الخميس، 30 يوليو، 2009

مقترح بشأن ضريبة الدخل




ايه رايكم فى الداخله الجامده دي


ايوه ايوه هى دي الحقيقه يا جماعه انا هاعرض عليكم اقتراح بخصوص ضريبة الدخل


طبعا بتقولوا هى صبرني مالها يا رجاله بتتكلم فى كلام كبير على سنها كده ليه


اقولكم يا جودعان والله انا باتكلم فى الكلام الكبير ده بس مش باحب اصدعكم معايا


انما بقى الموضوع النهارده فكرته والاقتراح ده اساسا بتاع بابا حبيبى


ادي ايه كنت سعيده لما اداني ورقه كاتبها بايده وقالي اقري دي وناقشينى فيها ولو حبيتى تنزليها على المدونه بتاعتك
هو بابا عارف انى عندي مدونه بس ما كنتش اعرف انه لسه فاكر او حتى حاسس انها حاجه كويسه يعنى لدرجة انه عاوز يعرض فيها فكرته


المهم ندخل فى الموضوع عشان ما تقلوش عني رغايه


طبعا ضريبة الدخل دي مفروضه على الشعب الغلبان الى مش لاقي ياكل ده


بس طبعا مش كل الشعب مش لاقي ياكل فى ناس مش لاحقه تاكل مين ولا مين


احنا نقدر نقسم الحصيله الى احنا المفروض بنحصلها من الناس الى قسمين


80 % من الحصيله يسددها 20% من الممولين (كبار الممولين ) الى هما حبايبنا الى بالك فيهم
20% من الحصيله بيسددها 80 % من الممولين (ودول الناس الخاضعين للشريحه الاولى من قانون الضرائب على الدخل )
الى هما الغلابه يعنى الى بيقلبوا عيشهم يادوب
وده حسب النسبه المعلنه من وزارة الماليه

طيب ده الوضع الحالي
ايه بقى الى بابا بيقترحه
ان احنا نعفي من الضرايب دي من لا يتجاوز ارباحه السنويه عشرين الف جنيه (55 جنيه يوميا ) يعنى يادوب بتهيئلي ياكل خصوصا لو كان رب اسره
وما نلزموش اصلا بانه يسجل فى مصلحة الضرايب من الاخر نشيله من دماغنا
لكن عليه نلزمه انه اذا تجاوزت ارباحه السنويه 20000 جنيه انه لازم يسجل والا يعتبر متهرب من الضرايب ويحاسب بقى باثر رجعي من يوم ما فتح النشاط بتاعه كله من الاخر يعنى نخرب بيته بقى لو اتمسك
وده على فكره بيحصل فى ضرائب المبيعات لو حد عنده فكره
طيب على كده بقى يبقى نلغي اصلا الشريحه الاولى من قانون ضريبة الدخل وتكون الشريحه الاولى 15% على ما يزيد ارباحه السنويه عن عشرين الف جنيه

ايه بقى فايده الاقتراح ده او نتايجه الايجابيه علينا


اولا بالنسبه لمصلحة الضرايب


* هايتم قفل والغاء 50% من ملفات الممولين الحاليين والى هما بتقل ارباحهم السنويه عن 20 الف جنيه


* طبعا تكاليف جباية الضرايب دي من الناس هاتتخفض لحوالي 50% برضه


(ماهو في جيش موظفين بحاله موجود عشان يحاسب الناس ويعمل الشغل ده كله وراحين جايين وقابضين واكلين نايمين شاربين على حس جباية الضرايب من الشعب الجعان ده )



وطبعا الكلام ده من شأنه انه يخلي الموظفين فى الضرايب يفضوا بقى ويروقوا للناس الباقيه ويشتغلوا صح ويحصلوا بقى من الناس الى بتدفع فعلا فلوس مش ملاليم


فى كما ن حاجه مهمه اوي انا لما اقول انا مش هاحسب حد اقل من 20 الف جنيه ربح سنوي طيب كل الناس المستخبين بانشطتهم هايطلعوا للنور ويعلنوا عن نفسهم ماهو مش هايتحاسبوا ولا خايفين من الضرايب


وما دام اعلنوا عن نفسهم غصب عنه لما يكبر وتزيد ارباحه عن عشرين الف جنيه هايسجل نفسه فى الضرايب عشان ما يقدرش يستخبى بعد ما اعلن عن نفسه وكبر خلاص ولو اتمسك هايقطموا رقبته وهايتخرب بيته


يبقى كده مصلحة الضرايب كسبت ان ناس تانيه هايسجلوا نفسهم تلقائيا وناس هاتدفع مش ناس مش لاقيه تاكل

اما عن النتائج المتوقعه بالنسبه للمجتمع :


انتم عارفين ولا شكلكم مش عارفين اصلا ولا فاهمين انا باقول ايه


المهم انتم عارفين ان احنا عندنا مشكله فى الاقتصاد المصري اسمها الاقتصاد المخفي او الغير مسجل او زي ما بنقول عليه اقتصاد تحت السلم


وده مشكله لانك مش عارف تحدده ولا تحسبه ضمن الناتج القومي والدخل القومي ولا قادر تقيس النمو الاقتصادي مثلا بشكل حقيقى لان فى جانب كبير منه خفي علينا غير مسجل


ده غير انك كمان مش عارف تمسكهم ولا تحاسبهم ولا تقولهم انتم صنعتوا ايه ولا بعتوا ايه ما انت اصلا مش عارف عنهم حاجه


وخلوا بالكم احنا كشعب كلنا بناكل من الصناعت دي


اه منها مصانع زبادي وجبنه ومخللات وحاجات زي كده مثلا دول غير خاضعين للرقابه ( ده على اساس ان فى رقابه اصلا )


عارفين ان الاقتصاد الغير مسجل والغير مراقب ده ينتج 80% من احتياجات المجتمع المصري من السلع الغذائيه
وان حجم العاملين فى القطاع الاقتصادي الغير مسجل ده ب 40 % من حجم العماله يعنى حوالي 8 مليون عامل


وهما كمان غير مسجلين كعمال ولا لهم تامين ولا غيره ولا حقوق حسب قانون العماله ولا اي حاجه بقى
وكمان القطاع ده طول ما هو مستخبي تحت السلم هايخاف يكبر هايخاف يظهر وبالتالي ده بياثر على تنمية قطاعات كانت ممكن تكون احسن من كده بكتير لو كانت منظمه ومسجله وظاهره للعلم



وللعلم احنا ما نقدرش نستغنى عن القطاع ده ابدا زي ما انتم شايفين امال هناكل منين ؟؟؟




والكلام ده يخلينا ينقول اد ايه هايكون الوضع احسن لو كانت الصناعات دي فعلا فى النور
نقدر ننميها نقدر نكبرها ونشجع الناس يدخلوا فيها جديد


الحاجات دي المفروض انها تكون مخططات كبيره وعلى شكل منظم مش هانحس اثره فى يومها لكن على المدى البعيد حتى مش بعيد اوي يعنى بالعكس


ده فعلا من شأنه انه يشجع الناس انه يعمل مشروع صغير
يبقى منتج مش مستهلك
يطلع للنور ويشتغل براحته


من الاخر ملخص المقترح عشان ما تهوش مني
ان احنا ما ناخدش ضريبة على الدخل من الناس الى يادوب عايشه نسيبهم دول يعيشوا ويقلبوا رزقهم
وخلينا نركز قوتنا وقدرتنا مع الناس التاني الى معاهم بجد الى الموضوع يستاهل ان احنا نروح نقف على بابهم ونقولهم هاتوا فلوس
انما نشغل جيش موظفين وحسابات وورق رايح وورق راجع ومحاكم وقواضي عشان فى اخر السنه تبقى الحصيله ايه هاتصفي والله على ما فيش ؟؟

ها حد فهم حاجه ؟؟؟
مش عارفه شايفه نص الى قاعدين شبه يونس شلبي فى العيال كبرت وهو قاعد السلم بيهزر راسه ومش فاهم حاجه
اصل انا ما جربتش اكتب كلام من ده قبل كده يارب اكون عرفت اوصلكم وجهة نظر بابا فى المقترح ده
مع تحيات محمد الخولي امين عام الغرفه التجاريه بالمنصوره سابقا
ده الى هو بابا يعنى سلام كبير يا جودعان لبابا حبيبى

هناك 32 تعليقًا:

مي يقول...

ازيك يا صبرنى
بالنسبة لموضوعك بجد والله هو مهم جداااااااااااااا
بس انا غبية وفاشلة فى الرياضيات اصلالالالالا بس الموضوع شكله كده كبيررر
مين فين ليه؟ تااااااااكسى
تحياتى ليكى يا قمر بس نزليلى ترجمة والنبى لحسن يا اوختى الغباء مغلبنى
اموووووووه

مصري جدا يقول...

سؤالين عالماشي كدة
طب وهوا فين الدخل؟
حبايبك الحلوين ما بيدفعوش ضرايب؟

حلو كدة

انتي افترضتي فرضية غير حقيقية أن فية مساواة في الالتزام بين أفراد الشعب لا يا ستي ال80اللي بيدفعوا 20 هما اللي شايلين الليلة وال 20اللي المفروض يدفعوا 80 بياخدوا العشرين الاولانية اضافة للمعونات والقروض

adel يقول...

علي فكرة فكرة والدك حلوة قوي

بس المشكلة ان ال20% الكبار اساسا مش بيدفعوا عشان نلغي الباقي
بس فكرة انهم يلغوا ااقل من اللي دخلهم 20000 جنية كويسة قوي و هتخرج ناس ياما برة قايمة الضرايب و ده افضل كتير

عاشقه وغلبانه يقول...

احم احم
انا جيت في وقت مش مناسب ولا ايه ياصبرني

ايه ياختي اللي بتقوليه ده...؟؟؟

عموما ده اكيد حلم يقظه وربنا هايتوب عليكي منه

حكومه ايه اللي تعفي الغلبان دي؟؟؟؟
ده هي اساسا مابتخدش غير من الغلابه
هو انتي فكرك الناس الكبيره بتدفع
دول بيسرقوا بس يانور عيني
وبعدين من امتي الحكومه كان بيهمها الغلبان
وهو فين اصلا اللي دخله اكتر من 55 جنيه يوميا ده
اوعي تكوني منهم ... احسدك عالطول
ده انا دخلي 55 جنيه اسبوعيا
تفتكري هاتعفي ....؟؟

بنجاواتى يقول...

السلام عليكم

فى البداية كنت احب احيى استاذنا الاستاذ محمد الخولى على الفكرة

كنت عايز اقول انها فكرة كويسة لانها فيها جانب اجتماعى طيب ...يعنى بالظبط كده زى النصاب فى الزكاة وده طبعا بيحقق نوع من العدالة

لكن كنت عايز اقول برضه ان مثل هذه الافكار كانت ممكن تبقى مفيدة فى مجتمع كل مشكلته الافكار او المقترحات او حتى سن القوانين لكن زى ما حضرتك عارفة كويس ان مشكلتنا هى تطبيق القوانين

يعنى الاقتراح ده كان هيبقى محل نظر لو كل الشرايح اللى بتدفع المية فى المية من الضرايب بتدفع ..لكن للاسف دلوقت مصلحة الضرايب بتتدارى فى الشريحة الاولى اللى بتدفع العشرين فى المية علشان يبقى شكلهم معقول يعنى

تحياتى

تامر علي يقول...

لولا اني متأكد انك مصرية كنت قلت انك من مصريين المهجر:)

هل يمكن لحكومة الزبالة على الكهرباء وافتح صفحة جديدة مع الضرايب و بيع البلد وقتل المصريين وبيع الغاز لاسرائيل ... حكومة الشيخ حلاوة العنتبلي وجيمي النووي وعز الرجال انها تعمل اي شيء فيه أي مصلحة لأي حد ؟؟؟

؟؟؟؟
؟
تحياتي

د. ياسر عمر عبد الفتاح يقول...

أنا موافق
واديت الضوء الأخشر

يلا بقي نفذوها


لا بجد والد حضرتك دماغه قوية أوي
هوه بيشتغل وزير؟

الطائر الحزين يقول...

اصلا ليه ضرائب؟؟؟

======
المهم
الامر اعتقد مرتبط بتطبيق العدالة وعدم الكيل بميكيالين

عارفة احنا عاملين جوة البلد زى امريكا وتهادنها مع اليهود هما كمان يداهنوا مع الكبار

ذو الوجه المبتسم يقول...

السلام عليكم

اولا تحياتى لصاحب الاقتراح
ياريت توصلى له سلامى بجد

ثانيا ومبدئيا اوافق على التنفيذ
اذا طبعا الجهات الرسمية تقبلت الاقتراح

ثالثا بالرغم ان لاقتراح له جوانب ممتاز وطيبة كتير

لكن فيه نقطة مهمة

وده اكيد هيحصل .. ده بيحصل فعلا حاليا وهو
ان فيه ناس كتير هتتلاعب بالحسابات وبالدخل بتاعها

المهم مبدئياً موافقووووووووون

تحياتى

راجى يقول...

الحقيقة الضرائب وقوانينها وشفافيتها مقياس لتحضر الامم
فى امريكا كل مواطن يدفع الضرائب ليشعر انه يشارك فى بناء بلده
الضرائب تصاعدية وتصل الى نسب كبيرة جدا عند الدخول العالية مما يجعل اصحاب المهن مثل الاطباء والمهندسين يوقفون عند عند معين من النشاط وهذا يمنع الاحتكار ويعطى الفرصة للعمل لك الناس
تحياتى للوالد الكريم

الخبز قبل الحب أحياناً يقول...

اقتراحات جميلة
ياريت نشوفك فى الحكومة الجديدة وزيرة مالية
واهو يبقى زيتنا فى دقيقهم
ونوفر على الشعب وعلى الحكومة
هههههه
ربنا يكرمك ويكرم بابا

حلم بيعافر يقول...

اااااااااااه قولى كده
امن عام الغرفةى التجارية
طيب
بما اننا بلد بتطلع عين الغلابة بس واللى مش لاقيين ياكلوا وبيسهلوا العيشة ع الحيتان يبقى اقتراح بابا مينفعش
امممممممممممممم
ولا اقولك انا هبعت دللوقتى لمجلس الوزراء يلموا بعضهم كده ويجولى نناقش الاقتراح ده
اى خدمة
وهضيفك عندى بقى عشان اتبع بقية اقتراحات بابا الخولى

ستيته حسب الله الحمش يقول...

سمحوها دي غلبانة وام عيال
اسكتي اسكتي لحسن خلاص انا وصلت في الخنقة من ولاد الجزم ال 20 % دول لحد المناخير
حاضر ها اكلمهم لك واقول لهم خليكوا مواطنين صالحين وزي ما بتخدوا في وظيفة العضو المنتدب وغيره عشرات الآلاف كل شهر حاولوا واعصروا على نفسكم ليمونة وادفعوا الضرايب
اللي زيي يا حبيبتي بيخصموا ضرايبها من المنبع
قال ايه وبعتين لي بيقولوا انتي عليتي في الشريحة "زغرتي" ولازمن تيجي تعملي لينا إقرار جديد
حلفت لهم طلاق تلاتة ما رايحة
انا ست وش سجون بقى وعاوزاهم يسجنوني علشان انا الموظفة المتهربة من ضريبة الدخل العااااااااااااااااااااااااالي
ليه كده يا صبصب ده حتى انا وليه .. ليه تعملي في كده؟

بسنت صلاح الدين يقول...

ده انجليزى ده يا مرسى، بصى يا قمر انا على حسب مافهمت هى فكره هايله اوى و احب احيى والدك و عقله الراجح، انتى عارفه المشكله ايه؟؟ ان حكومتنا مش فارقه معاها و لا سهرانه الليل من ضميرها اللى بيوجعها على ولادها اللى مش لاقيين ياكلوا و برضه بيدفعوا ضرايب على بناء اقسام شرطه ينضربوا فيها ، ومستشفيات مفيهاش علاج ولا طب من اساسه ،و غيره وغيره....قطيعه فكرتينى بالهم الىل احنا فيه ،فكره والدك رائعه لدوله تهدف الى تنميه الفرد و اعلاء روح الانتماء عند الجيل الجديد

عمرو يقول...

20000 كحد للاٍعفاء أنا شايف أنهم قليلين يعنى لما تحسبيها تلاقى 55 جنيه فى اليوم كدخل لأسره مثلا مكونه من 5 أفراد تبقى الحياه صعبه أوى يعنى حوالى 10 جنيه لكل فرد أكل و شرب و لبس و علاج و مواصلات و سكن و كهرباء و مياه يعنى عايشين على الكفاف بقدرة القادر ..
بعد ما قريت البوست ده و أستوعبته مسكت ورقه و قلم و قعدت أحسب أنا بأدفع ضرايب قد أيه ؟؟
لاقيت أنى بأدفع حوالى 65% ضرايب من الدخل العام مش من صافى الربح يعنى اللى بيدخل جيبنى اليمين بيرجع يخرج تانى من الشمال و عليه شويه من رأس المال كمان اللى المفترض بقى أنه يتعوض فى دورة رأس المال الجايه :))
مهزله بصراحه ..
تحياتى و تقديرى لوالدك و بلغيه من فضلك يعيد نظر فى الحد الأدنى للتحصيل الضريبى لأنه لا يتناسب فى رأيى مع اٍرتفاع تكاليف المعيشه ..

صبرني يارب يقول...

مي

رياضيات ايه يا حاجه
ههههههههههههههههههه

بصي انتى خليكى هنا شويه وانا هابعتلك لموزين مش تاكسي

نورتي يا جميل

صبرني يارب يقول...

مصري جدا

عارفين يا عم والله بس يعنى ده ما يخليناش نركن دماغنا على جنب ونبطل نقول ونقول ونقول

وبالنسبه لل 80 فى الميه الى شايلين الليله

هما لا شايلين ولا عاملين مصاريف الجبايه بتفوق الحصيله يعنى محصله بعضها

صبرني يارب يقول...

عادل

طيب ماهو الى بيندفع بينصرف على الجبايه وزياده

يبقى ليييييه


نورت يا عادل

صبرني يارب يقول...

عاشقه وغلبانه

والله يا اختي انا ماليش دخل اصلا

انا عايشه بلقمتي
ههههههههههههههههههههه

صبرني يارب يقول...

بنجاواتي

اها انا كمان جت على بالي فكرة نصاب الزكاه

بس بقى عشان الزكاه نظام رباني مكتمل فهى على المدخرات

مش على القوت اليومي وكل ما نكسب


يعنى الى متوفر معاه فلوس عن قوته واحتياجاته هو الى بيطلع جزء منها فى سبيل التكافل الاجتماعي


شوف الفرق بقى ؟

صبرني يارب يقول...

تامر علي

والله العظيم يا اخويا وشربت من نيلها وباغينيلها ومش نافع معاها ايتها حاجه



احساس مرررررررررر انك ما حدش حاسس بك اصلا

صبرني يارب يقول...

الطائر الحزين


ضرائب المفروض بيحصلوها عشان يقدموا لنا احنا كشعب بها خدمات عامه

هععععع وسلملي على الطرق البايظه والبنيه التحتيه الزفت والعيشه السواد الى الشعب عايشها

صبرني يارب يقول...

د ياسر عبد الفتاح

وزير ؟؟

لا قلتله والنبى يا اخويا قالي ولا ارضى يا بنتى هو انا اهبل
ههههههههههههههههههه

صبرني يارب يقول...

ذو الوجه المبتسم

انت نفسك اهو قلت حاليا فى تلاعب طيب يعنى كده كده هايبقى فى تلاعب

فين بقى اجهزه الرقابه

ماهو احنا قلنا الى هايتقفش هايبقى عبره لمن يعتبر

صبرني يارب يقول...

الخبز قبل الحب احيانا

احيانا ؟؟؟ بتهيئلي دائما الجوع وحش ياعمنا


المهم وزيره لا


اقل من رئيس ورزاء ما ارضاش يا معلم

نوووورت

صبرني يارب يقول...

راجي

هى نظريه برضه


ان ما حدش يكبر اكتر من اللازم


لكن احنا عندنا بقى الى مش عايزينه يكبر اكتر من كده بنقوله كفايه عليك كده ياض شوفلك بلد تانيه

بؤيؤي

اصل احنا بلد قمة التحضر

نورت

صبرني يارب يقول...

حلم بيعافر


اه والنبى امين عام الغرفه فى حاجه ولا ايه ؟؟

لما تلمولنا السخصيات دي عندك ابقوا عزموني بقى


المدونه نورت

صبرني يارب يقول...

ستيته حياتي

وانا مالي يا خالتي بابا الى قال والله انا بريء يا بيه

ههههههههههههههههههه


معلش معلش هاتبقى كويسه بعد كام يوم وتنسى الى انا قلته

صبرني يارب يقول...

بسنت صلاح

نفس الى انا قلت لبابا على فكره

قلتله هما بس والنبى يفكروا فينا والحكايه هاتبقى فل

وهانسيبهم ياكلوا عيش على قفانا والله بس يفكروا فينا بس شويه صغيرين

صبرني يارب يقول...

عمرو

طب بس هما يعفوا العشرين الف ويطلعوا من تحت ضرسهم يا استاذنا


انا عن نفسي شايفه انه قليل طبعا

انت مش عارف الاعفاء الضريبى على الدخل كان كام الاول

؟؟؟؟؟؟؟؟

كان الفين جنيه للفرد فى السنه

ااااااااااااااااااااه يا اخواتي

للفرد ومالهومش دعوه بقى يعول ولا ما يعولش

وليه بتوصل معاك 65% ؟؟؟

طب ما تشيلهم الشيله كلها وخلاص
بلاش تعب قلب
هههههههههههههههههههه


نورتنا يا باشا

nemo يقول...

هو انا مقدر تعبك
وتعب بابا.. وبالمناسبه سلميلى عليه
بس انا مش فاهم حاجه صراحه
والعيب مش منى اكيد
شكلك انتى اللى نقلتى غلط من بابا
وبما انك انتى اللى نقلتى غلط من بابا
فبابا اكيد فاهم وانتى فاهمه بس انا مش فاهم..
مش عارف فى ايه
ولا انا فاهم بقول ايه .. بس اكيد كلامى معلهوش ضرايب
عشان كده بقى بتكلم براحتى
روحى ياشيخه
ربنا يخليلك بابا وماما
ويخلينى انا كمان

May Ali يقول...

تحدثنى عنى الاشياء التى لها اهمية كبرا فى الحياة وبدونا يأتى الامراض احدثك عن النظافة فاالنظافة من الاشياء التى لها اهمية كبر فى الحياة وبدونها يأتى المراض فالنظافة انواع كثيرة جدا من انواعها مكافحة الحشرات وهى شركة مكافحة حشرات بالخبر وشركة مكافحة حشرات بالجبيل فاعندما نكافح الحشرات لابد ان نلجأ لرش المبيدات وهى شركة رش مبيدات بالخبر وشركة رش مبيدات بالجبيل وايضا من النظافة المهمة جدا جدا فى حياتنا كشف تسربات المياة وهى شركة كشف تسربات المياه بالدمام وشركة كشف تسربات المياه بالخبر
وللاتصال وطلب الخدمة 0508400941