السبت، 23 مايو 2009

مالها قاعده العواجيز ؟؟؟


السلام عليكم يا جماعة الخير





النهارده يا اصدقائي الالداء (حلوه الالداء دي؟؟ تفتكروا لغويا صح ولا لا ؟؟ مش عارفه ما علينا )



النهارده هانتكلم فى موضوع مهم جدا



الاول هاحكيلم موقف حصل معايا فى الماضي القريب



فى احد الايام لابسه الاسدال وراحه اصلي ا لمغرب لقيت جرس الباب بيضرب فتحت لقيت عمي



هو مقيم فى القاهره ولما بينزل المنصوره بيكون عند بابا



المهم



أنا : اتفضل يا عمو



عمو باقتضاب وتقفيله عارفاها : لا انتى تقدري تخرجي معايا مشوار نص ساعه كده وتسيبى العيال تحت



انا من غير ما احاول اسال مين ولا فين وازاي : ايوه طبعا يا عمو بس خمس دقايق اصلي المغرب والبس وانزلك



وحصل فعلا حتى ما كملتش الخمس دقايق ولقيته بيستعجلنى وبيدور العربيه وانا عارفه انه ممكن يمشي ويسبنى عادي

هههههههههههههههههههههه



المهم نزلت معاه



قالي: انا رايح ازور والدة صديقى فلان (ده صديق عمره وانا عارفاه كويس طبعا وانسان جميل جدا فعلا ) وهو مش هنا مسافر بره وهى قاعده لواحدها حاليا مع مراته واقل حاجه يعنى انى لما انزل المنصوره اروح اعمل معاهم واجب .ومحرج اروح لوحدي عشان دول ستات عايشين لواحدهم .



بس البهواااااات ولادي مش راضيين يجوا معايا ولا هما ولا امهم . والبنت باقولها تعالى معايا تقولي اجي اعمل ايه اقعد مع شوية عواجيز ؟؟؟!! (دي عمرها 18 سنه )



انا تقولي عواجيز امال لما اكبر شويه هايعملوا فيا ايه ؟؟؟ هايرموني جنب الحيط ؟؟!!



البيه التاني كذلك مالوش مزاج يجى (وده عمره 24 سنه )



وامهم قالت مش قادره مع ان انا عارف ان لو كان المشوار على مزاجها كانت بقت اد عشره ونزلت



الكلاااااب انا لسه باصرف عليهم وباكلهم وما بيسمعوش كلامي امال لما اكبر فى السن ويكونوا هما بيصرفوا عليا مثلا هايعملوا فيا ايه ؟؟؟!!



الحقيقه انا كنت باحاول اهديه طبعا لكن باقل كلام لانى كان ممكن اتشتم ويفتح باب العربيه ويزقلني عااادي عمي وانا عارفاه .

هههههههههههههههههه



فهمتوا ايه من الموقف ده ؟؟؟



عرفتوا طيب انا عايزه اقول ايه ؟؟؟



شايفين ازاي الولاد ما فكروش باباهم عايز ايه ولا بيفكر فى ايه ولا حتى انهم يعملوا حاجه مش هاتكلفهم اي حاجه لانهم قاعدين فاضيين مش وراهم اي حاجه فى الدنيا .

هو ايه يعنى لما الواحد يعمل حاجه مش هاتكلفه اي حاجه لا صحه ولا فلوس ولا وقت مهم عشان يرضى مامته او باباه ؟؟

لا بلاش عشان ترضي اي حد او تسعد اي حد ؟؟؟ خصوصا لو كان حد كبير فى السن ؟؟!!



ايه المشكله ؟؟؟



طيب يا ولاد خدوها من ناحية ثواب زيارة ست كبيره فى السن ومريضه مثلااااا هاتاخدوا ثواب اهو عايزين ايه ؟؟

غير طبعا رضاكم لابوكم مثلا .



عمو كمان فى الطريق قالي كلمه عرفت انا ليه ولاده عملوا كده .



قالي طب الصغيره ماشي اهي لسه صغيره



انما الكبير وامه هما كماااااااااان مش فاهمين ؟؟؟



طبعا بكل حذر عشان مااتزقلش برضه قلتله : يا عمو الصغير بكره يكبر وبنتك مش صغيره اصلا دى كبرت والكبير ما بيتعلمش فجأه الواجب بمجرد ما يكبر لازم يتعود على كده من وهو يصغير ويعرف يعنى ايه الواجب والاصول والصح والغلط مافيش حاجه اسمها بكره يكبر ويعقل ويفهم مش بتيجى فجأه .



خلصنا مشوارنا وعمي قالي انه رايح مشوار تاني زيارة صديقه المريض الى قابلنى صدفه من سنه فى بنك وعرفني من اسمي الى اتقال قدامه صدفه وده لو قصه طويله نبقى نحكيها مره تانيه ولما عرفت انه اصاب بمرض عضال خلال السنه دي ولظروف كتير اصريت اروح مع عمو كمان لزيارته الحمد لله تعالى ربنا يشفيه ويعديها معاه على خير ويباركله فى عياله .



وعلى فكره والله العظيم القاعده مع العواجيز يا ولاد مش وحشه ولا حاجه بالعكسسسسسسسسسسسس ده جميله جدا



دول بيحكوا حكايات حلوه اوي ومسليه جدا بيتكلموا عن تاريخ وناس انتم ما شوفتهومش وكمان خبرتهم فى الحياه بتخلي كلامهم له طعم تاني . اينعم ممكن تسمعوا الحكايه خماشر عشرين مره بس برضه حلوه فى الاعاده افاده .



وبعدين فكروا كده احنا بكره نكبر ونعجز ودور علينا الايام ولا يعنى هاتفضلوا شباب وصغيرين



ومافيش حاجه بتروح والله صدقوني كله عند الله بس المهم تعملوا الحاجه وفى نيتكم فعلا انها خالصه لوجه الله تعالى



احلى حاجه بقى



انى رجعت لقيت بابا بيضحك اوي و بيقولي هو انتى اتقابلتى فى عمك ازاي

هههههههههههههههه



قلتله ايه ده انتم ما تعرفوش انه جالي فوق خدني ؟؟!!!!



قالي لا بس انا خمنت كده



وطلعت قلت لولاده فوق ايه انتم فاكرين انها هاتقوله لا ؟؟ لا طبعا انا ولادي متربيين ما يعملوش كده .



حسيت ان بابا فخور بيا اوي الصراحه وفرحت اوي ان الواحد بقى مفخره كده

هههههههههههههههههههه



ولما طلعت جيت اتكلم مع البنت لقيتها بتقولي نفس الكلمه اروح اقعد مع عواجيز اعمل ايه ؟؟؟!!



قلتلها ان باباها زعلان من الكلمه اوي وقلتلها الى قاله

الصراحه حسيت ان البنت زعلت ان ابوها فهم كده وبررت يعنى بكلمه ما لهاش معنى هو ابويا انما هما يبقولي ايه ؟؟!!



قلتلها ابوكى كنتى ارضيه ايه يعنى لما تعملي حاجه مش على مزاجك عشان ترضي بابا مش هاتخسرك اي حاجه



خصوصا لما لقيتى الموضوع قلب لمشكله



انا قعدت سنين وانا بنت اروح مع بابا فى العيد الف على قرايبه من بعيد ومن قريب وناس كبار فى السن وما اعرفهمش حتى ومش باشوفهم ولا بيشفونا الا فى العيد بس كنت باروح عشان ارضي بابا عشان برضه ما كانش حد بيرضى يروح معاه



ما تبقوش انانيين يا ولاد وافتكروا انكم يوم هاتبقوا ابهات وامهات



وانكم ان شاء الله هاتعجزوا وهاتبقوا مكانهم خليكم فاكرين دي اووووي



واعملوا زي ما القرأن ما قال


وَقَضَى رَبُّكَ أَلاَّ تَعْبُدُواْ إِلاَّ إِيَّاهُ وَبِالْوَالِدَيْنِ إِحْسَانًا إِمَّا يَبْلُغَنَّ عِندَكَ الْكِبَرَ أَحَدُهُمَا أَوْ كِلاهُمَا فَلاَ تَقُل لَّهُمَا أُفٍّ وَلاَ تَنْهَرْهُمَا وَقُل لَّهُمَا قَوْلاً كَرِيمًا


وَاخْفِضْ لَهُمَا جَنَاحَ الذُّلِّ مِنَ الرَّحْمَةِ وَقُل رَّبِّ ارْحَمْهُمَا كَمَا رَبَّيَانِي صَغِيرًا






وعلى فكره مش بس مامتك وباباك لا والله وعمك شالك وخالتك شالتك والست ام ابراهيم جراتكم وقرفت العيله كله وانت صغير اكيد طول عمرك مقرف اصلا عادي



بس خلاص كفايه كده



مش معقول الرغي بتاعكم ده على فكره صدعتوني


اه قبل ما انسى
نورا انتى وجوزك مش عايزه تصييح احسن مش هايحصلكم كويس باقولكم اهو
اقروا وانتم ساكتين


هناك 58 تعليقًا:

Ahmed يقول...

والله لو الرغي كله كده كلام في الجون يبقى يلا نرغي طول النهار

في حاجه مهمه جدا مش بناخد بلنا منها

أقل كلمه أو حركه ممكن متلفتش نظرنا, بتأثر كتير جدا جدا في الناس اللي اكبر منناد

عشان كده أمر ربنا لينا اننا نخفض جناح الذل. وكأن الشباب قوة وليه جناح عالي لكن لازم ينخفض للوالدين

صبرني يارب يقول...

احمد ابو العلا

تمام الله يفتح عليك يا بشمهندس نوووووووورت

مصري جدا يقول...

لو كان عمك مع بنتة زي ما عمل معاكي بالظبط بلا أختيار
كانت المشكلة أتحلت صح

صبرني يارب يقول...

لا طبعا

لان هو قالها فعلا يلا تعالى معايا قالتله لا

لكن الفارق هو طلب من مين

ولو كان بابا الى مكانه كنت برضه هاقول حاضر

انا كل الحكايه لو كان عمو بيقولها وهو مش باين عليه انه مقفول اوي كنت ممكن اسأله طب احنا راحين فين يعنى؟

انما ياعم ما سألتش العمر مش بعزقه


مش كل الحوار بينه وبين بنته انا قلته

يوميات شاب منوفى يقول...

انا شخصيا بحب الاقعدة مع الناس الكبار بسمع منهم حجات مسلية جدا وجميلة خصوص جدتى لما تحكى عن عمايل بابا وهو صغير ههههههههة بتبقى حجات مسخرة بس انتى موافقك رائع مع عمك وربنا يكملك بعقلك كدة على صول تقبلى مرورى

Sweet Violet يقول...

طبعا معاك حق فى كلامك

بس ياصبرنى العيب مش فى الاولاد اكتر منه عيب اهل

يعنى دلوقتي تلاقي الاب او الام مشغولين فى مشاكلهم و حالهم و مش بيشوفوا اههلهم الا كل شهر و اوقات بتعدي الشهور كمان يعنى صله الرحم شبه ضايعة ..يبقى منتظرة ايه من الاولاد نفسهم ؟؟؟

للأسف رتم الحياة اللى احنا عايشنها افقدنا معانى و احاسيس كتير زى صله الرحم والحب و التعاطف ..ألخ

مابقناش نسأل عن احوال بعض ولا نشوف احتياجات بعض ولا اصلا بنحس ببعض

انتي عارفة بقى ان القاعدة معاهم رغم انها ممتعة الا انها بتقلب مواجع جامدة وحزن و تفجر مليون سؤال جوه الواحد حول التغيير اللى حصل في الزمن ده من قيم و اخلاق و مبادئ

ايه السوداوية اللى انا فيها دي بس ..

سيبك انتى بقى بجد كان نفسي اشوفك امبارح فى اللقاء و زعلت انك مش جيتى ):

مسدس صغير يقول...

مالها قعدت العواجيز
دا حتى بيكلمونا عن سعد زغلول والثورة والملك وعبد الناصر وغيره وغيره
هههههه
لا بجد طاعة بروا ابائكم يبركم ابناؤكم..
طب انتى عارفه ان من بر الوالدين بعد مماتهم ان الواحد يبر اهل ودهم..
انه يزور اللى همه كانو بيزوروهم.
ويود اللى همه كانو بيودوهم.
بجد بوست هايل وجميل
وبيتكلم عن مبدأين حلوين
وهما صلة الرحم وطاعة الاباء والامهات.
احييكى على البوست
نورتى المدونة

حنعيش يعنى حنعيش يقول...

كلة سلف ودين ....جدتى كانت دايما تقول كدة ....بس ماحدش بيسمع ...حلو الوست قوى يا صبرنى

صبرني يارب يقول...

يوميات شاب منوفي

اتفضل على الجدود بقى

هايفضحوا الابهات
ههههههههههههههههه

نورت وربنا يكرمك

صبرني يارب يقول...

سويت فيوليت

وانا كمان زعلت وما زلت زعلانه وحاقده عليكم من قلبي انتى عارفه

بس هاعمل ايه

وطبعا انا دايما باشوف ان العيال مش طلعوا كده لواحدهم اكيد الى ربوهم طلعوهم كده بشكل او باخر

فاتيما يقول...

الأول أزيك يا صبصب و مبسوطة قوى إنى سمعت صوتك يا حبيبتى و سلامة مرمر ألف سلامة إن شاء الله تبقى بخير و فى اتم صحة
ثانيا يا ستى إنتى قولتيها فى معرض حديثك من غير ما تقصدى
كنتى و إنتى صغيرة بتلفى مع باباكى على القرايب تعيدوا عليهم فكنتى متعودة أصلاً على القيام بصلة الرحم دى من بدرى بدرى بينما عمك ممكن يكون معملش كدا فالعيال مستتقلين الحكاية دى
قعدة العواجيز كلها بركة و خير و مش مسألة ثواب دا الواحد بيتعلم منهم و يطمن إن الدنيا ممكن يكون لسه فيها خير و امل دا كفاية العبر اللى فى قصصهم
ثالثا بقى احييكى بشددددددددددددة على الصورة اللى حطاها دى
أنا بموت فى المابيت شو بكل ابطاله و عرايسه و إنتى رجعتيينى عيلة لمدة ثوانى بالفرجة على الصورة
بوسة و حضونة بقى و خلى بالك من القمرتين و سلامنا لرضا العزيز

صبرني يارب يقول...

حنعيش يعنى حنعيش

ايوه فعلا كله سلف ودين والله

تحياتي لحضرتك ومن بعض ما عندكم والله

نورتنا

صبرني يارب يقول...

مسدس صغير

الله يكرمك يارب

تمام كده بر الوالدين ببر اهلهم واحبائهم الرسول عليه الصلاة والسلام كان بيكرم اهل خديجه وصحويبتها محبة فيها

ودى كانت زوجته مش امه

تحياتي لك ونوووووورت

صبرني يارب يقول...

فاتيما

تعيشي يارب ربنا يكرمك

طيب ماهو انا قلت ان عمو لما التمس العذر للبنت الى هى اصلا مش صغيره ولا حاجه وانا قدها كان مكتوب كتابي

وقلت عرفت ليه العيال ردوا عليه كده


وبالنسبه للمابت شو ده هاروح ابوسهم حالا ما دام انتى بتحبيهم يا قمر

ولو تحبي ارجعك يبقى عندك خمس شهور عادي قولي بس وانا اجيبلك شادر صور
هههههههههههههه

نورتي يا جميل

mira يقول...

بصى موضوعك بجد جميل بس احب اقولك
ان اللى بيحب اعدة الناس الكبار مش كل الناس من الشباب والكبار دة بيكون طبع وبال يعنى انا بصراحة شديدة
انا كنت بعشق انى اعد مع بابايا وهوة بيحكى عن مواضيع كتيييير زى ما قلتى عن تاريخ وناس ومواقف ومواضيع كنت بحس انها لذيذة وكنت بلف معاه فى العيد وامناسبات بردوة زيك فى ناس كتير يمكن يكونوا مش شباب يعنى كبار فى السن وبيضايقوا من اعدتهم بصى لو اتكلمت اكتر من كدة هاطول عليكى الموضوع كبير والكلام عنة كتير
تقبلى تحياتى

شمس النهار يقول...

ازيييييييييييك

احسن عشان ماجيتيش معانا مالقيتيش حاجه تعمليها غير انك تكتبي بوست ذكرايات:)


كلامك كله حكم ياريسه
بس مين يقرا ومين يسمع
طب امبارح انا كنت عجوزه مع شباب زي الورد وضحكنا واتكلمنا
ماحسوش بحاجه
ليييييه
عشان الكبار دايما لما بيتكلموا مع الصغار بيكون في فجوه وتعالي وابست حاجه لو اختلفوا يقول له انت فاهم انت ياابن امبارح

فاطبعا بيهربوا من المناقشه والقاعده اللي كلها
جيل مهبب
ده احنا كنا وانتم لا
لازم الكبار يشغلوا مخهم شويه علي الاقل عشان مايتحرموش من قاعدتهم مع الصغار
حلو الكلام

همس الاحباب يقول...

هههههههه
والله انتى مشكلة با ام مريم
بس احيانا بتقولى حكم ومواعظ
ههههههه
ربنا يبارك فيكى
فعلا بر الوالدين فرض علينا وكذلك صلة الرحم وبر اصدقاء الاب والام حتى بعد وفاتهم بر بهم
وكذلك زيارة المريض صدقة
تحياتى وتقديرى

صبرني يارب يقول...

ميرا

ماشي ما احنا عايزين نتعود يبقى عندنا بال وروح للكبار والصغار كمان


تحياتي ليكى ونورتينى

صبرني يارب يقول...

شمووووووسه

مين الى عجوزه يا بطه

ده انتى لسه شباب يا ماما انا باتكلم عن ناس عدو الناحيه التانيه 70 وانتي طالعه

ههههههههههههههههه

وبعدين انت قمر يا قمر

قشطه بالعسل انا عارفه

في زيك انت

نورتي يا حجوجتي

اتقابلوا او اتقابلوا

وسبوني هنا اجتر الذكريات

صبرني يارب يقول...

همس الاحباب


طبعا كلي مشاااااااكل طول عمري انت عارفه


تحياتي لك ولا فض فوك

نورت

ঔღঔ نـــوارة ঔღঔ يقول...

هههههههههههههه

عمك دا طبق الاصل بابا بطريقة كلامه ونرفزته وهو مدايق :)

وبيعقد يخانق ويزعق ومش بقدر اقاطعه وبعقد اهز براسي ومش بيكون يخانقني بيكون يتكلم عن حد تاني :)

والله البوست رائع وفيها ايه يعني لو ارضوا باباهم

لازم نكون رحمين بالاباء والامهات لانه بيكونوا حساسين ومحتاجينا معهم

يسلم نفوخك ياقمراية

جزاك الله كل خير

ستيته حسب الله الحمش يقول...

انتي ست جدعة نعمل ايه احنا بقى

اعرف واحدة زيك كانوا فاكرينها هي مرات الأب مش بنته لأنها دايما في زيارات البلد حداهم هي اللي معاه
ههههههههههههههههههههه

بنجاواتى يقول...

سلام عليكم

بجد انتى لفتى نظرى لحاجة ما كنتش واخد بالى منها خالص

وعلى فكرة قاعدة العواجيز دى جميلة والله كفاية لما يطلب منك حاجة وانتى تعمليها وانتى مبتسمة كده وطبعا هو نسى من زمان ان حد يبتسم فى وشه فبيبقى فى غاية السعادة

هو اى نعم المشكلة عندى انى لازم ازعق علشان يسمعونا بس مش مشكلة اوى يعنى عموما انا بقعد ساكت واسمعهم وهما بيتكلموا

بس عمك ده ما شاء الله قد ما هو طيب وودود لكن عنده عصبية جميلة كده لدرجة انه بيشتم ولاده

تحياتى

صبرني يارب يقول...

نوراه

ربنا يخليلك بابا يا قمر

وتسلمى يا جميل ونورتي

صبرني يارب يقول...

ستيته

اهاااااا كانت بتحصل ساعات لو كنا رايحين عند حد غريب او ما شافش بابا من زمان


مين الواحده دي ؟؟(وش بيغمز )

صبرني يارب يقول...

بنجاواتي

اه هو عمو فعلا طيب اوي

بس يا اخويا عليه عفريت لما بيقوم علينا ممكن نتزقل في الشارع عادي ههههههههههههههههه

على فكره عمو مش كبير فى السن اوي يعنى

ده فى الخمسينات

انا اقصد بالعواجيز الى هو كان رايح يزورها الست الكبيره فى السن

طيب انت جربت تعمل لهم حاجه

طيب جرب بقى تطلب منهم حاجه هما يعملوها ويحسوا بقيمتهم كده في الدنيا

يااااااه بيبقوا طايرين

نووووووورت

KHALED يقول...

بجد الموضوع حلو قوى المرة دى و تنبية لحاجة ممكن يقع فيها الشباب و الشابات بتوع اليومين دول بس برضة رغاية آخر حاجة .. ههههههههه

عمرو يقول...

و الله يا صبرنى القعده مع الناس الكبار فى السن غير اٍنها ممتعه لكن كمان فيها ثواب كبير لأن لا يخلو اٍنسان كبير فى السن من مرض ما قد يكون بسيطا و قد يكون مش بسيطا :)
و طبعا زيارة المريض لها أجر و ثواب كبير ..
و ممتعه لأنك بتسمعى منهم حقائق و حكايات لها العجب .. يعنى مثلا أنا أهو قدامك شاب فى عز شبابى و سيبك من الكام شعرايه البيض اللى أشعلوا الرأس شيبا :)
لكن لما بأقعد مع عيالى و أقول لهم أنى أشتريت كيلو اللحمه الكندوز ب 68 قرش و أكلت ربع كيلو الكباب من عند أبو شقره ب 2 جنيه بالسلاطات و العيش و الله ..
و يا سلام بقى لما أحكي لهم اٍزاى قضيت أسبوع فى اٍسكندريه سنة 1975 بأصيف و قاعد فى أوتيل نضيف على البحر فى كليوباترا و متهنى و مبسوط و بأتعشى كل يوم عند أباظه ب 30 جنيه :)))))
يقولوا لى أسبوع مصيف فى اٍسكندريه ب 30 جنيه ؟؟؟!!! ( مش مصدقين يعنى )
أقول لهم أيوه يا جيل ما يعلم بيه اٍلا ربنا ..
يبدو مش أنتى لوحدك اللى بقيتى رغايه !!
بس يظهر أنه فعلا صح كل ما الواحد بيعجز بيبقى رغاااااااااى !!

MǿиY El-Shreef يقول...

انا بمووووووووووت ف قعدات الستات الكبار دي

خدوني معاكم المره الجايه

كلامك كله ف الجون ياصبرني :)

ياريت الواحد يعمل دلوقتي لله عشان ربنا يوفقله الي يقف جمبه اما يكبر هو كمان

تعيشي وتفتكري يا قطه :)

بسنت صلاح الدين يقول...

والله قعده العواجيز و الناس كبار السن دول بتبقى متعه على الاقل بالنسبه ليا،مواضيعهم تحسيها ليها طعم تانى ،و كل كلمه فى حكمه وخبره كمان،و بيبقى دمهم خفيف والله،ربنا يكرمك زى ماريحتى قلب عمك

صبرني يارب يقول...

خالد

ااممممممممممم (وش مفكر وبيستحلف )

حلو المره دي ؟!!!

هل معنى ذلك انى الى فاتوا كانوا كفته

ماشي طب كنت تعالى قولي مواضيعك كفته يا صبرني عادي كنت هاقولك هات الطحينه معاك


ما علينا

ماله الرغي والنبى حلو
ههههههههههههههههههههههه

نورت

صبرني يارب يقول...

استاذ عمرو

ايووووووه لا بابا عنده اسعار تانيه خالص

ويقولك خد خمس قروش جبت بهم بنطلون وقميص وحركات كده
ههههههههههههههههههههه


وانا صغيره كنت اقعد احلم بقى ان الواحد يركب سفينة الزمن ويروح يشبرق نفسه من الماضي ويجى

هههههههههههههههههههههه


وايه الناس لما ببتعجز بتبقى رغايه دي ؟؟؟

قصدك ايه

انا عندي 18 سنه انت عارف

ههههههههههههههههههه


نووووورت يا استاذنا
كنت لسه راحه احرر محضر تاخير

صبرني يارب يقول...

بسنت

اه والله بجد بيبقى دمهم خفيف جدا

نورتي يا جميل

صبرني يارب يقول...

موني الشريف

اوووووووك

دى حكاتلي يومها عن مغامرات فى تربية الحمام وطبخه

وطبعا اول ما شافتنى

عمي قالها دي شيماء بنت اخويا

بصتلي كده لفووووق طبعا

وقالتله شيماااااااااااااء

ما شاء الله ده كبرت ده كانت لسه بتيجى فى ايدك كده صغيره
ههههههههههههههه

قالها يا حاجه دي عندها دلوقتي 3 عيال
ههههههههههههههههه

عسل اوي وربنا

MaNoOoSh يقول...

بجد حكاية صلة الرحم وزيارة الناس دي من أكتر الحاجات اللى انا مقصرة فيها جدااااااااااااااااااااااا
علشان كسولة وبتكسف وببقى قاعدة زي الخرساء مبلاقيش حاجة أقولها وبرد على قد الكلام يدوب.

لكن الناس الكبار دول انا معاكي جدا وأنا بحاول أبقي صبووووووورة على قد ما اقدر مع جدتي (اصل طبعها صعب قوي وبتشتم)
هههههههههههههه
سلام يا قمر

تامر علي يقول...

فعلاً ...أنا من ساعة ما كبرت في السن ومش لاقي حد ييجي معايا في حته العيال أندال قوي فعلاً ....:)

على فكرة الجيل الجديد كله كده أي حاجه عنده (خنيقة) ومش عاوز يتعتع من مكانه إلا علشان مصلحته وانانيته ... ودي يتحمل جزء كبير منها الكبار برضه

هييييه فين أيام زمان لما كان جوز الحمام 3 فرد ... ياللا حسن الختام:)

ذو الوجه المبتسم يقول...

السلام عليكم
تعرفى انتى عسل بجد
ومش بترفضى لحد اى طلب
ولما عمك يطلب منك تخرجى معه يبقي
اوعى ترجعيه فاضى
بس عاوز اسال سؤال
بتستأذنى من زوجك قبل الخروج
ولا انتى متفقة معه على ان الاذن open

تقبلى تحياتى

أحمد حسن البنا يقول...

السلام عليكم ام مريم
بمضى حضور عشان ماتفتكريش انى مش موجود انا بقرا كل رغيك والله ولما اكون معكنن باجى عندك عشان افرفش بس مقصر فى الردود غصب عنى والله بس حقيقى المدونة فاكهة الواحد مهما قرا فيها مايشبعش ومبروك النيو لوك رغم انها متاخرة بس متاكد انك عارفه انى متابعك كويس جدا
تحياتى ياست رغاية هانم

صبرني يارب يقول...

مانوش

مقصره ليه هاتي ودنك

هااااتي ودنك


هههههههههههههههههه


وتيته عادي ايه يعنى لما تشتمك انتى غريبه اوي ده اقل واجب

لما تشتمك قوليلها صباح الخيييييييير يا تيته

صبرني يارب يقول...

تامر علي

ههههههههههههههههههه

شكلك كده انت الى ما بترضاش تروح مع باباك
ههههههههههههههه

اه جوز الحمام 3 فرد والنبى يا اخويا خليهم اربعه

يعنى عشان يبقى يملا العين شويه

نوووووووورت

صبرني يارب يقول...

ذو الوجه المبتسم


طبعا طبعا قلت لجوزي

هو اصلا كان فى البيت وقتها

وخلي بالك عمي يبقى عمه هو كمان

حتى هو قالي والراجل ده طلع كده يقولك تعالى معايا

الله هو قادر عليا ولا ايه عشان هو عمي يعنى يعملوا فيا كده
هههههههههههههههههههههههه



وخلي بالك بيدخل المدونه هنا دايما ولو قلت عسل تاني ماليش دعوه هايعورك يا معلم

صبرني يارب يقول...

احمد حسن البنا

يا باشا انت تنور فى اي وقت

انا والله سبتلك رساله اوف لاين سألت عليك لما غبت علينا


ربنا يكرمك ونورت والله يبارك فيك

حنين القلب يقول...

الله يا صبرنى
والله كلامك عجبنى جدا

صح فيها ايه لما تحاول تساعد او تزور حد كبير فى السن حتى لو مش علشان ترضى ابوك او امك

لالالالا
علشان ترضى ربك
زيارة المريض صدقه والناس الكبيرة دى ممكن تكون قاعده كل حلمها ان حد يخبط عليهم الباب ويلاقوا حد يقعد معاهم شويه

اسوء شىء فى الدنيا الوحده
ربنا ما يكتبها على حد ابدا

ان يكون كل حلمك فى الدنيا انسان تسمعه ويسمعك بدل صدى صوتك اللى مش بتسمع غيره

بت يا صبرنى
انتى جدعه اوى وانا كمان فخورة انى صاحبتك
بجد والله
وبحبك موووووووووووووووووووووت

صبرني يارب يقول...

حنين

يا قمر ربنا يكرمك والله انتى الى جدعه وانا باحبك

وحشاني يا بت والله

Soul.o0o.Whisper يقول...

السلام عليكم و رحمة الله و بركاته

تصدقى فعلا إنهم رغايين
صدعونى أنا كمان

يا ساتر يارب

المهم يا بنتى
سيبك منهم
خلينا فى اللى كنا بنتكلم فيه


اه
العواجيز على فكرة باحبهم جداااااااااا

بجد والله
و بأحب حكياتهم
و نوادرهم


بجد باستمتع جدا

و كمان فعلا كفاية ثواب عيادة مريض
طب ادخال السرور عليهم
والله كفى بها ثواب


ربنا يجعله خالص لوجهه يارب
و يتقبله منا

دمتى بود يا جميل

عاشقه الرومانسيه يقول...

ياااااااااه ياصبرنى
كلامك رجعنى لذكريات جميله مع بابا
وماكنتش باشبع من حكاياته ابدا ابدااااااا
سواء حكايات عن طفولته او شبابه او كلامه عن عبد الناصر وايامه
انا حبيت عبد الناصر من حب بابا له
واول فيلم دخلته سينما فى حياتى كان عن عبد الناصر وكنت مع بابا
ويومها ضحكنا كتير وقلت له يعنى اول مره تدخلنى سينما يكون فيلم سياسى وانا حافظه احداثه منك؟
والله حرام
ههههههههههههه

بجد رجعتينى لايام جميله باتمنى اعيش منها ولو لحظه دلوقتى
ربنا يخليكى ليا يااجمل صاحبه فى الدنيا
وماتخافيش لما تكبرى وتعجزى هابقى اجى انا واقعد معاكى
هو انتى حد يشبع من خفة دمك دى ابدا؟
حتى لو حكيتى نفس الموضوع خمستاشر مره

بحبك جداااااوربنا شاهد

دعاء يقول...

يا رب لما أكبر ألاقى حد زيك كده يبقى ييجى يزورني
والله اللى زيك بقوا قليلين قوى
ربنا يبارك فيكى

صبرني يارب يقول...

سوووووووول

نورتي يا جميل وربنا ينفعنا بثواب صالح الاعمال

صبرني يارب يقول...

عاشقه الرومانسيه


الله يرحمه ويجمعك به فى الجنه ان شاء الله


وانا كمان والله باحبك يا دودو



مش عارفه على ايه









هههههههههههههههه

صبرني يارب يقول...

دعاء


والله يا اختي وانا كمان عايزه لما اكبر برضه الاقي حد زيي
ههههههههههههههههه

نورتي يا جميل

سبهللة يقول...

والله انا قعدت مرة مع واحدة ست عجوزة
هى تبقى عمة حماياوانا حمايا متوفى من حوالى شهر عن عمر 73وهى على الاقل لا يقل عمرها عن 85سنة بأى حال من الاحوال.. والمصيبة انها مش بتسمع
والمصيبة الاكبر انها حبتنى جدا وكانت اول مرة اشوفها فى ايام العزاء
واذا بها تمسك ودنى وتحكيلى حكاياتها من ايام الملك فاروق وطبعا هى ما بتستناش انى ارد عليها لانها فى كل الاحوال مش هاتسمع وكنت برد بتعبيرات وشى
بس بصراحة انا اتبسطت جدا
يمكن لانها كانت محتاجة جد تتكلم معاه وانا تقريبا فرجت عنها شوية
وعلى رأيك
مالها اقاعدة العواجيز

Mo7ammed يقول...

جميلة جدا
وياريت الناس كلها تحس بأهاليها
بجد ياجماعة الناس دى بتتعب لمين غيرنا يعنى ؟
واحنا ولا تمران فينا حاجة
يبقى اقل حاجة اننا نريحهم ولو نفسيا بأى كلمة حلوة ولا ابتسامة

تسلم ايدك واسلوبك العثل ده ^_^

KHALED يقول...

ههههههههههههههههه

لا طبعا أنا ماقصدتش إن إللى فات كان وحش بس فعلا حسيت إن البوست دة مهم قوى بسبب موضوعة إللى بيغيب عن شباب كتير ..

صبرني يارب يقول...

سبهلله

طب كويس اوي

ما تشوفلها عريس يا بنتى
ههههههههههههههههههههههههههه

ربنا يكرمك يارب

صبرني يارب يقول...

خالد

انا عارفه والله انا باهزر معاك

صبرني يارب يقول...

محمد

حلو اوي واحنا لا تمران فينا دي


اصل انا باقعد لما اتعب نفسي اوي مع العيال

اسأل نفسي ياترى العيال دي هايتمر فيهم ولا ايه الظروف
ههههههههههههههه


متشكره لك ونورت

عطش الصبار يقول...

بوست جميل وبيلمس مشكله موجودهوبصفتى من الناس العواجيز اللى فى ال55 هقولك ان احيانا السبب فى المشكله مش الشباب احنا احيانا بنبقى السبب فى الفجوه الموجوده بين الكبار والصغار كتير مننا بنستخف بااراء الشباب وما بنسمعش ليهم وبننسى ان احنا عشنا نفس احاسيسهم ومشاكلهم ومش معنى ان السنين اللى مرت علينا اكسبتنا الخبره يبقى ما نحترمشفكر الاصغر
وزى ما قلتى احيانا القعده مع الكبار بتبقى لذيذه قوى وان صغيره كانت عندى هوايه الجلوس والاستماع للكباروبنتى ورثت الهوايه دى منى عندها قدره على استيعاب كل تفاصيل حكاويهم من صغرها
اما موضوع تكرار الحواديت خماش ر عشرين مره عادى ياعنى انا احيانااعمل كدا بس قبل مادخل جوه تفاصيل الحكايه ااقول سمعتوا الحدوته دى قبل كدا؟ اذا سمعتوها قولوا والاالعقوبه انكم تسمعوها قبل الاكل وبعده
عموما بوست حلو قوى انا كاتبه حاجه مشابهه ليه ياريت اعرف رايك وبعدين لكل الشباب زياره المريض صدقه وصله الارحام وزيارتهم صدقه والكلمه الطيبه صدقه وكلنا هنمر بنفس الفتره وربنا يدينا ويديكم الصحه وهتلاقى نفسكم ماشيين على نفس الخطى
تقبلى تحياتى

صبرني يارب يقول...

عطش الصبار

لا يا حياتي ما تهربيش من الحياه 55 سنه مش عواجيز ولا حاجه


هههههههههههههه

وفعلا احيانا كبار السن بيكونوا متعبين اوي
بس بررررررررضه لازم نستحملهم

هاجيلك يا جميل