده

وتحتيه سطرين دعوه للاضراب وشرحه فى كلمتين

مفهوووووووم ايها المدونين الجدعان اوي بالصلاه علىا لنبى ؟؟

عايزه البلوج كله ان شاء الله بكره يكون لونه ازرق زي البانر الى فوق

وطبعا تسيبوا البوست ده لحد يوم الاحد بالليل

وشكرا يا حلوين عايزه اشوف الهمه من فضلكم

سعيد بن جبير .... على الرؤيه

سعيد بن جبير

امام جليل نتناول اخر مشهد فى حياته الحافله

على الرؤيه الاسلاميه المتواضعه

شرفونااااااااااااااا

النهارده الجمعه .... قولوا بابا

السلام عليكم يا حلوين

بعد البوستات الى فاتت الى كلها ضرب نار

تعالوا نرغي بقى رغي خفيف شويه

النهارده السبت عارفه ما لحقتش انزل البوست ده امبارح خلاص بقى

ايه بقى حكاية النهارده الجمعه قولوا بابا

دلوقتي كل ام فى الدنيا خصوصا لما يبقى عندها 3 اطفال ظراف لطاف خفاف كده زي الى عندي

لو عدت كده هي بيتقال لها كام مره فى اليوم ماما

ممكن يطلعوا خمسه سته مليون ماما

عارفين فى المعتقلات ؟

ايوه ايوه ربنا يبعدنا عنها يارب

مش فى بلدنا نو نو نو على راي الرايق

احنا ما عندناش معتقلات اصلا

المعتقلات الى فى شومبونجو

عشان ياثروا على الشخص المعتقل ويقر ويعترف بكل الى عمله والى ما عملوش

وشركاؤه وابوه وامه وكل الى يعرفهم

لازم يفقدوه التركيز ويتلفوا اعصابه

ازاي ؟

خد عندك بقى قلة نوم وممنوع التركيز فى اي شيء لاكتر من دقيقه

بصوت عالي بخضه بجردل مايه على راسه

بكلاب معاه فى الاوضه

وكل ما ينام يصحوا لحد ما يجيله انهيار عصبي كده يبقى جاهز بقى للاستجواب

ده برتوكول عالمي مش فى شومبونجو بس يعنى

اهو هو ده الى بيحصل بقى معايا ومع كل واحده مكاني فى الغالب

ماما ماما مامااااااااا ماماااااااااا مامااااااااااااااااااااااااااااااا

حتى وانا نااااااايمه

ده لو اتهبلت فى عقلي وقررت انام وهما صاحيين يعنى

لدرجة مره اخو جوزي بيتغدى معانا فلقى كل الى على السفره ماما هاتي كذا ماما عايز كذا صبرني هاتي كذا

قالي هو اي حد عايز حاجه هنا بيقولك انتى ؟

قلتله : اه

قالي : طب انا عايز اتجوز

هههههههههههههههههههههه

المهم قررت بقى ان اخد اجازه من هذ الانهيار العصبي

الا وهى يوم الجمعه

طبعا طبعا مش اجازه اوي يعنى لا هيهات انهم يسبوني فى حالي

انما باستمتع بقى بهذه العباره : النهارده الجمعه ... قولوا باااااااااباااااااااا

وطبعا ده لما حد يجيلى ماما مريم مش عايزه تدينى المسطره وانا مسطرتي اتكسرت و و و و ..............

الى هو دور القاضي ده

اقوله النهارده الجمعه قولوا بابا

واستمتع انا بقى انى اقعد متفرجه يوم من نفسي

ماهو طول ا لاسبوع حتى لو موجود بيبقى متفرج برضه

مافيش مانع انه ساعات يلاقي حد بيغزه فى جنبه كده ويقوله زعق بدالي شويه والنبى

وطبعا اجازة يوم الجمعه دي مستأصل منها وقت الصلاه ووقت النوم الى هو حوالي 20 ساعة نوم

وكمان جايز يكون فى وقت مستقطع مع اصحابه

بس يعنى اهو الواحد يستمتع بالمقوله

النهارده الجمعه قولوا بابااااااااااااااااااا

يارجااااااااااااااااااااااال

الله يصلح حالكم ارأفوا بحالنا شويه

والله احنا بنى ادمين زيكم ولنا نفس ناخد اجازه ولو ساعه

ولنا نفس نقابل اصحابنا

والله العظيم نرغب فى الخير كما ترغبون

وكمان والله العظيم دول ولادكم برضه مش استنسخناهم مننا ولا حاجه

ولا شاطرين بس لما العيال تكبر

تقوله انا ابوك يااااض انا الى ربيتك وعملتك بنى ادم

اسمع كلام ابووووووووك يا ولدي

لازم تستحملوهم بصحيح وهما صغيرين عشان يستحملوكم وانتم كبار

تستحملوهم وتربوهم مش تصرفوا عليهم بس

مش وظفيتكم تكونوا بنك فى البيت بس

ولا انكم تزعقوا بس وتقرفوا فى العيال وامهم باوامر

لا طبعا

اسمعهم وقاضي ما بينهم وشيلهم والعب معاهم

واهتم تعرف التفاصيل من مامتهم مهما كانت صغيره او مش مهمه

وانت طبعا مهم ومش معقول تفكر فى الحاجات الصغيره دي

بس معلش تعالى على نفسك شويه

واسمع قصة المدرسه الرخمه الى زعقت للولد النهارده

والبنت السخيفه الي زعلت بنتك في المدرسه وقالتلها يا كلبه

واندهش وقولها هااااااو ديد لازم تقولي للميس عليها

واحضر حفلة اخر السنه الى بنتك مشتركه فيها ما تبقاش خنيق

واسمع شكاوي مراتك وطبطب عليها وقولها معلش

من حقك ومن حقهم ومن حقها والله تلاقي حد يشاركها مشاكلها حتى لو كانت فى نظرك صغيره

الا ان صدقنى المشاكل الي انت شايفها هايفه دي ممكن تغير مسار ابنك او بنتك

ومن موقعي هذا يا حريم

عايزه اطالب بحقوقنا فى اجازه ولو شهريه

بلاش اسبوعيه احنا مش طماعين

يعنى بالذمه مش من حقنا مره مثلا فى الشهر كده نخرج ولو نص يوم بلاش يووووووووم

نص يوم مع اصحابنا لواحدنا من غير عيال ؟

ويتحمل هو مسؤلية ولاده نص يوم ما يروحش يحدفهم عند مامتك ولا مامته ؟؟؟

لحنا حق ولا ما لناااااااااااااش حق

اشمعن هما بيخرجوا مع اصحابهم يعنى

اعضاء جمعية المرأه المتوحشه اجمع عندي قولوا رايكم

اضراب 17 مايو .... لا تفسد

تحديييييييييث هام

بناءا على ما ورد لنا من تنبيه من الاخت اليس فى بلاد العجائب ان يوم 15 مايو ده يوم جمعه

قلنا مش معقول يعنى نعمل حركه زي كده

وبعد ما دوخت علىما وصلت لدكتور اسلام الى نزل البانر تقريبا وطلع يجري

فهو قالي خلاص نخليه يوم 17 على اساس ان السبت كمان بيبقى اجازه

وعليه تم التعديل ده

والبانر الجديد اهو عيشوا بقى حياتكم

****************************************************

السلام عليكم

بعد الخناقه الى فاتت نتكلم بقى كلام مالوش دعوه بالخناق عشان انتم عارفين خنقتى منكم اد ايه

المهم

الموضوع الى هانرغي بشأنه هو اضراب 17 مايو

والى نادى به د. اسلام صاحب مدونة حانعيش يعنى حانعيش

والاضراب ده لا ها نتجمع فيه ولا نندد ولا نشجب ولا اساسا هانتحرك من اماكنا الطبيعيه

احنا هانضرب عن الفساد

هانبطل احنا الاول فساد

لمدة 24 ساعه

ما حدش يقولي انا مش مفسد

ولله الحمد كل واحد فينا متحمل جزء من الفساد الى في البلد دي

جايز يكون نظام الحكم عندنا فاسد

انما كمان احنا اصبحنا بالتبعيه مجتمع فاسد

اوجه الفساد كتيره اوي بنشوفها كل يوم وكل ساعه وفى كل مكان تعالوا نقول امثله عشان نفهم اكتر

الرشوه الى بتدفعها عشان تمشي المسائل بسرعه ...... ده فساد

مخالفة قوانين المرور الى المفروض تطبق فى حضور او غياب كماين المرور ما تفرقش كلها مخالفات .... ده فساد

اهمالك فى شغلك وعملك واستهبالك وكلمة على اد فلوسهم ..... ده فساد

لو كنت انت مش مرتشي ولا بتسرق لكن شايف وسايب ناس تسرق .... ده فساد

لما تشتم وتقل ادبك على كل الناس ولسانك يبقى مش نضيف وتزعق ..... ده فساد

لما تكذب وتخدع وتخون اهلك ولا اصحابك ولا مديريك ...... ده فساد

الانانيه والبخل فى العطاء المادي والمشاعر حتى واهمال مشاعر الناس ... ده فساد

عدم التمسك بدينك وتعاليمه المحترمه اي كان دينك (كل الديانات السماويه لها تعاليم لو مشينا علينا هانبقى زي الفل) .... ده برضه فساد

عدم الاتزام بالمواعيد والاستهانه بوقت الناس وحياتهم وظروفهم ........ ده فساد

عدم احترام الراي الاخر والمصادره على اراء الاخرين وقلة الادب الى بتصاحب السلوك ده ...... ده فساد

كمان لما تروح مكان بتدفع فيه تذكره وتدفع الفلوس وما يجيش لك صبر تستنى تاخد التكت بتاعك انت كده بتساعد على الفساد ماهو هياخد الفلوس بالتاكيد ومش هايوردها ...... ده برضه فساد

وحاجات كتير اوي اوي اوي

مش ساعفاني الذاكره

المهم اننا عايزين فى اليوم ده نبطل فساد نعيش يوم نضاف

جرب تعيش انسان

انسان نضيف ملتزم محترم مجتهد متعلم هاديء اخلاقه عاليا يعرف ربنا ويخافه ويحبه يحب الناس والناس تحبه

ايه رايكم فى الفكره دي ؟؟

يوووووووووووووم

يوم واحد فى السنه اقلع عن الفساد

لا تنخرط انت فى الفساد ولا تجعله مفروض عليك

يوم واحد افرض انت نفسك واخلاقك الكويسه على العالم كله

مش هايحصل حاجه

جرررررررررب تعيش انسان

الاضراب ده يوم 17مايو

الى فيكم عايز يشارك ياريت ياخد الصوره الى فوق دي ويحطها عنده بانر مع وصله من

مدونة حانعيش يعنى حانعيش

الى عامل سلسله بوستات بيتكلم فيها عن الاضراب

اسمها مين فينا الظالم وياريت ننزل الوصله دي كمان بتاعة مجموعة البوستات

وان شاء الله قبل الاضراب بيومين هابقى افكركم تاني

تحياتي لكم جميعا

يخربيت الى يزعلكم

سلام عليكم

يخربيت الى يزعلكم

اه اه يخربيته

انا ما زعلتكوش ولا جيت ناحيتكم

شوفوا بقى انا بقالي يجى اسبوع باهاتي من قلبي ان حد يفهم ما حدش عايز يفهم

طلعتوا روحي منكم لله

وكل شويه اقول الله يسامحك يا باحث يا ابن ام باحث ( الباحث عن الحقيقه) عشان هو الى طلب مني موضوع عن التعدد

واضح ان الموضوع الى ناقشته على المدونتين كان موضوع بمثابة صباع فى عين الرجاله

وفى قلب كل واحده جوزها فكر يتجوز عليها

والواحد بعد كده فى القضايا الخلافيه دي يبقى يعمل دكتاتور ويقفل التعليقات ويريح نفسه الا انتم جبتولي صداع

وطلعتوني باجاهز بالذنب وباناصر جمعيات حقوق المرأه وباقلد الغرب وفى نفس ذات الوقت مستبده برايي ومستقويه ومعقده نفسيا وخايفه جوزي يتجوز عليا

الهي تتوكسوا وكسه بنى يا الى بالي

المهم

انا بقى اعلاء لمدأ الدكتاتوريه فى المدونه دي والاستبداد بالراي هاقول بؤين واقفل التعليقات عليهم كمان

الجماعه الى بيقولوا التعدد سنه

الرسول عليه الصلاة والسلام اتجوز 7 فى وقت واحد

الجدع فيكم يورينا نفسه ويعمل زيه الله هى مش سنه ولا ايه ؟؟؟

الى هايقول حكم خاص هاحط صبعي فى عنيه بقى ازاي حكم خاص وسنه ؟

وعيسى عليه السلام ما اتجوزش خالص

والقرآن قال كده

ورهبانية ابتدعوها ما كتبناها عليهم الا ابتغاء رضوان الله فما رعوها حق رعايتها فاتينا الذين امنوا منهم اجرهم وكثير منهم فاسقون

سورة 57 - آية 27

مش كان اولى يسنوا سنة نبيهم هما كمان ؟؟

عشان بس الى بيقولي التعدد سنة الانبياء كلهم

بس خلاص ما اسمعش صوتكم بقى

الى عايز يعدد يتفضل يهوينا ويروح يعدد حد منعكم ولا هى هرتله فى الكلام وخلاص

مش قادرين تعملوها قاعدين تسقفوا وتهللوا وخلاص

هاقفل التعليقات على البوست ده تدخلوا تقروا وتمشوا من سكات

وانا هاروح بقى اكتب بوست جديد نتكلم فى حاجه جديده يا خنيقين يا مملين