الثلاثاء، 27 سبتمبر 2011

لقاء المدونين فى المنصوره الجمعه القادمه 30/9


اعزائي المدونين الشرفاء

ايون امال يعنى

يسعدني ويشرفكم انه فى يوم الجمعه والموافق 30/9/2011  سوف يكون يوم لقاء مدونين بالمنصوره

اينعم افرحوا وهللوا بقى هانستضيفكم عندنا

ان شاء الله تنورونا يا جماعه ونشوفكم وانا فرحانه اوي عشان ده اول لقاء بعد الثوره مش عارفه هانعمل ايه من غير مندوب امن الدوله الى كان بيبقى معانا كل مره

ولو انهم لسه موجوديييييييين يعنى  بس يشرفونا عادي

برنامج اليوم هايكون كالآتي

هانتقابل ان شاء الله كبداية فى كافيه هاي لايت الى قدام بوابة الجامعه الرئيسيه طوال
الناس الى حضروا معانا اللقاء الى قبل الى فات كنا روحنا هناك  كافيه لطيف وهادي وكده

هانقعد شويه ونشرب الشاي وناكل الكيييييك ايون وبعدين الى هاينزل يصلي الجمعه ينزل يصلي ويرجعولنا

بعدين ننزل نتغدى فى اي مكان بقى الى هانتفق عليه  نتغدى في الشارع كله مليان مطاعم من كل الانواع

بعد كده ان شاء الله هانروح على نادي الكهربا ..نادي هادي وجميل ونضيف وعلى النيل وان شاء الله يعجبكم

وان شاء الله نحاول نروح دار ابن لقمان او نركب مركب فى النيل او الاثنين معا حسب الوقت والتساهيل

طبعا انا وباقي مدونين المنصوره  هانكون فى الكافيه من الساعه عشره وتشرفونا بقى وقتما تشاءوا

هايكون معايا يومها تليفون اللقاءات

0126379796

هافتحه شويه يوم الخميس  اخر النهار عشان الى عايز يستفسر عن حاجه للطريق او كده
وبعد كده اول ما اصحي يوم الجمعه هافتحه بقى لباقي اليوم

اي حد يتوه او يحب يعرف احنا فين يتصل علينا وان شاء الله يوصلنا فى سلام

انا عارفه ان فى مليونيه يومها طبعا الى رايح المليونيه ربنا معاه وقلبنا معاه  والى مش رايح يجى هناااااا وهو ساكت بقى

ومش عارفه انا عندي احساس كده انه هايبقى يوم حلو ان شاء الله  اتمنى تشرفونا عايزه اشوفكم كلكم

تحياتي لكم ايها المدونون الشرفاء

والله الموفق

هناك 14 تعليقًا:

غير معرف يقول...

عايزين نروح نادي بني عبيد

والغدا بط

وبلاش كيك خليها كحك

هوا الصراحه مش جاي بس بغتت يعني

shimaa elkholy يقول...

البط والكحك موجودين بس بنى عبيد لا اون ماي بادي هههههههههههههه

يعنى انا اساسا محرجه من يومها اجي اقولك والله

وطبعا كنا نتمنى تكون منورنا

قدر الله وما شاء فعل ربنا معاك يا استاذنا

الـسـيـدة نـون يقول...

هاتعمليلي كيكة شكولاتة لو جيت ؟

mayada يقول...

اعمل فيكي ايه ياحجة انت بتنشني يافالحة ههههههههههههههه
ماتشوفيلي يوم غير الجمعة ولو فاتيما جت انا هنتحر من فوق السرير بس بقي علشان مش هعرف اجي
ان شاء الله يكون لقاء فله ياام مريم

فاتيما يقول...

كيكة
انتى بتقولى كيكة

أخخخخخخخخخخخخخخ

مش جاية برضو

يااخواننا المدونين الشرفاء هنا وهناك
بيهيبوا بيكم
لما أى حد يعمل لقاء ف الأيام الفحلوقى اللى احنا فيها دى ...
وحياة النبى يبعد عن يوم الجمعة
الله يكرمكم ...
عشان بعضى بيمزق بعضى
ومينفعش مروحش التحرير ف ايام زنقة زى دى ...
ومينفعش كمان ابقى عاوزة اشوفكم
وانحرم من اللقاءات دى
بكيكها اللى بالشكلاتة كمان ؟!!!


ان شاء الله ربنا يوفقكم
ويبقى يوم سعيد عليكم
وتنبسطوا


معلش يا ميودة ...
تتعوض
وان شاء الله اجيلكم ف مرة تانية

سلامى لكل اهل المنصورة وضواحيها

وبحبكم يا عيااااااال

shimaa elkholy يقول...

نوراااااااان اه والله هاعمل كيكه بالشيكولاته هاستناكي بقى

shimaa elkholy يقول...

مياده

ليه بقى يا ستى ماهو لازم الجمعه عشان كل الناس بتبقى اجااااااازه الا انتى

طب تعالي كده فى ايتها حته من الحتت احنا قاعدين طول اليوم يعنى

shimaa elkholy يقول...

فاتيما والله محددين الموضوع ما كانش لسه فى دعوه لمليونيات

وبعدين انتى عارفه ان اختك واخده حبس مشدد فى موضوع المليونيات

عامة يا ريتنا كلنا نعرف نيجى معاكي

ولو انا مكانك كنت هاروح التحرير

تسلمى يا جميل

مونتي بوكيه ورد يقول...

يا جماعه متسمعوش كلام فاتيما احنا مش بنهيب بيكم احنا نفسنا نخلي فاتميا تشارك معانا في جو تحرير المنصورة وهي مصممه تناضل في مكانها .. يرضيكوا كدا ال يقدر يخظفها ويجيبها هنا يجيبها واحنا هندفع الفديه الكيك والبط وكل حاجه :))

snohe يقول...

ممكن احضر اللقاء؟

shimaa elkholy يقول...

متولي

والله لولا حكاية التحرير انا كنت روحت جبتها انا من هنا ك

shimaa elkholy يقول...

سنوهي


طبعا تشرفنا يا فندم

واعتقد حضرتك الى كلمتنى من شويه
ان شاء الله فى انتظار صباحا

Unknown يقول...

ايه الحظ دا يعنى بقالى أربع خمس سنين بدون وجمبكم وبتعملوا لقاءات من غيرى ..حظى كدا دايما متأخر :(

shimaa elkholy يقول...

د مصطفى

طب ما شرفتناش ليه يا دوك ؟

ملحوقه ان شاء الله تنورنا دايما فى اللقاءات