الأربعاء، 11 مايو 2011

الهبل الطائفي فى مصر

غلبتوني يا خلق ... يا ناس حرام والله ده انا غلبانه وعندي الضغط و3 عيال وابوهم

الواحد بيسمع كلام ينقط ويشوف كليبات تجيب شلل رباعي ويقرا كلام مكتوب يجيب تخلف عقلي

غلبت بقالي كام يوم اقول واعيد وما حدش بيفهم لييييييييييه مش عارفه

كل يوم اقول بس خلاااااااااااص ما عدتش هناقش حد ولا هاكلم حددددددد  بس مافيش فايده

هو احنا ليه ما بنتعلمش مما سبق ؟؟؟ الله ده غباء ده ولا هبل ولا ايه ... الله ده احنا كنا بناخد فى علم النفس ان ابسط واول واسهل طرق التعلم هى التجربه والخطأ  ... طب ايه ما شبعناش اخطاء ولا ايه

النظام السابق والى لسه لابد فى الدره وقاعد يناوشنا كان طول عمره بيستخدم كارت الفتنه وحواديت هبله وعبيطه زي حواديت زمان بتاعة ابو رجل مسلوخه وابو شوال الى بيلم العيال فى الشوال وامنا الغوله الى بتمص دم العيال وتاكلهم .. وصولا للاشكيف المخيف

وما زلنا فى نفس المسلسل الاهبل
 عك عك عك كله بقى عك وفى الاخر بكل بساطه يقولك اصلها فتنه طائفيه  وانا راي انها هبل طائفي والله
دلوقتي فى حد عنده مخ دلوقتي مش عارف ومتاكد بان النظام البائد واصابعه منهم خمس ست صوابع بيلعبها جهات خارجيه معاديه واولهم اسرائيل

فى حد عنده شك ان النظام ده كان عميل فعلا لاسرائيل وامريكا واي كلب بلدي يدفع اكتر ؟؟

طب الى يبقى عميل وخاين وبيقبض من بره اصلا لما تحط السكينه على رقابته هايعمل ايه ؟؟

هايستعمل كل سلاح قذر وفتاك فى ايده واستعمله قبل كده وبشرااااسه عشان يحلق اي حاجه او على الاقل يتعلق فى قشايه

وهو ده الى بيحصل دلوقتي بالظبط  بس بقى الفرق اننا اصلا بنفرر عندنا وضع اقتصادي منيل بستين نيله وقلق اجتماعي وامنى مقصود ومظاهرات فئويه وغير فئويه وهبليه وكل حاجه

وكمان بقى طلعلنا اعداء جداد  من الدول المحيطه الى مش من مصلحتها نجاح الثوره والا يبقى اشاره مؤكده على زوال ملكهم

هل تعتقدوا مثلا ان الولايات  المتحده الامريكيه دلوقتي قاعده بتلعب وحاطه ايدها على خدها زي الولايا مستنيه تشوف  الثوره هاتوصل لحد فين  ومين الى هايرسى عليه العطا  ابسلوتلي نوت اكيد شغاله من فوق الترابيزه ومن تحت الترابيزه وكله الله ينور

واسرائيل اظن اخدت صاروخين ارض جو فى اسبوع واحد مطيرين عقلها توقف الغاز والصلح بتاع فتح وحماس
حد متخيل مثلا ان سرائيل هتاخد الصاروخين دول وتقعد كده تقول اه يا مامايا  اكييييد لا دول لو ما اشتغلوش علينا صح يبقوا احنا هبل وعبط ان عاملين لهم قيمه كل السنين دي وفاكرينهم عدو وخصم قوي

طب الدول العربيه الشكيكه الى قاعدين على جمر كلهم اولا عشان خايفين يجي عليهم الدور وثانيا عشان امرائهم ومشايخهم متورطين للركب مع رجال الاعمال عندنا والقلبان الى عندنا دي هاييفتح ملفات اجاركم الله على ريحتها وخدوا بالكم الامراء دول لهم نفوذ وضغوط قويه على الحكومات دي  ... طب برضه الناس دي هاتقف ساكته ؟؟

وطبعا طبعا لما تتلاقي المصالح دي كلها يبقى هايتفقوا علينا ويطلعوا عين اهالينا زي ما انتم شايفين

طب الناس الى عماله تخرط على قلبنا بصل طول النهار والليل فى الفضائيات دول ما بيقلوش الكلام  ده ليه ؟؟؟
هالبت انا عقليه فاذه يا ولاد وانا ما اعرفش

طيب احنا بقى مفروض نعمل ايه ؟؟؟ ايه الحل ؟؟؟

اولا: الملف الامني المصري والى تولاه عم الحاج وزير الداخليه ... حد يقولي عمل فيه ايه ؟؟

ده لازم يتغير لازم كل مسؤل يعرف انه لما ما يعرفش يمشي الشغل يمشي ويجى غيره  وعموما انا شايفه ان شخصيته ضعيفه ومش عارف يسيطر على البلجيه المسميين بظباط الشرط  مش كلهم طبعا عشان ما تطبقش فى زمارة رقابتي انما ما تنكروش انهم اكترهم كده


ثانيا : هولاء المدعين السلفيه والسلف الصالح براء منهم انا مش عارفه هما سلفيين سلفهم الحقيقى مين يعنى
لازم يتادبوا كويس ويتلبوا كويس ويطلع عصام شرف كده وهو مكشر عن انيابه ويقولهم يا غجر انتم مالكوش اي صفه قانونيه هنا وكل واحد فيكم يحترم نفسه ويلزم مكانه ولما واحده تتصل عليك تقولك الحقنى يا عنتر زمانك تروح تبلغ الامن وتقول  روحوا فتشوا مش تفتش انت يا شاطر عشان كده عيب يا عين امك


ثالثا: المسيحين جميعا ياخدوا تنبيه شديد اللهجه بانه لن يتم التهاون ابدا فى اتخاذ الاجراءات اللازمه اذا ثبت ان اي كنيسه او دير يحتجز به اي شخص رغما عنه ايا كانت ديانته  وكذلك الاسلحه الغير مرخصه .. والناس الى اطلقت رصاص فى اي من الاحداث الماضيه يتعلقوا من رجليهم بجد ومحاكمات عسكريه واعدام لانهم اتسببوا فى قتل فعلا

وبكده يبقى المشكله انتهت

انما الطبطبه والمياصه الى احنا فيها دي ما تقولش غير حاجه واحده بس

ان فى تآمر من الجهات السياديه عموما فى البلد بتغذى الاحداث المؤسفه الى حصلت ودي حاجه اصلا اخطر  من اي شيء ان يبقى حاميها حراميها

واي حد يعتقد ان الى بيحصل قد يصب فى مصلحة البلاد بشكل او باخر وان سبوهم يادبوا بعض والكلام ده يبقى غلطان غلط بشع جدا

لان احنا كده بنستعمل نفس الطرق المشينه الى كان بيستعملها النظام السابق واصابعه القذره الملوثه بالخيانه العظمى

كل الاطراف غلطاااااااااانه كلهم غلطانين يا عاااااااالم ولاااازم يتحاسبوا بشده وحزم وقلمين وشلوطين واحتمال قطع رقبه

يااااااااااارب تعقلوا بقى ياااااااااااااااااارب تفهموا بقى

عندي كمان اقتراح مهم بعد انتهاء الازمه الحاليه عشان نخلص منها للابد بقى
الرسول عليه الصلاة والسلام فى صلح الحديبيه  اتفق مع قريش على هدنه وكان من شروطها اييييه ؟؟؟
ان لو واحد اسلم من قريش نرده ليهم انما العكس لا لو واحد رجع فى اسلامه وراح لقريش تاني مش هايردوه لينا

والرسول عليه الصلاة والسلام وافق  طبعا لان الظروف وقتها كانت تحتم علينا كده وكنا كدوله اسلاميه لسه فى المهد ومحتاجين للهدنه دي عشان نوحد صفوفنا ونبنى اركان الدين والدوله

طيب احنا ليييييييه ما نعملش اتفاقيه حلوه كده اموره ونسميها زي ما نسميها
نسميها عهد نسميها قاااانون اااااه ايه المشكله احنا هانعمل دستور جديد وقوانين جديده وهانبقى فله ان شاء الله
ايه المانع ان يكون فى قانون  يقول الى ياسلم ياسلم والى يتنصر يتنصر والى هايقول بم هانقطع رقابته لانه هايعد اييييييييه مشعل للفتنه
انا مش بتاعة قوانين ولا اعرف ازاي ممكن يتوضب القانون ده بس اعتقد انه ممكن اوي
ليه لا ؟؟ عمر ابن الخطاب رضي الله عنه كان بيسن قوانين مستحدثه وتعد قوانين وضعيه زي الى موجوده ايامنا بما فيه الصالح للمجتمع والدوله وبيغير فيها وبيلغيها ويحط غيرها
ايه المشكله ؟؟؟
حد يناقشنى فى الاقتراح ده من فضلكم  بيفهم فى القانون  عشان عايزه اعرف امكانية تنفيذه
بس كده يا اصدقائي الحلوين
اللهم بلغت اللهم فاشهد

يااااااااااااااارب استرها معانا يارب  احنا غلابه والنبى وما صدقنا نعمل ثوره

هناك 22 تعليقًا:

غير معرف يقول...

القانون الجديد بتاع المواطنه والدور الموحد للعباده وعدم رفع شعارات دينيه في الدعايه للاحزاب اعتقد فيه ما تقوليه ..

ورب ضره نافعه .... لسانا دلدل علشان قانون مواطنه وكمان هيمنع اي فتنه قادمه ان شاء الله

لا هدم كنايس ولا تسليم مواطنين غيروا دينهم ولا هبل من ده ..

بالنوسبه ليكي فانتي فعلا ذكيه وبتشغلي مخك مش ركناه ومستنيه حد في برنامج توك شو يشغلهولك .... مش بتستسهلي يعني .... ودول عددهم قليل الصراحه اللي زيك :)

حلم بيعافر يقول...

متقلقيش هتفرج...

Ramy يقول...

معاك فى الأقتراح

لأن الواحد تعب من الكلام صدقينى


ربنا معانا كُلنا

Haytham Kilany يقول...

فعلا عنونا رائع ...هبل طائفى
وعك والكل غلطانيين
لكن الغلطان الاكبر هو الجيش والحكومة ....
طبعا هناخد وقت كبير لمحو الثقافة السيئة التى ربتنا عليها حكومات مبارك

اعتراضى الوحيد " ولى حق الاعتراض"
السلفيين أولا لأنى واحد منهم
ثانيا : لان ممثلهم ف مصر حاليا اللى رأيه هو رأى عموم السلفيه " غير كدة يبقى {اى صاحبه " هو الشيخ حسان والشيخ محمد عبد المقصود واتباعهم من الدعاه

أه سلفيين ومتبعى السلف الصالح .... وأن شاء الله ربنا هيخذى الاعلام الفاشل المتسلط اللى كل حاجة بقى يتهمها ف السلفيين

وبعدين بشهاده كل الحاضرين ان السلفين وجدوا لحل الازمة واللى استدعاهم الامن
وهم اللى انقذوا ناس من الكنيسة " بشهادة النصارى

sony2000 يقول...

ياريت والله
بس من يسمع؟

Haytham Kilany يقول...

على فكرة انا من الضحايا اللى راح تعليقهم فى تهيسات البلجرز " أظن أول تعليق هنا"

عموما
- خلص مووضع الودان ... وبرىء" بضم الباء" منه السلفية
- خلص موضوع اطفيح ... وبرىء منه السلفية
- وأتفضح موضوع كاميليا ....بعد ضغط السلفية
- وأتفضح موضع عبير وكنيسه امبابة ... وبرىء منه السلفية

- وأتفضح موضوع هدم الاضرحة ... وبرىء منه السلفيه

ولسه بردوا بنسمع كلام الاعلام وبنقول " السلفيه...السلفيه "

ثانيا : بخصوص القانون دة وكل مشاكل الكنيسة والمسلمين - يتم الان عمل لجنة " بدون طبطبة" لوضع قانون لتنظيم العلاقه بين الكنائس وبين المسلمات الجدد

ثالثا : أخر بوست عندى بيكشف حقيقه السلفية وكل الجماعات الاسلامية وعلاقتهم بالنصارى والكنائس "بعنوان : يلا نولع فيهم ... نعم للفتنة الطائفية"

shimaa elkholy يقول...

اه فعلا انا شوفت تعليقات وتاني يوم ما لقيتهاش
اغلب الظن فى يوم بحاله اتمسح من البلوج كله

اولا متشكره لحضرتك على ذوقك انك عدت التعليق تاني
وانت نورتنا

ثانيا

مين هما السلف اصلا ؟؟
ويعنى ايه سلف ؟؟
ومن هو سلفهم ؟؟
ونعرف منين السلفي مش من السلفي يعنى لما كل واحد يعمل عامله هباب ويقول انا سلفي وانتم تقولوا لا مش سلفي يا سلفيين اعرفكم منين انا ( مش انا بالتحديد انا باعرفهم كويس ولله الحمد)
نقط من الى حضرتك قلتها فيها حاجات ما وصلنيش بيها علم اكيد زي مثلا الودان والاضرحه مين قال انهم براء منها ؟؟

shimaa elkholy يقول...

وعبير مين قال انهم مش سلف حضرتك الناس الى لها كليبات على النت دول ايه ؟؟؟ وما تنكرش انهم كانوا رايحين يفتشوا من فضلك عشان دي حقيقه مش محتاجه كلام

اما حضرتك محمد حسان الى حضرتك جبت سيرته فى التعليق السابق
فانا عارفه محمد حسان جيدا من اول ما كان بيخطب فى الجامع الى على اول الشارع ده لحد لما قال الخروج على الحاكم حرام ولحد بعد التنحي اول جمعه واحنا بنحتفل وهو بيقول الماده التانيه من الدستور هنا فى المنصوره والله بالتالي ياريت بلاش تقحمه فى الكلام بينا عشان ما تزعلش مني

سيدى الفاضل انا اعلم جيدا ماهو المنهج السلفي فى البحث والتفكير والاجتهاد والعلم
واميز جيدا المتسلفين عن غيرهم

وشوفت بعينى ما حدش قالي حاجات كتير مش مجال سردها
واتعاملت معاهم

مع الى فاهم يعنى ايه سلفيه
ومع الى اخر الحديث يقولي هو يعنى ايه سلفيه اصلا

اخي الفاضل بلاش ندفن راسنا زي النعام وتعالى نقول هناك اخطاء ويجب اصلاحها
تحياتي لحضرتك ونورت

Haytham Kilany يقول...

ردا على الاسئله أقول
تعليق رقم "1"

- السلفيون هم المسلمون ...الملتزمون بمنهج الله من قران وسنه " كباقى الفرق المسلمة " ولكن الفرق هو اتباعهم لفهم سلف الامه من الصحابه والتابعين الذين هم أفهم الناس للوحى لمعاصرتهم النبي محمد صلى الله عليه وسلم

- عكس الشيعه المتبعون لفهم الأئمة المعصومون " الاثني عشر أمام سلالة على بن أبى طالب

- وعكس الصوفيين المتبعين لنهج أئمه ومشائخ الطرق الصوفيه

- وعكس القرأنيين الذين يتبعون القران فقط ولا يؤمنون بسنه النبي محمد المعصوم

- وعكس المتفلسفون والذين حكموا عقولهم وأعترضوا على نصوص الكتاب والسنة


وأظن بالتعريف دة عرف من هم السلفيون
من الناس المتبع للمنهج والداعى له
ومن الناس المؤمن به

Haytham Kilany يقول...

رقم "2"
قبل كل حاجة المثال دة مهم
السلفييين ناس مسلمين
ومن المسلمين العاصى الزانى القاتل السارق
حتى فى عهد النبي صلى الله عليه وسلم والصحابه كان هناك زناه " المرأة التى رجمت فى عهد النبي صلى الله عليه وسلم

اذن ....ليس عيبا فى المسلمين أو الاسلام أن نجد منهم السارق او الزانى أو القاتل

وكذلك ليس عيبا ف المنهج السلفى ان نجد فيه المخالفون ....فكلنا عصاه ...ونسأل الله أن يسترنا فوق الارض وتحت الارض ويوم العرض

هنا لينكات تبرئة السلفيين من هدم الاضرحة
وقطع الاذن " وهل قطع الاذن من حدود الاسلام أصلا؟؟؟؟

http://www.youm7.com/News.asp?NewsID=386861

http://aljazeeratalk.net/forum/showthread.php?t=327584

Haytham Kilany يقول...
أزال المؤلف هذا التعليق.
Haytham Kilany يقول...

رقم "3"

انا معاكى اننا مش لازم ندفن رأسنا فى التراب
والكل مخطىء وأولهم السلفيون
والاعلام الذى أخترع فزاعه السلفيون مخطىء
والحكومة والجيش الذين يتعاملون بمياصه مع الاحداث مخطؤن
والازهر وقياداته مخطؤن جدا جدا

نحن نحتاج الى قوه رادعه وقانون حازم
وحكومة لا تكيل بمكاييل




وف النهايه لا يسعنى ألا أن أقول

ربنا يعديها على خير "


انا هسجل هنا نظرة متشائمة - أدفن رأسى دائما منها فى التراب - أرجو ان تنشريها

********

أحب أقول أن الخروج على الحاكم " حراام ولا يجوز "


الحكم الشرعى ده النهاردة مش عاجب الناس
لكن بكرة بعد الخناقه الكبيرة بتاع انتخابات مجلس الشعب
وطعن الخاسرين فى الانتخابات

وكذلك انتخابات الرئاسه

وتوجه الجميع الى ميدان التحرير والمليونات اللى بدات ولن تنتهى

ساعتها ممكن ناس كتير تقتنع ان الخروج على الحاكم .....فعلا مصيبة

shimaa elkholy يقول...

انا كنت ناويه ارد عليك يا مهاترات عاقل كلمه بكلمه

لكن بعد الفقره الاخيره بتاعة الخروج عن الحاكم قررت اوفر صوابعي

مش تقليلا من قدرك ولا فكرك وانما لانى كل الى هاقوله سيذهب سدى وبالتالي مالوش لازمه

خليك سلفي او غير زي ما تحب ان تكون

انما يكون فى علمكم انا وملايين غيري مش هانسمح لاي بنى ادم بعد كده يحط سيف على رقابينا

القانون الى هايقره الشعب هايمشي على رقبة التخين فيها
ساعتها بقى ابقوا طلعوا افتاءات زي ما انتم عايزين

ومن فضلك فهمنى يعنى انك ممثلهم فى مصر حاليا

shimaa elkholy يقول...

فتاه من الصعيد

اولا شكرا على رايك فيا يا جميل والى كتير عليا

ثانيا واتمنى يحصل زي ما دايما بادعي
اللهم رد كيدهم الى نحرهم

shimaa elkholy يقول...

حلم بيعافر

يااااااااااااارب الفرج من عنده

يسمع منك ربنا

shimaa elkholy يقول...

رامي

يارب يا رامي

shimaa elkholy يقول...

سوني

انشاله ما سمعوا بقى هانعمل ايه

Haytham Kilany يقول...

السلام عليكم

شكرا لأنك وفرتى الرد " أو قد يكون مافيش رد لأنى تكلمت بكل موضوعيه وبلا تحيذ"

ثانيا : احنا ماحطيناش سيوف على رقبتك قبل كده .......لو حصل ...ممكن الدليل ؟؟!- من امتى والدول تحكم بالدين ....للأسف دة كان أيام الصحابه والتابعين

ثالثا : القانون اللى هيقرة الشعب هيمشى على رقبة التخين "
مش عارف انتى عرفتى أزاى أنى تخين"
***********************

رابعا : الناس اللى بتخترع افتائات زى ماهيه عايزة ...أكيد انا كمان هقولهم ...طلعوا أفتائات زى مانتوا عايزين


اظننا متفقين ف المبادىء العامه مختلفين ف المناهج


لذا .... من شروط تقبل الأخر
عدم تسفيه أو أحتقار أو سب
الكل يعرض بضاعته بلا تشويه فى بضاعه الأخرين



شكرا للسماح لى بالحوار
وأتشرف بزيارتك لمدونتى
الساخرة " مش سلفيه على فكره"
" مهارترات عاقل"

تامر علي يقول...

ما تتكلمي عنه يسمى لعبة التوازنات السياسية وهي لعبة ينجح فيها من لديه القدرة على إدارة الأزمه بشكل أفضل ففي المراحل الانتقالية كل شيء قابل للحدوث وكل الضغوط التي ذكرتيها صحيحة ويوجد أكثر منها وكذلك الداخلية وكلها تصب في بوتقة فشل الثورة ولكن في المقابل يوجد الارادة الشعبية والوعي العام المتيقظ لانجاح ثورته فيا تري مين اللي هيكسب ؟ :) نرجو ان يجعلنا الله من الفائزين واياكم :)

shimaa elkholy يقول...

مهاترات عاقل

يا سيدى انا مش قلتلك انى ما رديتش ووفرت صوابعي مش تقليل من قدرك ولا فكرك والله ولا تسفيه منه وانما عشان مالوش لازمها لكلام احنا مختلفين وسنظل ما دام ده فكره اصلك جبت معايا اخر الخط
الخروج على الحاكم
وبالنسبه لموضوع ان مافيش رد عندي
فحضرتك كده يبقى انت الى بتقلل مني وعامة مش مشكله خالص
لكن احب اقولك ان لو كلامك اقنعني يوم ما فى اي موضوع انا لا اجد غضاضه ابدا فى اعلان ذلك
ودي حاجه يعرفها عني كل الناس الى متابعنى مافيش اي مشكله بس المهم تقدر تقنعني يعنى

وبالنسبه لكلامك طبعا عندي ردود بس غير مجدي انى اقعد اعيد وازيد فى كلام تعبت اقوله

وبالنوسبه لحكاية التخن تقريبا قلبي حس عشان الحال من بعضه

وطبعا هاتشرف بمدوتك وازورها حتى لو كنت سلفي
بس اعذروني عندي ظروف الايام دي مش تمام اروق لكم ونزوركم كلكم ان شاء الله

تحياتي لك ونورت

shimaa elkholy يقول...

تامر علي
بالظبط الله يفتح عليك

ان شاء الله عندي امل فى ربنا كبير اننا ربنا يكرمنا بما بذلناه من دم وبما تذوقناه من ظلم ويجعلنا من الفائزين ان شاء الله

حمد الله على السلامه فينك

غير معرف يقول...

مش هتبطلى جدال يا ام مريم ..

مالهم السلفيين ؟؟ وبما انك عارفه يعنى ايه سلفى وبتميزيهم فياريت بدون غلط ..لان اى كلمه هتتحاسبى عليها .. واقضل شئ ليكى بصراحه خلى بالك من بيتك ومن اولادك وربيهم على طاعة الله ده اللى هينفعك دنيا واخره وسيبك بقى من التهييس بتاعك ده
دى نصيحه لوجه الله ومش اقصد بيها شن هجوم عليكى
ربنا يهدينا ويهديكى آمين يارب العالمين