السبت، 20 يونيو، 2009

سرير بيبى لكل مواطن


باديء ذى بدأت احب اقول مبروووووووووووك يا دودو الف الف مبروك
دودو يا جماعه عاشقة الرومانسيه قروا فاتحتها النهارده عقبال ما يقروا القرآن كله ونجوزها ونخلص منهااااااااااااا
قصدي ونفرح فيها
يووووووووه
نفرح بيييييييييييييها
الف الف مبروك يا دودو وربنا يجعله خير عليكى ويكتبلك دايما كل خير ويتمها عليك بكل خير
وباهديلك يا دودو يا حياتي اغنية لواحظ اختي خطبوها
لا لا اقصد يا نخلتين الى شغاله دي قشطه يا دودو



السلام عليكم ايها المدونون الكرام
ازيكم كيفكم اشحالكم اش اخباركم اشلونكم اش علومكم
واي حاجه تانيه كم او نص كم مش مهم


شوفوا يا احبائي وكتاكيتى انا من موقعي هذا قررت ان لازم يكون في لكل مواطن سرير بيبى


لا لا مش عشان ينام فيه لا لا ما يجيش على اده ده علشان ينيم فيه البيبى فعلا لما يجى .


وايه الجديد ؟؟


استنوا بقى عليا


اكتر من مره الفتره الى فاتت اكون باكلم حد من اصدقائي والاقيه بكل بساطه بيقول ان بنته او ابنه عمرهم مثلا 3 سنين


او اكتر او اقل شويه وبيناموا مع مامتهم فى السرير ؟؟!!!


وات ؟؟ ليه يعنى حضرتك


يقولك ماهو ما بيرضاش ينام الا كده ؟؟!!!


نعم ما بيرضاش ينام الى كده ؟؟!!


طب ماهو ما بيبقاش راضي يتفطم هاتسبه يرضع لحد ما يروح الكليه ولا ايه ؟؟؟!!!!


شوفوا يا ساده يا كرام انا واحده خلفت 3 عيال عمري بتاتا البته ما نيمت حد جنبي
اااااااه كله كوم واحتلال السرير بتاعي كوم تاني .


ايه ده مش كفايه احتلال نفسيتى واعضائي الداخليه فى الحمل كمان الواحد ما يعرفش ينام ساعتين لو اتحصل عليهم يعنى .


الله الوحد ازاي ينام وفى شخص ما نايم جنبه والواحد يفضل خايف يتقلب احسن يخبطه ولما يكبر شويه كل ما هو يتقلب اصحى انا


الله هو انا ملقيه ولا ايه ؟؟


انا فاكره مره دخلت على اختي الكبيره لقيتها نايمه على ظهرها وعلى ايدها اليمين طفل والشمال طفل وعلى بطنها بيبى رقم 3 كانت عندها شهرين


طبعا انا فى هذه اللحظه قررت اربي لها عيالها الى هى ما عرفتش تربيهم


واقمت حرب لمدة شهر فترة اقامتهم عند ماما عشان العيال الدزم دول يناموا لواحدهم ونجح الشبشب ابو ورده والى من غير ورده فى اتمام العمليه


والوش بقى الخشب طلع للعيال وامهم وامي كمان الى كانت معترررررضه على الوضع بتاع ولاد اختي وفى نفس ذات الوقت بتعمل زي كل ام خلصونا وناموا على اي شكل بس ناااااااااااموا


وصل الامر مع ولاد اختي ان الولد كان عمره 6 سنين وبعد ما نام واستغرق في النوم مامته قامت تقعد بره ترضع البيبى الصغيره وانا كنت قاعده معاها


لقيت الواد طالع واقف على باب الاوضه وايده فى وسطه وبزعق لامه .. انتى قومتي لييييييييه بقى ؟؟
طبعا انا تلقائيا رفعت الشبشب وجريت وراه قائله هى على ذمتك ياض ؟؟؟


وقعدت فى الحرب دي شهر مع العيال الدزم دول لحد لما سافروا وبعد ما سافروا اتصلوا بيا مخصووووص عشان يقلولي انهم بيناموا لواحدهم دلوقتي .

لذلك انا اؤيد الانفصال التام عشان الكل يرتاااااااح وينام


وبعدين ده احسن للبيبى جداااااااا من كل النواحي


اولا : ينام براحته فعلا مش مزنوق فى السرير ولما يكبر يتقلب ويعيش حياته


ثانيا : ما يتعداش منك او من باباه لو كان عندكم برد وممكن طبعا يكون عندكم الفيرس ومش حاسين .


ثالثا : البيبي لما يبقى عمره 3 شهور ممكن يتقلب ويتحرك على السرير وعليه لو كان نايم وقمتي من جنبه ممكن يقع فى سريره مش هايقع


ولا سيما لو كان سرير بقى من الى جداره عالي الطفل بيفضل لحد عمر سنه ونص مثلا ما بيعرفش يخرج من السرير لواحده .زي السرير الى فى الصوره فوق ده والى من وجهة نظري احسن سرير بيبى واكترهم عمليه
وده بيديكى امان انه لو صحي ما يقمش يعملك مصيبه وانتى مش واخده بالك


رابعا : هايتعود انه ينام لواحده مش لازق فيكى لان لو بينام جنبك هايتعود على كده وهايبقى صعب فصله . حتى انتى نفسك هاتلاقي صعوبه انك تنامي من غيره .


ما تقوليش وايه يعنى ده قلبي وروحي ما ينام جنبي لا ماهو هايجي يوم لازم ويبعد عندك خصوصا لو جبتى بيبى غيره هاتجيبى مكان منين انتى؟؟


وبعدين لما تعوديه ينام فى سرير منفصل


لما يبقى عمره سنتيه تطلعيله سريره بره الاوضه وينام فى اوضه تانيه خصوصا لو كان له اخوات اكبر منه يعنى ممكن قبل سنتين كمان يتقلب فى اوضه تانيه بس ايه مش اطلع بره يا كلب محروم من الميراث


لا تمسك مايك كده وتقف فى وسط الشقه وتقول يا جووووودعان نزف اليكم خبر ان زعبوله القله كبر خلااااااص من هذا التاريخ العظيم هاينام فى اوضه تانيه لواحده تصفييييييييييق حاد .


فهو يحس ان دى مكفأه يعنى ويهلل بقى وهايتقبل الموضوع عادي جدا
ساعة ا لنوم هايعترض عادي نقوله انت كبرت وكلمتين قرع كده حلوين ما نفعوش يبقى شخطه حلوه المهم ان القرار يتنفففففففذ اوعى ترجع فى كلامك من اول يوم لو رجعت يوووووووم هاترجع كل يوم يا معلم .

وبعد شهر مثلا او اكتر شويه تنقليه بقى من السرير بتاع البيبى للسرير بقى كبير عادي بنفس الاحتفاليه الهبله
وبيكون الموضوع ايسر كتير من حكاية انه نايم فى حضن ماما على طول

طيب انت عندك اساسا طفل وكبر ومش عارف تنزعه من ملكيتك الخاصه الى هو سريرك يعنى ؟
تعمل اييييييه ؟؟


وانت مروح النهارده تاخد معاك زواق حفلات على كام صوره من بتوع العيا لدي الى بتتزلق على بوستر ارقام وحروف وحيونات وحركات
وتاخد فى ايدك ابنك ولا بنتك


وتعملوا احتفاااااااال بقى عشان كبر الولد وطلعله شنب ايوه دقق بس وانت تشوفه
وتزوقوا الاوضه وماما توضبها وحركات جامده اوي وتخلوا الواد يقص الشريط وعلى سريرك يا معلم
وده ينفع من عمر سنتين ونص عادي واقل من كده لو كان عنده اخوات اكبر
وخدوا بالكم من نقطه مهمه فى ناس كتير بيعملوها


لما تكون الام حامل بالفعل يفضل الطفل ينام جنبها لحد ما تولد واول ما تولد فجاه يلاقي نفسه بيترمي فى اي مكان اخر
فى سريره جنب بابا جنب تيته اي ركن بقى عشان يفضي مكان للبيبى الجديد
طبعا هايكره البيبى وهايكره نفسه والعيشه والى عايشنها
خلوا بالكم اوووووي من النقطه دي


والطفل الاول بيكون اكتر الاطفال غيره
عشان كده لو كنتى حامل وعندك حتى سرير بيبى بينام فيه الطفل لازم تشليه من السرير ده قبل ما تولدي بكام شهر
وتفكي السرير ده خااااااالص وتخفيه
وتنقليه بقى لسرير كبيره وهيه وكبرت والحركات الى انا قلت عليها فوق


ولما تقربي تولدي تجيبوا السرير بقى بتاع البيبى وتخلوا الطفل الكبير هو الى يساعد فى تركيبه وتجهيزه للبيبى وتحسسوه انه هو متحمل مسؤلية البيبى ده


البيبى ده جاي عشان يبقى اخوه وهو الى هاراعيه مش عشان ياخد منه حضن ماما ودلع بابا والسرير كماااااان حصلت يا كلاب ؟؟؟!!! ده الواد الى بيقول


و لنا لقاء تاني بقى عن الغيره بتاعة الاطفال ان شاء الله من واقع خبرتي وعذاباااااااتي
اتفضلوا بقى قدامي كل واحد على سريره على الله الاقي حد نايم جنب مامته ولا نايم فى سرير اخوه


هناك 66 تعليقًا:

ستيته حسب الله الحمش يقول...

قبل ما اقرأ البوست اللي اطول من الليلة البيضا احب اشجب وادين واندد بطول البوست

كما احب اهنيء وابارك وازغرد على أول تعليق

ستيته حسب الله الحمش يقول...

وفي تاني تعليق ينبغي علينا في جمعتنا دي نهنيء البنت دودو عاشقة الرومانسية
ونقول لها ربنا يخلي ميدو يعقلك كده وترسي وتبقي ميت فل واربعتاشر
ويارب ربنا يتمم لك بخير

ستيته حسب الله الحمش يقول...

وفي تالت تعليق احب اقول
هييييييييييييييييييييييييييه
المدونة مدونتنا انتشروا يا عيال طنطكم صبرني ها تعمل لنا محشي
طب كوباية شاي الاول طيب

بكرة اقرأ بقى البوست انا معرفش اكروت كلامك

صبرني يارب يقول...

ههههههههههههههههههههه
يا خالتي ما انتى عرفااااني
رغايه موووووووت

معلش بقى استحملوني

هاستناكي يا جميل

Bola 7elmi يقول...

صبرني يارب ...
بجد موضوعك حلو أووووي .. عاوزا أقولك انو دي مشكله أختي فـ توأم وانهم دايما نايمن جمبها و ياحرام مبتعرفش تروح ف النوم وطول الليل قلق .
(( أنا مش عارفه هتفطمهم ازاي الشهر الجاي وهيتفصلو ازاي عنها )) !!!!

قصة ان الاطفال يتفصلو ف النوم عن امهم انا متفقه معاكي جدا جدا جدا .. ومن الشهور الأولى ...
ربنا يخليلك ولادك :)

Sweet Violet يقول...

الاول مبرووووك لدودو مليون مبرووووك
ويااارب يتمم لها على خير ^_^

تعالى بقى فى البوست

(وانت مروح النهارده تاخد معاك زواق حفلات على كام صوره من بتوع العيا لدي الى بتتزلق على بوستر ارقام وحروف وحيونات وحركات)

قصدك ايه ياصبرنى هه يعنى الاطفال بس اللى الاوضة بتاعتهم كده ولا ايه

ايه العنصرية دى ..مش تخصى الكلام بالاطفال بس ياصبرنى بلاش بقى اللى انتم فيه ده P:

نشكرك جدااا على النصائح الجميلة

طبعا انا لسه مش عارفة ايه النظام

لكن اهو الواحد بيتعلم منك

ربنا يخليك لينا ياصبرنى ياااااااارب

بس انتى طلعتى شريرة قوى فى معاملة الاطفال ):

بنجاواتى يقول...

بنجاواتى يقول

بنجاواتى يقول
-البلوجر هنج ولا ايه :P-

هو السرير اللى فى الصورة ده بكام؟؟اوعى يكون غالى..
اصل انا نويت اجيبه من دلوقت

الامهات لازم تحس بنفسية الاطفال شوية مش كل حاجة اكل وشرب وهبل من ده

بس انا مكنش عندى سرير زى ده وانا صغير
مليش دعوة انا عاوز واحد

تحياتى

ستيته حسب الله الحمش يقول...

سبحان الله
مانوسة تنام في سريرها من اول يوم لها في الدنيا وان حد خرجها منه كانت متعرفش تنام ياعيني ان شا الله 3 ايام متواصلة
وعياط ونكد لحد ما تلمسه تعوض النوم كله


بس هي فضلت فيه لحد كي جي 1 وبعدين جبنا لها واحد محترم كبير

وانتقلت اوضه لوحدها من سن سنتين عادي جدا والحمد لله ده كان سبب شخصيتها المستقلة جدا


وبعدين جه عفرتو صغنن واصنن انما جبار

عادي جدا نام في سريره من اول يوم

واول ما بقى عنده سنتين وبيعرف يخرج منه لوحده اجي اتقلب الاقيه جنبي

ابوه يتغاظ يشيله من قفاه يوديه اوضته

يسهي ابوه ويجي ينام جنبي تاني بس من الناحية التانية
يقوم ابوه يصلي الفجر يلطشه ويشيله يرميه على سريره

وهكذا ياأختي لا الكبير بييأس
ولا الصغير بيتساهل مع ابوه ويكبر عقله

النهاردة بقى شحط عنده 10 سنين وممكن عادي جدا اجي اتقلب الاقيه في قفايا

والله تحيا البنات
الطف المخلوقات
وكمان عاقلات

واحدة مفروسة يقول...

هههههههههههههههههههههههه
على رايك لازم الست تنام لوحدها فى السرير
الحاجة الوحيده اللى ممكن تعملها لوحدها
هههههههههههههههههههههههه
بدل ما تلاقى بيبي يعمل بيبي على السرير
و لا زوج بيشخر
هههههههههههههههههههههههه
لازمن ولا بد سرير لكل مواطن سواء زوج او ابن
هههههههههههههههههه
الاتنين بيعملوا ازعاج و قلق

كلام فارغ اوى يقول...

معاكى حق والله رغم ان البوست طويييييل
بس والله معظم الناس بيحاولوا يعملوا كده بس ما بيعرفوش يطبقوا ده

عمرو يقول...

ألف مبروك يا عاشقة الرومانسيه و ربنا يتمم بخير اٍن شاء الله و عقبال كل البنات و الشباب يفرحوا كده يا رب ..
يا أم خالد أوافقك تماما على رأيك السديد بارك الله فيكى ..
و ده اللى بأحاول دايما أعلمه لبنتى الكبيره أم أحمد حيث أنها على طول مرنخه الواد فى حضنها رغم أنه داخل على السنتين و لما أنصحها أن ده غلط تعيط و تحضن الوله و تقول : ميدو نونى حبيبى ما يبعدش عنى اٍهىء اٍهىء و كأنى بأقولها مثلا وديه على باب جامع و سيبيه !!
و بعد كده نرجع نتساءل مستغربين عن سبب هذا الكم الهائل فى الخلل اللى بيصيب الناس على اٍختلاف أعمارهم ..
أؤيدك تماما و تقبلى تحياتى و تقديرى ..

صبرني يارب يقول...

بولا حلمي

الشهور الاولى مين يا بنتى من اول يوم ايه المشكله ؟؟

انا ربيت ولادي كده من يوم فى السرير ولما يصحى ولا يجوع اشيله ايه المشكله ؟؟

السرير بتاعه بيبقى لازق فى السرير بتاعي بحيث انا شايفاه وسامعاه وطايلاه بايدى فين المشكله بقى

شجعيها على انها تفصلهم بس بعد الفطامه

هاتتعب شويه معاهم بس هاترتاح بعد كده

صبرني يارب يقول...

سويت فيوليت

يا بنتى انا شريره مع الكل مش الاطفال بس
هههههههههههههههههه

وطبعا مش الاطفال بس يا معلم الى عقلهم على ادهم برضه بنعملهم كده
ههههههههههههههههههههه

على ادهم وكبير يعنى
ههههههههههههه

وان شاء الله تعملي كده والا هاجيب ابو ورده واجيلكم
هههههههههههههههه

صبرني يارب يقول...

بنجاواتي

ولا انا والله تصور ؟؟

والسرير الي فى الصوره ده يعمله 400 جنيه

بس لو عايز نصحيتى بقى اعمله خشب زان عموله

بيطلع تحففففففففه انا شوفته فى ورشه هنا
وجامد بقى حديد يستحمل عشر عيال تباعا

السرير الى فى الصوره ده استحمل عندي ال2 بسلام
الى ان جاءا لاستاذ خالد كسره تمامااااااا ما عادش فيه ولا عمود اه والله يا اخويا كسر اللحام الحديييييد شوف القدره

اعمل جمعيه يا ابنى من دلوقتي
هههههههههههه

صبرني يارب يقول...

سوتيته حياتي

نعم عشر سنين وتلاقيه جنبك ده انا ممكن اعضه فى قفاه يا ستيته

هههههههههههههههههه


انا برضه كده على فكره عادي يعنى اصحى الاقيه جمبي

مره يصعب عليا لو الجو برد اخده فى حضني شويه

قوم ينغز ا بوه برجله فى جنبه يقوم شايله من قفاه على بره
هههههههههههههههههههه

وهكذا عااااااادي

المهم الطفل يفهم ويسلم ان مكانه الطبيعى والاصلي هو السرير


الى عندي كان مرتبط بالسرير جدا فى النوم هو خالد

ما كانش يعرف ينام على ايدى لااااااازم احدفه فى السرير
ههههههههههههه

نورتي يا خالتي

صبرني يارب يقول...

مفروسه حياااااااتي

لا لا لا انتى كده عايزه الرجاله يعملوا ثوره ولا ايه

انا ما قلتش يا اختي يطردوا الرجاله
هههههههههههههههه

لا يا مفروسه كفايه انا لسه رابطه صباعي من يوم بوست التعدد عشان كنت حطاه فى عين الرجاله
ههههههههههههههههههههههه

نورتي يا جميله ووحشاني والله

صبرني يارب يقول...

كلام فارغ

البوست الطويل ده من شيم المدونه عندي

مش رغي ؟؟؟
ههههههههههههههههههه

انتى جايه عند رغايه ليه ؟هههههههههههههههه

ومش بيعرفوا ينفذوه علشان بيستسهلوا

عيشنى النهارده وموتنى بكره

المهم الواد فى هذه اللحظه يسكت ويخرس وينام

مش مهم جاي ايه بعد كده

نورتي

صبرني يارب يقول...

استاذ عمرو

ايوه ما انا عارفه الادمغه دي

لا ابعتهالي بقى عشان انا عارفه انها حامل وبجد ده هايعمل مشكله مع احمد لما البيبى يجى

اقولك خليها وانا هاعجي اعضها
هههههههههههههه

نورت يا استاذنا

مصري جدا يقول...

يا خوفي لا الزوج كالعادة يتكعور وينامفي سرير البيبي والزوجة والعيال ينامو ويبرطعو في سريرة
أنتي بالمعدات بتاعتك(الشبشب ابو وردة والذي منة) تعلي حملة علي بيوت المدونين أية رأيك

ديالا يقول...

اولا مبروك لدودو

ثانيا بقي

انا عن نفسي لمااتجوز عايزه سرير لجوزي وسرير للبيبي

اصلي اساسا مبحبش حد ينام جمبي بحب احتل السرير لوحدي

وبوستك جميل ودمه كمان خفيف اوي

الجواز و سنينه يقول...

فكرتينى بحالى ليه 2و نص تقريبا فى احتلال طفولى
مش عارفه اطلع منه
بس هاحاول فى الصيف انى اعمل استقلال
الحلو بقى انى الاقيلى انا سريرى لوحدى ياسلالالالالالالام تبقى هيه دى الاستقلاليه بجد

عاشقه الرومانسيه يقول...

اولا ميرسى جدا على تهنئتك ليا
وفرحتك فيا
يووووووه
قصدى بيا
اما عن السرير ونوم العيال
فانا بعد قرأه البوست ده
نويت والنيه لله
انى بكل فخر لمااتجوز
هاخلف وابعتلك العيال تربيهم بطريقتك
ابو ورده بقى ولا ابو فيونكه انتى حره

انا كفايه عليا ابوهم
(:
ايه رأيك؟
موافقه طبعا
طيب على خيرة الله

MǿиY El-Shreef يقول...

اولا اولا

مبروووووووووووووووووووووك لدودو الامورة العسوله حبيبة قلبي ربنا يدوم عليها فرحتها ياااااااارب

ثانيا بقى

انتي صح جدا جدا

ومن امتى انتي مش صح يعني :D

لا بجد انا عجبني تفكيرك خصوصا ف حكايه غيرة الطفل الكبير لما يجي يجي اخوه ونرمي ده بقى :D

احب اهنيكي واشد ع ايدك ~> حلوه اشد ع ايدك دي هههههههههه

وحشتني بوستاتك الي زي العسل

موووووووووواه

مامة مازن يقول...

اولا مبرووك وربنا يفرح قلوبكم جميعا
ثانيا والله عندك حق دا طب العيال عندى بينامو فى سرايرهم عادى بقالهم فترة فالعيال علشان عارفين انى رافضه حد فيهم يقرفنى ويلذق فى حضنى يقومو يقولولى احنا زعلانين يا ماما علشان مش عايزه تنامى فى اوضتنا احنا مش هنتضايق لو نمتى معانا عادى انتى مامتنا حبيبتنا شوفتى ولاد الايه بيتذاكو عليا هههههههههههههههه
المهم مشهد اختك ده عشته كانت مريم على دراعى ومازن بيبى مكانش بينام الا على بطنى ااااه متفكرنيش الحمد لله عدت وانا لسه بعقلى ههههههههه
دمتى اختى بكل خير

أحــوال الهـوي يقول...

اختي الفاضلة
اشكر لك سؤالك و اهتمامك

تحياتي

بسنت صلاح الدين يقول...

انتى هايله والله فكره جنان اوعدك اول ماتجوز و اجيب بيبى هاعملها علطول هههههه،انا معاكى فى كل كلمه و صوتى راح من كتر مابنادى بالموضوع ده مع اصحابى و قرايبى ،كده احسن ليكى و للبيبى عشان ميتعلقش بيكى زياده عن اللزوم و تطلع شخصيته كده مستقله و ميخافش انه يقعد لوحده و كمان عشان تاخدى راحتك فى اوضتك ومع جوزك اللى نسيتى تقوللى انه اكيد هايبقى متضايق و مش بعيد يقولها خدى ابنك وناموا انتوا الاتنين فى الاوضه التانيه لأنه مش لاقى عروسته اللى كانت لسه من كام شهر بتدلعه و مش عامله حفله نوم على سريرهم الخاص

رؤية يقول...

عموما يعنى يعنى
انا ما بحبش انام جنب حد
^_^

بس كويس اخدت معلومات افدتنى

تحياتى

nody يقول...

كويسه فكره البوست

الطفل لما يتعود انه ينام لوحده
بيتعود انه يكونله شخصيه مستقله
وما بيبقاش ماسك فى ديل أمه لما يكبر

enjy يقول...

كلام زى الفل الله ينور

اكتر حاجة عجبتنى انه مش كلام وبس لا انتى حطيتى طرق كمان الناس يعرفوا ينفذوا بيها هاذوها المخطط الشرير نيهاهاها

فعلا كلامك صح والله ومينفعش نربى الطفل على عدم احترام الخصوصية

شمس النهار يقول...

ياام خالد

اختصري ياامي
البوست متر ونص(هو المتر بكام)

:)

كلامك صح جدا
وعلي فكره نوم الطفل بين ابوه وامه مش بس غلط علي نفسيت الطفل بس علي نفسيت الاب كمان
واحيانا بيسبب فتور
والاب بدون مايشعر بيحس ان الام بتفشل اولادها عنه وفي اللا وعي بيبتدي يغير ويترجم ده لحركات غبيه منه
وتبتدي مهاترات ومشاكل كتير

البوست جميل وزي بخضه طويل طويل
امرنا لله

هنعمل ايه بنتنا وبنحبك هنرميكي عشان بوست طويل شويه
:)

عطش الصبار يقول...

يااااااااااااااااااااه ياخساره كان نفسى استفيد من البوست ده
كان فيها ايه لو كتبتيه من تلاتين سنه
فعلا الطفل حسب ما اتعود
وبرضه دا ما يمنعش اننا نعرف ان الطفل مفاوض جيد
ياعنى هيستخدم كل الاسلحه اللى تخلى مامته تستسلم وكل ماما وشخصيتها بقى
تقبلى تحياتى

صبرني يارب يقول...

مصري جدا

ما عنديش مانع بس كله بحساااااابه

مش هانقطع الشباشب اوانطه بقى

صبرني يارب يقول...

الجواز وسنينه

اهم حاجه الصبر والاصرار على الموقف

لو رجعتي فى كلامك يوم يبقى كل حاجه اتهدت

صدقينى حياتك هاتتغير

صبرني يارب يقول...

ديالا

خليها فى سرك اصل لو سمعوكي هايطفشواالعرسان

هههههههههههههههههههه

نورتي يا جميل

صبرني يارب يقول...

موني الشريف

طيب يا جميل علقي البوست ده حلقة فى ودنك واهم حاجه الاصرار

صبرني يارب يقول...

عاشقة الرومانسيه


اييييييييييه يا ماما نو نو نو

شكرا يا اختي خليهوملك


انا ناقصه ياامي

مبروووووووووووك يا بت

صبرني يارب يقول...

مامة مازن

ايوه عارفه النغمه دي

بس احيانا يعنى ادخل انام معاهم شويه كده دلع ونلعب حبه واقوم على سرير وهما عارفين انى مش باعرف انام الا فى سريري

عيال مكااااااارين

ههههههههههههههههه

نورتي

صبرني يارب يقول...

احوال الهوى

حضرتك كنت فين غايب لعله خير ان شاء الله نورتنا

MaNoOoSh يقول...

دة انا من قبل ما يتولدوا اساسا هنيهم فى سريرهم
ههههههههههههههههههههه
معرفش ازاي بس دي مشكلة ابوهم مش مشكلتي
بس هو ييجي الاول بس ويتدبس


بجد كلام حقيقى جداااااااااااااا
والواحد ياما شاف امهات بتتعذب بسبب الحكاية دي وبردو بتسيب العيال تعمل اللي فى دماغها

حواء يقول...

اولا مبروك لستيته علي اول تعليق
ثانيا الف مليون مبروك لدودو
وربنا يسعدكم يارب
ثالثا : بخصوص البوست بقي
عندك حق جدا ياصبرني
انا عن نفسي فاطمه من اربع شهور وانا فصلتها خالص عن سريري ولما تمت ست شهور فصلتها خالص في غرفه منفصله
ولكي ان تتخيلي كمية البهدله والكلام اللي في الجناب من كل من العائلتين
لا وايه اي حد يجي يزورنا من القرايب ولسه معرفش موضوع فاطمه
وجت سيرة العيال وحد افتكر
يقولوهم علي اللي حصل وزي مكون بعمل جرم لا يغتفر
وخدي بقي عندك
انتي قلبك حجر
انتي ام انتي
انتي ايه يابنتي مبتصعبش عليكي
وطبعا سعات برد
وسعات بطنش
وسعات بحس ان اللي قدامي هايف وعايز يتريق ويهزر علي اي حاجه وخلاص
تحياتي

mahasen saber يقول...

صبرنى تجننى بخفة دمك دى وقعتينى من الضحك

بس بصراحه البوست مفيد قوى قوى

عارفه بيرو الحمدلله بعد ما كان لازق فيا بغرا دلوقتى عادى جدا وايى خالص بينام لوحده ولاا ماما ولاا بابا كل الموضوع بس يحب يصحى يشرب ميه بالليل

يعنى الحمدلله عنده استقلال فى شخصيته حلوه قوى

mahasen saber يقول...

ومبروك لدودو طبعا مليون مبروك

وعبال ولادك يا صبرنى
وابنى يا رب

وعبال كل حبايبنا
اللهم امين

عارفه البت دودو دى غلبانه وطيبه وقلبها زى الفل وتستاهل كل خير
ربنا يسعدها
اللهم امين

همس الاحباب يقول...

الف مبروك لدودو
وربنا يتمم بخير
اما موضوع السرير
بقولك ايه ممكن نستلفك عندنا كام يوم
تقومى بالواجب ده مع همس هانم
لانها مش بتعرف تنام غير جنب بابا
ويكون لكى جزيل الشكر
ههههههههه

صبرني يارب يقول...

بسنت

لا ما نسيتش ولا حاجه والله انا عارفه ان الرجاله هايقولوا كلهم ااااااااه الاستقلال التام


بس هما اساسا ما بيساعدوش زوجاتهم على كده وكتير يزهق ويقولها باقولك ايه خديه وروحي معاه بره
عشان انام

ودي بداية المشكله الى هو يعيط منها بعد كده

شكرا ليكى بسنت

صبرني يارب يقول...

رؤيه

طيب اعدي العده من دلوقتي

بس فى حد واحد مش هانعرف نبعته فى سرير تاني اصل يعملوا انقلاب يا اختي

صبرني يارب يقول...

انجي

تسلمى ونورتي

صبرني يارب يقول...

نودي


حلوه ديل امه دي

هههههههههههههههههههه

بس عندك حق

صبرني يارب يقول...

شموسه

يخليكى ليا يا حجوجتي

طب ايه الحكايه هو انا اول مره ارغي يا جماعه
بقالي سنه ونص باكتب بوستات طويله ايه الجديد
هههههههههههههههههههه

ايوه يا شموسه فعلا الى قلتيه صح بالنسبه لمشكلة الزوج دي

بس الغلط عليه برضه
لازم كان يعلم مراته ويصبر على تعليم البيبى لكن ده ما بيحصلش

لعلمك الام لواحدها ما تقدرش تعمل كده لازم تكون اتفاقيه مشتركه

نورتي يا جميل

صبرني يارب يقول...

عطش الصبار

لا لا يا جميل من 30 سنه كان عندي خمس شهور
هههههههههههههههههههههه

وبعدين ما يستخدم اسلحته وانا عندي سلاح جميل بورده عااااااااادي
ههههههههههههههههه

صبرني يارب يقول...

مانوش

امهات سيس يا اختي


بس حلوه قبل ما يتولد دي

وبالنسبه لابوهم ما تقلقيش هانلاقيه وندبسه

نورتي يا جميل

صبرني يارب يقول...

محاسن

طيب خييييييير عايزين يطلع واد جااااااامد مش سيس بقى
هههههههههههههه

نورتي

صبرني يارب يقول...

حواء


سمعت كل الكلام ده ونفضت

يا بنتى خديه فى حضنك حرام عليكى البلد

يا قلبك ا لجامد

وكله ده كلام فاتشه نفضي يا بنتى

صبرني يارب يقول...

همس الاحباب

اووووووك عنيه جايلاكم اهو بس جهزولي ابو ورده
ههههههههههههههههههه

ذو الوجه المبتسم يقول...

السلام عليكم
طبعا فى الاول باقول الف مبروك يا دودو
وربنا يخليه لمام وبابا

على فكرة فكرتينى بحاجة كانت بتحصل لى بجد
كنت بانام والاولاد واحد على اليمين والتانى على الشمال
ومش باعرف حتى اتقلب كده ولا كده
طيب انتى قلبك قاسي شويتين
وشغالة الله ينور بالشبشب ابو ورده
طيب انا اعمل ايه
قلبى ضعيف قدام العيال
وامهم كمان ياستى علشان متزعليش
بيعجبنى بجد اسلوبك وطريقة عرضك للموضوعات
مش مجاملة
انتى عارفة اخوكى مش بيعرف يجامل
هههههههههههه

تقبلى تحياتى اختى الصغيرة

صبرني يارب يقول...

ذو الوجه المبتسم

يا استاذنا الشده لازم منها فى تربية الاطفال

الحزم بيربي ما ينفعش حنيه ودلع بس على طول

ومتشكره اوي باطرائك

ونورت

فشكووول يقول...

السلام عليكم صبرنى
الف مبروك لدودوا وانا رحت وباركت لها
انت قلتى نصائح غاليه بس المد لله انا عبرت المرحله دى وكبرت العيال وجوزتهم والحمد لله ... بس الواد احمد حفيدى ما بيحبش ينام اللا معايا على السرير وانا ما بحبش حد ينام جنبى وباستحمله
دا يعنى لما يكون عندى فى زياره وما اكتر زياراته هو وابوه وامه وقال يعنى بييجوا عشان انا عايز احمد يقعد
معايا اكتر وقت وبيتمحكوا فى احمد وهما مش عايزين يصرفوا وعايزينى ااكلهم واغديهم وانا بقى امرى لله عشان خاطر احمد
تحياتى

صبرني يارب يقول...

استاذ فشكول

ربنا يخليك لهم يا جدو ويخليلك احمد

فى مثل بيقول جوزناها تتاخر جابته وجت راخر
ههههههههههههههههه

دايما عامر يا فندم

لجين أبو الدهب يقول...

عندك حق فعلا ..

الولد يبقى شحت وطول كده وبينام جنب مامته وباباه ..

انا من زمان وانا حاسة ان حكاية نوم الاطفال دى حكاية بايخة جدا

على الاطفال وعلى الاباء

الاباء بيفقدوا شئ من الخصوصية اللى كانوا بيتمتعوا بها ففى غرفة نومهم

والاطفال بيبقوا دلوعة كده ويخاف لو نام لوحده ليلة

وحلوة حكاية اننا نعمل حفلة دى هاتبسط الامر كتير فعلا

دمتِ بخير ..

كاتب مصري يقول...

فكرتيني بايام الصبا
أقصد الرضاعة
ماما حكتلي اني مكنتش بنام غير على ايد بابا وهو رايح جاي بيا ولما كبرت شوية وبقيت أعرف أحبي كانوا يدوروا عليا يلاقوني نايم تحت السرير لدرجة ان بابا بيحكيلي انه كان سرير مخصوص محدش بنام عليه .. ليه عشان حضرتي مكنتش بنام عليه لا تحته ..هواية هههههههههههههه لو ان الطفل بيعي انه بغلب أمه وأبوه مش هينطق بس هي دي الطبيعة يعني الواحد مينامش في حضن مامته يومين قبل أما يكبر وتجري وراه بالشبشب وروح ياض يابن الـ ...
أقولك سر باه مش هتصدقيه أنا لما رجت السعودية بعد سنة كاملة من البعد عن ماما وبابا كنت بخلي ماما تنام جمبي ومرة صحيت من النوم لقيتني نايم بين بابا وماما ده من كام شهر بس ... هههههههههه اه والله أصلي وحشتهم والله هما الي حطوني بينهم مش أنا .. بصراحة حسيت بفرحة كبيرة جدا مش احساس طفولة ولا شغل عيال لا بس الله الله الله على أحضان بابا وماما ,, قد ايه وحشوني
مش عارف بكرة لما أخلف والواد ولا البت يقرفوني هقول كده بردو ولا هدعي لبابا وماما عشان كانوا بيتحملونا واحنا عيال
معذرة على الطول والتأخير في التعليق

ماورد في التعليق سر (هس يعني محدش يعرفه )
سلام

Anonymous يقول...

والنبى تخليلى السرير اللى فى الصورة ححتاجة ....ما السونار قال ان فية عروسة فى السكة ... وبالمرة احجزيلى العريس ....مش كدة؟؟؟ يارب اكون فهمت قصدك؟؟؟ ماشى ماشى عد والحساب يجمع ..

صبرني يارب يقول...

لجين

والله فعلا عندك حق

وكمان حكاية الخوف دي موال تاني كبير كبير كبير

وحقيقى مهم اوي هانتكلم فيه مره تانيه

نورتي

صبرني يارب يقول...

كاتب مصري

اعرف انى يوم فرحك هاطبعلك الرد ده واجي فى الفرح اصيحلك واقول كان نايم جم مامته وبابا اول امبارح
ههههههههههههه


انا على فكره كتير اخد بنتى الكبيره فى وسطنا وابوس فيها واخليها تنام جمبي شويه

بس شويه بسسسسسسسسسسسسسسسسس
انما لوهنام انام يعنى

برررررررررررررررره كله بره

ههههههههههههههههههه

نورت

صبرني يارب يقول...

غير معرف انا مش عارفه انت مين


بس انا روحت الوصله بتاعتك طلعت مدونة د اسلام

وعموما مبروووووووك على العروسه الحلوه

والعريس جااااااهز والبدله جاهزه وعليكم انتم الباقي بقى
ههههههههههههههه

نتشرف يا فندم طبعااا

ahmed_k يقول...

والله يا أم مريم الواحد مش عارف يقولك أيه , خبراتك وتجاربك دي حاجه ثمينه ومفيده جدا
أنا عن نفسي طلعت للدنيا لقيتني بنام في سرير لوحدي وتطور الأمر بعد كده لأوضه لوحدي ثم تطور لشقه لوحدي
مشكلتي بقا إني إتعودت على الوحده يعني لو في حد معايا في نفس الشقه مش الأوضه مبعرفش أنام !!!!
يا ترى عندك حل لحالتي ؟؟ هههه
سلاااااام ختام

صبرني يارب يقول...

احمد كيه

والله يا فندم مافيش غير حل واحد تشوف بنت الحلال بقى وتتجوز وهى هاتكبس على افكارك تماما ومش هاتلحق تفكر فى موضوع لوحدك ولا مش لوحدك ده

هههههههههههههههههه

نورت يا فندم

ঔღঔ نـــوارة ঔღঔ يقول...

ياي السرير جميل اوووي

انا هجيب سرير من اول يوم حمل ولا يهمك ياقمر

كلامك والله حكم انا بشوف اختي الكبيرة في عذاب من اولادها تلاقيها ياعني نايمة واولادها كلهم نايمين فوقها

ولا سلفي عنده بنت وولد اعمارهم متقاربة سنتين و3 سنوات من صغرهم بينام الولد معاه عالسرير و البنت بتنام مع امها عالارض والاولاد الاتنين الي بالابتدائي بيناموا بغرفة النوم عندهم كمان تصورا بقى شكل الغرفة ازاي انا مش عارفة بيناموا ازاي دول وبيمارسوا حياتهم الطبيعية :]

والمشكلة لو نصحتيهم تبقى غيررررررررانة منهم ومن اولادهم النابغة ربنا يهدي

ادعيلي ربنا يرزقني ببيبي وانا هعمل بنصائحك يلا هيصي بس انتي ادعي :(

تحياتي يا الذ رغاية في الدينا