الأحد، 13 فبراير 2011

نسمات الحريه

تصدقوا انا مش عارفه اكتب

والله مش عارفه اكتب هاكتب ايه ولا ايه ولا ايه ده عايزالي خمس سنين على ما ابطل كتابه

اولا مبروك
مبروك يا شعب مصر عليكم مصر

ومبروك يا مصر عليكى ولادك الى اتولدوا من جديد فى التحرير

مبروك يا ناس الحريه ونسايمها الى هاله علينا

ثانيا  يارب يارب يارب كملها بالستر  علينا ويتمها على خير ونفضل طول عمرنا نقول كان اعظم يوم هو 25 يناير وكان اجمل يوم لما سمعنا خبر تنحي الرئيس الظالم


يا جماعه انا فرحانه اوي اوي اوي بشكل لا تتخيلوه
ايام لما كان النت مقطوع انا كنت باكتب  تدوينات يوميه يمكن لحظيه
خلال الثوره انا قضيت اصعب لحظات حياتي واسعدها ايضا

ما كنتش بانام ولا باعمل حاجه اصلا قاعده متنحه قدام الاخبار اوقات اتفائل وافرح واوقات اقلق واوقات ابكي بحرقه واوقات اتجنن وافضل ازعق واكلم نفسي

يمكن الى متابعنى يعرف انى مش باتكلم فى السياسه على مدونتي الا نادرا ومن بعيد لبعيد لذلك ناس كتير استغربت اهتمامي بالثوره وكلامي فى السياسه عموما

الحقيقه مش كان بمزاجي مجبر اخاك لا بطل جوزي كان واخد عليا عهد ما اتكلمش فى السياسه  خايف عليا بقى والجو ده

الحقيقه من قبل الثوره بكام يوم اترجيته يحررنى من العهد عشان اقدر اشترك فى الجروبز واتكلم وانشر  رفض برضه لكن يوم 25 قلتله بص انا باقترح تطلقني لحد ما الثوره تخلص مش مشكله يعنى عندنا 3 طلقات J

من الاخر كان مسلوب حريتي ويعلم ربنا بسبب الحكايه دي انا كانت بتحصلي ازمات نفسيه كتير حيث انى اكتر حاجه تجننى حد يحط ايده على بؤي

آلمنى كثيرا جدا موقف بعض اصدقائي من الثوره وفهمهم الخطأ وكلامهم المستفز حتى انى حاولت كتير اتجنب الحديث معاهم عشان ما اخسرهمش وانا متعصبه وضغطي عالي وعلى اخر اخر اخري

اهالني كمية الناس الى صدقت التلفزيون المصري دون اي تفكير واهالني اكتر من نعتوني بعدم الفهم وانى اساسا اعرف ايه فى الدنيا ده انا اخري حلة محشي ودمتم ....هو صحيح يا ولاد انا شكلي كده ؟

الحقيقه كنت متفائله يا شباب بيكم وكنت حاسه ان هنعمل حاجه بس كنت خايفه عليكم اوي اوي

كنت باموت حقا مش كلام والله يوم الاربعاء الى كان مذبحه ليلا وفضلت اعيط طول اليل واقول يا عاااااااالم حد ينجدهم  وتساقط الشهداء حقا كان بيقتلنى فعلا

بعدين هابقى انشر تدويناتي لايام الثوره انشاء الله

دلوقتي ارجوكم يا ناس ... الى ما كانش مؤيد للثوره ورجع فى كلامه عادي والله يقول الحقيقه انا ما كنتش مؤيد بس دلوقتي اقتنعت مافيهاش حاجه ...مالوش لازمه نستفز الناس

كل واحد وله وجهة نظره

ونفسي اعرف المنادين للمتظاهرين او بالاصح الثوار الابطال الى وقفوا على خط النار انهم خلاص يرجعوا وكفايه لحد كده

الكلام ده بيتقال من اول خطاب لمبارك يوم الجمعه بعد ما كلابه قتلونا فى الشوارع وقالولهم خلاص يا جدعان هو حل الحكومه ارجعوا بقى
وبعد كل انتصار وكل تنازلات من الحكومه كانوا بيقولوا كده ارجعوا بقى
ولحد الان لسه بيقولولهم ارجعوا بقى

افهموا بقى ارجوكم ...الشباب الى هناك دول مش سيس العيال دي فاهمه هى بتعمل ايه الدنيا والزنقه والموت الى شافوه بعنيهم علمهم ..بما انكم قاعدين فى بيوتكم يبقى من فضلكم بسسسسسسسس سبوهم يكملوا

افهموا انهم اقويا لانهم فى التحرير .. افهموا انهم ما دام مشيوا مشوار الاحسن يكملوه دلوقتي مش يرجعوا وبعدين يبقوا يبدأوا من الاول تاني

لو كانوا سمعوا كلامكم من الاول ما كناش وصلنا لاي حاجه

دم الشهداء غالي كلنا كنا خايفين عليهم وربنا العالم عينى ما غمضتش يوم الخميس الى فات  لما عرفت انهم راحين العروبه لحد ما الشباب كلموني طمنوني وقالولي مافيش اي حاجه احنا تمام

لكن
ارواحنا لم تزهق فقط فى التحرير

ارواحنا كانت تزهق يوميا على يد النظام الفاسد واعوانه وايديه وكلابه... العباره فساد .. السجون والمعتقلات فساد.... حوادث الطرق والقطارات والحرايق فسااااااااد .... المصايب الاجتماعيه الى احنا فيها فسااااااد

صدقوني احنا كنا كده كده بنموت فى اديهم ...

لو الشباب رجعوا من غير ما يضمنوا اجراءات حقيقيه من الجيش لضمان حكم مدنى وتغيرات دستوريه وافراج عن معتقلين لا اضمن الجيش وما سيفعله بينا

انا لااقصد الجيش با كمله ..فالجيش انا راهنت عليه من البدايه .. ساورتنى بعض الشكوك احيانا بانه يمكن يقلواا عقلهم ويضربوا الناس لكن رجعت تاني قلت مش ممكن

عارفين ليه مش ممكن لان الجيش بتاعنا جيش وطنى ..... الكلام هنا على الجيش  المجندين والقياده الصغيره والمتوسطه .... دول يا ساده بيقبضوا نص مرتبهم وطنيه ... مش مرتزقه

اما جنرالات الجيش المصري فالكل يعلم انهم قد تكون مئات الالوف التى يتقاضوها كبدل ولاء للنظام الفاسد اعمت قلوبهم عن الوطنيه والحقوق
الى حاليا متولين قيادة البلد مين المجلس الحربى .. الروس الكبيره ... بيعصف بيا بعض القلق ان السلطه تحلى فى عنيهم ونعيش عصر نيله عسكرى تاني

عشان كده لازم ناخد ضمانات قد ما نقدر ..  الكوره فى ملعبنااااااااااااااااا افهموا عشان خاطري

ملحوظه هامه
انا باعتذر لاي حد اتعصبت عليه فى اليومين الى فاتوا  والتمسوا ليا العذر .. انا بطبقى يا جماعه عصبيه جدا
تقدروا تقولوا مجنونه
اعيانى التفكير فى البلد وحالها سنين والله اكتر مما تتخيلوا بكييييييت والله ياما على الى احنا فيه والمراره ما كانتش بتفارق حلقي
لما شوفت بارقة امل ناس بتحاول تموتها كنت هاتجنن
اضيفوا الى ذلك  الضغط العالي الى بيضيق خلقى اكتر والقلق الى انا عايزه اتعالج منه والله بجد كان بيقتلنى على الشباب فى التحرير
بالعافيه فى الايام الاولى كنت باعرف اخبارهم ...اقصد اخبارهم منهم شخصيا مش من على التلفزيونات والفضائيات

يعنى هحاول انسى صدمتى فى ناس كتير يعز عليا يكونوا بيفكروا كده بس طبعا هما احرار فى فكرهم وانا كمان حره فى فكري ورايي

وارجوكم اظن انا رايي واتجاهي واضح للجميع من اول يوم فى الثوره لحد الان .... من فضلكم الى شايف انه مختلف معايا ومش هايقدر يتعامل مع الاختلاف ده بهدوء فمالوش لازمه حضراتكم النقاش معايا خالص فى الموضوع ده
ولا اي موضوع تاني حاليا لانى مش عارفه افكر غير فى الثوره وما بعد مبارك وما الى ذلك

اسفه طولت عليكم
 ومبرووووووووووك يا مصر
ومبروووووووووك عليكم مصر

هناك 22 تعليقًا:

حفيدة عرابى يقول...

انا عايزة اقولك ان البوست بتاعك جميل لانه عفوى جدا
وانى موافقاك على رأيك وكل كلامك وخصوصا جزئية ان الشباب مينفعش يرجعوا دلوقت
وانى فرحت بيهم بزيادة وبوعيهم لما قالوا مش هنرجع من الميدان
وان الخلاف الجاى هيكون اوسع علشان النقطة دى تحديدا
لان لسه في ناس كتير بتحملهم ذنب كل حاجة بايخة بتحصل فى البلد وفى ناس مرعوبة بشكل لاتتخيليه من غزو اسرائيلى وامريكى وبيجهزوا نفسهم هيشتغلوا ايه لما الاحتلال ييجى
فطبعا وجود الشباب فى التحرير عاملهم قلق فظيع

دلوقت احنا عايزين نفرح يومين ونترجى ربنا يكرمنا من عنده ويسترها معانا فى الايام الجاية
على مانستوعب ممكن نعمل ايه الايام الجاية
تسلم الايادى

أحــوال الهـوي يقول...

يا صاحبة التكعيبه

كما انتي لا تتعاطين السياسه فانا ايضا و لكن ما كنا فيه ليس له شأن بالسياسه انها حرية حياة مستقبل

يجب ان نشترك فيها جميعا ان تقرير المصير حق

لا وقت للخلاف لنجعل جل طاقتنا مصوبة الي البناء و ليس لادعاء الفضل او اثبات الانتماء

سيدتي ابدعتي بما كتبتي رغم ادعائك عدم المقدرة علي الكتابه

تحياتي

ghada mOhsen يقول...

هلا ندى
^^

بجد أنا فخورة بيكي أوي

أنا في الـ 18 يوم يتخللهم
48 ساعه كنت عايزة هدنه
لكن ده مش معناه إني كنت مع مبارك أنا ضده مائه بالمائه

بس بعدين حسيت فعلا إن الهدنه متنفعش خالص
وكتبت بوست بده وإني مع الأحرار لأخر قطره

وبجد مبسوووطه كتير إني كنت من المشاركين صحيح مش في ميدان التحرير بس كنت بشارك هنا في طنطا

حبيت تدوينتك كتير والعفويه إللي فيها زي ماقالت رشا
^^

ألف مبرووووك لكل مصري اصيل
وبحييكي على ثوريتك وثباتك

^_^

كلمات من نور يقول...

تحية إلى ارواح الشهداء التي تحلق في سمائنا فرحة فخورة بنا

تحية إلى كل أهالي الشهداء الذين ارتفع صوتهم مزغردين فرحين بنصر مصر ولو بالتضحية بهم

تحية إلى مصررررررررررررر

أحمد عبد الحميد يقول...

عندى نقطتين
أولا مين قال إن إنت أخرك حلة محشى؟ ده إنت بتعملى كيكة جناااااااان
ثانيا أنا كنت مع التهدئة بعد خطاب الثلاثاء بس بعد مذبحة الأربعاء غيرت رأيى مائة بالمائة
أنا كنت نازل جمعة الشهداء بس للأسف ماعرفتش أرجع من سيناء

غير معرف يقول...

أبصمي

مش شغلانه يعني

shimaa elkholy يقول...

حفيدة عرابي
والله يا جميل انا تعبت من كتر ما اتكلمت مع الناس لدرجه انى ما بقيتش قادره اتناقش مع حد

والى بيحمولهم ذنب كل حاجه بايخه بجد مش فاهمين

واسرائيل وامريكا ايه بس ده اسرائيل كانت مقيمه الدنيا وبتدعم مبارك فهمتوا ايه من كدددددده فهمتوا اييييييه

وربنا يسترها يارب ومتشكره يا جميل على كلامك الى اسعدنى

shimaa elkholy يقول...

احوال الهوى
والله مش ادعاء انا بصحيح بقالي كام يوم عايزه اكتب مش عارفه حاسه انى مش مجمعه
فتحت الصفحه وقلت باسم الله وكتبت وبس

شكرا لك يا فندم نورتنا

shimaa elkholy يقول...

غاده

شكرا يا غاده ربنا يخليكى

والله يا بنتى انا نزلت المظاهرات هنا فى المنصوره مره واحده بالعافيه كمان يمكن ما عملتش شيء يذكر لكن ما كنتش منفصله عنهم هناك فى التحرير لحظه كنت بجد بقلبي معاهم مش كلام
نورتي يا قمر

shimaa elkholy يقول...

كلمات من نور

الشهداء دول فعلاااا دمهم هايفضل محنى جبينا لاخر يوم فى عمرنا

shimaa elkholy يقول...

ابو احميد

اولا حاولت ابعت كيك التحرير والله واشارك فى الثوره ما عرفتش الاقي حد مسافر من هنا بجد مش هزار

ثانيا: كنت لسه فى سيرتك من شويه والله كنت باقول لرضا هو كان له راي بس بعد ما فكر وقرا وفهم عادي فهمها صح وغير رايه وده عادي

الى مش عادي الى مش فاهمين اصلا وبيدعوا انهم قلبهم على البلد وهما اصلا مش فاااااااهمين
عشان كده نفسي بس يفهموا

shimaa elkholy يقول...

استاذهاني

ابصم بالعشره يا فندم ولا يهمك :)

ثـــوره الــغضب يقول...

كلامك من القلب اوووى
وحسيته جدا عشان كلنا مرت علينا كل المشاعر اللى انتى حكيتيها دى
مبروك علينا كلنا رجوع مصر لينا

سَارةٌ يقول...

طنـط ندى .. واسمحيلي أقولك طنط يعني :)

..

مـِن أول يوم ثـوره وانا كنت متابعه حضرتك على الفـيس وعالمدونه هنـا كمان ..
يمـكن فـ الأول كُنت شايفاكي مُتعصبه حبتين .. بس بعد كده أدركت إني كنت خاطئه ..

أساساً لقيت ناس كتيره خرّجت كبتها بأساليب مُختلفـه أثنـاء الثوره ..
النّاس كانت بتشتم فـ بعضها بدون أدنى دواعي أو اسباب ..
وناس كانت مُجرد إنها بتهيص فـ الهيصه ..
وناس تانيه ولا كإنها بتعيش ثوره اصلاً ..
وفعلاً عدّت احداث كتيره ومتفسرتش ..
بس الحمدلله عالنتيجه اللي وصلنـالها..
ومبـروووك علينـآ مصر من تـآني . :):)

mrmr يقول...

انا متفقه معاكى يا ندى ان الشباب اللى فى التحرير حاليا ما يفعش ابدا يرجعوا العمل اللى بدائوه لازم يكملوه
لا نكسب كل شئ او نخسر كل شئ
كل واحد حاسس بقهر وظلم لازم يصرخ دلوقتى بعلو الصوت ويسمع صوته للعالم كله خلاص عصر الضعف والسكوت بمقاش ينفع خلاص شلنا بكل قوتنا ايديهم من على بقنا وقدرنا نتنفس نسمات الحريه من جديد
ربنا يكمل على خير ويستر من مصير مجهول فى انتظار مصر
مبرووووك علينا مصر يا قمر

shimaa elkholy يقول...

ثورة الغضب

مش عارفه اقولك ايه

بس مش عارفه لما قريت تعليقك عيطت يا اخي بتستعبطوا بقى ما عدتش عايزه اعيط :))))

shimaa elkholy يقول...

حباية بنادول

قولي يا حبيبتى براحتك كلكم اولادي :)

وبجد يا جميل متشكره اوي ومبسوطه كمان انك صغنونه وعندك صبر تسمعي وتفهمي وتتعلمي وتكوني راي فىالاخر

shimaa elkholy يقول...

مرمر

ان شاء الله مصيرنا خير ونور اعتقد احنا كفايه علينا كده

شكرا يا جميل ومبروك عليكم مصر

الازهرى يقول...

يعنى عايزة تفهمينى إن كل الرغى وتصديع الدماغ ده وكنتى محبوسة

أما بعد ما يديك الحرية هتعملى فينا إيه ؟

ربنا يسترها على الغلابة

ألف مليون مبروك لكل المصريين

وربنا يقدرنا على المرحلة الجاية

فاتيما يقول...

:)

نفس الكلام انا كتبته يا صبصب

بس البوست دا فات عليا ازاى
كنت مكتبتبش بتاعى بقى
يلا ملحوقة

انا متفقة معاكى ف كل النقاط
خصوصا نقطة الجيش دى وقياداته
وكل القيادات اللى قاعدة لسه
ف اماكنها لحد دلوقتى
والضغط هوه الوسيلة الوحيدة
اللى تنفع مع العالم دى
ومفيش غيرها

اقرى البوست الأخير عندى
عله يفيد

سلامى لأستاذ رضا
وللعيال
ولكل اهل المنصورة الجميلة

shimaa elkholy يقول...

الازهري
هههههههههههههههه
كده برضه
اه والله يا ازهري كان حابسنى كمان شوف هايجرالكم ايه بقى

مبروك لينا كلنا

shimaa elkholy يقول...

فاتيما

توارد خواطر يا جميل

احنا تمام الحمد لله

نورتي يا قمر