الأحد، 22 أغسطس 2010

الاعمال بالنيات ... فى رمضان


الحقيقه انا احترت احط الموضوع ده فين هنا ولا على المدونه الاسلاميه

فقلت خلينى هنا عشان اتكلم براحتي اكتر


رمضان السنه دي مرهق جدا انا عارفه والناس بتبقى قبل الفطار دايخين ومهبطين وروحنا بتبقى طالعه
وبعدين بعد الفطار نبقى متنحين وبرضه هبطانين ونعسانين

الحر مريع ومخلي الناس مفرفره

ومع ذلك اكيد كلنا  عايزين نجمع حسنات طبعا

طيب انا عندي اقتراح جميل جدا جدا وهو انكم دايما قبل ما تعملوا أي حاجه ولو صغيره وعاديه واعتياديه انكم تنووا انها لوجه الله تعالى

أي حاجه فى الدنيا حتى طبيخ عيالك
واتقانك لعملك وضحتك فى وش مراتك
وبرك بالوالدين وصلة الرحم وطبق الحلويات للجيران

وطبعا وبدون شك العبادات الى على اد ما نقدر بنزودها بنوافل وقراءه قرآن وكل ده

اغتنموا الفرصه فعلا انكم تجمعوا حسنات فى رمضان
اعزمي اهل جوزك او صحابه واستحملي واصبري وقولي لله ورسوله وهاخد ثواب افطار صائم وثواب لم شمل وصلة رحم وثواب رضا جوزك عنك
وانتى تاخدي كل ده كده ربطه واحده فوق صبرك على الصيام الى هو لله تعالى وهو يجزى عليه

قصر لسانك حبه وانت سايق واتقن شغلك وخليك لطيف مع مراتك وولادك والكلمه الطيبه الصدقه وصبرها واضحك فى وشها ينوبك ثواب  فيها
وبر اهلك وزورهم واعزمهم وصالحهم على بعض

واي حد مخاصم اخوه ولا صاحبه ولا أي حاجه يصله ويقول لله ورسوله

هى دي خلق المسلم الحقيقى والله اوالى المفروض تكون على طول اصلا

المسلم مش بس الى بيصلي 21 ركعه فى  التراويح ولا الى مربي دقنه مترين ولا الى لابسه نقاب ولا الى بيتكلم باللغه العربيه الفصحى ولا الى مقصر التوب

كل ده ماشي حلو جميل اوي بس لو من غير اخلاق المسلم
ومن غير جوهر الدين تبقى طز ولا حاجه

بمعنى تاني لو واحد مربي دقنه ومقصر التوب وبيصلي فى اليوم ميت ركعه يا سيدى وبيصوم نوافل
لكن ممكن يكذب واخلاقه سيئه مع اهله ومراته وفي بيته ولسانه طويل وعايز قطعه وصلة الرحم بتاعته بعافيه


وواحد تاني لابس عادي قميص وبنطلون ومش مربي دقنه ومش بيصلي ولا بيصوم الا الفروض
لكن
اخلاقه عاليه اخلاقه بمعنى تاني مسلمه ومحترم فى بيته ومع اهله وبيصل رحمه ويبر اهله  ولسانه نصيف وقلبه قبل كل شيء نضيف وبيحب الناس والناس بيحبوه وبيقضى حوائج الناس 

مين فيهم المؤمن على حق يا جماعه

وصلتكم الرساله كده ؟

ارجوكم واحنا فى رمضان اوهبوا كل نقطة  عرق نازله منكم لله ورسوله  وصبركم على الناس واعملوا كل ما عليكم من واجبات قبل النوافل من فضلكم

وطبعا الى تقدروا عليه من النوافل

وليا طلب عندكم لو سمحتوا

تدعوا لبابا ربنا يشفيه ويقومه بالسلامه عشان هو تعبان شويه
وتجهزوله عروسه عشان هو قالي شوفيلي عروسه عشان اخف

وادعولي عشان اختكم محتاسه حوسه عجب فى رمضان

وكل سنه وانتم طيبين

هناك 35 تعليقًا:

Ramy يقول...

أزيك

(:

ربنا يشفى الوالد و يقومه بالسلامة

بس يا ريت تبقى اخلاق طول السنة مش شهر بس

على قد ما نقدر (:

رمضاااان كرييييم

باحث عن حب يقول...

السلام عليكم
كل سنه وانتى طيبه
الف سلامه على الوالد يارب يقوم بالسلامه يارب
وكل ميسر لما خلق له
(لا يكلف الله نفسا الا وسعها)
ربنا مش بيحمل حد فوق طاقته ابدا
(ولا يظلم ربك احدا)
كلامك جميل الصحابه رضوان الله عليهم كانوا تجار نوايا
ودى السنه
لازم النيه قيل اى عمل بس نتدرب فى رمضان
بارك الله لكى

ستيتة يقول...

ألف سلامة على بابا
شفاه الله وعافاه
عروسته عندي بس يقوم بس وعلى طول نتمم المسائل :)
وكلامك مية مية بلا ادنى ريب
وفوتر خيرك انك فكرتينا بتجديد النية

بوسة طايرة

adel يقول...

سلامتك اونكل
ربنا يقومه بالسلامة

وياريت كل ده مش بس في رمضان
نمشيها 6 اشهر طيب ؟؟

شمس النهار يقول...

سلامة بابا الف سلامة وندعي له بالشفاء ان شاء الله

وفعلا ياريت الناس اللي بتصلي وبتتشدق بالدين
وقال الله وقال الرسول
انها تكون قد ماقاله الله ورسولة
وماتبقاش بتقول وتتعبد بحاجه قصاد الناس
وفعلها حاجه تانيه خالص
سلامي

حنعيش يعنى حنعيش يقول...

الف الف الف سلامه وربنا يشفى الوالد يارب
فيه برنامج اسمه شجرة الاخلاق بيجى على ديم2 الساعة سته الاربع وبيتعاد بع المغرب مباشرة ياريت الناس تتفرج عليه

sony2000 يقول...

ربنا معاكي ياارب
اللهم امين
وبالنوسبه لحوسه رمضان دي
فكلنا لها:)

richardCatheart يقول...

ايه الكلام الحلويات دا

انت حلويات فى الطنتخ والبوستات كمان

ياريت والله الناس وخصوصا بنى جنسى من الستات تسمع وتحاول لاننا خلقنا ضيق
والحر بيضرب فى النفوخ

ربنا يارب يشفى باباكى ويطمن قلبكم عليه يارب ويهبه الشفتاء والصحه

بس بلاش حكايه العروسه دى علشان مانضطرش ندعى بعده لماما ربنا يشفيها
ياعنى بابا اول مايشطح بردو دا كلام
ربنا يخليهملك يا دردر يارب

كل سنه وانت واهلك كلهم وولادى الحلوين بخير بوسيلى العيال

shimaa elkholy يقول...

رامي

يااااريت انا قلت لا ما تبقى طول السنه بس يعنى حيث اننا بنصلي فى رمضان عشروميت ركعه عشان رمضان مافيهاش حاجه نبقى كمان اخلاقنا كويسه عشان رمضان


تحياتي يا فندم

shimaa elkholy يقول...

محمود

ونعم بالله وما ربك بظلام للعبيد طبعا

بس ما ننكرش انه صعب السنه دي على الناس الى بتشقى وتتعب يا محمود

وربنا يكرمك

shimaa elkholy يقول...

ستيته

الله يسلمك يا جميل اوووووك هاقوله بقى ان العروسه عندك
ههههههههههه

وشكرا على الكلام الجميل وميت بوسه طاير للقمر ده

shimaa elkholy يقول...

عادل
الله يسلمك يارب

اسم الله عليك يا اخويا ياريت كل الناس وياريت فى كل الشهور ياريت

عايزه اقول لداليا تبقى تدفعك ثمن الفطار الضعف يوم السبت

اه غلاسه يا جدع بنضيق عليك وكده
ههههههههههههههههههه

shimaa elkholy يقول...

شموسه

يا حبيبتى ربنا يخليكى ويشفيكى انتى كمان

وسلم لسانك ياريت

هاكلمك اول ما افنش على العزااااااايم اصل خلاص اناالى فنش

shimaa elkholy يقول...

حنعيش يعنى حنعيش

الله يسلمك يا دوك ادي الى خدناه من حتة اللحمه الملبسه يا ناس
ههههههههههه

شجرة الاخلاق ده ما عداش عليا سته الى ربع ده بنجهز الفطار يا ريس طبعا انت بتبقى مانتخ ساعتها

هو انا باشوف شيخ العرب ساعة الفطار والموعظه الحسنه ساعة السحور ومش دايما كمان الاثنين
بس هادور انا على شجرة الاخلاق طبعا

نورت يا باشا

shimaa elkholy يقول...

سوني

لا يا اختي انا حوستى مختلفه

نحن نختلف عن الاخرون
ادعولي يا عيال ربنا يدينى الصحه والصبرررررررررررر

shimaa elkholy يقول...

قطتى حياتي

لا ماما اعربت يا ستي عن رضاها وقالت لو كان ده الى يخففك يا اخويا نجيبلك

قلتله ابسط ياعم الحاجه قلبها رفرف اهو
ههههههههههههههه

وتسلمى يا جميل على كلامك الحلو زيك

Unknown يقول...

صباح الخيرررررر....
كلامك فكرني بالحديث(من صام رمضان إيمانا و احتسابا...) ، كل ما الواحد عزم النية علي فعل الخير لوجه الله كل ماكان ثوابه أكبر...
ربنا يشفي مرضانا و مرضي المسلمين و يقوم والدك بألف سلامة ، و قوليله لما الشباب يلاقي يتجوز نبقا نفكر في مشكلتك :) :)
تحياتي و ما يلزم...

غير معرف يقول...

رمضان بجد السنه ديه حاجه تحفه
تخيلي بقي كمان علي واحده زي حالاتي حمل وصيام وحر وطفله كل يوم بتتعلم حاجه جديده تفقع بيها مرارتي بس ربنا سبحان الله بيسبب الاسباب
طب عارفه انا دخلت علي فاطمه النهارده المطبخ لقيتها جايبه جردل وقلباه وواقفه عليه والهانم بتغسل المواعين
شوفتي الهنا اللي انا فيه
ولما تنزليها تسمعي غاره لا توصف وكلام غريب كده مش متفسر تقريبا والله اعلم شتيمه
هههههههههههههههههههههههههههه
تخيلي بقي كل ما سبق وفوقيها واحده زي فاطمه وفي سنها وعايزه تمسح الارض وتغسل المواعين وتغسل الهدوم
بالله عليكي انا برده حمل كل الحاجات ديه مع بعضها
هانت وتجي التانيه بالغاره بتعتها
دعواتك ياقمر
كل سنه وانتي بخير

غير معرف يقول...

اما الحج فربنا يشفيه ويعافيه يارب ويقومه بالسلامه

بس عروسه
عروووووووووووووووووووووسه
لاحول ولاقوة إلا بالله
طيب ينفع انا ياأختي
ههههههههههههههههههههههه

فاتيما يقول...

اخص عليكى يا صبصب

بتدورى لعمو على عروسة
و انا على قيد الحياة ؟!!!



ازعل دلوقتى انا و لا المفروض ازعل ؟
اقولك
هزعل


سلامته الف سلامة و ربنا يتمم شفاه
على خير يا رب



و كلامك الف صح
الدين سلوكيات و معاملة
بس رمضان فعلا السنة دى غريب
و الناس كلها تعبانة و هبطانة
و مظنش الحر بس السبب
النفس كمان
مبقاش فيه نفس لأى شيىء
ربنا يفرجها على الجميع يا رب


بوسيلى العيال
و جوزينى عمو عشان ابقى جارتك
و افوز بأطباق الحلويات بتاعتك دى
منتى هتودينى بقى و تدلعينى و كدا

صح ؟

خواطر شابة يقول...

ربي يشفي الوالد يا ندى ويقومه بالسلامة ان شاء الله
كلامك صحيح فلا حاجة لله بجوعنا وعطشنا ان لم يسلم الناس من أذانا وشرنا
تعجبني طريقة طرحك للمواضيع الدينية انت تخاطبين العقل والقلب معا وكل هذا في اطار خفيف ومحبب للنفس
دمت بكل الود عزيزتي ورمضان كريم

سواحة يقول...

دردر
كلام جميل كلام مظبوط
يتنفذ ميتناقش :-)
و عليه انا بعدى بس اقول
سلامة عمو الف سلامة

mrmr يقول...

مبروووووووووك النيوبوووووك
هههه

يارب نسمع ونعمل وتبقى اخلاقنا ترضى ربنا طول السنه
طيب انا عندى اقتراح نخلى السنه كلها رمضان علشان نصلى ديما

الف سلامه لبابا وربنا يمد يد الشفاء له

كل سنه وانتى طيبه

ودى دعوه للضحك من القلب
http://jokes-egyptian.blogspot.com/

adel يقول...

الضعف !!!؟؟؟
هههههههههههه
ولا ضعف ولا مش ضعف
مفيش اصلا متقلقيش :)

انا روحي هترفر بس

سندباد يقول...

ربنا يجعله في ميزان حسناتك
جزاكي الله خير
رمضان كريم كل سنة وانتي طيبة
تحياتي

KHALED يقول...

ربنا يعافى الوالد و يعافى كل مرضى المسلمين يارب .....

بس عندى طلب بجد و جديد
لو لقيتوا عروسة للوالد تشوفلى انا كمان عروسة إشمعنى هوا

shimaa elkholy يقول...

المستفز

قصدك ان بابا مش شباب يعنى

اطلاقا بابا شباب ما بعد الستين
هههههههههه
بعدين شباب اليومين دول خساره فيهم الجواز ياعم

shimaa elkholy يقول...

غير معرف

اه الله يكون فى عونك يا ام فاطمه بس خدي بالك انتى معاكي رخصه فما تجيش على نفسك اوي عشان البيبى


وتنفعي انتى لا طبعا ما تنفعيش
ههههههههههههه
هابقى اقولك ليه

كل سنه وانتى طيبه يا جميل وربنا يقويكى ويعينك

shimaa elkholy يقول...

فاتيما

ايوووووووووون كده فاتيما ممكن
ههههههههههههههه
مش تقولي ام فاطمه

بابا كده عايز عروسه تملى العين والقلب انا عارفاه
هههههههههههههههههههه


وحشاني يا فاتيما اوووووووي

وتسلمى يا جميل منوراني

shimaa elkholy يقول...

خواطر

الله يخليكى وربنا يكرمك

متشكره اوي ورايك فى كتابتي اسعدني جدا

shimaa elkholy يقول...

وندا

حبيبتى وحشاني خالص

وتسلمى يارب نورتينى

shimaa elkholy يقول...

مرمر

مرسي يا حبيبتى ربنا يكرمك

ونروح نضحك طبعااااا

shimaa elkholy يقول...

عادل

ايه ده انت مش رايح ولا انا :(

shimaa elkholy يقول...

سندباد

متشكره اوي ربنا يخليك ويكرمك نورتنا

shimaa elkholy يقول...

خالد

ماشي ادينى طيب تليفون المدام عشان انا باحب اهدي النفوس
هههههههههههه