تقرير لقاء القاهره ...باختصار شديد

انا جيت من القاهره

اه والله روحت القاهره وشوفت كل الناس الحمد لله

كان يوم فظييييييييييييييييييييييييييييييييييييع

بجد الحمد لله كان يوم حلو اوي

والسفر كان جميييييييييل والطريق فاضي ورايق وصلنا بسرعه الحمد لله ورجعنا كمان بسرعه

واكتر ما اذهلني يا ناس العدد

عدد كبير جدا

بتهيئلي كنا فوق الخمسين مدون وافواج تروح وافواج تيجى

بجد مش هاقدر ابدا اقول اسامي انا ما كتبتش جايز حد يكون كتب الاسامي بقى يقولكم

بس انا شوفت كم مدونين بصراحه فظييييييع

وكنت فرحانه اوي ان رضا كان معايا بجد يعنى شويه رضا مش بياخد على الناس بسرعه بس يعنى هو اندمج مع الناس برضه وبجد كنت فرحانه انه معايا

بس من موقعي هذا باقول لخيخه وداليا ودريم هاقطععععععععععععكم بالذات دريم دقنى يا بت واجعاني يا مفتريه

وبجد شكرا اوي اوي اوي لكل الناس الى رغم ظروف عندهم جم مخصوص عشاني

اولهم شمس حبيبتى الى ما لحقتش اقعد معاها وباقولها سووووووووووووري والله رضا كان عنده شغل

وريييم ومحاااااااسن وآبي وداليا وسو وبجد متشكره اوي اوي و كان نفسي اشوفكم كلكم والله

اه ومبروووووووووووووووووووووووك يا صلاح على الخطوبه وعقبال الفرح بس لو مش عزمتني هاقطعك

محمد عمود نور عايز يركب صاروخ على طول مالوش فى ركوب العجل خالص مش معقول كده خالص

عايز يعرف كل المدونين والمدونين كلهم يعرفوه فى يومين هاسميه محمد ا لمستعجل

عادل طبعا عذبنا هو ومينا وما رضيوش يتوزعوا فى اي منطقه ساعة ا لصلاه لما وزعنا الرجاله ونقولهم خدولكم ركن وصلوا من اجلنا مافيش فايده ههههههههههههههههههه

واستاذ هاني مصري جدا برضه فييييييين على ما راح الصلاه برضه ما كانش عايز يسبنا ننقي الرز (نرغي يعنى )

بعدين عادل قعد يمص مصاصه ويغيظ فينا قاعد يتكلم مع ستيته ومندمج فانا صورته الصوره الوحيده للقاء الى فوق دي وبعد كده انشغلت بقى ونسيت التصوير

اتكلمنا شويه انا وستيته وعمود نور ووليد كنج توت فى موضوع الكتاب الى عايزين نعمله لما الخطه تخلص هاقولكم عليه ان شاء ا لله

اه بتوع النادي خنيقين جدا الحقيقه وكنت حاسه انهم خلاص عايزين يرمونا فى الشارع

هههههههههههههههههههههههه

رغينا على جميع الاصعده ومع كل الناس

وفكروني البت خيخه دي اخليها تغير اسمها لبت فضيحه واي كلام

اه استاذ عمرو بدر زعلت اوي انك ما جيتش والله

اه شيماا رضا بيقولك خدتى معاكي البطه والوزه ولا لا وانتى مروحه ؟؟؟

ههههههههههههههههههههههه(اصلها لما عرفت انى واخده فطير قالت يا سلام اخد انا بقى معايا وزه صاحيه بما اننا راحين من الاكاليم وكده)

ولكل الى كانوا فى اللقاء الفطير ده مش انا الى عاملاه يا جودعان اه الكدب خيبه انا مش فالحه اوي كده ده انا شارياه والنبى يا اخويا

ده على ما قطعته بس كنت هبط هههههههههههههههههههههه

والكيك حاااااااااااااااضر اللوقاء الجاي بقى معلش النوبة دي اصل الظروف الصحيه بايظه

حصل ايه تااااااني مش فاكره

وطبعا فى ناس كتير كلموني فى التليفون برضه

مش قادره اعد لا الحضور ولا التليفونات حد يعد يا جماعه ويقول

وانا مشيت بدري طبعا من الساعه ثلاثه وشويه عشان نلحق نرجع عشان رضا كان عنده شغل والله كان نفسي اقعد اكتر بس بقى كمان كنت خلاص بنزينى خلص والصدااااااااع بقى من قلة النوم

وهاستنى بقى اسمع منكم باقي التفاصيل ولو افتكرت حاجه هارجع تاني اقولها

بس قلت اغلس عليكم واعمل انا تلخيص قبل ما هما يروحوا حتى

نيهاهاهاهاها

يلا بسرعه بقى كل الناس يعملوا بوستات عشان اشوف الى فاتني

هنام شويه وارجع الاقي الشغل يلا

لقاء مدونين فى القاهره...ومبروووووووووووك التاهل يا قوم

مبروووووووووووووك مبروووووووووووك

عقبال البطوله ان شاء الله

تي تريتى تيت تريتى تيت مصر

اه اللقاء كنت هانسى

فى لقاء مدونين بكره ان شاء الله والتفاصيل اهي عند ستيته هنـــــــــــــا

وان شاء الله انا رايحه وعايزه اشوف كل مدونين جمهوريه مصر العربيه

قولوا يارب ألا يحبسني حابس

مبروك يا قوم انا فرحانه اوي ربنا يفرح قلبنا دايما فى كل حاجه مش الكوره بس

اشوفكم بكره ياحلوين ان شاء الله

مروه وأمجد

مروه وامجد

مروه بنت جميله ودمها خفيف ومؤدبه واخلاقها لا يختلف عليها اثنين دخلت كلية الأداب قسم تاريخ اصلها من صغرها بتحب تقرا وبتحب التاريخ اوي

مروه عمرها ما حبت . اه وهى عندها 15 سنه كده كانت تقف تبص على ابن الجيران من ورا الشير كان واد حلو وشايف نفسه وماشي مع نص بنات المنطقه . بس برضه هى ما كانتش بتحبه

مروه بقت فى سنه تانيه وكل محاولات زمالائها فى الكليه فشلت معاها كل الى كان بينها وبينهم علاقات فى حدود الدراسه والزماله وجد جدااااااا فى معاملتها

مروه اول مره تروح رحله فى الكليه بعد محاولات مع باباها كتيييييير لحد ما وافق وراحت رحلة اسكندريه مع الشله بتاعتها الى كلهم زمايلها فى الكليه

وفى الرحله كان فى ناس كتير مش من كليتها وكان فى أمجد .....

امجد كان فى كلية صيدله مرح أوي ودمه خفيف ووسيم وذوق وملاحظ وجود مروه من اول الرحله بس ما كلمهاش من اول اليوم عشان كان حاسس انها مش واخده بالها منه

بس الحقيقه مروه كمان كانت شايفاه وعارفه انه شايفها

بعد شويه حصلت مشكله مع المنظمين للرحلة غيروا نظام الرحله وفى ناس مش عاجبها وكانت متزعمه المعارضه مروه وراحت اتكلمت مع المسؤل فى الرحله والى كان صاحب امجد جدا وكان ساعتها امجد قاعد معاه

امجد قعدت يتفرج عليها وهى بتتكلم ... اعجب بها اوي

جميله وشخصيتها قويه وعندها اقدام وفى نفس الوقت محترمه فى كلامها

ادخل امجد لتهدأه الموقف وحاولوا يوصلوا لحل وسط والمشكله اتحلت

وامجد ومروه اتعرفوا .....

وامجد راح قعد مع مروه واصحابها و اتكلموا كتير اوي واليوم كله كان امجد مش شايف غير مروه
ومروه كمان كانت ملاحظه اهتمامه وبصراحه هى كمان كانت مهتمه بس مش باين عليها اوي
هى اصلها طول عمرها جامده وبعدين حب ايه هى مابتفكرش تحب دلوقتي
بس بينها وبين نفسها كانت حاسه ان فى حاجه غريبه

حاجه غريبه فى أمجد
حاجه غريبه في صوت دقة قلبها

بس كذبت نفسها وهزت دماغها كده تنفضه من ا لافكار دي وكملت رحلتها عادي

حتى لما ندى صديقتها القريبه منه اوي قالتلها وهى بتغمز : ايه فى ايه ؟؟ امجد ده شكله مركز معاكي ولا ايه ؟؟؟؟؟

قالتلها : مركز ايه انتى كمان لا بتهيئلي عادي بلاش النوايا بتاعتك دي الواد بيكلمنا كلنا عادي جايز عشان انا اول واحده اتعرف عليها عادي يعنى

المهم خلصت الرحله وتركت ما تركت من علامات على قلب امجد ومروه

ونكمل ا لمره الجايه يا حلوين

على سلامه

سلام عليكم
الحقيقه لقيتكم كده مزاجكم مش حلو قلت ...
ايه فاكرين هارفه عنكم .... اطلااااااقا

امال النداله تروح فين

لا انا مش هانكد عليكم برضه انما زي ما تقولوا كده هاعيش معاكم النكد شويه

من كام يوم بعتلي صديق وأخ عزيز عليا اوي قصيده كاتبها على سلامه

فعجبنى جدا جدا كلامه وقعدت ادور عليه

ولقيت له لقاء مع منى الشاذلي حلو اوي جبتلكم منكم كذا حاجه

مش مخليه فى نفسكم حاجه حتى النكد معاكم فيه مش معقول كده

دول اكتر حاجات عجبتنى اووووووي

هارجع عمالة الاطفال

السلام عليكم

ازيكم يا حلوين

الاول الف شكر لكل الناس الى دعتلى وكل الناس الى سألت على الماسوف على شبابها ركبتي وأنا الحمد لله احسن .

نروح على الرغي بقى

دلوقتي يا جماعه انا عماله ا سمع البطاله ونسب البطاله والكلام الكبير الى انتم عارفينه والى لا يعبر عن ربع الحقيقه والى بتقول ان نص الشعب قاعد عواطلي ده بالنظر كده

طيب دلوقتي الحاله العامه لاصحاب الاعمال والشركات والمصانع انهم بيشدوا فى شعرهم مش لاقيين حد يشتغل

طيب ايه ؟؟ نصدق مين احنا كده ؟؟؟

اصدق نفسي طبعااااا

عشان احنا بقالنا سنين بندور على حد يشتغل ومش لاقيين والحكايه الايام دي بقت بزياده اوي

ايام ما كنت انا متخرجه جديد كان الشاب من دول حديث التخرج يروح يشتغل مندوب فى أي شركه ولا بياع فى أي محل وياخد 100 جنيه يطلع بيهم عينه طول الشهر وطول اليوم

حاليا احنا حاطين اعلان فى كل حته فى الدنيا بتقول عايزين بائعين والراتب يبدأ من 400 جنيه ومش لاقيين حد

ما حدش يقولي ا لتضخم لا لا خالص لأن التضخم خلال عشر سنين مش اربع اضعاف ولا حاجه

من فتره كنت باخد كورس تسويق الكتروني وقبل الكورس عملوا ندوه وفيها رئيس جمعية تطوير المنشآت الصغيره الاستاذ عبد الباسط (راجل محترم اوي ودماغ حلوه فعلا ) قعدت يتكلم شويه معانا كشباب يعنى (ما اسمعش صوتكم ايوه انا شباب طبعا )

فقال للشباب انا مستعد اوفر فرص عمل لكل فرد فى القاعه دي (كنا حوالي ميه وشويه) وبرواتب معقوله وفى كيانات كبيره او متوسطه واعطى امثله لكام شركه كده معروفين فى المنصوره

فطلع واحد شاب امور كده وبقصه وموبايله ما بطلش رن قبل الندوه وعرف نفسه انه بكاااااااالريوس تجاره (اماااااااااال )

وانه واخد كورسات فى كيت وكيت وزيد وعبيد (الى هما على ما اعتقد لهم علاقه بالكمبيوتر مش بالتجاره )

وقال انا روحت اشتغل عند فلان وقالولي مافيش شغل هناك كويس الا بواسطه وروحت بواسطه وقالي عايز تشتغل ايه فقلتله فلان الى باعتنى عشان اشتغل فى الاداره .

قالي لا مافيش مكان فى الاداره مافيش يا اما بياع ياما على الكاشير .
قمت قلت مش مشكله (شوف التنازل يا جدع ) اشتغل كاشير .

يقوم يقولي انا انت مسؤل من الماكنه بتاعتك والبوابه (جدار ازاز كده ) الى انت قاعد جمبه من سلامتها ونضافتها ؟؟!!!! يعنى ايييييييييييه

يعنى انا اجي الصبح امسك جرنال واقف المع ازاز البوابه ؟؟ هاو كام ده انا متعلم ومتنور وبافك الخط

قصدي يعنى قال ابويا علمنى لمدة 18 سنه وصرف عليا دم قلبه وخد كورسات اد كده وبقيت علامه قوم المع ازاز ؟؟

وعشان ايه؟؟؟ اخد 500 جنيه ؟؟؟ هع ما يكفونيش سجاير ومصاريفى (حلاوة دخانك )

الراجل الى بيعمل معاه الانتر فيو قاله يا ابنى انا بدأت هنا (Grocer) بقال يعنى

هو المكان مول كده حاجه شبه كارفور بس على صغنن

وعقب بقى الفالح ساخرا : يعنى ايه جروسر اصلا والله مشيت وسبته ولحد دلوقتي ما اعرفش يعنى ايه جروسر
(الفالح المتعلم المتنور بتاع بكالريوس التجاره والكورسات والى ابوه صارف عليه دم قلبه مش عارفه يعنى ايه جروسر وزعلان انه مش لاقي شغل لائق بامكانيات حضرته .

واوعوا تفكروا انه مش مثقف كلا البت استهل حديثه الشيق ده ببؤين عن حقوق الانسان واحوال البلد واهانة المواطنين واستهانة الحكومه بحقوق المواطن داخل وخارج الوطن وور ور ور ور

سؤالي الوحيد الى كنت هاموت واسأله للاخ ده انت دلوقتي قاعد من غير شغل ؟؟ ( طبعا ايوه مافيش مكان يناسب امكانياته يا جدعان )
طب مين ابن التيييييييييت الى بيديلك مصروفك تشرب سجاير وتغيرا لموبايل وتلبس وتلزق شعرك كده يا حبيبى ؟؟؟


الشاب التاني
قام قالك انا ليييييييه اشتغل هنا فى ب 400 جنيه وامسح ازاز واغسل صحون ؟؟ ما انا اطلع اشتغل بره واغسل صحون بس اخد الفين جنيه

على اساس ان الناس بيتحايلوا عليه يسافر وهو راكب ورا محمد ثروت بيقول بلدىىىىىىىىى

او ان البلد ماسكه فى كمه وبتقوله ما تسبنيش يا احمد
الراجل قاله طيب ما تشتغل هنا ب 400 لحد ما يبقى يا سيدى يجيلك ابو الفين جنيه ابقى روح مش احسن ما تقعد من غير شغل ؟؟؟

الواد كان بيشتغل فى مصنع وطلعان عينه وهو فى الكليه مش عشان حااااااااجه لا لا

عشان هو فاشل وقعد فى الكليه عشر سنين فابوه جه بعد اربع سنين كده وقاله طب اشتغل بقى

الواد اول لما اتخرج بطلوع الروووووووووح بعد عشر سنين بجد مش هزار ساب الشغل وقالك لا بقى

انا بقيت باش محاسب محترم ولازمن ولا بد اشتغل بشهادتي على راي شيما (اومااااال لاااااا اومااااااااال طبعا )

نقوله تعالى اشتغل فى المحل بتاعنا يتفرد ويتنى كده شويه ويقولي هو المواعيد ايه ؟؟ فترتين ؟؟ طول اليوم يعنى ؟؟ لا لا انا عايز حاجه لحد الساعه سته كفايه

اشد فى شعري يا ناس ؟؟؟

نفس السؤال يطرح نفسه مين الي يستااااااهل الطخ فى النافوخ الى بيدي العيال دي فلوس تصرف على نفسها وتانتخ فى البيوت

مين الى يقول ان واحد فى مكتمل شبابه وصحته ويترمي فى البيت ويصيع على حس امه ولا ابوه وهما يعنى مش اقطاعيين ولا اغنياء حرب ولا حاجه ده على ادهم برضه

بس يستااااااااااهلوا

ومن هذا المنطلق قررنا نحن صبرني يارب انى اول ما امسك الحكم .......
فى الصييييييين يعنى

هاطلع قرار دكتاتوووووري رقم خماشر ونص ان على كل فرد فى هذا المجتمع انا يكون فرد منتج من عمر 16 سنه يعول نفسه على الاقل

الشباب يخرجوا يشتغلوا انشاله تباعين على ميكروباص
والبنات يشتغلوا فى البيوت ويتعلموا الطبيخ وشغل البيت ويربولهم فرختين فوق السطوح

وهارجع عمالة الاطفااااااااال ايووووووووووووون مش باقولكم قرار دكتاتور

ممنوع منعا باتا على أي فرد فى المجتمع انه يانتخ

الشعب ده عايز يتربى

احم ... فى الصين يعنى

أي مقترحات للقرارات الدكتاتوريه فى الصين الجديده ابقوا قولولي

إخوات فى الدراسة ..... مي وآسر

تنويه هااااااااام

(مي وآسر قصه من تاليفى واخراجي وطالعه من معاميع افكاري واي تشابه فى الشخصيات والاحداث انا ماليش دعوه مش عايزه دوشه كالعاده يا ناس فاضيه انتم .... اينعم انا قابلنى من ده كتير بس والله دي بجد مش بتاعة حد معين )

مـــي وآســـر

مي وآسر مع بعض من زمان اوي مش فاكرين من امته

بيروحوا مدرسه واحده وبيركبوا باص واحد وبيروحوا نفس الرحلات وحتى ساعات بيروحوا نفس المصايف

وفى علاقات أسرية طبعا

لحد ثانويه عامه كل واحد فيهم راح كليه غير التانيه بس الاثنين كلياتهم كانت فى نفس البلد ساعات كتير كانوا بيسافروا سوا ويرجعوا سوا مش احسن ما تسافر لواحدها ؟؟ اهو آسر مش غريب برضه (دي مامتها )

الغربه وحشه لازم يسألوا على بعض لازم يخاف عليها ولازم هى تحن عليه كانه ابوها وكانها امه دى حاجه فطريه جدا

عمرهم ما فكروا يحبوا بعض حب من بتاع الشحتفه والتعطيف وكده

انما بيحبوا بعض برضه وما يقدروش يستغنوا عن بعض بس حب اخوي اه اوعوا تفكروا حاجه تانيه

اصحاب اوي بالنسبه لها هو اعز صديق عندها (اوعوا تكونوا متخلفين ومش مؤمنين بالصداقه بين البنت والولد )

وكان لهم اصحاب مشتركين كتير وقضوا اوقات حلوه اوي مع بعض لهم ذكريات كتيييييير اوي مع بعض

هى كانت دايما دايما تاكد وتبت اوي على الحب الاخوي والصداقه عشان يفضلوا فاكرين

وعشان تنفي اي احساس بالخطأ فى مواجهة المجتمع الى اصلا اصلا مش بالع الفكره من اولها او بالعها من غير نفس

ولازم العلاقه تفضل كده والا تبقى الى فاتت دي كلها ولا اخويه ولا نيله وكانت هى بقى بتشتغل نفسها والمجتمع والناس ؟؟!!!!

آسر بقى كان متفرمل جامد ما اقدرش يا ناس البت بين كل كلمه والتانيه بتقول اخويا وصديقى وحاجات من الى توجع الضمير دي (ماهو الصداقه نوع من انواع الحب والحب نوع من انواع الصداقه )

بس هو من البدايه ما عندوش الضغط المجتمعي على افكاره وعقله ايه يعنى اصلا لما يكون له صديقه ولا الصداقه تتحول ولا حب ولا يعمل الى يعمله عاااااااادي هو راجل (دي نظرة المجتمع )بالتالي مافيش الضغوط الجامده الى على مي

بس برضه كلا البت هي برضه اختي (امااااااااااال اخته فى الدراسه برضه )
المهم خلصوا الكليه وقالتله ايه يا آسر انت مش هاتخطب ولا ايه (مش انا زي ماما ) نقي اي واحده من البنات الى نعرفهم وانا اشوفلك الموضوع

قالها مافيش حد والله على بالي مش عارف طب انتى شايفه ايه ؟؟ اختاري انتى

قالتله : معقوله مافيش ولا واحده منهم لافته نظرك ولا عاجباك ؟؟!!

قالها : لا يعنى عادي رشحيلى طيب

رشحتله مي 3 من المعارف وهو قالها مش عارف كلهم زي بعض عندي .طيب زيد طيب عبيد المهم حادي بادي وقع اختيارهم على واحده

وبدأت مي تمشي في الاجراءات ( امااااااال... امه يا جدعان فى الدراسه ) المهم بدات توفرلهم فرص يقعدوا مع بعض الأول وشويه شويه قربوا من بعض وشويتين كمان والخطوبه الرسمي وخلال كل ده كانت هى الراعي الرسمي للموال كله

حضرت مشاكلهم وخناقتهم وصالحتهم على بعض . شافت رسايله لها ورسايلها له حضرت الخطوبه حضرت كل حاجه بينهم القصه كلها

آسر ؟
آسر في كل مشكله كانت بتدخل هي بينهم تحلها كان بيبصلها وفى عنيه نظره غريبه

تفتكروا كان بيقولها ايه ؟

بتيهئلي كان بيقولها : لييييييه ؟؟ كان فيها ايه يعنى ؟؟ كان لازم تسوقي في الاخوه على الرابع ؟؟

وكان ساعتها يقولها بعنيه برضه : عاجبك الى احنا فيه ؟؟ ما حدش هايفهمنى زيك ولا حد هايفهمك زيي .

افهميييييي بقى

تفتكروا هي كانت بتفهم النظره دي ؟؟

يا اما حماره ومش بتفهم ( بس معقوله ما تفهمش اعز اصدقائها من غير ما يتكلم ؟؟؟؟)

يا اما فاهمه بس بتستهبل (بتهيئلي هى دي )

تخيلوا كمان مي كانت كتير بتحس ان نها خطيبة آسر بتغير منها ده حتى ساعات كانت مي بتحس انها بتوقع بينهم !!!!!

طب ده خلى مي تفكر طب انا لما اتجوز جوزي هايقبل علاقتي الوثيقه وصداقتى بآسر ولا هو كمان هايغير ويمنعنى منها ؟؟

يعنى ايه.... يعنى تقريبا صداقتنا دي لا محاله ضايعه ؟؟؟ ليييييه ؟؟
طب اعمل ايه ؟؟؟؟


روحي يا ايام وتعالى يا ايام فشلت كل محاولات مي فى اصلاح الامور بين آسر وخطيبته
وسابوا بعض نهائيا بعلامات في قلب كل واحد من الاثنين لا قول الثلاثه

وبعد فتره طويله فضل فيها آسر ومي اصحاب اوي برضه اخواتي اوووووي برضه

وبعدين آسر جاتله شغله كويسه بس بره مصر..... هايسافر

بجد مش قادر يسيبها

بجد هى حاسه ان حته منها هاتبعد عنها

بجد بقى هو شايف ان مافيهاش حاجه لما يحبوا بعض ويتجوزوا ما يمسش الصداقه فى حاجه يا ناس ما احنا نفضل اصحاب برضه


المهم فكر كتير وبعدين استجمع قواه وراح قالها الكلمتين دول

هى صدمت لما سمعتهم ( تفتكروا صدمت بصحيح ولا بتضحك على نفسها )

هى رفضت الكلام ده رفضا تاااااااما

وكانت عارفه ان برفضها ده هاتخسر آسر هاتخسر صديق عمرها

ما عادتش هاتقدر تقول اصله زي اخويا هى عارفه انه فكر فيها حاجه تانيه

طيب بس هو اخويااااااااا يا جدعان (هاتستهبلي اخوكي منين ؟؟)

ايوه بس ده احساسي به .. مش قادره ازاي افكر فيه كده ؟؟!!

والصداااااااااااقه ؟؟؟ خلاص هاتنتهي .

انا كنت باعامله على انه اخويا ينفع اتجوز اخويا ؟؟

مش قاااااادره

بس خلاص هى رفضت

رفضته وخسرته وبكت على صداقة العمر وعلى العلاقه الحلوه الى كانت بينهم
ايه رايكم ؟؟

آسر غلطان ؟؟ ما كانش لازم يفكر كده ولا يطلب منها الجواز عشان ما يخسرهاش ؟؟

مي غلطانه ؟؟ متاثرة بفكرة الصداقة البريئة والى شايفة ان تحولها لجواز وحب حاجه مشينه ؟

ولا انا اصلا الى غلطانه عشان فكرت فيهم ؟؟
ههههههههههههههههههههه


سمعوني رايكم يا حلوين

اه والنبى تدعولي ربنا يشفينى ويسترها معايا

ادعوا بذمه منك لها له