انانية الابناء

سلام عليكم

وحشتوني موت يا جماعه وقبل ما انخرط فى الرغي كالعاده واصدعكم عايزه بجد اعتذرلكم جميعا عن تاخري فى الزياره والله معلش عندي ضيوف ومش فاضيه خالص

وان شاء الله اول ما اقدر طبعا هاجي اقرا الى فاتني واستمتع جدا بكلامكم الى واحشني جدا

ندخل بقى على موضوع الرغي النهارده وهو موضوع مهم جدا جدا

زي ما العنوان بيقول كده عن انانية الابناء .. ازاي ؟

هاقولكم على اكتر من موقف قابلنى تعرفوا انا قصدي ايه ..

المشهد الاول

واحده صديقه حماتها انتقلت الى رحمة الله تعالى وبعد سنه تقريبا قابلتها وقالتلى ان حماها عايز يتجوز .

قلتلها طب ومالوا مش احسن ما يعيش لواحده ويقعد يستنى حد يبص عليه وحد يخدمه وده حقه .

قالتلى بنته مش راضيه وبتقول ما اقدرش استحمل وجود حد فى البيت غير ماما ؟؟!!!

قلتلها طيب هى بتيجى تخدمه قالتلى يا ماما هى سافرت بره من زمان ولما بتنزل اجازه بتيجى عايزاني انا اخدمها اصلا .

الله يعنى كمان بتزوره مره فى السنه طيب يعنى ما تبقاش تزوره وهى ما تشوفش الى جت مكان ماما وخلاص ؟؟!!!!

وانتهى الامر ان الراجل قاعد كام سنه لواحده مسكين عايش ليلا نهارا لواحده يؤنسه الجرنال الى بيجيبه ويخلص قرايته على الساعه 8 الصبح ويكمل اليوم يناكف فى ابنه الصغير الى لسه باقي معاه فى البيت الى ان اختاره المولى وانتقل الى الرفيق الاعلى .

مشهد اخر :

واحده تانيه هبله عارفه نفسها (ايوووووه انتى ) مامتها ارمله وواحد من الجيران محترم على حد قولها اولاده راحوا يطلبوها للجواز . وامها لسه فى الاربعينات يعنى مش عندها 90 سنه ولا حاجه

وهي واخوها هايتجوزوا ان شاء الله السنه دي وهايسيبوا الست تقعد لواحدها . وعلى حد رواية الهبله قالت انهم بمجرد علمهم بالامر هبوا فى الست يا عينى وقالولها اييييييييييييييييه هو فى حد برضه يملا مكان بابا ؟؟؟!!!!!!

وانا شايفه ان البت بنتها (الهبله ايوه الى هو انتى) غيرانه منها عشان الست مزه وبيجيلها عرسان وهى لا

هههههههههههههههههههههههههههههههههه

مشهد ثالث :

ماما ايه رايك تبدلي معايا خدي شقتي وادينى شقتك ؟؟

لا يا حبيبى انا ما اقدرش اسيب شقتي ده بيتى الى انا عشت فيه عمري كله وذكرياتي كلها فيه وما اقدر اعيش فى مكان تاني

يا ماما ذكريات ايه بس وكلام فاضي ايه خليكى عمليه انتى بس هاتعيشى فى شقه اربع اوض تعملي بيهم ايه وبعدين شقتي بعيده عن شغلي

يا ابنى معلش انا ما اقدرش اعيش فى شقتك انا هنا متعوده على المكان واصحابي وجيراني حواليا هايعش هناك فى حتتكم كده مقطوعه وانا عايشه لواحدي . عايزيت تيجوا تعيشوا معايا هنا اهلا وسهلا انما انا مش هاسيب بيتى ...

وتنتهي المناقشه بحنق وغضب من الابن وبيقول فى نفسه ان ما كانش بجح وقليل الادب وقال لامه فى وشها

بتفكر فى خزعبلات ذكريات وكلام فارغ وبتفكر فى نفسها وراحتها بس وتقولك جيراني واصحابي ومش مهم انا بقى اتبهدل رايح جاي للشغل الى اخره من الكلام الي مش من حقه يفكر فيه بتيتااااااا

وغيره وغيره وغيره من الكلام الكتير اوي الى باسمعه والمواقف الى ما لهاش عدد الى من نفس الطابع

والى بجد باشعر فيها بانانيه فظيعه من الابناء وعدم اكتراث حقيقى باهاليهم واعتبار والدهم او ولدتهم حكر خاص لهم مش بس هما

لا ده هما واموالهم وتفكيرهم كمان .

والكلام العبيط الى بيتقال فى التلفزيون بتاع زواج الونس الى هو بيعصبنى( بقدر ما بيعصبني برضه تفنيد الزواج لنوعين زواج صالونات وزواج عن حب )

والى يغيظنى اكتر واحده هبله تستضيف واحد وتقوله والله كنا عايزين نعرف جواز الونس حرام ولا حلال

هو ايه البتنجان المخلل الى احنا عايشين فيه ده

اثنين بيتجوزوا وانتم مالكم هما هايعملوا ايه فى الجوازه الله حاجه غريبه والله

ونسوا بعض عملوا حاجه تانيه ما كل واحد يخليه فى حااااااااله

كبار فى السن ؟؟ واييييييييه يعنى وانت مالك يا بارد منك له ؟؟؟!!!!

شوفوا انا ممكن اقول مثلا ان لو مثلا الابناء لقوا ان والدهم رايح يتجوز عيله من دور اولاده ممكن مثلا يحاولوا يتكلموا معاه ينصحوه

لان بالطبع العيله دي مش متجوزاه عشان جمال عنيه مؤكد الموضوع فيه ان

بس ايه انت ما لكش حكم عليه يا حبيبى انصحه بس كلمه بس . وحياته هو حر فيها انت مش وصي عليه

اذا كان انت لو مخلف حته عيل مفعوص وحبي يتجوز جوازه مش على مزاجك هاتجوزه وتقول اعمل ا يه يعنى اقهر الواد ؟؟!!!

انما لو لقيت والدك او والدتك بيسعوا لجواز وهما كبار فى السن ارجوكم ما تعترضوش وما تزعلوش

مش معنى ابدا انها تتجوز او انه يتجوز انه نسي شريك حياته

لكن الحياه لازم تستمر والوحده مرررررررره

ما تقولش ما انا عايش معاه ولا اخواتي معاه

ابدا الانسان قد يكون حواليه الكون كله لكن حاسس انه وحيد

ومافيش ونس ابدا زي ونس الزوج والزوجه

عارفين ليه ؟

عشان ربنا هو الى قال كده :

ومن اياته ان خلق لكم من انفسكم ازواجا لتسكنوا اليها وجعل بينكم مودة ورحمة ان في ذلك لايات لقوم يتفكرون

الايه دي عظيمه عظيمه عظيمه ان شاء الله نتكلم عنها بالتفصيل فى الرؤيه فى موضوع باجهزه جديد

وما تحطموش الكبار فى السن وتقولولهم اييييييه انتم لسه عايزين ايه من الدنيا ومن الجواز انتم هاتخدوا زمانكم وزمن غيركم؟؟!!

انا عندي مبدأ باحبه اوي

لو فاضلك يوم واحد بس هاتعيشه اعمل اي حاجه فى الدنيا بس طبعا ما تكونش تغضب ربنا عشان تعيش اليوم ده سعيد

يوووووووووم واحد

والاعمار بيد الله ما حدش عارف مين هايعيش اد ايه

حد فهم حاجه ولا أنا قاعده اهاتي من قلبي وخلاص ؟

ارجوكم بلاش انانيه هما ربوكم وكبروكم وكل واحد فيكم هايبقاله حياته الخاصه او بالفعل عنده حياته الخاص

ما ترهنوش حياتهم باكملها علشان بتبصوا عليهم مره ولا اثنين فى الاسبوع .

من حقهم يعيشوا حتى لو كان هايعيشوا اخر يوم فى عمرهم

وكفايه انهم اكيد ضحوا واستحملوا حاجات كتير اوي عشانكم

اتكسفوا على دمكم

وكفايه بقى عشان شمس بتقول عليا رغايه

حقا انا رغايه ؟؟؟

سرير بيبى لكل مواطن

باديء ذى بدأت احب اقول مبروووووووووووك يا دودو الف الف مبروك

دودو يا جماعه عاشقة الرومانسيه قروا فاتحتها النهارده عقبال ما يقروا القرآن كله ونجوزها ونخلص منهااااااااااااا

قصدي ونفرح فيها

يووووووووه

نفرح بيييييييييييييها

الف الف مبروك يا دودو وربنا يجعله خير عليكى ويكتبلك دايما كل خير ويتمها عليك بكل خير

وباهديلك يا دودو يا حياتي اغنية لواحظ اختي خطبوها

لا لا اقصد يا نخلتين الى شغاله دي قشطه يا دودو

السلام عليكم ايها المدونون الكرام
ازيكم كيفكم اشحالكم اش اخباركم اشلونكم اش علومكم
واي حاجه تانيه كم او نص كم مش مهم

شوفوا يا احبائي وكتاكيتى انا من موقعي هذا قررت ان لازم يكون في لكل مواطن سرير بيبى

لا لا مش عشان ينام فيه لا لا ما يجيش على اده ده علشان ينيم فيه البيبى فعلا لما يجى .

وايه الجديد ؟؟

استنوا بقى عليا

اكتر من مره الفتره الى فاتت اكون باكلم حد من اصدقائي والاقيه بكل بساطه بيقول ان بنته او ابنه عمرهم مثلا 3 سنين

او اكتر او اقل شويه وبيناموا مع مامتهم فى السرير ؟؟!!!

وات ؟؟ ليه يعنى حضرتك

يقولك ماهو ما بيرضاش ينام الا كده ؟؟!!!

نعم ما بيرضاش ينام الى كده ؟؟!!

طب ماهو ما بيبقاش راضي يتفطم هاتسبه يرضع لحد ما يروح الكليه ولا ايه ؟؟؟!!!!

شوفوا يا ساده يا كرام انا واحده خلفت 3 عيال عمري بتاتا البته ما نيمت حد جنبي
اااااااه كله كوم واحتلال السرير بتاعي كوم تاني .

ايه ده مش كفايه احتلال نفسيتى واعضائي الداخليه فى الحمل كمان الواحد ما يعرفش ينام ساعتين لو اتحصل عليهم يعنى .

الله الوحد ازاي ينام وفى شخص ما نايم جنبه والواحد يفضل خايف يتقلب احسن يخبطه ولما يكبر شويه كل ما هو يتقلب اصحى انا

الله هو انا ملقيه ولا ايه ؟؟

انا فاكره مره دخلت على اختي الكبيره لقيتها نايمه على ظهرها وعلى ايدها اليمين طفل والشمال طفل وعلى بطنها بيبى رقم 3 كانت عندها شهرين

طبعا انا فى هذه اللحظه قررت اربي لها عيالها الى هى ما عرفتش تربيهم

واقمت حرب لمدة شهر فترة اقامتهم عند ماما عشان العيال الدزم دول يناموا لواحدهم ونجح الشبشب ابو ورده والى من غير ورده فى اتمام العمليه

والوش بقى الخشب طلع للعيال وامهم وامي كمان الى كانت معترررررضه على الوضع بتاع ولاد اختي وفى نفس ذات الوقت بتعمل زي كل ام خلصونا وناموا على اي شكل بس ناااااااااااموا

وصل الامر مع ولاد اختي ان الولد كان عمره 6 سنين وبعد ما نام واستغرق في النوم مامته قامت تقعد بره ترضع البيبى الصغيره وانا كنت قاعده معاها

لقيت الواد طالع واقف على باب الاوضه وايده فى وسطه وبزعق لامه .. انتى قومتي لييييييييه بقى ؟؟
طبعا انا تلقائيا رفعت الشبشب وجريت وراه قائله هى على ذمتك ياض ؟؟؟

وقعدت فى الحرب دي شهر مع العيال الدزم دول لحد لما سافروا وبعد ما سافروا اتصلوا بيا مخصووووص عشان يقلولي انهم بيناموا لواحدهم دلوقتي .

لذلك انا اؤيد الانفصال التام عشان الكل يرتاااااااح وينام

وبعدين ده احسن للبيبى جداااااااا من كل النواحي

اولا : ينام براحته فعلا مش مزنوق فى السرير ولما يكبر يتقلب ويعيش حياته

ثانيا : ما يتعداش منك او من باباه لو كان عندكم برد وممكن طبعا يكون عندكم الفيرس ومش حاسين .

ثالثا : البيبي لما يبقى عمره 3 شهور ممكن يتقلب ويتحرك على السرير وعليه لو كان نايم وقمتي من جنبه ممكن يقع فى سريره مش هايقع

ولا سيما لو كان سرير بقى من الى جداره عالي الطفل بيفضل لحد عمر سنه ونص مثلا ما بيعرفش يخرج من السرير لواحده .زي السرير الى فى الصوره فوق ده والى من وجهة نظري احسن سرير بيبى واكترهم عمليه

وده بيديكى امان انه لو صحي ما يقمش يعملك مصيبه وانتى مش واخده بالك

رابعا : هايتعود انه ينام لواحده مش لازق فيكى لان لو بينام جنبك هايتعود على كده وهايبقى صعب فصله . حتى انتى نفسك هاتلاقي صعوبه انك تنامي من غيره .

ما تقوليش وايه يعنى ده قلبي وروحي ما ينام جنبي لا ماهو هايجي يوم لازم ويبعد عندك خصوصا لو جبتى بيبى غيره هاتجيبى مكان منين انتى؟؟

وبعدين لما تعوديه ينام فى سرير منفصل

لما يبقى عمره سنتيه تطلعيله سريره بره الاوضه وينام فى اوضه تانيه خصوصا لو كان له اخوات اكبر منه يعنى ممكن قبل سنتين كمان يتقلب فى اوضه تانيه بس ايه مش اطلع بره يا كلب محروم من الميراث

لا تمسك مايك كده وتقف فى وسط الشقه وتقول يا جووووودعان نزف اليكم خبر ان زعبوله القله كبر خلااااااص من هذا التاريخ العظيم هاينام فى اوضه تانيه لواحده تصفييييييييييق حاد .

فهو يحس ان دى مكفأه يعنى ويهلل بقى وهايتقبل الموضوع عادي جدا
ساعة ا لنوم هايعترض عادي نقوله انت كبرت وكلمتين قرع كده حلوين ما نفعوش يبقى شخطه حلوه المهم ان القرار يتنفففففففذ اوعى ترجع فى كلامك من اول يوم لو رجعت يوووووووم هاترجع كل يوم يا معلم .

وبعد شهر مثلا او اكتر شويه تنقليه بقى من السرير بتاع البيبى للسرير بقى كبير عادي بنفس الاحتفاليه الهبله
وبيكون الموضوع ايسر كتير من حكاية انه نايم فى حضن ماما على طول

طيب انت عندك اساسا طفل وكبر ومش عارف تنزعه من ملكيتك الخاصه الى هو سريرك يعنى ؟
تعمل اييييييه ؟؟

وانت مروح النهارده تاخد معاك زواق حفلات على كام صوره من بتوع العيا لدي الى بتتزلق على بوستر ارقام وحروف وحيونات وحركات
وتاخد فى ايدك ابنك ولا بنتك

وتعملوا احتفاااااااال بقى عشان كبر الولد وطلعله شنب ايوه دقق بس وانت تشوفه
وتزوقوا الاوضه وماما توضبها وحركات جامده اوي وتخلوا الواد يقص الشريط وعلى سريرك يا معلم
وده ينفع من عمر سنتين ونص عادي واقل من كده لو كان عنده اخوات اكبر
وخدوا بالكم من نقطه مهمه فى ناس كتير بيعملوها

لما تكون الام حامل بالفعل يفضل الطفل ينام جنبها لحد ما تولد واول ما تولد فجاه يلاقي نفسه بيترمي فى اي مكان اخر
فى سريره جنب بابا جنب تيته اي ركن بقى عشان يفضي مكان للبيبى الجديد
طبعا هايكره البيبى وهايكره نفسه والعيشه والى عايشنها
خلوا بالكم اوووووي من النقطه دي

والطفل الاول بيكون اكتر الاطفال غيره
عشان كده لو كنتى حامل وعندك حتى سرير بيبى بينام فيه الطفل لازم تشليه من السرير ده قبل ما تولدي بكام شهر
وتفكي السرير ده خااااااالص وتخفيه
وتنقليه بقى لسرير كبيره وهيه وكبرت والحركات الى انا قلت عليها فوق

ولما تقربي تولدي تجيبوا السرير بقى بتاع البيبى وتخلوا الطفل الكبير هو الى يساعد فى تركيبه وتجهيزه للبيبى وتحسسوه انه هو متحمل مسؤلية البيبى ده

البيبى ده جاي عشان يبقى اخوه وهو الى هاراعيه مش عشان ياخد منه حضن ماما ودلع بابا والسرير كماااااان حصلت يا كلاب ؟؟؟!!! ده الواد الى بيقول

و لنا لقاء تاني بقى عن الغيره بتاعة الاطفال ان شاء الله من واقع خبرتي وعذاباااااااتي
اتفضلوا بقى قدامي كل واحد على سريره على الله الاقي حد نايم جنب مامته ولا نايم فى سرير اخوه

حكم الشذوذ الجنسي فى الاسلام ... على الرؤية

حكم الشذوذ الجنسي فى الاسلام

موضوع على

الرؤية الاسلاميه الجديد

اتمنى احظى مناقشه حقيقه راقيه منكم يا حلوين

الى هناك

حسنه قليله تمنع بلاوي كتيره

السلام عليكم

مالكم كده مطلعين حاجب ومنزلين حاجب

ايوه انا جايه النهارده رابطه عينى وهانشحت مع بعض جميعا

كل واحد يجيب المعدات اللازمه للشحاته ويجى يلا .

ما احنا اساسا شعب بنعشق الشحاته والشحاتين

نحب نشحت ونحب اوي ندي فلوس للشحاتين المتسولين فى الشوارع مهما قلنا عنهم

بجد بقى يا جماعه انا بقيت امشي فى الشارع ابص حواليا واقول يا عااااااااالم يا هو مافيش حد عايز يكسب فينا ثواب ؟؟!!!

ولا المسؤلين ولا اي حد من رجال الاعمال الى بيهلفطوا طول ا لنهار فى التلفزيون عن خدمة المجتمع

ولا اي حد سائل فينا ليه

مش فاهمين حاجه صح ؟؟

طيب انا هاديلكم مثال

حدانا هنا فى المنصوره فى شارعنا تحديدا شارع منيل بعيد عنكم فى رصيف فى هذا الشارع بيفضل بين طريقين واحد عالي والتاني اقل منه بتاع 20 سم

فكان فى رصيف فى النص زمان عباره عن درجتين

فبعدين جه واحد مفتكس من المفتكسين عمره اهله ما نزل يمشي على رجليه فى الشارع ( من ايام ما كان بيجري ورا عربية الرش )

فقالك احنا نشيل الرصيف الدرجتين ونعمل رصيف واحد بميل من فوق لتحت

ها متخيلين المنظر ده ؟

لا تتخيلوا بقى كام واحده وواحد بيقع على الرصيف ده يوما وانا كل ما اشوف المنظر ده ادعي عليه من كل قلبي

الى عمل شارع اعتقد طوله يمكن كيلو وشارع ايه فى اوله كلية أزهريه وفى اخره موقف كبير لميكروباص الارياف .

شوفوا كام الف شخص بيعدي من على الرصيف ده يوميا ومنهم كام واحد بيقع ؟؟؟؟؟!!!

سنين واحنا على كده يا ساااااااده ان حد يكسب فينا ثوااااااااب ويبصلنا بعين الرأفه ويميط الاذى من الطريق ؟؟ ابداااااااااااااا

الشوارع كلها مكسره ومنيله وحاجه تقررررررررف يا جدعان ده 2 مليون جنيه يرصفو المنصوره كلها كتير يا ولاد ؟؟؟

للدرجه دي بنشحت . طيب يا جودعان عمنول شاريين تمثال رمسيس الى عملوه شبه عمو رمسيس الى هناك فى القاهره ومش عارفه رجعوا فى كلامهم ما حطهوش فباعوه للغلابه الى هو احنا وكعينا فيه 23 مليون جنيه

ااااااااااااااااه والله العظيم كده ماكانش في بس كام مليون من دول يطرطشوا كده على القاعده ويرصفوا الشوارع ويرحموا الاف البشر من المعاناه اليوميه ؟؟؟

بلاش بلاش هى الحكومه هاتعمل ايه ولا اييييييييييه هانقطعها ؟؟؟ ده غلابه مش فاضيين

رجال الاعمال الى خاوتين اهالينا فى التلفزيون عن خدمة المجتمع ما حدش فيهم يحترم نفسه ومن زكاة ماااااله حتى ياخد شارع كده ويوضبه

لا لا شارع مين

الشارع ده بتاع الغلابه . انما التخين فيهم يتمطع ويقول للمحافظ ادينى يا باشا ميدان كذا وانا اخليهولك فله

ويرشق تمثال مالوش معنى فى وسط الميدان ويزوق التمثال وما حوله والشوارع لسه زففففففففففففت

اماطة الاذى من الطريق صدقه

والنبى تتصدقوا علينا يا جدعان حرام كده .

اول لما جه عمو المحافظ الجديد الله يعمر بيته مانشتات فى الجرايد اول حاااااااااااجه هانعمل الشوارع طيب ياعم فين

هانعمل اهو

ونسمع بقى عن انه ماشي على رجليه فى الشوارع وبيقفش الاخطاء وبيدخل مستشفيات ويحاسب الى يغلط وحاجات قشطه كده

قلت لرضا معقوله ؟؟ احنا هاننضف ولا ايه ؟؟!!

قالي : هع بعينك

قلتله طيب حتى نغسل وشناااا ياعم ما تحبطنيش

الى حصل انه عمل زي رحمه بنتى لما تصحى من النوم فى البرد واقولها اغسلي وشك تقوم تغسل عنيها بس ههههههههههههههههههه

هو بقى جه كده فى بعض الشوارع وقام جايب شوية بتاع من الاسود ده وفوق التراب والورق وما الى ذلك ولزق ليس كله كويس وهيه هيه رصفنا الشوارع وبقينا زي الفل !!!!!!

بلاش الشوارع انشاله عنها ما اترصفت ولا لقينا رصيف مشاه نمشي عليه خلينا ماشيين هنا معوجين على رصيف المعاويج الى تحت ده .

السنه دي قالك الدقهليه تخفض نسبة زراعة الارز ليه ياعم قالك كده حفاظا على الثروه المائيه الرز بياخد مايه ضعف القمح

واحنا نصدر رز وبنستورد قمح

طيب نزرع قمح ونبطل نستورد رز

طيييييييييب يا عم

طيب يقااااال ان موضوع قلة الرز ده اثر على السمك اه ماهو زمان كان الفلاح بيروح يجيب سمك زريعه (سمك صغير يعنى) وفى اخر موسم الرز بيلم السمك بقى

الصراحه انا مش مقتنعه ان ده سبب قلة السمك لان اساسا الفلاحين بطلوا الحكايه دي وقالك مش جايبه همها

منين المشكله مش عارفه بصراحه

احنا فى الدلتا بنعتمد بشكل اساسي على سمك النيل وروافده طب يعنى السمك فى النيل مش محتاج موال يعنى ولا يكونش السمك فى النيل خلص

لالا هو تقريبا مااااااات من السموم الى بتترمي فى المايه عقبالنا ان شاء الله

المهم يعنى كيلو السمك انا شارياه النهارده بخماشر جنيه ما تبصوليش كده من شهر كان نفس الكيلو ده ب 9 جنيه

السؤال بتاع الشحاته بقى

مافيش حد من اي اتجاه من المذكورين اعلاه يفكر فى هذا الشعب الغلبان ويجيب بمليون جنيه زريعه يطلعهم من اي مزرعه ويرميهم فى النيل وروافده ؟

على اعتبار اننا عندنا كثافه عاليه فى الدلتا

بلاااااااااش نقول اعملوا مصانع يا عالم فى الصعيد جمب بحيرة ناصر الى مليانه سمك توحش هناك وبيشلوه يرموه على الجنب

لا لا مصانع ايه احنا وش كده برضه ؟؟

احنا نشتري سمك من جمهوريه شومبونجوا ويطلع فى الاخر مش سمك ده صراصير مربربه شويه عااااااااادي

انا اتكلمت فىمشاكل باشوفها بعينى وعايشاها ومش عارفه ليه ما حدش معبرها هو انا عندي عنين اكتر من اللازم ولا ايه ؟

عمو اوباما .... فلح ان صدق

السلاااااام عليكم

من غير لوك لوك لوك كتير هاقولكم بؤين كده فى السريع

انا سمعت نص الحديث تقريبا وحتى وانا كنت باغسل الفراخ يعنى مش فاضيه انا لاوباما

ههههههههههههههههه

المهم اليكم رايي وانا اساسا باعتبر نفسي ما باعرفش اي حاجه فى السياسه

اولا زي ما قلت فى العنوان فلح ان صدق

شوفوا الراجل ده يا اما بيثبتنا تثبيته جامده جدا يا اما صادق

وفى حال انه صادق لا اعتقد انه هايعمل الى قاله ده بسهوله كده مش هايسبوه

هما مين الى مش هايسبوه كتييييييير اوي فى العالم يهمهم الاحلام الورديه دي تحصل

ممكن ده يحصل بقى يا حلوين لو كان ربنا بقى رضي على المجتمع العالمي وهاينصلح حالنا يعنى

ولووووو نسبيا

مش عايزه افكار سووووده والنبى

خلونا كده متفائلي ولككككككككن متوجسين خيفه ماشي ؟؟

اينعم انا كنت فى بعض الجمل عايزه امد ايدى من الشاشه افقع عين اوباما ( زي كلامه عن مشكلة الاقباط فى مصر ولزقها دوغري فى المارونيه فى لبنان مش عارفه ايه وجه الشبه )

الا ان الراجل محترم وفاهم ودارس كتير عننا يا جودعان

وقال بؤين حلوين

وفلح ان صدق

وامشوا بقى عشان مش فاضيه مش معقول الرغي ده

بعد ما تموت مالكش فيه ..... خلصت

السلام عليكم

بصراحه انا ما هانش عليا اسيبكم فريكس بعد البوست الى فات المنعنش ده

نعم ؟

فريكس يعنى ايه ؟؟!!!

مش عارفين حالة الفريكس ؟؟؟ طيب زي بعضه

الفريكس هى حاله خليط ما بين الفريش والريلاكس

المهم نرجع لموضوعنا نعود بقى بعد حالة الفريكس ونتكلم فى موضوع جد شويه

الا هو :

انك لازم تعترف انك ان شاء الله لما تموت بعد عمرين طوال يا سيدى مش بافول عليكم كلنا هانموت

بعد ما تموت مالكش فيه .... خلاص خلصت

هو ايه الى مالكش فيه ؟؟ الدنيا يا حلو

حد يقولي يعنى ايه؟؟؟ مش مهم من غير ما تقولوا اقولكم يعنى ايه

يعنى الاقي واحد حلو كده كمل وعاقل يقولك :بقى اناااا ولادي مش سألين فيا طيب ولاد الهوهو دول الى زمانهم

بيتمنوا موتي مش هانولهم فلوسي حتى بعد ما اموت وهاكتب كل الفلوس باسم الواد ابنى الكبير هو الوحيد الى بيسأل

عليا ويعبرني بس انا هابقى اوصيه يخلي باله من اخواته برضه ويدي كل واحد حاجه(حونين )

طبعا ده شخص عبيط ولا عاقل ولا نيله . يا حاج انت بعد ما تتوكل على الله خلاص ما لكش فيه ما بقاش مالك بقى مال

الورثه الشرعيين ايا كانوا ما تلعبش بقى فى الوقانين الالهيه (الكتالوج على راي د. اسلام )

عارفين لو عمل كده ايه الى هايحصل ؟

ولاده كلهم هايكرهوا اخوهم الكبير ويحقدوا عليا وجايز هو يطلع ندل اساسا وما يعبرهمش بفتله

واقل واجب هايدعوا على ابوهم بدل ما يدعوله .

يجى سخص تاني

ويقول انا ما عنديش عيال او عنده بنات بس ولما اموت اخواتي ولادي الفرطوس هياخدوا فلوسي ولا هايشاركوا فيها البنات

مع انهم خوووووونه وما حدش فيهم بيسأل عليا وولاد هوهو وهايصرفوا فلوسي فى الهيافه ويقوم رايح زي الحلاوه كده ويكتب املاكه الى اصلا مترين فى قاع ترعة بلدهم باسم البنات او باسم مراته او باسم العفاريت بس اخواته لا .

الله طب ليه كده ؟؟!!! يا سيدى انت لما تتقلب بعون الله الموضوع ما عادش يخصك سيب كل واحد ياخد حقه وبدل مااعمام البنات يكرهوهم ويقطعوهم اهم هايسألوا عليهم ويودوهم ويترحموا عليك جااااايز

ربنا كتبلهم الورث ده والرزق ده خلاااااااااص يبقى حقهم

ما كانوش بيسألوا مااااااشي حسابهم مع ربهم بقى مالكش انت دعوه

هو مين قالك ان الورث ده مكفأه لهم على خدمتك ؟؟؟؟!!

ويجى حد تالت عنده بالصلاه على النبى الصبيان والبنات وعماره فله حلوه كده ومحلين يقوم لا بصوا يا ولاد انا خلاص تقريبا قربت اموت وعايزه اطمن عليكم عشان ما يحصلش بينكم مشاكل والمحلات تبقى بتاعة الصبيان كل ولد محل (كح كح كح ) ده بيكح مش قلتلكم حاسس انه بيودع .

اما العماره فكل واحد فيكم ياخد شقه واهو تمن المحل اد تمن الشقه ولا اقولكم المحلات شغاله برضه خلاص يبقى فى زمتكم لكل بنت الف جنيه من ايراد المحلات فى الشهر

طب يا حاج كبر انت بس دماغك من ا لموضوع ده وخليك فى الكحه لا انا عايز اطمن .

طيب ما تطمن ما انت لما تموت المحكمه هاتقسم الورث بما يرضى الله عادي زي ما ربنا قال شاغل حالك ليه انت ؟؟؟

لا هاتولي موظف الشهر العقاري ا سجل الكلام ده بيع وشرا ء واهو تتعفوا من ضريبة التركات

يادي النيله ياعم انت بتموت ولا بتوفر ضرايب

ويسجل المعلم ويبيييييييييع وبعدين بع اسبوع يقوم ويخف ويبقى زي القرد ويطلع ما كانش عنده حاجه ويرجع بقى محلااااااااته يلاقي العيال بيبجحوا فيه وكل واحد مش عاجبه شغل ابوه الللللللله مش بقى محلهم بيع وشرا ؟؟

وكل ما يقلولوا خليك فى البيت مرتاح يا حج يتنطط زياده ويتعرفت زياده ويقول انتم هاترموني يا ولاد الهوهو عشان بقت كل حاجه باسمكم

والضغط يعلى عليه والقلب يتعب ويحتاج عمليه والعيال جايز يطلعوا اندال

ويقولوا له منين يا سيد وحياة غلاوتك فلوسنا فى السوق ما انت عارف يا حاج

فيتحسر من قلبه ويموت كمدا بقى بصحيح

طب لييييييييييييييييييييييييييه ما تخليك عايش على اد ما تعيش ولما تموووووووووووت هما حرييييييييين

وواحد قاعد على جنب اهو وكتب كل حاجه باسم الووووولد امااااااال

مش هو الولد وهايشيل اسمه

انما البنات دول ولاد هوهو هايروحوا يدوا الفلوس لاجوازهم الاغراب ولاد الهوهو برضه

طب ما دام كلهم ولاد هوهو ما تسيبها تمشي زي ما تمشي

هاتظلم البنات كده

لا ااااااا اصلك ما تعرفش ده انا ابنى حنين اوي انا هاوصيه ما يسيبش اخواته البنات برضه

بس ما يجيش اجوازاتهم يشركوه فى ماله

لااله الا الله

ماهو مش ماااااااله لواحده ماهو مال اخواته البنات كمان

الله استنى اصلا مين ده الى مال مين

ما انت لسه متلقح عايش اهو

يعنى المال دلوقتي مالك انت اصلا بترغي انت ليه دلوقتي

خد من ده بقى وصايا معلقه زي الى كانت بتيجى زمان فى افلام الابيض واسود

لو ما تجوزتيش واد عمك مش هاتخدي ولا سنتوفه من الطين الى حدانا فى البلد

والى يكتب فى الوصيه ان ممنوع منعا باتا فض الشراكه بين الاخوات والا تتحول التركه كلها لصالح مش عارف مين فى كواللمبور

( الله ما تسيبهم ياعم يفضوا الشراكه ويفضلوا حبايب وكل واحد فيهم يعمل شركه لواحده ويكبر برضه ايه المشكللللللله )

والى يجمد اراضيه ويخليها حق انتفاع للورثه فقط لحسن العيال مخهم لاسع وهايبقوا الطين ويشتروا بداله عربيات وهدوم سنيه

لييييييييييييييييييييييييييييييه

خليك فى حالك ياعم عيش وموت براحتك ومالكش دعوه بالاتي

ما قلتش اضربها طبنجه كلا البته اطلاقا

انصح عيالك

وصيهم

حدد حاجه معينه يعملوها او وصي بحاجه مكتوبه ماشي

بس مش بمالك كله بجزء منه فى حدود التلث زي ما بيقول القانون

ما تخنقش عيالك وانت عايش وانت ميت

من حقهم يعيشوا ويحلموا ويحققوا حلمهم هما زي ما انت عشت وحققت حلمك انت مش حلم الجيران ولا حلم ابوك قطعا

هايخلطوا طيب وايه يعنى ما انت ياما عكيت يا معلم

خليهم يترحموا عليك مش حاجه تانيه

وعلى راي خيخه نطلع من الكلام ده كله بايه

وانت عايش حر فى مالك

وانت ميت خليك فى حااااااااالك

والى اللقاء يا اصدقاء