الخميس، 19 يناير، 2012

كده وكده



الصوره دي من تويتر طبعا وكلمه ليا كتبتها من فتره
ايوه هى دي الحقيقه

المجلس العسكري عايز يسلم السلطه كده وكده

وده مش اختراعات ولا انا بافتري عليه وانما هى تصريحات لما تجمعها على بعض تطلع كده فى الاخر

الاخوان بعد عقدوا الصفقه اتمام كالعاده مع المجلس العسكري .. مش عايزه تنصل من الصفقات هى شيم السياسيين ولا انتم مش بتلعبوا سياسه يا اخوان ؟

المهم بعد اتمام الصفقه راح الاخوان ساقوا فيها وقالك هانشيل وزاره ونحط وزراه وهانعمل ونسوي قام المجلس العسكري قالك عنددددددك مين ده ؟
وكالعاده نفس القلم بعد كل صفقه ... مجلس الشعب القادم هو مجلس تشريعى شكل لمهمه واحده هى اختيار اللجنه التاسيسيه وسن القوانين وليس من حقه حل الوزاره ... شكرااااا ادي مجلس شعب غير كامل الصلاحيات

طب اللجنه التاسيسيه : قالك لا ماهو احنا لازم نحط وثيقه اللجنه الدستوريه تمشي فى حزاها كده عشان برضه مش معقول نسيب دستور البلد يكتبه عدة اشخاص  على اساس ان العدة اشخاص دول عيال حافيه بتلعب فى الشارع الى ورانا مش لجنه تاسيسيه منتخبه او مختاره من برلمان منتخب من الشعب ولا ايتها حاجه
يبقى كمان اللجنه التاسيسيه غير كاملة الصلاحيات شكراااااااا برضه

طب رئيس الجمهوريه ... ااااه لا ده بقى احنا لازم نحد من سلطاته بموجب الدستور والقانون الجديد ايوووون امااااااااال حتى لا نخلق ديكتاتورا جديدا امااااااااااال ديموقراطيه يا جدعان
يلا بالشفا وكماااان رئيس جمهوريه بلا صلاحيات كامله  نفس الشكراااااااا

وطبعا طبعا الوزاره  اونكل جنزوري ملك الصلاحيات فى الارض الواقع بيقول ان هو كمان بلا صلاحيات كامله
حتى وزير بتروله خرج يقول مافيش ازمة بترول ..واتضح ان كل محطات البنزين عمو الى هناك بيقول للشعب ان ما عندوش بنزين وهو عنده جوه

يبقى نخرج من ده كله بايه ؟؟ ان احنا اصلا عملنا ثوره كده وكده تقريبا ... او ثوره فوتو شوب

وان المجلس العسكري بياخدنا على اد عقلنا ويقولنا ماشي اعملوا برلمان وانتخابات ومثلوا كده مع بعض يا ولاد والعبوا لعبة الديموقراطيه زي ما كنتم بتلعبوا بابا وماما زمان بس فى الاخر الحكم بتاعي

يكونش المجلس العسكري فاكر اننا خرجنا فى ثوره وولادنا دمهم ساح فى الميادين على يدك كلابهم عشان نشيله جمال مبارك من سكته ونديهاله على طبق من دهب ؟؟

طيب يسقط يسقط حكم العسكر ... مش هانسيبكم تركبونا تاني .. لازم تفهموا ان العهد ده ولى ومضى


لاقتناعي الشديد فى اننا بنعمل ديموقراطيه كده وكده انا ما صدمتش ولا اتفاجئت بانسحاب البرادعي وانا صورتلكم التويته عشان فى ناس عجيبة الدماغ قالتلى انتم قلتم كده بعد تنحي البرادعي التويته الى فوق دي عليها التاريخ ياريت نفهم ان انا وناس كتير لسنا اتباع البرادعي وانما احنا انصاره فى الحق ان شاء الله وما زلت اكن للرجل كل احترام وتقدير وتاييد لمواقفه

انا شاركت فى الانتخابات  سواء بالتصويت او بالمشاركه فى حملة الثوره مستمره
رغم انى عارفه انه هايبقى مجلس شعب كده وكده لكن شاركت لان المقاطعه لن تزيد الامر الا سوءا .. احنا قاطعنا سنين طويله وما عملناش حاجه برضه والمره دي مضطرين نخلينا مع الكداب لحد باب الدار ومش ضامنين ايه الى ممكن يحصل بكره كمان

فى النهايه احب اقول للجميع مش للمجلس العسكري بس .. احترسوا

الثوار راجعين يوم 25

هناك 8 تعليقات:

الازهرى يقول...

مشكلة الإخوان زى مشكلة كل البلد من أحزاب وخلافه
القيادات وتغييب العقل
بياخدوا القرارات ويطبقوها ويقنعوا بيها اللى تحتهم واللى تحت تحتهم

وأكبر مثال بسيط على كده
كنت بأتناقش مع محامى منهم رجل قانون ضليع من شهر تقريبا
وكان مقتنع تماما
إن دستور 71 ما زال يعمل ولم يسقط

فاتيما يقول...

معاكى يا صبصب

صباح الفل الأاول
صباح كيكة الشكولاتة اللى وحشتنى
عشان عمايل إيدك
وبنفسك الحلو ...


نخش ع البوست

متفقة معاكى جدااااا
ان المجلس معتبر الثورة دى فوتوشوب
بس احنا بقى
الشعب
او الثائرين منه ...
مش معتبرينها كدا بالمرة

الاخوان وأى متسلق زيهم
والفلول وغيرهم وغيرهم

كل دول ف ضفة نهر
واحنا ع الضفة التانية
والمواجهة موجودة
وهتفضل
لحد ما طرف م الاتنين يحكم سيطرته
ويفرض نفوذه ع النهر اللى بينهم
لأنه مينفعش يبقى بينا احنا الاتنين
احنا عاوزين نعيش ونروى ونصطاد ونعمر ..
وهما عاوزين يرموا فيه الزبالة ويسرقوا خيره ويجففوه ...

خلاص
هيا كدا خلصت
وكل شىء انكشفن وبان

اللعب ع المكشوف
ولهذا

كدا وكدا دى عندهم بس
وحتى انكشفت خلاص


اللى مش سايف تصرفاتهم
خايف
او لسه بيعانى من داء الخنوع
او عبد لا يريد ان يتحرر
او منتفع
او معرفش اقول ايه تانى ..!!


البرادعى بقى
انا والنبى قولت للعيال كدا
آخر مرة ف البورصة
قولتلهم انسحابه دلوقتى
ضره هوه اكتر مننا احنا اللى كنا واره
انا شخصياً بحترمه جداااا
بس مش بحب حذره
و شيفاه مفكر ملهم ..لكن مش زعيم
واحنا عاوزين حد كبير

مش عشان احنا صغيرين
لأ
احنا عاوزين الشباب يبقى بيقاتل ف الميادين و بيفرض كلمته ف الشوارع
والكبار اللى زى البرادعى وغيره يتكلموا ويتفاوضوا بالسياسة ف الغرف المكيفة ..

محدش قاله يتمرمط ف الشارع
لكن يبقى ع الأقل
على مستوى الحدث
يبقى موازى
مراية لينا
ميبقاش الناس بتموت
و الحقوق ف بق العسكر
وهوه يقول القواعد مش عاجبنى
واللعبة ابصر ايه ....

انا قولت للعيال كدا
جايز كنت اقبل منه التصرف دا
يوم 25 اللى فات ...
لما كان لسه محدش فاق وقام ونزل الشارع شايل روحه على كفه وبيقدم تضحيات

كان مكن أقبل دا

لكن النهاردة
الكلام دا أقل بكتييييييييير
من المنتظر منه

بإختصاااار
ملوش دلوقتى حجة

البرادعى دلوقتى
هوه اللى متأخر عننا بخطوة
بعد ما كان سابقنا زمان

ولهذا بعمل زيك
وأقول

احنا ورا الثورة
مش ورا البرادعى كشخص

لما كان ف قلب الثورة ..معاه
لما ياخد جنب او يتردد او يناور ...

مع السلامة
معطلكش

يعنى هوه اول مرة يعرف
ان انتخابات الرياسة هتبقى تمثيلية ؟!!!

مهى باينة من اول انتخابات مجلس الشعب المسخرة ...

ولهذا قاطعتها
مقاطعة أى حاجة تحصل ...
تحت اشراف العسكر
لأننا وكأننا ايام مبارك ..تمام


صباح الورد والياسمين
ع التكعيبة
واصحابها

وحشتينى قوى
وبوسيلى البناتيت
وسلامى لرضا الغالى

مصري جدا يقول...

يحترسوا أو لا يحترسوا

كل الفساد لابد أن يظهر لكي يجتث

ندى الياسمين يقول...

ازهري

اه معاك فى حكاية القيادات لكن السؤال هل هما قيادات مخلصه فعلا ؟؟ انا شايفه انه لا
وبالنسبه لدستور 71 شرعا هو سقط لكن فعلا هما بيطبقوا الى انيل منه علينا دلوقتي

ندى الياسمين يقول...

فاتيما؟؟

ده بجد وبحق وحقيق ؟؟ وحشااااااااني اووووووووي اوووووووي يا جميل وان شاء الله اعمل لقاء لما الجو يتحسن ونجيبك بالقووووه :)))

بالنسبه لكلامك انا شايفه ان البرادعي مش قال انا منسحب وانما قال انه منسحب من انتخابات الرئاسه وراجع للثوره

والله رجع للثوره اهلا به ولو ما رجعش خالص مش مشكله مكملين احنا

انا قلتلهم يوم ما انسحب جمله واحده بس وقلتلهم قيسوا عليها

من كان يعبد محمد فان محمد قد مات ومن كان يعبد الله فان الله حي لا يموت

الثوره باقيه الى مؤمن بالثوره مش محتاج البرادعي ولا غيره محتاج بس ايمانه بثورته

وبالنسبه للعسكر هانظبطهم ان شاء الله :))

ندى الياسمين يقول...

مصري جدا

اينعمممممم ان شاء الله هانجيبه من جدوووره نورت يا فندم

غير معرف يقول...

ثقافة الهزيمة .. عصابة البقرة الضاحكة 6‏

و فى حوار مع القيادى الأخوانى إبراهيم صلاح المقيم فى سويسرا منذ عام 1957 و نشرته جريدة المصرى اليوم فى 23 إبريل 2011 جاء فيه:

وما صحة ما بعض المواقع من أخبار عن رفض سويسرا عرضاً مصرياً لشراء بنادق قناصة وقت الثورة؟
- حدث بالفعل وحكاها لى أحد رجال المخابرات السويسريين فى حضور عدد من الشخصيات العامة، وقال أنه بعد أندلاع الثورة بيومين تقدم السفير المصرى فى سويسرا مجدى شعراوى، وهو صديق مقرب من «مبارك»، بطلب للحكومة السويسرية لشراء عدة آلاف من بنادق القناصة سويسرية الصنع بها تليسكوب يقرب لمسافة 1000 - 1500 متر، وجهاز يحدد المنطقة المطلوب أصابتها، وجهاز رؤية ليلية ويتم التصويب بدقة الليزر، وذخيرة مخصوصة وهى لا تُحمل باليد، ولكن لابد من تثبيتها على قاعدة ويُقدر سعر البندقية الواحدة بنحو 4000 دولار، ولكن الحكومة السويسرية رفضت الطلب.

الحكومة السويسرية أدركت كيف سيتم أستخدام تلك البنادق، وبالتالى رفضت أن يكون لها أى دور فى تلك العملية. و تحت عنوان " لواء شرطة : مبارك كان يتسلى بالشرائط الجنسية للفنانات" ...

باقى المقال فى الرابط التالى www.ouregypt.us

و المقال به معلومات هامة عن عمر سليمان.

غير معرف يقول...

ثقافة الهزيمة .. الناس اللى فوق و الناس اللى تحت

و نشرت جريدة المصرى اليوم فى 17 فبراير 2012 فى برنامج «محطة مصر» للإعلامى معتز مطر على قناة «مودرن حرية» وجه النائب أبوالعز الحريرى اتهاماً لأحد كبار أعضاء المجلس العسكرى بالتورط فى تهريب 4 مليارات دولار للخارج، وقال إن إحدى الشخصيات تقدمت ببلاغ رسمى عن وجود 15 مليار دولار «أموالاً قذرة» فى البنك المركزى، وقدمته لعدة جهات من بينها المخابرات الحربية التى أخبرته بأنه تمت إحالة البلاغ لأحد كبار أعضاء المجلس، وبعد عدة أيام فوجئت بخروج 4 مليارات دولار من هذا المبلغ خارج مصر،

وأضاف «الحريرى» أنه يتقدم باستجواب للمشير حسين طنطاوى حول هذا الموضوع، إلى جانب استجواب آخر حول المصرف العربى الذى وصفه بـ«المصرف الملعون»، لأنه «مغسلة للأموال القذرة» فى مصر، ويتربح منه المسؤولون منذ عام 1974، ولا توجد رقابة عليه، وتتعمد وحدة مكافحة غسل الأموال بالبنك المركزى تجاهله تماماً ...باقى المقال فى الرابط التالى

www.ouregypt.us