الأربعاء، 13 يناير، 2010

هارجع عمالة الاطفال


السلام عليكم

ازيكم يا حلوين

الاول الف شكر لكل الناس الى دعتلى وكل الناس الى سألت على الماسوف على شبابها ركبتي وأنا الحمد لله احسن .

نروح على الرغي بقى

دلوقتي يا جماعه انا عماله ا سمع البطاله ونسب البطاله والكلام الكبير الى انتم عارفينه والى لا يعبر عن ربع الحقيقه والى بتقول ان نص الشعب قاعد عواطلي ده بالنظر كده

طيب دلوقتي الحاله العامه لاصحاب الاعمال والشركات والمصانع انهم بيشدوا فى شعرهم مش لاقيين حد يشتغل

طيب ايه ؟؟ نصدق مين احنا كده ؟؟؟

اصدق نفسي طبعااااا

عشان احنا بقالنا سنين بندور على حد يشتغل ومش لاقيين والحكايه الايام دي بقت بزياده اوي

ايام ما كنت انا متخرجه جديد كان الشاب من دول حديث التخرج يروح يشتغل مندوب فى أي شركه ولا بياع فى أي محل وياخد 100 جنيه يطلع بيهم عينه طول الشهر وطول اليوم

حاليا احنا حاطين اعلان فى كل حته فى الدنيا بتقول عايزين بائعين والراتب يبدأ من 400 جنيه ومش لاقيين حد

ما حدش يقولي ا لتضخم لا لا خالص لأن التضخم خلال عشر سنين مش اربع اضعاف ولا حاجه

من فتره كنت باخد كورس تسويق الكتروني وقبل الكورس عملوا ندوه وفيها رئيس جمعية تطوير المنشآت الصغيره الاستاذ عبد الباسط (راجل محترم اوي ودماغ حلوه فعلا ) قعدت يتكلم شويه معانا كشباب يعنى (ما اسمعش صوتكم ايوه انا شباب طبعا )

فقال للشباب انا مستعد اوفر فرص عمل لكل فرد فى القاعه دي (كنا حوالي ميه وشويه) وبرواتب معقوله وفى كيانات كبيره او متوسطه واعطى امثله لكام شركه كده معروفين فى المنصوره

فطلع واحد شاب امور كده وبقصه وموبايله ما بطلش رن قبل الندوه وعرف نفسه انه بكاااااااالريوس تجاره (اماااااااااال )
وانه واخد كورسات فى كيت وكيت وزيد وعبيد (الى هما على ما اعتقد لهم علاقه بالكمبيوتر مش بالتجاره )
وقال انا روحت اشتغل عند فلان وقالولي مافيش شغل هناك كويس الا بواسطه وروحت بواسطه وقالي عايز تشتغل ايه فقلتله فلان الى باعتنى عشان اشتغل فى الاداره .
قالي لا مافيش مكان فى الاداره مافيش يا اما بياع ياما على الكاشير .
قمت قلت مش مشكله (شوف التنازل يا جدع ) اشتغل كاشير .
يقوم يقولي انا انت مسؤل من الماكنه بتاعتك والبوابه (جدار ازاز كده ) الى انت قاعد جمبه من سلامتها ونضافتها ؟؟!!!! يعنى ايييييييييييه

يعنى انا اجي الصبح امسك جرنال واقف المع ازاز البوابه ؟؟ هاو كام ده انا متعلم ومتنور وبافك الخط

قصدي يعنى قال ابويا علمنى لمدة 18 سنه وصرف عليا دم قلبه وخد كورسات اد كده وبقيت علامه قوم المع ازاز ؟؟

وعشان ايه؟؟؟ اخد 500 جنيه ؟؟؟ هع ما يكفونيش سجاير ومصاريفى (حلاوة دخانك )

الراجل الى بيعمل معاه الانتر فيو قاله يا ابنى انا بدأت هنا (Grocer) بقال يعنى

هو المكان مول كده حاجه شبه كارفور بس على صغنن

وعقب بقى الفالح ساخرا : يعنى ايه جروسر اصلا والله مشيت وسبته ولحد دلوقتي ما اعرفش يعنى ايه جروسر
(الفالح المتعلم المتنور بتاع بكالريوس التجاره والكورسات والى ابوه صارف عليه دم قلبه مش عارفه يعنى ايه جروسر وزعلان انه مش لاقي شغل لائق بامكانيات حضرته .

واوعوا تفكروا انه مش مثقف كلا البت استهل حديثه الشيق ده ببؤين عن حقوق الانسان واحوال البلد واهانة المواطنين واستهانة الحكومه بحقوق المواطن داخل وخارج الوطن وور ور ور ور

سؤالي الوحيد الى كنت هاموت واسأله للاخ ده انت دلوقتي قاعد من غير شغل ؟؟ ( طبعا ايوه مافيش مكان يناسب امكانياته يا جدعان )
طب مين ابن التيييييييييت الى بيديلك مصروفك تشرب سجاير وتغيرا لموبايل وتلبس وتلزق شعرك كده يا حبيبى ؟؟؟


الشاب التاني
قام قالك انا ليييييييه اشتغل هنا فى ب 400 جنيه وامسح ازاز واغسل صحون ؟؟ ما انا اطلع اشتغل بره واغسل صحون بس اخد الفين جنيه

على اساس ان الناس بيتحايلوا عليه يسافر وهو راكب ورا محمد ثروت بيقول بلدىىىىىىىىى

او ان البلد ماسكه فى كمه وبتقوله ما تسبنيش يا احمد
الراجل قاله طيب ما تشتغل هنا ب 400 لحد ما يبقى يا سيدى يجيلك ابو الفين جنيه ابقى روح مش احسن ما تقعد من غير شغل ؟؟؟

الواد كان بيشتغل فى مصنع وطلعان عينه وهو فى الكليه مش عشان حااااااااجه لا لا

عشان هو فاشل وقعد فى الكليه عشر سنين فابوه جه بعد اربع سنين كده وقاله طب اشتغل بقى

الواد اول لما اتخرج بطلوع الروووووووووح بعد عشر سنين بجد مش هزار ساب الشغل وقالك لا بقى

انا بقيت باش محاسب محترم ولازمن ولا بد اشتغل بشهادتي على راي شيما (اومااااال لاااااا اومااااااااال طبعا )

نقوله تعالى اشتغل فى المحل بتاعنا يتفرد ويتنى كده شويه ويقولي هو المواعيد ايه ؟؟ فترتين ؟؟ طول اليوم يعنى ؟؟ لا لا انا عايز حاجه لحد الساعه سته كفايه

اشد فى شعري يا ناس ؟؟؟

نفس السؤال يطرح نفسه مين الي يستااااااهل الطخ فى النافوخ الى بيدي العيال دي فلوس تصرف على نفسها وتانتخ فى البيوت

مين الى يقول ان واحد فى مكتمل شبابه وصحته ويترمي فى البيت ويصيع على حس امه ولا ابوه وهما يعنى مش اقطاعيين ولا اغنياء حرب ولا حاجه ده على ادهم برضه

بس يستااااااااااهلوا

ومن هذا المنطلق قررنا نحن صبرني يارب انى اول ما امسك الحكم .......
فى الصييييييين يعنى

هاطلع قرار دكتاتوووووري رقم خماشر ونص ان على كل فرد فى هذا المجتمع انا يكون فرد منتج من عمر 16 سنه يعول نفسه على الاقل

الشباب يخرجوا يشتغلوا انشاله تباعين على ميكروباص
والبنات يشتغلوا فى البيوت ويتعلموا الطبيخ وشغل البيت ويربولهم فرختين فوق السطوح

وهارجع عمالة الاطفااااااااال ايووووووووووووون مش باقولكم قرار دكتاتور

ممنوع منعا باتا على أي فرد فى المجتمع انه يانتخ

الشعب ده عايز يتربى

احم ... فى الصين يعنى

أي مقترحات للقرارات الدكتاتوريه فى الصين الجديده ابقوا قولولي







هناك 53 تعليقًا:

أحمد عاطف يقول...

حاجه صبرني

بتوع الشغل بردو مش وبلد حلال اوي يعني ... انا ببعت السي في بتاعتي من اول ما يقول مندوب مبيعات بخبرة 0-1 عام لحد مدير مبيعات بخبرة 8 سنوات او 9 سنوات

وبروح الانترفيو الاقي كلام يحرق الدم واحد بيقولي وانت عايز تشتغل مندوب مبيعات ليه وانت مؤهلاتك تأهلك لمدير ... لو رديت وقولت له مش لاقي شغل هايكون رد مش منطقي

فبرد اني عندي استعداد اشتغل اي شغل طالما مش هايعبني وفي نفس الوقت اكيد هاتعلم جديد

الاقي واحد يقولي مانت كده خبراتك اعلى من مدير المبيعات

طيب انا ارد عليه واقول ايه

خدي من دا كتير

لما تلاقي طالبين مدير مبيعات يشترط الا يتعدى سن 30 سنة وعنده خبرة 6 سنوات ومعاه عربية ويكون خريج مدارس لغات

ماهي دي حاجات تفرس بردو

يا حاجه صبرني بلدنا الشغل فيها مش بالكوم ولا حاجه الشغل فيها هنا هو نفسه نظام البلد ناس فوق بواسطة وهما حمير

وناس تحت من قلة وهما بيفهموا بس العينة اللي انتي شوفتيها دي من عينة الناس اللي بتشجع كورة

تحياتي

شمس النهار يقول...

::))
اذا كان الشغاله اللي بتشتغل في البيت بتاخد يوميه 60 و100 جنيه

ياصبرني مادام الهرم اتقلب يبقي خلاص يارحمن يارحيم

سلامتك هكلمك الصبح ان شاء الله

سلامي

Mr.Hazem يقول...

طفوله ضائعه ومستقبل مجهول :(

تامر علي يقول...

انطلاقاً من مبدأ الدفاع عن الأنتخة سأستل سيفي البتار المسنون كأنياب أغوال واناضل عن حقوقق المتأنتخين والمتأنتخات

- بداية احنا في بلد اصحاب الاعمال فيه عاوزين عبيد يشتغلوا عندهم 12 ساعة في اليوم ب300 جنيه في الشهر ويحمدوا ربنا في حين انه ممكن يكون عارف ومتأكد ان ده مش عدل وانه بيكسب كويس من ورا شغل العامل ده لكن شيطانه بيبرر له سوء افعاله بأن البغل اللي شغال ببلاش ده بياخد في المقابل "خبره" وبيتعلم الشغلانه وبناء عليه فلا مانع لديه من ان يتحول لمصاص دماء بدم بارد

- في نفس الوقت يقابل المذكور أعلاه نوعية من العمالة البليدة غير المؤتمنه التي لاهم لها سوى الهروب من المسؤليات وان وجدت قوت يومها لاتخرج من منزلها ويفضل قعدة القهوة على العمل طالما في جيبه 5 جنيهات

الملخص نحن نعاقب ببعض فالجشع الاول يعاقب بالبليد الثاني
والمتبطر الثاني يعاقب بالجلاد الاول

اي خدمة
وتحيا الانتخة :)))))

ستيته حسب الله الحمش يقول...

اولا يارب تكون ركبتك خفت

ثانيا طبعا شباب ومين ده اللي يعترض
بالفرفر على نوفوخه

ثالثا شوفي لو سمحتي ياريسة وظيفة لعفرتو وانا ابعته بصاروخ موجه

رابعا لأ بنتي مش ها تربي فراخ
ها تنزل في الصيف تاخد كورس مودلينج
يمكن البت تعرف بعد كده تجيب فلوس وتصمم ازياء ونبني بقى العمارة وفوقيها الروف :)

Wanda يقول...

اولا
انا اعترض
عمالة اطفال قال
لا يا سيتى امال طباخة بريمو نشغل فيها مين :-))

ثانيا
كحاكم الصين و النبى حللهم موضوع الجواز الى حيقف من 2020 قبل ما يهجموا على البنات فى البلاد الاخرى

ثالثا
لو سيبت الى انا فيه حتشغلينى ايه يا دكتاتور صبرنى :-))
جايز تلعب فى دماغى بجد و اسيب و انطلك :-))

بدراوى يقول...

صراحة معترض على الكلام
يعنى كل اللى بيتكلموا عن ان اى شغل مش المهم و مش عيب تتشتغل اى شغلانة فى سبيل انك متقعدش فى البيت
و الشغل مش عيب و شغلانة شريفة و كل الهجص ده
هماه اول ناس يرفضوا ان ولادهم يشتغلوا الشغلانات ديه

انا مثلاً قبل ما اشتغل من فترة لفيت فى اماكن طالبة مندوبين مبيعات ابص الاقيه يلف بشنطة
شغل تانى فى شركة ادوية مراجع ادارى
الراجل يقولى 13 ساعة ب 400 جنيه
و حتمضى وصل امانة ب 50 الف جنيه كمان
!!!!!

و شغل فى شركة سياحة تايم شير يطلع نصب فى الأخر

انا عندى اخرج برة البلد و اشتغل اى شغل
على انى اشتغل اى شغل مش مناسب ليا اجتماعياً هنا

حضرتك اعقليها كويس و حتلاقيه موضوع صعب اوووى و جارح لوحدى

حضرتك بتتكلمى كدة دلوقتى لأنك بتشتغلى خلاص و ربنا يباركلك و يكرمك بس احسبيها لما كنتى مش بتشتغلى
و حطى نفسك مكان الناس اللى مش لاقية شغل مناسب ليهم

خواطر شابة يقول...

من يقرأ تدوينتك يعتقد ان الحياة بمبي والناس بتتبطر على النعمة في حين هذه ليست الحقيقة الواقع هو الاستغلال يعطيك اجرة وظيفة ويشغلك ثلاث يطلبك لوظيفة سكرتيرة ويستخسر ان يشغل عاملة نظافة فيطلب منك ان تشتغلي الاتنتين هذا هو الواقع عزيزتي
انا معك ان اليد البطالة نجسة لكن اوقات المعروض يكون فوق الطاقة

محمد فؤاد (صاحب عمود النور) يقول...

ازيك يا صبرنى؟؟

بصى اللى عايز يعمل حاجه هيعملها واللى عايز يوصل هيوصل واللى عايز ينجح هينجح وبرضة العكس..

انا اول لما اشتغلت كنت فى رابعة جامعة ونزلت شغل عشان بعاقب نفسى انى سقت رابعة واشتغلت فى شركة واللهى واللهى تحت السلم كانت ريحة المجارى بتنزل عليا ب 300 جنية وقولت اتعلم واخد خبرة وكنت باشتغل ايه مصمم جرافيك وسيبتها وبقيت اروح شركات اكبر لحد بعد حوالى سنه روحت وكالة دعاية واعلان ولما خلصت الدراسة قررت انى اشتغل بتخصصى ابويا قالى تعالى اشغلك فى شركة زيروكس بتاعة الطباعة قولتله بتخصصى قالى لا هتقف على ماكنتة تصوير تصلحها هنا بقى كان قرار فاصل انى ياما اشتغل فى الدعايو والاعلان والتصميم؟؟ ياما اشتغل فى المحاسبة وفعلا اخدت القرار انى اشتغل فى المحاسبة ليه بقى؟؟؟ لان كنت واخد كورسات محاسبة وانجليزى بحوالى 4000 جنية فاحرام ارميهو فى الارض.
وصممت واشتغلت بتخصصى والحمد لله ربنا كرمنى وبقيت فى شركة كبيرة دلوقتى كل دا عشان انا اول لما اتخرجت كنت شايف مكانى هنا فى الشركة وماكنتش شايف اى حاجه الا انى ابقى موظف هنا فى الشركة اللى انا شغال فيها دلوقتى حددت هدفى وجريت وراه وكله بفضل الله.

الحكاية كلها انك تبقى عايز تعمل حاجة وسط كل حاجة مخلايك واقف

reem يقول...

حبيبة قلبي عاملة ايه دلوقتى

يارب تكون ركبتك احسن

انا مع ستوتة هاودى بناتى يتعلمو موديلنج هو دا اللى بينفع دلوقتى

بس ياتوتة بردو الشباب عندهم حق يعنى يكون ابن ناس وتعب واتعلم وفي الاخر مش يلاقي شغل يناسب مستواه

ماهى صعبة بردو

يعنى لو واحد بابه مهندس او دكتور محترم تفتكرى ينفع يشتغل اى حاجة
ومش بقول الشغل عيب بس لازم نعترف ان في حاجات كتير بتحمكنا

المهم انتى بئا تشوفي حل للحاجات دى لما تمسكى حكم الصين

بس ياتوتة بالراحة على الاطفال بليز ومش تشغليهم
حرام بيصعبو عليا

mayada يقول...

استني بقي عشان انت جايه علي الجرح اهو
استني انا جيالك في الكلام

واحد زميلي هو برضه خريج تجاره المهم ياست الكل اول مافتحنا الصيدليه قال لواحده صاحبتي كلمي ميادة اشتغل في الصيدليه عندهم بس متعرفهاش ان انا اللي قلتلك المهم البت كتر خيرها قالت ليه انا لفيت من بعيد برضه عشان مااحرجهوش المهم ياستي مطولش عليكي جه وقلتله هتاخد 300 جنيه غير نسبه ع المبيعات وكده قال طيب مش اعرف هشتغل ايه (قوليلي بس اقوله ايه اقوله هتشتغل صاحب الصيدليه راضيه زمتك )
المهم قلتلتله سيلز وكده المهم قعد يشتم علي البياعين ويتريق مع ان الحمار عارف ان في 3 كنت بشتغل في محل في الصيف سيلز وفي رابعه اشتغلت برضه تلي سيلز في شركه وانا ليومنا هذا عندي محل طرح ومكياجات وبشتغل فيه بياعه برضه يعني قعدت يهزء فيا وهو عاطل وصايع وفاشل وعمره ماهينفع عاااااااااااااااااا فتحتيني ليه بس ليه ليه

صبرني يارب يقول...

احمد عاطف

انا قلت ان بلدنا ما فيهاش حاجات تفرس ؟؟

اولا ما تنكرش برضه انك يوما كده قعدت واتنكت يا احمد وقلت انا لسه هابدأ من جديد ؟
لسه هارجع اشتغل مندوب ؟؟

وبعدين معلش اعذر صاحب العمل فى حاجه ما يقدرش يشغلك مندوب تحت مدير مبيعات اقل منك هاتحصل مشاكل فى العمل هو له مصلحته برضه

وبعدين انا مش باقول على حالتك انت لعلمك

ليه

لان انت كواحد عندك خبره فى عندك حاجه تديها لصاحب العمل انماا لخريج الجديد ده عنده ايه ؟؟
يعرف يعمل ايه ؟؟؟
صاحب العمل هايكسب من وراه كام
مش نحسبها كده ولا هو يعنى كل اصحاب الاعمال حراميه ومش من حقهم ياكلوا لقمه بالحلال ؟؟

وبعدين انا عايزه ذمتك يا احمد المواصفات الى انت قلتها دي

لما تلاقي طالبين مدير مبيعات يشترط الا يتعدى سن 30 سنة وعنده خبرة 6 سنوات ومعاه عربية ويكون خريج مدارس لغات

بس شيل موضوع العربيه

مش المفروض اصلا تكون موجوده عند واحد عمره 28 سنه عادي يعنى ؟؟؟

يعنى المفروض انه يكون متخرج من الكليه بيعرف لغه كويس ويخرج يشتغل على طول

لا ويكون فى الكليه كمان متدرب ويا حبذا لو كان بيعمل فى الاجازات تنضم لفترة خبرته جايز

المنظومه كلها غلط انا عارفه

مالوش لازمه بقى العيال تطلع بحتة ورقه مالهاش لازمه تتنطط على الشغل بسببها

صبرني يارب يقول...

حازم

منور يا فندم

جبت ضرفها انت
ههههههههههههههه

صبرني يارب يقول...

شموسه

الله يسلمك يا قمر

تنورينى


وهى فين الشغاله يا شمس دلوقتي بقوا يجوا عايزين حسنه لله تقولي اشتغلي تقولك اصل العيال لواحدهم فى البيت

صبرني يارب يقول...

تامر علي

انطلاقا من مبدأ اننا اصحاب اعمال على اد حالنا

هاستل انا بقى السنجه والمطوه واناضل لاثبتات حقوق الطلعان عنيهم

شوف يا تامر احنا الدنيا صعبه علينا كلنا

ما تحملش اصحاب الاعمال بقى كلهم الطيب فيهم والشرير المشكله

انا عارفه ان 400 جنيه يادوب ياكلوا عيش حاف

بس اعمل ايه ؟؟ اتبنى الشعب انا ؟؟؟

طيب انت اهو كمدافع عن شعب المانتخين

قولي انا كصاحب عمل

لما احب اشغل بياع فى محل لمدة عشر ساعات فى اليوم على فترتين ولا يشترط المؤهل ولا الخبره

مطلوب مني ايدله كام ؟؟؟؟؟؟؟؟؟؟

واحب اقولك ان 400 جنيه والله الحد الادنى

الى هو واحد جاي يتعلم الشغل وحتى ساعات بنخليهم 500 لما يكون واحد متجوز ونقول فاتح بيت

قولي انت نعمل ايه ؟؟؟

المحل عشان يمشي عايز خمس افراد على الاقل

ادفع اجور كام لمحل عادي جدا كل ذنب صاحبه انه قال مش هاحبس فلوسي فى بنك ولا ارض وهاشتغل واشغل ناس وربنا يرزقي برزقي ورزقهم ؟؟

لا احنا مستغلين ولا احنا بنمص دم الغلابه ياعم

ومش احنا بس والله فى زينا كتير صدقنى

وزي ما انت قلت بنقابل بلااااااوي الى يسرقنا فعليا

والى بيسرقنا معنويا بالانتخه والاهمال والاستهبال

حاجه تقرف

حضرتك انا هاطلب منك بس تيجى تقعد عندنا لمدة اسبوع تعمل بس انترفيو للمتقدمين للعمل وانت تعرف منطلق النقطه الى انا فيها والله

نورت يا باشا

صبرني يارب يقول...

ستيته

والله يعنى يا ستيته الحمد لله ماشي الحال احسن النهارده

هاتيه عفروتو ده حبيبى هياخدني معاه تدريب الفروسيه

وبالنسبه للموديلنج البت مريم لو عرفت هاتجيلك تتبنيها
هههههههههههههههههه


يعملوا اي حاجه يا خالتي انا بس بادي مثال على ان البنت كمان ممكن تكون منتجه
مش كسلانه متخلفه عقليا ما بتعملش حاجه غير انها تتزوق وتخرج تعمل شوبنج

وحشااااااااااااني اتصرفي بقى

صبرني يارب يقول...

واندا

بذمتك مش العيل الى بيشتغل وهو صغير بيطلع راجل

وكحاكم للصين الجديد هاطلع قرار ان الى هايزود عن 25 سنه ما يتجوزك هاعلقه من رجليه وده بوست جديد بجد مش هزار

واشغلك ا يه ياعم ما انا ما اعرفش انتى بتعملي

وبعدين تعالى انا وانتى نعمل عقود ياسمين ونطلع نبيعها فى الاشاره
ههههههههههههههههههههههه

صبرني يارب يقول...

بدراوي

و الشغل مش عيب و شغلانة شريفة

ده هجص ؟؟

امال ده يبقى ايه ؟؟

انا عندى اخرج برة البلد و اشتغل اى شغل
على انى اشتغل اى شغل مش مناسب ليا اجتماعياً هنا


بدراوي هاعورك يا بدراوي

شوف انا ماليش دعوه بالعقد النفسيه الاجتماعيه دي

انا عن نفسي جوزي كان بيشتغل كهربائي تركيبات وهو فى الدراسه واتجوزته وانا عارفه انه كان بيشتغل كده

وايام ما خطبنى كان بيشتغل مندوب فى شركة سيلتال وبيصلح آلات كاتبه اخر النهار وساعات يطلع برضه شغل كهرباء
وكان مشارك اصحابه فى مزرعة ارانب وواخد جدول رعايه معاهم

قشطه ؟؟

والله كان بيشتغل كل ده فى وقت واحد

ومش قلتله عيب عليك ولا حاجه

وبعدين واحنا مخطوبين سافر شويه بره ورجع ابيض يا ورد لاسباب فنيه مش منه والله

فما لقاش حاجه غير انه يقعد فى محل ورث مع اخواته محل بقاله

قالي عندك مشكله فى كده ؟؟ قلتله ابسلوتلي نوت بس يكون ده البدايه

وكنت سعيده اوي انه حول المحل من منشأه مديونه لمحل ناجح جدا ومحترم جدا وبيجيب قرش كويس

الرحله طويله بقى بعد كده عايزه قاعده


وانا باقولك اهو تعالى بعد عشر سنين وشوف انا هاكون مشغله ابنى ولا لا
لو ربنا احياني


وانا مش باشتغل دلوقتي اصلا عشان تكون عارف

ومش لقيت الشغل والدنيا على طبق فضه انا وجوزي بدأين من تحت الصفر بشويه

فمش تفرسوني والنبى

صبرني يارب يقول...

خواطر شابه

انا ما قلتش ان الحياه بمبي

بالعكس

عارفه لو كانت الحياه بمبي كان يبقى لهم حق

انما الحياه زفت واحنا بنتنطط كمان

فى اصحاب ا عمال مفتريين

بس فى اصحاب اعمال محترمين وفى ناس بتروح تشتغل ولاد تيييييييييييت

زي ما فى صاحب عمل مستغل

فى مليون واحد من العيال الايام دي مهملين وكسلانين ومش بتوع شغل خااااااااالص

انا شوفت بعينى والله

صبرني يارب يقول...

عمود نور

ايوه تمام انا معاك

بس انت كنت بتشتغل وانت فى الكليه ولو كنت مش لقيت فرصه بمحاسبه كنت هاتشتغل حاجه تانيه على ما تلاقي حاجه مناسبه

ما ينفعش اقعد سنين فى البيت اصل مش لاقي شغل يناسبنى ده يبقى هبل

يبقى استهبال بمعنى اصح

انا مؤمنه ان كل شغلانه الواحد بيشتغلها بتعمله حاجه من نوع خاص مافيش شغل ما بيعلمش

قعدت مره مع واحد الله يسامحه قالي انااشتغلت فى اكتر من شغلانه وكنت باسيبهم لما احس انى جبت اخر الشغل ده ومافيش جديد هاتعلمه ادور على شغل فى مكان تاني بقى لحد ما الاقي مكان هاتعمل منه جديد عشان اعلى بمستوايا لانى كنت لسه متخرج

عجبنى يومها بس تفكيره بالشكل ده

الله يسامحه ليه ؟؟ لا لا ده موضوع تاني خالص
ههههههه


نورت يا محمد

صبرني يارب يقول...

ريم

نعم ؟؟

هاجي اضربك

باباه دكتور او مهندس ماشي على عينى وراسي

هو مين ؟؟ بيعرف يعمل ايه ؟؟؟

هايقعد هو لابوه يصرف عليه عشان لو اشتغل شغلانه تعر ابوه

لا يا ريم دي كلها افكار غلط

بنقلد الغرب احنا فى الهبل وبس نرقص نلبس من غير هدوم ننادي بحقوق المرأه فى القلع فى الشارع والتعدد

انما نشوف بيشتغلوا ازاي ؟؟

الاب بيكون معاه فلوس ومركزه ميه ميه

والابن بيشتغل فى الجازه ويتر

عادي جداااااااااااا

ويا اما برغبة الاب او ساعات الولد نفسه عايز يبقى له شخصيه

والولد والبنت سواء كمان فى الموضوع

الموضوع اصله مش شغل وفلوس
الموضوع بناء شخصيه

والاطفال لا طبعا لا هواده هايشتغلوا عشان يطلعوا بنى ادمين مش عيال سيس
هههههههههههههه

صبرني يارب يقول...

مياده

عارفه المثل الى بيقول اقرع ونزهي ؟

اهو هو ده كده ولعلمك كل قلة الادب دي لا تخرج عن كونها غيره انك فالحه عنه مع انه طبعا واخد ابونيه فلاحه من المجتمع بما انه ذكر ومعدود علينا

حسبنا الله ونعم الوكيل

انا قلت كده الحريم هما الى ينفعوا الايام دي

ولعلمك احنا تنازلنا عن مبدأنا وشغلنا بنات فى المحل

والبنت الى شغاله دلوقتي بتشتغل نص دوام
عارفه ليه ؟

عشان بتشتغل دوام تاني عند دكتور اسنان

وعارفه كمان

متجوووووووووووزه

الهي يتوكسوا وكسه بنى الذكور المعدودين على المجتمع وبيطفحوا من دم الناس

mayada يقول...

طيب خدي دي بقي عشان انا افتكرت اهو
برضه انا كنت بشتغل في اكبر ش ركه توزيع ادوي ه في مصر اوكشن في h.r المهم يا حبيبتي اخوا مرات اخويا اصغر مني بسنه خريج علوم قسم كمياء المهم قلت لمحمد اخوي ا لان له دلال في الشركه وكده يكلمهم يشغل وه بدل مال واد اتخرج وعاطل وعامل شبيح وداير بالعربيه يعاكس في بنات الناس قشطه قشطه فجبناله شغله مندوب
عارف ام الواد حماة ا خويا قالت ايه لما جبناله شغل قالت ياشركه بترول يابلاش واهو الواد قاعد متلقح جنبها ليومنا هذا يبله بقي وتشرب ميته
وبرضه ياامي مش كل جمع مذكر سالم
يعني انا اخويا دكتور صيدلي وصاحبه مهندس مدني كانوا بيشتغلوا في اول سنه في الجامعه عاملين مشروع ديجي اللي هو بتاع الافراح ده مع ان والحمد لله احنا مستريحين ماديا وصاحبه كده كمان
بس الفضي ده بيعمل نصايب وقرف وبلاوي
ماهو احنا كل اللي احنا فيه ده من الفضي

يوميات شاب منوفى يقول...

لما الواحد يتخرج ومعاه اعلام ومش لاقى شغل ويروح من ورا اهله لشركة قلبظ يقلوله مش عايزيين مؤهلات عليا يعمل ايه .

انا مش هتعلم 16 سنة وادفع دم قلبى علشان اشتغل مرمطون طول الشهر علشان 300 جنية يعنى لو واحد اتقدم لاختك او بنتك ومرتبه 300 جنية هتوافقى .

لما اشتغل 12 ساعة علشان 300 او 400 جنيه ده عدل وصاحب الشغل يطلع عين الى خلفونا

حضرتك بتتكلمى كان الدنيا جميله والشباب هو الى بيدلع الوضع بجد صعب

لما اب يقول لابنه قعد فى البيت احسن متشتغل اى شغلانه بيشتغله الجاهل والى معاه دبلوم وانا صارف عليك دم قلبى فى التعليم وخليتك تاخد مؤهل عالى وتشوفى فى عنيه حسرة وكسرت نفس يبقى الوضع ايه

فتاه من الصعيد يقول...

انا مع حضرتك ... بجدفي كتير بيدلعوا

ربنا يسهل وتلاقي بياعين يا رب

تحياتي

Wanda يقول...

نبيع فل و ياسمين
ياسلام شغلانه كلها روائح
بس انت المعلمة يعنى انا اسرح و اغلس على الحبيبة و اخر اليوم اديكى اليومية

بس
هى فعلا بتبقى فل؟؟ اشك
اصل زمان انا و اخويا كنا بنعمل عقود من زهر البرتقال
و و الله الشكل و الرائحة زى الفل بتاع الشوارع ده:-)))
بس عندى خبرة اهه :-))

استوضاح التعليق على الرجلين ده
للصينين مش كده ؟؟؟
اصلى بدوخ يا صبصب من الحركة ده
و بعدين يا صبرنى انا اكبر منك انت اصلا :-)) حرام عليكى تعملى فيا كده :-))

تامر علي يقول...

ماشي انا هاجي اقعد اسبوع علشان احكم على الوضع ..بس لازم برضه يكون في حاجه تسند قلب الواحد يعني الفطار حمام "حاجه خفيفة كده"والغدا بط والعشا رومي علشان ننام خفاف وبعدها ممكن اتبنى وجهة نظركم :))))

ستيته حسب الله الحمش يقول...

بتتزوق وتعمل شوبنج؟
مين البنت دي؟
عرفيني عليها؟
علشان ها ارمي مانوسة في الزبالة واتبناها

يارب قبل ما اموت اشوف بنتي بتتزوق وتعمل شوبنج
عااااااااااااااااااا
يارب متحرمنيش الأمل ده

MǿиY El-Shreef يقول...

ايه ياحاجة ده طب ذنب البنات ايه

الولاد ماشي بس البنات لا احنا مالناش دعوه ايوة اللي اوله شرط اخره نور

عشان ننتخبك بقى للحكم ف الصين الجديده :P

الف سلامه يا صبرني هانم (L)

صبرني يارب يقول...

مياده

بصرف النظر عن الشغله الصعبه المنتجه الى اخواتك كانوا شغالينها
ههههههههههههههههههههههه

الا اني مش شايفه ان الشغل بس عشان الفلوس وعشان الناس المحتاجين لا خالص
وبعدين ما هو برضه عندها حق
يا بترول يا بلاش

اقل من الزفت على دماغه لا ترضى بديلا

حسبنا الله ونعم الوكيل على الاهالي الى مش عارفه تربي عيالها

صبرني يارب يقول...

يوميات شاب منوفي

لما اب يقول الى انت بتقوله ده

يبقى من هنا نعرف ليه احنا موكوسين وكسه طين

وانا ربينا ولادنا غلط وبنطلع عقدنا عليهم

ولما تروح لشركه وتقولك مش عايزه مؤهل عالي ده مش عشان المؤهل العالي شتمه

لكن عشان بقى ريشه على الراس ما لهاش لازمه

لا الشاب من دول نافع يشتغل بشهادته لانه اصلا ما اتعلمش
ولا عارف يشتغل اي شغلانه ونفسه كبرانه على الشغل

وصدقنى هى الغلطه من الاول ان الشعب كله اتعلم غلطه

عرفتوا بقى ان عمالة الاطفال مهمه


وبالمناسبه انا وافقت على جوزي وهو كان بيشتغل مندوب فى شركة سيلتال وبياخد 100 جنيه فى الشهر

ولو جه لبنتى رااااااااااجل اضمن بس انه راااااااااجل وهى موافقه عليه

مش هاسأله هو بياخد كام

صبرني يارب يقول...

فتاه من الصعيد

فكرنا جديا يا بنتى ناخد شقه احنا ومجموعه من التجار ونجيب ناس من الصعيد يشتغلوا والله العظيم

تخيلى

هانستورد عماله للدلتا الى فيها كثافه تخنق الى ما يتخنقش

صبرني يارب يقول...

تامر علي

هههههههههههههههههههههههههههههههه

انا باقول خليك مكانك مرتاح وانا هانزل عنوانك بدل عنوان المحل فى الاعلان وخلاص

هههههههههههههههههههه

صبرني يارب يقول...

واندا

والله زمان كانت بتبقى ياسمين فعلا بس حاليا ما قابلنيش ولا واحد ماشي بياسمين

ولا حتى ورد برتقال ده اخره ورد فجل

وبالنسبه للقرار ايووووووووه بنات وولاد وحياتك

الى مش هايتجووووووووز هاعلقه من رجليه قرفتوني يا واندا

ههههههههههههههههههههههه

صبرني يارب يقول...

ستيته

تعااااااااااااالي

والله ما هي راجعه

تعالى والنبى

واد مانوسه مرتين وحياتك

لسه حالا دلوقتي قايله لماما لو ما غسلتكيش المواعين هاتيها من شعرها ورنيها علقه

عشان ما بتعملش بجد غير كده

تنام وتقوم تتزوق وتخرج تصرف فلوس امها وابوها

هاتنقطتني يا ستيته

وهات البت مانوسه وانا اخليها تنحرف فى ظرف اسبوع
ههههههههههههههههههههههههه

صبرني يارب يقول...

موني الشريف

كلا البت الاثنين بنات وولاد ده انا قربت اعمل كورسات ترغيب فى الجواز

تسلمى يا جميل ونورتي

حنعيش يعنى حنعيش يقول...

الشعب ده عايز يتربى ... والله عايز يتربى ...والنعمة عايز يتربى ...والختمة الشريفة عايز يتربى ...يارب زى مابتصبر صبرنى ..صبرنى

صبرني يارب يقول...

حنعيش يعنى حنعيش

يارب يصبرنا كلنا يارب

ود اسلام يارب بزياده شويه


طيب هانعمل ايه بقى

هانربيه ازاي ؟؟

مش قلتلكم مسكوني الحكم ؟؟؟

فى الصين الجديده يعنى

نورت يا فندم

مصري جدا يقول...

نسبة وتناسب

الشاب او البنت محتاج كام علشان يقف على حيلة؟

على الاقل مية ألف جنية اضافة الى مصاريفة الشخصية

اي كلام تاني مجرد عبث

مية وخمسمية نكتة بايخة

الواد اللي مش عاجبك معاة حق

جاي تدفع ملاليم في زمن الملايين

طبيعي يرفض

راجل صعيدى يقول...

السلام عليكم ورحمة الله وبركاته
موضوعك انا قريته من اول يوم نزلتيه فيه بس استنينت لغاية ما أشوف ردود الفعل من قرائك وأنا شايف انهم بيشدوا عليكى شويه صحيح انا معرفش نوع السلعه المباعه او طبيعة عملهم ايه . لكن عاوز أقول الاتى :-
اولا :و دى يمكن عارفاها بنتى اليس كويس فى فتره عملت نوع من الشراكه مع أحد الاصدقاء فى سوبر ماركت قائم بالفعل وفى مكان حيوى جداا بمدينة اسيوط وأيجاره السنوى حوالى 48 الف جنيه غير باقى مصروفات المحل اللى اكيد انتى عارفاها وصديقى هذاراجل يعرف ربنا كويس اووى وكانت المرتبات يعنى أقل من اللى بتقوليه يعنى اللى قاعده على الكاشير وتقريبامسئوله عن كل المحل من انزال للبضاعه ومحاسبة الشركات وخلافه وتعمل من الساعه 8 صباحا حتى الساعه 6 مساءا راتبها الشهرى 140 جنيه فقط صحيح لو حسبتى باقى ماتتقاضاه سواء عينى او مادى من الممكن ان يصل ال 200 او 225 بحد اقصى وباقى البنات اللى بيشتغلوا كانوا حسب فترة العمل بس المرتبات كانت تبدأ من 75 جنيه لغاية الساعه2 و 95 لغاية الساعه4 ده اللى شفته بخلاف التأمينات طبعا والمزاسا اللى قلتلك عليها كان ولا يزال الوضوع زى ما قلتلك عليه بس معظمهم يجيدون القراءه والكتابه فقط .
ثانيا : بالنسبه للشباب اللى عاوزين يتخرجوا ويشتغلوا فى نفس مجال الكليه سأقول لك حاجه بسيطه جداا أبنى عندما حصل على الثانويه العامه كان الاول على مدرسته القسم الادبى وعند الالتحاق بالحامعه ونظرا لطبيعة عملى فى الموارد البشريه والتدريب رفضت تماما التحاقه بكلية الاقتصاد والعلوم الساسيه او كلية الاعلام ( نظرا لعدم وجود واسطه) ورفضت الالسن لانه فى النهايه اما شغل فى القاهره او العمل كمدرس بالحصه فى اسيوط وأصررت ان يدخل كلية التجاره شعبة البريد لوجود تكليف لها عند دخوله للكليه ...وأحمد الله ان ابنى هذا ربنا اكرمه وانهى دراسته وبتقدير وكنت قلق جداا نظرا لضغطى عليه لدخولها بالاضافه الى معيشته فى القاهره بما فيها وفى شقه مستقلا بحياته .
المهم أنهى دراسته واكرمه الله بأعفاء نهائى من الالتحاق بالخدمه العسكريه والمفروض يشتغل طبعا اعتقد انى لم أقصر معه فى كورسات سواء لغه او كمبيوتر .. وجائت الفرصه فى احدى المصانعالتى أصبحت بعد الخصخصه أجنبيه فى وظيفة operator فى موقع شديد الصعوبه وهو محاجر الشركه وتعامله مع عمال وفنيين يشرف عليهم ومعظمهم اعماره لاتقل عن 26 سنهوفيهم اللى عمره زى عمك كده 18 سنه لكن
والحمد لله احب ابنى شغله والمرتب اعتقد
انه ممتاز بالنسبه لشاب فى بداية حياته اتم 21 سنه 3 يناير2010 (وأصبحتى تجديه بدا ما بيذاكر محاسبه وادارة اعمال تجديه يفتح النت ليعرف كل شئ عن المنتج النهائى للشركه التى يعمل بها وتركيباته الكيميائيه والمواد الخام ونس

راجل صعيدى يقول...

آسف اضطريت أن أرجع تانى عشان تعليق الابن ( مصرى جداا ) أنا مش معاك قوى فى حكاية ال 100 الف جنيه دى كبدايه طيب واللى مش معاه يشتغل حرامى ولا تاجر مخدرات بدل الكلام اللى يثبط العزيمه ده بقولك ممكن جداا الشاب اللى عاوز يتجوز هو ومراته ممكن لو اشتغلوا بمرتب الاثنين 800 او 1000 جنيه يتأجروا شقه فى حجره وحمام وصاله فى اى مكان شعبى ب 300 بكتيره ويعيشوا بالباباقى ويكبروا مع بعض ومش لازم يكون من الاول الشقه التمليك والعربيه موجودين يبتدوا صغيرين ويكبروا مع بعض شجع الشباب سا عزيزى عشان ما ينحرفوش اكتر ما هما منحرفين حمى الله ابنائنا جميعا بدل النواصى والشات ؟؟؟ يا ابنى بقسما بالله فى هذا اليوم العظيم اعرف رجل بعت ابنه ليعمل فى سوق العبور بعد 3 اعدادى ولما قلتله حرام عليك كان رده خليه يطلع راجل و عندما كنت أسال هذا الرجل الصغير بتشتغل ايه يا أحمد فى العبور كان يرد كل اللى بعمله يا عم ... أنة بنزل عربية طماطم أو فكهه وباقى اليوم أشتغل لحسابى .. لو شاب حاليا شال 3 ك خضار فى كيس يفضل يوم تعبان ....وكانت وجهة نظر ابيه صحيحه هذا الشاب عمره الان لم يصل الى 20 سنه ودلوقتى صاحب قهوه فى المرج الجديده فى منزل من 65 متر هو صاحب هذا المنزل لا تثبطوا الشباب سيبيهم يشتغلوا اى عمل شريف وربنا هيوفقهم بأذن الله .

صبرني يارب يقول...

مصري جدا

انت بتتكلم جد ؟
لا صحيح بجد ولا بتتريق ولا ايه ما فهمتش

بس شكله بجد

عموما

لا يا راجل والله ما يكفوش


صدقنى ما يكفوش 100 الف كبدايه طبعا

طب احسبها كده

اقل شقه بكام فى القاهره دلوقتي ؟

وفرشها

وعربيه انشاله نص عمر

وشبكه وفرح ومصاريف نثريه

دخلنا فى حسبة نص مليون جنيه

دى البدايه ولسه كمان ما عندوش حاجه ياكل منها عيش

طيب المفروض تشوفله وظيفه كبدايه برضه يقبط منها 3 الاف جنيه بالميت

اظن دي الحدود الادميه لكل البشر

يكون عنده شقه وعربيه متواضعين وجوازه وشغلانه

بس سؤال يطرح نفسه انت بدأت حياتك بقى بكام ؟؟
واعمل حساب التضخم ومن عندي بزياده شويه


زمن الملاين ؟؟

مين معاه ملاين ؟؟

الناس الشقيانين التعبانين بكل قرش جابوه

مش مسموح صدقنى

مش مسموحلك تلعب فى المنطقه دي فى البلدي

يا تبقى معاهم ياتخليك تدور على لقمة العيش بسسسسسسس

تكلم حتى وتفكر فى لقمة العيش بس

يا استاذ هاني بابا دايما يقول

الواحد ممكن يشبع ويملا بطنه بجنيه
وممكن بالف جنيه
وممكن اكتر

كل واحد فى الدنيا دي له رزق ولازم كلنا نعيش

الدنيا دي طول عمرها هايفضل فيها الغني والفقير

الوضع الى احنا فيه دلوقتي غلط

بس على الكل

احنا نفسنا بقينا غلط

بصوا حواليكم جعانين وبتتامروا

اتفرجوا على الاجانب بيشتغلوا ازاي وبعدين قولوا من حقنا نعيش زي البني ادمين

قال معاه حق قال

كسر حقه وقطم رقابته هو والى زيه عيال ما اتربوش زي باقي الشعب ده والله

خلي بالك فى لقاء قريب وانا جايز احضره خااااااااف على نفسك بقى
ههههههههههههه

صبرني يارب يقول...

راجل صعيدى

يا استاذنا لا فض فوك

اه شوفت عمالين يناحوا فى قلبي كده من امبارح

ولعلمك انا عارفه ان ده هايحصل اصل كلامي ضد كلام الاتجاه الاعلامي العام والمطبلتيه بتوع الفضائيات

بس ما علينا

الاول ربنا يخليلك ابنك

وصاحبك الى شغل ابنه ده راجل جدع والله

تعرف كان معانا فى الامارات ناس قرايبنا كان الراجل عنده سوبر ماركت وشركه استيراد مواج غذائيه
وحالتهم الماديه تمام جدا

وهناك بقى مش عايزه اقولك العيال متدلعين اد ايه

المصريين بيقلدوا الامارتيه الى هناك
والى كان الشيخ زايد بيدلع فيهم بالشمال واليمين
والعيل من دول يتخرج يقوله تعالى يا حبيبى على حجري عايز ايه
شقه وعربيه ووظيفه وعروستين ثلاثته مش مهم وعايز تحج اوك
عايز تتعلم بره لومتفوق من عنيه

والله مش مبالغه كان ده بيحصل

المهم يعنى الراجل ده بقى كان عياله تشوفهم هياثم كده وقصه وبتاع بس كان بيعمل حركه بجد حلوه اوي

لما تيجى عربية بضاعه يقولهم ها
تنزلوهم وتاخدوا انتم الفلوس ؟

العيال كانوا بيوافقوا وياخدوا الفلوس فعلا

وكان وهما صغيرين شويه ويقولهم ها مين هايغسلي العربيه الاسبوع ده وياخد هو العشرين درهم غسيلها
ههههههههههههههههههه

العيال كانوا بيوافقوا عشان رباهم على ان الشغل مش عيب ابدا

وهو ما كانش بيستعيب يعمل كده ولا يقول ابهدل ولادي ليه ولا البتنجان الى بنسمعه ده

عايزه اقولك بسم الله ما شاء الله الواد الكبير كان متفوق فى ثانويه عامه ودخل جامعة الشارقه
اخد بكالريوس فى البزنس فى سنتين
اه والله وكان طالع الاول كمان على الدفعه وانا شوفت حفلة التكريم فى قناة الشارقه بجد حاجه تفرح

مش تقولي تعبانين فى دراسته وصارفين عليه
مسخره بجد الى بيحصل ده مسخره

ربنا يخليلك ولادك يا عمو ويكرمك فيهم يارب

ويرحمناااااااااااا من الهبل الى عايشينه

ومصري جدا سبهولي بقى هادخله بلاك لست لجمعية المرأه المتوحشه
هههههههههههههههه

نورت يا فندم وسعيده اوي بمتابعتك ليا

mostafa rayan يقول...

اولا ازيك يا صبرني العزيزه يارب تكونى بخير وفى احسن صحه وحال
وثانيا : اهلا بيا هنا بعد غياب
اما بقى ثالثا : اعتقد انك تقصدي ان الشباب من الافضل انهم يرضو بشغل اقل على بال مايلاقو الشغل اللي يناسبهم شيئ قليل افضل من لا شئ
بس ماتنكريش بردو ان في ناس مش لاقيه حتى الفرص البسيطه دي وان الوسايط والكوسه ماليه الدنيا في ناس بجد عايزه تشتغل ومش بتتنك لكن مش لاقيه الطريق او الفرصه مش كل الناس من النوعيه اللي شوفتيها يا صبرنى
لك كل التحيه ويارب تكونى بخير وافضل حال

أم .. بوبه يقول...

ألف سلامة عليكى أنا مكونتش عارفة حكاية ركبتك دى

ثانيا موضوعك جميل ووجهة نظرك بجد تحترم وبجد صح

بس المشكلة مش غن الشاب يرضى يشتغل أو لأ وبكدة هتتحل

فى خلفية لازم تتصلح وتتدعم علشان تساعد الشباب على الإقدام على الشغل إللى من النوع إللى ميناسبهومش إجتماعيا حتى ولو كان هيكفيهم ماديا

يعنى لما شاب زى ده معاه مؤهل عالى ويشتغل الشغلانة دى وطبعا اهله مهما كان حالهم على قدهم هيبقوا زعلانين بردو على آخر تعبهم مع إبنهم

لما يروح بقى يتقدم لواحده علشان يخطبها وهى كمان مؤهل عالى ومتستتة فى البيت .. ويقول لأهلها أنا بلمع إزاز وباخد 500 جنيه تفتكرى هيبصوله بنظرة تقدير ولا إحتقار

مسدس صغير يقول...

مهو اللى ايده فى المية مش زى اللى ايده فى النار
دالوقتى انا شاب متخرج يا صبصب وعايز اشتغل ومعايا ليسانس او بكالوريوس ايا ما كان
محتاج اصرف على نفسى ومحتاج اتجوز وووو
مش معقولة هتقوليلى اروح امسح ازاز واكنس وفى الاخر 400 جنيه
ده حرام
مهو بردة لكل مقام مقال
بما انى اتعلمت لازم تبقى حاجة مناسبة ولو فيه تنازل يبقى فيه تعويض
مش ابقى خريج كلية من كليات القمة مثلا وتعبت وطلع عين اللى خلفونى وفى الاخر تقوليلى تعالى امسح ازاز وهديك 400 جنيه
مهو انا لو خلاص ضاقت بيه السبل وهمسح ازاز ميبقاش ب 400 جنية لأن انا كده بقدم تنازلات وده الواقع
التكافؤ مطلوب فى كل حاجة وديننا نفسه اللى طالبنا بيه حتى فى الجواز
فمتقوليش مصر تعملكو ايه مهى موافرالكو عمال نضافة اهوه
ده مش تقليل من عمال النضافة
بس فيه ناس غلابة كتير ومش بيشتغلو ومش متعلمين اشغلهم فى الشغلة دى
هتبقى كويسة
وميجيش صاحب شغل بردة يقول انا عايز بكالوريوس تجارة خارجية يجيد 7 لغات معاه دورات فى البورصة والمحاسبة والتجارة الالكترونية والكومبيوتر والمش عارف ايه
طب والراتب كام يا سيدى ؟؟
500 جنية او حتى 1000 جنيه
طب يعنى ده كويس يعنى
اما اخد دورات ب 20 الف جنيه
وفى الاخر اقبض 500 جنيه
طب منا اروح اغسل اطباق برة اكسبلى واشرفلى
اه اشرفلى
مش بتقولو الشغل مش عيب
يبقى اما اقبض 500 دولار فى غسيل اطباق احسن ما اقبض 500 جنيه فى شركة محترمة وفى الاخر مش عارف اصرف على مراتى ده لو كنت اتجوزت اصلا
يلا كفاية كده
هههههههههه
بس بردة احييكى على طرح موضوع جميل للمناقشة

صبرني يارب يقول...

مصطفى ريان

ايه النور ده يا باشا
نورتنا فعلا والله

وسايط ايه بس وكوسة انا باتكلم فى نوعيه من الشغل مش محتاجه وسايط

الموضوع مش كده

ولا حتى موضوع شغل

الحكايه ان قيمة العمل والاعتماد على النفس والنخوه غابت يا مصطفى

الواد من دول بيفضل طول عمره عيل

وفى ناس مش لاقيه شغل اه
طيب هما فين هاتهوملي

احنا بنفكر جديا نوفر شقه سكن عزابي ونجيب عمال من الصعيد ولا من كفر الشيخ ولا اي حته

وجايز نفكر ونجيب من الصين

صبرني يارب يقول...

بوبه

لما يروح بقى يتقدم لواحده علشان يخطبها وهى كمان مؤهل عالى ومتستتة فى البيت .. ويقول لأهلها أنا بلمع إزاز وباخد 500 جنيه تفتكرى هيبصوله بنظرة تقدير ولا إحتقار


الى انتى قولتيه ده فيه تلات مشاكل

بنفكر بدماغ المجتمع وهو اصلا مجتمع مريض نفسيا ومش بنفكر بدماغنا احنا


وبنتكلم من منطلق الدماغ الكبرانه من التعليم المزيف

ما بنحترمش العمل كقيمه ما عندناش فكرة اشتغل عشان تبقى راجل وعشان تتعلم يعنى ايه عمل الاول قبل ما تفكر هاتقبض كام والناس هايقولوا ايه ولما اجي اتجوز اقول انا مين




كلامك ده معناه حاجه واحده بس

ان المشكله فى الشهادات المزيفه الى احنا بنديها لولادنا لا منهم متعلمين بصحيح ولا منهم مش متعلمين

معاهم شهاده وما بيعرفوش يعملوا بها حاجه ريشه على راسهم مانعاهم يتعملوا بصحيح

افتكر الحل بقى اننا ما نعلمهمش احسن لهم

نورتي يا جميل

صبرني يارب يقول...

مسدس صغير

ما تخلنيش اشتملك الشهادات والى اخترعها بقى

هو انا كل ما اكلم واحد يقولي اصل اتعلمت واهلي صرفوا عليا ؟؟

طيب ماشي انا مش مختلفه معاك احسن طبعا تغسل اطباق ب 500 دولار

لو لقيت يا اخويا ال500 دولار شوفلي عقد معاك

انا باغسل اطباق ببلاش خالص طول عمري

بس يعنى اشتغل بال500 جنيه لحد ما تلاقي الدولار

مش تخلي اهلك يبيعوا الى وراهم والى قدامهم ويشترولك فيزا حره للسعوديه ب 25 الف جنيه وتروح هناك تشتغل مرمطون سنه ولا اثنين وتيجى سالف حق التذكره

الكلام الى انا باقوله ده حصل فى الاونه الاخيره قدامي اكتر من مره مش بالف والله العظيم


وبعدين لو كنت هامسح ازاز امسحه بمقابل دي
ههههههههههههههههههههه

يعنى انت عايزنى لو وظفت واحد يمسح الازاز اقوله لا يا حبيبى ما دام انت بقى مؤهل عالي انا هاديلك 1000 جنيه
عشان انا حراميه اصلا وبالاقي الفلوس فى الشارع

هع هع هع هع
حلوه صحيح يعنى لو هامسح ازاز لازم يبقى فى تكافوؤ


يا صلاح مدير قصر الشيخه فاطمه فى فرنسا ده حضرتك مش هاقولك مستواه ايه يا اخويا عشان ما تتعقدش

كان جايب بنته حلوه كده 14 سنه وفرنساويه عقبال املتك

كانت جايبها تشتغل فى المكتب تصور ورق تجيب ورق تودي ورد فى اجازة الصيف

حلاوتك انت وهو بشهادتهم وفلوس اهاليكم الى اتصرفت عليكم

النبى تتوكسوا

شوفت بقى طلعت فيك كل الى عملوا فيا فى مناقشة البوست
هههههههههههههههههه

عطش الصبار يقول...

ياه ياصبرنى
خرجتينى من مود الاكتئاب بخفه دمك
شوفى انت كداكدا هتحكمى الصيين لان كل الشباب المتأنتخ هيرشحك عشان لامؤخذه يبعدك عشان خطتك فى تشغيلهم فى سن 16 والبنات تربى فراخ دا انتى عايزه تخلصى على الجيل كله
عموما الصين عندها مشكله مش لاقين عرايس
واحنا هنا مش لاقيين عرسان وبصفتك حاكم الصين المقبل قرار دكتاتورى كده بارسال البنات وتزويجهم فى الصين وخلى المتأنتخين هنا
تحياتى

صبرني يارب يقول...

عطش الصبار

وحياتك يا جميل قلت قبل كده هانستورد رجاله ونحسركم يا انتيخ منك له


ربنا يفرح قبلك مالك بس مكتئبه ليه


نورتينى وياريت مش تنقطعي تاني ابدا

هي وظروفها يقول...

اذا اذنتي لي

لي تعقيب علي كلام سيادتك

وبختلف معاكي انك تسفهي من كلام حد او تحجري علي رأيه وبعدين نظام تعليمنا الفاشل مش دليل ابدا علي نجاح شخص او فشله وانا اظن ان التعبير خانك او اللفظ ايهما اصح ومكنتيش تقصدي اتهامه بالفشل

مش معني انه ميعرفش يعني ايه جروسر يبقي فاشل

لاني اعرف ناس علاقه شخصيه وانا بحمد الله بشاده الناس عندي عقل منظم لا يستهان به

وهما في وضع اجتماعي افضل بسبب الواسطه الله يسهلهم

وبعدين اذا كان من رأيه انه ميلمعش ازاز فواجب علينا كمثقفين وحضرتك اولنا اننا اذا كنا اختلفنا مع حلمه منحجرش علي فكره

اللي بيكلم سيادتك دلوقتي علي فكره بكاليريوس تجاره واشتغل سباك ونقاش وطلع عين امه

بس اسف انا شايفك ظلماه

بعتذر لالاطاله

أحمد شريف يقول...

السلام عليكم
مؤيد تماماً وبشدة للتدوينة

البعض من زوارك طرح أنه لا يليق به أن يعمل في وظيفة إجتماعية أقل من مستواه
وأنا أتسائل كيف ستترقى وأنت لا تريد أن تصعد السلم .. صدقني كل من ترقى وصعد ووصل لمَ هو عليه الآن طرق الباب من الأسفل

دعني أسوق لك مثل وسأكون محايد لأبعد درجة وسأحضر مثل لشخصية مشهور عنها العفة والنزاهة والعطاء والخير الحج محمود العربي صاحب مصانع العربي وكيف بدأ حياته بقروش وصعد السلم حتى أصبح الملياردير

يا رفاق أنتم تتعللوا بحجج واهية
أغلب الشعب الأمريكي على فكرة عمال
الصين أغلب شعبها عمال أقول لكم أن أكثر من 80 % من الشعب الصيني عمال

وهنروح لبعيد ليه .. سيد الأنام محمد الكريم صلوات الله وسلامه عليه كان راعي غنم
وغيره من الرسل من كان حداداً ومنهم النجار ومنهم المزارع .. لم يكن بينهم طبيب أو مهندس أو حاكم

بطلوا العنجهية ده بقى
مصانع برج العرب مش لاقية عمال
والله العظيم أنا كان لي صديق مش لاقي عمل مناسب لدراسته الجامعية وموهبته ولم يكن يملك المال لفتح مشروع
ونصحته وبإلحاح أن يتوجه لمصانع برج العرب ويعمل بها إلى أن يمن الله عليه بجديد خاصة أنه كانت خاطب وكاتب كتابه وكان يواجه أزمات نفسية كثيرة بسبب بطالته وفعلاً حدث وفي المصنع الذي يعمل به لفت نظر مديره بخبرته وتميزه وذكائه فرقاه من عامل لمدير قسم ومع الوقت فت الله عليه ودخل بزوجته منذ عام مع العلم أن هذه القصة لا يتجاوز عمرها العامين
فاجتهدوا وثقوا بأن الله لا يضيع أجر من أحسن عملاً
وتذكروا آيات العزيز الحكيم حين قال
" ومن يتق الله يجعل له مخرجاً ويرزقه من حيث لا يحتسب "