الأحد، 8 أغسطس 2010

كما تدين تدان

سلام عليكم يا اصدقائي

الحقيقه انا يظهر دايما باحب احط ايدى فى عش الدبابير

الموضوع الى فات الى كان عن خدمة زوجة الابن لحماتها  والى زعل ناس كتير وحتى لما عملت استاتيو مره بالمعنى ده على الفيس بوك كان في واحد فاضل يقولي انتى هاتكفري ولا ايه
هههههههههههههههه

لكن طبعا ما حييت ما دام كلمة حق لازم تتقال وما دام شرع الله مش هاطنشه  وأخبيه واقول اصل يستغله ضعاف النفوس
اطلاقا مطلقا مش هايحصل  وان شاء الله لنا كلام تاني فى الموضوع ده على المدونه الاسلاميه

المهم انا وعدت  م. علي يونس انى هاعمل بوست تاني اصالحه فيه اصل كان زعلان مني اوي عشان رايي بتاع البوست الى فات والى بيقول انه مش فرض على الكنه خدمة ام الزوج او اهله  وطبعا ما زال هو ده رايي

لكن هاحكيلكم حاجه يا جماعه فعلا حصلت معايا

انا جدتى كانت ست حكيمه جدا وطيبه جدا وانا كنت باحبها جدا جدا ويمكن قلتلكم الكلام ده قبل كده واثرت فيا كتير واتعلمت منها كتير قوي

مره حكتلى عن واحده من قرايبنا نسميها عايده   وقالت ان حماتها راحت قعدت  عندها يومين بالحال من ابنها طبعا ورجعت زعلانه من عندها وحكت لتيته  الى حصل وطبعا ده يا جماعه فى الازمان البعيده جدا ماما نفسها ما توعاش عليه

المهم حماتها بتحكى انها الصبح بتحب تشرب شاي على لبن فلقت مرات ابنها جايبه لها الشاي ساده
فسألتها مافيش عندك حبة لبن يا عايده اصل الشاي ساده الصبح بيتعبنى
فقالت لها لا مافيش وطبعا بغباوه
الست شربت الشاي وامرها لله وقامت تودي الكوبايه وتغسل  اديها

لقت صنية كوبايات فاضيه مكانها حليب وحله فيها بواقي لبن على البوتجاز
وعليه الست حطت فى نفسها وزعلت اوي واول ما جه ابنها قالتله روحني يا ابنى

لحد كده عادي

تمر السنين يا ساده يا كرام وعايده حماتها ماتت وهى جوزت  عيالها وبدأت تجوز فى  عيال  عيالها    وتيته الله يرحمها ماتت  كمان  وبعدين ماما كانت راحه تزور الحاجه عايده دي مره وانا روحت معاها  كنت فى الجامعه ايامها تقريبا

فماما بتقولها يا حاجه انا اتصلت عليكى فى البيت ما حدش رد سألت مرات ابنك قالتلى انك قاعده عند فلانه بنتك  اغلب الوقت

راحت قالت الحاجه عايده : ايوه يا حبيبتى اصل انا ما بقيتش ارتاح هناك ابنى بيصمم ياخدنى عنده فوق  ومراته معاملتها مش اد كده مش باستريح معاها

وقعدت تحكي يا ساده يا كرام
مش عايزه اقولكم انى كنت هاعيط عشان الى قالته صوره بالكربووووون من الموقف الى تيته حكتهولي قبل ما تموت

والله ولا كلمه زياده ولا كلمه ناقصه  بالظببببببط  واقعة الشاي باللبن دي بالظبط بنفس التفاصيل

سبحانه وتعالى حقيقى كما تدين تدان

للأسف احنا  اصلا ما بنحسبهاش كده عموما مش بس مع الحمى لا خالص مع كل الناس وكل الدنيا
اوقات كتير اعمل حاجه وابقى حاسه ان الشخص الى عملتله الحاجه دي فعلا ندل وما يستهلش بس ارجع وارضي نفسي واقول لوجه الله تعالى خالصه ومتاكده ان ربنا هايردهالي في حاجه تانيه
حتى وان كان لولادي مش ليا انا شخصيا

عارفين لو نحط الامور فى نصابها الصحيح
وزوجة الابن تكون بتخدم حماتها او حماها وهى بتقول لله ورسوله  وجوزها وحماتها عارفين انها مش فرض عليها وانها بتعمل كده اخلاق وكرم منها

هاتبقى الزوجه راضيه ونفسيتها مستريحه وهايبقى اهل الزوج ممتنين لها وبيقلولها شكرا بالتالي الدنيا هاتمشي كويس اوي

انما نغطي الحقيقه ونقول اصل نعمل فتنه ؟؟!! ده لا يمكن ابدا

ده غير ان مش كل الناس تقدر تسامح ومش كل الناس تقدر تعطي فعلا دى بتبقى هبات من عند ربنا

والحمى الى تعبانه وعايزه حد يمرضها ويخدمها تسعين فى الميه منهم بتكون كل حاجه بتوجعها ماعادا عضو واحد لا يكل ولا يمل ... لسانها طبعا بينقط سكر

يا جماعه شوفوا ربنا وصى ازاي على الوالدين فى القرآن .. تفتكروا ده ليه ؟؟ التاكيد ده كله ليه ؟؟
عشان اصلا هى مهمه صعبه شاقه جدا جدا  التعامل مع كبار السن صعب جدا والله يا جماعه انا جربته كثيرا

تخيل انه يكون صعب عليك وهما امك وابوك  فما بالك لو كانت هى زوجتك مش امها وابوها  فعلا  ولا هما برضه بيعاملوها فعلا زي بنتهم خلونا واقعيين

على راي المثل الى بيقول اذا كانت الغله تيجى اد التبن الحمى تحب مرات الابن

:))))))))

الكتااااالوج
 ممنوع مخالفه الكتالوج وكل شيء هايمشي تمام

من فضلكن يا زوجات لا تنسوا الفضل بينكم  ....

ومن فضلكم يا ازواج اتقوا الله تعالى ولما يكون عندك ست بتخدم امك ربع خدمه بوس ايدها كل يوم وقولها شكرا
واي واحده من اخواتك تيجى  تقولها بم قولها تعالي انتى اخدمي  امك يا شاطره وخلي كل واحده تحط لسانها فى بؤها
وكمان فهم امك ان مراتك مش ملزومه بها ووصيها على مراتك بس ما توصيش اوي عشان هاتغير من مراتك وهاطين عشيتها زياده

بس خلاص

هناك 34 تعليقًا:

mrmr يقول...

الله ينور عليكى
كلام ميه ميه فى الصميم
مدام الحماه عندها بنات هما اولى بخدمتها زوجه الابن تخدمها فقط علشان ترضى ربنا لكن مش مجبره ولا واجب عليها ولا فرض
وكل شئ بالمحبه يحتمل
كل سنه وانتى طيبه
رمضان كريم

ستيتة يقول...

كلام جميل مقدرش اقول حاجة عنه
بس اللي عملته الست دي دنائة مش عدم خدمة

وهناك فرق كبير بين الفروض وحسن الطباع ومكارم الأخلاق

فيه حدوتة حكاها لي حمايا الله يرحمه
قال لي كان فيه راجل ابوه عجوز وكان تعبان من خدمته ورعايته
وكان بيعامله وحش جدا
وكان بيأكله في طبق اظن بلاستيك
مات الأب
قام الحفيد خد الطبق وغسله وشاله
ابوه قال له بتعمل ايه
قال له بشيل لك طبق جدي علشان أءكلك فيه لما تكبر
يعني اهم شيء كل واحد يخلي باله من ان عقوق الوالدين هو اللي سلف ودين فعلا
ولو كل انسان رعى الله في ابويه ما وضع لوم على غريب ان يحن عليهما
والخير احنا مأمورين بيه لكل المخلوقات
ومن حبنا للزوج بنحب اللي جابوه وربوه احسن تربية
ومن حب الزوج لزوجته بيشيل اهلها على راسه
والا ميكونش فيه خالص حب ولا ود ونكون بنمثل على بعضنا

فين مدونة المطبخ
اشتغلي يالا علشان عاوزين الحاجات الحلوة
كل عام وانتي بخير

محمد عبد الغفار يقول...

احنا دلوقاى بقينا نتسول المعامله الطيبه للأب والأم مش الحماه والحمى

ربنا يرحمنا

adel يقول...

ممممم
كله كوم و المثل بتاع التبن ده كوم تاني
:):):)
هههههههههههههه

كنت لسه بتفرج علي فيديو هتلاقيه عنجي علي الفيس مشيره
بيوريك ازاي الاطفال بياخده كل شئ من الام و الاب
فبالتالي معاملة الزوج او الزوحة للحماة بتترد لان الولد و البنت بيبقوا لقطوا الاسلوب

خواطر شابة يقول...

عزيزتي انت بترددي جملة انا شايفة ان فيها الحل السحري لكل مشاكلنا ممنوع مخالفة الكاتالوج الكتالوج هو الحل ولو حطينا الله ومراقبته امام اعيننا وجعلنا عملنا دوما لله لانريد جزاء ولا شكورا لعشنا في سعادة ولما اشتكى احدنا من الاخر ابدا
رمضان كريم عزيزتي

Unknown يقول...

و الله انا متفق مع رفعت اسماعيل في رأيه عن الصراع بين الزوجة و حماتها ، صورة أخري من صور صراع الأنثي علي رجل الكهف...
الأم شايفة ان الزوجة هي الحرباية اللي جاية تاخد ابنها منها بعد تعب و شقا سنين في تربيته و صنع رجل منه...
طبعا دي مش قاعدة اعمم بيها لكنها مجرد محاولة لتفسير الخلاف الدائم اللي ممكن نلاقيه بين الزوجة و حماتها...
بيني و بينك أنا لحد دلوقت مشوفتش حالات كراهية واضحة و صريحة بين زوجة و حماتها ، بس شوفت حالات كتير من الحرب الباردة بين الطرفين ، و غالبا نهايتها بتكون أسوأ من الواضحة الصريحة...
كلامك في نهاية البوست بيبسط الدنيا و ياريتها بالبساطة دي ، إحنا اللي بنعقدها...
تحياتي...

shimaa elkholy يقول...

مرمر

الله اكرم يا جميل نورتينى

shimaa elkholy يقول...

ستيته

لا اختلف معاكي انا بقى كما تدين تدان دي فى كل حاجه

مش مع الام والاب ابدا

يعنى فرضا واحد ظلم مرؤسه فى الشغل تلاقي الدنيا تلف وتدور وفى الاخر ينظلم برضه

فى حديث عن الرسول عليه الصلاة والسلام بيقول عف عن الناس يعف الله عنك

بمعنى انك تعف عن الناس فيعفف الله الناس فيك

بالتالي هى مش ما خدمتش حماتها لا دى بخلت عليها وما عملتهاش حتى معاملة الضيف
بالتالي يوما ما حصل معاها نفس الشيء عشان مافيش حاجه بتروح ابدا


مدونة الطبخ حااااضر على عينى والله ناويه وربنا بس ما تعرفيش انا مضروبه فى الخلاط اليومين دول بارفص كده عشان اكتب والله

ما اتحرمش من نورك يا جميل يا واحشنى

shimaa elkholy يقول...

محمد عبد الغفار

اه والله عندك حق
حسبنا الله ونعم الوكيل

shimaa elkholy يقول...

عادل

اي خدمه هالفلك المثل وانت ماشي ههههههههههههههه

بالظبط كده يا عادل الرسائل الغير مباشره الله ينور عليك

هاشوفه على الفيس لما اوصل هناك حاضر

shimaa elkholy يقول...

خواطر شابه

الله يفتح عليكى ويكرمك هو ده الكتالوج الله يكرمه دكتور اسلام كان عامل سلسله جميله اسمها الكتالوج

تحياتي يا خواطر وكل سنه وانتى طيبه ورمضان كريم

shimaa elkholy يقول...

المستفز

لا انا شوفت بقى كراهيه وشوفت حرب بارده وسخنه وكل الانواع وحياتك

وفعلا هى بعض الاوقات بتكون السبب زي ما انت قلت كده صراع على الرجل

كانت فى واحده فلسطينيه تقولي مشكلة المصريين انكم بتخلفوا قليل تلاقي الواحده جايبه ولد او اثنين وعماله تشم وتلم فيهم ومطلعه عين زوجاتهم
ههههههههه

وصدقنى الصدامات هاتبقى موجوده مش هاتنتهي مهما كانت الظروف
ولكن
ازاي نواجه الصدامات ؟؟

اظن كلنا ممكن حتى نختلف مع امهاتنا يبقى طبيعى جدا نختلف مع الحموات
بس المهم نواجه ازاي

كزوجة ابن وكزوج كمان فين الحدود
فين المرجوع والمردود
نحتكم لمين

نحتكم لخير حكم الله سبحانه وتعالى
كتابه وسنة نيبه للدين وحكمه الشرعي ونلغي الاعراف والهبل الى جايبنا ورا ده

تحياتي يا فندم بس مين رفعت اسماعيل ؟؟

Ramy يقول...

ازيك كل سنة و انتِ طيبة

بالنسبة للموقف الأول

على رأى امثالنا الجميلة جدا

كله سلف و دين حتى المشى ع الرجلين

لفت الأيام و ربنا امهل و لم يهمل


بقى الموضوع صدقينى بأمانة

هى المحبة

لو هنحب بعض هنستحمل بعض

حضرتك كلامك منطقى فى البوست

رمضااان كرييييم

(:

Unknown يقول...

شخصية قصصية لأحمد خالد توفيق...
أوعي تقولي مش عارفاه ده كمان :) :)

shimaa elkholy يقول...

رامي

متشكره اوي ربنا يخليك

shimaa elkholy يقول...

المستفز

عارفه احمد خالد توفيق
لكن مش عارفه الشخصيه القصصيه معلش بقى على اد علامي وكده
ههههههههههه

مرسي على الاهتمام

حنعيش يعنى حنعيش يقول...

حاجه غريبه ... اول ما الجو يتعدل والحرارة تنزل ... اسمع كلام يمخمخ .... لكن اول مالحرارة ترتفع ... اجارك الله على الافكار والابداع ... بتبقى من نوع احنا جايين نهدى النفوس ... تسلم ايدك ودماغك ... ويارب الجو يفضل معتدل على طول

باحث عن حب يقول...

السلام عليكم


كل سنه وانتى طيبه

اختى
اان قرأت البوست بتاع الحما ه
بجد زعلت
وكنت عاوز ارد بجد وعندى كلام كتير قوى بس للاسف والله ما كان عندى وقت
بس انا لسه هقرأ التعليقات علشان التعليقات اكيد هتكون جامده
ده اولا
ثانيا
انا مش متجوز وربنا يدينى واتجوز
اللى عاوزه من زوجتى المستقبليه حسن معامله ماما وبابا
زى ما هى عاوزانى احسن معامله بابها ومامتها
الخدمه وكده
باختصار
ده يعود الى ثقافه البنت ودينها وتربيتها فى الاول والاخر
وعلى حسب تعامل الزوج معاها وتفاهمه مع بعض
هو مش متجوز ممرضه لوالدته
ولا فلبينيه
بس هناك شروط مسبقه عن رضا اولا
ولا جبر

وفعلا كما تدين تدان
كل سنه وانت طيبه
ليكى عندى تاج تعالى خديه فى البوست اللى فات عندى
بارك الله لكى

shimaa elkholy يقول...

د اسلام

بقى كده برضه

هاتقولي انت كمان باهدي النفوس

كلمة الحق لازم تطلع تهدي تولع ماليش دعوه

مع انى شايفه ان الحق دايما يهدي

ويارب يفضل الجو معتدل على طول

رمضان كريم يا باشا نووورت

shimaa elkholy يقول...

محمود زعلت من ايه ؟؟

مش فاهمه انت موافق على كلامي بصراحه ولا مختلف معايا

الكلام الى انت قلته ما يختلفش عن الكلام الى انا باقوله
غير ان بس اتمنى ما تكونش من نوع الناس الى بتروح تتجوز وتقولها انا اهم حاجه عندي اهلي قبلك وقبل عيالك وقبل كل حاجه

مش لازم ابدا ترتبهم فى حياتك

كل واحد له مكانه المنفصل عن التاني

تحياتي وحاضر هاروح اشوف التاج استر يارب
هههههههههه

هتشوفوا يقول...

ماشاء الله عليكي مدونتك بتفكرني ببرنامج حياتي, كلها عبر

واللي يشوف بلاوي الناس تهون عليه بلوته

باحث عن حب يقول...

السلام عليكم
انا طبعا لا اقصد ان اقول اهلى قبلى
لآ
طبعا
بل اقصد التفاهم الاول وبس
والاهل عباره عن مين الاب والام
وبس وعمر ما الاب والام يحبوا ان حياه ابنهم تكون فى جحيم بس برضوا هى متنغصش عليه عيشته يا استاذه ندى

اللى اقصد التفاهم ثم الثفاهم ثم التفاهم
وبس
بس الاول اتجوز
بس
وانا اللى هكون مع اهلها قبل اهلى
هههههههه
بس الاقيها
الاول
كل عام
انتى بخير

ستيتة يقول...

كل عام وانتي بألف خير وسعادة
ربنا يتقبل منا ومنك رمضان
ويعيده عليكي وعلى اسرتك الجميلة بكل خير وسعادة يارب
تحياتي

جنّي يقول...

السلام عليكم

الاول كل سنة وانتي والاسرة بكل خير ورمضان مبارك عليكم ..

التاني ما احنا بنبوس اديها برضه من غير ما تخدم ابونا وامنا ..

shimaa elkholy يقول...

هتشوفوا

مااااشي انا هاوريك حياتك هاتبقى ازاي
هههههههههههه

shimaa elkholy يقول...

محمود

لا فى بيخلوا حياة ابنهم جحيم صدقنى بدون قصد يعنى

بيحبوهم بطريقه غلط

بيعتقدوا ان ده الاحسن لهم او بيحاولوا يقنعوا نفسهم بده

shimaa elkholy يقول...

ستيته تسلمى يا جميل ربنا يخليكى

وكل سنه وانت بالف هنا يارب

shimaa elkholy يقول...

جني

كل سنه وحضرتك طيب يا استاذ سعيد وربنا يكرمك يارب

وبعدين فى الحاله دي بقى يبقى اقولك بوس الايادي ضحك على الدقون بس مش مشكله كويس اوي استمر
ههههههههههههههههههه

نورت يا فندم

بحر الالوان يقول...

كل عام وانتم بخير ... رمضان كريم

فارس عبدالفتاح يقول...

الأخت المحترمة / ندى الياسمين

أشكرك على الاهتمام ،، وأنا قرأت الموضوع وهو عبارة عن وجهة نظر كما قلتي وليس هو إفتاء شرعي حتى نكون موضوعيين في النقاش ... وهذا بناء على كلام بالنص

بخصوص وجهت نظرك أنا احترمها واعتبرها اقرب إلى الصواب ولكن ينقصها شيء واحد حتى تكتمل وتتماشى وتتوافق مع الحق ( الشرع ) وهو الضرورة التي اقرها الشرع لخروج المرأة من بيتها والاختلاط بالناس وعليه يكون الالتزام بالزى الشرعي ثم انخفاض الصوت وغض البصر وعدم الخلوة برجل في مكان وعدم ضرب الأرض بالأرجل ( الكعب العالي ) عدم الإخضاع بالقول أو في القول .. الخ


فالضرورة هي الرخصة الشرعية لخروج المرأة والاختلاط من الأساس ، والضرورة تقدر بقدرها من قبل العلماء .


وعلى فكرة أنا احترم وجهات النظر التي يكون فيها منطق حقيقي سواء أكان يستند إلى منطق ديني أو منطق أخلاقي أو منطق قيمي أنساني .


أما الصراخ في الهواء والتبجح بالترهات والتضليل وخلط الأخلاق بعدمها والدين باللأدين والعرف بالهمجية والقيم بالانحلال.. هذه أمور أسس لها فلاسفة العبث والفلسفة العبثية وهي مستنكره حتى من قبل جميع القيم الأخلاقية الإنسانية والقيم الدينية في جميع العالم سواء أكانت ديانات سماوية أو ديانات بشرية .


وأخيراً تقبلي كل التقدير والاحترام


فارس عبد الفتاح .. قومي عربي

shimaa elkholy يقول...

بحر الالوان

وانت بخير وسلام يارب ورمضان كريم
متشكره اوي

shimaa elkholy يقول...

فارس عبد الفتاح

اهلا بك يا فندم وبوجهة نظرك

ولكن بعد اذنك يا فندم هو مين المقصود ب:
الصراخ في الهواء والتبجح بالترهات والتضليل وخلط الأخلاق بعدمها والدين باللأدين والعرف بالهمجية والقيم بالانحلال

أنا ولا بعبعه ؟؟

عموما مش مشكله

اسمحلي لتاني مره اختلف معاك فى بعض نقط حضرتك قلتها

الضروره : مين الى يحدد الضروره دي ؟؟ هى ولا جوزها ولا ابوها ولا عم الشيخ ؟؟

بمعنى هل من الضروره انها تخرج تروح لواحده صاحبتها مثلا ؟؟؟
عمليا ده مش ضروري مش حياه او موت انما فعليا ده ضروري ولا ايه حضرتك ؟؟

ايام الرسول عليه الصلاة والسلام وصحابته كان فى وقائع كتير اوي الستات موجودين فيها وبيتكلموا وبيناقشوا وبيخرجوا مش عشان يجروا على اكل عيشهم عادي بيخرجوا

وعليه مين ممكن يقرر الضروره من عدمها ؟؟؟ اظن هي اولا وبعد كده المسؤل عنها ابوها او جوزها يقيم الموقف

والا تتفق معي ان صلاة المرأه فى خدرها افضل ؟؟
ولكن رغم ذلك لا تمنعوا اماء الله مساجد الله ( على اساس لو ارادن ذلك يعنى )

ثاني حاجه : انخفاض الصوت ... حضرت الايه الى اعتقد حضرتك تقصدها هى الخضوع بالقول
والخضوع باقول مش الصوت العالي والله يا فندم
دى حاجه ودي حاجه ممكن تكون واحده صوتها منخفض تماما ما تسمعوش الا انها بالبلدي بتتمايص فى الكلام وهو ده الخضوع فى القول يا فندم


ثالثا : الخلوه انا اتكلمت عنها فى الموضوع بتاعي واظنك فهمت قصدي

رابعا : الضرب بالارجل = الكعب العالي ؟؟
ازاي يعنى ؟؟
اولا اعتقد ان حضرت تقصد برضه الايه يضربن بارجلهن ليبدين زنتهن

ما كانش فى ايامها كعب عالي اصلا ومش كل الكعب العالي بيدق
وممكن يكون لابسه شوز فلات بس بيعمل صوت ويدق

والضرب بالارجل هنا يا فندم مقترن بابداء الزينه كانوا بيلبسوا حلي فى رجليهم خلخال يعنى فتضرب برجلها وهى ماشيه عشان الناس تعرف انها لابسه زينه تحت الهدوم

لان المصرح لها ابداء الزينه التى تظهر منها فقط للوجه والكفين
ودون اسراف برضه فيها وتبرج صارخ


فى نقطه كمان مهمه اوي

الشرع = الكتالوج الالهي = كتاب الله وسنة نبية (المؤكده طبعا)

وعليه اي حاجه فى الدنيا تانيه تتعارض مع الشرع من حقي اكسرها واقطم رقابتها كمان

حتى لو كانت العرف

والاخلاق كلها موجوده فى الدين دون اي استثناء

فقد اتم الله علينا نعمته باكتمال الدين

الاسلام دخل على ثقافات كتيره جدا لم يمحها ولكن توافق معاها بما يتلائم مع الشرع
فكانوا يحتكموا للشرع متعارض مع الشرع يبقى لا ماشي مع الشرع يبقى ماشي ومافيش مشكله كل واحد حر

تحياتي لك يا فندم ويارب ما اكونش طولت عليك

شكرا لاهتمامك وردك

P A S H A يقول...

كل سنة وحضرتك طيبة وبألف خير وصحة وسلامة إن شاء الله
:)
رمضان كريم

shimaa elkholy يقول...

وانت طيب يا باشا وبخير وسلام متشكره اوي